قصة صراخ مكتوم (كامله)

قصة ( صُراخٌ مكتوم ) كاملة
سامعة صوت حد بيصرخ من الوجع
كل يوم الساعه 3 الفجر أسمع الصوت ده ؟!!
ما بقتش عارفه أنام .. صوت وجعه رهيب .. بيخليني أتخيل حاجات كتير صعبه
أنا أسماء حسن .. أم وعندي مي 8 سنين وعمرو 6 سنين .. نعتبر من ذوي الطبقة المتوسطه
زوجي مسافر بره عشان يصرف عالبيت ونقدر نعلم عيالنا تعليم راقي
المنطقة اللي ساكنين فيها شبه شعبيه .. بس جنب شقة ماما عشان بروحلها كل فتره أقعد معاها
نونس بعض وأطمن عليها .. خلاص كلها أيام ورمضان داخل علينا
بس اللي مزعلني من فترة .. جارتنا الست الطيبه اللي سابت شقتها اللي جنبنا
وراحت تسكن في حته تانيه .. وجه مكانها أختين عايشين لوحدهم
أنا ما أتكلمتش معاهم كتير .. بس واضح أنهم مش إجتماعيين إطلاقا
يبان عليهم في بداية الثلاثينات ..يعني مش صغيرين ومع ذالك
ما يبانش عليهم أنهم متجوزين ..أو حتى اتجوزوا قبل كده
انا مش من عادتي أني أدخل في حياة الناس ..بس في حاجات غريبه بتشوفها أو بتحسها
فبتحب تعرف الحاجه كامله عشان قلبك يطمن لا أكثر ولا أقل ..
لاني لاحظت دايما يجيلهم ضيوف كتيرة .. بقابلهم وانا طالعه على سلم العماره أو وانا نازله
المهم بعدها بفتره جوزي رجع وللاسف .. ساب شغله هناك والاقامه بتاعته اتوقفت
وهيضطر يشتغل هنا .. ومش هيعرف يرجع تاني
هوا خبر زعلني وفرحني في نفسي الوقت .. بس انا واثقه ان فادي هيلاقي شغل كويس هنا وهيبقى أحسن من الاول ولو مش هقف في ضهر جوزي دلوقتي هقف في ضهره إمتي !؟
وبالفعل بدأ يدور في كل مكان ..وبقى يرجع البيت مهموم جدا وينام من غير ما يتكلم
صعبان عليا .. بس في مشكله قريبه خايفه منها عمري ما حسيت الاحساس ده زمان
حاسه اننا على وشك الإفلاس القريب .. بدأت أنا كمان أدور على شغل بس ماشتغلتش بقى لي 9 سنين أو أكتر ومعايه شهاده مش قوية .. لقيت شغل بس بمرتبات ضعيفه جدا
ما تجيبش هم مواصلاتها .. اللي زاد الطين بلة إني بدأت أسمع أصوات غريبه بليل ومش عارفه أحددالصوت جاي منين؟
فكل شوية أفتح أبص على العيال أطمن عليهم .. وفي مرة الساعه 3 بليل .. فضلت قلقانه .. قولت أمشي مع الصوت المرة دي أشوفه جاي منين .. قومت فعلا من سريري وبدأت أتحرك
والصوت عمال بيزيد لحد ما وصلت للحمام فتحت الباب بالراحه لقيت الصوت بقى أوضح
قربت من شباك الحمام اللي بيطل عالمنور وفتحت الشباك وشوفت حاجه كانت هتقوف قلبي من الخضه
لما لقيت ....
