قصة عهد الملاعين

جدي قبل ما يموت وصاني وصية غريبة جدا؟! قالي يا احمد يا ابني بعد ما اموت و ادفن عايزك تفتح عليا القبر! وصية جدي غريبة جدا؟ مات جدي وطبعا منفذتهاش لأن نبش القبور حرام شرعا.. لكن في حاجات غريبة بتحصل في البيت؟! تاني يوم من وفاة جدي صحيت  من النوم على صوت قطط بتتخانق مع بعض ، لما كنت بطلع الصالة كنت بسمع صوت القطط جاي من اوضة جدي، بتحرك وكل جسمي بيتنفض من الخوف وافتح اوضة جدي، كنت بشوف منظر يشيب! بشوف مشهد لاشخاص غريبة لابسين عبايات لونها اسود ، مافيش جزء من جسمهم باين ، كانوا عاملين دايرة وعمالين يميلوا بجسمهم وهما بيرددوا كلام غريب، اللي كنت بقدر افهمه من كلامهم كام جملة وكانت هي ( عهد بدأوا الاجداد من سنين ، اللقاء اقترب ، مخلصنا وسيدنا ننتظرك ) مع كلام مش مفهوم.. فجأة الدايرة بتنفك وبشوف جسم بني آدم نايم على الارض وفيه قطط سودة كبيرة بينهشوا في لحمو! ومن غير سابق انذار بلاقي الجسم اللي نايم على الارض بيقوم ويقعد! هو جدي! ايوة جدي هو اللي نايم على الارض ! جدي! كنت انا اللي بقول الجملة دي وانا مصدوم ، بعدها بلاقي جدي بيقولي 

( مش قلتلك افتح القبر عليا بعد ما ادفن ! ) 

بعد ما قالي الجملة دي طلعت اجري من الاوضة ومن الاوضة طلعت برة الشقة ، فضلت قاعد في الشارع لحد ما الفجر اذن ، صليت الفجر ورجعت البيت ، كنت هديت شوية ، فضلت طول النهار افكر في اللي شوفته ، مرحتش الكليه لان اعصابي كانت تعبانه من اللي شوفته... الليل جه وطبعا لازم انام لان منمتش من امبارح، بس انا خايف انام ، خايف اشوف اللي شوفته امبارح!.. لكن النوم غلبني... نمت وصحيت  على نفس صوت القطط! قلت والله ما انا متحرك من مكاني واللي يحصل يحصل... 

لكن بعد دقائق لقيت باب الاوضة بيتفتح لوحده! انا قاعد على السرير منهار من الرعب مش قادر اتحرك من مكاني! لقيت نفس الاشخاص اللي لابسين عبايات سودة بيدخلوا الاوضة! متثبت مكاني ومش قادر اتحرك ، قربوا عليا لحد ما وصلوا للسرير ، كانوا لافين دايرة حوالين السرير وانا جوه الدايرة! واحد منهم عرى وشوا، شفت وشه اللي عبارة عن عين واحدة لونها ابيض ، مفهاش النني الاسود اللي بيكون في عين أي بني آدم طبيعي!... لقيت الشخص اللي عرى وشه مادد ايه ليا وبيديني كتاب! كنت خايف امد ايدي لكن سمعت صوت جوايا بيقولي ( كتاب العهد عليك أن تكمل مسيرة اجدادك! ) لقيت نفسي بمد ايدي وباخد الكتاب!... مجرد ما اخدت الكتاب اختفوا اللي كانوا واقفين !... مسكت الكتاب وفتحته ، لقيت ان الكتاب عبارة عن مذكرات لجدي؟ ايوة لان كان مكتوب في اول صفحة من الكتاب ( رضا الشافعي  والعشرين شيطان عهد الاجداد ) جدي اسمه رضا الشافعي ، يبقى ده مذكرات جدي! لكن مين هما العشرين شيطان وايه هو عهد الاجداد ، ده اللي انا معرفوش ، أو كنت معرفوش؟ لاني قريت الكتاب وعرفت حاجات مستحيل تتصدق! وعرفت ليه جدي قالي افتح القبر عليا بعد ما ادفن!.... 

