البيت المسكون 👻 الجزء الاول
#البيت_المسكون
#الجزء_الاول
12 ديسمبر 2015..
من 3 سنين بالظبط من انهاااااردة
الاحداث معظمها بعمارة اهل سيف
عمارة 7 ادوار
الدور الاول مكتب ديكور لسيف
الدور التانى مكتب محاماه لعلى
الدور التالت شقة العيله
الدور الرابع شقة سيف الى هيتجوز فيها
الدور الخامس شقة على الى هيتجوز فيها
الدور السادس والدور السابع ... فاضين ومحدش راضى ياجرهم .. ولما حد بيرضى مبيكملش شهر
والسبب مش معروف ...........
....................................................................
ماما:- سيف ..سيف .. اصحى بقى زهقتنى
هو كل يوم ع الحال دة من ساعه م اتخرجت وانت تسهر للصبح ع لاب زفت بتاعك وتنام وتصحالى المغرب .. وتقولى شغل شغل اصحى يابنى الله يرضى عليك
سيف:- صباح الفل يا ست الكل مالك متعصبه ع الصبح ليه
ماما:- يخربيت برود التماسيح الى فيك دة ماتقوم تفطر وتتوضى وتنزل تصلى الجمعه مع اخوك على
انا مخلفنش غير على ديما مفرح قلبى ديما رافع راسى
سيف:- طيب طيب اسبقينى ودقيقة وربع وتلاقينى ف ديلك..
ماما:- ديل مين يا قليل الادب لا اخلاق ولا تربية انا عملت اى فى دنيتى يارب .
طلعت مامت سيف وقفلت الباب وراها ..وكمل سيف نومة وصحى ع اذان المغرب
سيف:- يالهوى اى دة صوت الاقامة انا لو مصلتش الجمعة ماما ممكن تقتلننى .. فين القفطان ... فين الحمام...
لبس سيف القفطان واتوضى وطلع يجرى لقى باباه ومامتة وعلى قاعدين بيتغدوا بالصاله
بابا سيف:- خير يا حبيبى صليت الجمعة بالبلكونة ؟
سيف:- لا يا حج بتقول اى ع الصبح يلا بسرعة ع نلحق صلاه الجمعة
على :- بس انهاردة الحد ع فكرة !
سيف:- نعم ؟
مامت سيف:- اتنهدت .. ايوة الحد انت نايم من اول امبارح
سيف:- خبر اسووووود كان عندى تسليم بروجكت امبارح
رد بابا سيف:- الخميس ؟
رد على بسرعة:- السبت يا بابا يقصد ..
جرى سيف على اوضتة وغير هدومة ونزل جرى ع مكتبة بنفس العمارة الدور الاول..
وبعد نص ساعة طلع ...
اول مدخل بصلهم بصو غضب ..
راحوا فطسوا ع نفسهم من الضحك
سيف:- خليتوا شكلى اهبل اتصل بالعميل اقولة اسف ع التاخير معرفتش اكلمك امبارح ولا اجى اسلمك الشغل عشان ماما كانت تعبانة و..
مامت سيف:-قلعت الشبشب وحدفت سيف بية وقتلتله يا كداب يا كلب بتكذب وبتمرضنى كمان
سيف بعضب:- خليتوا شكلى اهبل .. الراجل قالى المفروض نتقابل بكر يا سيف تاخير اى ..قلتله ازاى مش انهاردة الحد والمفروض التسليم السبت
قالى حد اى يا سيف انهاردة الجمعة
على :- وقع فى الارض من الضحك ...احسن يا اهبل عشان بعد كدة تظبط يومك ونومك وتعرف انت فين بالدنيا
راح سيف مسك على من قميصة وكان هيضربة من عصبيتة
راح باباهم اتدخل وبعدهم عن بعض ...
ودخل سيف اوضته وهو متعصب ومرضاش ياكل .
حضرت مامت سيف الغدا ودخلته لسيف الاوضة ..
سيف:- سيبينى ف حالى مش عاوز اطفح حرجتونى قدام العميل ...
مامت سيف:- اهدى يابنى منت الى متسرع ويومك ملخبط حد يصحى الساعه 6 برضو شوف اهى وصلت ل 8ونص وانت لسة مفطرتش
سيف:- سيبينى فحالى لو سمحتى
بعد نص ساعة ... على دخل الاوضة لسيف..
