رواية عشق الطفوله الحلقه الخامسه و السادسه❤

الفصل الخامس والسادس ❤

الفصل الخامس. دلفت إلى الداخل لتباغتها تلك الكره التي اصطدمت بجبهتها..

:يانهاار ابيض.. آيه.. روحي ياسيرين هاتي تلج بسرعه.. 

قالتها ياسمين بخضه موجهه حديثها لسيرين..

:حاضر.. حاضر يا مامي..

قالتها سيرين وهي تسرع باتجاه المطبخ..

:بالراحه.. بالراحه ياملك..

:حاضر ياطنط..

قالتها ملك وهي تسند آيه لتجلس بجوار والدتها..

لتزيح والدتها يد آيه من على وجهها..

لتقول وهي تتنهد براحه: الحمد لله.. مورمتش..الحمد لله..

:الحمد لله يامامي.. 

قالتها آيه وهي تتألم.. 

:امسكي يامامي.. التلج اهو..

قالتها سيرين وهي تعطي التلج لوالدتها..

 :تعالي ياحبيبتي.. حطيهولها إنتِ.. على اما اقولهم يجهزوا الاكل..

:حاضر يامامي..

لتنهض سيرين وتجلس أمام آيه لتضع الثلج على جبينها.. 

ليقاطعهم رنين هاتف سيرين.. لتقول:

ملك.. ممكن تيجي أنتِ بليز تحطيه لآيه..

:اوك ياسيري.. روحي شوفي الفون.. 

لتنهض سيرين وتجلس ملك بجانب آيه.. 

لتقول آيه بهمس: هما قاعدين فين.. وهو قاعد فين.. 

 لتبادلها ملك نفس الهمس: كلهم ورانا.. وهو بالذات عمال يبص عليكِ من طهرك.. ده هياخد حته مفاجأه لما تلفي وتوريه وشك..

قالتها وهي تجاهد لكتم ضحكتها

:انتوا عمالين تتكلموا في ايه؟!

قالها عدي بتساؤل... 

 :مبنتكلمش في حاجه.. مااحنا ساكتين اهو.. انا بس عماله اقول ليوكا.. ان الخبطه مش مأثره خالص في وشها.. 

لتقول آيه بصوت منخفض: للأسف 

ثم ترفع صوتها قليلا لتقول: انا تمام ياعدي.. 

:طب لفي كده ووريني وشك.. 

 :هاا.. حاضر.. امسكي التلج ياملك.. لتعدل من وضع شعرها.. وتلتفت اليهم وماان التفتت اليهم حتى اصبحت تنظر في جميع الاتجاهات عدا اتجاهه هو.. وهو يفترسها بعينيه.. ويقول في نفسه: البسس.. القطه البريئه لسانها بقى طول مترين.. البس يا معلم.. ده انت هتشوف ايام سوداء.. 

لتقول نورا لها : تعالي سلمي عليا ياحبيبتي.. 

 لتقول آيه وهي تتجه اليها بابتسامه : اكيد حضرتك طنط نورا.. 

:اه ياحبيبتي.. تعالي في حضني.. 

 لتحضنها نورا بسعاده بالغه وهي تقبل وجنتيها.. وتقول : ماشاء الله ياحبيبتي.. بقيتي زي القمر لما كبرتي... 

قالتها بابتسامه حنونه

 :ميرسي يا طنط.. ده من ذوق حضرتك.. واكيد بقى حضرتك اونكل عادل صح؟!

 قالتها وهي تتجه باتجاه ذلك الرجل البشوش الذي يجلس بجانب والدها

:اه ياحبيبتي.. الف حمدلله على السلامه.. 

:الله يسلم حضرتك يااونكل.. 

قالتها وهي تسلم عليه باحترام ليقبل هو جبينها برفق.. 

ليبدأ محمد بالتأفف.. 

لتقول لها مايا عندما لاحظت اخيها وهي تنهض لتسلم عليها: ازيك يايوكا.. اكيد طبعا مش فكراني.. انا مايا بنتهم الوسطانيه... وام جوز اختك المستقبلي..ههههه.. 

 :لا.. لا خليكِ قاعده.. أنتِ حامل عشان متتعبيش... انا جايه اهو.. 

قالتها وهي تتجه اليها لتحتضنها برفق بسبب بطنها المنتفخ.. 

:وده بقى جوزي عمر الحمراوي.. دكتور اطفال 

 قالتها مايا وهي تشير ناحيه زوجها لينهض هو بدوره يسلم على آيه قائلا:اهلا وسهلا بالدكتوره.. اللي مشرفه مصر.. اتشرفت بمعرفتك.. 

