قصة حدثت بالفعل

قصة_حدثت_بالفعل
جربت تشوف مخاوفك حقيقه قدامك و قلبك يقف و تحاول تهرب و متعرفش
طب جربت تهرب للمكان اللي كل الاروح بتهرب في و يبقي هو بوابة الجحيم اللي بتتفتح عليك انا جربت ..
ف عالم الاحلام لا شيء مستحيل حين تختفي القوانين و ينعدم المنطق....
ابتدت حكايتي اني بكتب قصص رعب و طبعا بعد اول و تاني قصه ابتديت ادور علي افكار جديده علشان ابدع بيها ف كتاباتي لحد متحولت اني طول اليوم قاعد لوحدي بفكر ف حاجات مرعبه ف الاول كنت بفكر و بستمتع و اتخيل علشان اكتب حاجه انا راضي عنها مع الوقت لقتني بشوف خيالات ف الشقه و احس بحد ورايا و ابص ملقيش حد و احس بهواء سخن و كآن حد بيتنفس و حراره و اسمع حد بينادي باسمي و حاجات مخيفه لحد مقررت اني هوقف كتابه. ف مجال الرعب من اللي بشوفه و بحس بيه مش بس و انا صاحي لا و انا نايم كمان مش بقولك بوابه الجحيم و فتحتها علي نفسي اه احلامي مستغرب ليه .
الاحلام و النوم اللي المفروض الواحد بيهرب في من الواقع انا كنت العكس كنت بخاف انام .
بخاف انام علشان الكائنات و الاحلام اللي بشوفها كانت ابشع مليون مرة من الحقيقه المقتصره علي شويه تهيؤات زي ماالناس قالولي و غصب عني طبيعتي البشرية بتغلبني و بنام
و انا عايز احكيلكم انا بشوف ايه ..
في يوم حلمت...
الحلم الاول
اني قاعد ف مكان ما زي ميكون قهوة و سامع صوت مزيكا للست ام كلثوم اصلي بحبها جدا
و قت العشا و المطر شغال و مفيش غيري انا و كام واحد قاعدين و لقيت طفلين ماشين ف الشارع تحت المطر يجي عندهم 7  او 8 سنين تقريبا ماشين ببطي مخيف كنت مركز معاهم لقتهم شايفني و بيبصولي  انا قمت من مكاني و روحتلهم  يمكن محتاجين مساعده  و طلبو مني اوصلهم البيت خدتهم و طلعنا ف شقه و بدون مقدمات  لقيت الطفلين لونهم اخضر و عينهم كمان اسودت و كان خارج منهم ريحه بشعه جدا عمري مشمتها قبل كده انا جيت اخرج من الباب لقيته اتقفل بقوه و مكنش فيه مقبض حولت اصرخ و صوتي مش طالع و هما بيقربو عليا و بيمسكو ايدي و بيشدوها و بيتمتمو بكلام مش مفهوم و انا بحاول اقوم و اتكلم....
. بسم الله الرحمن الرحيم اعوذ بكلمات الله من شر ما خلق و بكل مُعافره احول اكتر و واحده واحده صوتي بيطلع اعوذ بالله من الشيطان الرجيم . بسم الله الرحمن الرحيم . و اقول آيه الكرسي و ابتدت كل حاجه تختفي و انا افوق واحده واحده .... قومت اتوضيت و صليت ركعتين و نمت علي وضوء...
  اليوم التاني

يوم جديد من التفكير اني اكتب و تركيزى اكبر لاني لسه ببدا و خوفي من رد فعل اللي بيقرأ قصصي  بيضغط علي عقلي اكتر و اكتر  عشرات الورق مرمي جنبي علي الارض نتيجه محاولات متكررة مش راضي عنها  نمت من التعب و الارهاق الذهني ..

الحلم التاني

المرة دي انا كنت واقف ف وسط ناس كتير روحت مكان انا عارفو كويس  بيت واحد قريبي دخلت البيت و لقيت سلالم و ف اخرها جدار مسدود  نزلت للشارع تاني و مشيت و انا ماشي شوفت كائن ملوش شبه ايدو و رجلو طويله جدا و جسمه عريض الي حد ما  و جلده بيسيح و بيقع علي الارض و عينو مفهاش نيني شعرو خشن جدا و طويل و طالع لفوق " اعذروني لو مش عارف اوصف بالظبط و خانتني الكلمات انا كل مبفتكر ركبي بتسيب  "  .
دا كان شكله و بيقرب عليا و انا بجري ف الشارع الناس راحت فين اتكعبلت وقعت و بقوم لقيته قدامي و مسك ايدي حطها علي جسمه اللي بيسيح دا انا حسيت بايدي لزقت و نار قايده فيها بدون مبالغه بصرخ و بقول اعوذ بالله من  الشيطان
الرجيم يارب يارب بسم الله الرحمن الرحيم آيه الكرسي ......

اليوم التالت
انهارده انا خايف انام  خايف من اللي هشوفه انهارده القران و ذكر الله هو المنقذ الوحيد من اللي بشوفه و اللي هشوفه اتوضيت و صليت ركعتين و نمت ..
الحلم التالت 
المدرسة . مدرستي و انا صغير ماشي ف المبني اللي كان فيه الفصل بتاعي اطفال كتير و ناس اكتر وجههم مالؤفه الدنيا كانت ماشيه كويس لحد مداخلت الفصل بتاعي زمان و انا علي الباب لقيت كائن باربع رجلين  ف البدايه افتكرته قطه  عاديه لكنه كان افظع من مجرد قطه كان مليان شعر اسود رجل من رجوله ماسكه ف رجلي و عينه عليا رجعت ورا كام خطوة و هو برضو مركز معايا بهدووء شديد      و فجأة لقيت لقيت جسمه العلوي اتشق و طلع منو جسم تاني كان ابشع كان زى الاطفال جسمه املس صغير و اقرع و عنده انياب حمرا و عينه سودة كبيره اتفزعت و جريت جوا الفصل و انا بعلو صوتي بقول يا اللله يا الله اعوذ بالله من الشيطان يارب يارب لقيت الناس بيبعدوه عني و اختفي الكائن دا  بعدها لقيت شخص داخل المكان طويل و عينه بيضه تماما و كان عايزني انا اشمعني انا  و الناس يبعدوني و يخرجوه من المكان ...
خرج الحمد لله و انا صحيت علي اذان الفجر  ......
و بقيت بتمني بس اني ارتاح من كوابيس بوابه الجحيم
انتا ممكن تقول دلوقتي ان دا خيال او احلام من الشيطان  او العقل الباطل او حتي مجرد اوهام لكن الاكيد ان كل اللي حكيت عنه حقيقة مش مجرد قصه زى اي قصه .....
و اكيد انتا عندك من الاحلام دي اللي ممكن تحكيهولنا ...

دينا_والي