نقطة و سطر جديد(الحلقة الخامسة)

الفصل الخامس

_ ببساطة كدة...من غير رسوم مرور ولا ..

بصلها بوقاحة و هو بيقرب منها

_مالك يا حلوة خايفة من ايه
نور صرخت :سيب ايدي
= اسيب ايه بس حد يسيب الحلاوة دي و قال ايه يقولك البلد مفيهاش خير يجو يشوفو النعمة دي كلها
ضحك صاحبه : اه ولله يا ماندو

مسكه من رقبته بعنف و سنده على الحائط : في ايه يا رجالة

شهقت برعب لما سمعت صوته و شدها من ناحيتهم و هي بتتجنب نظراته خايفة تبصله و دموعها بتنزل منها من الرعب و الخوف  واحد منهم خاف منه و التاني قرب منها و مسك ايديها و هي انهارت من البكاء
_ لامؤاخذة  يا أسطى المزة دي تلزمني
عمرو شدها من ايديه : و دلوقتي تلزمني انا
_ بس اللي ياكل لوحده يزور يا أسطى
عمرو بنرفزة مسكه من رقبته لدرجة انه قرب يتخنق: قولت ايه معلش سمعني .. مش عاملي فيها راجل قول
_ اااه مقولتش يا أسطى مقولتش
عمرو : ايدك دي لو لمستها تاني هقطعهالك فاهم

اتدخل صاحبه :خلاص يا اسطي احنا اسفين يلا ياض بقي كفاية ...
خبطه عمرو برجله : انت يلا قوم روح شوف شغلك

قام من علي الارض هو و صاحبه و دخلوا الورشة

عمرو بيبصلها كانت واقفة و جسمها بيترعش من الخوف و دموعها لسة بتنزل
عمرو بعصبية :خير لسة عايزة حاجة تاني تحبي اضربلك 5 كمان روحي البيت بقي و كفاية اوي كدا
نور : اانا كنت
عمرو قاطعها : كنتي ايه كنتي عايزة تتأكدي من مصدر الفلوس اتأكدتي دلوقتي خلاص
نور : انا اسفة انا عارفة اني غلطت لما  اتصرفت  كدا بس ولله ما كان قصدي يا عمرو
عمرو : قصدك بقي ولا مش قصدك روحي يا نور روحي و كفاية اوي كدا المكان ده مش مناسب ليكي و  اديكي شوفتي اللي حصل من شوية روحي يا نور

نور : ح ح اضر
عمرو قرب منها و مسح دموعها : اهدي تحبي اوصلك
نور : ااه
عمرو : اول مرة اشوفك بتعيطي بس تعرفي شكلك حلو وانتي بتعيطي
نور : ده انا علي كدا بقي اعيط علي طول طالما انت شايفني حلوة كدا
عمرو ضحك : بس ضحكتك احلي
نور : بقي العيون الحلوة دي تشتغل ميكانيكي
عمرو : حتي وانتي بتعيطي بتهزري روحي يا نور انتي خلاص بقيتي كويسة
نور : طيب علي الأقل وصلني لبرة شوية عشان خايفة من المكان ده
عمرو : ماشي
_____________________________________
عدي اتصل علي هيام و استأذن من شغله و قابلها في مطعم

هيام بخنقة: و بعدين يا حبيبي
عدي : مانا قولتلك يا حبيبي ماما بس محتاجة شوية وقت و انا بحاول معاها هي و بابا عشان يوافقوا يزودو المهر و المؤخر
هيام بنرفزة: يعني ايه بتحاول معاها
عدي: حبيبتي عشان خاطري اهدي الموضوع بس محتاج شوية وقت مش اكتر و بعدين اهدي عشان نفكر بالعقل و نشوف نغير رأيها ازاي
هيام : انا مش قادرة أفهم شاب زيك عنده 25 سنة و مهندس شاطر في شغلك ازاي بتخاف من مامتك لغاية دلوقتي و كل قرار لازم هي اللي توافق عليه
عدي : مش بخاف يا هيام بس انتي متعرفيش ماما مهمة عندي قد ايه هي و بابا ده غير أن هما اللي بيدفعوا انا بس مش عايزها تزعل مني ده احنا مصدقنا
هيام بدلع مسكت ايديه: طب و زعلي انا حبيبي يرضيك
عدي باسها من ايديها : انا مقدرش علي زعلك يا قلب حبيبك
_____________________________________
نور وقفت في البلكونة و هي منتظراه اول ما شافته داخل العمارة ابتسمت

اول ما دخل شقته و دخل اوضته مسكت أشياء حدفتها علي بلكونته اللي جنبها فتح البلكونة و خرج كان عارف ان هي
عمرو : ايه
نور : احم كنت بقولك يعني تحب اجبلك الغدا امتي
عمرو : لا
نور قاطعته: متقلقش من فلوسك يعني
عمرو : اكلت في الورشة
نور : ماشي يا اسطي
عمرو : شكلك بتتريقي صح
نور : بقولك ايه انا خايفة حد يشوفنا هجيلك ماشي
عمرو : لا مش لازم انا اصلا داخل اخد شاور و انام
نور : مش هعطلك 5 دقايق بس