=============================================
قربت من شباك الحمام اللي بيطل عالمنور وفتحت الشباك وشوفت حاجه كانت هتوقف قلبي من الخضه
لما لقيت جارتنا بتبص من شباك حمامها عليا ..لقيتها بتبصلي في عيني وهي مبرقة وملامحها كلها شر
أول مره اشوفها بالمنظر ده اول ما شوفتها كده روحت قافله شباك الحمام بسرعه ودخلت أوضتي..وانا قلبي بيدق بسرعه من الخوف
بعدها تاني يوم فادي خد العيال يوديهم المدرسه ..وانا روحت اجهز الغدا .. رجعوا بعدها واتغدينا واخيرا فادي لقى شغل اي نعم بمرتب أقل من اللي كان بياخدوا قبل كده بس احسن من مافيش
قلبي اطمن جدا بعدها حسيت ان كان في حاجه كاتمه على نفسي واتشالت من عليا .. بعدها قولت لفادي انا رايحه اقعد مع ماما شوية .. قالي ماشي وسيبتله العيال وروحتلها قعدنا نحكي وطمنتها ان الموضوع اتحل
وبعدها ببص على تلفوني لقيت فادي اتصل 3 مرات.. وانا كنت سايبه تلفوني يشحن بعيد عني .. اتصلت بيه لقيته بيكلمني بهلع بيقولي هي مي معاكي ؟؟
قولتله معايه ازاي انا سايبه العيال معاك .. قالي بعد ما نزلتي بشويه مي خدت مني فلوس عشان تجيب حاجه حلوة ونزلت ومارجعتش قلبنا عليها المنطقة والدكان وكل حته
قفلت معاه بسرعه ومشيت بسرعه ..ورجعت عالبيت لقيت عمرو بيعيط .. وفادي مخضوض وانا مش قادره اوصف احساسي كان ايه ..
بعدها سالنا الناس في الشارع كلنا عارفين بعض .. سالنا الجيران كلهم ماحدش شافها .. بصراحه قلبي كان شاكك وياكد يكون متاكد ان الاختين اللي سكنوا جديد في العماره ليهم يد في الوضوع
روحنا القسم وعملنا بلاغ .. وانا منهاره من البكاء وفادي قال انا مش هرجع البيت غير وهي معايه ونزل يدور عليها وفضلت مع عمرو لحد ما خليته ينام والوقت اتاخر .. بعدها سمعت صوت صراخ مكتوم تاني
قررت أني اتحرك مع الصوت لحد ما لقيت الصوت فعلا جاي من عند الجيران .. اتصلت بفادي كتير ماردش وبعدها تلفونه قفل ..كتبت ورقه وسيبتها على السرير و طلعت من الشقه وخبطت جامد على باب الاختين دول .. واستنيت خمس دقايق محدش فتح .. فضلت أخبط جامد عليهم بغباء
ومحدش راضي يفتح .. خبطت تاني لحد ما واحده فتحت وبتبصلي وهي مغمضه .. الساعه ساعتها كانت 2 ونص بليل
قولتلها ايه الصوت اللي عندك ده .. قالتلي صوت ايه ؟؟
قولتلها في صوت صريخ مكتوم .. كل يوم بسمعه .. قالتلي اسفه لو صوت التلفزيون عالي
قولتلها دا مش صوت تلفزيون عديني وسيبيني أخش اشوف في ايه ؟؟
قالتلي تدخلي بيتي في نص الليل تفتشينا انتي زودتيها قوي.. لقيت اختها التانيه جت قالتلي اهلا بيكي أتفضلي ..
وقامت زاحت اختها اللي فتحتلي ..قولتلها شكرا ودخلت .. قالتلي البيت بيتك تحبي تشربي ايه ..؟ قولتلها متشكره
انا عايزة اعرف الصوت ده بيجي منين؟
قالتلي التلفزيون ,قولتلها لا مش تلفزيون انا هبص في الاوض كلها .. قالتلي براحتك وفعلا بدات ادور في الشقه كلها لدرجه اني فتحت الدولاب وبصيت تحت السراير كل مكان بخلصه ومش بلاقي بنتي
بفضل أعيط اكتر .. كان املي الاقيها هنا .. خلصت الاوضتين والصاله والمطبخ واختها كانت كل ده في الحمام..
