غابة القتلي

غابة_القتلى
"هو بيتكلم "
الحروب  بقت  في كل مكان الجثث بقت منظر عادي والسرقه والقتل بقوا اسلوب حياه الناس بتاكل في بعض والصفات الحسنه و الحب والصدق والجمال مبقوش موجودين، لو خرجت في الشارع يبقي لازم تتسرق او تتضرب او تتقتل ،ممكن تكون مسلم علي جارك وتاني تلاقيه اتقتل مبقاش فيه امان ابدا مبقاش فيه حياه ،الناس بقت تحارب بعض والبلاد بقت تحارب بعض مفيش بلد فلتت من الدمار والدم غير بلد واحده واحده بس بلد اسمها "بيس "
ودي البلد الوحيده اللي شعبها مسالم قدروا يحصنوا نفسهم من الشر الخارجي ،يقدروا يعيشوا مع بعض في سلام قدروا يفلتوا من كل الدمار اللي برا، كانت امنية حياتي اعيش في البلد دي لكن دخولها كان صعب صعب جدا ،علشان تدخل البلاد دي بيتعملك امتحان اسمه امتحان الانسانيه زي التأشيره بالضبط بتعدي بمواقف ويشوفوا انت الانسانيه لسه فيك الصفات الحميده لسه موجوده ولا الحرب قضت عليها ،كنت متأكد اني لو روحت هفشل وهيطردوني انا مش بس الانسانيه ماتت جوايا انا بقيت وحش ،انا كنت انسان عادي دكتور عندي 25سنه عايش مع امي وابن اختي آدم  لان اختي كانت ماتت وهي بتولده وجوزها قتل نفسه بعد ما أكتئب من  اللي البلد وصلت له بقيت عايش انا وامي وآدم بنحاول منتأثرش بالعالم الخارجي والوحشيه اللي بقت فيه بروح المستشفي  وبرجع ومكنتش بخرجهم ابدا وبحاول اخلي آدم ميشوفش حاجه من كل ده كان دايما يسألني ليه مبنخرجش نفسي اخرج كنت هقوله بعدين او اغير الموضوع ،كنا عايشين كده لغايت ما جالي أمر من الجيش اني اسافر مع الكتيبه مش بصفتي دكتور زي ما كنت فاكر بصفتي  محارب بسبب القتل اللي بيحصل كانوا بيخلوا ناس من الشعب تحارب مع الجيش اجباري مكنش عندنا اختيار والا هيتم ضربك بالرصاص لمخالفة امر الجيش ،ومن هنا كان تغير كل حاجه انا مبقتش اشوف الجثث او الامكان المهدوده بس انا بقيت اشارك فيها،في الاول كنت بخاف واعيط و بعد كده بقيت اقتل بدم بارد اتعودت علي الجثث حواليا والقتل وكل العادات السيئة اتعلمتها في الفتره دي 3سنين كانت فتره كافيه تخليني شبهم ،بعدالتلت سنين روحت البيت وانا مش عارف هلاقيه ولالا امي هتكون موجوده روحت،دخلت البيت ودورت عليهم المفاجاه اني لاقيت جثة امي وملقتش آدم ،فضلت انادي عليه وجريت خبطت علي الجيران اسالهم كان في منهم بيقولوا بيشوفوه هنا او كان بيجري في الشارع او واقف بياخد اكل من  اللي بتوزع اطمنت انه لسه عايش  ،دخلت البيت سمعت صوت قطه مشيت ورا الصوت لاقيتها في اوضه والمفاجاه ان آدم كان بيعذبها اول ما شوفت كده عرفت انه خلاص بقي شبه العالم ده ،جريت عليه وبعدت القطه، ساعتها فاكر بصلي ازاي وكأنه بيقولي انت السبب وقالي جمله واحده انا عرفت دلوقتي مكنتش بخرج ليه اديني خرجت ،طفل صغير كان بيتكلم كأنه راجل عجوز ،كان لازم اتصرف مكنتش هقدر اشوف آدم بيضيع زي ما انا ضعت علشان كده وديته مدينه "بيس" لكن طبعا من اول إمتحان كان مرفوض ،خلاص فرصته انه يدخل المكان ده ضاعت ،كان لازم الاقي حل ولاقيته اني أدور علي قلب نقي قلب لسه فيه انسانيه قلب ملائكي مدنستهوش وحشيه العالم ده لكن هلاقيه ازاي هنا ده انا كده بدور علي ابره في كوم قش ،ولما الاقيه هنقله ازاي لجسم آدم فضلت سنه أعمل اختبارات وأفكار والفلوس اللي جبتها من فترتي في الجيش فادتني جدا الفلوس دي الجيش كان بيديها للجنود برغم اننا الزامي نحارب بس كان بيدونا الفلوس علشان نتشجع ويبقي عندنا دافع للقتل اكتر ا،كانت فلوس كتير ،وفعلا بعد السنه قدرت اعرف الطريقه اللي هتخليني انقل قلب الشخص المطلوب بدل قلب آدم وكمان حضرت المكان اللي هيكونوا فيه والامتحانات اللي هيتعرضولها مكنش ناقص غير المتبرع عملت إعلان المواصفات اللي عايزها وعملت مبلغ كبير للي هيكون فيه المواصفات دي لكن مكتبتش في الاعلان انه هيموت واني هاخد قلبه لابن اختي.

"هي بتتكلم "
اول ما شوفت الاعلان مصدقتش نفسي "ابحث عن قلب نقي لم يدنسه قسوة العالم الذي اصبحنا عليه قلب يستطيع ان يحتضن قسوة تلك العالم وينبت مكانها زهراً ،قلباً يستطيع إن يسكن مدينه بيس من يجد ان قلبه يتميز بتلك المميزات فلياتي للعنوان الاتي وسيأخد مبلغ مليون بردن(البردن هو عملة هذه البلد)"
الأعلان غريب ومواصفات القلب اللي بيطلبه اغرب لكن انا كل اللي شوفته المبلغ مش علشاني علشان اقدر  اعالج امي بيه ،من غير تردد روحت المكان المكتوب في الاعلان ،كان في ناس مقدمين كتير كنا واقفين في اوضه فاضيه وفي كرسي واحد كان قاعد عليه شخص طويل وجسمه قوي وعنده دقن واقرع وعينه ضيقه وحواليها هالات سودا وكان مكشر و مضحكش ولا إبتسم طول ما كان بيتكلم وقال انه هيكون في امتحانات تقيس إنسانيتنا واننا هنفضل كلنا في اوضه واحده وهيقولنا بعد كده هنعمل ايه ،دخلنا الاوضه كنا حوالي 50شخص بنات وولاد ،الاوضه فيها 10سراير وحمام واحد وطبعا في ناس جريت بسرعه علي السراير دي وفضلوا يتخانقوا علي مين هينام عليها ومين سبق وفي اتنين فضلوا يضربوا بعض جامد لكن الغريب ان محدش حاش بينهم لان تقريبا كان كله عمال يشد مع التاني لكن دول كانوا بيضربوا بعض روحت بسرعه احاول أفك  بينهم لكن حد منهم زقني فضل كله يتخانق حبه  كده لغايت ما القوي قدر ياخد السرير من الضعيف انا قعدت علي الارض علي جمب ،لاقينا قطه صغيره دخلت الاوضه واحد من اللي معانا زقها جامد برجله وقال هو الموضوع ناقص قطط كمان انا اتعصبت جدا وزعقتله علشان زقها كده وخدت القطه وكانت خايفه وفضلت احضنها واحسس عليها وبعدين الراجل الغريب دخل وكله هجم عليه كانوا