قصة

القصة كاملة

قاعد حوالي الساعة  1بعد نص الليل في اوضتي وقافل عليا بابها كنت بخلص شوية حسابات..اتفاجئت أن أوكرة الباب بتتهز كأن في حد بيحاول يفتحها، وانا متاكد ان كل اللي في البيت ناموا، قمت بسرعه فتحت الباب، لقيت اسلام ابني اللي عنده 4 سنين  اللي المفروض نام من تلت ساعات، عينيه مبرقه ووشه شاحب وبيقولي

_بابا في صوت عالي زي الصريخ في الاوضه بتاعتنا..

هو واخته حلا بيناموا في اوضتهم، اخته اكبر منه لكن اسلام ده من يوم ما اتولد وانا حاسس انه اكبر من سنه،خاصة هدوئه ونظراته، اخدته في حضني وقلتله_متخافش يا حبيبي،

على اساس انها اوهام اطفال،،وقمت من مكاني وانا بقول_تعالى يابابا اما اشوف في ايه..

ومشيت قدامه عشان احسسه بالامان وفتحت باب الاوضه لقيت اسلام نايم في سريره ببص ورايا ملقتش حد..جسمي اتنفض..امال مين اللي جالي وحضنته؟؟  في الوقت ده لقيت اسلام بيقوللي وهو نايم في مكانه على جنبه الشمال من غير ما يتحرك او يرفع راسه..هو جالك يا بابا  ؟؟

_مين اللي جالي يا اسلام؟؟                                    

..صاحبي اللي بيجيلي كل يوم يا بابا                                                                                                                                      ..بتلقائيه لقيتني بساله_هو بيجيلك كل يوم يا حبيبي؟؟

لقيته اتعدل في سريره وقال ..ايوه يا بابا، وبنلعب مع بعض بس هو بيقوللي انه متدايق عشان شقة عمو كامل فيها اوضه منوره ولازم تنطفي..

ساعتها جسمي اتنفض تاني خاصة أن عمو كامل ده جاري في العمارة وشقته في وش شقتي  وهاجر كندا من ست شهور واحنا اصلا اتحاد ملاك عمارة في العاشر من رمضان وهو بني ادم وحيد لا نعرفله اصل ولا فصل وحتى عرفنا انه سافر كندا من عم على البواب وده راجل كبير في السن وقلبه ابيض ومبيتبلش في بوقه فوله فنشر خبر سفره بين السكان 

المهم انا هديت اسلام ابني وقلتله_اه يا حبيبي عمو سايب لمبه منوره عشان العصافير بتاعته..

فنام اسلام تاني على جنبه الشمال واداني ضهره وراح قايللي .. بس هو على فكره معندوش عصافير هناك.. هو عنده خفافيش بس ؟؟ وعايزها تمشي..  اتفاجئت من رده

انا طبعا خلاص اعصابي بتنهار وبحاول اني اظهر متماسك

_صاحبك اللي قالك كده يا حبيبي  

...ايوه وورهالي كمان

_اوعى تكون رحت هناك يا اسلام ؟                     

لا طبعا يا بابا مروحتش، دي هي اللي بتجيلي 

_مين دي اللي بتجيلك يابني ؟؟                                  

...مفيش يابابا ولا حاجه، خلاص انا هنام                     _خلاص يا حبيبي نام..

غطيته وبوست راسه وقلت يمكن اللي انا شفته اوهام ..اما حكاية صاحبه دي فكل الاطفال بتتخيل حاجات مبتحصلش ..عقلي بيحاول ينفي اللي حصل وميصدقوش باي شكل ..انا مؤمن طبعا بوجود الجن لكن مش مؤمن بامكانية التداخل بين العالمين ومرضيتش اسال مامته على حاجه ولا اصحيها وقلت ليله وهتعدي.. لغاية تاني يوم في نفس الميعاد كنت سايب باب اوضتي مفتوح لقيت اسلام جايلي بهدوووء فقعدت استغفر واستعيذ منا خلاص هتجنن فلقيته قرب عليا وانا قاعد على مكتبي زي مانا وجه وشوشني في ودني وقال ...صوت عالي في اوضتي يابابا عامل زي الصريخ ومش هيروح الا لما الاوضه المنوره نورها يطفي.. 

فالمره دي شيلت اسلام ورحت بيه الاوضه والحمد لله اني ملقيتوش في سريره زي المره اللي فاتت المهم نيمته و مددت جمبه كده على اساس اطمنه لغاية ما يروح في النوم وفجأه لقيتني في شقة كامل واوضة نومه فعلا منوره وكان في تعويذه بتتردد في ودني بلغه غير العربيه بصوت زي الصريخ وقمت مفزوع.بس الافزع اني لما قمت من غفوتي كان عندي زي تشوش في الرؤيه كنت شايف اسلام اتنين قاعدين بيبصولي ففركت عينيا وببص لقيت اسلام ابني لوحده فخدته في حضني لما لقيته بيقولي ..ها يابابا شفت الاوضه المنوره 

رديت_هو انت بتشوفها كل يوم يا حبيبي 

...اه يابابا وصاحبي متدايق عشان هي منوره،،شفت الخفافيش يا بابا ؟؟دي كمان لازم تمشي.. 

