قصة اللوحة الحلقة الرابعة
اللوحة
الراوى
الحلقة الرابعة
بعد ما اللوحه رجعت مكانها وقالتلي انت اللي هتنقذني يا كريم .
قمت وقفت واتحركت في اتجاه اللوحه وقفت قدامها واول مره مكنش خايف منها ..
واتبدل شعور الخوف بمشاعر مش مفهومة !!
( قلق /توتر /شفقة /عطف /حيرة) كلها داخله في بعض
بس المهم انى مكنتش خايف وقتها
وقلتلها...
" يعني انت انسانة عايشة شبهنا"
قالتلي " انا انسانه اه" " بس عايشه شباهكوا لا "
انا جسم محبوس من سنين طويلة وروح بتدور عليك عشان تنقذني، قلتلها انقذك ازاي؟؟
وليه؟ واشمعنا انا اصلا؟؟
قالتلي والابتسامة على وشها...
اشمعنا انت؟
فالسؤال ده انا اللي لازم اسالهولك اشمعنا انت اللي اشتريت اللوحه ؟؟
اما ليه؟؟
فعشان لازم تنقذني يا كريم !
اما ازاي؟؟؟
فأنا هاقولك طلاسم تقراها واول ما تقولها هتبقى في عالم الجن و هناك هتلاقيني..
بدات مشاعر الخوف ترجعلي تانى وقلتلها انا مش هعمل كده،انا اكيد بيتهيئلي، وانتى اكيد مجرد وهم....
لقيت الابتسامة اختفت، ووشها كشر وطلع بره البرواز....
وقالتلي
""الوهم ده اللي هتفضل عايش فيه طول حياتك لو ما نفذتش كلامى ""
وقعت على ارض من خوفي وطلعت اجري بره الاوضه ،لقيت اختي اسمها بتقولي مالك يا كريم بتجري ليه ؟! فكرت اني اقوللها على كل حاجه، بس خفت لتقول عليا مجنون او خفت عليها لو عرفت يحصللها حاجه، قلتلها تقريبا شفت صرصارفي الاوضة،ضحكت وقالتلي مش عيب لما تكون كبير كده وخايف من صرصار، فضلت ساكت وباصصلها وقلتلها عندك حق..
وانتى ايه اللي مصحيك لحد دلوقتى؟
قالتلي هتفرج شوية عالتلفزيون وهنام،
سبتها وكنت خايف اخش الاوضه بعد اللي شوفته وخايف اقعد معاها ويبان عليا حاجه رحت دخلت الحمام وبعد نصف ساعه طلعت قعدت معاها نتفرج عالتلفزيون وكل شويه ابص على الاوضة و حاسس انها هتطلع من الاوضة في اي وقت
لقيت اسماء لاحظت توترى وقالتلى مالك يا ابني؟؟
قلتلها مفيش حاجة
قالتلي خلاص انا بكره رايحه فرح صاحبتي لو اتاخرت ابقى تعالى خذني من هناك، ديرت وشي وقلتلها متتأخريش عشان ممكن مكنش فاضي..
لقيتها قالتلي بصوت مختلف تماما...
""لازم تاخذني من هناك يا كريم""
ببص لقيت عائنة هي اللي قاعده جنبي مكان اسماء
واسماء مش موجوده قمت بسرعه من مكاني وفضلت مبرق
قالتلي مالك ياكريم في ايه ؟؟
ولسه بتقوم من مكانها طلعت اجرى واتكعبلت فى الترابيزة لقيت اسماء اختي هي اللي بتقومني وبتقولي مالك؟؟
قمت مره واحده وجريت ليه؟ في ايه ؟
قمت وانا باصصلها ومسكت وشها عشان اتاكد انها اختي
قالتلي اقعد يا كريم وقولي مالك؟ قررت ساعتها انى احكلها حتى لو حاجة بسيطة من اللى بيحصل قلتلها اني بقالي يومين بشوف تهيؤات وحاسس اني تعبان،قالتلي اسماء انا حسيت بكده لما كنت بتزعق في الاوضه ،وده طبيعي بسبب ضغط الشغل والكليه والخطوبه والمسئوليه والسهر وانت مش متعود عليه
لازم تريح دماغك و تريح اعصابك..
عملت نفسي مصدق كلامها وقلتلها تمام خشي نامي بقى عشان انا هنام هنا، قالتلي ما تنام في اوضتك قلتلها سيبني على راحتي و نمت عالكنبة برا ورحت فالنوم ولقيت امى بتصحيني الصبح وبتقولي ايه اللي نيمك هنا قوم نام في اوضتك قلتلها لا انا خلاص صحيت،
دخلت الاوضه اجيب هدومي عشان ادخل الحمام و لقيت اللوحه مكانها ثابتة اخذت دش وفطرت معاهم وكلمت عمر عشان اروح اطمئن عليه لأنى سبته ومشيت امبارح
وانا نازل على السلم لقيت جارتنا بتقولي "معلش يا كريم وانت نازل ابقى سيب باب الشارع مفتوح عشان شكل في قطة محبوسة من امبارح في الحوش"
قلتلها حاضر قالتلي "محبوسه بقلها 50 سنه يا كريم "
ببص لقيت جارتنا اتحولت لعائنة وهي اللي بتكلمني...