سيف:- خير ؟
على :- هنفاتح ازاى بابا وماما بموضوع خطوبتى من هند ؟
سيف:- برة عنى الحوار دة انت عيل واطى ومش هقفلك بحاجة دة غير انى ما صدقت امى بطلت زن ونست موضوع جوازى الى مسكهولى من يوم متخرجت انا يادوب 26 سنة مش 40 على الى بتعملة دة كانى بنت وهعنز حاجة زفت
على :- كدة يا سيف .. انت عارف ان هند متقدملها عريس ولو مانجزتش نفسى ممكن تضيع منى
سيف:- ساذج جدا يا على لا هتلاقى عريس ولا نيلا اكيد بتشتغلك ع تتلحلح وتجرى تلبس ...
على :- سيف عيب الكلام دة هند مش محتاجة تحور انا واعدها اخطبها قبل السنادى متخلص بقالنا سنة متخرجين وهى صابرة و.....
سيف :- بس بس بااااااس حاضر يا على سيبنى اتصرف بالموضوع دة بالليل افاتح بابا ع العشا اتفضل هاتلى الايس كريم الى بالتلاجة ..
على :- بس دى بتاعتى مش كلت بتاعتك امبارح.؟
سيف:- نعم.. بتقول حاجة !
على :- حاضر حار ونار ....😠
اوضة على ....
على :- ياهند ماتقلقيش .. انا كلمت سيف. وهو هيفاتح بابا انهاردة . الوووو يابنتى اقفى بمكان فى شبكة ... الوووو .... الصوت اتعدل ..
اهدى يا هند بتعيطى ليه قلتلك هكلم بابا انهاردة
طيب ادينى ميادة اكلمها ...
الو عاملة اى .. واللهويا بنتى هكلم بابا انهاردة هدى هند بقى عشان كدة بتوترنى اكتر .. بابا مش هيرفض ..والله مش هيرفض .. هي فض لية يعنى ..
انا فتحت مكتب بالعمارة وبدئ يجيلى قضايا والشقة بابا بانيلى انا وسيف شقتين برضو بالعمارة يعنى مافيش سبب يمنع..
هديها بس وان شاء الله خير .. سلام
بالصاله وقت العشا...
سيف:- بتضحكوا تانى .. مش هتبطلوووا...
بابا سيف:- كان شكلك اهبل اوى وانت مصدق ان انهاردة الحد
سيف:- اللهم طولك يا روح
بابا سيف:ولو مطالتش يا خويا هتعمل اى
على يقاطعهم ويغمز لسيف:- ميبقاش قلبك اسود باقى يا برنس
سيف بصوت واطى :- كلب السرايا بتاع مصلحتة .
يا حج انا كنت عاوز افاتحك بموضوع ..
بابا سيف:- خير؟ فلوس تانى انسى ؟
سيف:- استغفر الله ديما فاهمنى صح 😂
بابا سيف:- انسى لما ترجع الى عليك الاول
سيف:- لا بتكلم جد يا حج .. دلوقتى على عاوز يخطب ...
مامت سيف تقاطعهم :- انت بتستعبط عاوزنى اخطب للصغير قبل الكبير.
سيف:- ياماما يا حبيبتى انتى عندك رجاله مش بنات دة غير اننا ب2015 ومحدش بقى بيفكر بالطريقة دى دلوقتى ..
وانا مش هتجوز حاليا نهاااائى
مامت سيف:- طيب والله العظيم....
بابا سيف يقاطعها :- بتحلفى ع مين يا ام سيف .. هو خلاص هتلغى الرجالة الى قدامك اى الى بتعملية دة
خلاص يا على بكرة نروح نخطبلك بنت خالك باخر سنة تربية وبنت زى الفل ...
على :- لا يا بابا انا عاوز اخطب زميلتى بالكلية
بنت محترمة ومتربية وبنت ناس
مامت سيف:- كمان كنت تعرفها وماشى معاها
سيف:- ياماما عيب الكلام دة بيقولك زميلته مافيش الكلام دة
بابا سيف :- طيب خدلنا معاد مع بباها يا على
على:- باباها متوفى هو ومامتها وهى عايشة مع اختها عند خالهم ...
مامت سيف:- يتامى لا حول ولا قوة الا بالله
سيف :- شوفتى يا ظالمة
مامت سيف:- اتلم والا اقسم بالله احلف منا رايحة ..
سيف:- لا يا ست الكل انتى الخير والبركة
وقام وسيف وباس راس مامتة ونزل مكتبة..
