التحدي الاخير (الجزء الرابع و الاخير)

(4)
سيبنا المكان كله ومشينا احنا التلاته واتنقلنا لبيت بعيد عن المنطقة دى حسيت انى انا السبب فى اللى بيحصل لصحابى من اول اختفاء احمد الغامض لغايه اللى حصل لرامى وانا معرفش ايه اللى ممكن يحصل تانى بسبب تهورى وحبى للفضول مكنتش اعرف المفاجاه اللى مستنيانا هناك
كانت الساعة 11 بالليل لما لاقينا نفس الراجل الغريب اللى قابلناه ف الفندق و ف الاوضة اللى ف المقابر مستنينا واحنا خارجين من المكان العجيب ده وزى اول مرة بصاته لينا غريبة واحنا ساحبين رامى وفضل ماشى ورانا وهو شايل ف ايديه شنطنا اللى معرفش اصلا جت له منين وامتى
البيت اللى وصلنا عنده كان ف مكان اشبة بالصحراء وهو موجود وسطها زى افلام وحكايات الرعب دخلنا وفضل الراجل ملازمنا ومره واحده الراجل اختفى ولاقينا شنطنا محطوطة ع الارض البيت من دورين كان مهجور زى مايكون مغارة مليان عفش قديم ومتهالك رغم انه واسع جدا من جوة طلعت ومعايا رامى للاوضة نرتاح اما كمال فشال الشنط ف ايديه وحصلنا ودخلنا الاوضة اللى هنبات فيها كانت تقريبا هى المكان الوحيد اللى يصلح للسكن اوضة واسعه جدا فيها تلات سراير ودولاب كبير
فتحنا الشنط وقعدت انا وكمال نرص هدومنا ف الدولاب وغيرنا هدومنا علشان نرتاح وساعدنا رامى هو كمان ونقلناه على سريره
بس لما جينا احنا ننام لاقينا نفس الصندوق تانى ف ركن من اركان الاوضة فتحركت ناحيتة وفتحته انا المرادى
لاقيته فاضى وفيه ورقة متكومة ف جمب فتحت الورقة وقريت
(ان هذا التحدى مصمم خصيصا لاصحاب القلوب القوية ولذلك فلا مكان للخوف والتردد فالنهايه المحتومه هلاك محقق للمتخاذلين
التحدى الاخير : عليكم اختيار طريقة لانقاذ الساحر العظيم واسترجاع ابناءه والا فلن تجدوا الغائب ولن يعود مجددا )
قفلت الورقة وحطتها ف الصندوق ونمت بعد ماهم ناموا وعلى الساعة 12 بالليل سمعت نكش وخبط تحت ف الصاله نزلت اشوف فى ايه ومجرد مانزلت النور قطع ف البيت كله ولاقيت نور شمعه جاى ناحيتى واتفجات باللى مكنتش متوقعه لما قرب منى
احمد ......!! هو الشخص اللى ماسك الشمعة لابس قماشه شبه الكفن وعينية سودا وشكلها مرعب وبيطلع منه صوت غريب شبه فحيح التعابين فضل يقرب منى وبايده التانية حط ايده على كتفى
صرخت واغمى عليا
النور رجع ولاقيت نفسى ع السرير وكمال ورامى حواليا حكيت لهم كل اللى حصل واللى لاقيته ف الصندوق وقلت لهم ان احنا لازم نكمل التحدى للاخر مهما حصل
كمال : طيب لو كان احمد عايش زى مابتقول مش يمكن يكون مات م اللى شافه ف المقابر الموضوع ده مش امان ي صحبى
رامى : انا مش قادر اتلم على اعصابى من ساعه اللى حصل عند الراجل ده وحاسس ان موتنا واحد ورا التانى هيكون بسببك عايز تكمل او تنسحب دى حاجة ترجعلك انما احنا هنشوف طريقه ونمشى من هنا الصبح بدرى ناموا بقى وبكرة نشوف هنعمل ايه؟
