جاذب الارواح
#جاذب_الأرواح
#بسنت_علاء
انا مروان ٢٧ سنة خريج حقوق.. من بنها بس روحت القاهرة عشان اشتغل.. صاحبى شافلى مكتب اشتغل فيه لقيت المرتب كويس اضطريت اسافر عشان ما ابقاش حمل على أهلى اكتر من كدة.... ظروفى على قدى فضلت ادور على شقة اسكن فيها بس كل الإيجارات كانت غالية.. الدنيا ليلت والوقت أتأخر وانا فى الشارع ومش لاقى لسة شقة اقعد فيها حتى الفنادق غالية فضلت ماشى ادور على اى فندق ابات فيه لحد الصبح لحد ما لقيت فندق شكلة قديم اوى دخلت سألت على أوضة فاضية وسعرها كام الراجل الى فى الاستقبال وشة كان شاحب تحسة ميت بس قابلنى بإبتسامة ساذجة وكأنة بيبتسم بالعافية المهم لقيت الأوضة عندهم سعرها رخيص ومناسب برغم ان الفندق شكلة غريب من جوه حتى الناس الى فيه شكلهم غريب طلبت منة يفرجنى على الأوضة الممر الى فى الأوض شكلة مخيف ومش مريح ابدا حسيت ان المكان مهجور وان مفيش حد ساكن الأوض دى سألت الراجل
_هو مفيش حد قاعد فى الأوض دى؟!
رد عليا بنفس الإبتسامة الساذجة بتاعتة
= لا فيها ناس بس بينامو بدرى وياريت صوتك يبقى واطى وانت هنا عشان هما مش بيحبو الإزعاج
مش عارف لية اترعبت من كلامة بس ماحطتش فى دماغى كنت همشى من المكان بس قولت هبات فى الشارع يعنى رجعت فى كلامى تانى وقولت ماجتش على ليلة لحد ما الاقى شقة
الأوضة كانت صغيرة جدا ويدوب فيها سرير ودولاب صغير ومكتب صغير كنت تعبان جدا من الطريق واللف طول اليوم نمت بهدومى وماحستش بنفسى غير لما قلقت الفجر على صوت حاجة اتهبدت جامد تقريبا فى الأوضة الى جمبى فتحت الباب روحت قدام الأوضة الى جمبى حاولت اسمع اى حاجة بس ماكنش فى اى صوت خالص ماخدتش بالى من الراجل بتاع الاستقبال الى فجأة لقيتة ورايا وبيقولى
_ انت بتعمل اى برا أوضتك؟
اتخضيت جدا لانى ماسمعتش صوت اى حد جاى استغربت هو جه امتى قولتلة
=سمعت صوت حاجة اتهبدت على الأرض فى الأوضة دى
_ ازاى والأوضة دى مقفولة بقالها سنة وماحدش قاعد فيها
= بس انا متأكد انى سمعت حاجة وقعت جامد على الأرض وقومت من النوم مخضوض على صوتها
_ اكيد كنت بتحلم ارجع أوضتك تانى وحاول تنام و زى ما قولتلك الناس هنا مش بتحب الإزعاج
حاولت اصدق انى يمكن اكون كنت بحلم فعلا وكان بيتهيألي ورجعت أوضتى ونمت تانى
صحيت الصبح لبست هدومى عشان انزل افطر وادور على شقة عشان ما اضطرش ابات تانى فى الفندق دة
وانا خارج من الأوضة قابلت راجل تقريبا فى الأربعينات كدة سلم عليا وتعرفنا على بعض عرفت انة ساكن فى الأوضة الى قصادى خرجنا فطرنا سوا عرفت انة أرمل وماعندوش اولاد وقاعد فى الفندق بقالو أسبوع وانة عايش فى المنيا بس جه مصر عشان يخلص شغل هنا ومسافر تانى الاسبوع الجاى بعد ما خلصنا فطار استأذنتة ومشيت فضلت ادور على شقة لحد مالقيت شقة أوضة وصالة صغيرة وسعرها مناسب اتفقت مع السمسار وقال هيسلمهالى آخر الاسبوع يكون صاحبها نقل حاجتة كلها الى فيها قولت مش مشكلة ماجتش على ٣ أيام هباتهم فى الفندق وأمرى لله
رجعت تانى الفندق وطلعت على أوضتى بس لقيت أوضة الراجل الى قابلتة الصبح مفتوحة وفاضية خالص وكأن مافيش حد كان قاعد فيها
نزلت تحت اسال الراجل الى فى الاستقبال
_هو الراجل الى قاعد فى الأوضة الى قصادى فين؟
= مشى انهاردة
_مشى ازاى وامتى انا لسة كنت معاة الصبح وقالى انة هيمشى آخر الاسبوع !
