قصة فقدان صعب ( كاملة)

قصة (فقدان صعب ) كاملة
انا رحمة متزوجة من سبع سنين..وربنا رزقني بـ عمرو
ولد في منتهى الجمال لكنه مات بعدها بخمس سنين وست شهور
وهوا نايم في غرفته وماكنش تعبان ولا عيان.. مات لوحدة وكان نفسه يروح الملاهي تاني يوم
الموضوع ده عملي اكتئاب لدرجة ان انا وجوزي هيثم سيبنا شقتنا القديمة ونقلنا حاليا في شقة جديدة
وبعدها طبعا دخلت في تعب نفسي شديد .. الدكتور قالي امسحي كل صوره
واي حاجه بتفكرك بيه ارميها وانا مش قادره اعمل كده
ابني مات من الدنيا بس لسه عايش في قلبي .. ابني مات بس لسه سامعه صوته وهوا بيقولي ماما لاول مرة
ابني مات بس عمرة ما هيتنسي.. الصور هي اللي بتهديني والفيديوهات بتاعته واحنا بنلعب معاه
الميديا والتطور والتصوير والفيديو لعنة ماحدش عارف هي قد ايه مضرة .. بتئذيني بس ما قدرش امسح الصور
هيثم بصراحه رغم تعبه النفسي هوا كمان الا انه دايما بيهديني وانا بقول كلام يزعل وهوا ملوش دعوه من عينة
انت مش حاسس بقلبي موجوع ازاي ؟ .. وانت بتبقى في الشغل انا اللي قاعده معاه في البيت 24 ساعه
وبرجع بعدها اتأسف له بس هوا ما بيزعلش عشان عارف اني مضايقة جدا ..دا اللي بيلعب لعبه بيخسر فيها بيزعل
اللي بيقضي وقت كبير مع صحابه ويفترقوا بعدها بيزعل جدا .. مالبلكم بـأم شايفه ابنها بدأ يكبر قدامها وبتبني احلامها عليه
وبتفكر في مدرسته وتعليمه وجامعته وفي يوم وليلة يختفي .. يختفي مش هشوفه تاني .. الا في خيالي
اللي بتمنى انام وافضل عايشة فيه مع عمرو ..
نقلنا شقة جديده بعيدا عن تفاصيل واركان شقتنا القديمه اللي كان فيها غرفة عمرو بالونها والعابها .. بعيدا عن كل ذكرى في كل حتى في الشقة بفتح الدولاب بفتكر لما كان بيستخبي مني جواه ..فبقيت افتح دولابي ادور عليه
وابص عليه تحت السرير .. وابص ورى الستارة بقيت انام تحت سريره في الاوضه بتاعته الاماكن اللي كان بيحب يستخبى فيها ودايما بلاقيه فيها.. هيثم رمى كل اللعب قولتله الا ارنوب لعبته المفضله كنت امسكها واعمل بصوتي ان الارنب بيتكلم معاه عشان اخليه ياكل ويشرب ويعمل الحاجه صح وما يعملش الغلط
يارب نفسي يرجع اشوفه تاني .. واخده في حضني .. ابوسه على خدوده وعينيه ..أحس بنفسه جنبي .. اعمله الاكلة اللي بيحبها ..اللعب معاه .. وارخم عليه وهوا بيغير المسلسل عشان يشوف الكارتون اللي بقيت بتفرج عليه كل يوم في نفس المعاد اللي كان بيتفرج فيه عليه .. متبعاه اكتر منه دلوقتي وبجيب الارنب بتاعه يتفرج معانا زي ماكنت بعمل وهوا عايش وبخلي الارنب ينام جنبي ..

نفسي بس يرجع اقوله كل الكلام اللي كان نفسي اقولهوله لما يكبر اعلمه كل حاجه في الحياة .. الحق احضنه واودعه وانصحه واقوله ماتخفش وانت لوحدك تحت الارض الدنيا مش هتكون ضلمة .. اقوله اني هفضل فكراه ومش هنساه اقوله اني بحبه اكتر من اي حاجه في حياتي
انا اسفه ياهيثم اني مش قادره انسى اللي حصل .. استحملني ارجوك .. هيثم انسان ابن اصول بحبه جدا وهفضل احبه ...
