نقطة و سطر جديد (الحلقه السادسه)
الفصل السادس
(اتمسح لأنه منزلش كامل و ده كامل )
نور قربت منه مرة واحدة و حدفت السكينة علي الارض وقع علي الارض و قعدت جنبه : انا يا عمرو .. انا بحبك
عمرو : ايه ؟ بتحبيني علي ايه فيا ايه حلو عشان تحبيني عشانو انا لا معايا فلوس ولا شقة
نور : ربنا يسامحك بقي انا بحبك عشان يكون معاك فلوس
عمرو :انا مقولتش كدا بس انتي اللي اتسرعتي انا بقولك الحقيقة حتي لو بتحبيني بتحبي واحد مش معاه فلوس ولا مكان ولا قادر يصرف علي نفسه .. تحبي اقولك يلا نتجوز صح هتعيشي معايا ازاي ؛ طب و اهلك هيوافقوا مثلا انك ترتبطي بواحد زيي
حطت ايديها علي شفايفه و دموعها بتنزل منها :اسكت بقي اسكت .. انا مش عايزة حاجة من الدنيا دي غيرك انت .. مسالتش نفسك انا بعمل كل ده ليه باجي علي نفسي رغم انك بتتعصب عليا كتير .. مسالتش نفسك انا ليه متمسكة بيك ، انا مش عايزة اي حاجة من الدنيا غيرك ، انت لو كان حصلك حاجة انا كنت هموت
عمرو : لا بعد الشر عليكي
عمرو مرة واحدة شدها لحضنه من غير ما يتكلم لمدة دقيقة
عمرو : اشمعنا انا ؟؟
نور : عشان انت احسن راجل في الدنيا .. و عشان اي واحدة تأمن علي نفسها و هي معاك
عمرو : بس كدا
نور بعد عن حضنه و بصتله :و عشان انا بحبك .. انا كنت كل مرة بحاول ابعد عنك و مش عارفة
عمرو : بس انا حياتي شبه متدمرة
نور : يعني انت موافق بس عشان حياتك صح
عمرو : موافق ايه بس اهدي .. انا هنسي كل اللي قولتيه ده وانتي كمان انا زي ما فهمتك حياتي واقفة يعني لا اقدر احب ولا ارتبط
نور : امممم فهمت
عمرو : علي فكرة انتي جميلة جدا و اي راجل يتمني يسمع منك الكلام ده بس صدقيني انا هظلمك انا مش هعرف يا نور
نور : طيب انا همشي انت بقيت كويس صح
عمرو : اه
_____________________________________
اسلام كان معاه نور في المول و بتختار معاه لبس
نور :بس يا لوما المحلات دي مفيهاش استايل التسعينات بتاعك أقصد الاستايل بتاعك يعني
اسلام :اه مانا عايز اعمل نيو لوك و اغير شوية و عايزك بقي تختاري معايا كام حاجة كدا جينز بقي بس كتير من البنطلونات الجينز ها
نور باستغراب : ها اشمعنا يعني اخيرا اقتنعت برأيي
اسلام : تعرفي تختاري معايا و انتي ساكتة ولا اشوف حد من هنا يختار معايا و خلاص
نور : لالا حد ايه بس انا يا لوما هختار معاك
بعد دقايق نور اختارت تيشرت و بنطلون جينز
نور : ادخل قيس دول كدا علي ما اشوفلك حاجات تانية و بالمرة نشوف مقاسك ولا لا
اسلام : ماشي
دخل اسلام البروفة و هو بيخلع القميص
اسلام : بتتريق علي هدومي دي تحفة جدا ايه فهمها دي قال قميص بابا قال لا بس دول حلوين برضو اهو تغيير
خرج بعد ما انتهي من تغيير ملابسه
نور بإعجاب : تحفة بجد ايه الجمال ده انت ايه اللي خلاك اخويا بس
اسلام حدفلها القميص القديم في وشها
اسلام : اتلمي هه
نور ضحكت : مش احسن ما اعاكس حد تاني يرضيك يعني
اسلام : كنت موتك طبعا .. حلو بجد
نور : وتكة يا لوما
اسلام: انتي بتجيبي الكلام ده منين
نور : يلا بقي قيس دول كمان ، البنطلون طلع مقاسك صح
اسلام : اه
_____________________________________
روح البيت و هو بيتفرج علي هدومه الجديدة و بيشيل هدومه القديمة من الدولاب و بيرتب الجديد
اسلام : انا مش عارف عملت كدا ليه .. يعني انا عملت كدا عشان متضايق منها و احرجتني ولا عشان اثبتلها اني بعرف البس كويس جدا .. طب ما انا اللي كنت حابب كدا و بعدين انا مالي بيها انا اصلا كنت هغير استايلي .. لا طب ما نور كلمتني كذا مرة و انا رفضت اسمع كلامها
_____________________________________
في فيلا سمر
كانت جوري قاعدة في الحديقة و معاها ألوان و اسكتش رسم و بترسم ( محروس ) بواب الفيلا اللي بيضحك غصب عنه