 لتبتسم آيه ابتسامه صغيره وتقول:اهلا بحضرتك يا دكتور.. الشرف بحضرتك طبعا.. انت بقى سيف؟! 

قالتها وهي تشير ناحيته وهو يجلس بجوار اختها الصغيره.. 

 :اه.. انا.. ازيك ياابله ايه... وسوري على الكوره اللي جات في رأسك دي.. 

قالها بابتسامه طفوليه.. 

 :لا عادي ياسيف ولا يهمك..بس انا لسه صغيره على كلمه ابله دي.. انا اسمي آيه وبس.. 

 قالتها بابتسامتها الجميله لتظهر غمازتيها الغائرتين.. ليسرح فيها ذلك العاشق المتيم بها.. فهي مهما اختلفت بعد ان كبرت فستظل اقل كلمه منها تؤثر عليه.. فما باله باتسامته التي تأثره من هاتين الشفتين الصغيرتين ..وااه!!!من هاتين الشفتين التي يتمنى ان يقبلهما الان ويتلذذ بطعمهما.. واخذ يفكر في أشياء اخرى لن يفهمها عقلها الصغير... فهو يعرف ان معشوقته الصغيره التي يفكر فيها هكذا تخجل من مجرد نظره فما بالها بتفكيره هذا!! 

 ثم نفض هذه الأفكار عن رأسه وهو يقول:نعم لقد نضجت.. وتجرأت عليه ايضا.. ولكنها ستظل قطته الصغيره التي يسامحها على كل شيء.. فهي قد اخذت منه اهم شيء لديه وهو قلبه وصار اسيرها..واصبح ايضا اسير بحور عينيها واااه!! من هاتين العينين المناسبتين اليها الان.. وهي العيون الزرقاء الصافيه.. ليغرق في بحورها التي اسرته منذ ان دلفت إلى غرفه المعيشه.. نعم فهو عرف انها تلك الفتاه التي قابلها في المطار منذ ان رأى تلك الصوره لها الموضوعه على الحائط لتجمعها بعائلتها يوم تخرجها من الجامعه.. وهي تظن انه سيعاقبها!!حسنا لا مانع من عقاب صغير حتى لا تتجرأ عليه مره اخرى.. 

 لتلتفت اليه فجأه.. لترى نظراته تلك.. لتخفض عينيها بسرعه و بارتباك وقد تسللت الحمره إلى وجنتيها الممتلئتين ليكتمل مظهرها الطفولي .. لتذهب سريعا لتجلس بجانب صديقتها ملك بعد ان سلمت على اخيه إبراهيم وزوجته مروه.. 

 ليقول لها عدي قبل ان تجلس: ايه ياآيه؟! مش هتسلمي على محمد ولا ايه.. مش ده اللى كنتِ بتسألي عليه الصبح في الصوره..

لتلعن اخيها في سرها على تفوهه بالحماقات دائما!! 

لتقول بابتسامه صفراء: اوكي.. 

 لتذهب باتجاه ذلك الدراكولا كما لقبته.. لتندهش من جمال عينيه الرمادتين التي تناسب حلته الرماديه.. وقميصه الابيض الذي ينير وجهه.. ويكاد يتمزق من عليه بسبب عضلاته البارزه والظاهره من ازرار قميصه.. ومظهره الرجولي هذا الذي ينطق بانه راجل بمعنى الكلمه.. لتلعن نظراتها التي ظهرت معجبه تلك مقابل نظراته الماكره التي طالعها بها هذه!! 

 وكانت قد وصلت امامه.. وهو لم يقم لها مثل البقيه.. بل اكتفى بمد كفه لها وهو يقول بابتسامه مستفزه: اهلا يا.. دكتوه.. منوره والله.. 

 ثم قال بعد ان اقترب منها بصوت منخفض: إنتِ بقى دلوقتي اكدتيلي اني طلعت دراكولا حلو.. والا سيادتك مكنتيش تنحتي فيا كده!! 

قالها وهو يختم حديثه بنبره ساخره.. 

لترد عليه قائله: ده بنورك يابشمهندس والله.. 

 ثم قالت له بصوت اشبه بالهمس: وانت كمان اكدتلي ان انا مش بس دكتوره ناجحه لا وجميله.. والا مكنتش بصيتلي بنظارات الإعجاب دي.... 

 ثم مدت كفها له لتصافحه فجأه لتسير القشعريره في جسديهما.. ليضغط هو على يدها.. لتبدأ وجنتيها في الاشتعال مجددا.. لتحاول سحب يدها من بين يده الكبيره الى ان تركها هو... وهو يرمقها بنظراته البارده.. لتتأفف بضيق وتسير لتجلس مره أخرى بجوار صديقتها!! 

