مصير غريق 🙄الجزء الرابع +الخامس

مصير_غريق
الجزء الرابع

امير: هوه كل اللي بيجي هنا ولاد؟
ضحك اسعد ورد عليا : احنا مش عاجبينك ولا ايه؟
امير:لا اصل كان في بنت بتغرق معايا ودخلت نفس الدوامه معاها .. هيا موصلتش لهنا زيي؟

ضحكو كلهم .. معرفش ايه ممكن يضحكهم من سؤالي ده .. ورد مجدي وفهمني كل حاجة ..

مجدي: احنا كلنا جينا بنفس الطريقه.. البحر كان هادي وبنت بتغرق.. تحاول تنقذها الجو يقلب فجأه .. ومتفهمش اي حاجه بتحصل لغايه متفتح عينك هنا..
اسعد:البنت دي زي النداهه اللي ندهتنا كلنا.. اكيد حاجه تبعهم هنا عشان يشدونا لعندهم..
امير: يعني محدش بييجي هنا غير لو الجو حلو عندنا؟
اسلام: ايوه عشان كده كل اللي حاولو يطلعو حاولو في نفس يوم وصول حد جديد ..

وقتها بصولو كلهم عشان يسكتوه.. وانا رديت بسرعه ..

امير: حاولو يطلعو؟
عمر: في مكان هنا لما توصله .. حتشوف ماية البحر من عندك بس من بعيد قوي .. ممكن تنط منه لمايه البحر بس مش حتبقى عارف مصيرك .. تحس انك باصص من الدور العاشر.. في ناس نطت .. ومنعرفش مصيرها كان ايه.. عاشت اساسا بعد النطه ولا عرفت توصل للشط التاني اللي بيدخل منه المستجدين ..
امير: وبيحاولو ليه يوصلو للشط التاني؟
اسعد: اكتر مكان عليه حراسه هوه الشط التاني .. زي ميكونو بيخافو حد برجع منه.. مش بيشيلو الحراسه من عليه غير وقت واحد بس .. لما ييجي مستجد وشهد تبقى بتفرجه على المكان.. و بعدها الحراسه بترجع..
عمر: يعني يا أمير لو كنت وصلت للشط امبارح قبل منهربك .. كنت حتشوف كميه الحراسه اللي عليه..
اسلام: امبارح كان في واحد مننا اسمه "محمد" حاول يستغل انهم شايلين الحراسة من الشط عشانك .. وحاول يروح الشط .. حاولنا نمنع محمد بس جرى وسابنا.. كنت انت تقريبا في المعبد يا أمير.. وانا راقبته من الغايه.. قبل ميوصل للشط في كائن منهم ضربو بسهمين .. ومات محمد ..
امير: واكلوه؟
بصلي اسلام باستغراب ورد: غريبة .. لا ماكلهوش.. في حارس راح المعبد ولما رجع حرقوه..

فكرت شوية وكملت ..

امير: ممم .. يبق هما مش بيكلو غير اللي طلب يتقتل.. انا افتكرت فعلا امبارح وانا في المعبد .. دخل كائن كده كلمهم واتبرجلو كلهم.. بس شهد طبعا قالتلي كلام تاني خالص…
اسعد: انت متهور ولا لاء يا أمير؟
امير: تقصد ايه؟
اسعد:يعني حتجرب اي طريقه للرجوع حتى لو مش متأكد منها؟
امير: مظنش لازم ابقى مفكر فيها كويس ومنطقيه شويه.. ليه بتسأل
اسعد:كلهم هنا متهورين عايزين يرجعو وخلاص..

دخل احمد وشريف بالفاكهه وبدأنا ناكل وكمل اسعد

اسعد:يعني اسلام مثلا كان طالع مع محمد امبارح عشان يروح معاه الشط مش عشان يمنعه.. واستنى الأول يشوف محمد ينزل البحر عشان بتطمن .. ولما اتقتل قصاده .. خاف ورجع..
وكمل اسعد: في طرق اوقات بنفكر فيها ومش عارفين مصيرها .. كلهم بيبقو عايزين يجربو وبتعب قوي عشان اقنعهم على الاقل واحد يجرب مش كلنا مع بعض..

اكلنا وقلت اطلع من الكهف .. قالولي لاء النهارده بنقلل طلوعنا.. بعد هروب واحد بيدورو عليه في الغابه شويه..
كملنا اليوم كله في الكهف .. وهما بيحكولي عن الغابه واماكن الفاكهه والأعشاب..

