النصيب
زي أي أم نفسها تفرح ببنتها،أمي كان نفسها تفرح بيا..
-يلا يا سمر قومي جهزي نفسك علشان تقابلي العريس كمان شوية بعد المغرب
=يا ماما بالله عليكِ كفاية بقا أنا تعبت و الله
مش عاوزة أقابل حد و مابقيتش طايقة كل شوية حد ييجي يقعد معايا و بعدها مايحصلش نصيب
و كمان مش كفاية الخطوبات اللي اتفسخت دي و بقيت حاسة بالإهانة من كل واحد شوية
و الحمدلله أنا مفيش فيا عيب يمنع حاجة بعيدًا عن العيوب اللي بتكون في الإنسان ما هو محدش كامل..!
-جربي المرة دي أخر مرة و الله يمكن نصيبك فيه!
=نفس الكلمتين بتوع كل مرة
و نفس وعد كل مرة و مابتوفيهوش يا ماما
و النصيب ده من ربنا و لربنا مش إحنا اللي هنكتب النصيب
-علشان خاطري ماتكسيفينيش قدام الشاب و أهله
=يا ماما أنا تعبت ليه مش حاسة بيا!؟
أنا مش كبيرة أنا لسه عندي ٢٩ سنة يعني لسه ماكبرتش و لا حاجة فبالله عليكِ ماتعملينيش كإني عانس و بايرة
-يا بنتي قطع لسان اللي يقول عليكِ كده
بس اعذريني يا سمر أنا يا بنتي مش ضامنة أعيشلك و إنتِ مالكيش لا أخ و لا أخت تتسندي عليهم لما أموت و إنتِ شايفة إن تعبي بيزيد..
لما أبوكِ اتوفى و سابني بعد سنتين جواز يا بنتي و من يومها و أنا لوحدي في الدنيا دي و خايفة عليكِ من اللي شوفته
=طب يعني أعمل إيه دلوقتي؟!
أنا مش قادرة أقابله يا ماما بجد
هيطلع عنده عيال و عاوزني أربيهم؟!
و لا مطلق؟!
و لا هيتضايق إني كنت مخطوبة قبله؟!!!
و لا هيكون راجل كبير في السن!!
-و الله يا بنتي ده شاب زي القمر عنده ٣٢ سنة هو بس كان خاطب قبل كده مرة و ماحصلش نصيب و بيشتغل محاسب في شركة محترمة
=و هيرضى بيا بقا و لا زي اللي بييجوا كل شوية و يتصدموا!!!
يا ماما أنا مش عاوزة أتوجع تاني بالله عليكِ
-لا يا سمر أنا عرفته بكل حاجة
=يعني إيه؟!
-يعني عرفته إنك اتخطبتي قبل كده وماحصلش نصيب و إنك عندك ٢٩ سنة و كمان خريجة طفولة و بتشتغلي في حضانة كويسة و ليكِ شخصيتك و كيانك
يا بنتي أنا مش ببيعك و أنا أول واحدة مش هوافق باللي مش كويس و مش مناسب ليكِ
أنا عاوزاكِ مرتاحة يا سمر
=طيب يا ماما هقوم أجهز نفسي
بس لو مارتحتش مافيهاش زعل تمام؟!
-تمام يا بنت قلبي
ماما خرجت من الأوضة و أنا مش عارفة أنا وافقت أقابله ليه!!
ما هو أصل أكيد الواحدة عاوزة واحد يقبلها كما هي و أنا حسيت براحة مش زي ما كان بيحصل فيا..!
أنا اتخطبت تلات مرات و اتقدملي كتير و أنا مش وحشة أنا الحمدلله حلوة بس مجتمعنا متخلف شايفين إن القطر فاتني!!!
وأنا بنهي آخر خطوبة ليا و أنا بعطيله الدهب قالي:القطر هيفوتك و بكرة تندمي عليا ده أنا كنت واخدك علشان خاطر أمك
قُلتله:لما يفوتني أحسن ما يفرمني و أنا مع واحد زيك
اكتشفت إنه متجوز واحدة و ماكانتش راضية تربي أطفاله من زوجته الأولى فاتجوزني علشان أتكفل بتربيتهم!!!
هو إزاي الناس بقوا أنانيين كده؟!!
اللي زي دول راضيين على نفسهم كده؟!