عندها دلفت سيرين الى الغرفه وهي تقول بسعاده:

يوكا.. عرفتي مين اللي كان بيتصل بيا؟! 

:لا..مين؟؟ 

قالتها آيه بتساؤل

 :دي قناه**** عايزين يعملوا معاكِ لقاء تلفزيوني.. بمناسبه تكريمك من اسبوعين في امريكا.. وعشان كمان مجله*** الامريكيه حطت صورتك تاني يوم كغلاف للمجلع... ده انتي بقيتي famous يابه.. 

:طبعا يابنتي.. هو انا اي حد ولا ايه؟! 

قالتها آيه بغرور مصطنع.. 

لتضربها ملك على راسها برفق:ياشيخه اتنيلي بقى اسكتي.. 

 وما هي الا دقائق حتى انفجر جميع من بالغرفه ضاحكين على هؤلاء المشاكسات.. 

 :خلاص.. انا يابنتي مش عارضه ازياء عشان كل ده.. فممكن ارفض يعني.. مش عارفه!! 

:ياحبيبتي انتِ لو قدمتي كعارضه ازياء هتتقبلي اصلا... 

قالها عدي بابتسامه هادئه لاخته.. 

 ليتمتم محمد بغضب :اه ماهو ده اللي ناقص.. حبيبه مين ياعدي الكلب استنى بس اما وريتك.. 

لتلتفت اليه آيه قائله:بتقول حاجه يابشمهندس؟! 

ليتأفف بضيق: لا.. بقول مبروك.. 

:اه!! الله يبارك فيك..

 لتنادي عليها والدتها ياسمين قائله: ياآيه.. ياسيرين.. تعالوا يلا ساعدوني.. 

:حاضر يامامي.. يلا ياسيري.. 

:استني ياآيه.. انا جايه معاكوا.. 

قالتها ملك وهي تنهض معهم... 

 :وانا ياحبيبتي كمان جايه معاكوا.. تعالي معانا يامروه وأنتِ يامايا.. 

قالتها نورا وهي تتوجه معهم للخارج لتتبعها مروه ومايا.. 

 ثم اردف بعد ذلك محمد بقليل:مازن ياحبيبي.. خد معاك سيف وتيا واياد واطلعوا العبوا فوق.. 

:اوك..

قالها مازن بطفوليه

ليخرج جميع الأطفال والنساء..ويتبقى فقط الرجال.. ليقوم  محمد سريعا ويغلق الباب بالمفتاح ثم توجه الى عدي ليرجع بدوره الى الخلف الى ان اصبح محمد امامه ليلكم عدي في وجهه.. ويمسكه من تلابيب قميصه وهو يهدر فيه بغضب قائلا:

 عارضه ازياء مين ياروح خالتك.. ده ناقص تقولها تشتغل رقاصه.. في ايه ياحيوان؟! .. انت شايفني ايه بقرون!! وانا ازاي معرفش بموضوع المجله ده.. بقى الهانم كانت على غلاف مجله من اسبوعين وانا معرفش.. ده انا ساكت من الصبح.. وانت ياعمي متقوليش على اللي بيحصل ليه؟! طرطور انا بقى وانا مش عارف!! 

 :لا ياحبيبي.. لا عاش ولا كان اللي يقول عليك طرطور.. بس كل الحكايه يعني مش مستهله اللي انت بتعمله ده.. وبعدين يابني فيها ايه لما تبقى على غلاف مجله محترمه في امريكا يعني... 

 :ليه ياعمي هو انا مشكلتي انها في امريكا؟! ده على اساس انها لو في مصر كنت هاروح ازغرط يعني ولا ايه؟! 

قالها بغضب وهو يوجه عدي بين يديه ناحيه اليمين واليسار!!

 :ياعم!! ابوس ايدك.. كفايه بقى منظري بقى زباله قدام الرجاله اللي قاعده دي...يابني ده آيه وسيري راضعين على بعض يعني هي اختي... 

قالها عدي وهو يحاول ان يفلت من قبضه صديقه.. 

 ليلكمه محمد في بطنه هذه المره وهو يقول له بغضب : وانت ياحيوان.. تقولها حبيبتي!!ده انت نهار ابوك اسود... ده انت تبوس ايدك وش وطهر اني مقومتش هزأتك قدام الستات يازباله... 

:عيب بقى يامحمد.. 

 قالها عادل وهو يمنع نفسه من الضحك على المنظر الذي امامه.. 