خرجت من اوضتها و فتحت باب شقته بالمفتاح كان هو في المطبخ بيشرب

نور : هو يعني خلاص الشغلانات خلصت من البلد مفيش غير انك تشتغل ميكانيكي
عمرو التفت و بصلها: وانتي متضايقة ليه و بعدين دي مهنتي حضرتك
نور ضحكت : نعم مهنتك ازاي
عمرو : أنا خريج هندسة قسم ميكانيكا
نور : ااه تشتغل في مصنع او في شركة  مش ورشة ميكانيكي
عمرو : شغلانة شريفة يا مدموزيل نور و بعدين حضرتك هاتيلي كدا المصنع اللي هيشغلني معلش و ....
سكت مقدرش يكمل و يقولها ان طليقته هي السبب
نور : و ايه ما تكمل ايه خايف تقول علي السر الخطير اللي مخبيه عني .. ايه للدرجة دي خايف
عمرو بعصبية : انا مش خايف انا مش عايز شفقة من حد انا عايز اعيش هنا و خلاص لحد بقى ما اموت اتنيل انا حر و بعدين انتي مالك انتي ليكي فلوسك اللي سلفتيهالي ترجعلك و خلاص و لو يعني علي انك ساعدتيني و مخليتينيش ابات في الشارع ف انا برضو متشكر اوي هحاول اعوضك تمنهم ولا عايزاني افضل قاعد حاطط إيدي على خدي مستني مصروفي منك
نور دموعها نزلت منها : مكنتش اعرف انك بتكرهني اوي كدا 
عمرو : لا مش بكرهك انا بكره الدنيا أنها بتديني الخبطات دي انا مبقتش قادر
نور : بس الشاطر اللي ميقعش في الاخر
عمرو : انا تعبت مبقتش قادر

موبايلها رن في اللحظة دي 3 مرات و كل مرة بتكنسل
عمرو : ما تردي
نور : دي صاحبتي و مش لازم يعني
عمرو : شوفيها عايزة ايه
نور :حاضر

ردت  نور عليها و كانت ولاء

نور : أيوة يا ولاء .. تمام الحمدلله .. ولاء دي تالت مرة هعمل كدا و جوزك كل مرة بحسه شاكك فيا او كأنه مش مصدقني صدقيني وانتي وعدتيني انك هتبعدي عن وليد ده يا ستي لو لسة بتحبيه حرام عليكي تخوني جوزك و اطلقي بس وقتها لو وليد ده فكر انه يتجوزك ابقي تعالي قابليني عشان هو لاقي حاجة ببلاش وانا مبقتش قادرة اكدب تاني

حس بنار جواه مش قادر كأنه نفس السيناريو و بيعيد نفسه او مشابه له محسش بنفسه الا و هو بيمسك موبايلها و بيقفل الفون مع صاحبتها

نور بنرفزة:انت مجنون بتقفل السكة في وشها ليه اكيد هي دلوقتي فاكرة اني انا اللي عملت كدا

مسكها من ايديها بعصبية : عشان كلهم زبالة كلهم كدا لا و حضرتك بتساعديها للمرة التانية أنها تكدب علي جوزها الراجل اللي بيحبها و يتمنالها اي حاجة بتخونه
نور كانت مرعوبة من صوته و ايديها اتألمت من مسكته
نور : حرام عليك ايدي بتوجعني
عمرو ضحك بسخرية و دموعه بتنزل منه :طب وانا محدش حاسس بيا محدش حاسس بكمية الجروح اللي جوايا

بعد عنها و مسك زجاجة فاضية كانت علي المطبخ كسرها بايديه و اتجرح ، غمضت عينيها و هي خايفة من حالته و اترعبت اكتر لما شافت الدم بيغرق ايديه

مسحت دموعها و خرجت من الشقة و هي بتدعي ربنا محدش يكون رجع البيت و يشوف منظرها ،دخلت و حضرت شاش و قطن و مطهر ، سمعت صوت والدها من اوضته
حسان : انتي جيتي يا نور
نور: اه يا بابا بس رايحة ل ميار و جاية تاني
حسان: خدي يا بنت هنا ازاي تروحي ل ميار انتي ناسية أنها اخت علي
نور فتحت باب الشقة : بعدين يا حاج بعدين

