ماااو 😾

خلصت امتحانات الثانوية العامة النهاردة و لأن أنا و اصحابي تافهين و عقلنا لسه عقل اطفال طلعنا على البيت المهجور اللي بنعدي من عليه كل يوم و قررنا أننا نرن الجرس على شقة شقة فالبيت ده و نطلع نجري ، أه والله زي ما بقولكوا كده ، رنينا الجرس على الشقة اللي فالدور الأول و بعد كده عالشقة اللي فالدور التاني و لسه بلف وشي لقيت قدامي قط اسود واقف عالسلم عمال يخرج منه صوت غريب و فجأة لقيته سكت و خرج منه صوت راجل عجوز قال ..( هموتكوا واحد واحد لو جيتوا هنا تاني ) ..... انا شوفت المنظر و سمعت الصوت حسيت بجسمي بيترعش و اصحابي واقفين متسمرين مكانهم و مرة واحدة اتفتح باب الشقة و اللي فتحه كان راجل عجوز بدقن طويلة ولابس عمة و جلابية و برقلي و قال ... ( هموووتك ) .... من الصدمة و من اللي شوفته محستش بنفسي و غبت عن الوعي ....

فقت لقيت نفسي نايم على سرير و الدنيا ضلمة حواليا ، قمت من عالسرير اللي كان ف أوضة شبه أوضتي لكني مش قادر افسر هى أوضتي ولا لأ بسبب الضلمة ، مشيت لحد ما وصلت لباب الأوضة اللي فتحته و أول ما فتحته لقيت برضه المكان ضلمة لكني في شمعة محطوطة على حاجة زي ترابيزة و قصاد الشمعة كان في قط قاعد عالتربيزة و بيبص ع الشمعة ، ملامحه كانت مخيفة بسبب الضلمة و نور الشمعة اللي منعكس على وشه ، قربت منه و أول ما قربت لقيته بيبصلي و بيخرج منه صوت موااء خلاني مش قادر اتحرك ولا حتى اتكلم من الرعب فجأة سمعت صوت خطوات جاي من ورايا ، لفيت وشي علشا اشوف مين لقيت أختي و وشها أسوووود و ماسكة كشاف و بتبصلي نظرات غريبة خلتني للمرة التانية غصب عني فقدت الوعي علشان افوق و الاقي نفسي نايم على سريري و حواليا أمي و أختي اللي كان ف أيدها قطة و عمالين يبصولي و يضحكوا ، بصيت لهم و انكمشت ف نفسي و قولتلهم ..
- أيه القط ده يا ماما .
بصتلي أمي و ضحكت و قالتلي ..
- بس يا موكوس يا تافه يا اهبل .
بصيتلها و انا مستغرب و مذهول من كلامها و قولتلها ..
- اهبل أيه و تافه أيه ، انا رنيت الجرس و بعد كده لقيت قط و رجل و محستش بحاجة و لما فوقت لقيت قط بيقولي ماااو ...
قاطعتني امي و قالتلي ...
- ما كل القطط بتقول ماااو يا تافه بس انت البيت اللي رنيت عليه الجرس مش مهجور ولا حاجة ده بيت قديم و عايش فيه رجل عجوز غلبان و انت عشان خواف و اهبل خوفت منه و من القطة اللي شوفتها عالسلم و اغمى عليك و صحابك جابوك لحد هنا و حكولي اللي حصل و لما فوقت النور كان قاطع و انا كنت منورة شمعة فالصالة و كان قاعد قصادها القط بتاع بنت خالتك اللي ادته ل أختك امبارح و لما اختك سمعت صوت راحت لعندك بالكشاف و انت أول ما شوفتها اغمى عليك تاني يا جبان يا اهبل ..
بصيت ل أمي و ل أختي و انا مستغرب و بصيت للقط اللي ف أيد أختي اللي لقيته باصصلي و بينونو بصوت مزعج و رخم ، بصيت ل امي و انا خايف و قولتلها ...
- أهو يا ماما اهو بيقول ماااو والله .
لقيت امي مسكت القط من أيد اختي و لسه هتقربه نحيتي قومت جريت و فضلت تجري ورايا فالشقة و تخوفني بيه و من يومها و انا بترعب من القطط و من صوتها رغم أن اللي حصل كان سببه خوف زايد مني أنما بقيت بكره أي صوت بيقول مااااااو ...... تمت

محمد_شعبان
العارف