قصة طلاسم الحمل (كامله)

قصة ( طلاسم الحمل ) كاملة
لقيت واحدة بتقرب مني وماسكة سكينة وغرزتها في بطني بكل قوتها
صرخت جامد لأني حامل
فضلت تطلع السكينة وتغرزها في اكتر من مكان في بطني وهي بتضحك بشدة..
والدم بدأ يسيل بغزارة
وقعت على الارض بنهج وبشرق مش قادرة اتنفس ..
وفجأة لقيت دود كتير بيطلع من بطني مع الدم
الوجع فظيع وانا بعيط من شدة الألم وحاسة بالدود بياكل في بطني
بعدها صحيت من النوم بصرخ ..وصحيت جوزي اللي قام مخضوض هوا كمان كالعادة
الحلم القذر اللي ملازمني بقى له أسبوعين .. جوزي هشام فضل يهديني وجابلي مياه وخدني في حضنه وقعد يطبطب عليا ويمسح العرق من على وشي وهوا بيقولي ما تخافيش انا معاكي
انا مابقتش قادرة استحمل أنا حامل في الشهر الخامس .. معرفش أيه اللي حصل فجأة والكوابيس دي بدأت تجيلي ..هشام جوزي كان كلم شيخ مشهور في المنطقه وأخو صحبتي الانتيم نورهان
تاني يوم أصريت على هشام نروح المستشفى ونكشف عشان أتاكد ان الحمل سليم والحمدلله طلعت كويسه
بس الدكتور كتبلي على فيتامينات عشان قالي اني مجهده جدا..ودا طبعا بسبب قلة النوم بقيت أخاف أنام أحلم بالكابوس والست الغريبة اللي كل شوية تطلعي ماسكة سكينة وبتجري ورايه لحد ما تمسكني وتقعد تغرز السكينه في بطني
شكلها مرعب جدا ملامح وشها وتجاعيدها بيضاء جدا مناخيرها طويله وشعرها أبيض وعينيها كلها أسود مافهاش أبيض ولابسه عباية سودا
الغريب أن الحلم بيبدأ وانا نايمه في اخر مكان وتبدأ تظهرلي وتجري وراية وهي بتضحك ..وكل ما افتكر منظر الدود وهوا طالع من بطني مع الدم برجع وبيجيلي تقلصات في بطني
بنام وانا مولعة النور في الشقة كلها حتى الحمام.. هشام بقى مش عارف يساعدني ازاي ؟!!
لحد ما نورهان صحبتي كلمت أخوها الشيخ ورتب مع هشام انه يجي يقرأ عليا
وبالفعل الساعة دلوقتي 7 بليل.. زمان هشام راجع من الشغل وجايب معاه الشيخ
وصحبتي قاعدة معاية لحد ما يجوا ..مابقتش قادرة أقعد لوحدي ..
ونورهان بتصر عليا اني أكل وانا نفسي مسدوده بقى لي اسبوعين حاسه اني خسيت كتير .. وأرهاق وأرق مابقتش مستحملاهم
وبالفعل الجرس ضرب ونورهان قامت تفتح ودخل هشام شايل كيس مليان ملح و معاه الشيخ بص عالشقة كلها ..
وبعدين قال لهشام يجيب طشت ومياه سخنة وحط عليها كل الملح وقعد يقلب الملح في المياه بعدين لقيته بيتمتم عالمياه وجاب كوبايه وخد شويه مياه وبدأ يرش منها على كل أركان الشقة
قلبي لسه مقبوض بس مش عايزة أطلع كل اللي جوايا من خوف انا حاسه بهشام عليه ضغط في الشغل والحمل موترة وكمان المشاكل بتاعتي دي وأم هشام حماتي كل شويه تقوله دا دلع حوامل ودلع بنات ماسخ
مافيش غير نورهان هي اللي بتسمعني ومستحملاني ..المهم الشيخ خلص رش مياه بعدها جالي وقرب مني وحط ايده على راسي وبدأ يقول كلام مش سمعاه وبعدها قالي خلاص هتبقي كويسه
لان مافيش حاجه في الشقة دي كلها ضغوط نفسيه بس ..بسبب تعب الحمل أرتاحي كويس ونامي وماتقلقيش وحاولي ما تفكريش في الموضوع ده كتير
بيقولي حاولي ماتفكريش في الموضوع ده كتير وانا مش بعرف افكر قبل ما انام غير في الموضوع ده .. ازاي اقنع دماغي ابطل افكر في حاجه معينه منا كده بفكر فيها اكتر ..المهم قولتله خير وشكرناه ومشي هوا ونورهان
بعدها حماتي اتصلت على هشام وفضل يكلمها وبعدها بعد عني وطلع يكلمها في البكلونه ..أكيد طالما عمل كده يبقى بتشتم فيا وهوا عمال يقولها يا أمي انا بحبها وهي مضغوطه .. اكيد نفس كلامها اللي يسم البدن
انا لازم فعلا ابطل احكي وانسى الموضوع ده
هشام خلص المكالمة وجه قعد جنبي وهوا مهموم ابتسمتله وقولتله تحب تتعشى ايه ..حسيت وشه نور ..بقى لنا اسبوعين بناكل من بره وهوا بيعملي كل حاجه ..بجد انا متقله عليه وهوا راجل جدع وبيحبني من قلبه
قومت قام قايم ماسك ايدي وبايسها وقالي تعالي خدني وقالي اقعدي على السرير انا اللي هعمل العشا النهارده ماترهقيش نفسك ابتسمتله وبعدها فعلا اتعشينا ونام جنبي على السرير وهوا لابس غمامه على عينه عشان سايبه النور ..