 :بلا محمد بلا نيله... انتوا خلتوا فيها محمد.. ده انا بقيت حميده خلاص!! 

قالها محمد باستهزاء.. بعد ان ترك عدي من بين يديه.. 

 ليسمعوا صوت طرقات على الباب ويتبعها صوت آيه: بابي!! انتوا قافلين الباب ليه يابابي؟! وايه الاصوات دي؟! 

 :لا ياحبيبتي مفيش حاجه.. ده احنا  بس قافلين عشان الاولاد الصغيرين مش عارفين نتكلم منهم.. 

 قالها عادل وهو يرمق ابنه بنظرات غاضبه.. الذي جلس في مكانه ببرود وكأنه لم يفعل شيء!!

 ليقوم عدي بتعديل مظهره ويفتح لآيه الباب.. لتدلف لتأخذ هاتفها الذي نسيته.. لتنتبه إلى جانب عين عدي المحمره لتقول له: عنيك محمره كده ليه ياعدي؟! 

ماانت كنت كويس من شويه.. ايه اللي حصل؟! 

 لتمد يدها لتلمس وجهه ليبعدها هو قائلا بمزاح: لا ياحبيب.. قصدي ياآيه مفيش حاجه.. تلاقيها من الحر بس ولاحاجه... 

:حر ايه ياعدي اللي في شهر ٢ ده!! 

 :متركزيش ياآيه.. ويلا بقى.. هاتيلنا السي دي بتاع حفله تكريمك.. عشان عمك عادل عايز يشوفه.. 

قالها أيمن بابتسامه حنونه... 

:اوكي يابابي.. بس هو فين؟! 

:هتلاقيه في الدرج التاني في المكتب على ايدك اليمين... 

:اوكي.. عن اذنكم.. 

:اتفضلي يايوكا.. 

 لتخرج آيه من الغرفه وتذهب باتجاه مكتب والدها.. لتدلف إلى الداخل.. وتفتح الدرج الذي اخبرها عنه والدها.. لتقوم بفتحه... لتخرج السي دي وعندما جاءت لتغلقه.. لاحظت تلك الورقه.. ليغلبها فضولها لتأخذها وتفتحها لتقرأ مابها لتتوسع عيناها بصدمه مما رأته.. 

انتهى.. 

بقلمي:آيه عبد الرحمن 

الفصل السادس يجتمعون جميعا الآن ومعهم عاصم الذي انضم اليهم منذ قليل على سفره الطعام..

 وهي شارده تفكر فيما رأت.. لو كان أي حد اخبرها بما رأت لكانت بالتأكيد كذبته.. ولكن هذه عينيها ايعقل ان تكذبها؟؟ يجب ان تتنظر بعض الوقت وبالتأكيد سيشرحون لها.. هي عادت اليوم فلتنتظر أكثر حتى يخبرونها..ثم فاقت من شرودها على صوت عادل قائلا بابتسامه هادئه:ماشاء الله ياحبيبتي.. بجد تستهلي اللي انتِ وصلتي ليه ده.. الف مبروك يابنتي.. منظرك وهما بيكرموكِ كان واضح فيه اد ايه انتِ فرحانه ومبسوطه.. ربنا يفرحك كمان وكمان... 

 لتبتسم اليه ابتسامه بسيطه قائلا:ميرسي ياأونكل.. ده من ذوق حضرتك والله.. اكيد كنت فرحانه عشان انا وصلت لكده بتعبي ومجهودي الحمد لله.. 

 ليبتسم أيمن قائلا بمرح: في ايه ياعادل؟؟ خف على البنت شويه.. ايه هتحسدها ولا ايه؟؟ امسك الخشب ياراجل.. انا خايف على بنتي من الحسد.. 

 :لا ياخويا انا مبحسدش.. دي بنتي انا كمان.. دي كانت متربيه عندنا وهي صغيره.. وانت عارف تربيتنا عامله ازاي.. 

 لينفجروا جميعهم ضاحكين على هذين الصديقين.. الا هي اكتفت بابتسامه بسيطه.. 

 ثم عادت الى دوامه افكارها مره ثانيه وهي تعبث في الطعام امامها.. إلى ان لاحظتها والدتها وقالت: ايه ياآيه؟؟ في ايه الاكل مش عجبك؟؟ 

:لا يامامي.. الأكل حلو جدا.. انا باكل اهو..

قالتها وهي تحاول أن تأكل من طبقها..

 حسنا!! هي يمكنها ان تكذب على الجميع ولكن ليس عليه هو.. فهو يعرفها اكثر من حالها.. ولكن لايستطيع ان يسألها الآن وهي لا تتذكره.. فلينتظر قليلا..