= وانا قولتلك انة مشى مش هسأل كل واحد انت عاوز تمشى لية وأحسنلك ماتبقاش فضولى اوى كدة
_ مش فاهم تقصد اى!
ابتسملى نفس الإبتسامة الساذجة وقالى = مش مهم
مسكت اعصابى وطلعت أوضتى تانى وانا بحاول افهم اى الى بيحصل ولية كل ما ادخل الفندق بحس انة معزول عن العالم وكأنة مش موجود نفضت الأفكار دى من دماغى وطلعت كتاب اقرأ فيه عشان وقتى يعدى لحد مانمت ..
صحيت تانى الفجر على نفس الصوت من الأوضة الى جمبى بس سمعت صوت واحدة بتصوت وكأنها بتتعذب ايوة انا متأكد انى سمعت كدة ومتأكد انى صاحى ومش بحلم بس المرة دى انا خوفت اطلع من الأوضة والصوت سكت مابقتش سامعه حاولت اقنع نفسى ان اعصابى تعبانة وانى بيتهيألي كل دة حاولت انام تانى وبعد محاولات كتير نمت وصحيت الصبح خرجت من أوضتى بس كان عندى فضول ادخل الأوضة الى قصادى اصلى مش مقتنع انة فجأة كدة قرر يمشى !
دخلت الأوضة فضلت ادور على اى حاجة يمكن يكون هو نسيها او افهم اى الى بيحصل .. لقيت تحت السرير نوتة صغيرة فتحتها لقيت اسم الراجل عليها وتقريبا دى مفكرة بتاعتة خدتها و رجعت أوضتى تانى وفتحت المفكرة وقعدت اقرأ وانا مش مستوعب الى بقرأة دة .. وكمان الى مكتوب كان بتاريخ السنة الى فاتت!! ازاى وهو قايلى انة لسة جاى هنا من اسبوع بس؟! ولية انا ماشوفتش مدير الفندق ومراتة الى هو كاتب عنهم هنا
فجأة سمعت صوت جامد جاى من نفس الأوضة الى كنت بسمع منها الصوت كل يوم بس المرة دى الصوت اقوى وكان صوت صريخ جامد لناس بتتعذب
روحت ناحية الأوضة وحاولت افتح الباب بكل قوتى لحد ما اتفتح الأوضة ريحتها وحشة وكأن حد ميت فيها بس فاضية مافيهاش حد رجعت سمعت الصوت تانى بس كان جاى من الحيطة الى ورا الدولاب قربت عشان اسمع كويس واعرف ازاى الصوت جاى من هنا لان الأوضة دى مافيش بعدها قوض تانية ..
زقيت الدولاب لقيت وراه باب تانى حاولت افتح الباب دة اتفتح بالعافية لما دخلت قابلتنى ريحة بشعة جدا فجأة المكان اتبدل الدنيا ضلمت والفندق اتغير وكأنة مقفول بقالة سنين ومهجور والحيطان محروقة وكل حاجة كأن حصلت حريقة هنا اترعبت فتحت كشاف الموبايل لانى ماكنتش شايف قدامى وياريتنى مافتحتة لانى لقيت هياكل عظمية لشخصين مربوطين بسلاسل وعليهم حشرات و دود كتير الدنيا لفت بيا ماحستش بنفسى غير وانا فى المستشفى .