خرجت من شقتها و دخلت شقته هو كان فاكرها خافت منه و خرجت كان قاعد علي الارض و ساند رأسه علي الحائط و دموعه بتنزل  منه  قعدت جنبه و مسكت ايديه طهرت الدم و نضفته و ربطته بالشاش و القطن و دموعها بتنزل علي هدومه
نور : حاسس بأي وجع
عمرو : يعني بس الوجع اللي جوايا لسة مستمر
نور : مالك يا عمرو احكي صدقني والله عمري ما هبصلك بأي نظرة شفقة اعتبر انك بتحكي لنفسك .. طب احكي حتي عشان ترتاح من كتر ما انت كاتم جواك
عمرو : من 7 سنين كان فيه واحدة بنت صاحب بابا بس كان مستواهم المادي متوسط مش زينا بابا قالي ايه رايك فيها
نور قاطعته : الأول بس عايزة اعرف انت عندك كام سنة
عمرو : متوقعة كام
نور : بص متوقعاك 25
عمرو : 29
نور: طب كمل
عمرو : المهم كانت سمر وقتها عندها 20 سنة و في 2 جامعة ، كنت انا في اخر سنة في هندسة قولت ل بابا بس دي صغيرة شوية قالي بالعكس ده هتربيها علي إيديك و بعدين انت عندك 22 ف اعتقد مناسبة ليك اتخطبنا فترة قليلة جدا و اتجوزتها كنا الأول عادي جواز صالونات يعتبر بس بعدها حبينا بعض جدا بعدها حملت في جوري بنتي و لما جت كنا مبسوطين جدا حبي ليها زاد يوم عن يوم عمري ما خونتها ولو  زعلتها من غير قصد كنت بصالحها تاني سمر كانت كل حاجة حلوة في حياتي كنت بعدي الوقت الرخم اللي في الشركة او المصنع عشان اروح البيت و اشوف اجمل زوجة في الدنيا كانت بالنسبة لي اجمل ست في الفترة الأخيرة آخر 7 شهور لاحظت ان سمر متغيرة بتخرج كتير بس قولت يمكن من الزهق و عشان شغلي كانت بتطلب مني فلوس كتير و ده علي غير عادتها لحد ما في يوم كنت مسافر باريس عشان اعمل عملية ل بهاء ابن واحد صاحبي متوفي عشان يعمل عملية ل قلبه و كان المفروض مرتب كل حاجة في شغلي لبعد شهر و بهاء تعب جدا و كان لازم يسافر ، ف للاسف مكنتش بثق في حد غيرها عملتلها توكيل زي ما طلبت مني و رجعت من السفر لقيتها جايبة 2 بودي جاردز و معاها واحد اسمه حسام انا مش مغرور لكن هقولك ان حسام ده شكله يقرف ، لقيتها بتقولي ده حبيبها و هتتجوزه بعد ما تطلق مني و معاها هاني اللي كان عايز يشاركني في مشروع وانا رفضت لان شغله مشبوه فهمت أنها راحت لهاني من ورايا  اتفقوا علي كل حاجة و من كام يوم طلقتها رسمي علي الورق و فهمت منهم ان اي شغل  هقدم  فيه مش هتقبل
نور : طب و بنتك
عمرو : مسموحلي اشوفها مرتين في الشهر
نور قاطعته : لالا مش قصدى بس ام زي دي مستهترة مستحيل تربي بنت ف اعتقد لو قولت انك هتاخدها مش هتمانع
عمرو : انتي متعرفيش سمر هي معاها جوري  كضمان عشان مقربش منها مع ان مش في ايديا حاجة اعملها او يمكن عشان تربيها علي مزاجها
نور : و علي ايه كل ده ما تجيبها و تعيش معاك هنا
عمرو : وجود جوري مع سمر افضل انا لا هقدر علي مصاريف مدرسة انترناشونال ولا مصاريف اكل و لبس و علاج مش لما اقدر علي مصاريفي انا الأول
نور : هي جوري تعبانة
عمرو : عندها السكر .. كانت سمر جالها السكر و هي عندها 19 سنة اعتقد و المرض اتنقل ل جوري ، علي فكرة انا كنت حاجة تانية كنت عايش في فيلا و عندي شركة ناجحة و مصنع و حساب في البنك ميتعدش كل ده سمر نقلته ليها بالتوكيل
نور : ده انت شايل جواك كتير اوي
عمرو : اوي ، حتي صباح الشغالة مش عارف اوصلها تقريبا سمر غيرت رقمها عشان موصلهاش عشان اكلم بنتي
نور : انا بجد آسفة انا سببتلك ألم والله و فكرتك بوجعك
عمرو : انا منستش اصلا
نور : طب عشان خاطري اهدي و كل حاجة هتتحل بس كفاية عياط انا قلبي بيتوجع عليك
عمرو : يارب كنت اموت ولا
نور قاطعته و حطت ايديها علي شفايفه : لا اوعي .. تقول كدا فاهم متقولش كدا تاني
عمرو باستغراب:ايه خايفة عليا
نور : أيوة طبعا متقولش كدا تاني عشان خاطري و بعدين كفاية عياط بقى الرجالة مبتعيطش
عمرو بتلقائية سند رأسه علي كتفها من غير قصد و هي حست بقشعريرة في جسمها و قلبها كان بيدق جامد لدرجة انها كانت حاسة انه سامع صوت ضربات قلبها
عمرو فاق من الموقف و بعد عنها : انا اسف بس مش عارف انا سندت عليكي ازاي اسف
نور بتنهيدة: لا فاهمة
عمرو : يلا بقي روحي بيتك انا يدوب اخد شاور و انام
نور مسكت ايديه : بس خلي بالك من ايديك متجبش عليها ماية
عمرو : حاضر
نور :بس  انا خايفة تعمل في نفسك حاجة
عمرو : متقلقيش
نور : بجد
عمرو : اه
____________________________________
بعد ما عدي رجع من شغله  دخل غرفة نور كانت فاتحة اللاب توب و بتتفرج علي مسلسل اون لاين