 إلى ان قطع عليهم صمتهم هذا سؤال عاصم لآيه قائلا: صحيح ياآيه.. هتعملي ايه في موضوع اللقاء التليفزيوني ده؟؟ 

 لتنتبه إليه آيه قائله: مش عارفه والله يا عاصم.. انا بفكر اهو واللي فيه الخير يقدمه ربنا..

 :هترفضي طبعا ياآيه.. انا سايبه كل واحد يتكلم بس اكيد لازم ترفضي...

 لتلتفت آيه لوالدتها قائله باستغراب:ليه يامامي؟؟فيها ايه يعني لما احضر لقاء تلفزيوني؟؟ 

 :ياحبيبتي انتِ لسه جايه من السفر.. وبعدين انتِ يعني مش خلاص عملتي الماجستير.. ايه لازمتها بقى الدكتوراه ووجع الدماغ ده؟؟

قالتها والدتها وهي تحاول اثناء ابنتها عن قرارها..

 :وجع دماغ!! بقى الدكتوراه وجع دماغ يامامي.. الكلام اللي حضرتك بتقوليه ده يقوله ناس جهله مش صيدلانية متعلمه زي حضرتك..

 :يابنتي.. ماعشان انا كنت دكتوره باقولك ان الحاجات دي ملهاش لازمه.. كفايه اوي الماجستير..

 :لا يامامي.. مش كفايه.. وبعدين ظروف حضرتك كانت غير ظروفي.. انا عندي استعداد اني اكمل في الدراسه دي.. اصل حرام اوي ان انا ابقى تعبت ده كله وفي الاخر اضيع تعبي.. ولا حضرتك ايه رأيك يابابي؟؟

 ليترك أيمن الملعقه من يده ويقول بابتسامه حنونه : بصي ياحبيبتي.. ده قرارك إنتِ ومحدش يقدر يقرر غيرك.. بس لو جينا للصراحه فانا معاكِ في قرارك..

:ميرسي يابابي.. ربنا يخلي حضرتك لينا يارب..

قالتها آيه بابتسامه لطيفه..

 لتقول سيرين بمزاح : وبعدين يامامي احنا عايزين حد famous في العيله دي.. اونكل عادل ماشاءالله.. عنده كل الناس الfamous.. لكن احنا عندنا عدي.. والشيخ عاصم.. والتافهه سيرين اللي هي انا طبعا...

 لترد عليها آيه قائله:لا ياحبيبتي.. إنتِ مش تافهه ولا حاجه.. إنتِ فاضيه وعندك فراغ نفسي المفروض تشغليه بحاجه.. ده لولا انك بترسمي كان زمان البيت كله هيولع في نفسه منك..

:ابتدينا في وصله العلاج النفسي..

:عددي!! كله الا شغلي ياعدي.. فاهم ولا لا؟؟ 

قالتها وهي تلوح بالسكين امامه..

:فاهم.. فاهم.. ربنا على المفتري..

قالها بخوف مصطنع..

لتقول ملك بسخريه:ناس تخاف متختشيش..

:ملكيش فيه يادحيحه!!

قالها عدي بنبره مستفزه..

:احسن منك ياخويا..

قالتها ملك وهي تخرج لسانها له كالاطفال..

لترمقهما آيه بنظرات ناريه بمعنى اصمتا لا طاقه لي الآن.. 

 لتقترب منها ملك قائله بصوت منخفض: في ايه يا آيه؟؟ وشك لونه اصفر كده ليه.. إنتِ قادره تتنفسي كويس؟؟ 

 لتهز لها آيه رأسها كعلامه بالموافقه.. فهي الآن تشعر بأنها ليست على ما يرام!!ولا قدره لها على الحديث.. هي فقط بحاجه إلى البخاخ الخاص بها لتصبح بخير.. 

 ليسود الصمت مره أخرى لمده قصيره ليقطعه هذه المره عاصم قائلا بابتسامه : مبروك يامحمد على المناقصه الجديده اللي كسبتها شركتك في ألمانيا.. 

 :الله يبارك فيك يا عاصم.. كل ده من تعليم عمي أيمن ليا.. هو ليه الفضل بعد ربنا سبحانه وتعالى في اني اتعلم الشغل ده.. 

 ليرد عليه أيمن بابتسامته البشوشه قائلا: لا يابني.. انت الحمد لله وصلت لكده بتعبك ومجهودك وشغلك.. واصرارك ياحبيبي انك تنفصل عن شركه والدك وتعمل شركه ليك.. وماشاء الله عليك شركتك بقيت مجموعه شركات.. ربنا يحفظك من كل شر يابني.. 