_حمدالله على سلامتك ياراجل بقالك يومين نايم
= يومين! انا فين ؟ اى الى حصل؟
!
_ اهدى بس انت فى المستشفى وانا الظابط ادهم لقيناك مغمى عليك فى فندق مهجور بعد ما جالنا بلاغ من الناس بحركة غريبة واصوات فى الفندق وانهم شافوك وانت داخل هناك .. احكيلنا بق اى الى وداك الفندق المهجور دة؟
حكيت للظابط كل حاجة حصلتلى هناك وانى لما شوفت الفندق ماكنش مهجور لما لقيتة مش مصدقنى وريتة المفكرة الى لقيتها ولما عرف اسم الراجل الى مكتوب على المفكرة قالى ان دة الراجل الى لقو الهيكل العظمى بتاعة فى الأوضة والهيكل العظمى التانى كان بتاع مرات مدير الفندق وان كان جالهم بلاغ ان الراجل دة متغيب وماحدش كان عارف هو اختفى فين وان مدير الفندق نفسة كان عامل بلاغ بردو بإختفاء زوجتة المفاجئ والكلام دة كان من سنة وبعدها بأيام الفندق دة اتحرق بالمدير والناس الى كانت فية والجيران قالت انهم بيسمعو اصوات بليل لناس بتتعذب جاية من الفندق ..
وبعد ما لقيت المفكرة دى الحكاية بدأت توضح اكتر
الحكاية ان المدير دة كانت متجوز واحدة أصغر منة ب١٠ سنين وكانت جميلة جدا اتجوزتة عشان هو مبسوط ويعرف يصرف عليها بس المدير كان سادى ومريض كان بيضربها وبيستمتع بكدة .. لحد ما الراجل صاحب المفكرة دة جه الفندق شافته وحصل اعجاب وانجذاب بينهم وقالتلة على كل حاجة جوزها بيعملها فيها وانها مش مبسوطة معاه ومع الايام كانو بيتقابلو فى السر لما مدير الفندق يسافر لحد هنا والمفكرة خلصت بس اقدر استنتج الى حصل بعد كدة .. ان المدير عرف بخيانتها وانتقم منهم بطريقتة ... أوضة المدير كان فيها حمام خاص ..... حبسهم جواه وربطهم بالسلاسل دى وقفل الحمام دة بالدولاب وسابهم جواه .. وراح عمل بلاغ ان مراتة مفقودة عشان طبعا ماحدش يشك فيه ..
والناس بتقول انة هو الى حرق الفندق وهو جواه.
_بس انا مش قادر افهم انت ازاى كنت بتبات هناك وازاى لقيت المفكرة والحمام المخفي دة؟!
= انا ذات نفسى مش فاهم بس انا مش بكدب عليك الفندق كان سليم وقابلت الراجل وفطرت معاه و اتكلمت معاة بجد
_ غريبة فعلا بس المهم انك كويس حمدالله على سلامتك
بعد ما الظابط خلص كلامه سابنى ومشى ... سابنى مع حيرتى .. انا لية حصلى كدة وبعد تفكير كتير قررت انى هرجع الفندق تانى يمكن احاول افهم انا كان بيحصلى كدة لية .
