الانسان الرجيم

الأنسان الرچيم

ها انا أقف خلف ذلك الكهل الذي أعتدت على طاعته منذ سنوات ، ذلك الكهل الذي يجلس على كرسيه بتلك الغرفة التي أعتاد أستقبال زبائنه بداخلها و التي يملاؤها دخان ذلك البخور الذي يحترق بداخل المبخرة الكبيرة التي أمامه و التي تجلس من خلفها أمرأة بدينة ترتدي فستان أسود و يحتل ملامح وجهها مساحيق التجميل ، تلك المرأة التي تبكي بكاءاً مصطنعاً و هى تتحدث قائلة ....

- انا معرفش الناس مالها يا شيخنا بقت بتاكل حقوق الناس ليه ؟؟!
يرد عليها ذلك الكهل الدجال الملقب بالشيخ نوار قائلاً ...
- مالك يا ابتسام ؟ ، ايه اللي حصل تاني ؟
تستمر تلك المرأة في بكاءها المصطنع و تستكمل كلامها قائلة ...
- أهل جوزي مطلعين عيني و مش عايزين يدوني بقية حقي ف ورث جوزي ، الله ينتقم منهم و يجحمهم هم و هو ف نار جهنم ، مش كفاية ان انا فضلت مستحملة جوزي ٥ سنين مع أنه اكبر مني ب ١٠ سنين و فضلت مستنياه يموت علشان اورث و ف الأخر ماماتش إلا اما طلع عيني بعد ما حطيتله سم ف الاكل و بعد كده قطعته و حطيته ف أكياس و روحت بعته لمحلات الكباب و الكفتة اللي عندنا ف المنطقة و اتعرضت لمواقف كتير بايخة و اصحاب المحلات يفاصلوا معايا ف سعر كيس اللحمة ، تخيل يا شيخ نوار بعد ده كله مش عاوزين يدوني ورثي كامل و مطلعين عنيا ف المحاكم عشان ال ٢٠ الف جنيه الباقيين ليا من الورث ، و عشان كده انا جيتلك النهاردة يا شيخنا علشان تعملي ليهم عمل او حجاب يخليهم يغلبوا شيطانهم و يدوني بقية حقي ف ورث جوزي بسلام و من غير محاكم لأن كل ما اتكلم مع واحد فيهم يزعقلي و يفرج عليا الدنيا و يقولي ملكيش عندنا حاجة ، و انا بصراحة يعني تعبت و بقت حاجة استغفر الله العظيم ، انا مش عارفة يا مولانا الشيطان بقى مسيطر على الناس كده ليه ، اعوذبالله من الشيطان الرچيم.

و هنا لم اتحمل تلك الأهانة و أظهرت نفسي لها و قلت لها بغضب ..
- لااااااا ، لحد هنا و كفاية ، بقى تقتلي الرجل و تحطيله سم و بعد كده تقطعيه و تبيعي لحمه لمحلات الكباب و الكفته و بعد كده تاخدي ورثه و علشان ناقصلك ٢٠ الف جنيه تروحي قايلة اعوذبالله من الشيطان الرچيم !!! ، لاااا انا شيطان من الجن و بقولك انا نفسي ميجليش قلب اوسوسلك تعملي اللي انتي عملتيه ده .

تشهق المرأة و يتسع بقبق عيناها و تنظر لي باستعجاب و تقول ..
- مين الجدع اللي بعين مفتوحة و عين مقفولة و لونه رمادي ف احمر ده اللي ظهر من وراك يا شيخ نوار ؟
ينظر نوار لها ثم ينظر لي و يقول ...
- ده سليط ابن طهطيل ، خادمي من الجن .
و هنا نظرت له و قلت ...
- لا يا عم ، من النهاردة انا لا خدامك ولا ليا علاقة بعالم الأنس بتاعكم ده خاااالص ، و إذا كان على العهد اللي انت واخده مع ابويا طهطيل علشان اخدمك بسببه ف انا مليش دعوة بيه و هرجع عالمنا تاني و اسلم نفسي ل ابويا و اقوله انا نقدت العهد معاك و معنديش أي مشكلة أن انا اتحبس ف عالمنا و اتعاقب أشد عقاب كمان و أي حاجة هتحصلي ف عالمنا هتكون أهون بكتير من أن انا افضل ف عالمكم و كل ما تعملوا مصيبة تلبسوها فينا و تقولوا اعوذبالله من الشيطان الرجيم ..
هنا نظرت لي تلك البدينة بتحديق اكتر و قالت ..
- يالهووي ده شيطان بجد ، انصرف يا اخويا انصرف ، بلاش تأذيني ، اعوذبالله منك .
نظرت لها نظرة استعجاب و قلت ...
- بقى انتي خايفة من أن انا أأذيكي يا ولية انتي !! ، ده انتي تأذي قبيلة جن بحالها ، لأ و كمان بعد كل اللي نيلتيه ده بتقولي اعوذبالله مني ؟!! ، روحي انتي اللي منك للي خلقني و خلقك ، اعوذبالله منك انتي ، اعوذبالله من الانسان الرچيم يا ولية يا مفترية انتي و الرجل الدجال النصاب ده .....

و هنا انصرفت و عدت لعالمي و اخبرت أبي الملك (طهطيل) بأنني نقدت العهد الذي بينه و بين الدجال نوار و لن أعود لخدمته مرة أخرى ، و بذلك حَكم عليِ والدي ان أقضي بقية حياتي بالسجن و حقيقةً ذلك الأمر أهون لي كثيراً من أن أقضي عمري في عالم الأنس أخدم و أطيع كائن يسرق و يكذب و يقتل و بالنهاية يقول ( اعوذبالله من الشيطان الرچيم ) ، كائن متناقض يفعل الخطيئة و يستعيذ بالخالق مني و بعد كل ذلك يطلق على الفرد من بنو جنسي لقب (رچيم) و لكن بحقيقة الأمر هو بنظري كائن قاتل و مفسد ف الأرض ، و خاصةً بعد ما حدث من تلك المرأة تأكدت تماماً من أن الأنسان هو الكائن الرچيم و لست أنا ........ تمت

محمد_شعبان
العارف