امير: وكل قد ايه بييجي بشري جديد؟
شريف:اوقات بييجو ورا بعض .. يعني كل مواحد يتقل بعدها بيومين ييجي واحد جديد.. واوقات بالشهرين مبيجيش حد..
اسعد: تقريبا لما الجو بيبقى كويس بيجي ناس كتير ..
اسلام: احتمال كبير الدوامه اللي بتيجي فيها في زيها ترجعنا..
امير: يعني احنا بندور في الغابه على حاجه توصلنا الشط التاني او البحر اللي هناك؟
اسلام: بالظبط كده..

بعدها بيوم صحيت بردك على الظهر.. زي قبلها بيوم بس مكنش عندي اسئله كتير زي الاول ..

اسعد: اعمل حسابك من بليل انت حتحرس معانا..
امير:تمام ماشي

يومها طلعنا من الكهف بعد مفطرنا بالفاكهه.. فرجوني على الغابه .. والحاجات اللي حكولي عنها.. لما وصلنا للمكان العالي عن البحر اللي حكولي عنه امبارح.. فضلنا واقفين نتفرج عل البحر واحنا بعيد..

اسعد: يا ترى اللي نطو وصلو .. ولا هما فين دلوقتي..

وقتها سمعت صوت الجرس لأول مره.. بيعلن عن قدوم بشري جديد.. غريق جديد مش عارف اللي مستنيه هنا..
فجأه .. لقينا عمر بينط في البحر .. بصيتلهم بذهول.. بس حاستهم عادي.. محدش اتفاجئ ولا اتأثر زيي ؟؟

امير: هوه نط فجأه ليه طيب
مجدي: متستغربش احنا اتعودنا على كده كل فتره حد يروح مننا يوم الجرس.. ومش عارفين بيوصل ولا لاء..
امير: بس ازاي من العلو ده.. تحت ممكن يخبط ف الصخر ويموت قبل ميوصل للبحر اساسا..
اسعد: كل مبتطول المده هنا بتيأس اكتر.. بتحاول بأي طريقه ..
مجدي: فعلا احنا آخر سته جينا هنا.. وكان معانا اسعد وعمر اقدم اتنين.. كل اللي في النص حاولو باي طريقه..

بصينا كلنا لاسعد..
و حاولت ابعده من الحرف عشان مينطش

امير:انت حتحاول تعمل زيهم؟
اسعد:للأسف مش حاعرف

رجعنا تاني الكهف.. وبليل مجدي وإسلام و شريف طلعو يجيبو البشري الجديد.. بس رجعو بعد غياب لوحدهم..
مجدي: للأسف .. الجديد مطلعش من الكهف غير الصبح.. دخلت شهد الكهف وطلع معاها.. وراحو المعبد .. شكله راح يطلب قتله ..

يومها بليل سمعنا صوت الجرسين.. ورحت مع احمد اشوف المنظر المريب اللي حكلنا عليه اسعد.. يمكن ماتأكدتش من كلامه غير لما شفت بعيني.. كان زي محكلنا بالظبط ..

بس بعدين .. حنفضل هنا محبوسين كده !!؟ رغدة_حمودة

*الجزء الخامس:

اتعودت على المكان بمرور الوقت.. الغابه كبيره جدا.. كل يوم بنكتشف مكان جديد فيها .. ده كان بيجدد فيا الأمل اننا نلاقي طريق للرجوع .. تقريبا انا بس اللي كان بيتجدد فيا الأمل ده ..

جه ناس جديده علينا.. كنت بشوف في عيونهم كل الاسئله والاستغراب اللي كنت فيه اول ماجيت.. كتير نطوا في المايه.. او حاولوا يهربوا عن طريق الشط.. منعرفش مصير اللي نطوا.. بس اللي راحوا الشط اتقتلو كلهم..

كانت أصعب لحظه لما اسلام نط.. مكنش فاضل من السبعه اللي رحت عليهم غير اسعد.. كنت حاسس ان عليا الدور في اليأس.. كان في بعدي خمسه جهم جديد..

بس لما كنا بتلاقي مكان جديد في الغابه كان بيبقى عندي امل.. مكنتش عارف انقلهم الأمل ده .. بدأوا الخمسه يزيدوا.. وبدأ اللي منهم ينط او يروح الشط.. فضلت انا واسعد اقدم اتنين.. انا بالأمل قاعد.. وهوه قاعد رغم اليأس..
لغايه مره الصبح قالي

اسعد: أمير انا عايز اتكلم معاك شويه لوحدنا

طلعنا من الكهف على الغابه.. اتمشينا شويه وقعدنا لوحدنا.. وبدأ كلامه

اسعد: انا عايز اقولك على السر الي شايله في قلبي.. السر اللي مخليني مش عارف اجرب حاجه بنفسي..
امير:سر ايه؟
اسعد: انا ححكيلك كل حاجه..