برقتلها ومتكلمتش عشان متفتكرش انى مجنون
فضلت متحكم في اعصابي لحد ملقيت عائنة ضحكتلي واتحولت لجارتنا تانى وقالتلي ماشي يا ابني ربنا يباركلك،
سبتها ونزلت وانا ماشي فالشارع كنت بتخيل عائنة ماشية حوليا فى كل حتة،مره بتعدي الشارع،مره واقفه فالبلكونة،ومرة راكبه عربية....
وكانت دايما بتبصلي وتبتسم لحد ما رحت لعمر فالبيت،لقيت صابر اخوه فتحلي،سألته علي عمر قالي جوه ادخله،وانا داخل لقيت صابر بيقولى ""هو جوه متسلسل ولازم تنقذوه"" بلف وشى لقيت عائنة هي اللي واقفه وبتبسم....
بدأت احس انى عايش فى الوهم....
سبتها ودخلت لعمر لقيته قاعد سلمت عليها ولاحظ انى متوتر وسألني مالك؟ وقلتله سيبك مني انا انت اخبارك ايه؟ مش احسن من امبارح الحمد لله
قالي اه الحمد لله،وقعدت معه حوالي ساعتين،وقعد يتكلم معايا ومحصلش حاجه وانا معاه ونزلت كلمت شهد كانت في الكليه عديت عليها قعدنا مع بعض شويه ولقيتها بتسألنى..
"هو لو في بيموت وانت في يدك تنقذوا هتنقذه ولا هتسيبه يموت؟؟"
قلتلها هنقذه طبعا،قالتلي حتى لو في خطر على حياتك؟؟؟
قلتلها اه حتى لو فيه خطر...
ابتسمت وقالتلي انا كنت متأكدة،
وعينيها بدأت تلمع اوى،وانا مركز في عينيها لقيت التليفون بيرن ببص لقيت شهد بتتصل
اللى انا قاعد معاها دى مش شهد !!!
واكتشفت ان عائنة هى اللي قاعده معايا دلوقتى
ولقيتها بتقولي رد يا كريم على خطيبتك وروح قضى معاها اليوم خلاص انا مش هظهرلك تاني وبالليل حضر نفسك..
لسه بقولها احضر نفسي لأيه؟؟
لقيتها اختفت...
وفعلا رحت لشهد قضيت يومى معاها ورجعت بالليل على اوضتى دخلت وطفيت النور وقاعد على السرير باصص للوحة مستنيها تتكلم وفعلا ضحكت اوي وقالتلى انت باصصلى اوي ليه كده ؟؟
قلتلها انتى عايزاني احضر نفسي ليه؟
راحت مكشره وقالتلي لعالم الجن عشان تنقذني ...
قلتلها انا لسه ماوافقتش اصلا
قالتلي انت خائف من ايه يا كريم
انا روحي هتبقى معك هناك خطوه بخطوه وانا حافظه العالم ده كويس جدا واكيد مش هضرك يعنى،بس انا بقالي 50 سنه محبوسه،حتى الموت مش عارفة اموت يا كريم ....
سكت شويه و كان باين عليا اني بفكر
قالتلي خلاص اعتبرني ما طلبتش منك حاجه،وخذ البرواز وارميه وكأنك مشفتنيش ،قلتلها يعني لو رميت البرواز دلوقتى انتى مش هتأذينى
قالتلي" لا " "ولا هتشوفني تاني"
وفعلا مسكت البرواز وكنت هرميه او بصراحه كان عندي فضول اعرف هتعمل ايه ؟
وانا شايل البرواز ببص عليها لقيتها بتعيط،نزلت اللوحه على الارض و قلتلها هو انا لو ما رحتش طلعتك هتفضلي هناك اد ايه ؟؟
قالتلي معرفش انا حتى جسمى مابيكبرش ومابتعبش عشان احلم انى اموت وارتاح ...
قلتلها خلاص يا عائنة انا هروح هناك عشانك ،
ابتسمت وقالتلي وانا هعيش حياتي كلها ليك لو فعلت عملت كده..
قلتلها طب هروح ازاي عالم الجن؟
وهعمل ايه هناك ؟؟
قالتلى متقلقش انت هتقرا التعاويذ اللي هقولك عليها وبمجرد ما تخلص هتبقى هناك،وروحي هتكون معك وهقولك تعمل ايه
قلتلها "ماشي"
ابتسمت وقالتلي قول ورايا......
وفضلت تقول كلام غريب وانا اقول وراها وفي لحظه لقيت نفسي ........
يتبع......
اللوحة
الراوى
التعليقات على الموضوع