قطع تفكيري جرس البيت لما هيثم رجع قدمتله الاكل وشاف الارنب على الكنبه بصله وكمل اكل والدمعه هتنزل من عينه وبعدها ساب الاكل ودخل ينام .. حتى مش قادرين نقرب من بعض من ساعتها مش قادرة اعمل اي حاجه
وفي يوم وانا قاعدة في البيت بغسل المواعين لقيت صوت حاجه اتكسرت في الغرفه وانا لوحدي وهيثم في الشغل .. جريت عشان اشوف في ايه لقيتها صورتي انا وهيثم وعمرو ..وقعت من التسرحية على وشها واتكسر الزجاج بتاعها
غريبه جدا الصورة اصلا مستحيل تقع والشبابيك كلها مقفله احنا في عز الشتا .. كلمت هيثم يجيب برواز تاني نحط فيه الصورة وبعدها سمعت صوت حاجات كتير بتتكسر بصوت عالي في المطبخ ..
قلبي هنا اتقبض لقيت نفسي ضامه دراعاتي عند قلبي وقافله ايدي ومتسمرة وعيني مبرقه بتاكد اني سمعت صح
فضلت واقفه وعيني بترتعش و بتلفت حواليا في الغرفة ... بعدها قررت اطلع اشوف في ايه؟!
اكتشفت اني طلعت وسيبت الحنفية مفتوحة فملت الحوض وطلعت عالرخام ووقعت الكوبايات ... بس ازاي شويه ميه توقع الكم ده كله من الكوبايات قفلت الحنفية وشيلت الزجاج المكسور وبعدها هيثم جه اتعشينا ونام
وانا فضلت قاعده شويه في الصالة وقبل ما اخش انام سمعت صوت في ودني جاي من ورايا لجملة عمرو كان دايما يقولها .. ماما انا زهقان اوي تعالي نلعب .. بصيت وراية في ثانية وانا قلبي مخطوف لدرجة أن القشعرة حسيتها في راسي كلها في كل شعرة ووشي نمل بجد من الخطفه انا مش متهيئلي انا سمعت صوته جنبي جاي من ورا
فضلت مخضوضه من اللي بيحصل بعدها شربت ميه وخدت دواء الدكتور كان قايلي عليه .. ودخلت نمت جنب هيثم وانا سرحانه وعماله بتخيل صوت الجملة اللي وقعها ماستقبلتوش طبلة ودني استقبلته ضربات قلبي
وبعدها بدات اسمع صوت حاجه برة فتعدلت من نومتي وقعدت عالسرير صوت من بعيد لخطوات بعيده .. عيني دمعت من الصوت لان عقلي الباطن وخيالي استحضر موقف الصوت ده ..الصوت ده متسجل بذكرياته
ده صوت خطوات عمرو لما يصحى من النوم بليل ويجيلي عشان عايز حاجه ..الصوت بيقرب دا صوت خطوات بجد ايوه انا مش متهيألي الصوت عمال يقرب وباب الغرفه موارب الصوت قرب وبقى مسموع كويس وعيني عماله تبرق وبعدها لقيت ....
-------------------------------------------------------------------------
وعيني عماله تبرق وبعدها لقيت خيال عمرو مرسوم على الارض قومت من على سرير وقفت وانا حاطه ايدي على قلبي ومش قادرة اخد نفسي من الفرحة او الخضه ... بعدها قبل ما اشوفه لقيته بيجري على الصالة طلعت انا كمان جريت وراه دورت عليه في كل حتى وانا بنده عليه بصوت عالي عمرو؟ انت فين ياعمرو ؟
دورت تحت الكراسي ورى الستارة وانا بنده عليه زي المجنونه لحد ما لقيت هيثم واقف في نص الصاله بيبص عليا فجأة حسيت اني مجنونة بجد ياترى هيثم شايفني ايه دلوقتي اكيد واحده غير عاقله بالمرة قولتله هيثم انا سمعت صوت عمرو وسمعته وهوا بيجري جنب غرفتنا فضل باصصلي وحضني وطبطب عليا وانا بقوله انا سمعته بجد مش بيتهيألي وهوا مش بيرد عليا لحد ما عيطت جامد في حضنه ..وانا بنده عليه ياعمرو ؟ رد عليا يا عمرو ..واعيط اكتر
تاني يوم فضلت سرحانه وانا بعمل الاكل لدرجه الرز اتحرق مني مرتين وانا بطبخ من كتر منا مش مركزة ولما زهقت كلمت هيثم يجيب معاه اكل مش قادر اطبخ ولا اعمل حاجه .. بعدها سمعت صوت في الاوضه قومت جري اشوف في ايه اول ما دخلت الاوضه لقيت الدولاب بيتقفل وصوت ضحكة عمرو
