عذبني حبك الحلقة 33

الفصل الثالث والثلاثون

تجلس نور بغرفتها وتسمع اغاني الحب والعشق لتختار اغنيه تؤديها لمعشوقها، واذا بوالدها يطرق الباب، فاذنت له بالدخول، فاقترب منها قائلا،،،

-طبعا انا جي مش هلومك علي اللي حصل امبارح، والدنيا اللي ملهاش سيرة غير عنكوا

نور مقاطعة حديثه ترد،،،

بابا انا

زين بنظرة حب يقول،،،

حببتي مش عايزك تبرري حاجه، وانا مش مكسوف ولا خجلان من اللي عمله ايهاب، بالعكس والله انا احترمته وكبر في نظري اوي بموقفه ده، ولا علي ردك له، انا كان بس نفسي الامور متوصلش لحد كده، كنت اود انها تتحل في نطاق ضيق، مش علي الفضائيات كده، والعالم كله فجأه نسي كل المشاكل اللي البلد فيها وركز بس مع قصة حب نور وايهاب

نور بضحكة تحاول كتمها ترد،،،،

معلش بقي يابابا، ربنا مقدر كل ده انه يحصل، بس يارب تكمل علي خير

زين بنظرة قلق يقول،،،

بإذن الله هيتمها بخير حببتي، ليه بتقولي كده؟

نور بنظرة قلق وخوف تقول،،،،

مش عارفه يابابا، برغم فرحتي اني خلاص اخيرا قدرت اخرج من الدوامه اللي كنت فيها، وهكمل مع ايهاب تاني بعد ما اتأكدت من حبه وندمه، انما قلبي مقبوض مش عارفه ليه، خايفه فرحتي متكملش

زين ينظر لها ويقترب منها وبضع يده علي كفيها، ويقول في هدوء؛؛؛

- ده بس احساس طبيعي عشان اللي عيشتيه مكنش سهل، فخايفه تقفديه تاني، استعيذي من الشيطان الرجيم كده، واستهدي بالله حببتي، وقبل ما تنزلي اقراي قرآن وقبل ما تطلعي تغني، وباذن الله ربنا هيحفظك بمشيئة الله تعالي، هقوم انا بقي اناكف في امك شويه، واسيبك تختاري الاغنيه، ثم يغمز لها بعينه اليسري

ويتركها مبتسمه، واستمرت في انشغالها حتي استقرت عليها ورددت،،،
اخيرا هي دي ياهوبا اللي هغنهالك ياحب عمري

ثم اغلقت حاسبها وتوجهت الي والدتها فوجدتها داخل المطبخ ووالدها
مقتربا منها خلف ظهرها، ويهمس لها ببعض كلماته بصوت هامس لا احد يسمعه غيرها، فردت قائله،،،

-انا ممكن يعني اخد بعضي واعتبر الحفله هتبدا واسبلك البيت يازيزو، عادي يعني، لحسن اكون عزول بينكوا ولا حاجه

تنظر لها والدتها باحراج، وتضرب بيدها على كتف زين ضربه خفيفة، ثم تقول له،،،

-عجبك كده البنت تقول عليا ايه دلوقتي، اااه منك ومن تصرفاتك المراهقه دي، دايما كسفني يازيزو

زين يقترب منها ويحاوطها بيده حول خصرها، ثم يهاتفها مرددا،،،

في ايه بس،هو انا عملت حاجه، انا واقف مؤدب اهو، ايه الظلم ده، وبذمتك تنفع كلمه زيزو دي بعد اللي قولتيه

سمية ببتسامه تقول،،،

وهو ينفع وقفتك كده برضو، وسع كده انا ماشية وسايبه المطبخ كله، اشبع بيه بقي انت وبنتك

وتتركهم وتنصرف وسط ضحكاتهم، ثم ينظر لابنته قائلا،،

- احلي حاجه في امك بعد كل العشرة اللي بينا دي، ولسه بتتكسف زي ما تكون بنت مراهقه اول مرة تحب

نور تنظر له بحب وتقول،،،

بصراحه يابابا، احلي حاجه في بيتنا ده الحب اللي اتربيت عليه طول عمري، من صغري وانا شايفه حبكوا بيكبر مع الايام، وعمره ما قل بالعكس بيزيد، انا اتعلمت معنى الحب منكوا، ربنا ميحرمنيش منكوا يارب

زين بنفس النظره الحانيه يقول،،،

ولامنك يانور قلب ابوكي ، انتي عارفه لولا الحب اللي بينا ده، الواحد مكنش قدر يكمل حياته ابدا، الحب ده نعمه من عند ربنا، بيديها لعبده اللي راضي عليه، وانا الحمدلله ربنا راضي عليا اوي، عشان امك كانت من نصيبي، ورزقني بيكي يا احلي نور دخلت حياتنا، ويارب يسعدك يابنتي ويريح بالك