عدي : نور انا عايز اتكلم معاكي في حاجة  و بصراحة مش حابب اتكلم فيها مع حد غيرك
نور بتقفل اللاب:ايه يا حبيبي قول
عدي : هيام كل شوية تقولي عايزة فلوس اجيب لبس و ميكب و طلباتها كتير اوي  و قالتلي هاتلي موبايل ايفون 7 زي بتاعك و المشكلة ان مرتبي كلو بيروح عليها و للاسف مش بعرف ازعلها و اي حاجة بتتطلبها بجيبهالها هو ده عادي ولا ايه
نور بضيق :هو اللى مش عادى ان حضرتك بتسأل !! مش متاكد يعني ؟ دي مش بتستغلك دي لا مؤاخذه بتبعترك يا حبيبي المفروض يعني البنت المحترمه المتربيه متطلبش حاجة عشان انت مش جوزها و ممكن ميحصلش نصيب و ده وارد يعني انت عايز تجيب حاجة من نفسك ماشي لكن هي تطلب لأ و باين جدا انها طماعه اللي زي دي مش هتعيش معاك لو ظروفك بقت وحشه المفروض الواحدة تبقي قانوعة شوية
عدي : ياسلام ما هو البنات لو الراجل مصرفش عليها تقول انه بخيل
نور : ايه الهبل ده انا عمري ما كنت اخدت من علي فلوس ولا طلبت منه يجيبلي حاجة هو من نفسه يجيبلي هدية ماشي لكن غير كدا لا و بعدين لو حضرتك ظروفك الماديه كويسة علي طول و معاك دايما بزيادة يبقى ده شي عادي جدا لكن لو هي عارفه ان مرتبك محدود مش كبير يعني يبقى فيه حاجه غلط وانت لازم تنبها ان ظروفك ما تسمحش لكل ده بطريقة غير مباشرة  من غير  ما تجرحها كفاية انك تقولها ان مرتبك مايسمحش بكل ده وهي أكيد هتفهم وهتقدر الكلام ده كويس لان انت كدة يعني سوري أهبل عشان واحدة زى دى عايزاك عشان فلوسك ولو في يوم وقعت او مكنش معاك مش هتلاقيها جنبك دى واخداك عشان فلوسك فاهم
عدي بعصبية : هيام بتحبني و عمرها ما بتفكر  بالطريقة دي
نور : لا يا حبيبي طالما هى اللي بتطلب من غير متقدملها هدية أتأكد انها طمعانة وش فيك إللي بيحب حد ميحبش يتعبو ودي مش تعباك دى بالوضع ده عملاك بنك متحرك بتلعب عليك كل شوية فين ايام الكانز اللي كنت طلبته بكل احراج من علي لما كنا في كنتاكي ولله يومها كنت محرجة جدا و رغم كدا جيت ادفع فلوسه مرضيش لكن عايزة ايفون 7 ليه يعني ده ابوها ماسك تليفون نوكيا اساسا بنت مين هي عشان تمسك  ايفون 7 يمكن مفكرة نفسها  مخطوبه ل على بابا والاربعين حرامى
عدي ضحك : حتي واحنا بنتكلم في موضوع مهم برضو بتهزري
نور  : انا كنت اعرف واحدة لما تطلب من خطيبها مصاصة بيخليها تروح معيطة كان جلدة الله يحرقه بس الحمدلله البت سابته
عدي : طب اعمل ايه فهميني كدا
نور : اممممم بص جرب ف مره تقولها معلش الحكايه مش ميسورة  اليومين دول وشوف هتعمل معاك ايه والله لو قدرت الموقف خير وبركه وتحاول بقى تمسك ايدك شويه ولو مقدرتش يبقى واخداك علشان فلوسك يا معلم
عدي :لا طبعا مستحيل هيام مش كدا يا نور هي بس اخدة عليا علي فكرة كل ده طبيعي جدا
نور ضحكت :لا مش طبيعي دي بتستكردك
عدي قاطعها :بتستك ايه مفهمتش انتي بتجيبي الكلام ده منين
نور : بتستكردك يعني جاية من .. مش هتفهمها انت لا .. بص بلاش تكمل اصل النوعيه دي عمرها ما شافت حد يطاوعها تلاقيها كانت بتاخد بالجزمه في بيت اهلها وما زالت طب خلاص بلاش جزمة عشان انت بتزعل عليها اصل انت لازم تفهمها ان كل حاجه لیها حدود وعرفها انك مبتسرقش الفلوس عشان كل شویه تطلب حاجة
عدي :تصدقي انا جزمة  فعلا عشان سألتك
نور : عايزني اقولك ايه يعني اااه فهمت ..
اقولك علي حاجة خليها تحقق كل احلامها وانتوا مخطوبين علشان لما تسيبك تفتكر بالخير ولا تحب اقولك مثلا ؛ اه عااادي جدا مش هتبقي مراتك ؟ ايه تروح تطلب من الجيران يعني ده انت خطيبها عادي
عدي نام علي السرير : اطلعي برة يا نور  انا غلطان اصلا اني باخد رأيك
نور :علي فكرة دي اوضتي انت اللي تطلع برة
عدي:واطية
نور : عارفة عارفة ايه الجديد
_____________________________________
في بيت هيام