قربت في خطوات بطيئه وقعدت على الارض وحطيت ودني عالباب خايفه افتح الدولاب يختفي او اكتشف اني في وهم قولتله عمرو .. انت جوة ياعمرو .. ماتخافش مش هضربك انت شاطر وبتسمع الكلام .. زي ما كنت بقوله لما بيستخبى بعدها فضلت قاعده شويه وقومت وقبل ما اطلع من الاوضه سمعت جمله رعشت جسمي كله
ماما ما تمشيش .. وقفت ورجعت تاني قعدت على الارض .. عمرو انت كويس .. انا كويس ياماما بس بابا ليه مش عايزني ارجع .. قولتله ليه بتقول كده وانا عماله اعيط .. قالي مش بيدور عليا زيك .. قولتله لا بابا بيحبك وعايزك ترجع .. يلا عايزة اشوفك واحضنك اطلع من الدولاب .. قالي لا .. قولتله اطلع ما تخافش وهنتفرج على الكرتون سوى
فجأة لقيت الدولاب بيفتح ولقيت عمرو واقف قدامي .. صرخت من الفرحة وخدته بالحضن .. وفضلت ابوس فيه في كل حتى وهوا لسه بيغير ويضحك لما ابوسه في رقبته .. ويصرخ ويضحك وانا بضحك مع عياطي مش مصدقه عمرو رجعلي زي ما راح مني مرة واحده
فضلنا نلعب انا وهوا كتير مع بعض فالبيت وبعدها عملتله الاكله اللي بيحبها وبرده مارضاش يخلص طبقه واتفرجنا عالتلفزيون وانا عايزة اتصل بهيثم اقوله بس قولت خليها مفاجئة ليه لما يرجع من الشغل يلاقيه ويفرح بلاش اخضه دلوقتي لاني مهما قولتله دلوقتي مش هيصدقني... انا مش مصدقه نفسي بجد الوقت عدى بسرعه اوي ووقت رجوع هيثم قرب
مش قادره استنى اشوف فرحة هيثم لما يشوف عمرو قدامه هيعمل ايه .. وقبل ما هيثم يرجع لقيت عمرو بيقولي عايز انام .. قولتله استنى شويه عشان بابا يقعد معاك لقيته بصرخ عايز انام .. قولتله خلاص هتنام .. شيلته ونيمته في السرير بتاعي مكاني وفضلت قاعدة جنبه واطبب على راسه وهوا نايم وامسح على صدره بشويش
وبعدها الجرس رن قومت جري فتحت الباب لقيت هيثم شديته من ايده قولتله تعالى هيثم اول مره يشوفني بضحك كده من فترة لدرجه انه بصلي وعينه فتحت مش مصدق اني بضحك ..دخلت اوضتنا وانا ساحبه هيثم من ايده بسرعه مالقتش عمرو نايم سيبت ايد هيثم وفتحت الدولاب مالقتش حاجه بصيت تحت السرير
هيثم هنا اول مره يتعصب عليا .. قالي كفايه بقى يارحمة عمرو ربنا توفاه خلاص حاولي تنسي دا قدر ربنا مش هنعيش نفضل نفكر فيه كل يوم بالمنظر ده .. وعمرو مش هيرجع تاني بلي تقعدي تضوري عليه انا خايف عليكي هتتعبي نفسيا اكتر لو ما قررتيش تبطلي اللي بتعمليه ده .. بطلي يارحمه ابوس ايديكي بطلي
فضلت بصاله وانا ساكته وقومت نايمه على السرير ومتغطيه ومش عارفه اعيط حتى من كتر التعب اللي كنت فيه كنت حاسه اني عايزة انام بس .. بعدها بنص ساعه هيثم جالي قالي تعالي اتغدي معايه جبت غدا لينا .. وانا مش برد عليه بعدها قام كل ورجع ينام وانا صاحيه باصه للدولاب بفكر في كلام هيثم
وتاني يوم صحيت وفضلت قاعده عالسرير ماقومتش منه حتى وكان الوقت متاخر في عز الظهر .. بعدها سمعت صوت عمرو جاي من الدولاب مارضتش اتحرك ولقيت عمرو بينده عليا بيقولي ماما انا زهقان اوي تعالى نلعب ..هنا ما قدرتش امسك نفسي وقومت لقيته واقف ماسك الارنوب بتاعه فضلت العب معاه
قالي هوا بابا فين ما جاش ليه يلعب معانا قولتله بابا رجع امبارح وانت نايم وزعل منك عشان مشيت قبل ما يسلم عليك ويلعب معاك .. قالي بس هوا اتاخر اوي وكنت تعبان عايز انام .. قولتله حصل خير ياحبيبي هوا نفسه يشوفك اوي .. قالي بس انا سمعتكم امبارح ..قلبي كان هيقف من الخضه قولتله سمعت ايه
قالي سمعت ان بابا بيقول اني مت خلاص ومش موجود .. قولتله لا بابا ما قالش كده .. بابا بيحبك ونفسه يشوفك .. قالي طب ليه كان بيزعقلك امبارح .. قولتله عادي بابا وماما بيتناقشوا في مواضيع كبار ولما تشوف بابا النهارده هتعرف انه بيحبك ..