بعدها بشويه لقيته راح في سابع نومه وانا عماله اتلفت حواليا مش عارفه انسى الموضوع ده .. فضلت  قاعدة لحد ما الساعه جت 3 حسيت اني عيني بتقفل بعدها سمعت صوت حاجه بتتكسر ..اتعدلت من نومتي وبصيت على برة بصيت لهشام عشان اصحيه
بعدها سحبت أيدي قولت بلاش أصحيه واتعبه أكتر من كده .. شيلت البطانية براحه .. وقومت لبست الشبشب وفتحت الأكرة بتاعة الاوضه براحة عشان ما اصحيش هشام وطلعت بصيت عالصاله كل حاجه زي ماهيا
وبما ان الصوت كان بعيد اكيد الصوت ده جاي من المطبخ فضلت ماشية بالراحه في الصالة وبتحرك ناحية المطبخ وكل شوية أبص أشوفني بعدت عن الاوضه كتير ولا ممكن ارجع متردده بس لازم أشوف في ايه؟؟!
وصلت لباب المطبخ لقيته مقفول ؟استغربت جدا !! عمرنا ما قفلناه جايز هشام بعد ما عمل العشا قفله وراه ..بس بيقفلوا ليه ؟؟
حطيت ايدي على أكرة المطبخ وفتحتها بالراحة وأول ما فتحتها ....
(نهاية الجزء الاول)
=========================================================
حطيت ايدي على أكرة المطبخ وفتحتها بالراحة وأول ما فتحتها .. لقيت الست اللي بتجيلي في الحلم ماسكة السكينة وبتجري عليا .. قفلت الباب بسرعة وفضلت مسكاه بكل قوتي ..
وهي عمالة تخبط عليه جامد وانا خايفه أسيب الباب ومش عارفه اعمل ايه ؟؟
فضلت أصرخ على هشام مش سامعني بدأت تضرب الباب بحاجه من ورى لحد ما لقيت الكسينة كاسرة الباب من النص سيبت الباب وطلعت اجري على أوضتي لقيت هشام نايم بيتقلب
وقبل ما أدخله الاوضة لقيت باب الاوضة قفل في وشي بقوة رهيبة وقعت على الارض من الخضة بصيت وراية لقيت الست واقفه ورايه حاولت اجري على ايديا ورجليا وانا واقعه على الارض قامت ماسكة رجلي وسحباني
فضلت تجرني وانا بصرخ وحاسة بألم رهيب في بطني لحد ما خادتني عالحمام وقامت قاعده عليا وماسكه رقبتي بايدها وقامت مدخله السكينة في بطني بكل قوتها وانا بصرخ وهي عماله تغرز سكينتها في بطني
لحد ما صحيت من نومي بصرخ هشام صحي وبصلي بغضب .. أول مرة أشوف هشام بيبصلي بالقرف ده
انا ماليش ذنب .. دا كابوس قعدت أعيط وأقوله غصب عني أنا أسفة بعدها لقيته بيستغفر ربنا وبيطبطب عليا وبيقولي مافيش حاجه المهم انتي ما تخافيش انا معاكي .. اهدي مافيش حاجه كله حلم .. حاولي تنسي الموضوع ده
مش عارفه ارد اقوله ايه؟! ..وهوا بيبصلي مستني اجابة مني بحاضر.. بس مش قادره انطقها
فضلنا صاحيين للصبح وهشام لبس رغم انه مرهق وراح الشغل وانا فضلت قاعده في الشقة لوحدي مرعوبه ..اتصلت بنورهان قالتلي ساعيتن وهجيلك..