عمل لنفسة ماج نسكافية بلاك.. وشغل فيروز.. كيفك انت.. وعلى الصوت ..
وبدأ يدندن معاها ويشتغل ...
بعد 10 دقايق سمع صوت قطط كتييييير برة قدام باب الشقة
سيف:- يخربيتك يا على ديما تسيب بابا العمارة والقطط تدخل .. حاجة مقرفة مهمل وعاوز يتجوز
بيت المهمل بيخرب قبل بيت الظالم
فتح باب الشقة ...
لقى قطتين لونهم اسووووووود وديلهم رفيع وطويل واقفين على دماغهم .. وبيلفوا جامد حوالين نفسهم وبينونوا باصوات مرعبة
سيف:- اعوذ بالله من الشيطان الرجيم ... اية دة ..
هش هش هش هش
باب الشقة اتقفل بضهر سيف وفضل سيف واقف ع السلم برة والقطط ادامة مستمرة تعمل الاصوات المرعبة دى..
صوت الاغانى اتقفل ورجع اشتغل تانى بصوت اعلى لكن اشتغل بالعكس الكلامات من الاخر للاول والموسيقى من الاخر للاول وكلة داخل فى بعضة ومافيش حاجة مفهومة ...
سيف قعد يصرخ من المنظر والغريب انة مكنش شايف السلم عشان يطلع يجرى ع شقة العيله ولا شايف السلم عشان ينزل يجرى بالشارع ...
السلم اختفى مكانة اسوووووووود ضلمة ...
فضل سيف يصرخ ويحاول يفتح باب الشقة ... ابدااااااا
لحظات وانتهى كل حاجة ... اختفت القطط .. الاغنية رجعت اشتغلت عااااادى ....
قلبة تقريبا هيقف ...
بلحظة لقى نفسة قدام شقتهم بيهبد ع الباب طلع السلم بسرعة من كتر الرعب
فتح على :- خير يا سيف مالك عرقان كدة ليه فى اية ماله يابنى ؟
سيف:- فين بابا فين بابا
بابا سيف:- مالك يا سيف ف اى ؟
سيف:- بابا فاكر الى كان بيحصل زمان و.....
قاطع بابا سيف سيف وقالة :- هترجع تخرف ... انا مش فاضيلك ولا دة مقلب جديد ... حسبى الله ونعم الوكيل .. ربى عيالك يا سميحة ...
سيف:- بس يا بابا والله العظيم ..
قاطعه بباه برضو وقالة :- تصبح ع خير عندى شغل الصبح ومش فاضيلك
سيف دخل اوضتة وعينة كانت مليانة دموع بس معيطش ...
دخلة على :- فى اى يا سيف حصل اى ...؟
سيف:- ولا حاجة سيبنى واطلع لو سمحت .
وراح زاقق سيف على برة الاوضة وقفل الاوضة ....
فلاش بااااااك ..........
من 21 سنة .....
سنة 1994م
سيف كان عمرة وقتها 5 سنين وعلى 3 سنين .
سيف:- ماما انا خايف مش عارف انام بالاوضة لوحدى .. نيمينى جمبك زى على
مامت سيف :- بس على تعبان يا سيف وسخن عشان كدة نايم جمبى عشان اتابع حرارتة ..
بس يا ماما انا خايف .. مولازى(القرد اللعبة ابو زنبلك ) بيقعد يشتغل طول الليل ومش بعرف انام منة ...
مامت سيف:- معلش ياسيف طلعه حطة برة الاوضة وسيبة يلعب لوحدة ولما تصحى رجعة اوضتك تانى ..
سيف:- يا ماما عملت كدة امبارح .. فتح الباب ودخل ... وجة فوق المكتب وفضل يشتغل ومعرفتش انام منة ...انا خايف يا ماما ..
بابا سيف يصحى ....
بابا سيف:- اى الى جابك عنا يا سييييف غور روح نام ف اوضتك وبطلع دلع ...
سيف :- يابابا مولازى مش بيخلينى ان....
قاطع بابا سيف وقال :-لو مطلعتش ورحت اوضتك وقفلت الباب وراك حاااااالا هقوم احرقك بالشمعة ..
سيف :- خلاص انا اسف
ومشى سيف وكان خايف يمشى بالشقة الانوار ضعيفة والشقه كبيرة واوضتة بعيدة عن اوضة اهلة ...
