قصة (غيرة) كاملة

قصة ( غيرة ) كاملة
انا بغير من صحبتي أوي بس انا بحبها فعلا
بس حاسه انها عندها كل حاجه انا نفسي فيها .. والغريب اني لما بتمنى اي حاجه واقولها عليها
لازم ولو بعد فترة كبيرة تعملها .. مش عارفه هل هي قاصده انها تعمل كل ده
يعني هي كمان متغاظة مني او خلينا نقول حاسه اني احلى منها عشان كده بتحاول تتفوق عليا في حاجات تانيه
انا ما بقتش فاهماها بس بقيت اخرج معاها تبقى ساكته وطول النهار ماسكه الموبايل
ولما نخرج مع صحابنا كلهم تبقى قاعده تهزر وتضحك وفرفوشه اوي
بس في مرة كنت انا وهي خارجين وكان نفسي اشتري حاجه بس ماكنش معايه فلوس
فقولت للبياع هبقى اجيلك بكره .. وبعدها روحت وتاني يوم قالي للاسف في حد جه اشترها وبعدها لما قابلت صحبتي لقيتها معاها الحاجه دي وهي اللي شوفتها امبارح وقاصده تورهالي
قولتلها حلوة اوي النضارة دي .. قالتلي اه شكلها حلو .. انا مش عارفه هي بتعمل كده ليه بس انا اضايقت اوي من جوايا في نص القعده كده قولتلها ثواني هرد على تليفون وروحت فضلت تتصل بيا كتير ما ردتش عليها
انا علاقتها معايه بقت متعبه مش عارفه انا بغير منها ولا هي اللي خلتني اتغاظ منها بتصرفاتها الاحسن ليا وليها اننا نبعد عن بعض ..
الغريبة انها بعد يومين ولسه مصممة تتصل بيا لحد ما جتلي البيت وماما اتكسفت تقولها اني مش موجوده دخلت وقعدت معايه وقالتلي انتي مش بتردي عليا ليه
قولتلها عشان انتي بتعملي اي حاجه تضايقني .. قالتلي عشان النضارة خديها ياستي
حسيت انها بتنرفزني اكتر بس مش هينفع ارد عليها عشان هي معايه في البيت
قولتلها بصي انا عايزة ابعد عنك عشان بقيت حاسه انك متغيره ومابقتيش زي الاول حاسه انك بتمارسي مرضك النفسي عليا انا .. بتحاولي تظهري احسن وتبهريني بالحاجات اللي انا بحبها
انا مابقتش مستحملة بجد تساليني ايه رايي وعايزة ايه عشان تجيبية انتي طب انا كنت عايزه اجيبها
لقيتها سكتت شوية كده وقالتلي خلاص انا اسفه وما تزعليش مني المهم صالحتها وتاني يوم نزلنا مع بعض بعد الجامعه عادي
لحد ما في مرة كنا قاعدين مع صحابنا كلهم ولقيت الناس بتلقح عليا بالكلام وبيقولوا لبعض ايه كل ما ابص على حاجه تجيبها انت .. بقولك ايه حلو الكرسي ده ماتاخدوش تقعد عليه ويبصوا لبعض ويضحكوا وهي تبرقلهم وهي مبتسمه
فروحت ابتسمت انا كمان وفهمت انها حكتلهم عن الكلام اللي بينا وواضح انهم كانوا بيتريقوا عليه كملت اليوم وانا هنفجر وروحت وانا ناويه فعلا اكسر نفسها
قعدت افكر ازعلها ازاي لحد ما جه في بالي خطيبها دي اكتر حاجه تفرسها دلوقتي وخصوصا انها اتخطبت قريب وليل نهار عماله تجيبلي في سيرة خطيبها
روحت مكلماه وقولتله انها بتخرج معايه كل يوم بعد الجامعه وهي بتقابل واحد صاحبنا من زمان بتحبه ودايما يتريقوا على الهدايه بتاعتك