نور تحتضن يداه ثم تقول؛؛

يارب يابابا، ادخل يازيزو بقي راضي المقموص اللي جواه وانا هدخل اريح شويه عقبال معاد الحفله

زين بحب يردد،،،

ماشي ياحببتي، هروح اشوف الموزة بتاعتي، وانتي روحي شوفي... ويغمز بضحكة

نور بضحكة ترد في نفسها،،،

والله انت اب زي العسل، مفيش منك اثنين في البلد دي يازيزو

ينظر زين فيجد زوجته جالسه وعلي وجهها علامات الغضب والضيق منه، فيقترب منها ويهمس لها مرددا،،،،

-حبيبي مقموص مني ولا ايه؟ هو انا بس عملت حاجه ده انا كنت بقولك هاتي قاطه كده سريعه، راحت بنتك مقطعه الارزاق دخلت علينا

سمية بحده تنظر له مردده،،،

قولت كتير يازين خلي بالك من تصرفاتك ونور في البيت، احنا مش صغيرين علي الحركات دي، تقول علينا ايه دلوقتي البنت، امي واقفه بتتدلع مع ابوها

زين مبتسماََ يقول لها،،،

طب وفيها ايه لما تتدلع علي ابوها، هي بتتدلع علي حد غريب ده انا جوزها، ويقترب اكثر، وحبيبها، ويهمس اكثر، واكثر،، حتي اصبحت امامه تنظر له بحب، فطبع قبله حانيه بقرب شفتاها، وعشرة عمرها كله، فسلمت له تحت تأثير قبلاته فردت بصوتِ ناعما،، زين مش كده

زين بنظرة حب، يقول،،،،

هو ايه اللي مش كده ياسوسو، انا ماصدقت بالي راق علي نور، وهتصالح مع ايهاب، خليني انا بقي اصالح نفسي، تعالي بس لما اصالحك، لحسن انا شرير اوي وزعلتك مني النهارده ياسوسو

سمية بضحكة تثير العقل، تقول،،،

والله انت هتجنني يازيزو، بس اعمل ايه بمووت في جنانك وحبك ياحبيبي

زين وهو محتضنها بشده، يهمس لها مرددا،،،

وانا بعشقك ياعشرة عمري، متتخيليش انتي وحشاني ازاي ياسوسو، الايام اللي فاتت كانت صعبه اوي علينا، والحمدلله اخيرا الغمه أزاحت، ياااه حضنك وحشني اوي

سميه بنظرة هيام تردد،،

انت اكتر ياحبيبي،انت بتوحشني وانت قاصد عيني

زين يشتد اكتر في امتلاكها، ويقول،،،

لا لا كتير عليا اوووي الكلام ده، دلوقتي نشوف مين اللي مشتاق اكتر،، ده النهاردة شكله عيد ولا ايه؟، استعنا بالله

ونتركهم يغوصون في عشقهم، الذي يتجدد كل يوم ويزداد مع مرور السنين

#عذبني حبگ بقلم إيمووو كمال


تقوم نور بالاتصال علي عادل، وتنتظر ثواني حتي تم الرد عليها قائلا،،،

ايوة يانور ازيك، امبارح ردك كان جميل، والخاطرة بتاعتك تحفه

نور بفرحه تقول،،،، بجد عجبتك!

عادل بنبره ثقه يقول،،، اكيد طبعا، دي روعه

نور ببنبرة حب تقول،،،،

عشان طالعه من اعماق قلبي ياعادل

عادل بنبره ندم يرد،،،

واضح من حروفها يانور، انا مهما اعمل مش هقدر ابدا اعتذر على اللي حصل مني

نور بضيق،،،

انسي ياعادل،زي ما انا بحاول انسي، وتعالي نبدا كلنا من جديد، انا بتصل بيك، عشان اقولك هتحضر الحفله النهارده، ولا وراك مواعيد؟

عادل بنبره حماس يقول،،،

ولو ورايا الف معاد كله يتلغي يافندم، اكيد هحضر يمكن ايهاب قلبه يحن زيك ويسامحني هو كمان

نور ببتسامه قالت،،،

هيسامحك متقلقش، ايهاب قلبه كبير، استغل انت النهارده الموقف، وهو هينسي

عادل علي وجهه ابتسامه،،،

ماشي يانور، ربنا يسعدك يارب، هسيبك عشان تجهزي

نور؛ اوك ياعادل متتأخرش بقي

ونهت مكالمتها، ثم توجهت الي خزانه ملابسها، لتبحث عما سوف ترتديه، فقد ارادت ان تختار شيئا مميزا لم يراه من قبل، حتي وقع اختيارها علي فستان بلون الذهبي اللامع، فقامت بعمل بروفه عليه، فقد كان ضيق من الصدر يشبه شكل رسمه السمكه فقد كانت مثل عروس البحر، المتلألأه في ظلمات الليل، لتنور دنياه