انتو بردو لو مكانى كنتو هتعملو كدة صح!؟
.............................................................. . ....................................................................... ....... وقررت انى ارجع اشوف كان بيحصلى لية كدة وبالفعل رجعت بعد ما خرجت من المستشفى واتجهت للفندق قبل ما اروح استلم الشقة الى هسكن فيها
الفندق كان فعلا مهجور ومحروق دخلت الأوضة الى كنت فيها السرير كان موجود والدولاب وكل حاجة بس محروقين فضلت أفتش فى الأوض يمكن اى حاجة تحصل او ألاقى اى حاجة مفيش
وانا خارج من الفندق سمعت صوت ورايا بصيت لقيت الراجل صاحب المفكرة ومرات المدير واقفين وماسكين ايد بعض وبيضحكولى كأنهم بيشكرونى انى حررت روحهم الى كانت محبوسة هنا وانا المرة دى ماخوفتش لقيت نفسى بضحكلهم وبعد كدة هما اختفو ومشيت من الفندق
روحت الشقة الى هسكن فيها ومن هنا بدأت حكاية تانية ... تقريبا كدة انا جاذب للأرواح والأشباح وليلة كبيرة اوى سعادتك وشكلى هلم حاجتى و اروح اقعد جمب امى احسن
المهم
روحت الشقة الجديدة هى كانت دور أرضى والصالة صغيرة فيها أنتريه قديم شوية والأوضة فيها سرير و دولاب رتبت هدومى فى الدولاب ونضفت الشقة من التراب ودخلت المطبخ كنت جايب أكل جاهز للتحمير وخلاص ومشيت اليوم على كدة ودخلت نمت
صحيت الصبح دخلت اخد دوش عشان ألبس وأنزل لانة أول يوم ليا فى المكتب ... وانا خارج من الحمام وبنشف شعرى بالفوطة حسيت بحد معدى من قدامى وداخل المطبخ .. دخلت المطبخ مالقتش حد قولت يمكن بيتهيألي بسبب حكاية الفندق .. غيرت هدومى ونزلت الشغل .. رجعت ع العصر للبيت غيرت هدومى ودخلت المطبخ أعملى اكل .. وانا واقف شوفت فى إزاز البوتاجاز خيال حد واقف ورايا .. انا اتسمرت مكانى خوفت ابص ورايا غمضت عينى وقرأت آيه الكرسى والخيال اختفى ..
خدت الأكل وطلعت الصالة وشغلت الإذاعة على القرآن
بعد ما خلصت أكلت لبست ونزلت لصاحبى قعدنا على القهوة شوية ..
رجعت بليل يدوب على النوم .
صحيت وانا عرقان مع اننا كنا فى الشتا مش عارف ازاى كنت عرقان ولقيت حد واقف على باب الأوضة.. كنت مرعوب جدا مش عارف اقوم افتح النور ولا عارف اطلع اى صوت حسيت انى اتشليت..
لحد ما الشخص دة اتحرك ناحية المطبخ ساعتها شجعت نفسى وقومت فتحت النور وبصيت برة مالقتش حد فتحت انوار الشقة كلها وشغلت الراديو تانى وسيبتة شغال على القرآن لحد الصبح ..
صحيت وقولت انا لازم اسأل السمسار الى جابلى الشقة دى على الموضوع ..
عديت علية بعد ما جيت من الشغل وحكيتلة الى حصل
_ انت متأكد من الى بتقولة دة يا استاذ؟
=ايوة ياعم متأكد انا هكدب عليك لية . هو اى الى حصل فى الشقة دى!
_ ماحصلش فيها حاجة يا استاذ صدقنى دى شقة الست نادية كانت عايشة فيها هى واخوها قبل ما أخوها يسافر فجأة وهى سابتها ومشيت وماحدش جه فيها غيرك بعد الست نادية.
= امال اى الى انا بشوفة دة ؟ ومين الى انا بشوفة دة!؟
_ممكن تكون انت الى ملبوس يا استاذ لو عاوزنى اجيبلك شيخ يرقيك انا اعرف شيخ كويس
= شيخ اى بس.. خلاص ياعم متشكرين انا هروح انا السلام عليكم
_وعليكم السلام يا استاذ
رجعت البيت تانى وشغلت القرأن ودخلت نمت لانى كنت مرهق من الشغل .. بس صحيت بعد ساعتين على صوت حد بيتكلم فى الصالة .لا دول اتنين بيتخانقو تقريبا والنور كان قاطع كمان فا كنت شايف من خلال النور الى جاى من الشباك ..