محروس : مش كفاية يا جوري هانم عايز اشوف شغلي .. يا ست جوري
جوري بصتله : ايه في ايه ده فن و لازم يخلص
محروس بغضب :مانا بقالي شهر حضرتك كل يوم بترسميني مزهقتيش
جوري : اسكت بقي يا منحوس مش عارفة ارسمك
محروس : يا ست جوري قولتلك اسمي محروس والله محروس مفيش منحوس ده خالص
جوري : اسكت بقي و اضحك عشان اكمل الرسمة
في اللحظة دي حسام و سمر رجعوا من الشركة و حسام بيشغل الكلاكسات
محروس :الأستاذ حسام هيرفدني يا جوري بالله عليكي سيبيني اقوم افتحله
جوري بتحذير :لو قومت تفتحله انا هخلي مامي ترفدك انت حر
محروس : لا خلاص انا كدا كدا شكلي اترفدت
جوري : و بعدين حسام معاه مفتاح خليه يتعلم يفتح لوحده هو كل حاجة انت يا منحوس
محروس :محروس محروس
جوري : وات ايفر .. محروس من منحوس مش فارقة كتير اقعد بقي اكمل الرسمة
محروس : طيب
جوري بعصبية : اضحك
محروس بيضحك : اهو
جوري : اثبت بقي
دخل حسام و معاه سمر
حسام بعصبية : انت يا زفت يا محروس بقي انا عمال اضرب كلاكسات وانت قاعد تترسملي
محروس : والله يا حسام باشا الست جوري هي اللي قالتلي اقعد متتحركش عشان ارسمك
جوري بنرفزة: حسام قولتلك 100 مرة متزعقش ل منحوس وانا برسمه عشان لما بتزعقله بيزعل و مبيرجعش يضحك تاني بسرعة
حسام : وبعدين بقي في لماضة بنتك دي ما تشوفيها يا سمر
سمر : جوري عيب كدا اطلعي اعملي الهوم وورك بتاعك
جوري : مامي بكرة الجمعة و كمان انا خلاص اخدت الأجازة
سمر :يوووه خلاص سيبي الزفت محروس يشوف شغله
_____________________________________
مر يومين
عمرو كان واقف في البلكونة و سرحان و بيقول لنفسه :
_ مالك ، خلاص استقريت انك قاعد هنا و رتبت نفسك علي الحياة الجديدة .. ههه ميكانيكي يا عمرو بعد ما كان عندك مصنع و شركة من أنجح الشركات في مصر ، بقيت عايش في حارة شعبية بعد ما كنت ساكن في 6 أكتوبر .. خلاص دخلت علي مرحلة جديدة
بص علي بلكونة نور
_ حاسس انك مبسوط عشان بقالك يومين مبتشوفش نور و بتتهرب منها .. ده انت حتي مبتنزلش الشغل عشان متشوفهاش لا بالعكس انا مش مبسوط خالص نور وحشتني اوي بس هي مالهاش ذنب في كل اللي حصلي
دخل اوضته و بعد دقايق سمع صوت البلكونة بتتفتح اتخض لما شاف نور
عمرو مندهش : يخرب عقلك ايه ده انتي جيتي ازاي
نور بتنفض التراب من علي هدومها
نور بهدوء :عادي نطيت من بلكونتي ل بلكونتك و دخلت
عمرو اندهش: انتي مجنونة صح
نور خرجت من الأوضة و شافت اللي توقعته فعلا المفتاح في الباب و عمرو خرج وراها
نور ضحكت : حاطط المفتاح في الباب عشان لما انا افتح باللي معايا ميفتحش .. لا حركة صايعة
عمرو : ها .. لآ ده اكيد يعني نسيته
نور : يا روحي نسيته يومين .. بقي بتتهرب مني
عمرو : و اتهرب منك ليه ماضية عليا شيكات
نور ضحكت : عسل يا عمور
عمرو : انا مش قادر استوعب اللي انتي عملتيه ده طب مخوفتيش تقعي او حد يشوفك
نور : يابني كدا كدا الناس هنا بتنام من المغرب و المحلات قفلت استنيت لما كلو قفل و جيتلك
عمرو : يخربيت جنانك ده
نور : وحشتني اعمل ايه يعني
عمرو :افرضي حصلك حاجة يعني
نور :خوفت عليا
عمرو :لا اخاف عليكي ليه
نور : يا واد عليا انا برضو
عمرو : نور هو انتي مدرسة فرينش صح
نور :اه
عمرو : جاتلي فكرة كدا بس مش عارف هتوافقي عليها ولا لا
نور : ايه هي
عمرو :انقلك مدرسة جوري و بالمرة ده هيساعدني اشوفها اكتر
نور : اوكيه بس نستني الترم التاني حتي لان الترم ده خلاص خلص يعتبر
عمرو : تمام بس بكرة هروح المدرسة و اتفق مع المديرة
نور :تمام ماشي
عمرو : يعني انتي موافقة
نور :اه طبعا عادي .. صحيح مفيش أخبار عن طليقتك
عمرو : اللي عرفته من اخر مرة شوفت جوري أنها اتجوزت حسام
_____________________________________
في اليوم التالي ....
