حياة و يونس ❤❤
"حياةُ يونس"
...
-مش هتاكُل يا يونس؟!
=ما أنا كلت خلاص
الحمدلله
-بس ده أكلك زي ما هـ..
=مش قُلتلك كلت خلاص
ماتعصبينيش بقا
-حاضر أنا آسفة
=أنا نازل
-هتنزل تالت يوم جواز؟!
=هو إحنا مش اتفقنا على اللي بينا!!!
-أيوة اتفقنا..بس على الأقل بلاش تنزل علشان محدش يعرف حاجة
و صدقني أنا مش هضايقك خالص
=طيب خلاص
شكرًا
-العفو
=أنا آسف
-لا لا و لا يهمك
.......
*فلاش باك*
° يونس يا ابني بالله عليك اتجوز حياة بنت خالتك و تنسى البنت دي اللي بتحبها أنا مش مرتاحة ليها
=يا ماما أسماء طيبة خالص مش عارف إنتِ ليه مش بتحبيها كده..!!
و بعدين حياة عمري ما شُفتها غير أخت ليا و كمان واثق إنها مش شايفاني غير أخ بردو
صدقيني يا ماما أسماء طيبة
° صدقني إنت يا يونس هي مش طيبة و لا نيلة دي عقربة...إنت ماشوفتش كلمتني إزاي يوم ما روحنا نتقدم ليها
و كمان أبوها كلمنا بطريقة مش حلوة أبدًا
و أمها ماكانتش عارفة تسكتها و لا تسكت أبوها
ربنا يكون في عونها قاعدة في بيت زواحف مع عقربة و تعبان و في الآخر أبوها قالك لما تجهز كويس تعالى
أصلًا مش عارفة إنت إزاي لسه عاوزها بعد الإهانة دي كلها..!!
=يا ماما ما أنا قُلتلك اللي فيها
و هي اعتذرت ليكِ و قالت إنها كانت بترضي أبوها مش أكتر
° بص يا ابني خدها كلمة مني أنا أمك و أعرف عنك
كانت أمي الله يرحمها تقولي دايمًا البنت اللي تحب راجل و الله لو عاوزاه و رايداه هتقعد معاه و لو في أوضة بس و هتكتفي بدبلة طالما شايفة إنها اختارت راجل هيصونها و يحميها و مش هيحوجها للناس
=يا ماما مفيش من البنات دول في زمننا ده
° و مين قال مفيش يا مايل
=المهم يا ماما أنا عاوزك ترضي عنها ممكن؟!
° يا ابني يا حبيبي أنا مش بكرهها بس كان نفسي في واحدة تصونك في غيابك قبل حضورك
و دي ماصانتكش في حضورك أصلًا يبقى هتصونك في غيابك إزاي؟!!
=ماتخافيش يا أمي هي طيبة و هتصوني
° طب و الشقة اللي أبوك حط فيها فلوسه كلها و اشتراها ليك قبل ما يموت علشان يكون عملك حاجة هتبيعها كده بسهولة؟!
=.....
°لا ما إنت ترد عليا...!
=هعمل ايه يعني ما هما قالوا عاوزين شقة واسعة و دي ماعجبتهمش..!
° عاوزاك ياابني تداوم على قيام الليل و تقول دايمًا يارب اخترلي و لا تخيرني
هتلاقي حياتك بتتصلح غصب عنك
=ما أنا بصلي الحمدلله يا أمي و مش بسيب فرض
° صلي قيام يا حبيبي و هتدعيلي لما تتفرج على حياتك و هي بتتجمل
= ربنا يباركلي فيكِ يا أمي
*********************
=أهلًا أهلًا إزيك يا خالتو نورتينا والله
أومال مين دي يا ماما؟!
° دي حياة يا يونس ما شاء الله ربنا مَن عليها بالنقاب
= نقاب إيه بس يا بنتي؟!
إنتِ لسه صغيرة على الكلام ده!!!
هيكبرك و جمالك هيتدارى و محدش هيشوفك
كنتِ على الأقل تستني لما تتجوزي
و بعدين إنتِ مخبية وشك عني ده احنا متربيين سوا؟!
