في منزل جاري🏠 الجزء الاول

في منزل جاري

قاعد حوالي الساعة  1بعد نص الليل في اوضتي وقافل عليا بابها كنت بخلص شوية حسابات..اتفاجئت أن أوكرة الباب بتتهز كأن في حد بيحاول يفتحها، وانا متاكد ان كل اللي في البيت ناموا، قمت بسرعه فتحت الباب، لقيت اسلام ابني اللي عنده 4 سنين  اللي المفروض نام من تلت ساعات، عينيه مبرقه ووشه شاحب وبيقولي
.. بابا في صوت عالي زي الصريخ في الاوضه بتاعتنا ، هو واخته حلا بيناموا في اوضتهم، اخته اكبر منه لكن اسلام ده من يوم ما اتولد وانا حاسس انه اكبر من سنه،خاصة هدوئه ونظراته، اخدته في حضني وقلتله متخافش يا حبيبي،على اساس انها اوهام اطفال.. وقلتله تعالى يابابا اما اشوف في ايه..مشيت قدامه عشان احسسه بالامان وفتحت باب الاوضه لقيت اسلام نايم في سريره ببص ورايا ملقتش حد..جسمي اتنفض..امال مين اللي جالي وحضنته؟؟  في الوقت ده لقيت اسلام بيقوللي وهو نايم في مكانه على جنبه الشمال ..هو جالك يا بابا  ؟؟
..مين اللي جالي يا اسلام؟؟                                   
..صاحبي اللي بيجيلي كل يوم يا بابا                                                                                                                                      ..بتلقائيه لقيتني بساله..هو بيجيلك كل يوم يا حبيبي
لقيته اتعدل في سريره وقال ..ايوه يا بابا، وبنلعب مع بعض بس هو بيقوللي انه متدايق عشان شقة عمو كامل فيها اوضه منوره ولازم تنطفي، جسمي اتنفض تاني خاصة أن عمو كامل ده جاري في العمارة شقته في وش شقتي  وهاجر كندا من ست شهور احنا اصلا اتحاد ملاك عمارة في العاشر من رمضان وهو بني ادم وحيد لا نعرفله اصل ولا فصل وحتى عرفنا انه سافر كندا من عم على البواب وده راجل كبير في السن وقلبه ابيض ومبيتبلش في بوقه فوله فنشر خبر سفره بين السكان
المهم انا هديت اسلام ابني وقلتله اه يا حبيبي عمو سايب لمبه منوره عشان العصافير بتاعته
فنام اسلام تاني على جنبه الشمال واداني ضهره وراح قايللي .. بس هو على فكره معندوش عصافير هناك.. هو عنده خفافيش بس ؟؟ وعايزها تمشي..  اتفاجئت من رده
انا طبعا خلاص اعصابي بتنهار وبحاول اني اظهر متماسك
..صاحبك اللي قالك كده يا حبيبي 
...ايوه وورهالي كمان
..اوعى تكون رحت هناك يا اسلام ؟                    
لا طبعا يا بابا مروحتش، دي هي اللي بتجيلي
مين دي اللي بتجيلك يابني ؟؟                                 
  ...مفيش يابابا ولا حاجه، خلاص انا هنام                    
...خلاص يا حبيبي نام ، غطيته وبوست راسه وقلت يمكن اللي انا شفته اوهام ..اما حكاية صاحبه دي فكل الاطفال بتتخيل حاجات مبتحصلش ..عقلي بيحاول ينفي اللي حصل وميصدقوش باي شكل ..انا مؤمن طبعا بوجود الجن لكن مش مؤمن بامكانية التداخل بين العالمين مرضيتش اسال مامته على حاجه ولا اصحيها وقلت ليله وهتعدي.. تاني يوم في نفس الميعاد كنت سايب باب اوضتي مفتوح لقيت اسلام جايلي بهدوووء ..قعدت استغفر واستعيذ منا خلاص هتجنن فلقيته قرب عليا وانا قاعد على مكتبي زي مانا.. وجه وشوشني في ودني ..صوت عالي في اوضتي يابابا عامل زي الصريخ ومش هيروح الا لما الاوضه المنوره نورها يطفي.. المره دي شيلت اسلام ورحت بيه الاوضه والحمد لله اني ملقيتوش في سريره زي المره اللي فاتت نيمته و مددت جمبه كده على اساس اطمنه لغاية ما يروح في النوم فجأه لقيتني في شقة كامل واوضة نومه فعلا منوره وكان في تعويذه بتتردد في ودني بلغه غير العربيه بصوت زي الصريخ وقمت مفزوع.بس الافزع اني لما قمت من غفوتي كان عندي زي تشوش في الرؤيه كنت شايف اسلام اتنين قاعدين بيبصولي فركت عينيا وببص لقيت اسلام ابني لوحده فخدته في حضني ..لقيته بيقولي ..ها يابابا شفت الاوضه المنوره
رديت ..هو انت بتشوفها كل يوم يا حبيبي
...اه يابابا وصاحبي متدايق عشان هي منوره..شفت الخفافيش يا بابا ؟؟دي كمان لازم تمشي
..لا يا حبيبي مفيش خفافيش والاوضه المنوره هطفيها
قررت اني لازم اشوف حل، قررت ادخل الشقة بتاعت جاري واطفي نور الاوضه المسكونه دي ، بلكونتي لازقه في بلكونته هنط وهتصرف في باب بلكونته وادخل وبالفعل تاني يوم الساعه 2 بالليل كنت جوه شقته
كنت واخد معايا كشاف عشان انور بيه لنفسي عشان مولعش اي نور..اول ما دخلت من باب البلكونه لقيت اوضته فعلا منوره رحت هناك وكانت المفاجأه اللي هزتني من جوه فبقي جسمي يتنفض وخلت قلبي هينط من مكانه،، الأوضه مكنش فيها لمبه ..الاوضه منوره من غير ما يكون فيها اي مصدر للضوء مفيش تفسير طبيعي او فيزيائي للي انا شايفه ده  كان التفسير المنطقي الوحيد ان ده نوع من انواع السحر
وكانت المفاجأة ان كان في خفاشين كبار متدليين من السقف رجليهم متعلقه في اللمبه المطفيه وجسمهم متدلي لتحت وعينيهم حمره دم شافوني هربوا لبره عشان اخد المفاجأة التالته