مصير غريق 🙄(الجزء الثالث)

مصير_غريق

الجزء الثالث:
فضلت ماشي على طول زي معملت مع شهد.. حسيت بحركه جايه من ناحيه الغابه.. ببص لقيت فجأه تلاته لابسين اسود.. ملثمين.. كأنهم تلات عفاريت.. بيجرو وجايين عليا بسرعه.. انا اتشلت حركتي ومكنتش عارف اتصرف من الرعب .. والفجأه..
حوطوني التلاته وبسرعه لقيت لزق علي بقى.. واحد همس في ودني ..

الغريب: متخفش .. احنا جايين نساعدك

صوته كان مفهوم عادي.. شكله بشر عادي.. مكنتش فاهم اي حاجه.. بس لقيتني بمشي معاهم بارادتي.. دخلنا الغابه بسرعه وقالي الغريب ..

الغريب: حاول تجري معانا على قد متقدر.. لو اكتشفو انك هربت حيثورو .. لازم نلحق نتدارى منهم بسرعه ..

فضلت اجري معاهم .. شكلهم عارف الطريق كويس .. قبل اي حفره او اي نبات بيشوك حد منهم بيحذرني ..
فجآه لقيتهم دخلو كهف كان متداري تحت أوراق الشجر.. ودخلت وراهم ..

لما دخلنا لقيته كهف زي الكحلي اللي فات.. فيه شعلات نار متثبته على الأرض عشان تنور.. جوه الكهف كان في اربعه قاعدين على الأرض .. بشر عادي زيي ..
التلاتة اللي جابوني لما دخلنا شالو الاقنعه من على وشوشهم.. وفكولي اللصق من بقى..
كنت محتار.. متوتر. مش فاهم اي حاجه.. واحد من الاربعه اللي كانو قاعدين اتكلم ..

اسعد: هاه .. حد اخد باله منكم .. او حسيتو بحد بيجرو وراكم؟
شريف: لا اتطمن اخذناه والحراس نايمين.. وجرينا وهوه جرى معانا متعبناش وخلانا نشرحله الحمد لله ..
وبعدها بص لي وكمل: اصل انت مش واخد بالك .. في ناس نيجي ناخذهم .. يفضلو يناقشونا لغايه مالحراس يبدأو يحسو .. ونفضل نجري اكتر من كده ف الغابه عشان نتووههم عن مكاننا..

راح واحد تالت اتكلم

احمد: تقصدني انا مش كده؟ طب مطبيعي ناس لابسه اسود حطت مره واحده لزق عل بقى .. وبتقلي اهرب.. وانا مش مستوعب اساسا انا فين..

وراح باصصلي وكمل

احمد: يعني انت يا عم المستجد مخفتش ولا قلقت لما شفتهم طلعولك فجأه كده؟

انا كنت عمال اتفرج عليهم وانا مش فاهم اي حاجه.. لغايه مسألني السؤال ده رديت ..

امير: انتو مين.. واحنا بنهرب من ايه.. انا مش فاهم اي حاجه
اسعد: اكيد لسه مش مستوعب .. احنا حنقولك كل حاجه.. اولا انا اسعد.. وشاور على الباقيين.. احمد.. شريف.. مازن.. إسلام.. مجدي.. عمر..
امير: وانا امير
اسعد: اقعد معانا ارتاح .. وححكيلك كل حاجه.. انسى بس اي حاجة سمعتها من شهد .. لان كلها كذب في كذب ..

وكمل اسعد: انا أقدم واحد في المجموعه اللي انت شايفها دي .. جيت هنا زيكم كلكم.. كنت بغرق في دوامه .. فقت لقيتني هنا.. و قابلتني شهد.. و فهمتني ان كل حاجه حلوى هنا.. وان قرار القتل حيرجعني .. وقد ايه انه قرار حيريحني وارجع .. وسابتني انام بليل زي محصل معاك اكيد.. انا معرفتش انام مكنتش مقتنع.. يومها قررت اهرب.. مكنوش حطين حراسه كتير زي دلوقتي .. مكنش حد تقريبا هرب قبلي .. فهربت للغابه.. كنت بلاقي فاكهه كل فين وفين او عشب.. اول اسبوع بعد مهربت كان صعب قوي عشان اتأقلم ..
امير: يعني انت بتهربنا .. عشان انت خايف منهم؟
اسعد: لا اصبر اكملك.. بعد اسبوع سمعت صوت جرس عالي كان بيدوي في المكان كله.. غلبني الفضول اعرف في ايه.. وصلت لآخر الغابه ناحيه الشط وانا متداري وسط الظلمة والشجر.. لقيتهم شايلين بشري بيدخلوه الكهف..