 :لا بصراحه ياأيمن.. محمد عنده حق.. لولاك انت زمان مكنتش شركتنا قامت ايامها خصوصا بعد الازمات اللي كانت بتمر بيها.. واللي لسه بتمر بيها بس الحمد لله بمجهودنا بعد فضل ربنا علينا كل حاجه بتعدي.. 

قالها عادل بامتنان لصديق عمره.. 

:اه بصراحه يابابا احنا.... 

 ولم يستطعوا اكمال حديثهم من تلك التي اصبح وجهها ازرق بشده وغير قادره على التنفس.. 

 ثانيه واحده وانتفض الجميع اليها في محاوله لانقاذها.. وهي صدرها يعلو ويهبط بشده من قله تنفسها.. فهي تصيبها هذه الحاله الصعبه عندما تغضب بشده.. وهي الآن في اشد حالات غضبها.. 

 ليجثو منها محمد قائلا وهو يربت على وجنتها:آيه!! فوقي ياآيه!! متغمطيش عينك.... هاتولها البخاخ بسرعه...

 ثواني وكانت تعطيه ملك البخاخ ليساعد في استنشاق بختين منه.. ليعود وجهها لللون الطبيعي.. وتستلم هي للدوامه التي استقبلتها بكل ترحاب وهي الهروب من الواقع او مانسميه نحن ب"فقد الوعي".. لتقع على كتف محمد.. ليسندها هو ويحملها بإتجاه غرفتها ليضعها في فراشها ويخلع عنها حذائها ويدثرها جيدا بالغطاء.. ويطبع قبله حانيه على جبهتها.. ويتركها لتنام ثم ينزل إلى الأسفل.. 

****************************

 في بهو القصر كان يجتمع الجميع متوجسين خفيه من الحاله التي وصلت اليها آيه اليوم.. لينزل إليهم محمد قائلا بحده بسيطه: ايه بقى اللي حصل قدامي ده؟؟ مش انتوا قولتوا ان حالتها بدأت تتحسن.. 

 لترد عليه سيرين قائله بتبرير: والله يامحمد هي كانت على طول معايا في أمريكا.. مبتتعبش اوي كده غير لما تتعصب او تتضايق.. بس والله هي حالتها بدأت تستقر.. والازمه مبقتش بتيجي عندها كتير... 

 التفت محمد إلى والدتها قائلا:يبقى كلام حضرتك معاها ياطنط هو اللي تعبها... المفروض كنتِ تكلميها بالراحه.. مش تفرضي رأيك عليها.. انا نفسي معنديش اي مشكله في انها تكمل الدكتوراه بتاعتها ولا عايز امنعها من كده.. ومجاتش على لقاء تلفزيوني يعني ياطنط.. شوفي بقى اذا كنت انا هاحاول استحمل انها هتروح تحضر لقاء.. مابالك بقى حضرتك والدتها.. المفروض تقعدي معاها وتشجعيها عشان تكمل ياطنط.. آيه زمان كانت في قوقعه وكلنا كنا حوليها وبرده اتاخدت مننا ومن وسطنا.. سيبيها بقى ياطنط ومتخافيش عليها.. انا زمان معرفتش احميها بس المرادي هاحميها ياطنط.. انا مش صغير دلوقتي وهي تخصني ومحدش هيقرب من حاجه تخصني.. 

 :محدش فيكوا فاهمني.. فاكرين اني مش فرحانه لبنتي... دي بنتي ياجماعه محدش هيفرحلها زيي.. دي اول فرحه في حياتي ياجماعه.. ليه مش مقدرين اني خايفه عليها منه.. هو لو عرف انها رجعت هيحاول ياخدها مني ويبعدها عني تاني.. انا استحملت ٦سنين من غيرها.. وانا عارفه دلوقتي انها شايفاني مش مهتمه بيها.. ليها حق.. هي كانت في محنتها وبتعديها من غيري من غير مااقف جمبها.. كنت كل اما اكلمها في التليفون اسمع صوتها وهي بتلومني ونبرتها معايا.. هي صحيح ساكته وعمرها مااتكلمت بس نبرتها على طول كلها لوم.. وانا مقدره كده.. هي شايفه ان انا كنت بعيش حياتي من غيرها وليها حق.. هي في حادثة.. وانا بولد واخلف ومش همي بنتي الكبيره.. ليها حق دلوقتي ياايمن انها تحبك انت وتقولك على اسرارها وانا لا.. انت اللي اهتميت بيها ٦ سنين اللي هما دلوقتي كل حياتها.. وانا لا.. طول عمري بابص لها على انها بنته هو ونسيت انها بنتي.. حتى لو هي نسيت انا مش هانسى.. 

