قرين ابو وديع
(قالوا الناس إنك بايعني ياما قالوا الناس عليك... قولت شاري سيبوه يبيعني زاد كلامهم حبي ليك)
ده الصوت اللي خرج من سماعات الكمبيوتر اللي ف الأوضة اللي ف شقتي اللي انا عايش فيها لوحدي من بعد موت امي و ابويا و جواز اختي الكبيرة، كنت قاعد بشرب سيجارة حشيش انا و عمر صاحبي و احنا بنسمع أغنية "لو نويت" للفنان جورج وسوف، فجأة لقيت عمر بص لي و قال....
- ياه ياض يا محمد لو حضرنا حفلة لعمنا جورج وسوف... الرجل ده انا بحبه اوي و نفسي اشوفه و هو بيغني لايف ولو لمرة في حياتي قبل ما اموت.
خدت نفس من السيجارة و قولت لعمر...
- انت عارف تذكرة الحفلة بتاعته بكام؟!....
و حتى لو قدرت تجيب حق التذكرة صدقني مش هيدخلوك الحفلة بالشبشب اللي انت لابسه ده.
خد عمر السيجارة من أيدي و خد منها نفس و قال لي و هو بيخرج دخان من أنفه اشبه بدخان عربيات البطاطا...
- ما احنا ممكن نخليه هو اللي يجي يغنيلنا!
وقتها سحبت السيجارة من أيده و قولتله و انا بضحك بعد ما اخدت نفس منها...
- و ده هتجيبه ازاي يا نجم... هتنادي عليه و تقوله يا ابو وديع ف هيجي؟!
مسك عمر الماوس بتاع الكمبيوتر و بص في الشاشة و قال لي و هو بيقلب في صفحة من صفحات الأنترنت...
- النهاردة كنت بقلب في منتدي من المنتديات و لقيت واحد كاتب تعويذة بتقدر بيها تحضر قرين أي حد انت عاوز تحضر قرينه... ف احنا بقى لو نفذنا الكلام اللي هو كاتبه ده ممكن نحضر قرين ابو وديع و نخليه يغنيلنا لايف من غير ما ندفع ولا مليم!
ضحكت بصوت عالي و قولتله...
- الله يخربيتك ياض يا عمر... انت الحشيش بيخليك تتسطل و تقول أي كلام و...
قاطعني لما قال بحزم...
- انا مابهزرش على فكرة يا محمد... انا فعلًا عاوز احضر قرين جورج وسوف و اخليه يغنيلي لوحدي.
رديت عليه بحزم انا كمان...
- بقولك ايه يا عم انت... انت فل اوي كده النهاردة و ياريت ماتشربش تاني لأنك كده بدأت تخرف، و ياريت تغور بقى يا عمر عشان انا عاوز انام لأني لازم الصبح اصحى بدري اروح شغلي.
قام عمر و راح ناحية باب الشقة اللي قصاد باب الأوضة و هو بيقولي...
- انا همشي يا عم بس انا عرفت اسم الموقع و اقسملك بالله هحضر قرين ابو وديع.
رديت عليه و هو بيفتح باب الشقة و بيخرج...
- يلا ياض يا ابن المهبوشة روح نام... الله يخربيت اللي قالك تشرب حشيش.
روح عمر لبيته و انا قفلت الكمبيوتر و طفيت السيجارة ودخلت نمت و تاني يوم روحت الشغل، استمرت الحياة لكن عمر ماظهرش ولا جالي البيت زي ماهو متعود لمدة كام يوم، بصراحة انا قلقت ف اضطريت اروح له البيت و اسأل عليه، روحت بيت عمر و بعد خبطات عالباب فتح لي والده اللي رحب بيا و دخلني الصالون، قعدت قصاد ابو عمر و قولتله...
- عمي هو عمر مابيظهرش ليه بقاله كام يوم؟!
رد عليا و هو متأثر اوي و قال...