_لا يا حبيبي مفيش خفافيش والاوضه المنوره هطفيها 

قررت اني لازم اشوف حل، قررت ادخل الشقة بتاعت جاري واطفي نور الاوضه المسكونه دي لو موجودة فعلا، 

بلكونتي لازقه في بلكونته هنط وهتصرف في باب بلكونته وادخل 

وبالفعل تاني يوم الساعه 2 بالليل كنت جوه شقته 

كنت واخد معايا كشاف عشان انور بيه لنفسي عشان مولعش اي نور فأول ما دخلت من باب البلكونه لقيت اوضته فعلا منوره رحت هناك وكانت المفاجأه اللي هزتني من جوه فبقي جسمي يتنفض وخلت قلبي هينط من مكانه،

إن الأوضه مكنش فيها لمبه كانت منوره من غير ما يكون فيها اي مصدر للضوء مفيش تفسير طبيعي او فيزيائي للي انا شايفه ده والتفسير المنطقي الوحيد ان ده نوع من انواع السحر

والغريب كمان ان كان في خفاشين كبار متدليين من السقف رجليهم متعلقه في اللمبه المطفيه وجسمهم متدلي لتحت وعينيهم حمره دم شافوني هربوا ومجرد ما طاروا ..لقيت جاري كامل اللي محدش لمحه من 6 شهور وعم على البواب داخلين عليا فكان شكلهم اصغر بكتير من الاول كأنهم شباب،، عينيهم بتلمع بس داخله لجوه ومبرقه ،،ووشهم بياضه فاقع فكانوا مقابليني على باب الاوضه ومفيش حته اجري منها،، 

اتمالكت نفسي وقلتلهم..اناااا ..مراتي سمعت صوت غريب هنا قلت اجي اشوف في ايه ؟؟  وزمانها منتظراني بس ملقيتش اي حاجه ومشفتش اي حاجه غريبه....

وجيت اعدي من جنبهم كده فالاستاذ كامل راح حاطط ايده على صدري موقفني،،

ايده كانت في تقل جبل وحسيت ان عينه بتطعني بالف سكينه لما قال ...كويس انك فاهم ان انت لا شفت حاجه ولا سمعت حاجه،،واوعى تكون راجل خايب وتفكر تبلغ الحكومة او الجيران لان لا هتطول معايا حق ولا باطل،،غير كده هتزعل اوي يا استاذ صابر.. 

فلما رجعت شقتي ساعتها ماكنتش  عارف اعمل ايه او افكر ازاي؟؟ اروح اشتكيه في قسم الشرطه؟؟ هيقولوا عليا مجنون لما اقلهم دا مطلع اشاعه انه سافر وهو مسافرش واكيد مش هيمسكوا عليه حاجه في شقته لو اشتكيته بالسحر والدجل وسكان العماره بيقولو لبعض سلامو عليكم بالعافيه دا لو قالوها ......انا لوحدي.......

ومش هينفع اسيب شقتي ولا هينفع اقول لمراتي حاجه ..ليلتها فضلت طول الليل صاحي وقررت اني اقاوم وبردو معرّفش مراتي حاجه واحاول اسيطر على اسلام اللي اصلا محكاش لوالدته ومكنش هيحكيلي لولا اني عرفت لوحدي والصبح رحت جبت ميه مقري عليها سورة البقرة ورشيت اركان البيت وشغلت قران بصوره شبه مستمرة لغاية ما دخل الليل والساعه 12 في نص الليل الكهربا قطعت عن المنطقة ..

مراتي كانت في سابع نومه والولاد في اوضتهم بردو نايمين بس انا كنت صاحي قلقان او تقدر تقول بين الصحيان والنوم ...بعدها بشويه حسيت ان باب اوضة النوم بيتفتح بالراحه مظهرش حاجه بتدخل من الباب غير نار قد نار شمعتين على ارتفاع مترين الا شويه وبتتهز زي نار الشمعه كانهم عينين بس لوش ضخم لان المسافه بين النارين كانت حوالي ربع متر فاتعدلت في قعدتي راح اتقفل الباب تاني وانطفت الجذوتين ..خفت اتحرك من مكاني وقعدت استغفر واقول دا اكيد حلم ..دا اكيد حلم.. لغاية ما غلبتني غفاوه ممكن دقيقه او اقل معدتش عارف بعدها اللي فات ده كان حلم ولا حقيقه بس اللي مش حلم اني سامع دلوقتي صوت حاجه بتتنفس في الاوضه ... ركزت اوي كان في خيال حاجه  بتتسحب في الضلمه..قيدت نور التليفون ملقتش حاجه.. ايه الليله اللي مش فايته دي.. مراتي قالتلي ما تنام بقا  ..حاولت استسلم للنوم ومش عايز مراتي تصحى تاني او تحس بحاجه لقيت صوت حد جمبي عالارض كأن الصوت طالع من العدم وبيوشوشني وبيقول.. سيب الشقه واهرب احسن لك، وده اخر تحذير..