فضل يرتعش سيف وهو ماشى خايف يوصل لاوضتة ... عشان الى بيشوفوا فيها كل يوم فوق استيعاب طفل بسنة ولكن محدش حاسس بيه ..
سيف سامع صوت طالع من اوضتة .. صوت اطفال بتضحك وتلعب بكورة بتهبد بالارض .. ومولازى(القرد اللعب ) شغال ...
مش بس مولازى لا والقطر كمان والبيانو حد بيعزف علية ...
قرب سيف من باب اوضتة وفتحة .......وفجأة .......
فتح سيف باب اوضتة وفضل واقف متنح .. لقى مولازى شغال ع الارض وحوالية ورق متقطع من جوة كراسة الرسم بتاعتة
ومرمى ع الارض ومرسوم فية رسومات كان اطفال راسمينها بس رسومات مرعبة .. مش مفهومة اوى
كان فى رسمة لشئ لية رجل وحدة وشعرة واصل للارض بدون ملامح بوشة وحوالية شخبطة كتير ع شكل دوامات
ورسمة لبنتين تقريبا هدومهم مش نضيفة ومكان قلبهم حفرة متشخبط بيها وشعرهم منكوش ..
وباقى الورق متشخبط فيه ..والالوان مفتوحة ومرمية بكل حتة بالارض
مسك سيف الرسومات وهو خايف ومش فاهم مين رسمهم .. ممكن على اخوة؟ ولا هو رسمهم وناسى ولا دى كراسة رسم حد من صحابة ولا..
كان خيال سيف واسع بشكل مرعب ف قرر يوريها لصحابة الصبح بالمدرسة ويقولهم ان مولازى (القرد اللعبة )رسمها ...
حب سيف يلاقى اهتمام من اى حد اى اهتمام يعوضة النقص الى حاسة فى البيت .. حتى لو اهتمام كاذب .. قرر وتخيل ونوى انة يلاقى لنفسة سبب يخلى الناس تفكر فيه وتهتم بيه . حتى لو من صحابة لو هيحكيلهم قصة مش واقعية فيستغربوا من مولازى الخارق الى مافيش منة غير عند سيف...
بس سيف مش فاهم مين شغل مولازى .. طيب مين طلعله الكراسة والالوان من الشنطة ...
طيب ايد مولازى فيها طبله ازاااااى رسم ع
سيف طفل عمر معداش 5 سنين مش فاهم حقيقة الموقف ..
الامر كان اصعب وارعب من ان عقل طفل بسنة يتخيلة ..
تاني يوم سيف راح ورا زمايله الرسومات .. كانوا مبهورين معقول القرد اللعب عمل كدة .. وقالولة اد اى هو محظوظ وعندة حاجة مش عندهم كلهم
الموضوع معداش بسهولة ... للاسف .. زميل سيف سعيد راح حكى لمامتة ومامتة اصلا دكتورة نفسية .. مامت سعيد حست ان سيف مش طبيعى وكلامة مريب عن مولازى وخافت انة ياثر ع عقل سعيد ابنها .. ويبوظ افكارة
جت اشتكت للادارة وحكت الى حصل
و طلبت من المديرة انها تقابل سيف عشان تتكلم معاه بخصوص مولازى والرسومات الغريبة
بالفعل المديرة طلبت سيف يجى يقابل مامت سعيد وطلبت منة يحكيلها الى حصل ...
مامت سعيد:- سيف حبيبى ازيك انا مامى سعيد حبيت اتعرف عليك ...سمعت ان عندك قرد ...
قاطعها سيف
سيف:- مولازى... انتى جاية تسألينى عنة مش كدة
حس سيف من جواه اد اى بقى مهم مامت صاحبة جاية مخصوص تسال عن قصة القرد
مامت سعيد :-بالظبط يا سيفووو شكلك ولد ذكى وشاطر بص انا جيبالك اى
وطلعت مامت سعيد كيس كبير مليان حلويات واديتة لسيف..
سيف بص بصة كانة بيقولها انا مش طفل ع تعملى معايا كدة وابتسم لها ابتسامة سخيفة وخد الكيس ركنة ع جمب ..
مامت سعيد :- ممكن تحكيلى بقى القصة بالتفاصيل ..انا حابة اتعرف ع مولازى اكتر
سيف بتنهيدة كدة ؛- اكيد يا طنط حاضر
وبدأ يحكى سيف
سيف:- مولازى قرد بلاستك قاعد معاه طبله وعندة حاجة ورا لما الفها يفضل يتحرك ويمشى ويطبل ...