نمت تانى وعمال احلم بكوابيس متداخله ف بعض شفت نفسى ف صحرا وقاعد ف حفرة ومش عارف اطلع منها وكمال واحمد ورامى شكلهم مرعب وعيونهم واسعة جدا وبتنزل منها خطوط دم وواقفين قدامى وعمالين يضحكوا ومش عايزين يخرجونى م الحفره ومرة واحده النار ولعت حوالين الحفرة وكل شويه تزيد وتقرب من وشى فضلت اصرخ وهما برضة لسة بيضحكوا وفجاه ظهر خيال من وسط الصحرا وشاور لمكان النار فانطفت وقرب منى ولما تحققت منه لاقيته هو الساحر العظيم فقولت له بتردد وخوف :انت عععاييز منى ايه؟ انا بموت واصحابى بيتفرجوا عليا
بص لى بصة كلها شر وتحدى وصرخ فيا بصوت عالى : انت غبى ..... انت مش هتطلع من هنا ابدا كلهم خدمى وبينفذوا اوامرى انا الساحر العظيم وانا حذرتك من الانسحاب ومسمعتش كلامى اوعى تكون فاكر انهم صحابك بجد بص على مرمى بصرك كده هتلاقى صحابك الاغبيا اما دول فولادى التلاته اللى اتفقت معاك ترجعهم لى ورفضت
بصيت وانا جوا الحفره لاقيت 3 اكفان مرميه قدامى وشوشهم بس اللى باينه مش قادر اميز وشوشهم من كتر الدخان اللى حواليهم
حاولت اقاوم واطلع م الحفره وكل ماحاول احس كان حاجة بتشدنى لجوة تانى
لاقيته بقولى خلى بالك من نفسك يامغفل الدور الجاى عليك وضحك بصوت عالى وبصلى بصه غضب ومشى وبالتدريج هما التلاته اختفوا هما كمان
قاومت لغاية مقدرت اطلع م الحفرة قربت منهم وتاكدت انهم هما فعلا احمد....!! كماااال.....رامى
وفجاه وشوشهم اتحولت لمسوخ وعينيهم فتحت وبصوا ناحيتى
صرخت وقمت مفزوع من الحلم
قمت وصوت الادان ف ودانى معرفش سمعته ازاى بصيت جمبى ع السرير ملاقيتش حد فيهم
نزلت ادور عليهم ف البيت كله ملهمش اى اثر والمكان بيتبدل من حواليا ولاقيتنى ف نفس الاوضة اللى كان فيها الراجل الساحر ده
دخلت عنده لاقيته قاعد على نفس الكرسى وبيبص ناحيتى باستهزاء وبيقول : كنت عارف انك هتيجى وهتتطاوعنى وتنفذ اوامرى وترجعلى ولادى
قولت له انت بتحلم مش هيحصل ابدا وهسيب المكان كله وهمشى انا وصحابى
ضحك وقاللى : هههه صحابك قصدك دول ؟ وشاور بايده الناحيه التانيه علشان الاقى 3 شباب اشباه صحابى متكتفين والنار من تحتهم وجلدهم بيقع وعمالين يصرخوا ويبصوا ناحيتى وكان هو معاه كتاب عمال يقرا منه (بحق ملوك الجن اامركم بالحضور الان امركم بتنفيذ الامر اجعلو اجسادهم خالصه لي لقد حان الوقت لاستقبال ابناءى المخلصين الان الان ف الساعة والاجل
لاقيت التلات شباب اتغيرشكلهم وبقو قريبين من شكل الساحر اجسامهم طولت وعيونهم وسعت والتلاته قاعدين على كراسى العرش وقاموا كلهم وراحوا ناحيته وركعوا تحت رجله
شفت بقى مش قلت لك انا اللى انتصرت ف الاخر روح دور بقى على صحابك يامسكين
وشفت نفس الكلب الاسود اللى كان عند المقابر ومرة واحده هجم عليا وقعدت اصرخ والدم بينزف من جسمى وقعت ع الارض من كتر التعب مغمى عليا
فوقت لاقيتنى ف الفندق !!! ومفيش حد جمبى ع السرير افتكرتهم خرجوا ع الظهر دخلت الحمام اغسل وشى لاقيت مكتوب ع المراية : تحدى الموت هل من مزيد ؟