في الشركة
كان حسام في مكتب السكرتيرة
حسام : ازيك يا قمر
نجلاء : احم حسام مينفعش كدا سمر هانم ممكن تشوفك هنا و تفهم غلط انت مش عارف أنها بتغيير عليك
حسام قرب منها : ايه يا نوجا يا حبيبة قلبي و بعدين انتي وحشتيني اوي
نجلاء : طيب يا حبيبي بعدين بعدين
حسام : ماشي يا حبيبتي
____________________________________
شقة حسان _ في المطبخ
اسلام : صباح الخير يا ماما
شاهيناز : صباح الخير يا حبيبي
اسلام : انا عايز ساندويتش سريع عشان عندي مراقبة امتحان بدري انهاردة
شاهيناز : ايه الهدوم اللي انت لابسها دي
اسلام بياخد قطمة من الساندويتش : دول هدوم جديدة اللي اشترتهم امبارح مع نور
شاهيناز : مبروك يا حبيبي حلوين اوي عليك
اسلام : الله يبارك فيكي يا ماما انا ماشي سلام
_____________________________________
في مدرسة جوري مكتب المديرة
عمرو : مس تيسير انا كنت طالب من حضرتك طلب كدا
تيسير: اتفضل يا عمرو
عمرو : يعني كنت طالب من حضرتك تنقلي عندك واحدة قريبتي تشتغل هنا هي مدرسة فرينش و شاطرة جدا
تيسير : انا فعلا عندي عجز في مدرسين الفرينش و الماث و كنت محتاجة حد عنده ضمير
عمرو : طب حضرتك تحبي ابعتهالك امتي
تيسير: تيجي بكرة تعمل انترفيو و اشوفها
عمرو : بس محتاجها ل سنة اولي
تيسير : اشمعنا ؟
عمرو : هي حابة تدي لفصل جوري و لو حضرتك حابة اي فصل تاني معاهم مفيش مشاكل
تيسير : طب تيجي بكرة و نشوفها
عمرو : تمام متشكر جدا يا مس تيسير
_____________________________________
في المدرسة
دخل اسلام الفصل يراقب و كان اخر يوم في امتحاناتهم ، كلهم مصدومين و منبهرين بشكله و ندي كانت مش مصدقة انه سمع بكلامها
اسلام بجدية:يلا حلوا بقي عشان الوقت بدأ
_____________________________________
هيام اتصلت ب عدي
هيام: ايه يا حبيبي
عدي: وحشتيني
هيام :وانت كمان .. عايزة اقولك علي حاجة
عدي : خير!
هيام : متقدملي عريس
عدي بعصبية : متقدملك عريس ازاي اومال انا ايه كيس جوافة
هيام : يا حبيبي لا بس بابا موافق و قالي انك لسة مش عارف تقنع أهلك علي الشروط ف غصب عليا أقابل العريس لما يجي
عدي : متطلعيش لحد يا هيام وانا ولله هحاول
هيام : ماشي يا حبيبي مانا ولله بحاول امنعه
____________________________________
خارج الفصل
ندي : مسيو ..
اسلام التفت:أيوة يا ندي خير في حاجة
ندي : ايه يا عم الشياكة دي حلو التيشرت ده
اسلام :اه مانا عارف
ندي : هقعد بقي أسبوعين مش اشوفك
اسلام : اه شوفتي
ندي موبايلها بيرن
ندي : ايه يا ماما .. ايه يا مامي كدا حلو ؟حاضر مش ناسية هدية فرح يوسف .. حاضر سلام
اسلام باستغراب :فرح يوسف ؟
ندي : اه
اسلام : اصل ليا واحد صاحبي أخوه هيتجوز اسمه يوسف معقولة يكون هو
ندي : اسمه ايه
اسلام : يوسف قاسم
ندي : يا خسارة لا مش هو .. طب اخوه متجوز
اسلام : لا
ندي ضحكت : طب ما تعرفني علي اخوه اللي مش متجوز ده
اسلام اتضايق: مبحبش الهزار ده علي فكرة
ندي :ولا انا بحبه علي فكرة
اسلام : يبقي متهزريهوش تاني علي فكرة
ندي ضحكت : حاضر
_____________________________________
مر أسبوعين
كان اول يوم ل نور في مدرسة جوري و كمان في فصلها
نور : تمام يا حبايبي قولولي بقي الأرقام بالفرينش
معظمهم رفعوا ايديهم طلبت من جوري تقول
جوري : un_ deux _ trois_quatre_ cinq_six_sept_huit_neuf_ dix
نور : شطورة برافو عليكي اسمك ايه
جوري :جوري
الجرس رن
نور : طيب اتفضوا يا حلوين روحوا البريك
خرجوا كلهم ما عدا جوري اللي قدرت تعرف شكلها من صورها
و كان فيه كام بنت قاعدين مع بعض و جوري طلعت الاسكتش و بترسم قربت منها نور و قعدت جنبها
نور : ايه ده انتي اللي راسمة الحاجات الحلوة دي
جوري : ااه
نور : حلو اوي مين ده
جوري : ده بابي
نور : رسمك حلو اوي يا
جوري : انا اسمي جوري
نور :وانا ممكن تقوليلي نور عادي لكن في الكلاس مدموزيل نور
جوري :اوكيه
نور : مالك مطلعتيش تلعبي مع صحابك ليه
جوري : عشان هما بياكلوا ايس كريم و بيشربوا عصير و حلويات وانا ممنوعة منها
نور : يا روحي طب ايه رأيك انا بقي هاكل معاكي و هشتري اكل من الكانتين زي اكلك كدا ده حتي مش بحبهم اوي
جوري : انتي كمان عندك السكر
نور :لا يا روحي بس انا ممكن اكل زيك عشان متحسيش انك لوحدك
ابتسمت جوري : وانا هرسمك عشان انتي شطورة
باستها نور من خدها : يا روحي انتي اللي شطورة و مين الوحش اللي بترسميه ده
جوري : ده حسام الشرير
نور ضحكت : مين حسام ده
جوري : جوز مامي بس شرير اوي بيضايقني وانا مش بحبه و محدش بيحبه خالص غير مامي
_____________________________________
كان عدي في اوضته بيكلم هيام
عدي : ازيك يا روحي ..وحشاني جدا جدا .. كنت برن عليكي مبترديش
هيام( بصوت جامد و قاطعت كلامه) : لحظة واحدة ممكن.. انا اتخطبت ..
