قصة شهادة زور
صحيت على صوت صرخة جي من أوضة ابني " كريم " ، جريت على الأوضة ، لقيت كريم ماسك راسه وعمال يصرخ .
- مالك يا كريم ؟!
- صداع يا ماما ، صداع هيفرتك دماغي .
مكنتش أول مرة والموضوع مبقاش ينفع يتسكت عليه ، الدنيا كانت ليل عشان كده مكنش في أيدي أي حل غير إني اديله برشامة صداع لحد الصبح وافضل جنبه لحد ما الشمس ما تطلع .
اخدته وجريت بيه ع المستشفى ، الدكتور فضل يقول كلام كتير مقدرتش أفهمه ، خلاني اعمله كذا آشعة ، آشعة مقطعية ع المخ وغيره ، الدكتور بص في الآشعة وظهر على وشه علامات الصدمة وبعدين قال لكريم :
- اطلع يا " كريم " يا حبيبي استنى برة شوية .
قالي و ملامح الحزن مرسومة على وشه :
- للأسف ابن حضرتك عنده cancer .
مفهمتش يقصد ايه في الأول ، بس .. بس عرفت إنه يقصد إن .. إن كريم عنده المرض الخطير ، كلامه نزل عليا زي الصاعقة ، كريم ابني الوحيد يحصله كده ، ده انا .. ده أنا معنديش غيره .
- طب أنا معييش حتى تمن العلاج ، من ساعة أبوه مامات وأنا وبجيب تمن عشا يومنا بالعافية .
- أنا مش عارف اجيبهالك ازاي بس للأسف العلاج ملوش لازمة في الوقت الحالي ، ابنك في اخر مراحل المرض ، فاضله ايام معدودة .
- لأ .. لأ انت اكيد غلطان ، طب .. طب بص تاني في الآشعة هتلاقيك اتلغبط ولا حاجة ، اكيد الآشعة فيها حاجة غلط .
- الآشعة صحيحة مية في المية ، ده قضاء ربنا ولازم ترضي بيه ، كل الي أقدر اقدمهولك محاولة بسيطة ، تقلل من انتشار توسع الورم في المخ ، يعني بمعنى ابسط هتدي لأبنك بعض الوقت .
لأ انا مش مصدقة ، كريم !! ، كريم ابني الوحيد هيروح مني !! ، طب ازاي ، هعيش ازاي من بعده ، طب .. طب ده الحاجة الوحيدة الي مخلياني متمسكة بالحياة ، ايوه ده اكيد عقاب ربنا ، كنت عارفة إن ربنا مش هيسامحني على الي كنت ناويه اعمله .
- الدكتور قالك ايه يا ماما ؟!
- الدكتور !! اه .. الدكتور قالي انهم شوية صداع وهيروحوا لحالهم يا حبيبي .
روحت كريم وروحت على المحكمة ، ميعاد الجلسة النهاردة ، وقفت قدام القاضي ، القاضي قالي :
- قولي والله العظيم لأقول الحق .
افتكرت الحديث الي دار بيني وبين محامي الأستاذة " عالية " ..
- طبعاً يا " زينب " انتي تعبتي من الخدمة في البيوت ونفسك في مبلغ يعيشك انتي وكريم ابنك عيشة كويسة .
- اه اكيد .
- يبقى تعملي الي هقولك عليه .
- قصدك إنك عايزني اقول شهادة زور .
- مش بالمعني الحرفي .. دي كدبة بسيطة عشان ابن أستاذة " عالية " يرجع لحضنها ، انتي ام وعارفة .
- طب والشاب الغلبان الي هيحقه هيروح .
- قدره كده .. بمجرد ما تعملي الي اتفقنا عليه الفلوس عن هتوصلك .
- وأنا موافقة .
- زينب .. قولي والله العظيم لأقول الحق .
صوت القاضي رجعني لقاعة المحكمة مرة تانية ، متستحملتش اكتم دموعي ، مقدرتش اكتم الوجع الي في صدري ، صرخت وانا بقول :
- والله العظيم لأقول الحق .. والله العظيم لأقول الحق .
سامحني يا رب ، سامحني إن فكرت ولو للحظة إني أشهد شهادة زور .