 قالتها ياسمين وهي تبكي بشده على اللحظات التي قضتها بدون ابنتها..

 لتجلس بجانبها نورا وهي تحاول مواساتها قائله: اهدي ياسمين.. آيه لسه معاكِ حاولي تعوضيها عن اللي فات.. واهتمي بيها وشجعيها على انها توصل للمكانه اللي هي عايزاها.. وهي طيبه وهتسامحك.. ده إنتِ امها اللي هي اكيد بتحبها.. 

:تفتكري ياياسمين.. لو انا عوضتها عن ال ٦٦ سنين اللي فاتوا.. هاقدر اسامح انا نفسي عن ال١٨ اللي قبلهم.. لا يانورا انا مش هسامح نفسي.. 

 ليجثو امامها عاصم ويمسك يدها ويقبلها وهو يقول: حضرتك تعبتي معانا كتير زمان بعد وفاه ماما الله يرحمها.. هي كانت صاحبه حضرتك واكتر من اختك.. وهي اللي وصتك علينا بعد ماتعبت.. حضرتك عارفه هي كانت بتحبك وبتحب آيه اد ايه.. وكمان حضرتك كان ليكِ حق تخلفي تاني بعد آيه.. حضرتك مغلطتيش... وبعدين آيه دلوقتي معذوره عليها ضغط كبير اوي.. سيبيها تستريح الاول وبعدين نتكلم معاها كلنا.. ومتخافيش عليها.. هو دلوقتي مش هيقربلها خالص متخافيش.. ولو حضرتك قلقانه عليها احنا هنعين ليها حراسه وسواق وكل حاجه ان شاء الله هتبقى تمام.. واحسن من الاول..

لتربت هي على شعره بحنان.. 

 :عاصم عنده حق ياياسمين.. متشليش هم كل حاجه كده.. وسيبي كل حاجه للظروف.. 

قالها أيمن وهو يجلس بجانبها ويمسد على كتفها لتهدأ قليلا.. 

 ثم قال محمد بعده : بعد اذن حضرتك ياعمي.. انا اللي هاتكفل بكل حاجه تخصها دلوقتي.. الحراسه والسواق انا اللي هابعتهم.. اذا كان على حسن الشافعي.. فهو مش هيعرف يقرب منها تاني.. وبعدين هو بعيد عنها اهو بقاله ٦ سنين.. يبقى ايه اللي هيرجعه تاني؟؟ 

 قال هذا وهو يحاول يقنعهم بهذا الكلام.. وهو بنفسه ليس مقتنع به.. يرى بوضوح انه لن يمرر هذه الفرصه دون ان يستغلها.. يكفيه ماوصلت اليه شركه والده وصديقه من خسائر بسببه إلى الآن... 

****************************

 ثم انقضى ظلام الليل سريعا بكل مايحمله من أحزان.. لتأتي مرحله الفجر لتبدأ آيه في فتح عينيها.. ثم جاءت لتنهض من على الفراش لتلاحظ ان والدتها نائمه على الكرسي بجابنها وتمسك بيدها.. وتلاحظ ايضا ان ملك وسيرين نائمتين على الكنبه لتضحك بخفه.. ثم تنهض لتوقظ والدتها قائله:مامي.. مامي.. اصحى.. 

 لتستيقظ والدتها قائله بخوف: مالك ياحبيبتي؟؟ في حاجه تعباكِ؟؟ 

 :لا يامامي.. انا الحمد لله تمام.. قومي إنتِ ارتاحي بس.. إنتِ لسه مغيرتيش هدومك لحد دلوقتي.. 

 لتقبل والدتها جبينها قائله: مش مهم ياحبيبتي.. المهم انك بخير الحمد لله دلوقتي.. 

 :لا يامامي... قومي ارتاحي وخدي معاكِ العيلتين دول اللي سابوكِ تنامي كده.. 

 :برده مصممه ياآيه.. حاضر هاروح اهو.. نامي إنتِ بقى كمان وارتاحي.. 

:اوك يامامي.. 

 لتذهب والدتها لايقاظ سيرين وملك قائله: يلا يابنات.. قوموا ارتاحوا في اوضتكوا يلا.. 

 لتستيقظ الفتاتان وتذهب سيرين برفقه والدتها وتبقى ملك مع آيه... 

 ذهبت لتجلس بجانبها على الفراش وامسكت البخاخ لتعطيه اليها قائله: امسكي.. خدي منه عشان مش هاسيبك غير لما تحكيلي سبب الحرق اللي في ايدك.. وسبب الازمه اللي جاتلك امبارح دي.. 