عدي بعصبية : ايييييييه .. انتي بتقولي ايه .. ازاي ؟؟ وامتى ؟؟ وليه تتخطبي ؟؟هو انتي مش مخطوبالي
هيام : عدي انا اسفة بس بابا للأسف غصب عليا اوافق و اتخطبت ل أشرف
عدي بعصبية :يعني ايه اتخطبتيلو ازاي
هيام : مانا قولتلك يا حبيبي مش عارفة وانت مش عارف تقنع أهلك .. معرفتش اقنعه يرفض غصب عني وافقت
هيام : هو كان متقدملي من بعد ما اتخطبنا بس مكنش يعرف و لما عرف من بابا انه فيه مشاكل بينا قرر يفاتحه في الموضوع و طلب كل حاجة بسرعة خطوبة وجواز وكل حاجة .. وبابا وافق..وانا حاولت اماطل وارفض .. بس مفيش فايدة خلاص .. الموضوع انتهى .. انا دلوقتي مخطوبة
عدي : ايه التهرييييج ده .. ازاي بتقولي كده .. شوفي اعملي حسابك الخطوبة دي لازم تتفركش ..اتحججي باي حاجة .. لازم
ترفضى.. وانا هحاول أقنع ماما و بابا تاني و لو لسة رافضين انا مستعد اشتغل شغلين و احوش فلوسهم و انفذ طلبات باباكي .. بس اوعديني انك تبوظي الموضوع.
هيام : يا عدي افهم.. موضوعنا خلاص انتهى.. كتب كتابي وفرحي بعد شهر .. سلام
عدي : بس انتي ممكن ترفضي ممكن ترفضي يا هيام
كان بيردد آخر جملة علي أمل أنها سامعاه لكن هي كانت قفلت السكة في وشه دخلت نور الأوضة لما سمعته متعصب و بيزعق كانت فعلا واقفة ورا الباب و خايفة تدخل و اخيرا قررت تدخل
نور : اهدي يا حبيبي و فهمني في ايه
عدي : هيام ابوها غصب عليها تتخطب و بتقول فرحها بعد شهر و هي معرفتش ترفض و ده بسبب ابوكي و امك لو كانوا وافقوا علي الشروط مكنش ده كلو حصل لكن هما رفضوا
نور طبطت عليه : اهدي يا حبيبي طب اتصل علي باباها
اتصل علي باباها رد عليه
صابر : نعم يا عدي
عدي : ازاي يا عمي تخطب بنتك لواحد تاني هي دي الأصول يا عمي هي مش مخطوبة يعني
صابر : بس بس متجبش سيرة بنتي علي لسانك .. انت مجرد عريس كنت خاطبها و رفضت شروطنا او أهلك رفضوا و جالها اللي هيسعدها و هيدفع اكتر منك وانا خلاص فركشت خطوبتك من بنتي و اياك تفكر تكلمها تاني كلها شهر و تتجوز و هي اللي اختارت عريسها بنفسها ولو فكرت تيجي همسح بكرامتك الارض .. سلام
كان كلام صابر كفيل انه يسد اي باب امل ل عدي محسش بنفسه الا و هو بيعيط و نور حاولت تهديه
عدي : انا حاسس انه كداب ده بيقولي أنها اختارت عريسها بنفسها
نور : لا مش كداب هي لو عايزة ترفض كانت رفضت
عدي : كلميها يا نور عشان خاطري كلميها
نور : حاضر حاضر بس انت اهدي
اتصلت نور علي هيام
نور: ايه يا هيام الكلام ده
هيام : خير يا نور
نور : اللي مش عايز حاجة مبيتغصبش عليها كان ممكن جدا تقولي لا
هيام :يووه عايزاني اعمل ايه يعني مقدرتش اقول لا و اكسر كلام ابويا
نور بنرفزة: لا كان ممكن تعترضي كان ممكن انتي مش عارفة أخويا عمل ايه عشان يخطبك
_____________________________________
بعد مرور يومين
كانت قاعدة في كافتيريا الكانتين بتاكل و قامت تشتري عصير و رجعت تاني
كان فيه شاب بيتكلم في الموبايل و قاعد علي الكرسي بتاعها
..... : مفيش يابني انا عند ماما في المدرسة اهو و لو كدا هجيلك بقي بالليل انا والعيال لالا متقلقش ماشي يا معلم
نور بعصبية : انت ازاي قاعد مكاني
بصلها ياسين : افندم ... طب سلام يا حازم دلوقتي هكلمك بعدين
نور :قوم ايه مش شايف حاجتي اللي موجودة قدامك و مشوفتنيش وانا بشتري العصير من الكانتين و رجعت
ياسين : سوري ماخدتش بالي معلش
نور : اوكيه .. اديك اخدت بالك ممكن بقى تمشي و تروح تشوفلك مكان تاني تقعد فيه
ياسين :الكافتيريا دي ملك الجميع
نور :وانا مالي دي مش مشكلتي انا كنت قاعدة هنا قبلك
ياسين : مكتوب عليها اسمك يعني
نور :و كمان ظريف .. ممكن بقى تاخد خفة دمك دي و تروح اي حتة تانية
ياسين :طب هدي نفسك معلش .. ايه رأيك مثلا لو تقعدي علي الكرسي ده و انا هقعد مكاني عادي و لو راسمة علي الكرسي هقعد انا علي الكرسي التاني مفيش مشاكل
نور ضحكت ضحكة صغيرة : لا خفيف اوي
قاطع خناقهم صوت مس تيسير الناظرة
تيسير :ياسين
ياسين : الحقيني يا ماما
تيسير :في ايه انت بتزعق انت و نور ليه
ياسين ضحك : ازيك يا نور عاملة ايه
نور :انتي تعرفيه يا مس
تيسير:ده ياسين إبني و دي نور مدرسة فرينش
ياسين :بصي يا مس نور
نور قاطعته : مدموزيل نور
ياسين ضحك :طيب بصي يا مدموزيل نور انا لو اعرف ان الكرسي كان مكتوب باسمك مكنتش نزلت من بيتنا اصلا
نور :ههههه ايه الخفة دي .. انا لازم امشي عندي حصة دلوقتي لان من كتر خفة دمك مش هقدر استحمل و شكلي هضيع حصتي سلام
ياسين : وبعدين بقى
تيسير :معلش يا ياسين تعالي مكتبي
ياسين :هي لسانها طويل كدا ليه
___________________________________
عدي كان بيحاول يتصل ب هيام و هي بتكنسل عليه ..