-هو من نحية مكبرني فهو مكبرني عند ربنا
و من نحية الجواز فلكل واحد نصيبه هيجيله هيجيله و مش هنروح في حتة منه
و من نحية إني مخبية وشي عنك فهو مابقاش ينفع إحنا كبرنا خلاص
=كلامك كلام كبار
اممم إنتِ كبرتي إمتى يا حياة؟!
° هي كبيرة من زمان يا أعمى البصر و البصيرة
=يا ماما حرام عليكِ بطلي تقطمي فيا كده..!
° روح يا ابني غير هدومك علشان أحطلك الأكل
=حاضر
*************************
*إزيك يا يونس؟!
=الحمدلله كويس
مالك يا أسماء و مال صوتك؟!
*أنا جايلي عريس
=بجد؟!
*أيوة
=طب ما تقولي إنك مش موافقة زي اللي قبله
*ما هو أصل.....
=ما هو ايه؟!
*بابا موافق عليه جدًا و كمان بيقول إنه عنده شقة كبيرة و جاهزة
و هو بصراحة كويس و كلامه كويس
=نعم؟!!!
نعم يعني؟!
كلامه كويس إزاي؟
هو إنتوا اتكلمتوا؟!!!!!
*ما هو بصراحة عملنا قاعدة امبارح بالليل
=و إنتِ وافقتي تقعدي؟!
*بابا غصب عليا و بعديـ....
=بابا غصب عليكِ؟!!
بابا لو غصب عليكِ فعلًا ماكنتيش هتبقي معجبة بيه كده!!
أنا مش مصدق أصلًا إنك بتقولي الكلام ده؟!
ده إنتِ يا شيخة ماشكرتيش فيا كده لما جيتلك
*إنت عاوز ايه دلوقتي يا يونس؟!
=إنتِ اللي عاوزة ايه؟!
*مش عارفة يا يونس بس ..
=أيوة أنا عاوز بعد بس دي
*هو كويس و جاهز و بابا موافق عليه خلاص
=ماشي يا بنت الحلال و أنا اللي ماكنتش كويس يعني؟!
على العموم ربنا يصلح حالك و مبروك
**********************
° يا ابني ريح قلبك و بالك بقا
أنا قُلتلك دي مايتزعلش عليها والله
و أهي اتجوزت أهي من ست شهور فربنا يصلح حالها بقا
=ربنا يصلح حالها
° ممكن تتقدم لحياة يا يونس؟!
=تاني يا ماما؟!
° البت غلبانة و الله
و أنا يا يونس مش ضامنة إني أعيشلك و إنت مفيش عندك أخوات و هي بنت حلال و أنا متأكدة إنها هتصونك
=هه هتصوني؟!
ده اللي حبيتها ماصانتنيش
° أديك قُلت اللي حبيتها مش اللي حبيتك
و دي بتعزك أوي يا ابني
=معلش يا ماما اقفلي على الموضوع ده
° ماشي يا ابني حقك عليا
*********************
=ايه يا ماما مالك كده؟!
° تعبانة أوي يا ابني والله و حاسة إني روحي بتطلع
=أنا آسف إني إتأخرت عليكِ بس الشيخ بعد صلاة العشاء كان بيتكلم معانا و سرقني الوقت
° ربنا يصلح حالك يا ابني يا رب و يهديك كمان و كمان
=تسلميلي يا غالية
ربنا ما يحرمني من دعواتك
° مش ناوي تسمع كلامي بقا يا ابني بقالي شهور بتحايل عليك في نفس الموضوع و إنت مش راضي
=ااااه حاضر يا أمي حاضر موافق
بس بشرط نعمل الخطوبة و كتب الكتاب في نفس اليوم و نتجوز بعدها بشهر
° ايه اللي بتقوله ده يا ولد؟!!
و هي هتلحق تخلص حاجتها؟!!
إنت نفسك هتلحق تخلص؟
=أنا حاجتي خالصة يا أمي من زمان و الشقة خلصانة مش فاضل غير حاجات بسيطة
بس أنا مش معايا غير مبلغ معين كده هجيب بيه شبكة و الحاجات اللي محتاجها دي هاخد سلفة من الشغل كده
° يونس؟!!
=آخر كلام
كلمي خالتو و قوليلها إن إحنا هنروح بكرة بعد المغرب بإذن الله على طول
=مش مكلماها أنا ماارضاش لبنتي اللي بتقول عليه ده و حياة بنتي
° تعالي نروح مش هنخسر حاجة
*************************
=إزيك يا حياة؟!