صابر بيشرب شيشة:اومال الواد بتاعك ده مش عارفة تطلعي منه بقرشين حلوين كدا
هيام : اعمل ايه يعني يابا مانت شايف ماشيلي بكلمة امه
صابر : الولية امه دي عقربة الولية كانت كل حاجة الواد يوافق عليها تقولك لا ما هو علي قلبهم قد كدا بتشتغل دكتورة و جوزها محاسب في البنك كبير ده غير مستواهم كويس
أمينة : حرام عليك دول ناس طيبين و شاريين بنتك متسمعيش كلام ابوكي يا بت يا هيام
هيام :وانا اعمل ايه يعني ياما ما انتي شايفة اللي باخده منه بديكو منه مصاريف  كان حد قالك يعني تجيبينا 4 وانتي مش قادرة علي المصاريف ولا تفتكري ال600 جنيه اللي باخدهم من مكتب المحامي فايز دول بيعملولي حاجة ياما عدي ده طاقة قدر و اتفتحت لنا
امينة :بس المثل  بيقول يابنتي ان كان حبيبك عسل متلحسوش كلو
صابر :وانتي مالك يا ولية ما تسيبيها تلحس الطبق كلو و هيتملي عسل تاني اما انتي ولية فقر و قطاعة ارزاق صحيح قومي غيريلي الحجر ده
امينة : ولله الواد ده خسارة فيكي خليكي ورا كلام ابوكي لحد ما تعيطي

دخلت أمينة المطبخ و صابر بص لبنته

صابر : قولتيلو علي المهر و المؤخر يزودهم
هيام : اه قولتله و قالي انه لسة هياخد رأي الست امه و ابوه  عشان مش موافقين
صابر : ولو موافقوش نقولهم ان كل شيء قسمة و نصيب وافقوا خير و بركة موافقوش وافقي علي المعلم أشرف اللي متقدملك راجل تاجر و معاه فلوس و الف بنت في الحتة تتمناه
هيام : طيب يابا اما اشوف بس عدي هيعمل ايه
_____________________________________
في فيلا ندي
كان اسلام بيشرح ل ندي درس جديد موبايلها رن و هي بتكنسل
اسلام : ردي او اعمليه سايلنت ممكن
ندي : مش عايزة ارد
اسلام : تمام براحتك
ندي : اصل ده واحد بيئة كدا بيتصل كتير اوي و كل مرة اشتمه و برضو يتصل تاني و بجد مش عارفة اعمل ايه
اسلام : عارفة تعملي ايه
ندي :ايه
اسلام :تسيبي الفون ده و تركزي عشان الامتحانات خلاص قربت و يدوب تذاكري عشان تنجحي
ندي : ااه طيب ..
اسلام : ندي اومال بابا و ماما فين انا مشوفتهمش غير مرتين بس اعتقد
ندي ضحكت : بابا و ماما مشغولين دايما عشان الشغل يعني بتاعهم حتي مش بشوفهم كتير الصبح بس و  احيانا بالليل
اسلام : طب ليه كدا
ندي : مش عارفة بقي و بعدين سيبك منهم انا عايزة اقولك حاجة
اسلام : ايه
ندي : اسلام هو انت ليه محسسني انك مش فاهم  ولا حاسس بيا انا بحبك
اسلام ضحك :بتحبيني يا بنتي انتي صغيرة عليا جدا .. ندي انا أكبر منك ب 7 سنين
ندي : ازاي مش انت لسة متخرج
اسلام :لا انا داخل المدرسة متأخر سنة و كنت في تجارة انجلش و حولت منها ل تربية يعني عندي 24 سنة
ندي :ايه يعني برضو ان شاء الله حتي تكون أكبر مني ب 10 سنين إسلام الحب مش بالسن
اسلام : و بعدين انتي مجنونة بتحبيني ازاي يعني انتي طالبة عندي ، ندي  احنا مينفعش يكون في حاجة بينا  اصلا و بعدين انتي صغيرة اوي عليا و الحاجة التانية و الأهم انك عندك 17 سنة او تقريبا لسة مش كملتيهم يعني المفروض الفترة دي تركزي في دراستك و بس و الفترة دي اصلا فترة مراهقة يعني مفيش حاجة اسمها حب بجد
ندي دموعها نزلت منها : بس انا بحبك متقولش دي مراهقة انا مش صغيرة يا اسلام
اسلام بحدة :اسمي مسيو اسلام و ياريت يا ندي تفهمي كدا كويس اوي
ندي : بس انا ب
اسلام قاطعها : كنا بنقول ازاي  نحول  Active الي pasive
_____________________________________
في اليوم التالي

