اطياف النيران

أبويا الله يرحمه جالي ف الحلم و قال لي:

- أنا شوفتك بتتعذِّب في النار.

قلت له:

- ازاي, انا معملتش حاجة غلط.. طب ف حل ؟

هز راسه بأن (لا), و الحلم خلص.

*****************************

انا صابر, عندي 30 سنة, متخرج و شهادتي متعلقة ع الحيط زي أي حد مصري..

عايش مع أمي, بشتغل و بصرف عليا بعد وفاة والدي, و طبعا شغال شغل عادي عبارة عن كاشير في سوبر ماركت صغير..

يومي قمة ف الملل و الخنقة, بصحى الصبح, افطر و اروح الشغل, افضل قاعد هناك وسط قرف الزباين و سخافة صاحب المحل, و ف اخر اليوم برجع البيت ارتاح و آكل و انام..

حياة يزهق منها حتى الموتى, لحد اليوم اللي جالي ابويا فيه ف الحلم و قال لي:

- أنا شوفتك بتتعذِّب في النار.

صحيت من الحلم ده خايف و قلقان, استعذت بالله من الشيطان الرجيم و قمت بصيت ف الساعة, لقيتها تلاتة الفجر, و فجأة سمعت أذان الفجر ف الشارع.

معنى ذلك إن ده مش حلم عادي.. قمت بسرعة اتوضيت و صليت الفجر, فضلت ادعي ربنا كتير انه يغفر لي لو عملت حاجة غلط..

و فضلت قاعد اسبَّح لحد ميعاد الشغل, و أمي صحت عملت لي الفطار و بعدها مشيت ع الشغل..

و انا قاعد ف الشغل و بحاسب الزباين كان الحلم بيتردد ف راسي بإستمرار, و صوت أبويا و هو بيقول إنه شافني بتعذب ف النار و هزت راسه بان مفيش حل ولا مهرب..

- انت يا عم الزفت, سارح و انت قاعد ف شغلك, لو مش هتشتغل بمضير قوم غور روح.

بصيت قدامي لقيته صاحب الشغل, تأسفت و حاولت اقوله اني تعبان شوية قاطعني بشتيمة و مشي و سابني..

عدى اليوم بعدها بالعافية وسط نظراته ليا, و قرف الزباين و خنقة الشغل كله..

رجعت البيت و كنت محتاج انام, دخلت نمت ع طول.. و لقيت أبويا جالي تاني, و قال لي:

- انا شايفك بتتعذب ف النار و بتاكل من شجرة ثمارها عبارة عن جمر من نار و بتشرب من دم مغلي فاسِد.

قمت من النوم عرقان و حاسس بخوف مالي جسمي كله, سمعت من برا صوت أذان الفجر!!

عملت نفس الشيء بتاع اليوم اللي قبله, اتوضيت و صليت و قعدت اسبح لحد ميعاد الشغل, و روحت الشغل..

صوت ابويا ع طول ف دني, دم مغلي فاسِد, و ثمرة عبارة عن جمر من نار.

- يابن الكلب برضة سارح ف الشغل, انت عايز تخسرني زبايني, انت ملكش شغل عندي, غور ف داية برا.

بصيت قدامي لقيته صاحب الشغل, ماسكني من دراعي و بيشدني عشان يطردني برا..

حاولت أهديه لكنه كان رافض, محدش من اللي معايا ف الشغل حاول يحوش عني.. و فجأة لقيت نفسي ف الشارع.

رجعت البيت, امي شافتني استغربت, متكلمتش معاها, دخلت اوضتي, فضلت قاعد افكر ف اللي بيحصل لي وقت كتير’ لحد ما غلب عليا النوم و نمت.

و شوفت ابويا للمرة التالتة, و قال لي نفس الجملة, انا شوفتك ف النار بتتعذب, فقلت له بعصبية:

- انا عملت ايه غلط؟ انا كل روم بصلي الفجر و اقد اسبح, انت كداب.

هز دماغه بمعنى لا, لكنه كان بيهزها و هو بيبص لي بأسى, و بعدها صحيت من النوم.

صحيت من النوم ع صوت أذان الفجر, بس المرة دي صحيت متعصب, قمت غسلت وشي و رجعت قعدت ف اوضتي تاني..