قومت غسلت وشي وقولت اشغل نفسي دخلت المطبخ بحذر مافيش حاجه.. وبدات اطلع اكل يفك عشان اطبخه
وقعدت في الصالة أفكر ..وأحلل الحلم .. دايما الست دي بتمسكني في الشقة ..[س في حاجه غريبة عمرها ما قتلتني في الصاله دايما تجرني على أوضتي أو على الحمام
مش عارفه هل دي علامة ولا مجرد حلم بس ليه دايما يتكرر وتاخدني للمكانين دول ..أكيد في سبب؟!!
دخلت أوضتي وبدأت أقلب كل حاجه .. وقلبت في هدومي في الدولاب وهدوم هشام والادراج كلها وتحت السرير وشيلت الملايات والمرتبه وبعدها غيرت الملايات بس وانا بغير ملاية المخدة لاحظت مخدتي في قطع ومتخيطه  ..
القطع ده ما كنش موجود .. فكيت الخيوط ودخلت أيدي أدعبس في القطن من جوه أيدي خبطت في حاجه !!
مسكتها وطلعتها وببص عليها لقيت الباب بيخبط والجرس بيرن شيلت الحاجه في الدولاب وروحت افتح
دخلت نورهان وساعدتني في التنضيف والغدا وبعدها مشيت وسابتني بعد ما اطمنت عليا وقبل ما يجي هشام بدقائق
روحت بعدها فتحت الدولاب لقيت القماشة اللي وقعت ..فتحتها لقيت صورتي وعيني الاتنين مخرومين والصورة محروقه من الاطراف الاربعة وفي على الظهر حروف ودم كتير وأرقام وأسمي مكتوب في نصهم ومكان الخرمين الصغيرين اللي في عيني
في خيوط متخيطه بين عيني الشمال واليمين منظر يخوف أي حد انا بقيت مش قادرة أخد نفسي .. بعدها الباب خبط جريت بسرعة أفتح لهشام ووريته الصورة ..الدم وقف في وشه هوا كمان قالي ايه ده؟؟
وازاي يعني لقيتيه في مخدتك ؟؟ مش كلمنا الشيخ وبص عالشقة ولو في حاجه كان قالنا ؟؟
المهم اتصلت بنورهان وقولتلها هاتي اخوكي وتعالي حالا
وبالفعل بعدها بساعه جت جري هي واخوها الشيخ.. وورتهم الصورة كلهم بقوا مستغربين والشيخ قالي استنى حط الصورة في مياه بملح ومسح الطلاسم وبعدها جاب مقص وبدأ يقطع الخيوط اللي متخيطه بين عينين الصورة بعدها قام حارقها ..
قالي خلاص كده ان شاء الله مافيش حاجه تاني .. بعدها هشام شكرهم ومشيوا ..وانا اعصابي كلها بايظة من المنظر ده ازاي ده حصل بصيت لهشام ..وقولتله انت عارف مين عمل كده ؟؟
هشام بصلي بقلق وخوف ..قالي مالك يا حبيبتي أهدي ..انا اتعصبت وجبت أخري قولتله أهدى أزاي الحاجه دي أزاي وصلت لجوه مخدتي .. أكيد في حد حقير وزبالة عمل كده
قالي هنعرف كل حاجه..وما تشغليش بالك بالموضوع ده دلوقتي انتي اعصابك منهارة نامي وبكره هنحل الموضوع
قولتله أنام أيه ..انا بقى لي أسبوعين بتعذب مش عارفه أنام .. بس أنا عارفه مين اللي عمل كده
هشام بدأ يتعب مني ويتخنق .. قالي مين الزفت اللي عمل كده
قولتله أمك اللي عملت كده ..طول عمرها بتكرهني ومحسساني اني خطفتك منها
أتعصب عليا وقام مزعق ..قالي بقولك أيه ..انا مراعي ان أعصابك تعبانه بس مش هتوصلي انك تتهمي أمي بحاجه زي دي .. هي مش بتستلطفك بس مش هتوصل انها تئذيكي وانتي حامل في حفيدها وأبني
مهو جايز هي مش عايزة الحمل ده يتم عشان ما تتربطش بيا .. خايفه عليك تنساها أمك أنانيه جدا يا هشام أنت اللي مش حاسس ولا بتاخد بالك من تصرفاتها
هشام أتعصب وقام ماسك الفاظه وضاربها في الحيطه أتكسرت مية حته ..قالي انا مش هرد عليكي أنا داخل أنام ..