بيسألوه هتعمل معانا ايه  وهناخد الفلوس ازاي واسئله شبه كده لكن هو مردش عليهم ،وطلع سكينه وشاور علي واحد وقاله عايز الفلوس اقتل ده وشاور علي واحد تاني من غير تردد الراجل خد منه السكينه والتاني كان مرعوب قرب منه وعينه كلها شر والناس بتشجعه والتاني خايف وبيرجع لورا قرب منه ورفع السكينه انا مقدرش ولاقتني بجري عليه وبصرخ بكل قوتي لاااااا ما تقتلهوش هو معملكش حاجه ،بصلي واتردد
شويه وبعدين الراجل قاله لو مقتلتهوش مش هتاخد الفلوس رجع تاني لنفس نظره الشر وزقني بعيد وكان خلاص هيقتله لكن الراجل قاله خلاص متقتلهوش ،بعدها وزع علينا كل واحد ربع رغيف ،بدأت اكل لكن لاقيت القطه بتبصلي وبتنونو مقدرتش مأكلهاش معايا وكلت انا وهي الربع رغيف مع اني كنت جعانه فضلنا شهر وهو يخش يعمل حاجه او يقول حاجه ويخرج كان شخص غريب ،بس اخر مره دخل وقال كله خسر محدش قلبه يستاهل المكافأه طبعا كله اتعصب وفي واحد قام يضربه لكن الراجل ده جسمه كان قوي ومسكه من دراعه وبطريقه سريعه كسره اول ما عمل كده الناس خافت وكله كان بدأ يمشي لكن انا ممشتش علشان هو جالي بالليل وقالي اني ممشيش معاهم علشان هو إختار قلبي وان هيديني الفلوس طبعا كنت فرحانه جدا علشان امي مع اني كان نفسي ادي كل اللي كانوا معايا الفلوس دي هما مدام جم هنا يبقوا محتاجينها.
"هو بيتكلم "
مكنش عندي امل ان الاقي حد قلبه لسه نقي كنت متاكد ان العالم ده قتل كل الخير لكن لما شوفتها ،استغربت جدا ان لسه في ناس كده دي اكيد ملاك شعرها كان طويل كان عاملاه ظفيره ولابسه فستان طويل وكله ورود لكن باين انه قديم علشان لونه بقي باهت  تصرفاتها تدل علي انها متأثرتش ابدًا بالعالم ده،ازاي هي كده ،كنت فرحان اني اخير آدم هيروح مدينه بيس لكن كان في حاجه جوايا بتقولي متقتلهاش بس كنت بسكت الصوت ده علشان آدم يعيش مرتاح ،انا من اول مره شوفتها وانا عرفت ان هي دي لكن كان لازم اتأكد ان فعلا قلبها نقي وكانت كل الامتحانات اللي عملتها بتنجح فيها بأمتياز ،بس ليه عايزه الفلوس مش مهم المهم اني اعمل العمليه في اسرع وقت.

"هي تتكلم "
كنت قاعده ومستنياه يديني الفلوس علشان ماما كانت وحشتني جدا وكنت بفكر فيها طول ما انا قاعده هنا وقلقانه عليها لاقيته دخل عليا ومكنش بيتكلم خالص وشاورلي بإيده علشان امشي معاه مشيت معاه وبعدين دخلنا اوضه فيها سرير واحد وأجهزة مستشفي وفي جهاز غريب معاهم لف وشالني بسرعه ونيمني علي السرير وربط ايدي ورجلي وثبتهم جامد وانا كنت بصرخ وبحاول اهرب منه لكن هو كان قوي كنت مرعوبه ومعرفش هو ليه بيعمل كده فضلت اقوله ليه ارجوك انا امي تعبانه مينفعش اسيبها لكن هو كان بيحضر ابرة وفجأه طفل صغير دخل علينا وفضل يعيط ويقوله جعان بس الراجل ده مردش عليه بس  هو قرب منه وقاله" تيتا لو عايشه كانت هتعملي اكل انا بكرهك "