الكتاب كان عدد صفحاته مش كبير ، كتاب صغير مكتوب فيه حكاية من سنين... فتحت اول صفحة وقريت والمكتوب كان كالاتي: 

انا رضا الشافعي، باقي ليا في الدنيا ساعات بسيطة، لكن هرجع تاني للدنيا! هرجع للدنيا بس مش بصفتي رضا الشافعي؟ خليني يابني الاول احكيلك الحكاية من اولها وانت هتفهم هرجع تاني الدنيا ازاي؟! اكيد يابني مستغرب من وصيتي الاخيرة قبل ما اموت، وبتقول لنفسك ليه جدي وصاني ان افتح تربته بعد ما يدفن؟ لما كنت شباب كانت بحب القراية في الكتب القديمة ، كنت باخد الكتب دي من مكتبة جدي ، جدي كان عنده كنز من الكتب القديمة اللي كانت في مجالات كتير ومنها كتب الاساطير القديمة والمخلوقات السفلية ، النوع ده اللي كنت بفضل اقرا فيه، في مرة وقع في ايدي كتاب غريب؟ شدني من اول مرة مسكته ، حتى اسم الكتاب كان غريب كان اسمه ( العزيف ) انشديت ليه جدا ، بدأت اقرا فيه وعرفت من الكتاب حاجات عمر ما خيالك يقدر يتصور اللي فيه؟ الكتاب كان بيحكي عن الكائنات اللي عاشت في الارض قبل آدم زي مثلا كائنات اسمها ( الحن والبن والمن والجن ) الكائنات دي كانت بتحتفظ بكل اسرار الارض، العلوم والتقدم كله كان عند الكائنات دي ، حتى كل العلوم اللي البشر وصلها بعد كده تعتبر ولا شيء من العلوم والتقدم اللي وصلوا الكائنات دي!... عرفت كمان ان الكائنات كان عددهم كبير جدا وكانوا في الاول متحدين مع بعض لكن بمرور الزمن عليهم بدأ يحصل صراعات كتير عشان كان كل واحد عايز يكون هو السيد فهنا حصلت حروب كتير والارض اتغرقت بالدم! فهنا جاء عقاب ربنا وقرر ان يرسل الملائكة تحاربهم وتخلص الارض من شرهم! مات في الحرب دي كتير من الكائنات ، وعدد بسيط نجي وهرب للكهوف ، هرب من الملائكة ومن قوتهم!... بعد ما الملائكة خلصت الحرب رجعت لربنا لكن كان معاها طفل؟ طفل من ذرية الكائنات اللي تم القضاء عليهم، الملائكة قررت انها تاخد الطفل ده للسماء العليا و ربنا يقرر مصيره؟ مصير الطفل ده انه اتربى مع الملائكة وبقى واحد منهم بل بقى المفضل عند ربنا بسبب شدة ايمانه وعبادته ، الطفل ده كبر وسط الملائكة واصبح هو ( عزازيل ) وكان لقبه طاووس الملائكة!... 