قومت خرجت الصالة اشوف فى اى لقيت واحد و واحدة ومشهد قدامى بيحصل وكأنى مش موجود فى الشقة اصلا وكانو بيتخانقو مع بعض
_على فكرة انا بطلب حقى من ورث ماما انت مش هتبقشش عليا من فلوسك مثلا
=وانا قولتلك لأ يعنى لأ انتى لما بتطلبى منى حاجة بجيبهالك انا ماما ادتنى الفلوس أعينها بإسمى انا عشان احافظ عليها ولما بتحتاجى حاجة بديهالك
_وانا بقولك يا حاتم عاوزة حقى عاوزة افتح مشروع يا أخى عاوزة فلوسى انا مش صغيرة عشان اخد منك مصروف
= قولتلك لأ يانادية ومش عاوز كلام كتير فلوسك دى تبقى تاخديها لما اموت مش كفاية مقعدك معايا لحد دلوقتى فى الشقة ورضيت انك تتطلقى بعد ما اتجوزتى وخلصنا منك
فجأة المشهد اختفى والنور جة وانا مش مصدق كل الى حصل دة بس ثوانى هو قال نادية صح! نادية دى صاحبة الشقة . وحاتم دة أخوها بس السمسمار قال ان أخوها سافر فجأة !!
خدت بعضى على طول ونزلت تانى روحت للسمسار
_انا عاوز اقابل صاحبة الشقة دى
=لية يا استاذ لو فى حاجة ممكن تقولى وانا اوصلها للست نادية
_ هو حاتم أخوها مسافر فين ؟!
= الست نادية قالت انة مسافر الإمارات . خير يا استاذ فى اى؟
_لا مفيش السلام عليكم
ماحبتش ارجع البيت على طول قعدت شوية على القهوة شربت حجرين معسل قبل ما ارجع الشقة تانى ..
بعد ما رجعت الشقة غيرت هدومى والساعة وقعت على الأرض وانا بوطى اجيبها لمحت البوم صور تحت السرير جيبتة ولقيت صور قديمة شوية ومنها صور لنادية وحاتم أخوها الى شوفتهم بيتخانقو . بس ثوانى حاتم دة نفس الشخص الى كان واقف على باب الأوضة والى كان واقف ورايا وانا فى المطبخ بردو . بس ازاى وهو سافر !
دخلت المطبخ اعمل شاى لقيت حاتم واقف فى المطبخ وغرقان دم انا وقفت اتسمرت مكانى مش عارف اعمل اى أجرى ولا أصرخ
لقيتة بيشاورلى على أرضية المطبخ وانا مش فاهم هو عاوز اى واختفى تانى
قربت مكان ما كان بيشاور وشيلت السجادة مالقتش اى حاجة بس حسيت البلاط كأنة كان متشال قبل كدة
جيبت أجنة وشاكوش وكسرت البلاط لقيت تحتية زى ما يكون مشمع كدة كسرت اكتر جيت اطلع المشمع لقيت جثة!!
دة حاتم!!
اتنفضت من مكانى لقيت نفسى بجرى على السلم بهرب من الشقة على السمسار ومن رعبتى ونفسى المقطوع من الجرى مش عارف اقولة اى ولا انطق الكلام عاى بعضة
_جثة.... مطبخ...حاتم
=اهدى بس يا استاذ انت بتقول اى؟
_تعال معايا وبلغ البوليس فى جثة فى الشقة
روحنا الشقة والبوليس جه وطلعو الجثة وكانت فعلا لحاتم
................