نور تحدث نفسها مردده،،،

كده حلو اوى، اقلعه بقي واحضر الشوز، والاكسسورات بتاعته، عشان اكون جاهزة علي طول، يادوب اعمل ميكب وانزل، يارب تعدي الحفله علي خير

#عذبني حبگ بقلم إيمووو كمال

يجلس ايهاب ويحاول أكثر من مره الاتصال بصديقه، لكن هاتفه مغلق، وبعد عدة محاولات رد عليه، فحدثه إيهاب بضيق مرددا؛؛؛؛

- ممكن اعرف يابني انت قافل تلفونك ليه؟ انا من بردي بتصل عليك يافارس وبيديني مغلق

فارس بهدوء، يقول،،،

انا عايز اعرف مش صلحتكوا على بعض، عايز من امي ايه دلوقتي، ما تسبني يا عم انت اشترتني، يخرب دي صحوبيه، وجعت قلبي معاك

ايهاب بتمثيل الزعل،،،

اخس عليك يافارس كده مكنش العشم ياصاحبي

فارس بضحك ثم يقول،،

خلاص ياعم انت هتمثل، اخلص كنت عايزني في ايه، أنجز وهات من الاخر

ايهاب ببتسامه يقول،،،

كنت عايزك، تنجز وتشتريلي بدله جديده

فارس فاغرا فاه متعجباََ،،

نعم! انت بتتكلم جد

ايهاب متسائلا،،،

ايه المشكله في كده؟

فارس زمجر غاضبا،،،

المشكله ان مفيش وقت، وكمان انت عندك بدل تنفع تتعرض في محل، هاجي اختارلك بدله منهم واخلص، معندناش وقت يا ايهاب

ايهاب بضيق يتنهد قائلا،،

انا عارف بس كنت عايز احضر ببدله جديده، اول مرة تشوفها عليا، هتعرف تجبها ولا اتصرف

فارس ضيق عينيه وقال بسخريه،،،

والنبي اتلهي، هو انت لو عارف تتصرف كنت طلبت مني، اصبر عليا ساعه هروح اختارلك احلي بدله فيكي يامصر من اكبر محل، وتكون عندك يا باشا انت تأمر، بس عايز لونها ايه

ايهاب بفرحه قال،،،

حبيبي ياصاحبي، خليها اسود، نور بتحب البدل السوده اوي، وبلاش جرافته، خليها ببيون

فارس باعتراض وحده قال،،،

انت رايح تتجوز، خلي الببيون للفرح، والبس جرافت النهاردة

ايهاب بنبره سعاده يقول،،،

ماشي بس متتاخرش عليا

فارس بقلق يقول،،،

حاضر ياصاحبي، بس يارب المقاس يكون مظبوط

ايهاب يرد بنبره توتر، ثم يقول،،،

يارب لحسن معندناش وقت

فارس بحب يقول،،،

طب اقفل بقي ياسيدي عشان أنجز واعرف اجبها بسرعه يالا اسيبك انا سلام ياصاحبي

ايهاب بنبرة حب وامتنان،،،

شكرا ياحبيبي، عارف اني تعبك معايا، بس انا مليش غيرك

فارس بنفس بنبرته يرد،،،

قولتلك مليون مرة مفيش شكر بينا، انت اخويا، فاهم ولا مش فاهم، يالا سلام بقي متعطلنيش، انا نازل اهو، وخليك معايا عشان ابعتلك صور تختار معايا، اوك

ايهاب :اوك ماشي، سلام

اغلق فارس معه، ثم اخذ مفاتيحه وهاتفه، وتوجه الي افخم محلات لبيع البدل السينيه في مصر، واخذ يجوب المحل حتي وقع عينه علي ما يريد، فقام بتصورها وارسلها اليه، فجاءه الرد بالموافقه، فتوجه الي الحسابات وقام بدفع ثمنها وانصرف اليه مسرعا ليلحق بموعدها، وبعد مضي مايقارب الساعه او اقل، وصل اليه، فاخذها منه وهو يقول،،،

-الله عليك يا ابو الفوارس، ايه الجمال ده، حلوة اوي احلي من الصورة اللي بعتها

فارس بفخر وسعاده يقول،،،

طبعا يابني، ده انا حتي ذوقي لا يقاوم، اطلع قسها وريني مقاسها، انا خايف يطلع مش مظبوط

ايهاب ممسكها بيده وعلي وجه ابتسامه ثم قال،،،

تمام هطلع اقسها، ولا اقولك تعالي معايا بدل ما انادي عليك، تعالي ياعم هو انا هخطفك