اما عن الارض ، فضلت سنين خالية من اي كائن حي لحد ما ربنا قرر انه يخلق سيدنا آدم... من هنا حصل نقلة كبيرة وكانت هي حقد ( عزازيل ) على ادم! رفض امر ربنا بالسجود لادم فربنا انزل غضبه عليه واصبح منبوذ ومطرود من الارض، وبقى هو ابليس المنبوذ من رحمة ربنا الى يوم الدين ، انطرد ابليس من الجنة واتولدت العداوة لادم، بقى ابليس شغله الشغال انه يخرج ادم من الجنة فوسوس له ودفعه انه ياكل من الشجرة المحرمة فانطرد ادم وحواء من الجنة! ابليس مسكتش؟ ابليس نزل الارض وقدر يوصل لعشيرته اللي هربوا من سنين في الحرب اللي حصلت ما بينهم وبين الملائكة! وهما العشرين شيطان.... ابليس عمل اتفاق معاهم ان عشان يقدروا يرجعوا يحكموا الارض تاني يحصل اختراق لنسل بني آدم ؟ وده مش هيحصل غير لو حصل تزاوج ما بين الكائنات وبني ادم! فاللي حصل ان ايناس من الكائنات المطروده من الارض تتشكل على هيئة بشر وينزلوا الارض ويحصل تزاوج من البشر ، وينتج عن التزاوج ده ذرية ! الذرية دي لحد الان بتكبر ، كل يوم الذرية بتكبر ، يعني هما عايشين وسطنا لكن منعرفش حاجة عنهم!... الذرية بتكتر لحد ما هيجي اليوم اللي هيكونوا جيش كبير و هيحربوا بني آدم ويرجعوا من تاني يسيطروا على الارض!... الكتاب كان مليان اسرار كتير ، الكتاب اللي عرفت مين اللي كتبوا؟ اللي كتبوا هما الكائنات! او للدقة شخصية اسمها ( عبد الله الحظرد ) رحالة يمني قضى عشر سنين في الصحراء واتقابل ما الكائنات دي وهما اللي املوا عليه كل الاسرار دي فهو دونها في كتابه ( العزيف ) قال كمان ان في بوابة بتفصل عالمنا وعالمهم؟ الطقوس دي هي انطاق الموتى؟! او نيكرونوميكون... من خلال انطاق الموتى هتقدر تفتح البوابة وتتواصل مع الكائنات!!... الطقس بيتنفذ على جثمان متوفي، بيتم تقطيع الجثمان لاجزاء وبعدها تستدعيه عشان يفتحلك البوابة... انا نفذت الطقس! في الاول مكنتش عارف ازاي هوصل للجثة اللي هنفذ بيها الطقوس، لكن الظروف كانت معايا؟ ابويا مات في الوقت ده، فبعد ما اتدفن اخدت جثته ونفذت الطقوس، وقدرت افتح البوابة وظهرلي ( ابليس ) بنفسه!... ظهرلي ابليس وحصل ما ببنا اتفاق أو عهد؟! انا كنت عايز اكون السيد عايز اكون شخصيه مهمه حتى لو هعمل عهد مع الشيطان! العهد اللي كان بيني وبين ( ابليس ) هو عهد الملاعين ، مقابل ان اكون المخلص والحاكم اخلي العشرين شيطان يخترقوا البشر؟ يتجوزوا من بنات البشر ، وده هيخلق ذرية كبيرة تخترق البشر عشان يرجعوا يحكموا الارض من تاني! قضيت حياتي كلها بخدم ابليس، كنت شغال في اعمال السحر الاسود؟ بنت مثلا عانس فاتها قطر الجواز، تجيلي وعايزه تتجوز، بعملها سحر واخلي واحد من ( العشرين شيطان ) يظهر في حياتها ويتشكل على هيئه بشرية ، يمارس العلاقة الحميمة ، واول ما بيظهر الطفل للحياة ويكبر وسط العيلة هنا بيجي في سن معين بيرجع تاني ليهم؟ بيرجع للشياطين بيكتسب منهم الصفات الشيطانية اللي هتخليه ينفذ المخطط اختراق الشياطين لعالم البشر!... او ست مش بتخلف بعملها سحر واخلي شيطان يمارس العلاقة معاها لحد ما يظهر الطفل اللي هيكون واحد من نسل العشرين شيطان! هتلاقيهم كتير لكن محدش هيقدر يكشفهم! ممكن يكون صحبك في الدراسة واحد من الشياطين دي او جارك بينفذ المخطط من غير ما البشر يكونوا عارفين، لحد ما هتيجي اللحظة اللي هتلاقي الارض اتملت بجيش كبير من العشرين شيطان ، وذريتهم من البشر وانا هكون قائد الجيش ده؟! ايوة هو انا يبني جدك هيكون المخلص! خلاص وقت تنفيذ عهد الملاعين حان! كل اللي عليك انك تفتح القبر عليا وانت هتعرف المطلوب منك عشان تنفذه! متحاولش تهرب ، عهد الملاعين لازم يتم والا مش هيسيبوك في حالك!... روح افتح القبر عليا ....  

