قصة الشقة اللي قصادنا
الشقه الي قصادنا ...
تأليف :عبدالله شوقي ...✒📓❤
ارجوا الدعاء لامي بالرحمه والمغفرة ❤
احيانا العشم ومساعدة الغير تدخلك في سكك انت مش حاببها وفي غني عنها وساعات ينتهي بيك الامر للندم بس يفيد بايه الندم لما الوقت يعدي ...
انا اسمي سامح ...سبت بيت العيله الي اتربيت فيه بعد وفاه والدي ووالدتي وسيبته لاخواتي تقدروا تقولوا نوع من انواع الأعتماد علي النفس واني اشوف هل ينفع اقدر افتح بيت ولا مقدرش وأهو خطوة جديدة والحياه تجارب زي ما بيتقال ...
وفعلا فضلت ادور وابحث علي شقه تلمني وفعلا لقيتها وكانت بسعر حنين وكمان كانت قريبه من بيت العيله يعني جمب اخواتي لو احتاجت اروحلهم او يجولي المشوار مش بعيد .....
اخدت كل متعلقاتي واي حاجه تخصني وبدات احطها في الشقه وحاجه ورا التانيه والشقه ظبطت ...
الشقه كانت في عمارة مكونه من 7 ادوار وليها بواب اسمه عم فضل والاوضه بتاعه تحت السلم وهو راجل في حاله مش بتاع قيل وقال ويحشر مناخيرة في كل حاجه
والدور الاول محلات واغلب شغلها بالنهار
العمارة بنظام الشقق الي قصاد بعض يعني الدور فيه شقتين وانا شقتي كانت في الدور الرابع ...
وفي يوم توضيب كبير وتنضيف وغيرة وانا بحط سله الزباله قصاد الباب لاحظت ان باب الشقه الي قصادى بيتقفل
كأن حد كان برا ولسي داخل ...محطيتش في بالي ودخلت شغلت التليفزيون اتفرج عليه والنوم كبس عليا ودخلت نمت ....
صحيت علي صوت خبط في الجدار جاي من الشقه الي قصادي ...حاولت اتجاهل الصوت كذا مرة وكان الصوت كل شويه يزيد عن الاول ....قومت قعدت علي السرير وولعت النور وبصيت في ساعتي لقيتها 2 ونص بليل ....
قولت في بالي اي الناس الي معندهاش زوق وتخبط في وقت زي دة ....
قولت اقعد في الصاله علي ما يمكن الخبط يخلص واقدر اكمل نوم ...ولكن الصوت موقفش ...فضل مستمر
اتحركت وفتحت الباب وروحت للشقه الي قصادي ...خبطت مرة والتانيه فتحت لي واحد في الثلاثينات من عمرها وبصالي باستغراب ولسي هنطق واتكلم لقيتها بتقولي
نعم ....خير !!!...اظن ان دة مش توقيت تخبط علي حد فيه
رديت وقولت ..
واظن برضوا ان دة مش وقت ان حد يخبط في الحيطان في ساعه زي دى ...الناس من حقها تنام ..
دة انت بتبجح بقي ....طب اتفضل احسنلك علشان مطلبلكش البوليس
وقامت رزعت الباب في وشي ...
مبقيتش فاهم ولا عارف العيب مني ولا منها ولا اي الاسلوب دة ...وقتها لساني اتشل معرفتش ارد ولا اتكلم خدت بعضي ودخلت شقتي ورجعت الاوضه وكان الخبط وقف قولت في بالي بدايتها بانت من اولها ربنا يستر ....
وكملت نومي وتاني يوم صحيت وروحت الشغل ورجعت
علي العصر وانا راجع قابلت عم فضل علي السلم.....
ازيك يا سامح باشا ....
اهلا ياعم فضل ....صحيح بقولك اي !
اؤمر ...
هو اي الست الي في شقه للي قصادي دي !
ااااه الست ميرفت !
معرفش اسمها
ايوة مهي اسمها الست ميرفت احسنلك يباشا ابعد عنها دى ست شرانيه وبتاعه حوارات والكل في العمارة بيتقي شرها سواء الي تعامل او متعاملش معاها ...
دي عماله ترزع في الحيطه امبارح انا حسيت ان الخبط في دماغي انا ....