فارس ينهض معه وهو يردد،،،

ادي قومه لما اشوف اخرتها معاك يا مغلبني

ويصعدون سويا، ويقوم بارتداءها وبخرج ليأخذ رايه مرددا؛؛

. - ايه رايك يا فروستي؟

فارس بنظرة اعجاب يقول،،،

ماشاء الله، قمر يا هوبا، البدله هتاكل منك حته، كأنها متفصله عشانك، انت ولا كأنك عريس النهاردة الله اكبر عليك، والليله هتتزف علي عروستك

ايهاب بنظرة حب له يرد؛؛

تصدق اني حاسس كدة برضو، اني عريس، وفرحان اووي يافارس، اخيرا نور من النهاردة مش هتفارقني تاني، ولا هتسيب حضني، ياااه علي فرحه قلبي

فارس يقترب منه ويقبله بحب وهو يردد له؛؛؛

مبروك يا صاحبي، عقبال الليله الكبيرة حبيبي

ايهاب؛ يارب

فارس؛ طيب ادخل اقلع البدله بقي، وادخل كده خد شور وظبط نفسك وذقنك كده، وانا هجهزلك البرفيوم والشوز عشان تلبس على طول مفيش وقت

ايهاب بسعاده يردد،،،

فوريره مش هتاخر

#عذبني حبگ بقلم إيمووو كمال

يجلس معتز برفقة جنة في منزل خالها، ويتحدث الي والدتها قائلا،،،

- دلوقتي الحمدلله ياطنط، الشقه مش فاضل فيها غير حاجات بسيطه اوي، تخلص في يومين، وجنة خلصت رص حاجاتها، كنت عايز احدد معاد للزفاف بقي

ليلي تنظر له ثم تنظر لجنه قائله؛؛؛

والله اللي يحدد المعاد ده جنة، مش انا المعاد اللي يناسبك ايه ياجنه

تصمت جنة دقائق ثم تنظر له مردده؛؛

- ممكن الخميس الجاي اية رايك يامعتز؟

معتز معترض؛ كتير يا جنة، لسه اسبوع بحاله هنستني

ليلي تنظر له مردده،،،

خلاص يامعتز، بسيطه مجتش من كام يوم، هيمروا بسرعه، عقبال ما تشوف حجز في فندق لشرم الشيخ، وتتفق مع بيوتي سنتر هتلاقي الايام مرت

معتز بزعل يقول،،،

خلاص اللي تشوفوه

سليم بنبرة فرحه،،،

الف مبروووك ياولاد ربنا يتمم بخير

معتز يبتسم له،،،

الله يبارك في حضرتك ياعمي

معتز ينظر لجنته ثم يهمس لها مرددا،،،

مبروك ياجنتي، ربنا يصبرني عليكي الاسبوع ده

جنة بنظرة خجل وكسوف ترد،،

الله يبارك فيك ياميزو، هانت ياحبيبي اسبوع مش كتير

معتز ينظر لها ويقول بنبره جديه،،،

طب اعملي حسابك اختاري بيوتي سنتر عشان نروح ونتفق معاه، اوك حبيبي

جنة تقول بنبره هادئة،،،

انا معايا رقم بيوتي سنتر اللي راحت له نسمه، كويس اووي، هتصل عليهم واحدد معاد معاهم

معتز يصمت ثم يقول؛؛

لا تعالي نروح نعدي عليهم دلوقتي

جنة باندفاع تقول،،،

بلاش مش النهاردة خليها بكره طيب

معتز مستفهما،،،

وليه مش دلوقتي، وراكي حاجه هتعمليها؟

جنة تنظر له بقلق ثم ترد؛؛،

لا مش ورايا، بس بصراحة كده كنت عايزة اتفرج علي حفلة نور، التلفزيون هيذيعها كمان شويه

معتز ينظر لها بضيق وغضب، ثم يرد،،،

- يعني حفلة نور اهم من تحديد معاد البيوتي ياجنة، علي العموم براحتك خالص، عايزة تروحي اتفضلي روحي، مش عايزة كلميهم بالتليفون، مش عايزة خالص الجوازة براحتك، هسيبك انا بقي عشان تشوفي الحفله براحتك، عن اذنكم انا ماشي

ليلي تمسك معصمه وتنظر له بنظر ترجي، تقول،،،

اقعد يا معتز الكلام مش بيبقي كده يابني، انت قفشت ليه كده

معتز يمسح وبيده وجهه لتهدئة اعصابه، ثم يرد قائلا؛؛

- امال الكلام يبقي ازاي يا طنط، لما مراتي تفضل مشاهده حفله علي مشوار حجز البيوتي، هي نور اهم من فرحنا

ليلي بهدوء ترد عليه،،

ولا اهم ولا حاجه، الفكرة بس ان الموضوع شد الناس اوي، وانا بنفسي مشتاقه اشوف رد فعلها ايه، وهتقوله ايه!