من حوالي تلات سنين شهد كانت بتعوم في البحر.. وفجأه جت دوامه وكانت مش عارفه تسيطر على حركتها ولا تتنفس .. لمحت حد من بعيد بيحاول يساعدها.. وكانت بتغرق.. فتحت عينيها في الكهف الغريب .. مربوطة .. مش فاهمه حاجه ..

شهد: انا فين.. انتو مين

كان في واحده هناك شكلها مريب.. عرفت بعد كده انها الساحره.. قالت شويه كلام وهيه ماسكه راس شهد .. بعدها شهد بقت تفهم كلام الكائنات الغريبه..
ودوها المعبد تقابل كبيرهم.. طلب منها انها تطلب منه قتلها

شهد:يعني ايه اطالب بقتلي؟ انا مش عايزه اتقتل
الكبير: احنا أمرنا الساحره تلاقي طريقه تخلي الناس تطلب تتقتل بس مش عارفه
شهد: طب انتو محتاجين مني اطلب ليه طلب زي ده ..
الكبير: لحم البشر بيموتنا.. والمعاونين أشاروا انه بيموتنا عشان بنقتلكم دون رغبتكم..
شهد: انتو بتاكلو لحومنا؟
الكبير: انتو سمك ضخم بالنسبه لينا .. بينزل على الشط بتاعنا.. انتو موجودين عشان ناكلكم.. لحمكم اطعم من لحم السمك ..
شهد: انا كنت لمحت واحد بيساعدني وانا باغرق.. مجاش هنا معايا؟
الكبير: انتو عندكم لو حد بيغوق بيساعدوه؟
شهد: اكيد مش بيسبوه كده ..
فكر شوية الكبير وبعدها كلم معاونية: أأمروا الساحره تعمل للبنت تعويذة جديده .. لازم لما الجو يبق كويس عندهم .. نرجعها في دوامة الشط بتاعنا ليهم تاني .. بس تموت لو طولت عن ربع ساعه ومرجعتش هنا تاني .. لازم يتوهموا وهما بيساعدوها ان الجو بقى متقلب عشان يروحوا للدوامه معاها ..
شهد: يعني انا حروح وارجع عن طريق الدوامة؟ ولو مرجعتش اموت؟
الكبير : ايوه .. تروحي تسحبي واحد منهم عشان ينقذك .. ويدخل معاكي دوامة الشط .. ولو الساحره موصلتش لطريقه .. حتموتي وقتها بردك..

بعدها بشهر اجتمع في المعبد الكبير شهد و كبير المعبد و الساحره والمعاونين .. طول الشهر وشهد بتدعي انها متتقتلش ..

الساحره: سيدي انا حقول دلوقتي علي البنت التعويذه

بعدها بدقايق حست شهد بقشعره جامد واتنفضت
ضحكت الساحره : التعويذه بكده جابت نتيجه
الكبير: كده فاضل حاجه واحده..
بص للساحره وكمل: تعويذه اغواء الرجال .. لازم يسمعوا كلام شهد عشان يطلبوا القتل من نفسهم..
الساحره: سيدي حضرتك عارف اني عارفه التعويذه ..
الكبير: القيها على شهد ..

كانت شهد مستنيه لحظه زي دي.. بعد مقشعرت تاني لما التعويذه عملت نتيجه.. أمرت الكبير بقتل الساحره على طول .. كانت مفكرة بعدها حتأمره انه يقولها طريقة للرجوع غير الدوامة .. وترجع تاني .. بس اللي حصل كان مختلف للأسف ..
الكبير اتأثر فعلا بشهد وامر الحراس بقتل الساحره ..
وقتها الساحره ألغت التعويذه اللي فاتت قبل ماتموت على طول ..
لما راح تأثير التعويذه كان الكبير مش فاكر هوه عمل كده ليه .. وأمر بقتلها ليه.. وفضل يفكر كتير .. حييعمل كده ايه ..

شهد: سيدي لما يجي جد جديد انا حترجملكم .. مش لازم يفهمكم ..
الكبير: ونخليه ازاي يطلب قتله؟
شهد: انا حقنعه ان الرجوع لبلاده مش بيحصل الا في حالة واحدة بس .. لو طلب قتله ..