-الحمدلله بخير والله و إنت؟!
=الحمدلله بخير
-ليه ماخلتنيش أنزل النقاب؟!
=ما أنا عارفك مش تايه عنك
-بس ده عدى أكتر من سنة و نص على آخر مرة شُفتني فيها
=عادي يا حياة المهم شخصيتك مش أكتر
-إنت جاي علشان ترضي خالتو صح؟!
= أنا مش عيل علشان تقولي كده
المهم أنا مش معايا مبلغ كبير للشبكة و فاضل ليا حاجات بسيطة للشقة هاخد سلفة من الشغل ليها
و عاوز الخطوبة و كتب الكتاب سوا و نتجوز بعد شهر
الظروف مش قد كده بس صدقيني مش هحرمك من حاجة
-أنا موافقة
=بجد؟!
-أيوة موافقة
كفاية إنك إنت اللي هتكون معايا و مش عاوزة حاجة تانية من الدنيا
=......
-هخرج أقولهم اللي قُلتهولي و هقول إني موافقة
*******************
° اختاري يا حياة اللي إنتِ عاوزاه
-أنا مش عاوزة غير دبلة يا خالتو
=نعم؟!!!
هو في حد لسه بيرضى بدبلة؟!
-أنا مش بحب الدهب أصلًا
=ممكن كلمة على جنب يا حياة؟!
-آه أكيد اتفضل
=ايه اللي بتعمليه ده؟؟
شبكة ايه اللي هتكون دبلة بس؟!
-أنا مش بحب الدهب يا يونس
لو عاوز تجيبلي شبكة كاملة ابقى جيبهالي فضة لإني بحب الفضة أكتر
و بعدين خلي فلوس الشبكة لباقي الشقة أنا مارضاش إنك تروح للناس على فلوس و إنت كان في ايدك فلوس و ضيعتها
و بعدين أنا مش بلبس الدهب
أنا عندي دهب في البيت من ماما و بابا الله يرحمه و مش بلبسه
فخلي الفلوس معاك و نستر نفسنا بيها و أنا مش عاوزة حاجة تانية من الدنيا
=أنا مش مصدق نفسي يا حياة!!
-يلا بقا نروحلهم لإن وقفتنا دي ماتنفعش
********************
-بسم الله
=بسم الله
ممكن أتكلم معاكِ شوية و تسمعيني و تفهميني بردو
-أكيد
بس عاوزة أقولك إني عارفة إنت عاوز تقول إيه
و أنا بردو مقدرة إنك عملت كده علشان خالتو يا يونس ربنا يبارك في عمرها
=لو عاوزاني أطلقك بعدها بفترة هطلقك بس مش دلوقتي
و لو عاوزة تفضلي صدقيني أنا بردو مش وحش
بس من حقك تحبي و تتحبي
-ربنا يسهل في اللي جاي
=لو عاوزة تفضلي بالنقاب افضلي بيه علشان ماتتخنقيش
-بجد!!
لا لو عليا هشيله عادي المفروض إنك بقيت جوزي
بس إنت شكلك اللي مش طايق تشوفني
على العموم مش هضايقك
ربنا يريح بالك
*********************
*نرجع تاني لتالت يوم جواز*
=يا حياة!!
إنتِ فين يا حياة؟!!
يعني الواحد ينام شوية يصحى مايلاقيش مراته؟!
مراته؟!!!!
إيه اللي بقوله ده!!!
يلا ما هي مراتي فعلًا
أنا نمت إزاي على الكنبة أصلًا؟!!!
لما أدخل اشوفها في الأوضة كده
-إنـ... إنت صحيت إمتى؟!
=إيييييه؟!!
-صحيييت إمتى؟!
=هو مين؟!
-إنت يا يونس إنت !!!
=أنا مين؟!!!
-يوووونس فوووق!!
=إنتِ احلويتي كده امتى؟!
-نعم!!
=هاااا...لا قصدي يعني إنتِ ليه خالعة النقاب و كمان الطرحة
-ما هو بصراحة كنت لقيتك نايم و انتهزت الفرصة و جيت الأوضة أظبط شعري ماكنتش أعرف إنك هتصحى دلوقتي
=ده الحمدلله إني صحيت
-نعم؟!