معتز بضيق،وغضب قال،،،

حضرتك كمان ياطنط، انا مش عارف الموضوع اخد اكبر من حجمه جدا عند الناس

ليلي محتفظه بهدوءها، ثم ترد قائله،،،

عشان هما مش ناس عاديه، هما نجوم، والناس بتهتم اوي باخبارهم، عرفت بقي احنا مهتمين ليه، وانت مش كل حاجه تقفش كده بسرعه، طول بالك شويه يابني، انتوا بكره ياما هتشوفوا

معتز بنظرة احراج يرد؛

- والله انا مش كده خالص ياطنط، بس انا مضغوط اوي، وعايز استقر واهدي كده، علي العموم انا اسف لو انفعلت في وجودكم

سليم ينظر له ثم يقول،،،

ولا يهمك يابني، انا لولا حاسس بيك وبمشاعرك، وحالة الاضطراب اللي بتكون قبل الجواز، كنت زعلت منك جدا

معتز بحزن وضيق يرد قائلا،،

انا اسف مرة تانية ياعمي، انا فعلا الدنيا مش متظبطة معايا، عشان كده انا قلقان شوية

جنة تنهض من مجلسها وتقترب منه مردده،،،

- انا جاهزة ياميزو يالا بقي متزعلش هنروح نحجز، ونرجع علي طول، خلاص

معتز يمسك مقبل يداها ويرد،،،

لا ياحبيبي، مش زعلان ولا حاجه، اتفرجي علي الحفله، وبكره نبقي ننزل نحجز

جنة تجلس بجواره ثم تقول،،،

يعني بجد مش زعلان

معتز ببتسامه علي ثغره يرد قائلا،،

لا والله، وعشان اثبتلك اني مش زعلان هتفرج معاكي علي الحفله، ايه رايك بقي؟

جنة بفرحه وسعاده تقول،،،

حبيبي ياميزو انت، وانا هقوم اتصل بالمقلي اخليهم يبعتوا شويه مسليات كده

معتز مسكا بيدها ثم يقول،،،

طب اية رايك ننزل نشتريهم بسرعه ونيجي، ده بعد اذنكوا طبعا

ليلي ببتسامه حانيه تقول،،،

ماشي ياحبيبي روحوا، بس متتأخروش عشان قربت تبدأ

جنة بفرحه تقول،،،

لا خالص المقلي قريبة، يالا بقي ياميزو

معتز بيضحك عليها ويقول،،،،
يالا يامجنونة

#عذبني حبگ بقلم إيمووو كمال

تنتقل نانسي الي غرفه العناية المركزة العاديه، وحالتها الطبيه في تحسن ملحوظ، بفضل وجود ادم بجانبها، فقد لازمها طوال الوقت، وهذا جعل روحها المعنوية مرتفعه ونسبه الاستجابه للعلاج في تقدم، فدلف اليها ادم مرددا،،

-حبيبي وروحي ازيه النهاردة، انا شايف بدر منور بصراحة قدامي

نانسي ببتسامه مشرقه كلها امل ترد،،

الحمدلله والشكر لله، طول ما انت معايا اي الم بيعدي واتحمله ياحبيبي

ادم بحب ممسكا يداها؛؛

وانا ايدي عمرها ما هتسيب ايدك ابدا يا انوس، يابنت ده انا ما صدقت

نانسي ببتسامه تقول،،،

حرام عليك مش قادرة اضحك، ارحمني من كلامك ده

أدم بنظرة حنيه يقول،،،

هو انا قولت حاجه، انا ساكت اهو

نانسي مسائله؛؛

هو انا هخرج من العنايه امتي، ماما بابا وحشوني اوي

أدم ينظر لها بحب ويقول،،،

يومين كده ياقلبي بس تستقر الحاله وتروحي غرفه عاديه، وبعدين نشوف هنبدأ امتي العلاج الطبيعي، ومدي استجابتك له، وكمان عمي وطنط كل يوم عندك

نانسي اومأت براسها بنعم،،،،

ايوة عندي بس مش بتكلم معاهم، انا تعبت من النوم كده نفسي اتحرك بقي، واقف علي رجلي واجري، واروح واجي

أدم بنظرة شفقه عليها يرد،،،

معلش يا انوس العمليه مش سهله ياحببتي، وكل حاجه هتبقي كويسه بفضل الله تعالي، احنا هنعمل العلاج الطبيعي وشويه شويه هترجعي احسن من الاول، بلاش استعجال احنا لسه في اول الطريق، ماشي حبيبي