عجبت الفكرة الكبير جدا.. وبدأت شهد حياتها معاهم.. كانت بتكره نفسها.. كانت بتقنع نفسها ان لو معملتش كده حتتقتل.. بتدور على اي طريقه تطلع منها غير الدوامه دي.. لو غابت عنها ربع ساعه بعد متطلع حتموت..

مرت الايام والشهور.. لغايه مقررت تبدأ تساعد اي شخص .. يمكن يلاقي طريق في الغابه للرجوع .. ويساعدها ويرجعوا .. يومها الشخص ده كان "أسعد"..
لما طلعت معاه يومها عشان توصف له الكهف والمكان .. فضلت تشاور على الماكن وتقول كلام تاني خالص ..

شهد: انا حقول كلام مهم .. اوعي ترد عليا.. اوعى تبين اي اهتمام .. مش حاعرف اطول في الشرح عشان مياخدوش بالهم .. انا ههربك من هنا.. الكائنات دي بتاكل لحوم بشر.. راقب اللي حيحصل بعد متهرب حتلاقي الجديد حيموت.. مش حاعرف اساعد الكل.. ححط منوم للحراس بليل.. اهرب للغابه يا أسعد .. ودور على طريق للرجوع غير هنا .. ومتنسانيش.. حافظ على نفسك عشاني.. انا عايزه ارجع لأهلي .. انا بساعدههم هنا بس عشان اعيش.. متقلش لحد اني نبهتك.. لازم يفكروا اني مع التانيين عشان لو كتير عرفوا حيبقى خطر عليا.. لازم كلهم يكرهوني عشان لو اتكشفوا هما ماتكشفش انا معاهم .. لازم تحافظ على حياتك عشاني ..
سمع أسعد الكلام الغريب ده وفضل يفكر شويه وهما ماشيين .. بعدها قالها: طب لما الاقي طريقة حتعرفي ازاي؟
ردت شهد: .. لو لقيت طريقة ترجعنا .. ارسملي بالطوب شكل نجمة على اول الغابة .. انا كل يوم الصبح حاصحى على امل اشوفها .. يوم ماشوفها بليل حتلاقيني عند مدخل الغابة ونهرب .. بس لاحظ يوم ماهرب حيبقى غير هروبك .. حيتعصبوا ويدوروا عليا اكتر .. انا الوحيده اللي بترجم .. انا الوحيدة باللي بأكلهم بشر .. لازم لما اهرب يبقى في طريقة

حكالي اسعد كل اللي حصل بينه وبين شهد .. فهمت ليه كان اسعد بيحافظ على حياته رغم يأسه.. كان شايل مسؤوليه انقاذ شهد ..

امير: وانت بتقلي كده ليه؟
أسعد: خايف اضعف .. فكرة النط بتلح عليا كل مرة .. بس شهد اللي انقذتني مينفعش اسيبها كده .. حاول تحافظ على نفسك .. وتحافظ على شهد لو انا نطيت ..

بعدها بيوم بليل كنا كلنا قاعدين في الكهف من غير أسعد ومنير .. منير ده كان واحد من اللي جهم بعدي .. سمعنا وقتها صوت الجرس .. بيعلن عن قدوم بشري جديد لمصيره المجهول يا مأكول من الكائنات .. يا معانا بيحاول يعيش .. ياما ينط بعد اليأس .. او يروح الشط ويتقتل ..

يومها رجع منير لوحده ..

منير: أسعد نط في الماية ..

مستغربتش.. كان باين عليه من فتره.. اكيد سره مع شهد هوه اللي كان حايشه ..

يومها بليل طلع تلاته انا كنت واحد منهم وهربنا "محمود" .. البشري الجديد .. بقينا سبعه .. فضل يسأل ونجاوب .. القصة بتعيد نفسها كالعادة ..
بعدها بيومين كنا وصلنا لمكان جديد في الغابة.. وبنلف فيه عشان نكتشف تفاصيله .. منير نادى علينا فجأه ..

منير: يا جماعه تعالوا هنا بسرعه..

وصلنا لقيناه بيشيل مجموعه ورق شجر.. وراها مدخل كهف .. كهف جديد منعرفش بيروح على فين .. دخلنا براحه الكهف .. كل لونه كحلي زي باقي اغلب الكهوف اللي شفتها هنا ..

مشينا لغاية موصلنا لمنظر مرعب .. شفنا ..
(تتبع)
رغدة_حمودة
انتظروا باقي الاجزاء😍