اما شاهيناز بتتكلم مع صاحبتها في مشكلة ابنها
شاهيناز : ابني بقي عصبي اوي و بيكسر الأطباق او اي حاجة قدامه و مشيلنا الذنب يا إيمان انا تعبت بجد مش عارفة اعمل ايه ده حتي مش قادر يقتنع ان هي مش كويسة فعلا و طماعة
إيمان : يبقي لازم يعرف الحقيقة يا شاهيناز ان شاء الله حتي تروحي للبنت دي و تعرضي عليها فلوس توافق تقوله الحقيقة
شاهيناز : و لو رفضت
إيمان : يبقي هي كويسة فعلا و مغصوبة علي الجوازة و ساعتها بقي ساعدي ابنك يرجعلها ولو اني أشك في النقطة دي
شاهيناز : ماشي
_____________________________________
كانت نور خارجة من شقتها و قابلت ( ساندي ) طفلة جارتها عمرها 8 سنين في الصف الثالث الابتدائي و معاها طفل في عمرها كان طالع معاها علي السلم
ساندي :نور ازيك
نور :ازيك يا ساندي عاملة ايه يا روحي
ساندي :تمام
الطفل : طيب انا رايح الشغل يا سو عايزة حاجة
ساندي :لا يا حمادة خلي بالك من نفسك يا حبيبي
شهقت نور بصدمة :يلهوي .. حبيبك مين يا بت
ساندي : ايه يا نور انا و حمادة بنحب بعض و بعدين ادعيلو عشان هو تعبان اوي اليومين دول
نور : معقول يكون طهروه
ساندي :لا ده عشان بيشتغل مع جدو في المحل عشان يجيبلي المصاصة اللي بحبها
نور : قلب امه ربنا معاه بس انتي يا ساندي مش صغيرة يا حبيبتي ده انتي في 3 ابتدائي اومال حمادة في سنة كام
ساندي : لا انا مش صغيرة و حمادة في 2 ابتدائي
نور : ده اصغر منك
ساندي :ماهو عشان كدا انا بحاول انفضله لان كريم اللي معايا في الفصل بيحبني وانا بحبه
نور : اومال حمادة ده يبقي ايه
ساندي :لا ده فاكس
نور : ياختي اتهدي ده انا وانا في سنك كان كل همي اني اهرب من البوليس اللي في لعبة جاتا 3 ، ده انا مش لاقية كلب يعبرني وانتي مرتبطة ب اتنين !! هو انا وحشة يا ساندي ؟؟
ساندي ضحكت : لا طبعا ده انتي قمر يا نور
نور : ميرسي يا روحي انتي اللي قمر ؛ تفتكري مثلا يمكن عشان انتي ارفع مني و اقصر مني شوية معجبين بيكي
ساندي بصتلها من فوق لتحت : امممممم ممكن برضو .. باي بقي
نور : باي
_____________________________________
علي سطح اللي عمارة اللي ساكنة فيها هيام كانت شاهيناز قاعدة معاها
شاهيناز : هيام انا عارفة انك كنتي مرتبطي ب ابني عشان مصلحة بيصرف عليكي و مستواه عالي و لما رفضنا الشروط بتاعتكم و جه العريس اللي هيدفع اكتر سيبتي عدي و بمزاجك كمان مش كدا
هيام : الله ينور عليكي يا طنط كلك نظر
شاهيناز : تاخدي كام و تقولي لعدي الحقيقة ابني فاهم اني السبب و انك لحد دلوقتي كويسة و كنتي بتحبيه بجد كدا كدا انتي مش هتشوفيه تاني و هتتجوزي بس قوليلو الحقيقة هي الحقيقة بتوجع اه بس بتريح بعدين ها قولتي ايه
هيام : هتديني كام
شاهيناز : 1000 جنيه كويس
هيام : ما تبحبحيها شوية يا طنط
شاهيناز : 1500
هيام : و مالو ميضرش برضو و أوعدك اني هقوله كل الكلام المحشور في قلبي من يوم ما عرفته
شاهيناز : ماشي اتفضلي الفلوس اهي و اتصلي عليا وقتها اسمعك وانتي بتقوليلو و نصهم هبعتهملك مع اي حد
هيام : الله .. انتي مخوناني يا طنط
شاهيناز : لما تعملي اللي قولت عليه باقي فلوسك هتوصلك
هيام : ماشي يا دكتورة شاهي
_____________________________________
تاني يوم
وقت البريك كانت نور قاعدة في الكافتيريا اللي جنب الكانتين و بتاكل قرب منها ( ياسين ) و معاه اكل
ياسين : ينفع تقبلي عزومتي دي و تاكلي معايا اصل انا مش هاكل كل ده لوحدي
نور ضحكت : انت اسمك ..