نانسي برضا إيمان، تقول،،،،

حاضر يا ادم، ربنا يعيني ويقويني يارب

ادم ببتسامه يقول،،،

يارب حببتي، هسيبك عشان امر علي باقي المرضى وارجعلك تاني، سلام ياحبي

#عذبني حبگ بقلم إيمووو كمال

تجلس نور في غرفة تحضير الميكب، لوضع اخر لمساتها، قبل الظهور علي المسرح، فدلف اليها عادل، فنظر إليها متعجبا ومتسائلا،،،،

-مالك يانور متوتره ليه كده؟و وشك لونه مخطوف واصفر كده؟ هي اول مرة تقفي علي مسرح

نور تنظر له، وتفرك بيديها، وعلامات القلق واضحه عليها ،، ترد وتقول؛

-مش فكره غني يا عادل، انا قلقانه من رد فعل ايهاب، ورد فعل الجمهور، وخايفه مش عارفه ليه واية سبب الخوف ده، من اول ما صحيت وانا قلبي مقبوض اووي، ربنا يسترها ويعدي الساعات دي علي خير، هو ايهاب وصل ولا لسه؟

عادل ببتسامه يقول،،،

وصل ياستي، ومنتظرك في اول صف هو وفارس، وزي القمر، لابس بدله تحفه ابن اللذينه، كأنه عريس منتظر عروسته اللي زي القمر قدامي

نور ببتسامه ونظرة عيونها بتلمع، تقول؛

بجد طب ما تصورة وخليك جدع كده من غير ما ياخد باله، عشان خاطري ياعادل

عادل بضحكه عاليه يقول،،،

والله عارف انك مجنونة ايهاب، وصورته ياستي من غير ما تطلبي، اتفضلي الصورة بعتهالك من شويه علي فونك بس انتي مأخدتيش بالك

نور بفرحه تمسك هاتفها، وتفتح الصورة وتتظر له بكل حب وعشق مردده،،،

-حبيبي وحشتني اوي، خلاص كلها دقايق وارجعلك ياحب عمري، ومستحيل حاجه هتفرقنا ابدا تاني، بحبك اووي

عادل بنظرة تعاطف؛ يالا يانور المسرح جهز، انا همشي وهستناكي بره، متطوليش

نور سارحه في صورته وهيئته ولا ترد؛؛؛؛؛

عادل ينظر لها متعجباََ وينادي؛؛ نور.. نور. فوقي ياماما

نور انتبهت له وترد بضيق وعصبيه مردده،،،

في ايه يافصيل،، فصلتني ياشيخ منك لله، امشي ياعادل،، امشي ربنا يرضى عليك، انا جايه وراك

عادل يضحك باعلي طبقات صوته، ثم يقول،،،

والله اتجننتي خلاص يانور، ايهاب اكل عقلك، عليه العوض ومنه العوض،، ثم يتركها ليتوجه بالجلوس بجانب فارس، فيهمس له مرددا،،،

- كله تمام يا ابو الفوارس، زي ما توقعت طلبت مني صورة وبعتلها الصورة اللي بعتهالي، انت ياواد استاذ، توقعاتك دايما في محلها

فارس يرفع راسها بكل فخر ويرد،،،

عيب عليك يابني، ده انا ابو الفوارس كلهم، ثم يصمت ويقول بجديه،،، اللي بتحب واحد زي حب نور كده، تتوقع منه اي حاجه مجنونه تبين حبه، ربنا يسعدهم يارب

عادل ينظر لايهاب، ثم يقول،،،

يارب يافارس، بقولك ايه مش هتكلم ايهاب بقي عشان يسامحني، نور سامحتني وهو مش راضي

فارس ينظر له ويقول،،

حاولت كتير، بس رافض خالص، حاول انت دلوقتي تكلمه، هو موده عال العال

عادل بنظرة امل يرد،،

تمام، تعالي انت مكاني عشان اعرف اكلمه قبل ما نور تطلع

فارس؛ تعالي، ربنا بنفخ في صورتك

يقترب عادل منه ويهمس له ويقول،،

لسه مش ناوي تكلمني ياصاحبي

ايهاب ينظر له نظرة حاده ثم يقول،،،

الكلام بينا خلص ياعادل من زمان، مبقاش ينفع تقول كلمة صاحبي دي تاني

عادل بحزن، وندم يقول،،،

لا صاحبي واخويا كمان، انت ناسي العشرة اللي بينا

ايهاب بغضب يردد،،،

انت اللي نستها، انت اللي بعتها مش انا، انت اللي كسرتني مرتين مش مرة واحده، بس المرة التانيه كانت اشد واقوي بكتير اوي، لاني فعلا بعشق نور، والضربه وجعتني اوي ياعادل