ببص ف الارض لاقيت رسومات غريبة وع الحيطان وفي رطوبة طالعة م المكان وسخونة ف جسمى وسمعت صوت حنفية البانيو وستارة البانيو بتتحرك وفيه خيال وراها فتحت الستارة لاقيت رامى متكوم ف البانيو وعينيه مش موجوده وحوالين رقبته اثار لخنق قفلت الستاره وخرجت م الحمام وطلعت اجرى وفجاه المكان اتبدل للسرداب اللى بيودى للمقابر نزلت المقابر لاقيت احمد بيتحرك ناحيتى وبيقرب وفجاه شكله اتغير للساعى بتاع الفندق ولاقيت كفن متغطى قدامى كان كفن احمد
جريت وخرجت من المقابر ورجعت تانى لنفس الفندق ومجرد ماطلعت لاقيت الراجل الغريب ده قدامى كان بيبتسم لى باستفزاز محستش بنفسى غير وانا بهجم عليه فضلت ماسك فى رقبته اخنق فيه لغايه ماوقع قدامى ومات مبقتش عارف اتصرف ازاى طلعت الاوضة ولاقيت مفاجئة تاانية
كمال متعلق بحبل ف سقف الاوضة وعينيه جاحظة لبره شكله كان مخيف لاقيت سكينه جمب السرير قعدت اجرح بيها دراعى والغريب انى مكنتش حاسس بالم وعمال اضحك وساعات اصرخ بهستريا انا اللى قتلتهم ....انا اللى قتلتهم !!!ومرة واحده محستش الا بحديده تقيله نازلة على دماغى
فوقت ف المستشفى وجمبى امى وابويا اللى رجعوامن السفر ف اجازة ولاقيت امى بتقولى حمد لله ع السلامة ياعمرو اول ماعرفت انا وابوك باللى حصل جينا على طول متخافش ياعمرو انت كويس الله يرحمهم يابنى ادعيلهم هما ف مكان احسن من هنا بكتير
ناديت على اسمائهم وانا بصرخ ومنهار كمال....!!! احمد.....!!رامى جم الممرضين يلحقونى بالمهدئات لحد ماغبت عن الوعى
فوقت لاقيت ابويا بيكلم الدكتور ف المستشفى وبيقوله : ابنى هيتحسن يادكتور
تقرير الحاله بياكد ان المريض عمرو عبد الله يعانى من هلاوس سمعيه وبصريه وانه قتل المدعو عبد الصمد سعفان البواب اللى عندكم ف البيت تحت حاله مشهوره ف الطب النفسى اسمها المشى اثناء النوم دى بتحصل والمريض مابيكونش واعى للى بيعمله
وبياكد كمان انه ادعى انه راح اماكن ليس لها وجود
طب والمسابقة اللى بيقول عليها يادكتور ؟
دى تهيؤات من عقله الباطن خلقها حب المغامره اللى عنده
باب الاوضة خبط ودخل ضابط مباحث قرب من ابويا وقاله : احنا عرفنا ان صحاب عمرو اتقلبت بيهم العربية من فوق كوبرى قصر النيل وان عمرو ابن حضرتك كان معاهم فجيت اخد اقواله لان فيه شهود عيان كانوا موجودين ف مكان الحادث
ابنى مش ف حاله تسمح بسؤاله دلوقتى سيادتك لو عرفت حاجة تفيد التحقيق هبلغك
مشيو ابويا وامى وقفلوا الباب عليا وفضلت لوحدى ف الاوضه
يعنى اناااا مجنون ؟؟ وكل اللى حصل ده من عقلى الباطن ؟ ازاى هههه لا.... انا مقتلتش حد انا بشوفهم كل يوم وبيجولى يكلمونى كل يوم الساعة 12 بالليل
انا متاكد انهم عايشين انا كتبت اللى حصل لى والله اعلم هكون فين بعدها
ثانية واحده موبايلى بيدينى اشعار ان فيه رساله
- مبروك انت العميل المميز لشركتنا ليك رحلة مجانية للعالم الاخر
انا دلوقتى ف معاد مع الموت لو وصلتك الرساله دى اعرف انى ف عالم تانى وانى اجتزت التحدى الاخير
الباب بيفتح
صرخــــــــــه
تمت
التحدى_الاخير💀💀

دعاء حجازي