ياسين : ياسين سهل اهو
نور : اه سهل فعلا .. علي العموم ميرسي مش عايزة معايا اكل
ياسين : احم ايه الإحراج ده
لمحت عمرو من بعيد
نور : اقعد
ياسين اندهش : ها
نور بنرفزة :هتقعد تعزمني ولا هتفضل واقف متنحلي اقعد بقي
ياسين قعد علي الكرسي و بدأت تاكل معاه من اكله
قرب منهم عمرو لما لمحها من بعيد
نور : عمرو
عمرو بصلها : مين ده ؟
نور : ده ياسين ابن مس تيسير الناظرة عزمني علي الاكل و باكل معاه
عمرو مسكها من ايديها : يلا يا نور قومي وانا هعزمك علي اكل زيه
نور شدت ايديها منه : قلة ذوق مني لو مكملتش الاكل معاه و بصراحة الاكل بتاعه حلو اوي مش كدا برضو يا ياسين
ياسين : اه طبعا كدا
عمرو بلهجة حادة و قرب منها:يلا يا نور قومي
نور : أكمل اكل الأول مش هقوم غير لما أكمل اكل ممكن تروح تشوف جوري علي ما نخلص
عمرو شد كرسي : معلش ادخل كدا شوية يا ياسين
و قعد بين ياسين و نور
عمرو :ها يلا كملي اكل مستنيكي تكملي
ياسين :تحب اطلبلك حاجة
عمرو :وانت مالك
ياسين ضحك : يا سعد
سعد :نعم يا ياسين بيه تؤمر بحاجة
ياسين:كوباية ماية ساقعة متلجة للباشا يابني
عمرو : الماية دي تشربها انت هتقومي سيادتك ولا حابة تقعدي معاه
نور : انا لسة مخلصتش اكل
شدها من ايديها جامد و غصب عنها قررت تمشي بهدوء عشان شكلها قدام الناس
نور : انت ازاي تشدني كدا من ايدي
عمرو بنرفزة :وانتي يعني عاجبك القعدة معاه و بعدين مين ده اصلا
نور : ما قولتلك ابن مس تيسير
عمرو : اووف مالو يعني يعرفك منين هو عشان يعزمك
نور : انت متعصب كدا ليه اللي يشوفك كدا يقول بتغير عليا
عمرو : جوري فين
_____________________________________
طلبت هيام من عدي يجيلها البيت و عدي ماصدق كان فرحان جدا حاسس ان العريس اترفض او الخطوبة اتفركشت
استقبلته هيام علي السطح
عدي : مصدقتش انك كلمتيني جيت بسرعة كنت عارف انك هتتحدي باباكي و هتضحي عشان حبنا
هيام بصتله و بلهجة جامدة : خلاص مفيش حاجة بينا لو سمحت انا خليتك تيجي عشان تعرف الحقيقة احنا فعلا انفصلنا خلاص و علاقتي بيك انتهت
عدي دموعه بتنزل منه: لالالالالا .. هيام ارجوكي قولي انك بتهزري .. ارجوكي قولي انك بتختبري حبي ليكي..
هيام : انا اسفة .. بس الكلام حقيقي.. انا خلاص هتجوز بعد شهر .. انت لازم تنساني .. و تعيش حياتك
عدي : بالسهولة دي .. بالسهولة دي تقولي انساكي .. انساكي ازاي وبعد ايه ..انساكي ازاي.. بعد ما رسمت كل احلامي معاكي..انا مقدرش انساكي..ولازم اننا نكون لبعض .. فاهمة .. طب انتي هتقدري تنسيني
هيام : انا اصلا نسياك من زمان انا محبتكش عشان افضل فاكراك او ازعل عليك .. انت فاكر اني كنت بحبك بجد لا غلطان انا كنت بحب فلوسك اكتر كنت فاكراك هتشيلني و ترحمني من الفقر لكن امك كانت كل شوية تتحكم في الفلوس و الشروط عشان كدا وافقت علي العريس اللي هيدفع مهر و مؤخر غالي و شبكة غالية كمان هو ده بقي معني الحب بالنسبة لي ؛ الحب اللي هيعيشني عيشة هنية انا و اهلي ، كلام الرومانسية بتاعك ده مبيأكلش عيش يا عدي و ياريت بقي تمشي دلوقتي عشان خطيبي لو جه و شافك دلوقتي هيكون له كلام تاني
عدي كان في حالة ذهول و صدمة
عدي : علمتيني ازاي احبك و معلمتنيش يعني ايه خيانة معلمتنيش ان كلام امي و اختي و كل الناس صح .. طب هتقبلي تعيشي و تنامي في حضن واحد كبير قد ابوكي وانتي مبتحبيهوش
هيام ضحكت : بس لما يلبسني دهب و يديني فلوس كتير وقتها هحبه و هحبه جدا
ضربها بالقلم علي وشها : مكنتش اعرف انك و*** اوي كدا
هيام : انت بتضربني امشي بقي بقولك امشي
نزل عدي و هو في حالة الصدمة كان يتمني يموت ولا يسمع كل الكلام ده
_____________________________________
عمرو دخل الفصل و كان فاضي مفيش حد فيه غير جوري لأنه فصل احتياطي
عمرو : جوري
جريت عليه و حضنته جامد لأنه كان واحشها جدا
جوري : ميس يو بابي
عمرو : ميس يو تو يا حبيبة بابي
جوري : thank you Nour
نور : حبيبتي العفو هو كان نفسه يشوفك جدا و قولت فرصة قبل ما السواق بتاعك يجي