بعدها قعدت في الصاله والتانيه جابتلي عصير تهديني مارضتش اشرب حاجه .. قالتلي طيب انتي فتشتي مالقتيش حاجه ارتحتي خلاص كده احنا مستعدين ننزل ندور معاكي بنفسنا
قولتلها انا اسفه بس بنتي مش لاقياها..قالتلي حاسه بيكي .. قولتلها عايزة ادخل الحمام حاسه اني تعبانه
قالتلي.. رانيا في الحمام تخلص وخشي قولتلها ماشي .. بعدها بشويه قولتلها هي طولت كده ليه ؟
قالتلي .. هي دايما بتطول في الحمام عندها شويه مشاكل في بطنها .. لو انتي تعبانه روحي خشي الحمام وتعالي تاني شقتك جنبنا مش بعيد
قولتلها انا مش هطلع من هنا غير لما ادخل الحمام وطلعت اخبط على باب الحمام وانا بزعق وبقولها اطلعي
والاخت التانيه تهدي فيا تقولي ما يصحش كده .. وفجأة لقيت ضربة على دماغي من ورى وقعت على الارض وانا بحاول اقاوم وباب الحمام اتفتح واغمي عليا
فتحت عيني لقيت نفسي في مكان شبه الحمام من غير قاعده ولا بانيو في حوض كبير بس وسراير وثلاجات ومتعلقه من ذراعاتي بكلبشات على الحيطه وفي جثث كتير حوالياولقيت بنتي متعلقه قدامي ..وشكلها متخدر
ولقيت عيال كتير متعلقه وبطنهم مفتوحه ... بالطول ومافيش غير جلد بس مافيش اعضاء المنظر تعبني نفسيا جدا حاولت اصرخ بس كان في قماشه جوه بقي وملفوف عليه شريط لزق لدرجه بتنفس من مناخيري بالعافيه
بعدها فضلت أحاول أصرخ أو اي حاجه وبتمنى مي ما تفوقش أو تكون ما شافتش المنظر القذر اللي حوالينا ده
بعدها باب الحمام اتفتح ودخلت علينا واحده من الاختين وهي ماسكه مشرط موس .. ولقيتها بتبصلي بغل انا خلاص عرفت انها النهايه بعدها لقيت الباب بيخبط جامد بيترزع لقيت واحده بتقول للتانيه خليكي في الحمام وانا هفتح ..
وبالفعل .. قفلت باب الحمام وانا عمال انوح .. لقيتها بتقولي لو ما بطلتش دوشه هدبح البت .. وحطت سن الموس على رقبه مي ..فسكت سمعت صوت فادي بره وصوت ناس معاه .. وفضلوا يدوروا في الشقه بعدها وصلوا للحمام فضل يرزع ..الباب يرزع الباب ومحدش راضي يفتح لحد ما كسروا الباب
لقيت اللي حاطه الموس على رقبه مي بتقول اللي هيقرب هدبح البت فجأة لقيت طلقه انضربت في نص دماغها ووقعت على الارض ميتة .. انا اتخضيت خضه كبيرة جدا
ولقيت اللي كانوا مع فادي دول البوليس .. وفكوني وفكوا مي وطلعونا بره وفضلوا يسألوني وجت الاسعاف خدت مي كانت كويسه ..بس متخدرة جامد
وقبضوا على الاخت اللي فاضله وودوها القسم .. وفضلوا يسألوني عنهم وطلعت عصابه بيتاجروا في الاعضاء
فادي لما رجع البيت والبوليس بيسأل اهل الحته في الشارع لقي ورقتي اللي كتبت فيها انا بسمع صوت تعذيب وصريخ كل يوم بليل من شقه الجيران انا رايحلهم دلوقتي وكتبت الوقت بالسعه والدقيقه لو رجعت ما لقتنيش اعرف اني عندهم وبلغ البوليس
وبالفعل خلصنا منهم اخيرا وشالوا الجثث واتصلوا بأهالي الضحايا مي فاقت وماكنتش فاكره غير ان واحده من الاختين قالتلها تعالي اديكي حاجه حلوه تديها لماما ودخلت معاها الشقه مع اني نبهت عليهم مية مرة ما تدخليش مع حد غريب ولا تصدقيه لو قالك انا صاحب بابا او ماما
طبعا بعد ما الموضوع عدى بفتره ما قولتلش لمي طبعا هي كانت فين بس عاقبتها على انها ما سمعتش كلامي .. وبقيت اقلل نزولهم لوحدهم قدر المستطاع لان فعلا الناس بقت مريبة ولازم أدي عيالي النصيحه كويس واتاكد انهم فهموها واستوعبوا الكلام كويس.
الــنــهــايــة
بقلم_عمر_ليمونه