قصة شيطاني الاليف الجزء الرابع💀

#شيطاني_الاليف
#الجزء_الرابع
الجميع بيعاملني علي إني مجنونة بشوف نظرة الخوف والشفقة في عنيهم بحاول أفهمهم إني مش مجنونة وإن دي الحقيقة بس مفيش فايدة
إنهاردة دكتور أحمد زارني في أوضتي في المستشفي كنت فاكرة إنه بيطمن عليا وإنه صدقني أخيرا بس للأسف الأمر كان غير كده
دكتور أحمد : إزيك يا دينا شكلك بقيتي كويسة
دينا : الحمدلله أحسن كتير
دكتور أحمد : أتمني تكوني بطلتي جنانك وعقلتي كده
دينا : أنا مش مجنونة وإنت عارف كده كويس
دكتور أحمد : لا مش عارف اللي اعرفه إنك مجنونة الاموات مبيرجعوش والدليل علي كده إنك مشوفتهاش تاني من آخر مرة إنتي اللي مريضة وعموما أنا جاي عشان كده انا كتبتلك علي أجازة تقعدي في بيتك شوية كده لحد ما تعقلي وأعملي حسابك لو فتحتي موضوع البنت ده مع أي حد هتحصليها 
خرج بسرعة وسابني مصدومة حقيقي ومش مصدقة اللي هو قاله ده كان بيهددني بالقتل
خرجت من المستشفي ورجعت شقتي اللي تقريبا مدخلتهاش من ساعة ما كل الاحداث دي حصلت البواب قابلني في مدخل العمارة وقالي إنه مش لاقي القطة بس الجيران بيسمعوا صوتها بالليل قال إني ممكن أكون نسيت وقفلت عليها باب الشقة
هو خلص كلامه وانا تقريبا مش عارفة أعمل إيه أنا خايفة أطلع شقتي وخايفة ارجع المستشفي مفيش قدامي حل تاني طلعت شقتي وأنا بتمني أكون مجنونة
طلعت مكنش في أثر لأي حاجه دخلت أوضتي ونمت صحيت في وقت متأخر علي صوت حركة خفيفة حد بيتمشي في البيت وصوت الارض بيعلي نتيجة الخطوات فتحت عيني كان النور مقطوع خدت قرار إني مش هخرج أشوف أيه اللي بره مهما حصل صوت الخطوات وقف قدام الباب وبدأت أسمع الأغنية أغنية غريبة وقديمة  لحنها غريب خصوصا لما تسمعها من صوت رخيم قوي طفولي قدام باب غرفتك في شقتك اللي انت عايش فيها لوحدك الأغنية وقفت وبدأت أسمع صوتها بتنادي بإسمي دينا .....دينا ........دينا
صوت ضحكات عالي مع صوت قطة بيعلي
دينا ..... دينا .....دينا  أذني لي بالدخول
بدأ الصوت الهادي يتحول لصوت صراخ عالي كنت بستخبي أكتر في سريري مش عايزة أقوم وأواجه اللي مستنيني بره حاولت أقرأ قرآن مش عارفة مش فاكرة أي حاجة
فجأة ظهر نور من تحت الباب والصراخ زاد والباب إتفتح بقوة بدأت أحس بحركة جنبي الصوت المرة دي خارج من تحت سريري همس خافت "مفيش هروب من العقاب" ضحكات خافته واجهي عقابك مفيش مفر
جريت لبره الاوضة خرجت الصالة والمشهد اللي شوفته عمري ما هنساه في حياتي  البنت كانت واقفة وجنبها القطة بفستانها الابيض ورابطة شعرها الحمراء وتجويف قلبها الفاضي بس مش ده المهم المرعب كان حاجة تانية كان في بنت مشنوقة في السقف ضهرها ليا
البنت كانت لابسة فستان أزرق قصير لحد ركبتها بس اللي لاحظته جرح في رجليها أنا كمان عندي جرح في رجلي ولابسة فستان أزرق دي ....دي أنا   الجثة لفت وشها ليا
دي كانت أنا بس عنيها مش موجودين مكانهم فاضي وبينزفوا دم ومكان قلبها مخلوع الجثة وقعت علي الأرض وبدأت تزحف ناحيتي انا بدأت أصرخ من الخوف والصدمة أنا مش بهرب من البنت المرة دي أنا بهرب مني من جثتي بدأت تزحف ناحيتي كانت باصة عليا بالرغم من إن عينيها مش موجودة بس كنت حاسة بنظراتها حاولت أجري إتكعبلت في جسم صلب علي الأرض وقعت ملحقتش أقوم كانت واقفة فوقي بجسمها كله فوقي حاسة بريحة أنفاس كريهة مسكت إيدي وضغطت عليها بقوة كنت حاسة بنار بتاكل جسمي كنت قادرة أشم ريحة جلدي المحترق كانت بتحاول تتكلم وبيخرج من بوقها سائل لزج بدأت تقول كلمات مش مفهومة وبدأت كلماتها توضح العقاب ..... الانتقام ..... الانتقام 
بدأ صوتها يتحول لصراخ هستيري بدأت تضغط علي إيدي أكتر من شدة الألم فقدت الوعي معرفش فقدته لامتي بس لما صحيت كان النهار طلع كانت الحروق مبهدلة جسمي لما بصيت في المراية كان لون عيني مختلف كانت عين بني وعين زرقاء .....
أنا مبقتش فاهمة حاجة ولا عارفة هي عايزة مني ايه خرجت من البيت ولبست نضارة أخبي بيها عنيا أنا عارفة المرة دي هروح فين روحت للمكان اللي جبت منه القطة أو بمعني أصح بيت البنت  خبطت علي الباب كتير جداً ومحدش رد عليا لحد ما خرجت جارتهم اللي قصاد البيت وقالتلي أن مفيش حد هنا وإن صاحبة البيت سافرت لبلدها
سألتها فين بلدها دي
قالتلي قرية صغيرة تبع محافظة البحيرة
خدت منها العنوان بالتفصيل وقررت أسافرلها واللي يحصل يحصل بس قبلها عندي مشوار مهم روحت المستشفي لدكتور أحمد
أول ما دخلت عليه كان غريب وشه شاحب ومرهق وعنيه حمرا جدا
بص لي بتردد وخوف وقال : أيه شوفتي عفريت ايه تاني المرة دي
خلعت النضارة وبصتله وسكت أول ما شاف عنيا إترعب شهق من الصدمة وبان عليه الرعب وقال دي ....دي عيون القطة
ضحكت بسخرية وقولت : وأنت شوفت القطة فين شكلك هتتجنن زيي يا دكتور
بدأ يتلخبط وبان عليه الذعر وقال لا انتي مش هتخوفيني البنت ماتت عارفه يعني ايه ماتت ولو رجع بيا الزمن هموتها تاني
انتي مش هتقدري تخوفيني لا انتي ولا هي
ضحكت بسخرية : واضح انك مش خايف خالص  عموماً أنا مسافرة لجدتها حالا عشان لازم افهم اللي بيحصلنا قبل ما نموت
وخليك انت عايش ف خوفك وأنا متأكدة انك هتتجنن قريب
خرجت من عنده وأنا مش عارفة هواجه ايه بس لازم اكفر عن غلطتي علي الأقل

استنوا الجزء الخامس 😍

Hadeer_saeed