طبعا دا ماحصلش بس هي كانت بتحكيلي كل تفاصيلهم فانا هستغلها بشكل يخليه يصدق انها بتحكي كل ده فعلا عشان كده انا عرفته من صاحبها اللي مش موجود
طبعا هوا عارف اني اقرب صديقه ليها .. فسمع كلامي ده لدرجه اني سمعت صوت عياطه وهوا بيحاول يكتمه وبعدها رد عليا قالي شكرا وانا عامله نفسي بنصحه عشان قولتلها كتير وهي مش راضيه تتعدل
قفلت وانا حاسه اني لبستها في حيطه .. بعدها بشوية لقيتها بتتصل بيا رديت عليها لقيتها بتعيط .. قولتلها مالك في ايه قالتلي اللي حصل .. وقالتلي انا ماحكتش الكلام ده غير ليكي وهوا بيحكهولي على اني قولتله لواحد ماعرفش مين هوا
قولتلها انتي مجنونه انا هطلع كلامنا برة يعني .. اكيد حكيتي لحد تاني افتكري كويس جايز حد من الشله حكيتي قدامه مثلا ولا حاجه
قالتلي مش فاكره وبعدها قفلت وبعدها باسبوع عرفت انهم سابو بعض .. بصراحه حسيت بالفرحة لما حصلها كده بس اللي ماكنتش اتوقعه حصل
لما لقيتها بتتصل بيا وبتقولي ان خطيبها حكالها كل حاجه قولتها انا جسمي كله قشعر وحسيت الدم وقف في عروقي
فضلت ساكته وهي عماله تهزق فيا وبعدها قفلت السكة في وشي هنا بجد قررت اني ازعلها زعل كبير جدا
قومت مكلمه واحده صحبتي في الكلية في قسم كيمياء وقولتلها انا عايزة منك ....
-----------------------------------------------------------------------------
قولتلها انا عايزة منك مية نار .. صحبتي رفضت في الاول بس فضلت اتحايل عليها لحد ما وافقت
جابتهالي وهي بتحذرني منها جدا عشان خطر .. وانا مش بفكر غير في حاجه واحده بس اني ازعلها
لانها انسانه حقودة ومريضه ووصلتني لمرحله اني كرهت عيشتي انا من النوع اللي مش بعرف اسكت عن حقي
لما حد بيستفزني لازم انتقم .. وخصوصا الحد ده لو قريب منك
يعني لو الناس بتستفزك بعشرين كلمه .. ده بكلمة واحده يقدر يستفزك
بس قعدت افكر ازاي ممكن اعمل ده من غير ما تشوف اني انا اللي عملت كده
فضلت افكر كتير ولقيت ان اسهل حل اني استناها بليل وهي داخله عمارتها .. وارشه عليها
وخصوصا ان مدخل عمارتهم دايما ضلمة .. وكمان هسرق شنطتها عشان تبان عمليه سرقه وماحدش يشك فيا
وفعلا تاني يوم فضلت مستنية تحت العمارة بتاعتها من الساعة 8 بليل وده الوقت اللي عارفه هي بترجع فيه دايما
فضلت مستنية حوالي نص ساعه كانت اصعب نص ساعه مريت بيها لحد دلوقتي دماغي عماله تجيب وتودي وانا بفكر ههرب ازاي بعدها من غير ما تاخد بالها
لحد ما سمعت صوت حد بيدخل العمارة وانا مستخبيه ورى السلم في الضلمه اول ما قربت مني قومت فاتحها الزجاجه اللي معايه وروحت رشاها عليها سمعت بعدها صوت صريخ عالي ووقعت على الارض انا رميت الازازه وخدت شنطيتها اللي وقعت منها وطلعت اجري برة العمارة زي المجنونه وحاسه ان جسمي متخدر