كمل أسعد كلامة: فضلت اراقب من بعيد.. لقيت بعد شويه شهد طلعت معاه واتمشت.. تقريبا نفس اللي حصل معايا.. بعدها بيوم سمعت الجرس تاني بس وقتها كانو جرسين ورا بعض.. رحت تاني للشط.. لقيت الكائنات كلها متجمعه .. وحاولت اتداري وسط شجر الغابة والظلمة كانت مساعداني اتدارى.. وهما كانو مشغولين باللي بيحصل..

كمل أسعد : كان كبير المعبد واقف .. و معاه سيف كبير .. وقصاده شاب بشري .. فهمت انه طلب من كبير المعبد يرجعه.. والقوم كله بيتجمع يشوف المشهد ده..

وكمل اسعد كلامه: وبدأ اسوء مشهد شفته في حياتي.. كبير المعبد قطع راس الشاب.. بس الشاب مختفاش ولا حاجه.. اول مقطع راسه كل القوم سقف.. واتبسطو زي ميكون عيد.. بعدها بدأو يقطعو من جسمه .. ويتقاسموه.. كل واحد بياخد نصيبة ويشوف حياكله ازاي .. اول ماشفت يومها كده جريت على طول.. كنت مش عارف اعمل ايه..

امير:يعني دول بيكلو البشر؟
وكملت كلامي بعد مفكرت: طب وبيعمل كل ده ليه ميقتلونا عادي من الأول .. وياكلونا .. ليه كل اللفه دي؟
رد عليا عمر:مش عارف.. انا كنت بسأل زيك اول مهربني اسعد .. لغايه مشفتهم بيعملو كده في واحد قصادي بردك..
اسعد: انا في الاول كل ماسمع جرس مكنتش بروح.. ولما بعدها بيوم اسمع الجرسين كان ضميري حيموتني.. بعدها قررت اروح يومها بليل اشوف .. لو عرفت اهرب حد اهربه..
عمر: انا كنت اول واحد يهربني.. يوم مجيت هنا طلعت من الكهف بليل .. زي مانت عملت يا أمير.. كان الحراس نايمين .. ولقيت فجأه اسعد قصادي.. انا زعقتله وقتها جامد من الخضه .. وده فوّق حارس .. وهربنا منه بالعافيه.. كويس اننا لقينا اللصق ده هنا عشان نلصق بق الجداد في الاول ..

امير: طب مفيش طريقه نرجع؟

محدش رد عليا

اسعد:انت اكيد تعبان دلوقتي .. وكلنا تعبانين .. بكره نقولك تفاصيل اكتر ان شاء الله ..

مكنتش عارف انام.. كنت بحاول .. بس القلق والتفكير كانو اكبر مني .. لقيتهم بيوزعو وقت النوم والحراسه.. بس قالولي انت مش حتحرس لمده يومين.. حتبق لسه مرهق ونخاف تنام وانت بتحرس..
معرفش نمت امتى.. بس اخيرا نمت.. حلمت بكابوس وقمت مفزوع.. كان طبيعي اكيد مع اللي بيحصل فيا ده.. لما صحيت لقيتهم كلهم صاحبين.. وفي اتنين مش موجودين..

امير: اومال فين الباقي؟
اسعد: احمد وشريف طلعو يدورو على فاكهه وخضار.. وانت حتلاقي بركه مايه عذبه بعد متطلع من الكهف على طول لو محتاج تشرب..
طلعت من الكهف لقيت اشعه الشمس ضاربه علي الكهف.. شكلنا الظهر.. شربت و رجعت تاني..

امير: هوه كل اللي بيجي هنا ولاد؟
ابتسم اسعد ورد عليا : احنا مش عاجبينك ولا ايه؟
امير:لا اصل كان في بنت كانت بتغرق معايا ودخلت نفس الدوامه معاها .. هيا موصلتش لهنا زيي؟

ضحكو كلهم .. معرفش ايه ممكن يضحكهم من سؤالي ده .. ورد مجدي وفهمني كل حاجة ..
(تتبع)

انتظروا الجزء الرابع

رغدة_حمودة