اقولك اي بس يباشا ...معلش نام في اوضه تانيه واقصر الشر معلش علشاني انا ....
تمام ياعم فضل ...
سبت عم فضل وطلعت الشقه وغيرت هدومي ودخلت المبطخ اعملي لقمه وانا واقف في المطبخ عيني جت علي الشباك الي قصادي في المنور لقيتها واقفه وبتبصلي وتضحك ....قفلت الشابك في وشها ....الصراحه انا مبقيتش طايقها من ساعه الي عملته امبارح ...
خلصت ونزلت قضيت مشاويري ورجعت هلكان اترميت علي السرير ..صحيت علي صوت حد بيتألم وصوت كأن حد بيرجع ....والصوت اتحول لصوت حشرجه وحد بيقول الحقوني ولكنه كان صوت واطي جدا ....
قربت من كل الشبابيك علشان اعرف مصدر الصوت وعرفت ان الصوت جاي من شقتها هي ...شقه ميرفت ..
جريت علي شقتها وفضلت اخبط وانادي عليها وارن الجرس ولكنها مش بترد ...حاولت اكسر الباب مرة واتنين ولكن التالته فتح معايا ....لقيتها مرميه في ارضيه الطرقه الي بين الحمام والمطبخ مغمي عليها .....شيلتها ونيمتها علي الكنبه وحاولت افوقها وبعد فترة فاقت ....
استغربت من وجودي وكانت لسي هتبدا تغلط ...
فهمتها الي حصل ....ولكن مفرقش كتير ...بعد كل الي عملتوا طردتني من الشقه ....رجعت شقتي وقعدت مش طايقها ولا طايق نفسي وخدت قرار انها لو بتموت قصادي مش معبرها وزي ماتيجي تيجي ....
ورجعت شقتي وعملت كوبايه شاي ووقفت في البلكونه وفضلت افكر ان ادد اي الست الي قصادي دماغها غريبه حتي تعمل كدة مع حد بيقدملها خدمه ولا معروف ...سبحان الله بجد ...
دخلت الاوضه ونمت ...صحيت قبل الفجر بنص ساعه وواقف في المطبخ لقيت نور شمع منور في الحمام وميرفت واقفه قصاد المرايه وبتعيط وبتقص شعرها ومرة واحده اتحولت تحول جزري ولقيتها بقت بتضحك بهستيريا شديدة
ومرة واحد اتلفتت وبصتلي وكانت عينها بيضه واسنانها مدببه زي انياب الوحش ....انا من خوفي قفلت الشابك ودخلت جوة لدرجه اني خوفت انزل اصلي الفجر وصليته في الشقه يومها ...
انا فاكر اني فضلت سهران ومطبق اليوم دة كله وروحت الشغل بدري ومكنتش مركز نهائي ومديري في الشغل لاحظ دة عليا ....
خلصت الشغل وفضلت الف واتمشي كتير علشان اتعب واروح انام علطول مش حمل اشوف حد ولا حاجه تانيه لاني من وقتها وانا اعصابي سيابه ...
رجعت الشقه علي المغرب وانا شامم ريحه وحشه اول ماوصلت للدور الرابع ....فتحت شقتي ودخلت اترميت علي السرير وطفيت كل انوار شقتي ونمت ...
قلقت علي صوت حد ماشي برا في الصاله بخطوات منتظمه بعدها بشويه حسيت ان مبقاش واحد لكن الي ماشي دة اكتر من حد وصوت الخطوات اتغير لصوت همس والهم بقي ممزوج معاه ريحه دخان كان فيه حاجه محروقه ...بدات احس في جسمي بقشعره وهزة خفيفه ...
استعزت بالله وبدات اتحرك من مكاني بهدوء حاسس اني شايف حجات في الضلمه ...لا دة مش احساس دة اكيد ...لسي بحط ايدي تحت المخدة علشان اجيب الموبايل وانور بيه لقيت ايد مسكتني من تحت المخدة ....
اتفزعت وقومت جريت من مكاني سمعت صوت هبدة من المطبخ واصوات كوبيات واطباق اتكسرت ...
ولعت نور الشقه كلها ودخلت المطبخ في حذر ولكن مالقيتش اي حاجه ....
