قصه❤
"1"
اسمي أدهم ، النهارده فات 8 شهور علي فراقنا ، بس احنا لسه سوا ، بوصلها كل يوم لشغلها ، وبرجعها البيت ، بكون معاها وهي بتعمل شوبنج ، وبكون معاها وهي ف النادي ، النهارده كانت خطوبة واحده صاحبتها ، كانت جميله اووي ولابسه دريس مخليها احلي واحده ف المكان ، بس ضيق ، وانا قلتلها ميت مره متلبسش ضيق ، هي بتعاندني ؟ ، لما نرجع نتكلم ف الموضوع ده ، سلمت كمان علي واحد ووقفت تتكلم معاه ولا كأني موجود ، فضلوا مع بعض طول الليله ، قلتلها اني بغير لما حد يبصلها ، هي ليه غبيه كده وبتضايقني بكل افعالها ؟ ليه النهارده سابتني اروح لوحدي وروحت معاه هو ، هو فيه ايه احسن مني عشان تهتم بيه كل الاهتمام ده ؟
تخيلوا ؟!
قلعت دبلتي من ايدها ولبست دبلته هو ، والنهارده كتبت علي فيسبوك ان فرحهم بعد اسبوع !
انا مش هسمح ان ده يحصل ، انا قلتلها انها بتاعتي انا.
"2"
_ احنا مش هينفع نكمل مع بعض يا أدهم ! ,,
*انا هعتبر نفسي مسمعتش يامروة ، احنا منقدرش نستغني عن بعض وانتي عارفة.
_ ما كفايه بقي ، كفايه متشوفش غير نفسك وبس ، كفاية قلة تقدير كأني عبدة ليك ، ف الاول كنت بقول بيحبني وكنت ساكته ، بس انت مريض ي ادهم ، مريض بحب التملك والانانيه ومش هتتغير ، هتفضل تأذيني لحد امتي ؟
*عارفة ,, بيعملوا هنا "كابتشينو" حلو جدا ، مش عارف ليه عمرك ما جربتيه معايا !
_ انت فعلا محتاج تروح مصحه نفسيه ، انت مريض ، ولو سمحت متكلمنيش تاني ، لازم تعرف ان دي اخر مره هنشوف بعض فيها ، سلام .
"3"
_ النهاردة اليوم الاول اللي متكلمنيش فيه ، مش مهم هي بتعمل كده علطول ، هتكلمني .
_ النهارده تاني يوم ، انا مش قلقان ، فضلت قبل كده 4 ايام ورجعت كلمتني تاني .
_ فات 10 ايام ومتكلمتش ، انا مش هروحلها انا مش ضعيف ، انا هسيبها وهتجيلي تطلب رضايا كمان .
_ شهرين ، انا عارف كل حاجه عنها وعارف انها هترجع ، حتي لو كانت خطوبتها النهارده هترجع .
_ 4 شهور ، روحتلها الشغل وطردتني من هناك ، قالتلي انها نسيتني وانها بتحب خطيبها ، بس اكيد مش من قلبها .
_ 6 شهور ، كانت ف السوبر ماركت اللي دايما بتروحه ، قربتلها ومسكت ايديها ، كانت واحشاني اوي ، صرخت ف وشي وشتمتني ، اول مره اشوفها متعصبه كده مش عارف ليه ، قالتلي انت محتاج تروح مصحه نفسيه ، تاني .
_ النهارده فات 8 شهور علي فراقنا ,,,,,
قلعت دبلتي من ايدها ولبست دبلته هو والنهارده كتبت علي فيسبوك ان فرحهم بعد اسبوع .
انا مش هسمح ان ده يحصل ، انا قلتلها انها بتاعتي انا .
"4"
اخترت يوم فرحكوا عشان ضروري نتجمع كلنا ، اوضتكوا حلوه اوي واكيد زوقك ي مروه ، مستني بقالي ست ساعات بس مش مهم ، المهم عندي اللي جاي ,,
يهمني اوي انك تحس الاحساس ده يا "احمد" ,, ههه ياخي حتي اسمك تقليدي ، مش عارف حبتك علي ايه ولا ليه ، انا متأكد انها مغصوبه عليك ,, ربطتها ف السرير هنا وربطتك علي الكرسي عشان تبقي بعيد وعشان تشوفني وانا جنبها ، كان مفروض تكون انت هنا وانا اللي اكون بعيد عنها ، بس انا قررت ابدل كل حاجه ، ابدل حتي الشعور والاحساس ، اخدها ف حضني ، تعرف انها وحشتني اوي ، للاسف مش متاح ليكوا تتكلموا غير لما انا اللي اقول .
بتعيطي ليه ؟ عشان مغصوبه عليه مش كده ؟ متخافيش انا جنبك ، انا حلمت باليوم ده كتير ، وكنت عارف انه هييجي ياحبيبتي ، انا عارف اني مش مفروض اطول ، عشان كده هشيل اللزق ده تقوليلي الكلمه اللي بحلم اسمعها من زمان اوي ، انتي عارفاها صح ؟ هتقوليها ادامه عشان يعرف انك بتحبيني وبعدين همشي ، اتفقنا ؟
يلا 1 ، 2 ، 3 ,,
_ أنا .. أنا بكررر,,
كنت عارف انك مش هتقدري تقوليها قدامه ، بس ده ميرضنيش لا ,, لا لا لا ,, انا كده هستأذنك يا استاذ احمد هاخدها معايا ، هسمع منها اللي انا عايزه وهرجعهالك تاني ، متخافش عليها دي حتة مني ، متحاولش تعمل حاجه لانك مش هتوصلنا ، انا مجهز كل حاجه ومجهز بيتنا الجديد يا مروه ، اسف ، دماغك هتوجعك شوية بس الخبطه دي هتنيمك لحد ما نوصل ,, بحبك .
"5"
بعد يومين ، تم رفع تسجيل صوتي علي حساب مروه الشخصي يحتوي علي محادثه صغيره بين أدهم ومروه وظهر علي صوتها اثر البكاء والاذي النفسي والجسدي معا ,,
" أنا بحبك ي أدهم ، محبتش غيرك ومش عايزه غيرك ، انا اسفه اني سبتك ، غلطت ، غلطت وبترجاك تسامحني ,,
*صوت ضحك عالي*
كنت متأكد اني صح ,, انا كمان ي مروه ,, انا كمان بحبك اووي ومش هسيبك تضيعي من ايدي للأبد . "
انتهي التسجيل ، ولم يستدل علي مكان ادهم ومروه حتي الان .
التعليقات على الموضوع