فوقت ساعتها والكهربا رجعت فرحت ادور في الشقه ملقيتش حاجه بس وانا بدور سمعت صوت صريخ عالي في اوضة الولاد طلعت اجري عليهم وفتحت الباب لقيتهم في سابع نومه بس لقيت الخفاش بيلف في اوضتهم واول مافتحت الباب طلع فطلعت وراه كان اختفى ..قعدت شويه في الصاله منهار مذهول مش فاهم حاجه..لقيت اسلام طالعلي ..يابابا لو نور الاوضه انطفى كل حاجه هترجع كويسه ..

لقيتني غصب عني برد عليه _وانا هطفي النور ده ازاي طيب ،،هطفيها ازاااي،،هطفيها ازاااي،، ..دي منوره من غير لمبه ..

قاللي ...فكر يا بابا وانت هتعرف تطفيه اما الخفاش فسهل تطفشه  وسابني ومشى خطوات وقبل ما يوصل ترقة التوزيع كان اختفى ..تقريبا هو خلاص نسى اسلام وبقا بيتعامل معايا راجل لشبح.. 

 بدأت افهم اللي انا رميت نفسي فيه ..تقريبا في صراع ما بين جاري الساحر اللي عايز يطفشني من الشقه بكل افعاله بعد ما كشفته والكيان اللي كان بييجي في صورة اسلام ابني وعايزني انا اطفش الساحر او اهدم سحره لسبب انا مش عارفه فربنا هداني لفكره ممكن اطفي بيها نور الاوضه بس لازم ادخل الشقه تاني..                           

ففكرت في إن عم على البواب من يوم ما طلع اشاعة ان كامل سافر وهو مبيظهرش الا بعد المغرب وطول النهار مراته هي اللي موجوده فاكيد طول النهار نايمين هو وكامل وطول الليل صاحيين حتى لما طلعولي كان واضح انهم مبيناموش الليل فانا قررت اني هدخل الشقه بالنهار في اليوم التاني الساعة 12 الضهر 

فكنت داخل وواثق انهم نايمين وساعدني الخشبتين اللي كنت كسرتهم بصوت مكتوم في شيش بلكونته في اول مره.. فدخلت واتسحبت بسهوله للاوضه المشهوده وكالعاده طفش الخفاشين بس ف ثواني كنت شادد الستاير السوده اللي كانت فوق الشباكين اللي في الاوضه وفتحت شبابيكهم ووقعت عش الخفافيش اللي عامل زي بتنجانه من الطين متدليه من السقف.....

النسبية وشوية معلومات قديمه عن الخفافيش ..انت لو عندك لمبه منوره في اوضه وانت معتم الاوضه كويس هتحس ان اضائتها قويه  جرب تفتح شباكين في عز الضهر مش هتحس باي اثر لنورها بالنسبه لنور الشمس.. وده اللي انا عملته ..نور الاوضه كان نور سحر مش نور طبيعي ملوش مصدر ومش هيطفى الا بانه يتشتت ويتلغى بنور اقوى منه والدليل ان الخفافيش كانت بتستقر فيه وبانيه فيه عش ومعروف ان الخفافيش مبتبنيش عشها في مكان بيشوف النور.. اي نور.. كهربا او شمس.. ولو شافت الشمس مبتكملش عشها في المكان ده.. مجرد ما عملت كده حسيت ان الشمس بتحرقني من شدتها وسمعت صوت صريخ عالى ودربكه وخبط فهربت انا على شقتي....

وفي الليل جالي اسلام اوضتي ولقيته بيقوللي _انا متشكر يا استاذ صابر ان انت حررتني من حبستي اللي كنت هتحبسها ودا جميل مش هنساهولك،، اما كامل فمعدش هيقدر يأذي حد تاني لأنه قربان التسخير  اللي كان بيحلم يقدمه انقطع ومكملش واللي كان بيبغي رضاه سخط عليه ..ادعيله بقا عشان العذاب اللي هيشوفو ..دا لو فضل عايش وشاف النور

قلتله =وايه كان قربانه..

رد وقاللي.. عش خفاش ولدت فيه انثاه وكان وصل نصه وجني محبوس على تعويذة واللي كان أنا،، 

 وساعتها سابني ومشي

بعدها رحت ادور على اسلام ابني في اوضته ملقيتوش فسألت مامته ..فين اسلام؟؟

لقيتها بتقول_مش عارفه ماله،، من الصبح وانا حاسه انه مش على بعضه ودايما قاعد لوحده وشارد،، هتلاقيه في البلكونه او الليفينج او حتى مستخبي تحت السفرة

_ماتقلقيش عليه كلها يومين وينسى ويرجع طبيعي

=ينسى إيه؟؟

_لا ولا حاجه،،

تمت