الجزء الثاني

اللي قريته كان صدمة بالنسبة لي، حاسس اني عايش في كابوس ومش قادر افوق منه! مستحيل انفذ اللي مكتوب !... لكن كنت مفكر ان القرار بايدي انا؟ في اللحظة اللي قررت اني مش هنفذ حاجة من وصية جدي لقيت شيء غريب حصل؟ سمعت صوت القطط ودي اكيد علامه لظهور الأشخاص المجهولين! فعلا ظهروا من العدم، في لحظة لقيت اكتر من شخص لابسين نفس العبايات السودة جوه اوضتي! لقيتهم بيقربوا عليا، انا ساعتها كنت قاعد على السرير زي المتكتف مش عارف اتحرك من مكاني! واحد منهم كان ماسك كتاب ، فتح الكتاب ومد ايده على جبهتي وبدأ يقرأ كلام غريب، تعاويذ ، لما كان بيقول التعاويذ دي كنت بحس بسخونة بتسري على جسمي كله، شوية شوية ووعيي كان بيغيب! صوت التعاويذ كان بيختفي لحد ما اختفى تماما ومبقتش سامع اي حاجة، الدنيا اسودت في وشي! فتحت عيني لقيت نفسي في مكان غريب؟ ببص فوق مني بشوف صخور وببص يمين وشمال برضه بشوف صخور ومتعلق على الجدران مشاعل! المكان أشبه بالكهف!.. مفيش ولا مخلوق غيري في المكان، ثواني انا سامع صوت؟ صوت شيء بيمشي على الأرض ، حاجة مجهولة بتقرب من المكان اللي انا فيه! فضلت ابص حولين مني عشان اعرف مصدر الخطوات دي منين، الجدران بدأ يحصلها حاجة غريبة؟ كأنها بتتلخلخ من مكانها! شوية ولقيت فتحه بتتفتح في الجدار وبيخرج منها ابشع منظر عمري ما كنت اتخيل ان هشوفه في يوم من الايام! مش عارف اوصف الكائن اللي شايفه من شدة غرابة منظره! هو شيء أسود زي الفحم ، وشه اسود برضه الشيء الوحيد اللي لونه مش اسود هو عينه اللي لونها احمر كأنها بتطع شرار ! وفي نص رأسه قرنين طوال ! اكيد هو ده الشيطان! الرعب والصدمة مسيطرة عليا ، ولا عارف المفروض اعمل ايه في الموقف اللي انا فيه ده! الكائن خرج من الفتحة ومن بعده كائنات تانية كتير خرجت من نفس الفتحة! اشكالهم كانت مختلفة، منهم اللي زي القرود ، ومنهم الكلاب لكن مختلفين عن الكلاب اللي بنشوفهم؟ الشيء اللي كان بيميزهم كبر حجمهم والقرون اللي في وسط راسهم! كل الكائنات دي اتجهوا ناحيتي وعملوا دايرة عليا وكنت انا في وسطهم! الكائن أو الشيطان اللي اكيد ده سيدهم قرب على الدايرة فانفتحت! دخل جوه الدايرة والكائنات قفلت الدايرة من تاني! الكائن وطه عليا وسمعتوا بيقولي ( المهمة ستنفذ والا ستكون مصيرك الهلاك ، افتح قبر جدك قبل فوات الاوان ) خلص كلامه وحط ايده اللي كانت عبارة عن حوافر خارج منها ضوافر طويله اوي ، ايده اول ما اتحطت على جبهتي حسيت في كل جسمي كهربا، لسعة كهربا شديدة اخترقت جسمي خلتني محسش باي حاجة بعدها! فوقت لقيت نفسي على السرير ! من هنا حسيت ان في شي بيوجهني؟ يعني انا ماليش اي تصرف في عقلي ولا في جسمي بتحرك وفقا لكلام بسمعه جوايا! خرجت من الشقة ومنها على قبر جدي! الوقت كان بعد نص الليل ، مشيت وسط المقابر لحد ما وصلت لقبر جدي ، اول ما وصلت ظهروا نفس الكائنات اللي شفتهم في الكهف! الكائنات اللي كان منهم القرود والكلاب، هما اللي فتحوا باب القبر وبعدها دخلت! جوه القبر لقيت جثة جدي على الارض وكان جنب الجثة في كتاب ، سمعت صوت جوايا بيقولي اخد الكتاب واخرج من القبر؟! عملت كده فعلا ، الكائنات لقيتها بتخرج جثة جدي بره القبر ! صوت جوايا بيوجهني ان افتح الكتاب ، أول ما فتحت الكتاب لقيت جواه خنجر شكله غريب اوي! كان خنجر صغير منقوش عليه كلام غريب ، الصوت بيقولي اقلب الصفحات ، قلبت الصفحات وفجأة الصوت جوايا صرخ وقال 

( طقوس استدعاء المخلص )