بس شكلة بايظ عشان بقى يتحرك من غير ملف البتاعه دى
مامت سيف:- يعنى اى يا سيف مش فاهمة ؟
سيف:- يعنى يا طنط مولازى دة بيحس زينا وبيتحرك وبيمشى من غير ما نشغله..
كل يوم بالليل اصحى الاقية بيلعب لوحدة وبيرقض وبيطبل وحوالية الدباديب بيسمعوة
وحد من الدباديب بيعزف ع البيانوا وحد بيشغل القطر وحد بيلعب بالكور
لا وكمان بيطلع كراسة الرسم والالوان وبيرسم ..
انا مش بعرف انام يا طنط طول الليل يعملوا دوشة باوضتى ....
مامت سعيد حست بالخوف للحظات وبعدين افتكرت ان سيف طفل وممكن يكون خياله واسع ..
وسالته:- الرسومات معاك يا سيف؟
سيف:- معايا .
مامت سعيد :- ممكن اشوفها ؟
سيف:- اكيد
راح سيف جابهم من الفصل ورجع
سيف:- اتفضلى يا طنط
خدت مامت سعيد الرسومات ولما فتحتهم حسة لخضة وبقبضة ورعشة بجسمها واتاخدت اوى واتفجعت من منظر الرسم ...
وبعدين جمعت نفسها وخدت نفس عميق وراحت سأله سيف سؤال مفاجئ عشان تشتت افكارة وتحاول تفهم الوضع صح..
مامت سعيد :- حلو رسمك اوى يا سيف اى الرسم الجميل دة شكلك هتطلع فنان لما تكبر .. ماما ساعدتك وانت بترسمهم ؟
رد سيف:- مولازى .. مولازى يا طنط الى رسم مش انا ......
رد سيف ع مامت سعيد خلاها تحس ان حد كب ماية ساقعة ع جسمها ... حتى نظرات سعيد ليها كانت مش مريحاها....
شكرت مامت سعيد سيف وقالتله يهتم بدراستة ولية هدية جميلة لما ينجح...
وقابلت مامت سعيد المديرة
مامت سعيد للمديرة :- انا مش مرتاحة لتصرفات سيف .. الولد دة مش طبيعى خالص احنا لازم نتواصل مع اهله ونفهم منهم الوضع اكتر عشان الموضوع شكلة خطير وكبير ...
المديرة :- حاضر .. وطلبت من السكرتارية تعمل استدعاء ولى امر لسيف.....
بابا سيف تانى يوم راح للمديرة ..
بابا سيف :- خير ممكن اعرف فى اى ؟
حكت المديرة كل التفاصيل لبابا سيف وورتة الرسومات...
مسك الرسومات وبص فيها كتير .....
وبعدين راح مقطعة وحدفة ع المكتب و رد وقال .. خيال اطفال .. المفروض انتوا كترباوين تبقوا فاهمين السن دة كويس وفاهمين الخيال الواسع .. بس شكل المكان دة مش مناسب لابنى لو سمحتم حضرورلى ورقة انا هنقله من المدرسة وهودية مدرسة الى فيها بيفهموا
استغربت المديرة رد فعل بابا سيف ..بس سابته على راحتة ...
لما بابا سيف روح البيت ومعاه سيف .. ومسك سيف من ودانة وبرقله ...وشدها جامد وقاله :- لو حكيت تانى لاى حد اى حاجة بتحصل فى البيت هنا .. هموتك ...
مامت سيف سمعتهم وجت تجرى :- فى اى يا محمود بتضرب سيف لية وكانوا عاوزينك فى اى بالمدرسة ..
راح زقها من وشة ودخل الاوضة
سالت سيف :- فى اى يا سيف
سيف كان مخضوض ومرعوب من باباه ومرضاش يحكى اى حاجة
دخلت مامت سيف على محمود بابا سيف الاوضة عشان تفهم فى اى ....
لقيته بيعرق جااااامد بالرغم من انهم كانوا بيناير وماسك عروسة قماش فى ايدة كانها قديمة او معمولة من قماش قديييم ....
وماسك ابرة وعمال يشكشكها ويردد
سحل .مط .سد سحر صق .سق سق سق
كان مدى ضهرة لمامت سيف.. بس حس بيها او حد نبهه الله اعلم
وراح ادور بسرعه وبص عليها وبرقلها
يتبع
#تاليف_هويام_شعيب
التعليقات على الموضوع