أنا الحمدلله ثقتي في نفسي مااتهزتش في يوم
كنت بزعل لما بيحصل شيء؟!!!
كنت بتقهر مش بزعل بس لإني كنت بزعل على أمي
بس أنا عارفة إنه خير و أكيد مش هحمل نفسي فوق طاقتها ما هو ربنا ماقالش كده يعني!
لبست و عملت الشاي و خرجت لقيته هو و مامته و باباه
هو بصلي من تحت لتحت بس أنا لمحته الخبيث و لما شاف إني لمحته بص لمامته ضحكت غصب عني و قُلت في نفسي:"شكله سوسه و الله"
أول مرة أخرج أقابل حد من فترة و أنا مرتاحة كده!!!
قعدنا فمامته سألتني:إزيك يا سمر يا حبيبتي؟!
ابتسمتلها و قُلت:الحمدلله و الله بخير
اتكلمنا شوية في بتشتغلي إيه و حياتك حباها إزاي و كده فهو بص لمامته بصة كده فهي ضحكت و قالت:مش هيقعدوا سوا و لا إيه؟!!!
قعدنا سوا نتكلم فهو قال:إزيك يا أستاذة سمر انا اسمي حسن محاسب و عندي ٣٢ حبيت أقدم نفسي و لو عاوزة تسألي أي سؤال اتفضلي
أنا عجبتني طريقة كلامه اللبقة و الواثقة و في نفس الوقت محترمة جدًا
رديت بثقة:أنا بس عاوزة أعرف عرفتني إزاي؟!
ضحك و قالي:أنا حكيت لوالدتك برا على فكرة و حضرتك بتعملي الشاي كل حاجة
أنا كنت مع صاحبي في الحضانة و هو بيجيب ابنه و كان لسه بيقولي عقبال ما تيجي تجيب ابنك من هنا ببص لجهة ابنه لقيتك ظهرتي من الشباك فجأة كده و بتضحكي!!
غصب عني و آسف بجد بصيتلك لدقايق
لقيت محمد بيقولي:ايييه اييييه عيينك دي بنت عمي!!
أنا اتصدمت بجد و قُلتله:طب بقولك إيه جوزهالي و أنا أجيب عيالي الحضانة هنا
ضحك و قالي:سبحان مغير الأحوال مش من يومين لسه بقولك في عروسة قُلتلي لا مش هتجوز؟!
إيه غير حالك يا ضنايا؟!
على فكرة سمر كانت العروسة!
قُلتله:بجد؟!!!
يعني بنت عمك دي هي الليييي.....
ضحك و قال:ايوة هي اللليييي
المهم ساقني القدر لعقر دارك بقا و كده
اللي عاوزة تقوليه قوليه و اللي عاوزة تسألي فيه اسألي فيه
طريقة كلامه حسستني إني بتكلم مع نفسي!!
سألته:أنا كنت قبل كده مخطوبة و محصلش نصيب
ضحك و قال:طب ما أنا كنت خاطب و محصلش نصيب
و بتمنى إن نصيبنا يكون سوا يعني
أنا ارتحت جدًا ليه و وافقت بيه...
بعد سنة اتجوزنا الحمدلله و حاليًا بقالنا سبع سنين متجوزين و معانا بنت و ولد و الحمدلله إنه دخل حياتي و جملهالي
أنا اكتشفت إن ربنا كان حافظنا لبعض حتى لو لُقانا اتأخر شوية لكن بقينا لبعض في الأخر،أو للتصحيح لقانا كان بداية الحكاية و بداية كل حاجة حلوة
وأيوة تعبنا كتير قبل ما نشوف و نعرف بعض بس ربنا بيسبب الأسباب و أكيد كل اللي حصل لينا كان لسبب
..
يوم ما تختاروا اختاروا اللي هتشوفوا فيه نفوسكم بجد
اللي هتشوف إن روحه لايقة على روحك
مش لما تختاروا علشان الناس و كلامهم
الناس أول ما أمرك ينتهي هيبصوا لأمر تاني و مش هيخلصوا و حالك عمره ما هيعجب الناس
خلي عندك ثقة في نفسك و اختاري اللي في نفسك و ساعتها الناس هتحترمك غصب عنهم
أصل دي حياتك مش حياة الناس
..
ريهام يحيى
التعليقات على الموضوع