قصة الصندوق🗃 الجزء الثاني

وعماله أصرخ وخايفه وخرجت لتيتا
-في ايه يا بت بتصوتي كده ليه وبتترعشي كده ليه ما تردي عليا ؟؟
=في حد بينادي علي اسمي من تحت السرير
-اي هييه  حد بينادي عليكي انتي اتجننتي باين قولتلك تعالي كولي هي البطن الفاضيه اللي بتعمل كده
*مردتش عليها وقعدت علي الكنبه استجمعت نفسي واتشجعت ودخلت الاوضه وطلعت الصندوق بس ملقتش الصوت معقوله كنت بتخيل لا انا متاكده اني سمعت حد بينادي عليا ،حطيته تاني تحت السرير وجايه بخرج من الاوضه علشان خفت انام في الاوضه لوحدي وبقفل النور الصوت جيه تاني
المره دي جريت ناحيه الصندوق وفضيته كله وقلبته لاقيت في طبقه بتتشال تحتها 100 ورقه مترقمين ومحطوطين بالترتيب
ايه الورق ده وايه اللي بيحصل  كلها اسئله جت في دماغي مسكت اول ورقه صغيره صفره مكتوب فيها "انتي اللي سرقتي الخمسه جنيه من جيب ابوكي"
الورقه خلتني افتكر الموقف
كنت في ابتدائي واتسحبت وخدت خمسه جنيه من جيب قميص بابا وهو نايم  لكن ماما شافتني وساعتها مضربتنيش بالعكس كلمتني بكل هدوء وعرفتني ان ده غلط وحتي مقالتش لبابا ازاي حد يعرف الموضوع ده!!
فتحت الورقه التانيه والتالته وقعدت افتح في كل الورق وكل ورقه فيها سر صغير عملته مكنش حد يعرفه حتي اللي يعرفوه ماتوا او مبقناش صحاب!
لغايت ما وصلت لاسرار بعملها دلوقتي
ورقه مكتوب فيها
"هتبطلي سجاير امتي" والتانيه
"راضيه عن نفسك وانتي بتكلمي وبتخرجي مع ولاد "
"مش كفايه بقي الطريق اللي انتي ماشيه فيه "
فتحت الورقه اللي بعدها
"هتبطلي الحاجات دي ياما هفضحك في المنطقه كلها "

"عايزك ترجعي مريم الجميله اللي بتتكسف من خيالها"
"عايز تقطعي كلام مع كل الولاد"
"انا عارف حاجات تانيه وصور وحاجات تخليكي تهربي من المنطقه بفصيحه"
"مريم انا عارف انك ندمانه علي كل اللي بتعمليه ده وانك عايزه ترجعي لمريم البريئه "

أترعبت جدا وقعدت أعيييط مين اللي هيفضحني معقول حد من اللي كنت بكلمهم بس محدش يعرف انا ساكنه فين انا هتجنن اعمل ايه وكمان محدش من الولاد اللي  يكلموني هيبقي عايزيني اسيب اللي انا بعمله وبعدين ده عارف حاجات ومن انا صغيره !
انا فعلا مندهشه من كميه الحاجات اللي يعرفها عني وده لاني في المنطقه هنا مش باين عليا كده خالص انا قادره ابين للناس اني محترمه جدا  وكله فاكرني البنت المثاليه اللي متربيه كويس
لكن انا اول ما بخرج من المنطقه ببقي حد تاني كأني شخصين ولو بكلم ولاد بكلمهم لما تيتا تنام
انا مكنتش كده قبل ما بابا وماما يموتوا انا كنت فعلا شخصيه محترمه مش بتمثل !
كنا عايشين بسعاده وبنحب بعض لكن هما ماتوا وسابوني وعشت مع تيتا كان عندي 17سنه بدأت اعاقب نفسي واعمل اي حاجه مكنتش بعملها زمان او يمكن بعاقبهم علشان مشيوا انا عارفه ان ده غلط وان مش بايديهم يسبوني بس انا مبقتش عايزه اعيش اي حاجه كنت عايشه زيها زمان علشان كده بدأت اكلم ولاد واخرج معاهم واشرب سجاير   اي عريس بيجيلي من المنطقه برفضه لانه فاكرني البنت المحترمه الجميله ميعرفش ايه اللي ورا القناع ده!
جملته اني ندمانه واني عايزه ارجع فعلا حقيقه في كل مره قبل ما نام بعيط وبحس بقرف من نفسي وانا مش عايزه اعمل كده بس اضعف وبرجع تاني زي الادمان بالضبط 
بس حسيت ان كلامه بيشجعني وفي نفس الوقت بيخوفني انه يفضحني بس في جمل رجعتني لمريم زمان اللي كنت بحاول انساها وكمان لمسني بكلامه والهدايا اللي  حسيت بيها انه  عرفني كويس ورجعني لذكريات ماما وبابا الله يرحمهم زي ما يكون فتح جوايا باب بحاول اقفله من سنين
صوت الموبيل قطع افكاري كان محمد واحد من اللي بكلمهم رديت وانا بكلمه لاقيت رساله جتلي
ايه ده معقول ايه الرساله دي!

‏Menna_elshamy
‎الجزء_التاني
الصندوق