حاسه اني عايزة اقع على الارض من كتر منا خايفه .. صوت صريخها عمال بيعلي في وداني مع اني بعدت عنها جدا .. وقلبي بيدق بصوت عالي بطريقه غريبه اول مرة تحصلي وصلت لحته مقطوعة ورميت شنطتها في مكان الناس بترمي زباله كتير فيه ورجعت عالبيت
ولما وصلت دخلت غرفتي وقفلت الباب وقعدت اعيط جامد .. انا يمكن اتخضيت اكتر منها صوت الصريخ كان فيه وجع جامد هز قلبي من جوة صريخها حسسني بكميه الوجع اللي هي حست بيه
حاسه اني مش متوتر جدا لدرجه اني دخلت الحمام ورجعت ودوخت ووقعت على الارض في الحمام لحد ما قدرت اقف بعدها بفتره وغسلت وشي وطلعت ودخلت نمت وانا سايبه نور الغرفه والع من الخضه
لحد ما نمت تاني يوم مافيش اخبار تالت يوم رابع يوم مافيش لا حس ولا خبر .. لحد ما واحده كلمتني من الشله وقالتلي ان صحبتي حصلها حرق في وشها وجسمها بسبب مية نار حد رشها عليها عشان يسرقها
وانا بسمع كلام صحبتي عيطت جامد وقالتلي انهم رايحنلها المستشفى يزوروها بكره .. وتاني يوم روحت وانا ماكنتش عايزة اروح قابلت صحابي وطلعنالها على غرفتها في المستشفى مامتها لما شافتني خادتني بالحضن وانا مش عارفه اقولها ايه ؟ ووالدتها تعيط وانا بعيط
ولما دخلنا لصحبتي بصتلي وهي بتعيط بعين واحده لان نص وشها كان متغطي .. شوفت منظرها مقدرتش استحمل واغمى عليا وفوقت بعدها وقولتلهم مش قادره اشوفها كده وامها تقولي يابنتي انتي كده بتتعبي بنتي نفسا اكتر قولتلها مش قادره ياطنط معلش وروحت عالبيت
فضلت طول اليوم مش عارفه انام وماروحتش الجامعه بعدها .. وبعدها بكام يوم لقيت صوره خطيبها متصور مع واحده تاني وكاتب انهم اتخطبو .. احساس الذنب بيقطع قلبي
قررت بعدها ازور صحبتي تاني يوم .. بعد ما مامتها كلمتني وقالتلي انها محتاجاكي جنبها .. وتاني يوم ماقدرتش اروح مش قادره اروح ولا اشوفها بالحاله دي وانا السبب ماكنش قصدي ارش على وشها بالذات كان قصدي ااذيها في جسمها وخلاص
ماكنتش اعرف ساعة الخوف ممكن اوصل للمرحله دي .. قعدت فترة افكر اني لازم اروحلها وروحتلها فعلا كانت فالبيت حضنتني لما شافتني وانا حضنتها وفضلت تعيط .. وانا مش عارفه اعمل ايه وهي تقولي حياتي ادمرت ومستقبلي راح مش هينفع اشتغل في حته ولا اتجوز انا عملت ايه في حياتي
سمعت كلامها اللي كان زي الشوك بيطعن في قلبي كل كلمه اقوى من اللي قبلها .. فضلت معاها ساعتين تقريبا ورجعت عالبيت وانا حاسه اني عايزة اموت حرفيا
عايزة اموت بسبب اللي عملته في واحده كانت اقرب الناس ليا ذله شيطان ما بينا خلتنا نكره بعض ونئذي بعض أذى الغريب كان هيخاف يعمله .. وفضلت بعيده عنها فترة
لحد في يوم وانا نايمه سمعت صوت حد في الاوضه .. قومت مفزوعه سمعت صوت جاي من تحت السرير قلبي اتقبض والدنيا ضلمه وموبايلي بعيد عني .. ما بقت عارفه اعمل ايه ؟