شهدت بكل الي عيني شافته ، شهدت بالحقيقة كاملة ، نظرات الغضب على وش مدام عالية كانت بتترصدني ، روحت وأنا ضميري مرتاح ، دخلت أوضة كريم وأنا بقوله :
- كريم مش انت قولتلي من فترة إنك عايز تروح الملاهي .
- اه بس انتي قولتيلي إنك مش فاضية عشان الشغل .
- طب يلا بينا .
كريم كان هيطير من الفرحة لما قولتله هوديك الملاهي ، اخدته وروحنا ، لاعبته كل حاجة كان عايزها ، اشترلته كل الي نفسه فيه ، كان مبسووط اوي ، ضحكته كانت جميلة اوي ، مش قادرة اتخيل اليوم إن الضحكة دي هتختفي .
روحت للدكتور زي ما اتفقنا عشان يعمل العملية الي قالي عليها عشان تدي الوقت لكريم زي ما قالي ، فهمت كريم إن دي عملية بسيطة عشان تنهي الصداع الي عنده ، بمجرد ما كريم دخل أوضة العمليات سمعت صوت دوشة كتير بره ، وبعدين لقيت ظابط داخل ووراه اكتر من عسكري ، مكنتش فاهمة اي حاجة ، لقيت الظابط دخل هو و اتنين عساكر على أوضة العمليات فجريت وراهم ، العسكري دخل ولقيته ماسك الدكتور وخارج بيه ، صرخت في الظابط ..
- حرام عليك سيبه ، ابني في أوضة العمليات جوه .
الظابط قالي :
- احمدي ربنا ، احنا لحقنا ابنك من تحت ايد واحد من اكبر تجار الأعضاء .
- تجار أعضاء !! .. طب وابني ؟!
- متخافيش ملحقتش يحط فيه مشرط ، بس هو نايم دلوقتي تحت تأثير البنج ، من حسن حظك بعد ثبوت التهمة على الدكتور " عادل دياب " أعترف على كل شركاؤه ومن ضمنهم الدكتور ده .
جريت على " كريم " اطمن عليه وأنا قلبي بينبض بسرعة وأنا بفتكر كل حاجة ، لما طلبت مني أستاذة عالية الي أنا شغالة في بيتها إني اروح أنضف عيادة ابنها ، كنت أنا الوحيدة الي موجوده يومها ، لما راحله مريض زي مرضى كتير ، المريض ده بعد فترة رفع قضية على ابن أستاذة عالية إن سرق منه أعضاء وهو تحت تأثير البنج ، وساعتها أنكر ابن أستاذة عالية إنه شاف الراجل ده من الأساس وبما إني الشاهدة الوحيدة طلبوا مني إني اكذب واقول إني مشوفتش الراجل ده ولا إنه راح للدكتور " عادل دياب " ابن أستاذة عالية ، دخلت على كريم لقيته نايم زي الملايكة .
جه شئ في ذهني فجريت بره ع الدكتور الي البوليس واخده ، قولته ..
- ابوس رجلك قولي إن ابني سليم ومعندوش اي حاجة .
الدكتور بص الناحية التانية وهو بيقولي ..
- ابنك سليم مية في المية ومعندوش اي حاجة .
قلبي طار من الفرحة ، نسيت إن ابني كان ممكن يضيع مني فعلاً دلوقتي ، نسيت كل حاجة ، جريت عليه ، فضلت احضن وابوس فيه ، الحمد والشكر ليك يارب ، الحمد والشكر ليك يارب .
" وَمَنْ أَظْلَمُ مِمَّن كَتَمَ شَهَادَةً عِندَهُ مِنَ اللَّهِ وَمَا اللَّهُ بِغَافِلٍ عَمَّا تَعْمَلُونَ)، «سورة البقرة: الآية 140»
" أَمَّن يُجِيبُ الْمُضْطَرَّ إِذَا دَعَاهُ وَيَكْشِفُ السُّوءَ وَيَجْعَلُكُمْ خُلَفَاءَ الْأَرْضِ ۗ أَإِلَٰهٌ مَّعَ اللَّهِ ۚ قَلِيلًا مَّا تَذَكَّرُونَ " « سورة النمل: الآية 62 »
.
*تمت*
.
#شهادة_زور
التعليقات على الموضوع