عدي كان عند هيام في البيت و بيتكلم مع والدها

صابر : معلش يابني بس احنا اتفقنا معاك علي شروط و اهلك مش موافقين دي مش مشكلتي ده بنتي مش بايرة دي ألف واحد يتجوزها مش هتقدر تخلي اهلك يزودو المهر و المؤخر خلاص يبقي كل شيء قسمة و نصيب
عدي  : ايه الكلام اللي بتقوله ده يا عمي احنا مش مخطوبين
صابر :ده عين العقل يابني مش موافق خلاص براحتك احنا مش هنغصبك علي حاجة برضو
عدي :طيب انا هحاول معاهم تاني
صابر : بس لمؤاخذة هنزود الشروط
عدي بلع ريقه: خير يا عمي في ايه تاني
صابر : نكتب القايمة حاليا
عدي :اه بس الفرح لسة بعد 8 شهور
صابر : و فيها ايه و تكتب في القايمة دهب و الشقة تتكتب النص باسمها اه عشان نضمن حقها برضو
عدي :حاضر يا عمي هقنعهم و اشوف انا لازم امشي دلوقتي عشان عندي شغل كمان نص ساعة
_____________________________________
وقت البريك كان اسلام واقف مع مرام و ندي بتراقبهم من بعيد

ندي : تفتكري بيقولوا ايه
روان : ندي فوكك منهم و بعدين خلاص بقى هتعملي ايه هو قالك بنفسه انه أكبر منك و مش مقتنع حتي بحبك ده
ندي بحزن: بس انا بحبه يا روان هو ليه مش قادر يفهم كدا بصي انا هروحلهم و كأني بسأله  عن حاجة
روان : ندي بلاش جنان بقي
ندي : اسمعي انا هروح وانتي تيجي تقوليلها ان فيه حد عايزها فوق المهم تمشيها
روان : و افرضي قفشتني
ندي : ياستي ابقي اتصرفي وقتها يلا

مرام بتضحك : والله من زمان مشوفتكش رايق كدا
اسلام : اهو الواحد مش واخد منها حاجة

ندي قربت منهم :مسيو ممكن اسألك علي حاجة فيه حاجة مش فاهماها
مرام : مش المفروض ان ده وقت بريك يا حبيبتي يعني تروحي تاكلي و تلعبي مع صحابك
ندي : العب ليه شايفاني صغيرة مثلا
مرام بتضحك : اكيد صغيرة طبعا

روان راحت عندهم : مس مرام  .. مس مرام
مرام بصتلها : أيوة يا روان في حاجة
روان : اااه مستر سمير عايز حضرتك سمعته بينادي عليكي
مرام : اوكيه .. طيب هطلع اشوف في ايه و راجعالك يا إيسو علي ما تشوف الصغننة دي تشرحلها ايه
اسلام : ماشي متتأخريش