اول ماما قاله كده ساب الحقنه وسكته وبعدين خرج من الاوضه الغريب اني لاقيت الطفل ده بيفكني مكنتش مصدقه نفسي وطلعت اجري بسرعه خرجت من الباب لاقيت ممر طويل جريت فيه  وبعدين لاقيت سلالم نزلتها بسرعه ووقعت من الخوف وقمت تاني لاقيته خارج من المطبخ بيبص اول ما شافني اتخض قومت بسرعه وفتحت الباب وطلعت اجري بصيت ورايا ملقتهوش وبعدين لاقيته جاي يجري ورايا فضلت اجري لغايت ما وصلت "غابة القتلى "ودي غابه مليانه جثث في اساطير عليها ان اللي بيخش فيها بيتوه ومبيقدرش يطلع وكمان ممكن المقتول اللي في الغابه
يطلع ويقتل الدخيل بنفس الطريقة اللي اتقتل بيها لكن مكنش قدامي غير اني ادخلها وعندي امل اني أعرف اخرج من الغابه لكن معنديش امل ان الراجل ده ممكن ميقتلنيش،فضلت أجري وأبعد لغايت ما سمعت  صوت صريخ "اااااااااااااه رجلي "صوته هو وكان بيتألم ،اتسمرت مكاني مكنتش عارفه ارجع اشوفه ولا اهرب مقدرتش اهرب ورجعت له  

"هو بيتكلم"
كنت عايز اخلص الموضوع في أسرع وقت دخلت الاوضه ولاقيتها قاعده بصيت عينيها بريئه جدًا ،مكنتش عايز اتكلم معاها علشان مرجعش في قراري شاورتلها تمشي معايا وانا ماشي في الممر علشان نوصل للاوضه كنت عمال اجيب اسوء حاجات حصلت في حياتي علشان مضعفش وارجع في قراري وأفكر في آدم وفعلا اول ما دخلنا الاوضه شلتها وحطتها علي السرير وربطتها انا شوفت ناس بتتوسل وبتموت قدامي كتير لكن دي اثرت فيا كان في صراع جوايا باني اسيبها لكن الشر كسب وربطها وكنت هنفذ العمليه بس آدم كان جعان ونزلت المطبخ اعمله اكل وشوفتها بتجري معرفش ليه لما خرجت من الباب وجريت وقفت شويه ومكنتش هخرج وراها لكن خرجت وجريت وراها لاقيتها داخله علي غابه القتلى دي مجنونه ازاي تخش الغابه دي بس انا مكنش هاممني وبرده جريت وراها وفضلت اجري وفجأه لاقتني بقع في حفره مكنتش عميقه بس كان فيها عضم واغصان شجر ورجلي داست علي غضن شجره  عامل زي السكاكين فتح رجلي ،فضلت اصرخ جامد مش علشان متألم انا مبقتش احس بالالم بس علشان كنت متأكد انها هتيجي وفعلا لاقيتها جت وقربت مني

-انت كويس حصلك حاجه ؟؟
=كويس
*ومدتلها ايدي علشان تخرجني مدت ايديها وبعدين رجعتها تاني في تردد *
-هساعدك بس اوعدني متأذنيش
=اوعدك
*مدتلي ايديها وخرجت من الحفره ومكنتش قادر امشي علي رجلي وفنطيت علي رجل واحده وسندت علي شجره  *
-ايه ده رجلك رجلك متعوره دي بتنزف
=مش مهم
-كده هتموت
=مش مهم
*وقفت خمس ثواني بتفكر وبعدين قلعت الحزام القماش اللي كان  مربوط بيه الفستان وربطت رجلي ،كل مره بندهش منها ازاي هي طيبه كده ازاااي تعمل معايا كده وانا كنت هقتلها من شويه *
-انت ليه بتعمل كده
=......
-ليه عايز تقتلني
=.....