عادل بنظرة ترجي يقول،،،

وحياة العشرة والسنين تسامحني، دي نور سامحتني وانت مش عايز، طب وحياة غلاوة نور عندك تسامحني ياشيخ

ايهاب ينظر له وقلبه رق عند سماع اسمها،،،

ربنا يهدي الحال ياعادل، صدقني الايام يا ما بداوي، يمكن يجي اليوم وقلبي ينسي اللي عملته فيا، بس اوعدك عشان حلفتني بأغلي انسانه عندي اني احاول

عادل بنظرة حب يقول؛؛؛

وانا والله حاولت مع نور كتير اوي، انها تسامحك وكنت بقف كتير معاك، وهفضل وراك ياصاحبي لحد ما تنسي، ونرجع تاني اصحاب واخوات زي زمان، انا وانت وفارس

إيهاب بابتسامه يقول،،

ان شاء الله ياعادل

عادل ينظر فيلمح نور قادمه فيقول له،،،

دي نور طلعت اهه ركز بقي لما نشوف هتقوله ايه؟

تظهر نور بفستانها الدهبي، وطلتها البهيه، كانها شمس منوره الدنيا بضياءها، لكن في ظلمات الليل، فقد طغي جمالها علي كل الحضور، والكاميرات موجهه عليها، فتقول،،،

- مساء الخير علي كل الحضور، احب اشكركم علي الحضور، واحب اولا اوجه رساله، او بالاخص رد وعدت بيه اغلي، واحب انسان عندي في الوجود، عشقي الوحيد، ايهاب،،،

وتنظر اليه بكل حب، ثم تاتي الكاميرا علي وجهه ليري المشاهد نظرات عشقه، ثم تاتي كاميرا اخري وتجعلهم بجانب بعض في مشهد عاطفي تعجز له الاقلام وصفه،، ثم تكمل قائله،،،

- ايهاب انا وعدتك امبارح اني اعترف زيك امام الجميع، وانا دلوقتي بقولها بكل حب الدنيا ليك، انا بعشقك، ومسامحاك ياعمري من زمان، بس كنت عايزة اقوي حبنا، عشان مفيش حاجه تقدر تهزه ابدا، ودلوقتي بهدي ليك الاغنيه دي اتمني تنال اعجابك، وإعجاب الجميع،،، ثم تبدأ الفرقه الموسيقية بالغزف وتغني مردده بكل احساسها قائله ،،،

أنا دنيته بحالها وحياته كلها..
أنا أهله وانا ناسه وروح قلبه وحبيبته
أنا اللي لو يغلط مسامحة ف حقها
وانا اللي لما يغيب عليها ترد غيبته

أنا الحضن اللي من تعبه بيهرب ليه
أنا القلب اللي من خوفه بيتحامى بيه
أنا مش واحدة بتحبه وبتموت فيه
دانا بموت في التراب اللي بيمشى عليه

"وتنظر اليه بكل حب وتأكد علي اخر جمله"

أنا عمري ما اتغيرت يوم من ناحيته
وانا اللي راضية تنصفه لو كان ظالمها
وانا اللي لما بيشتكي من وحدته
يبقى معاه قلبي وروحي صحابه يومها

أنا الحضن اللي من تعبه بيهرب ليه
أنا القلب اللي من خوفه بيتحامى بيه
أنا مش واحدة بتحبه وبتموت فيه
دانا بموت في التراب اللي بيمشى عليه
دانا بموت في التراب اللي بيمشي عليه

وتكررها اكثر من مرة،، بكل احساس ثم اوقفت الموسيقي بيدها مشيرا لهم بالتوقف، ورددت بصوتها العذب مشيره اليه باصبعها قائله،،

دانا بمووووت في التراب اللي بتمشى عليه ياااا هووووبا

صفق الجميع بشده، ونهض ايهاب مركضاََ اليها بكل عشق، غير مبالي بالكاميرات التي تصور الموقف، والجمهور الذي ينظر متعجبا لما يفعل، واثناء ركضه يلمح بأعينه شخص واقفا علي بعد يصوب مسدساََ تجاهها، فركض مسرعا وخطفها بين احضانه، كالنسر الذي يخطف فريسته بسرعه البرق، وسط دهشتها، ودهشة الجميع، فتفوق عند سماع الرصاصة تخترق ظهرة، فيسقط بين احضانها بذهول، فتصرخ نور صرخه مدويه تهتز لها الارض، ويركض اصحابه اليه مسرعين، ونور ما زالت تصرخ بهستريه مردده،،

- لا لا لا لا ايهاااب... ايهاااب متسبنيش لا قوم مستحيل،،، ايهاب قوم ياقلبي،، قووم انا نورك معقول هتسيب نورك تنطفي من بعدك... متهزرش فووق وكلمني،، فتح عينك،، وتهزه بشده،، فهمس لها مرددا،،