=أنعم الله عليكِ
-و اياك
=ممكن طلب؟!
-اتفضل طبعًا
=خليني أشوفك كده على طول ممكن؟!
-نعم!!
هو إنت عاوز تمشيني على مزاجك يا يونس؟!
= والله أبدًا
بس أنا ماتخيلتش إنك حلوة كده؟!
-هه..يعني عاوزني أفضل كده علشان بس حلوة؟!
=خلاص براحتك يا حياة بس أنا مش قصدي
**********************
-قوم صلي بيا قيام ممكن؟!
=لا
-ليه؟!
=ما إنتِ فاهماني غلط يا حياة
ليه مالبستيش النقاب قدامي تاني؟!
-أنا عاهدت نفسي إني عمري ما هرفضلك طلب مادام مش هغضب ربنا
=مش فاهم!!
-أنا هعترفلك بحاجة
أنا بحبك من زمان ... من زمان أوي يا يونس
من لما كنا أطفال بنلعب سوا في الشارع
بس وقعت على الواقع المر لما لقيتك بتحب واحدة و اتقدمتلها كمان
كنت بصلي دايمًا قيام بإن ربنا يرزقني بيك
كنت بدعي في كل صلاة إن لو في خير فيك ليا ربنا يرزقني بيك و لو في شر يسقط عنك الشر و يرزقني بيك و كنت بدعي إنه يحط في قلبك حبي
قبل ما تيجيلنا خالتو كانت متصلة بيا و فهمتني كل حاجة و قالتلي أرفضك بس أنا وافقت لإني بحبك و حسيت إن ربنا كاتبلي الخير معاك و إن مش بعد كل دعواتي دي تيجي و أرفضك!!
قُلت لنفسي إني هحاول أخليك تحبني
بس إنت صدمتني في أول يوم جواز يا يونس و بكلامك القاسي ده بس استحملته لإني بحبك
التلات أيام دول كانوا بالنسبة ليا سنين و كنت بتعذب فيهم لدرجة إني كنت ندمت على موافقتي بيك..
لما جيت الأوضة و شُفتني من غير نقاب أعجبت بيا خُفت تكون معجب بس بشكلي و ده اللي ضايقني مش أكتر..!
=ايه كل الكلام ده؟!
ليه ماعرفتينيش؟!
-كنت عاوزني أجي أقولك بحبك و اتجوزني؟!
=إنتِ كبرتِ في نظري على فكرة من يوم الشبكة
كانت أمي في مرة قالتلي
البنت اللي تحب راجل و الله لو عاوزاه و رايداه هتقعد معاه و لو في أوضة بس و هتكتفي بدبلة طالما شايفة إنها اختارت راجل هيصونها و يحميها و مش هيحوجها للناس
أنا قُلتلها إن مابقاش في حد كده و يوم الشبكة استغربت إنك ضحيتي بدهبك علشان ماستلفش من الشغل
خلال شهر الخطوبة كنت بحس بانجذاب ليكِ بسبب بعض تصرفاتك بس كنت بتجاهلها
و صدقيني أنا وقت الغدا لما زعقت ليكِ كنت عاوز أتهرب منك بأي طريقة
كنت عاوز أتهرب من مشاعري ليكِ اللي ماكنتش فاهمها من فترة
كانت مرة أمي قالتلي أصلي القيام و أتعود عليه و أفضل أدعي بإن ربنا يختار ليا و مش يخيرني و الحمدلله اختار ليا إنتِ
أنا ماكنتش حاطط في بالي غير رضا أمي بس صدقيني لقيت نفسي بحبك غصب عني والله
-لقيت ايه؟!
=لا مش هقولها لا
-طب أحسن
أنا هقوم أصلي القيام لوحدي يا يونس
=*شدها لحضنه و قال* ... بعد كده مش هتصلي قيام غير ورايا يا حياة يونس..!!
........
"دع أمرك بيد ربك دائمًا،
فهو خالقك و هو يعلم أكثر من علمك،
عندما يختار لك الله فلا تقلق فـ ستجد نفسك محاط بلطفه،رحمته و خيره دائمًا...فدعها تسير كما يكتبها لك الله"..
ريهام_يحيى
التعليقات على الموضوع