عمرو : المهم يا حبيبتي مفيش وقت انا فهمت نور تقولك أنها صاحبتي و هي اللي هتساعدني اشوفك بعد كدا انا دلوقتي عايزك تطلبي من ماما انك تاخدي درس برايفت ( خاص ) فرينش مع نور و أنها تجيلك البيت بس اوعي يا جوجو تحس بحاجة فاهمة
جوري : حاضر يا بابي متقلقش
_____________________________________
بعد ما رجعت من المدرسة دخلت غرفة والدتها
جوري : مامي .. مامي
سمر : اييه يا جوري عايزة ايه
جوري : عايزة اخد درس فرينش برايفت مع مدموزيل نور بليز يا مامي وافقي بليز
سمر : اه و تطفش زي اللي قبلهم
جوري : لا نور مش هتطفش يا مامي بليز وافقي
سمر : يوووه خلاص يا جوري هكتبلك العنوان تديهولها تيجي
_____________________________________
نور : يلا يا عدي عشان تاكل معلش يا حبيبي ربنا يهديك كل لقمة حتي
خرج عدي معاها و قعد علي ترابيزة السفرة و بياكل
عدي بعصبية: ماما انتي حاطة فلفل حامي في السلطة
كلهم بصوا ل عدي باستغراب
عدي : في ايه
شاهيناز : من امتي وانت مبتحبش الفلفل الحامي في السلطة ده انت علي طول بتوصيني اعمله
عدي قلب طبق الرز و قام
حسان بعصبية : انت ازاي تعمل كدا دي نعمة ربنا حرام عليك ليه تقلب الاكل
عدي بعصبية :محدش ليه دعوة بيا سيبوني في حالي بقي حرام عليكم
شاهيناز بتعيط : حرام عليك انت طب هدخل اعملك سلطة تانية بس كل يا حبيبي بالله عليك كل
عدي رزع باب اوضته: مش عايز حاجة من حد مش عايز اكل
شاهيناز نور قومي بسرعة حضريلو طبق سلطة من غير فلفل و دخليلو الصينية جوة
قامت نور دخلت المطبخ و جهزت السلطة و الأطباق و مجرد ما دخلت اوضته قلب الصينية كلها من عصبيته
عدي : انا قولت مش عايز حاجة سيبوني بقي
كان اول مرة عدي يعلي صوته بالطريقة دي عليهم و يكون عصبي بالطريقة دي فضل كذا يوم علي الحال ده و هما مش قادرين يعملوا حاجة
____________________________________
في الفيلا عند سمر
كانت نور قاعدة في الريسبشن و بتذاكر ل جوري دخلت سمر و سلمت عليها
نور : اهلا بحضرتك
سمر : انتي نور مدرسة الفرنساوي
نور : اه انا
سمر : انا سمر مامت جوري .. اتمنى أنها تنبسط معاكي لان جوري غيرت مدرسين كتير اوي بسبب ان كل مدرس يجي تقوله ارسمك و بيطفشوا
نور ضحكت : لا خالص انا حبيتها جدا
سمر :نورتينا هقول ل صباح تعملك نسكافيه بتحبيه؟
نور : اه
_____________________________________
في المساء
شاهيناز كانت مستنية عدي اللي اتأخر اوي و هي قلقانة عليه فضلت سهرانة مستنياه و دموعها بتنزل منها اتطمنت لما فتح الباب و دخل
عدي :ماما انتي صاحية
شاهيناز : كنت فين كل ده
عدي : مفيش كنت بتمشي شوية
شاهيناز : بتتمشي؟ لحد الساعة 1 بتتمشي .. انا تعبت و مبقتش فاهماك يا عدي كفاية بقي حرام عليك انت عايز تموت و تموتني معاك
عدي : انا كمان بتمني يكون كفاية و بتمني اموت
شاهيناز : بعد الشر عليك .. طب اسمع كلامي و روح ل دكتور يمكن اعصابك تهدي شوية
عدي : ماما انا مش مجنون مش مجنون عشان اروح ل دكتور فاهمة
شاهيناز : مين قال انك مجنون المرض النفسي مش جنان يا حبيبي انت بقيت عصبي و بتكسر اي حاجة قدامك عشان خاطري روح ل دكتور
_____________________________________
تاني يوم
كانت نور مع عمرو في محل ملابس
نور مسكت جيبة قصيرة جدا و معاها تيشرت حمالات باين انه ضيق
نور : عمرو ايه رأيك في الطقم ده
عمرو : حلو ده هتلبسيه في البيت .. لا بيت ايه مينفعش في البيت خالص هتلبسيه في البانيو ده صح ؟
نور : ايه الخفة بتاعتك دي هلبسه وانا خارجة طبعا
عمرو مسك الطقم و سابه مكانه : لا مفيش الكلام ده .. ده آخره اصلا يتلبس في البانيو
نور : بس ده عاجبني اوى
عمرو بنرفزة: و مش عاجبني ولا انتي عندك مانع
نور :هدخل اقيسه
عمرو :قولت لا
نور : بتغير عليا ولا ايه
عمرو : نعم اغير عليكي ليه ؟
نور :خلاص هشتري الطقم ده
عمرو شدها من ايديها : استني ..
نور غمزلته : ها بتغير صح
عمرو : أيوة بغير يا ستي
نور : طب ايه
عمرو : ادخلي قيسي ده حلو و طويل كدا
نور : طب مش هتقول حاجة تانية
عمرو : هتقيسي ده ولا حاجة تانية
نور : دايما كدا بتتهرب من الكلام مش مهم المهم انك بتغير عليا
عمرو : مجنونة علي فكرة
نور : ايه الجديد ؟
عمرو : الجديد انك احلى مجنونة في الدنيا ..
