نهايه الترحال

طول عمري أنا وأهلي عايشين نتنقل من بلد لبلد، مش مستقرين في مكان ومع كل بلد كنا بنروحها كنا بنقعد فيها كام شهر ونمشي،لحد ما استقرينا لفترة طويلة في أحد الدول العربية،حياتنا اتحسنت هناك ،اشترينا شقة ،و والدي عمل شراكة وشغله إتحسّن ،وكذلك دراستي

الوضع فضل مستقر حوالي سنة ونص ،لحد ما جه وقت لاقيت تصرفات والدي بتتغير بشكل ملحوظ ،وأحيانًا بتجيله حالات غريبة زي مثلًا التشنّج أو إنه يفضل يلف حوالين نفسه وبعدين يقع على الأرض 

مكنتش عارف دا تفسيره ايه وكل أما أحاول أسأله يبصلي بطريقة ترعب وميردش عليا 

لحد ما مات، طبعا العيله كلها قعدت تزن عليا أنا وأمي إننا نرجع مصر ونعيش وسطهم من تاني لكن أنا مكنتش شايف كدا، خلاص إتعودت علي المكان دا ومن الصعب إني أسيبه، فمهتمتش لكلامهم لكن أمي قررت إنها تنزل مصر لمدة إسبوع.

 

في يوم دخلت نمت في أوضة والدي، صحيت في نص الليل وأول لما فتحت عيني، لاقيت علي السقف فوقي بالظبط، ظل إسود زي ما يكون بني آدم لكن فيه إيد عنده مبتورة، طبعًا خوفت جدًا معرفتش أعمل ايه خصوصاً إن الظل دا اختفي بعدها بثواني

 حاولت إني  أقوم من علي السرير لكن معرفتش، حاسس زي ما أكون اتشليت ،مش عارف أحرك حتى صباعي ،الوضع دا فضل مدة صغيرة ،وبعدها بدأ يروح واحدة واحدة ،فكرت إن دي سيطرة الجاثوم 

قمت وخرجت من الأوضه 

دخلت الحمام عشان اخد دش وأحاول انسى، لكن الموضوع تطور أكتر فجأه لاقيت زي ما تكون ايد متشرحه أو محروقه بتحاول تدخل من شباك الحمام، و سمعت بعدها اصوات غريبه وصرخات جايه من الشقه اللي جمبي، حتي النور بدأ يطفي ويقيد، حسيت بالرعب وخرجت من الحمام بسرعه ،ودخلت أوضتي قعدت وهديت شويه ،وبعدها قومت قعدت على المكتب وقررت إني هسجل اللي حصل دا ،وفي وسط ما أنا بقلب في ورقي ،لاقيت ورقه قديمة معرفش جاتلي منين ،زي ما يكون مكتوب عليها كلام كتير لكنه ممسوح ومش واضح ،مش باين غير حرف واحد بس وهو"ف"

عدى اسبوع علي نفس الوضع، أصوات وخيالات وحاجات غريبه، أمي رجعت من السفر، اترددت كتير إني أحكيلها على اللي حصل، قولت بلاش اقولها لحد أما أشوف آخرة الموضوع دا إيه. 

من ساعة وفاة والدي، وطبعا أنا مهمتمتش بحكاية توزيع الميراث لحد أما في يوم أمي قالتلي لازم ندي كل حد حقه خصوصًا إن جدتي أم والدي لسه عايشه، وكمان لازم تفتح الوصية ،فحددت يوم هنفتح فيه الوصيه ،حضر اليوم دا أنا و والدتي صديق والدي المقرب أستاذ"خالد"

دخلت المكتب عشان أجيب الوصية 

  فتحت الخزنه ولاقيت في وسط الورق نفس الورقة اللي كانت على مكتبي ،استغربت ،معرفش انتقلت هنا ازاي!

فجأة لاقتني خدتها و وريتهالهم ،وحكيتلهم على كل اللي حصل في الأسبوع اللي امي غابت فيه ،وسألت أمي لو كانت تعرف عنها حاجه ولا لاء!

 قالتلي إن الورقه دي كل شوية كانت بتظهر في البيت في مكان مختلف، وكل مره بيظهر عليها حرف مختلف، مره واو ومر ياء، وظهرت قبل كدا أربع مرات قبل وفاة بابا ،وفي كل مرة كانت بتظهر فيها ،كان والدي بتظهر عليه تصرفات وحركات غريبة ،لحد ما مات ،حاولوا يتخلصوا منها كتير أوي لكن كل مرة بترجع

لكنّها متعرفش السبب الحقيقي اللي وراها ،لأنها لما حاولت تسأل والدي مكانش بيرد عليها كأنه مش سامعها لحد ما مات 

أسئلة كتير بقت بتدور في دماغي ومش لاقيلها أجابة ،لحد أما أتكلم أستاذ "خالد" وكشفلنا عن كل حاجه كان عارفاها اللي هو كان جاي أصلًا عشان يحكيها لأنه كان يعرف حاجات عن حياة والدي احنا منعرفهاش 

وقال إن الحكاية بدأت لما والدي اكتشف إن شريكه واللي هو جارنا دجال ،ودا من خلال إنه كان بيسمعه بيقول كلام غريب أحيانًا وبيعمل تصرفات غير مألوفه لحد أما في مره شافه داخل بيته ومعاه طفل صغير ،وبعدها سمع أصوات غريبه خارجه من شقته 

وفضل ورا الموضوع لحد ما عرف ،وإنه كان بيقدم الطفل دا كقربان عشان يكمل في اللي بيعمله، والدي ساعتها مكانش عارف يعمل ايه ،فقرر أنه يواجهه باللي عرفه وبدل ما يفضوا الشراكه اللي بينهم ،اشتغل معاه معرفش ايه السبب اللي دفعه لدا ،ولما سألته قالي إنه مقتنع إن الشغل دا ممكن يساعده كتير في حياته ،لأنه كان فاهم إنه مش هيتأذي بسببه،لكنّه بعد فترة صغيرة ساب شغله مع الدجال وقرر إنه يقلب عليه فبلغ عنه بحجة أنه سرقة عشان كان عايز يخلص منه ،ويبقى هو الكبير، وزي مهو معروف السارق هنا بيقام عليه الحد وهو بتر إيده، وبعد ما حصل دا بأيام الدجال دا مات، ومن ساعتها وكل شويه الورقة دي بتظهر عدد من المرات ،وكل مرة بيظهر عليها حرف مختلف ،لحد ما تكوّن كلمة ،وبعدها بتحصل مصيبه، عشان كدا لازم أخد حذري لإن اللي جاي محدش عارف ممكن يكون فيه ايه 

ساعتها تأكدت أنا اللعنه دي هفضل عايش بيها طول عمري، بدأت بموت الدجال ومش عارف أخرتها إيه. 

تمت. 

 

نوران_عطاالله