بعدها فضلت ساكته شوية كده وانا قاعده عالكنبة  ودخلت بعدها أنام أنا كمان.. وانا مفتحة عيني وباصة للسقف ..بعدها بشوية ببص على هشام لقيت الست دي هي اللي نايمة جنبي وبتبصلي بملامح غل وشر صرخت جامد ..وقومت بسرعة قامت مسكاني من رجلي قبل ما اتحرك من السرير
وقامت شداني وسحباني على الارض للحمام ..انا حاولت أقاومها حسيت بوجع في بطني من المجهود ..بعدها قامت قتلاني ..صحيت لقيتني نايمه عالكنبه لسه!!
فضلت مستنيه للصبح على الكنبة من الخوف ..هشام صحي نزل الشغل وبعدها قومت ودورت في الحمام فتحت السيفون وقلبت في كل ركن مافيش حاجه انا هتجنن .. فضلت باصة للمرايه وانا بعيط وبشوف شكلي اللي اتغير وبقيت مرهقة وفي سواد تحت عيني لحد ما مسكت مج محطوط فيه فرش الاسنان وقومت كاسرة بيه المرايه ووقعت على الارض
بدات أحس ألم فظيع في بطني هديت شويه وقومت أنضف اللي انا عملته..و ببص مكان المرايه لقيت حاجه غريبة جدا ..
لقيت ورقة فيها أسمي ومكتوب عليها طلاسم ومحروقه من الاطراف وملزوقه على الحيطه ورى المراية !!
مسكت الورقة بصيت عليها وعملت فيها زي ما الشيخ عمل امبارح
بعدها كلمت نورهان تجيلي بسرعه ..وبعدها بساعه ونص جاتلي ..قولتلها عايزة أتصل بماما ..ورصيدي خلص
خدت منها الموبايل.. ودخلت الاوضه وقفلت الباب ..بعدها كتبت رقم هشام في موبايلها
ظهرلي أسمه " العشق " بصيت عالرسايل بتاعتها .. لقيتها باعته رسايل لهشام بتساله عليا وبعدها تقوله تعالى نتقابل نشوف حل لمراتك ورساله بتطمن عليه ورساله بتفكره بمعادهم .. كل ده بدا من اسبوعين بس
من ساعة ما الحلم ده بدأ يجيلي .. هديت نفسي وعملت نفسي بكلم ماما في التلفون بصوت عالي وبقولها مش بتردي عليا ليه اتصلت بيكي خمس مرات وبعدها طلعت اديت نورهان الموبايل
قالتلي ها اطمنتي عليها قولتلها ايوه وبتسلم عليكي وبتشكرك عالي بتعمليه معايه
قالتلي طنط دي بتأفور المهم قولتلها تعالي نقوم نعمل حاجه ناكلها .. قامت معايه وهي ماسكه الموبايل وانا بولع على الطاسه وحطيت سمنه عشان اعمل بيض
نورهان قالتلي مش غريبة انك كنتي بتكلمي طنط ومافيش في المكالمات ولا مكالمة ليها ورصيدي زي ما هوا ؟؟
قولتلها أفتكرت انها بتقلق لما اكلمها من تلفون تاني فاستلفت رصيد وكلمتها من عندي
قالتلي طيب وريني موبايلك ووريني أخر مكالمة .. بصيتلها بشر قامت بعدت قولتلها انتي بتكذبيني قالتلي لا .. بس مستغربه ازاي كلمتيها من عندي عالموم خير المهم انك طمنتيها
بعدها لقيت نورهان بتفتح درج المعالق والسكاكين وبتسحب ايديها من جوه الدرج براحة !!
فعلا هي بت الكلب اللي عملت كده ..مسكت الطاسه كويس وعليت النار عليها وانا مراقبة نورهان بطرف عيني ..وفجأة نورهان اتحركت ناحيتي بسرعه قومت ماسكه الطاسه وضارباها على وشها بكل قوتي وانا بصرخ وقعت على الارض
والسكينة وقعت من ايديها .. فعلا كانت عايزة تقتلني ..طلعت اجري قبل ما هي تقوم وتمسك السكينة تاني ..