نور ضحكت : دايما بتثبتني كدا
عمرو : هو انا اقدر برضو .. يلا بقي عشان نلحق نرجع بدري عشان مامتك عازماني و الحق اروح قبلك انا
__________________________________
في الشركة
حسام في مكتب السكرتيرة
حسام :فطرتي؟
نجلاء : صباح الخير الأول حتي
حسام : متعشتش امبارح بقي و جعان
نجلاء : طيب هبعتلك محسن يجيبلك اكل
حسام : ياريت
دخلت بنت جميلة المكتب و حسام كان بيتفحصها بعينيه
..... : مستر حسام .. ازيك؟
حسام : هبة صح ؟ ازيك انتي ! شوفي يعني متقابلناش الا مرة واحدة لكن لسة فاكرك
( بيشاور علي رأسه )
حسام : اصل فيه هنا كمبيوتر مبينساش
هبة ضحكت : كنت عايزة ادخل ل سمر هانم أسألها علي حاجة لان فيه مشكلة في Design اللي شغالة عليه
حسام : اه طبعا ادخليلها و لو سمر مشغولة انا فاضي يعني
هبة : متشكرة اوي يا مستر حسام Have A Nice Day
حسام : تؤمريني
دخلت هبة مكتب سمر و حسام بص لنجلاء اللي متغاظة من تصرفاته
حسام : هي قالت ايه بالإنجليزي
نجلاء بغيظ: معرفش
_____________________________________
كان اسلام خارج من المدرسة شاف ندي واقفة مع شاب في اول العشرينات و بيهزر معاها قرب منهم
و الشاب اللي معاها مسك ايديها و هو كان بيهزر و اسلام شد ايد ندي منه
اسلام : بيتهيألي عيب اوي ده
..... : مين حضرتك و بعدين انت مالك
ندي : لالا اسكت يا مصطفي ده مسيو اسلام
مصطفي : أيوة حضرتك دي اخت صاحبتي يعني عادي بهزر معاها
اسلام بص ل ندي بصة خوفتها و كان معناها تمشي و هي فهمتها
ندي : طيب مصطفي روح انت دلوقتي سلام
مصطفي : تمام اشوفك بكرة بقي سلام
مشي مصطفي و اسلام كان لسة واقف
ندي : ايه
اسلام : المفروض نحترم نفسنا و عيب يعني
ندي : ايه يعني ده مصطفي
اسلام : بنت مصطفي ده يعني أيوة مالو مش فاهم
ندي ضحكت :مالوش يعني بس عادي انت اتضايقت ليه
اسلام : وانا هتضايق ليه انتي حرة اعملي اللي انتي شايفاه صح بس خلي بالك ان تصرفاتك دي غلط
ندي : إسلام استني
اسلام : خير
ندي : انا اسفة .. بجد دي اول مرة حد يخاف عليا و ينصحني
_____________________________________
عمرو كان معزوم عند نور في البيت و كانت نور لسة راجعة من عند جوري
نور : ماما عاملة ايه .. عامل ايه يا حاج
حسان: امك روشتنا يا بنتي كل شوية اتصل عليها شوفها فين
نور : عمرو انت هنا
اسلام : لا هناك
نور : يلهوي علي الخفة
خرجت شاهيناز من المطبخ : خضيتيني عليكي قلبي كان هيقف من الخضة
نور : قلقانة من ايه يا مامتي ماهو اكيد يا حبيبتي طالما كلمتيني 11 مرة يبقي انا بعمل حاجة .. بدي درس مثلا او في المدرسة و بعدين في حاجة يا حبيبتي اسمها ميسد كول يعني هبص علي الفون و أعرف انك كلمتيني و انا كنت هرجع اكلمك
شاهيناز :ربيني يا حبيبتي ربيني ما هو انتي اللي امي وانا اللي بنتك
نور بتقلد صوت مامتها:شطورة حبيبة ماما أيوة كدا اسمعي الكلام يا نونا
حسان : انتوا هتفضلوا كدا مش يلا بقي تحضري السفرة انا خلاص جوعت
نور :بلاش تتعصب و تزعق يا حاج سونا عشان السفرة لسة ماجهزتش .. خُدلك سنيكرز يا حاج انت لما بتجوع بتقلبها دراما
حسان بص لاسلام اللي كان بيضحك :و بعدين بقي في اللماضة بتاعتك دي ما ترد عليها انت يا اسلام
اسلام : ما انت عارف يا بابا محدش بيعرف يرد علي نور في البيت ده
حسان : امك هي اللي دلعتها
نور : عشان انا اخر العنقود يا بابا و بعدين علي فكرة بقي انت دلعتني اكتر من ماما
حسان: أيوة بس معلمتكيش اللماضة
شاهيناز : و هو انا يعني اللي كنت علمتهالها
عمرو ضحك :واضح انك هتتسببي في مشكلة دلوقتي بين باباكي و مامتك
نور : لا ده العادي اصلا
اتغدوا كلهم ما عدا عدي كان رافض اي أكل و عمرو دخل شقته و خرج
بعد دقايق كان جرس الشقة بيرن فتحت نور الباب اتصدمت لما شافت أمينة ( والدة هيام )
نور : اتفضلي يا طنط .. اتفضلي
_____________________________________
عمرو نازل من السلم و هو نازل شاف ميار ( اخت علي ) طالعة السلم اول ما شافوا بعض اتصدموا وقفوا لحظات يستوعبوا
عمرو : ميار ؟
يتبع ...
🌸أمينة ( والدة هيام ) عايزة ايه منهم و جاية ليه؟
🌸 ميار صاحبة نور و ( اخت علي ) تعرف عمرو منين ؟
التعليقات على الموضوع