بعدت مرام و طلعت الدور الأول

ندي خبطته في كتفه : سوري كان في تراب بنفضه
اسلام : عايزة ايه يا ندي
ندي : ما انت بتهزر و تضحك اهو مع كل الناس اشمعنا انا يعني
اسلام : انتي فاهمة ليه انا ماشي
ندي كانت ماسكة علبة عصير دلقتها علي هدومه 
ندي: انا اسفة اسفة ولله
اسلام بعصبية : مش تاخدي بالك
ندي ضحكت : ما قولنا اسفة بقي
اسلام : باظ كدا القميص ده خلاص مش هلبسه تاني
ندي : الحمدلله انه باظ علي فكرة
اسلام :ايه ده انتي فرحانة فيا ولا كنتي قاصدة تكبي العصير ده
ندي : هو ده اصلا  قميصك
اسلام : اه طبعا قميصي هيكون بتاع مين يعني
ندي : مش قميص باباك يعني ، و البنطلون بتاعك برضو ؟
اسلام : لا بتاع جدي
ندي ضحكت : مسمعتش خالص عن حاجة اسمها جينز
اسلام : جينز؟ ! لا مسمعتش
ندي : البنطلون اللي لابساه مس مرام كدا ده اسمه جينز .. اسأل عليه في اي محل هيعرفك شكله
اسلام : اه حاضر هسأل
ندي :دي نصيحة يعني علي فكرة
اسلام : حد قالك قبل كدا انك ظريفة
ندي ضحكت : هدخل الحصة بتاعتي بقي  عشان بدأت
اسلام : لا مجتهدة
ندي :طبعا
_____________________________________
عدي :يا ماما فيها ايه يعني
شاهيناز : فيها ايه ياربي اتكلم انت يا حسان قولوا فيها ايه دول طالبين شروط مبتطلبهاش ملكة جمال دي جوازة فاشلة بكل المقاييس
عدي : طبعا ما انتي بتفكري أنها مستواها قليل عننا لكن مش بتحسبيها بطريقة تانية
حسان قاطعه : لا يا عدي يابني امك مش بتحسبها كدا لان الفقر مش عيب لكن فرق المستوي الاجتماعي هيتعبك وهيجيب مشاكل انا و والدتك مش موافقين عالجوازة ده ومتهيألي احنا مشينا معاك للاخر وكنا فرحانين بيها بس الموضوع بدأ يظهرله جوانب مينفعش نستمر فيها عايز تتجوز هتكمل لوحدك بس احنا هنفضل اهلك لكن احنا ملناش دعوة بالموضوع ده اجتماعيا ولا ماديا وكفاية اللي تحملناه من اول الخطوبة
شاهيناز : يابني دي حاسة انك متمسك بيها علشان كدا بيتشرطوا وهتفضل كدا حتي بعد الجواز وهتتعبك جدا و الموضوع بقي فيه طمع ، ما فيه ناس فقيرة وعينيها مليانة وعندها عزة نفس وعيالهم متربين احسن تربية ده غير ان الاب والام هما العامل الاساسي لكل ده لما تتجوزها و يكون عندك  ابن هيبقي ده منظر جد والمفروض انهم حاجة تشرف دول عاوزين يضمنوا لنفسهم قرشين وهى بنفسها اللى هتطلب الانفصال سواء طلاق او خطوبه  كل مره  بطلبات اكتر منها وتنازل اكتر منك حرام عليك يا عدي متوجعش قلبي عليك يابني
_____________________________________
نور دخلت اوضة عدي كان صعبان عليها أخوها و هو بيعيط و قد ايه متمسك بيها
نور : بص يا عدي احنا ممكن مثلا نقنع هيام انت مش بتقول انك بتلين دماغها بالهدايا و كدا خلاص انا ممكن اجيبلها هدية كأنها هدية للجواز و احاول اقنعها توافق
عدي :مش عارف  اقولك ايه بجد ربنا يخليكي ليا
نور : متقولش كدا يا حبيبي
____________________________________
اما شاهيناز كانت في المستشفى و قررت تتكلم مع دكتورة زميلتها و تاخد رأيها في مشاكل عدي

شاهيناز : انا تعبت يا إيمان بجد البنت بتستغله كتير و كل شوية ليهم طلبات مختلفة ده غير شروطهم دي
إيمان : دي بنت شاطرة و قدرت تلعب على ابنك اتمسكنت لحد ما اتمكنت انا اعرف واحده جارتي  عملت كده مع خطيبها واهله وهو دلوقتى متجوزها وعايش معاها علشان خاطر العيال مش قادرة اقولك بعد الجواز حصل ايه كل الحب بدأ يقل لدرجة انه كرهها اوعى مهما حصل تسيبى ابنك يتجوزها هيتوجع شهر سنة  احسن مايتوجع العمر كله الحقى ابنك يا شاهيناز
شاهيناز  :اعمل ايه تعبت معاه و هما مصممين علي الشروط دي
إيمان: يا حبيبتي دول عاوزين يضمنوا لنفسهم قرشين خليكي متمسكة بقرارك انتي و والده وامسكى ايدك وحتى شقته متكتبوهاش باسمه المشكلة مش فى فرق المستوى ؛ لان دول ناس دون المستوى وداخلين على طمع واضح انكم متساهلين مع ابنكم بزيادة عشان كدا متعشم ان انتي و باباه توافقوا بس عشان خاطري بلاش خليكو علي الشط لاحسن تغرقو عشان لو حصل  و اتجوزها هيشيل كتير اوي علي دماغه نفسي افهم ايه المواصفات اللي ابنك اختار البنت دي علشانها ؟؟ طيب جد اولاده هيبقى عامل ازاي ؟؟ لو اختارها بقلبه بس ...يبقى هيشيل على دماغه ودماغك ودماغ باباه ...ولو اتجوزها غصب عنكم وطلعت وحشة هيلعن نفسه ويعيش حياة مقرفة ..بلاش احسن ولو عاوزة تخليه يريح دماغه خليه يتجوز بنفسه عشان يعرف ان الله حق بس جربي تسأليه ليه الاتفاق اتغير؟ ليه تصرفاتها اتغيرت بعد الخطوبة ...ليه ابدأ حياتي معاها بتضحية و هي مش عاوزة تضحي ؟ وتبدأ الاسئلة تدخل في دماغه ..وبعد كده يتأكد شوية شوية انكم صح ومبتفتروش عالبنت و هي اللي طماعة ومش كويسة
_____________________________________
تاني يوم اتصلت نور ب هيام بعد الشغل و قابلتها في كافيه