فكرت كتير, طالما انا كدة كدة هدخل النار, يبقى ليه بقى اصلي و اسبح و اتعب نفسي, ليه اروح اشتغل و اخلي راجل كلب زي ده يشتمني, انا لازم اعيش حياتي, انا لازم اتمتع, انا اتحرمت من حاجات كتير عشان آكل و اشرب انا و امي بس, من بكرة طلعت النهار هاخد فلوس معايا و اسافر, اقضي كام يوم ف مكان نضيف, اعيش حياتي و اشوف نفسي, انام مع بنات اللي ع طول بحلم بيهم, اشرب و ادلع نفسي, حياتنا ع الأرض ايام معدودة, ليه بقى اضيعها ف تسبيح و صلاة, منا كدة كدة رايح النار, و اديني صحيت كذا مرة ع أذان الفجر عشان أتأكد إنها رؤية مش مجرد حلم.

و ع الساعة عشرة الضهر كنت راكب المكروباص و رايح ع الغردقة, ف حتة فيها اعرفها من واحد صاحبي بتاعت الناس اللي مش معاها فلوس كتير..

وصلت هناك, كلمت صاحبي و اتفقت معاه اني هقضي عنده كام يوم, وافق و جه أخدني من ع المحطة بتاعت الاتوبيس..

كل اصناف البنات و الحريم العريانة ماشية قدامي, بصيت كتير و مليت عيني جدًا..

رحنا ع السكن, قال لي تاكل ايه قلت له مش عايز طفح, انا عايز أشرب احلى سيجارة حشيش عندك..

استغرب لانها مش عادتي, لكني ادهالي بعد شوية, شربنا كتير, كحيت أكتر, سرحت ف ملكوتي و افتكرت كل حاجة كنت دافن نفسي فيها..

و أفضل حاجة عملتها عشان محدش يفصلني من اللي انا فيه اني كسرت الخط عشان امي متتصلي و تسألني انا رحت فين و مفيش فلوس ف البيت ليه؟..

اتفقت مع صاحبي اني عايز اقضي سهرة مع بنت حلوة, عايز اعوض كل اللي فاتني..

شوفت ع وشه نظرة استغراب كبيرة..

و ف الليل كنا قاعدين ع بار بنشرب, و هناك عرفت اعلق بنت من اللي قاعدين, و كلها ساعة و كانت معايا ف الشقة..

قضيت احلة ليلة ف عمري كله, شرب و بنات و راحة بال كانت غايبة عني من سنين..

فضلت عند صاحبي حوالي عشر ايام, الفلوس اتصرفت الا اقل القليل منها..

قلت له ان ف مصلحة ف مصر هعملها و هرجع له..

رجعت مصر, امي فرحت لما شافتني, بس كان باين عليا انها تعبانة جدا, الدوا خلص منها و مفيش فلوس, اتصلت بقرايبها و طلبت فلوس, بس محدش كان قاعد معاها و بيراعيها..

هزيت دماغي و انا بتأسف لها, و دخلت نمت, و ع الساعة واحدة ف الليل صحيت, أخدت معايا شاكوش و مسمار..

رحت المحل اللي كنت شغال فيه, انا عندي طريقة ف فتحه, و محدش هيسألني انا بعمل ايه عشان عارفين اني شغال هنا و اني ساعات بفتح الباب كدة لما القفل بيبوظ..

فتحت المحل, و دخلت ع درج الفلوس, أخدت كل اللي قدرت عليه, و بدأت بالشاكوش أكسر و ابوظ ف باقي البضاعة و التلاجات..

و بعد ما خلصت طلعت الشارع, سبت المحل مفتوح و مديت خطوتي و جريت..

رجعت البيت نمت..

و تاني يوم الساعة عشرة كنت ف الاتوبيس..

رجعت لصاحبي تاني, بس المرة دي كنت مقرر اني هزود الدلع شوية.. بيقولوا الهروين حلو قوي..

طلبت منه اني عايز, ف الأول رفض, لكنه اصريت فوافق, جاب لي و عطاني اوي حقنة..

جبنا بنات و قعدنا ناكل و نشرب معاهم و بعدها نمنا سوا..

و تاني يوم نفس الشيء..

لحد اليوم السادس حسيت ان الجرعة مش كفاية, فزودتها جدًا..

حسيت بهبوط غريب و دوخة ملت جسمي كله, و وقعت ع الارض فاقد الوعي

********************************

صحيت من النوم مفزوعة, قلبي كان واجعني قوي ع ابني صابر, حلمت انه مات, و بيتعذب ف وسط نار و بيشرب دم مغلي و بياكل كور من نار.

****************************

الشيطان قادر انه يخدعك, متخلهوش يوصلك للحالة دي, تحداه و قرب من ربنا, و متخليش الحرام سكتك.

*تمت*

.

.

.

#الواقع

.