- من كام يوم يا ابني سمعت صوت عمر وهو بيزعق بكلام مش مفهوم جوة أوضته بالليل، بصراحة انا قلقت ف فتحت عليه باب الأوضة لقيته قاعد في الضلمة و مولع ٣ شمعات و عمال يقول كلام مش مفهوم بصوت عالي، فتحت النور عليه لقيته ماسك صورة للمطرب جورج وسوف و هو قاعد عالأرض و قصاده ال ٣ شمعات، أول ما ولعت النور لقيته زعق لي و اتخانق معايا ف انا اتخانقت معاه و ماعرفش هو كان بيعمل كده ليه، المهم يا ابني من تاني يوم بدأ حاله يتلغبط و بدأ يتشنج و يعمل حاجات غريبة لدرجة إنه كان هيرمي نفسه من البلكونة، كتفته انا و اخوه و بعد ما بقى أهدى بص لي و قال لي إن انا السبب في اللي جرى له لأني قاطعته و هو بيحضر قرين جورج وسوف!
وقتها يا ابني انا و اخوه خدناه و وديناه بالعافيه لدكتور نفساني قرر إنه لازم يتحجز في المستشفى لأنه للأسف مريض نفسي و كمان اكتشفنا إنه بيشرب حشيش!
وقتها بلعت ريقي و قولت لابو عمر...
- يعني عمر دلوقتي في مستشفى المجانين؟!
رد عليا و قال وهو بيدمع...
- اه يا ابني... ابقى روح زوره يا محمد... الا انت صحيح ماتعرفش إنه كان بيشرب حشيش؟!
جاوبته بارتباك....
- لا يا عمي ماعرفش الا منك دلوقتي... عمومًا انا هروح له.
خدت عنوان المصحة اللي فيها عمر من ابوه و روحت عشان ازوره لكن لما روحت و قابلت الدكتور اللي بيعالجه قال لي إن انا ماينفعش ازوره و لما سألته ليه ماينفعش كان رده إن عمر موجود في أوضة العزل عشان مايأذيش نفسه و لما سألته عن موضوع تحضيره لقرين جورج وسوف و هل ده فعلًا سبب في اللي حصل له ولا لأ، رد عليا و قال لي إن عمر جاله مرض في المخ بسبب شربه الكتير للحشيش و المرض ده هو السبب في اللي حصل له؛ و كمل الدكتور كلامه و قال لي إنهم بيحاولوا يعالجوه نفسيًا و عضويًا و إن اللي كان بيعمله بإنه بيحاول يحضر قرين للمطرب اللي هو بيحبه مالوش أي علاقة باللي وصل له و إن اللي وصل له ده كله بسبب الحشيش...!
مشيت من المستشفى و انا من جوايا بتقطع على عمر و على اللي حصل له لكن للأسف حزني بقى أكبر لما عرفت بعد كام يوم إن عمر مات!!!
مات عمر و بعد الدفنة و العزا دخلت في حالة اكتئاب خرجت منها بالعافية بعد مرور شهور لما انشغلت في شغلي و ف حياتي، خرجت من حالة الاكتئاب و بطلت حشيش و بطلت كمان اسمع جورج وسوف لكني لحد النهاردة كل ليلة بحلم بعمر لما بنام وهو بيغنيلي نفس الأغنية اللي كنت بحب اسمعها انا وهو و كمان بيقولي في الحلم إنه مات بسبب تحضيره للقرين مش بسبب الحشيش... ده غير إن كل ليلة بصحى مفزوع على صوت عمر وهو بيغني بصوت عالي و بيقول....
(قالوا الناس إنك بايعني ياما قالوا الناس عليك... قولت شاري سيبوه يبيعني زاد كلامهم حبي ليك)
و لما بصحى مابلاقيش حد!!
تفتكروا عمر مات بسبب الحشيش ولا بسبب تحضيره لقرين ابو وديع؟!
تمت
محمد شعبان
التعليقات على الموضوع