نور : ازيك يا ميمي اتفضلي
هيام :تمام يا نور ازيك انتي
نور : الحمدلله تمام .. اه صحيح اتفضلي الهدية دي
هيام فرحت بالهدية : الله دي ليا يا نوني بجد انتي جميلة اوي
نور في سرها : مادية حقيرة
هيام: ممكن افتحها
نور : امممممم افتحيها يا روحي
هيام فتحت الهدية و كانت سيت من فيكتوريا سيكرت و مجموعة من ماركة سوب اند جلوري فيهم لوشن و

هيام : ايه ده
نور : دي احدث سيت من فيكتوريا سيكرت و سوب اند جلوري فيها بودي لوشن يعني كريم  للجسم و بودي سبراي و شاور و بيرفيوم
هيام : سوري بس مش بحط الحاجات دي الا هو انتي جايباهم بكام يا نور
نور : ها اه دول ب 1100 جنيه
هيام  بدهشة: ايه طب مينفعش ترجعيهم
نور باستغراب : ليه؟ 
هيام : يعني رجعيهم احسن وانا اشتري حاجات محتاجاها اصل انا بخاف علي جسمي اوي
نور حاولت تتماسك : حبيبتي دول من افضل Brands  ( الماركات  ) في العالم و بعدين طالما انتي مش حباهم انا ممكن ارجعهم و اجيبلك حاجة مكانهم
هيام : لالا لا انتي بس رجعيهم و هاتيلي الفلوس وانا اجيب اللي انا عايزاه
نور : اه بس ده هدية يعني قوليلي انتي محتاجة ايه وانا اجيبلك
هيام : يا نوني هاتي انتي الفلوس بس وانا أجيب
نور : ها اه طبعا عادي هرجعهم و اجيبلك فلوسهم

نور في سرها : طب ولله لاخدهم لنفسي خسارة فيكي اصلا
هيام : شكرا يا حبيبتي بجد كلك ذوق
نور : اه صحيح كنت عايزاكي في حاجة
هيام : اتفضلي
نور : ما تحاولي تتنازلي او تقنعي باباكي يتنازل عن الشروط دي يا ميمي عشان نفرح بيكم قريب بقي انتي و عدي
هيام :ها لا ولله يا نوني حاولت بس بابا بقي مش موافق مع اني حاولت والله بس مش راضي خالص
نور : اه طيب حاولي تاني برضو
هيام : حاضر هحاول بس انا لازم امشي دلوقتي وانتي لما ترجعي دول كلميني
نور : حاضر اكيد
_____________________________________
دخلت نور شقة عمرو كان ماسك سكينة و بيقطع سلطة و هو بيقطع كان عايز يقطع شرايين ايديه
نور صرخت : وقف اللي انت بتعمله ده يا مجنون
عمرو بصلها و بصوت عالي: نور امشي و سيبيني
نور : لا بالله عليك متعملش حاجة انا مستحيل اسيبك
عمرو بعصبية : نووور امشي و سيبيني قولتلك  انا هتحمل اي وجع يحصلي
نور دموعها نزلت : عشان خاطري يا عمرو سيب السكينة دي عشان خاطري
عمرو :   انا تعبت انا خلاص اتأذيت من كل اللي حواليا مبقاش ليا حد
نور :وانا روحت فين انا موجودة معاك و هفضل دايما معاك والله بس بلاش تتهور و تعمل حاجة في نفسك
عمرو : وانا مبقتش قادر مبقاش عندي الحاجة اللي لازم اعيش عشانها
نور : لا فيه في بنتك
عمرو : اللي بشوفها مرة كل أسبوعين هي كمان حياتها مع امها احسن بكتير اوي
نور  :و عندك انا
عمرو : ايه
نور قربت منه مرة واحدة و حدفت السكينة علي الارض وقع علي الارض و قعدت جنبه : انا يا عمرو .. انا بحبك

يتبع......
🌸رد فعل عمرو هيكون ايه بعد اعتراف نور بحبها ؟
🌸 عدي هيسمع كلام أهله ولا هيتجوز هيام؟ 

( تنويه مهم بقي : مع انكم مش جدعان خالص و بتبخلوا عليا بالتعليقات  و ده مأثر عليا في القصة الجديدة بيحبطني جدا لكن رغم كل ده انا جدعة معاكم و نزلتلكم فصلين زيادة اهو حتي البيدج اللي كنت متفقة معاها تنزلي التفاعل هناك احلى بكتير لكن قولت مزعلكمش و انزلكم فصول اكتر و ده ممكن يسبب أنها تتوقف هناك ده غير ان نزول اكتر من فصل في اليوم الواحد ده بيقلل التفاعل جدا و ده ممكن يخليني ارجع انزل فصل كل يوم بس .. تاني حاجة انا مش عايزة تعليقات حلوة و جميلة و م و تم  ،عايزة رأيكم توقعاتكم ، مناقشة ، نقد .. اي ملاحظات كدا يعني اتشقلبوا بقي في التعليقات مشوفش حرف م و تم و استيكر دول خالص عشان حقيقي بيحبطني .. و بجد القصة حلوة ولا ايه بدون مجاملة يعني )