هي بتستغل حملي واني مرهقة وتعبانه ..مابقتش عارفه داحلم ولا حقيقه ايه اللي بيحصل ده ..جريت عالحمام وقفلت الباب بسرعه وبدات تخبط عالباب جامد وأقولها أنتي عايزة مني أيه ؟ حرام عليكي ؟
دانتي صحبتي الوحيده واكتر حد بحكيله تفاصيلي ؟؟ عايزة تقتليني عشان هشام خديه يا شيخه وغوري في داهيه
فجأة التخبيط وقف ..وانا مابقتش قادرة اخد نفسي ..لقيت قطعة زجاج حادة مرمية من المرايه ..مسكتها في ايدي ..قولت أتصل بهشام يلحقني أكتشفت ان الموبايل سيبته في اوضتي ..
الصوت برة وقف خالص ..حطيت ايدي على مفتاح الحمام ..مش عارفه اطلع اجيب موبايلي ولا استنى هنا لبليل ..بعدها لقيت السكينة كاسرة الباب من النص اتخضيت ووقعت على الارض .. بطني بتتألم بشدة مش قادرة فضلت قاعدة على الارض ونورهان بتحاول تكسر الباب من عند الكالون بعدها جاتلي فكرة .. غرقت ارضيه الحمام مياة بصابون كتير جدا ..وبقيت امشي على ايديا ورجليا عشان ما اتزحلقش
وخدت الفوطة حطيتها على ركن بعيد في الحمام ووقفت عليها عشان ما اتزحلقش
وفعلا بعد ساعتين نورهان جابت الشاكوش وكسرت الباب لقيتني قاعدة على الركن مغمضة ..حاولت تخش واقفه معرفتش قامت داخله على ايديها ورجليها وهي ماسكه السكينة واول ما قربت مني قومت واقفه على الفوطة
طبيعي من خضتها تحاول تقف هي كمان لسه بترفع جسمها عشان تتعدل على ركبتها قامت متزحلقه وقعت على ضهرها قومت ماسكاها من شعرها وبكل قوتي حطيت قطعة المرايه الحادة في عينيها
صرخت بكل قوتها والسكينة وقعت من ايديها .. قومت زاحفه جايبه السكينه وبكل قوتي فضلت أقتلها زي الحلم .. بكل غل بدون أي رحمة لحد ما بقينا في بحر دم
قومت بعدها طلعت الصاله زحف .. اتصلت بهشام اتخض من نبرة صوتي وقالي نص ساعة وهكون عندك
روحت بصيت لنورهان وهي غرقان في دمها ..
مش عارفه ليه ممكن صديق عمرك يعمل فيك حاجه زي كده؟
ليه يحسدك ويتمنى ياخد الحاجه اللي في ايدك واتكتبت ليك ..من خوفها اني لما أخلف من هشام كده هيفضل يحبني ويتعلق بيا وبأبنه حاولت تقتلني وتخليني أعمل مجهود يسقط الحمل وتخليني اتجنن من الكوابيس عشان هشام يحبها هي  .. حتى لو على حساب اي مشاعر وعلاقات أو إنسانية
كل اللي كان هاميمها .. انها تاخد هشام ..مع انه كان بيحاول يتفاداها .. بس هي الغل ظهر عندها مع الحسد فتحول لإنتقام مني .. بدون ان يكون لي أي سبب في الموضوع بل انا الضحية التي يجب ان تنتقم منها لمحاولتها اغواء زوجي
وبالفعل هشام جه واتصلنا بالبوليس والاسعاف وحكينا اللي حصل في النيابة وبعدها بأيام خدت برائة من القتل واتضح في القضية ان اللي كان بيعملها طلاسم السحر دي أخوها اللي عامل نفسه شيخ وتقي وأتحكم عليه بعدها ..
ورغم البهدله دي كلها الا أن اهم حاجه اني مابقتش احلم بكوابيس بقيت مرتاحه وعارفه انام وقررنا انا وهشام نسيب شقتنا وروحنا شقة جديدة ..وعدت الايام بسلام.. حتى جاء موعد الحمل وولدت على خير والناس كلها جت باركتلي
كان نفسي نورهان تكون معانا وتباركلي ونلعب سوى مع أبني .. بس هي أنانية واتحولت لحسد ثم لغل .. أتمنوا الخير لصحابكم ولكل الناس وماتحاولش تاخد حاجه مش بتاعتك بطرق ملتويه.. قد تودي بحياتك أو تعقبها أشياء تظل مخلدة في ذهنك من تأنيب الضمير .. ومن يفعل الخير سيجده ومن يفعل الشر سيلحقة ليتذوق من مرارته يوما ما.
الــنـهــايـــــة
بقلم_عمر_ليمونه
قصة (طلاسم الحمل )
مستني رأيكم