- نوري حببتي، النهاردة اسعد يوم في عمري، حياتي متغلاش عليكي عشان افديكي بيها ياعمري، انا فرحان اني اخر حاجه هتشوفها عيني انتي،، انا بحبك اوي، كان نفسي اعوضك عن عذاب الشهور اللي بعدنا فيها عن بعض، بس اظاهر ربنا مش رايد اننا نكون مع بعض،، انا بعشقك،، انا بعشق التراب اللي بتمشي عليه،،،"ثم يصمت لاخذ انفاسه، ثم يكمل حديثه مرددا،،" نور احضنيني اوي، حاسس انه هيكون اخر حضن يضمنا، احضنيني بكل شوق وحب السنين اللي عشتيهم بحبي، احضنيني اوي اوي يانور، بحبك وعشت وانا بحبك، اااه.. وهموت وانا بحبك، ياحب عمري،،، ثم توقف عن الحديث، وارتخت يداه

نور بانهيار تحتضنه بشده وتصرخ تنادي مطالبه بسيارة الاسعاف، وتردد،،

-حبيبي اتكلم معايا متروحش مني، انا ممكن اموت، مش هستحمل، ياااارب،،، ياارب، هي الدنيا معانده معايا ليه، انا ما صدقت هبدا معاك، وانعم بحبك، يااارب متخدوش مني يااارب، متسبنيش يا ايهاب، ارجوك قاوم عشان خاطري، ايهاب انت سكت ليه،، ايهاب،، لا مش ممكن،، فوق ياحبيبى، اتكلم،، قول اي حاجه،،، يااارب ده انا ملحقتش اتهني وافرح برجوعنا، يااارب متحرمنيش منه، وتنظر لفارس وعادل فتجدهم منهارين، فيقتربوا منه، يقول فارس مناجيه،،

-ايهاب فوق ياصاحبي، اوعي تسبني، انا مليش حد غيرك،، فيقترب منه عادل ببكاء ويد مرتعشه، فيلمس بيده النبض، فيجد نبضه ضعيف جدا، فيقول،،

-فارس شيله معايا مش هنستني الاسعاف النبض ضعف جدا، ايهاب كده هيضيع مننا
وهنا نور تصرخ وتهزه بشده وتقول،،،

-ايهاب،،، ايهاب فتح عينك حبيبي، رد عليهم، قولهم انك كويس وبخير، ايهاب ايهاب،،،، و"للاسف ايهاب فقد الحركه" ، فشعرت به فصرخت بانهيار، وهي محتضناه وممسكه به بشده، كأنها لا تصدق ما تراه،،،، هل رحل عنها حبيب العمر بهذه البساطه، وكيف ستبقي بمفردها بدونه،، وتأتي اخيرا سيارة الاسعاف لتحمله، ولا احد قادرا ان ياخذه منها فتصرخ بهم بنهيار جنوني بحالة جنونيه قائله،،،،

-سيبوا حبيبي، محدش هياخده مني ابدا، ايهاب مش هسيب نور، لا ايهاب عايش، ايوة عايش، وهنتجوز وتخلف، وهنعيش في سعادة، وهنبني البيت اللي حلمنا بيه، مش كده ياهوبا، قوم قوم وقولهم، قولهم ياهوبا اننا هنتجوز، انا موافقه والله خلاص،، خلاص ياحبيبي مش هعاند والله تاني، بس انت قوم، اقولك تعالي نتجوز دلوقتي انا موافقه،، ايهاب حرام عليك فوووق ياحبيبي بقي انا بنهار،، ايهاااااب

عادل محاولا اخذه منها مردد؛؛

حرام عليكي كده يانور، انتي بتعذبيه، سبيهم ياخدوه، ادعيله، كده حرام عليكي

#عذبني حبگ بقلم إيمووو كمال

نور تصرخ وتبكي بحرقه؛؛

لا متقولش كده، ايهاب عايش، ايوة عايش ممتش، صدقني حتي شوفوا اهو انا حاسه بانفاسه والله، ده لسه كان بيتكلم معايا... فوق بقي ياحب عمري وحياتي

يقترب رجل الاسعاف منه وينظر اليها ويقول بحزن،،،،

للاسف

والي هنا تنتهي احداثنا عند هذا الحد، لتعرف في الحلقات القادمه ماذا حدث لايهاب، ونور وماذا تخبي لهم الايام، وهل ايهاب مات فعلا؟

كل هذا في احداث مليئة بالاثارة والتشويق من روايتي المتواضعة

"عذبني حبگ"
إيمووو كمال ✍️

الرجاء عدم الشتيمه والضرب 👊 ده انا إيمووو برضو اهون عليكوا🙈