-براحتك متتكلمش
*غمضت عيني وروحت في النوم ولما صحيت لاقيت النهار طلع وملقتهاش حواليا معرفش ليه إتخضيت وفضلت ادور عليها بعيني وكنت هقوم اشوفها ،معقول مشيت وسابتني ! لاقيتها جايه من بعيد ا*
_الغابه دي مطلعتش وحشه زي ما الاساطير بتقول بص لاقيت ايه توت طعمه حلو اوي جبتلك منه
*حطته جمبي وقعدت انا كنت جعان فضلت اكل منه وكان طعمه حلو معرفش علشان هو فعلا كده ولا علشان هي مسكته بإيديها ،انا ازاي كنت هقتل الملاك دي
-هو انتي ازاي كده ؟
=ممكن مردش عليك زي ما عملت انت بس قصدك ايه
-ازاي بتعامليني كده وانا كنت هقتلك ؟
=انا مش بواجه الشر بشر انا بواجه كل حاجه بالخير ،بس صحيح كنت هتقتلني ليه
-علشان اخد قلبك واديه لآدم علشان يقدر يعيش في "بيس"
=الطفل اللي هربني ؟
-ايوه،آدم ملهوش غيري ولازم انقذه من العالم ده واحافظ عليه ،صحيح هو انتي ليه عايشه هنا ،ليه مروحتيش المدينه دي
=انا مكنتش عايزه اروح بس ماما كان نفسها تروح وتسيب المكان ده فروحت معاها لكن متقبلناش
-ازاي انتي منقبلتيش!!!!
=مش انا ماما برغم ان ماما اطيب مني وأحن مني بكتير لكن علشان كانت حامل ولما العالم بقى كده خافت عليه واجهضته خافت يعيش في العالم ده ويبقي زيه مع اني زعلت منها وقتها ومكنتش عايزاها تعمل كده  بعد سنه روحنا المدينه دي لكن ماما متقبلتش وانا مشيت معاها مقدرش أسيب امي ،انت مكنتش كده صح
-مش فاهم
=مكنتش مكشر دايما ولاساكت ولا كان ممكن تقتل حد ولا تقدر تأذي نمله حتي
-لا انا من زمان وانا كده مبعرفش الضحك والقتل اسلوب حياتي
=بس عينك بتقول حاجه غير كده
-ههههه انتي قاكره نفسك  هتحليلني ولا ايه
*سندت علي الشجره وبحاول اقوم لكن معرفتش من رجلي *
=حاسب رجلك اسند عليا احنا لازم فعلا نحاول نخرج من هنا
-لا مش هسنذ عليكي
=علشان تخرج لآدم هو اكيد خايف دلوقتي
"هو بيتكلم "
*قومت وسندت عليها وفضلنا نلف ونقعد فات اسبوعين واحنا قاعدين في الغابه  بناكل من الفاكهه ونشرب من بحيره لاقيناها ، الغابه مكنتش زي ما الاساطير بتقول ولا مفهاش حياه بالغكس دي كانت جميله جدا وكبيره وده اللي خلانا نتوه فيها في الاسبوعين دول ،وانا شايفها نجمه جميله مينفعش مبصلهاش كانت بتشدني لعالم الورد اللي شبه فستانها وبتنسيني عالم السواد اللي كنت فيه انا بتغير انا حاسس بنفسي برجع تاني لضحكتي ولا يام زمان ايام لما مكنتش أرضى اقطف ورده علشان متبعدش عن بستانها  .

"هي  بتتكلم "
كنت متأكده انه جواه كويس كنت عايزاه ارجع الخير جواه تاني بس مكنتش اعرف اني هحبه في الاسبوعين دول وانا معرفش ليه حبيته لكن في حاجه في عينه بتشدني وبتخليني ابقي مش عايزه اسيبه وعايزه اتكلم معاها عالطول برغم انه في الاول كان  بيحاول يكلمني برخامه لكن برده مكنتش حاسه ان ده اللي جواه دايما بيقولوا العين مش بتكدب وهو عينه كان فيها حاجه تستاهل اني احاول يرجع تاني إنسان ،لاقينا بيت من بعيد مصدقناش نفسنا وجرينا حاولنا نفتح الباب متفتحش وفهو كسره ودخلنا لاقينا واحد في التلاتيني بدقن وعينه لونها ازرق وطويل ولابس بنطلون جينز وقميص أبيض وماسك بندقيه وموجها ناحيتنا بحركه سريعه مسك ايدي وشدني ورا ظهره وقعد يهدي الراجل ويفهمه اننا تايهين والراجل نزل البندقيه .