 لتتناول منها البخاخ وتستنشق منه بختين.. ثم اردفت قائله:حاضر يا ملك.. وامري لله.. بس اوعديني اللي هاقوله ده محدش هيعرفه.. وانا قصدي اي حد مش لازم يعرف.. 

:ماشي ياستي.. محدش هيعرف.. اوعدك!! احكي بقى.. 

:ماشي..

 لتبدأ في سرد ماحدث معها في أمريكا وسبب لها هذا الحرق.. وانه ايضا ساعدها في شئ اخر.. ثم ماقرأته في الورقه...وثم ماعزمت على فعله.. لتفتح ملك عينيها بصدمه قائله: يانهار ابيض.. إنتِ كده.... 

 :هشششش.. ايه وطي صوتك.. ايوه ومحدش لازم يعرف.. عشان لو حد عرف انا مش هاعرف انفذ اللي عايزه اعمله.. وبالذات هو ياملك مش لازم يعرف بالسرين دول.. ممكن؟؟ 

 :حاضر يا آيه.. انا خلاص وعدتك.. ومش هاخلف بوعدي.. بس إنتِ كمان لازم توعديني انك مش هتأذي نفسك باللي إنتِ عايزه تعمليه ده؟؟ 

 :اوعدك ياملك.. وانا لو حسيت اني هتأذي.. مش هتردد ثانيه اني اقوله وهو ساعتها هيسامحني انا عارفه.. وهيقدر اللي انا بعمله.. بس اللي انا شايله همه دلوقتي الورقه اللي تحت دي.. هما ازاي 

 قدروا يعملوا كده وازاي عايزين يتحكموا في مستقبلي... دي حياتي انا مش حياه اي حد تاني.. 

:خلاص ياآيه اهدي.. هما اكيد هييجوا يتكلموا معاكِ.. إنتِ شوفتي اهو امبارح كنتِ تعبانه فمعرفوش يقولولك.. اكيد لما تهدي هيقولولك..

:وحتى لو ما قالوش.. انا مش هاسكت وهاتكلم انا المره دي..

 قالتها آيه بتصميم وهي عازمه على فعل شيء ما.. ثم اردفت قائله: المهم ياملك عايزاكِ تشوفيلي دكتوره تجميل عشان الحرق ده..وده مش اي حرق ده درجه تالته.. ومش هكرر تاني مش عايزه يعرف.. اوكي؟؟ 

 :اوكي ياآيه.. انا اعرف واحده صاحبتي من ايام الجامعه.. هابقى اكلمها الصبح لما الناس تصحى.. يلا بقى انا هاقوم انام شويه وابقى اشوفك الصبح..تصبحي على خير..

 قالتها وهي تتأثب.. لترد عليها آيه بابتسامه صغيره : وإنتِ من اهل الخير يا ملك..

 لتذهب ملك للنوم في غرفه الضيوف..او هكذا كانت تظن آيه... 

 ثم نهضت آيه لتبديل ثيابها لأخرى بيتيه مريحه.. ثم لتصلي صلاه الفجر وتدعو الله ان ييسر لها امورها ويحقق لها ماتتمناه.. وبعد فتره قصيره كانت في فراشها مره أخرى تتناول دوائها وماهي الا دقائق حتى راحت في سبات عميق.. غافله عن الذي يخبئه لها القدر في يومها!!

****************************

وفي مكان آخر 

 كان يجتمع ثلاثه اشخاص اقل مايقال عنهم انهم شياطين على هيئه بشر.. 

مجهول١:برده مسمعتش الكلام ورجعت.. انت مش حذرتها.. 

مجهول٢٢:ايوه حذرتها بس هي اللي مسمعتش الكلام.. يبقى لازم تعرف هي بتتعامل مع مين.. واننا مش بنهزر.. 

مجهول٣:يبقى لازم نبعتلها هديه تعرفها احنا مين.. 

مجهول١١: وانت فاكر ان محمد البغدادي هيسكت.. ده اقل حاجه انه يولع فينا.. 

مجهول٢:ماهو كمان هنبعتله هديه تشغله عننا هو كمان.. 

ثم نتركهم ليخططوا بخبث ودهاء الشياطين.. 

***************************

بقلمي: آيه عبد الرحمن 

رأيكم؟! ♥️

وتفتكروا ايه اللي حصل لآيه في امريكا وسببلها الحرق؟!وايه اللي شافته في الورقه خلاها تتعصب؟! 🤔🤔

هتبدأوا تعرفوا حاجات الفصول اللي بعد كده 💙😉