_يعنى مش هاخد فلوسى الا لما تموت يا حاتم
= اة يا نادية وأسكتى بق وبطلى كلام كتير فى الموضوع دة
واتجه حاتم للمطبخ ولم يشعر بنادية التى دخلت وراءة وأمسكت سكينا وغرزتة فى ظهر حاتم اكثر من مرة حتى وقع على الأرض ومات
_انت الى خلتنى اعمل كدة يا حاتم ودايما بتعايرنى على طلاقى ومفكر نفسك حاجة وانت ولا حاجة
نزلت نادية على ركبتها وظلت تبكى ثم فكرت كيف تخفى جثة حاتم
ففكرت ان تدفنة فى المطبخ هنا ثم تقول انة قد سافر ولكنها لم تطيق بعد ذلك أن تعيش فى الشقة...... بعد أن أخذت كل الأموال التى كان يمنعها عنها أخيها اشترت شقة أخرى وتركت هذه الشقة ورحلت ولكنها ذهبت للسمسار لأجل أن يؤجر الشقة حتى تستفيد من إيجارها
_امال الأستاذ حاتم فين بقالى أسبوع ماشوفتهوش
= حاتم سافر الإمارات جالة شغل هناك
.................
فى الشقة بعد أن استخرجو الجثة واستجوب رجال الشرطة مروان والسمسار دخل الظابط ادهم وعندما رأى مروان تذكره على الفور
_اى ياعم مروان مش ورايا غيرك ولا ايه!
= والله يا باشا انا زهقت مش عارف اى الى بيحصل شكلى كدة جاذب للأرواح المعذبة
_ انا بفكر نجندك معانا والله يا مروان ياراجل دة انت لسة جاى مصر وكشفتلنا جريمتين و٣جثث
= قدرى يا باشا . بس انا خلاص قررت هروح اقعد جمب امى احسن.. هى نادية يا باشا قتلتة عشان الورث صح؟
_ اة لما قبضنا عليها وضغطنا عليها فى التحقيق اعترفت بكدة .. بس انت عرفت منين؟
= مانا لو قولتلك يا باشا مش هتصدقنى
_طب حاول تبعد عن العفاريت بق عشان لو شوفتك تانى هحبسك
= حاضر يا باشا من عنيا
تانى يوم على طول خدت بعضى ورجعت بلدى قعدت جمب امى حكيتلها على الى حصل
_ اى الى رجع الموضوع دة بس تانى
=انتى تعرفى حاجة يا امى انا ما اعرفهاش؟
_الحقيقة يا ابنى الموضوع دة زى ما تقول كدة وراثة بسبب غلطة ابو جدك الله يرحمة كان بيشتغل فى الأعمال والسحر والعياذ بالله قبل مايتوب والى بيحصل دة كان جزاء انة خالف العهد الى كان بينة وبين الجن والشياطين بتوعة دول وخلوة يشوف الميتين طول عمره وانة يصيبة ويصيب كل الى من دمة وحاول يخلص من الموضوع دة ما اعرفش
........
انا انصدمت طبعا من الكلام الى سمعتة من امى بس رجعت مصر تانى قولت بدام كدة كدة هفضل ملعون هرجع اشوف شغلى احسن والى يحصل يحصل
رجعت قعدت عند صاحبى فترة مؤقتة لحد ما اشوف شقة ما تكونش مسكونة بالعفاريت
وانا خارج من الشقة الصبح ورايح الشغل إذ فجأة طالع من الشقة الى قدام شقة صاحبى بنت جميلة جدااا آيه فى الجمال فضلت مبحلق ليها ابتسمتلى وكانت احلى ابتسامة اشوفها وقالتلى
_صباح الخير
= هو انتى بنى أدمة زينا!
_ نعم؟
= قصدى يعنى انتى انسانة عادى ولا هتطلعى شبح فى الاخر ومقتولة عوزانى ادور على جثتك ومين الى قتلك بق وكدة
_انت مجنون شكلك كدة شارب حاجة على الصبح وانا غلطانة انى قولت صباح الخير
= هولى شيت انتى طلعتى بجد! .. طب استنى بس يا آنسة انا هفهمك والله ..خدى هنا اقولك طيب .
..............تمت.........
التعليقات على الموضوع