مبقيتش عارف اعمل اي ....اول حاجه جت في بالي اني اشغل الراديو علي اذاعه القران الكريم ...وقتها حسين بطمئنينه وهدوء بعض الشئ ...
وقعدت علي الكنبه وفضلت افكر في الي حصل ...وانا في كامل تركيزي سمعت صوت قطط بتتخانق علي السلم فزعتني من مكاني ...جريت علي الباب وبصيت من العين السحريه لقيت ميرفت واقفه قصاد باب شقتي وبتبص في المرايا وبتضحكلي بعنيها البيضه وفي ايدها المقص ....
دخلت جوة وانا برتجف من الرعب لقيت خراج من الاوضه شخص معمض عينه ملفوف في ورق لونه رمادي وبدا يتحرك في ارجاء الصاله في ثبات وهو مغمض عينه لحد مادخل في جدار من الجدران بسلاسه واختفي ....
بعدها دخلت غيرت هدومي ونزلت جري من الشقه زي المجنون
ومش عارف هروح علي فين ولا هعمل اي !
نزلت قعدت قصاد جامع المنطقه لحد الفجر ودخلت الجامع وفضلت قاعد لبعد الصلاه وكل المصليين مشيوا لقيت شيخ كبير في السن جاي بيقولي ....
يابني مالك ....انا ملاحظ انك من بدري وانت هنا ...في حاجه عايزها !
الصراحه اه ....انا محتاج شيخ فاهم في امور الجن وكدة لاني متبهدل ....
بصلي باستغراب ...وحسيت انه مفكرني اني ملبوس او عليا حاجه قاطعت استغرابه وقوتلوا ...
ياعم الشيخ انا مش ملوبس ولا عليا حاجه ....بالله عليك انا عايز الي يساعدني ...
قول يبني وربنا يقدرني واسعدك ان شاء الله
يارب ....وبدات احكيله وفعلا حكيتله كل حاجه من الاول للاخر .....
قالي ...انا عاوز اروح شقتك يابني اشوف حاجه
وفعلا اخدته وروحنا الشقه اول مادخلنا فضل يمشي فيها ويقرا قران ويقول اذكار وبعد ما خلص قالي ....
بص يابني انا اول ماطلعت هنا وخصوصا في الدور كله انا قلبي مش مستريح ...حاسس بقبضه ...المكان دة فيه حاجه او قوة خارجيه مش مريحاني انا دخلت اماكن كتير وقليل وبعرف المكان الطاهر والمريح عن المكان المقبض ...انت مش ملاحظ حاجه !
اي هي !
فيه ريحه وحشه جدااا اول ماطلعنا الدور ...
فعلا انا شميت كدة بس مركزتش وكل لما اطلع اشم كدة فعلا
فيه حاجه غلط يبني .....انا الي عليا انا هاجي اقرالك كل يوم بعد العشا علشان ربنا يحفظك بس احسنلك تمشي يبني ...
شكلها كدة ياعم الشيخ ...هو صحيح اسم حضرتك اي !
انا الشيخ سلامه ودة رقمي في اي وقت انا موجود علي ازنك يابني ....سلام عليكوا
مشي الشيخ سلامه وانا في حيرة ومش عارف هعمل اي واا هتصرف ازاي بس احتمال كبير همشي ومش هرجع ....
وفضلت علي نفس الحال من الرعب والاحداث المتتاليه وجنون ميرفت والي بتعمله ...ولكن الي مينفعش يتعدي مرور الكرام ...
في ليله كنت نايم صحيت علي صوت حد بيزعق وصوته كان غريب بصيت من المنور لقيت ميرفت واقفه في الصاله بتزعق لوحدة وبتغير في نبرات صوتها كان اتنين بيتكلموا جوة شخص واحد وبنبرة مختلفه انا فضلت واقف مبلم مش عارف اتصرف ازاي وقتها قررت اني هنزل مش راجع تاني وفعلا جريت علي باب الشقه ولسي بفتحه وهجري انا مالقيتش سلم ....مفيش سلم ... جدران محوطاني من كل ناحيه ومش عارف اتصرف ازاي وكل الجدران بيخرج منها ايادي ماليانه دم ....دخلت الشقه وجريت علي البلكونه ونطيت منها ......
ومن بعدها محسيتش بنفسي ولا بأي حاجه .....