اول ما سمعت الصرخة جوايا بتقول ( طقوس استدعاء المخلص ) لقيت الشيطان ظهر ! طلب مني أجرد نفسي من الملابس، عملت المطلوب مني لان مكنتش مالك غير ان انفذ، قعلت كل ملابسي ! بعدها طلب مني امسك الخنجر واشق بطن جدي اخرج قلبه! .. شقيت بطن جدي وخرجت قلبه وبعدها شاور الكائن أو الشيطان على الكتاب وكان مفتوح على نفس الصفحة اللي كان مكتوب على رأسها ( طقوس استدعاء المخلص ) ومكنش مكتوب ولا جمله بعدها ، يعني الصفحة كانت فاضيه اصلا! لكن لما اكلت قلب جدي الكلام على الصفحة بدأ يتشكل ويكون كلام قدرت اقرا ، اللي كان مكتوب ان ده طقوس لاستدعاء المخلص او الدجال اللي محبوس في الكهف اللي انا كنت فيه! وعشان يخرج من الكهف على حسب الاتفاق اللي حصل ما بين جدي وبين إبليس زمان لازم يموت الاول وبعدها حفيده اللي هو انا اكل قلبه وأعمل طقوس الاستدعاء اللي بعدها هيتفك حبس المخلص وهيظهر لكن هو مش جسم ؟ يعني المخلص عبارة عن طاقة محبوسة جوه الكهف وعشان يخرج لازم يلاقي جسم بني آدم يلبسه وطبعا لازم الجسم ده يكون شاب ومن نفس نسل اللي عمل العهد او الاتفاق زمان واللي هو ( جدي ) يعني انا اللي هكون المخلص مش جدي! انا اللي هقود الجيش ، جيش الدجال! بعد اللي قريته ده اكيد كنت المفروض اهرب، لكن انا مكنتش مالك خيار الهروب لان خلاص انا بقيت جوه العهد ولو خرجت مش هيسبوني في حالي! فعشان كده كملت الطقوس! الطقوس كانت هي أن هقطع جثة جدي حتت وبعدها اقرا تعويذة الاستدعاء ؟! قطعت جثة جدي ، الشيطان واقف منتظر وكان على وشه ابتسامة نصر ، بعد ما الجثة اتقطعت طلب مني شيء مستحيل كنت أصدقه؟ طلب مني كل جزء من جثة جدي أكلها! رفضت اعمل كده لكن لما لقيت سكاكين بتنهش في جسمي والالم كان لا يطاق عملت كده ! اكلت جثة جدي وقرات تعويذة الاستدعاء! مجرد ما عملت كده لقيت دخان ملى المكان مبقتش شايف اي حاجة منه، وحده وحده الدخان بدأ يتلاشى وبعدها لقيت جدي واقف جنب الشيطان! جدي بشحمه ولحمه واقف يبتسم لي ! قرب عليا جدي وقال لي 

( نفذت المطلوب منك على أكمل وجه )

بعدها بص للشيطان ولقيته بيقول له ( أنا جاهز ) مجرد ما قال كده لقيت الشيطان بيحط ايده على رأس جدي وبيقول ( الجسد جاهز للاختراق ) فضل يقررها كتير وكل ما يقررها جسم جدي بيتشنج جامد وبيصرخ لحد ما وقع من طوله! ثانية لقيته قام من مكانه ! لكن المرة دي انا شفت جسم واحد شاب مش جدي العجوز! شاب وسيم جدا ! انا مش فاهم اي حاجة ؟ هنا الشيء اللي واقف قدامي اللي المفروض جدي  قرب عليا وقال 

( انا المخلص ، أنا الدجال ، انا من النور ، بعد ظلام استمر لسنين جاء المخلص لينتشل البشر من الظلام ! )  كل شيء اتبدل من حواليا ، فتحت عيني لقيت نفسي جوه اوضه مقفوله عليا ، شوية ولقيت حد داخل عليا بيحطلي الاكل وبيخرج تاني، حاولت كتير اعرف انا فين لكن محدش بيرد عليا، ولما بحكي عن المخلص وبحظرهم بيعملوني كأني مجنون ! قررت اكتب كل الحكاية عشان جايز حد يصدقني ويحظر الناس من المخلص! ارجوكم متصدقهوش ، هو مش المخلص ، هو مش النور ، هو ظلام ، هو فساد ، هو عبودية ، هو امراض ، هو فيروسات ، هو الحروب ، هو جيش فاسد بيحارب الارض عشان يجعل البشر عبيد ويكون هو وإبليس السيد ! ... متصدقهوش هو موجود ما بينكم لابس بدلة شيك اوي وبيتكلم كلام هتحبه جدا لكن في الباطن عايزك عبد عنده! ...  

تمت

عهد_الملاعين_المخلص

محمد_مهني