الراجل :انتو ايه اللي جابكوا هنا
هو:احنا توهنا وعايزين نخرج برا الغابه دي تعرف تخرجنا
الراجل:ايوه طبعا الغابه دي حياتي وانا اعرف فيها كل حاجه
هي:انت ازاي عايش هنا
الراجل: كنت بهرب من العالم اللي برا ده وكنت عارف ان اكيد الغابه دي هتبقي احسن بكتير من الدمار اللي برا وطلع وان كل اللي بيتقال عليها ده بيخوفوا بيها الناس ،متخافوش هخرجكوا من هنا بس الصبح
هي:شكرا جدا احنا فعلا مصدقنا لاقيناك بس ممكن تشوف الجرح اللي في رجله علشان هو بقاله اسبوعين كده واكيد اتلوث

"هو بيتكلم "
اول ما وجهه علينا البندقيه وانا مكنش مهم حياتي اهم حاجه هي ميحصلهاش حاجه ،فرحت اننا لاقينا الراجل ده واخيرا هنرجع ،الراجل كان عنده في البيت كل حاجه طهرلي الجرح وربطه وفضل يكلمها ويهزر معاها وانا كنت عايز اقوم اضربه وكل ما تتكلم معاه اكتر كل ما دمي يتحرق هي كانت مندمجه معاه وعمالين ييتكلموا جيت احاول اقوم لاقيتها جريت عليا
-عايز ايه وانا اعملهولك
الراجل:ليان بوصي الصوره دي
=اسمك ليان
-ايوه
=اسمك جميل بس ليه مقولتلش عليه
-انت مسالتنيش ،وانت اسمك ايه 
=مراد،هو الراجل ده بيقولك ايه شايفك مبسوطه اوي في الكلام معاه
-اصل هو حكاياته حلوه اوي
=ماشي
-بس انا ببقي مبسوطه اكتر وانا قاعده معاك ومع سكوتك
=بس المره دي هتكلم
_ياريت
=انا كنت معاكي في الاسبوعين دول اثبتلي ان اي انسان جواه الخير عمره ما يموت ،ليان انتي ملاك لما تقدري تعيشي في العالم ده وتفضلي بالبراءه دي والصدق ده انا لما دخلت الجيش بدأت اتحول واكون إنسان تاني لكن رجعت في الاسبوعين دول بسببك انتي ،بدأت الاقي نفسي مبقتش مخنوق ولا بحلم بالكوابيس بقت احلام جميل نفسي اعيشها معاكي ،انتي تقدري ترجعي للعالم ده طهارته وتقدري تساعدي آدم مش لما تديله قلبك لكن  بمجرد ما تتعاملي معاه
-مراد،مفيش حد شرير حتي هتلر اللي كان عايز يحتل العالم هو كان فنان بيرسم لكن الظروف وصلته لكده ،صدقني كلنا كويسين من جوانا ربنا بيخلقنا بالصفات الكويسه بس والعالم اللي حوالينا بيغيرها ،فالو قابلنا شخص وحش نتأكد انه مكنش كده ونحاول نساعده لكن منقابلش شره بشر ابدا لان كده هنبقي شبههُ منفرقش عنه في حاجه
=انتي جميله اوي ،انا بحبك
-....
=انا عارف ان مينفعش ملاك زيك يحب شيطان زي
-عمري ما شوفتك شيطان ،بالعكس عينك فيها حاجه بتشدني ليك بشوف في عينك هدوء وجمال البحر وبطمن لما بص فيهم انت عينك بتظهر الجمال اللي جواك برغم انك بتحاول تكشر وتتعامل بقسوه لكن عمر الحنيه ما بتتنسي ،انا كمان بحبك
"المؤلفه بتتكلم "
خرجوا من الغابه وراحوا لامها وآدم وعاشوا كلهم مع بعض ومراحوش مدينه "بيس"
وقراروا يبنوا السلام والحب في بيتهم اي كان العالم الخارجي قاسي هيبنوا عمدان من الحب والصدق يحموا نفسهم من ذلك العالم وقراروا كمان يرجعوا كل شرير لشخص كويس ويحولوا مدينتهم هما كمان الي مدينه السلام .
‏menna_elshamy
غابة_القتلى
*قولولي رايكوا💜

‬