فوقت مش عارف بعد ادد اي بالتحديد بس فوقت لقيتني متجبس من كل حته في جسمي وطقم تمريض ودكاترة حواليا ودكتور بيقولي ...
حمدالله علي سلامتك يابني ....جت سلميه معلش ...
هو حصل اي !
كل خير ...اخواتك واهلك برا عاوزين يطمنوا عليك وهعدي عليك تاني ان شاء الله ...سلام عليكوا
دخل اخويا مصطفي وعامر واطمنوا عليا وفضلنا نتكلم مع بعض واحكيلهم الي فاكرة وفضلنا قاعدين سوا لخد نهايه الزيارة وبعدها بيومين جالي الشيخ سلامه وقالي....
اولا حمد الله علي سلامتك يابني ....دة غير اني عرفت الي كان بيحصل دة بيحصل بسبب اي !
بسبب اي ياعم الشيخ ....
انا جيتلك يبني البيت بعد صلاه العشا كل ما ارن عليك ماترودش قولت اروح واطمن عليك واول مطلعت في الدور عندك شميت نفس الريحه وكانت بشعه جدا والباب بتاع الشثه الي قصادك كان متوارب ...ربنا يسامحني بقي الفضول خلاني ادخل واشوف الي فيها ....دخلت ومكانش فيها حد وفضلت ماشي لحد لما لقيت ورق متقطع وشعر ودم واكياس سودة ....فضلت ماشي لحد مالقيت جدار اوضه من الاوض محفور و جواه حاجه محطوطه ....وكان فيه اثار دم في الاوضه دي والريحه كانت صعبه جدا فيها .....
خرجت من الشقه جري وبلغت الحكومه وفعلا ظني كان مظبوط الست الي في الشقه الي قصادك كانت قاتله جوزها وقطعته وحطته جوة الجدار ....
ينهار اسود ....انت بتتكلم جد ياعم الشيخ ....
ايوة يابني ....التحقيقاات معاها بتقول كدة وهي اعترفت قصاد النيابه دة انت بقالك كتير هنا متعرفش حاجه ....دى من علامات الساعه يبني
وقتها حسيت بارتياحيه وان الحق رجع الحمد لله وان شكي كان في محله وان الست دى وراها مصيبه ....
في نفس اليوم بعد العصر اخويا مصطفي عدي عليا وقالي ..
انت تعرف الست ميرفت الي قتلت جوزها دي !
مالها ...
جوزها طلقها ياسيدي وخد بناتها وهما اطفال وسافر بيهم وهاجر وسابها لوحدها وفضلت مع نفسها ودخلت في ازمات نفسيه كتير... الحال خدها انها تعمل عمل لجوزها... عارف انت سحر تقرب البعيد ورد المطلقه والكلام الفاضي دة !!!
ايوة ..وبعدين
ولا قبلين ...هو السحر عمل عمايله الباشا حب واشتاقلها من تاني و رجعلها من غير بناتها والهانم خلصت عليه وعملت الي عملته ...
ينهار اسود ...انا مش عارف انا مالي ومال الكلام دة ...ربنا يجازي الي كان السبب ...وانت مين قالك كدة وعرفت دة منين !
البواب ومن الشارع والناس كلها بتحكي ياعمنا انت مش في الدنيا ...دى القصه جت ع التلفزيون ....صحيح انا اتخانقت مع البواب وهتسيب شقتك وهتيجي تقعد معانا ياسامح .
اتخانقت لي بس !
الاستاذ بيقولي ان الي سكنوا قبلك اتضروا جامد وكانت بتحط سحر علي عتبه الشقه الي قصادها الي حضرتك كنت قاعد فيها علشان يخافوا ويهربوا فتعمل الي تعملوا برحتها وكان عارف دة ومقالكش ...دة يبقي راجل مبيتقيش ربنا ونصاب ...
حمدت ربنا وقتها انها جت علي ادد كدة ....احسن ما اتهبل ولا يحصل حاجه تانيه مش قدها...كله خير
وبعد شهرين خرجت من المستشفي ورجعت حياتي طبيعيه ورجعت اعيش وسط اخواتي ورجعت شغلي ونسيت الشقه والي حصل فيها ......
الشقه الي قصادنا
تاليف :عبدالله شوقي ❤📓✒
التعليقات على الموضوع