قضيت اليوم مع عمرو عادي ولما هيثم رجع النهارده وعمرو كان قاعد جنبي بيتفرج عالكرتون اول ما هيثم فتح باب الشقه بصيت عالباب فرحت انه رجع وعمرو قاعد جانبي بصيت على عمرو لقيته مش موجود جنبي
كنت لسه هقول لهيثم عمرو اهو عشان تصدقني لقيته اختفى .. هيثم بصلي ودخل يغير هدومه وانا مش فاهمه في ايه بيحصل .. انا خلاص حاسه ان اعصابي تعبت ومابقتش قادرة استحمل اي حاجه هيثم كلامه صح كل دي تهيوئات مش موجوده ... لازم اصارح نفسي بالواقع عمرو مات ومستحيل يرجع
كل ده تهيؤات من عقلي وخيالي لرفضي لموت عمرو وتمسكي بيه .. اي نعم خيال حلو بس دا مش صح مش صح افضل عايشه على وهم كداب .. وهيثم ذنبه ايه وانا ذنبي ايه دا قضاء ربنا .. الموضوع ده لو اديته اكتر من كده هتجنن اذا ماكنتش اتجننت بالفعل ...
فضلت ساكته ودخلت انام وهيثم النهارده من شهور خدني في حضنه وهوا نايم .. وصحيت تاني يوم بدري عملت الفطار لهيثم قبل الشغل بقى لي شهر ما بعملوش فطار قبل نزوله وجهزت الغدا ونضفت البيت وبعدها سمعت صوت عمرو جاي من الدولاب مش هروحله عقلي بيقولي ما تروحيش وقلبي بيقولي يارب يجي العب معاه
مش قادره وصوت عمرو بدأ ينده عليا ماما مش بتردي عليا ليه ؟ ماما تعالي نلعب انا زهقان اوي .. ماما تعالى بسرعه .. وانا بنضف الشقه ومش راضيه ابص اشوف في ايه ؟ بعدها لقيت عمرو جاي بيعيط قومت معيطه انا كمان وهوا ماسك في العباية اللي لابساها وعمال يعيط وينده عليا ماما مش بتردي عليا ليه

عماله اعيط ومش عايزة ارد عليه عشان دا مش حقيقي اكيد عمرو مات ودفناه ... فضل يعيط بعدها لقيته ماشي وقام واقف على طربيزة جنب شباك وفتح الشباك وقام لافف باصصلي ..وفضل يندهلي ماما انا مش هروح مش هرجع تاني .. ماما مش بتردي عليا انتي مش بتحبيني .؟!
فضلت اعيط ومش بتحرك لحد مالقيت عمرو رمى نفسه من الشباك شهقت بصوت عالي من الخضه وعيني برقت وجريت عالشباك وبصيت مالقتش حاجه قعدت عالكرسي وفضلت اخد نفسي كويس وانا بهدى من صدمة المنظر ده وبعدها خدت الدواء وفضلت اصلي وادعي ربنا يصبرني
هيثم رجع لقى البيت مترتب وانا قاعده مبسوطه مابقاش مصدق بدات انا وهيثم نقرب من بعض تاني ونحاول نخرج نزور صحابنا وقرايبنا القعده لوحدك والحبسه وحشه ..لما تحصل مصيبه كبيرة جايز بعدها بنحب نقعد لوحدنا بس المدة دي لو طولت هتبقى انسان مش طبيعي لازم تخرج وتشوف الناس وتتكلم معاهم
لازم ننسى جايز من نعم ربنا نعمة النسيان عشان كده المشاكل كلها بتعدى مع الوقت وكل مشكله بتاخد وقتها بس المهم انك لازم تخليها تعدي الموضوع مش سهل بس لابد منه
فضلت انا وهيثم على علاقة اقوى من الاول وقربنا اكتر من بعض بس للاسف بدات احس بتعب في جسمي من اسبوعين ودوخة ومش عايزة اقول لهيثم
حاسه اني بقيت تقيله ودماغي مش مركزة حاسه اني هموت ومش عايزة اخض هيثم عليا اكتر من كده لحد ما في مرة رجعت وهيثم قالي مالك قولتله مافيش وتاني يوم واحنا بره سوى وقعت اغمى عليا ساعتها هيثم خدني للدكتور
ولما فوقت لقيت هيثم بيبصلي وبيعيط عرفت ان في حاجه وحشه بس الحمدلله على كل شئ .. بس لقيت هيثم بيقولي ان التعب ده بسبب اني حامل في توأم .

تمت ..النهاية
بقلم_عمر_ليمونه