فضلت مكاني وبتنفس ببطئ من كتر الخوف وفي صوت خروشه لسه تحت السرير بصيت بالراحه بعد ما رفعت الملايه مالقتش حاجه اطمنت نزلت الملايه .. ورجعت اتعدلت في نومتي عالسرير ببص جنبي لقيت صحبتي نايمه ووشها محروق ومش واضح في الضلمه وبتصرخ في وشي
صرخت انا كمان وصحيت من نومي مفزوعه وودني وجعاني من صوت صريخها امي جاتلي مخضوضه وولعت النور وقالتلي مالك قولتلها مافيش كان كابوس
فضلت بعدها خايفه انام لمده يومين وفي مرة وانا في الحمام بغسل وشي ووببص في المرايه لقيت صحبتي واقفه ورايه ووشها محروق .. لدرجه اني طلعت اجري بعدها من الحمام بسرعه وسيبت الحنفيه شغاله
انا بقيت عايشه في كابوس مش عارفه هصحى منه امتى .. لحد ما قررت اعمل اكتر حاجه عمري ما كنت هصدق اني هعملها كلمت صحبتي وعيطت لما سمعت صوتي عشان بقى لي فتره ما كلمتهاش وقولتلها هجيلك النهارده
وبالفعل روحتلها البيت ... وقعدنا نتكلم كتير وقولتلها سامحيني قالتلي اسامحك على ايه ؟ عارفه انك مشغوله وانا قصرت معاكي كتير الفترة اللي فاتت وماتزعليش مني واحنا مالناش اللي بعض كفايه انك الوحيده من الشله بتاعتنا اللي بتسالي عليا لحد دلوقتي
قولتلها انا اللي شريت عليكي مية نار عشان كنت مضايقه منك جدا وانتي جرحتيني بكلامك
فجأة لقيتها سكتت .. وعينيها بتبصلي ودموعها بتنزل من غير عياط .. قولتلها انا اسفه ماكنش قصدي يحصل كل ده ولا كنت اعرف انك هتتوجعي كده ولا ان الموضوع ده هيوصل للدرجه دي
فضلت تقولي انتي .. وانا اعتذرلها وهي تقولي انتي ؟!
انتي اللي عملتي فيا كده ؟!
دنا صحبتك اعز صحابك ؟ في اول خناقه ما بينا تعملي كده وتبوظي كل حياتي !
للدرجه دي  مش بتفكري في حاجه غير نفسك .. للدرجه دي شايله وحاقده عليا
انا حسيت ساعتها قلبي هيقف من كلامها وبدات ادوخ .. فوقت من تفكيري
على صوت خطواتها وهي داخله العماره بليل .. وانا ماسكه زجاجه مية النار
فضلت مستخبيه ورى السلم وسامعها بتقرب وانا الزجاجه بتترعش في ايدي لحد ما طلعت شقتها وقومت شايله الزجاجه في شنطتي وطلعت اجري برة العمارة
طلعت اجري زي المجنونه ورميت الزجاجه بعيد في الشارع وغطيتها برمل .. ورجعت عالبيت وانا ببكي من تفكيري اللي وصل لمرحله اني أوجع حد بأذى يعيش معاه طول العمر وما بالك لو الحد ده عزيز عليك
قررت ابعد عنها وعن كل المشاكل دي لو قربنا هيعملنا مشاكل في حياة بعض يبقى البعد اسهل
البعد هوا اسلم قرار في الحاجات اللي زي دي بعدت عنها وعن كل الشله
وهي بعد اللي عملته معاها هي وخطيبها ما كلمتنيش تاني وبعدها عرفت انهم رجعوا لبعض
وفضلت مكمله حياتي بعيد عنها وبقيت مرتاحه نفسيا اكتر وقررت اصاحب بنات تانين اكيد هلاقي توأم روحي في واحده تانيه لحد ما صحبتي كلمتني بعدها بثلاثه شهور وعزمتني على فرحها
وقالتلي حتى لو زعلنا من بعض ما ينفعش اختي ما تجيش فرحي

تمت ... النهاية
بقلم_عمر_ليمونه