قصة اضحية العراف

أنا مش راوي , أنا مش كاتب , أنا مُجرد ناقل للحقيقة , ناقل لأحداث وقعت بالفعل , أنا مش جاي أضحك عليك بكلمتين يخوفوك , لكن فقط جاي أقولك حاجة حصلت , وبتحصل , وهتحصل !!

كان ليا صديق عزيز عليا جدًا الحقيقة , وكان اسمه *محمد* كان من أطهر الأرواح اللي عرفتها , محمد كان من أكبر فُعال الخير اللي قابلتهم في حياتي , معتقدش إنه صادف حد محتاج في يوم وتجاهله , ومعتقدش إنه لو كان لسه موجود , كان هيتجاهل حد !

في مرة من المرات اللي كان محمد قاعد جنبي , وبيقلب في الفيسبوك بتاعه , صادف بوست من على الجروبات اللي كل واحد بيعرض مشكلته فيها , وباقي الأعضاء , بيحاولوا يعرضوا حلول . 

المشكلة المرة دي كانت مختلفة , هعرض عليكم البوست , وإحكموا بنفسكم .

"السلام عيلكم , أنا مش حابب أطول عليكم ولا إني أزعجكم أو حتى أخوفكم بكلامي , لكن أنا مضطر أحكي لإن الموضوع زاد عن حده , إحنا مش عارفين نعيش , مفيش داعي علشان أقول اسمي , لكن هكتفي بعرض المشكلة , أنا واحد من سُكان قرية من قُرى مصر المغمورة *وقال اسم القرية* قريتنا بعيدة عن الخدمات وبعيده عن كل حاجة تقريبًا لكننا كُنا حامدين ربنا , ومُكتفيين ذاتيًا لحد كبير , لحد ما ظهر شخص إسمه "العَراف" الشخص ده دجال لكنه من مُستوى تاني , الشخص ده اللي بيروحله , مبيرجعش إلا بشخصية تانية , وأحيانًا مبيرجعش , الأطفال بقت تختفي , النساء مبتحملش , الرجاله نفسها مبقتش زي الأول , زي ما تقول العراف ده سحابة سودة , وغطت على قريتنا ! 

المطلوب ؟ المطلوب إن كذا شخص يُنشر البوست ده , وأتمنى إن كذا شخص يزور قريتنا ويتأكد بنفسه , ويحاول ينقل كلام لفئات أكبر بإمكانيات أكبر للشخص ده, وده للتأكيد , شُكرًا ليكم , مستنيكم , واللي عايزني أوصفله الطريق , يقدر يتواصل معايا "

لما محمد قرأ الكلام ده , بدأت أفهم اللي بيدور في دماغه , وبدأ هو يعرض عليا إني آجي معاه القرية دي , كإننا دجالين أو شيوخ مثلًا هنحل مشكلتهم في دقايق , أو إن زيارتنا ليهم هتفرق في شىء , لكن هل محاولات إقناعي لمحمد , وقعت بنتيجة ؟ هل حتى فكر ؟ لا , لو كان سمعني , كان زمانه موجود معانا !

محمد حضر شنطته اللي هيسافر بيها , وكلم الشخص صاحب البوست , وطلب منه إنه يوصفله الطريق بشكل أدق , روحت علشان أودعه , وكان في عنيا نظرات خوف ملحوظة , لكنه ملتفتش ليها وكمل في طريقة 

السفر على كلام صاحب البوست بياخد تقريبًا 6 ساعات أو أكتر أو أقل وقت بسيط .

محمد كان المفروض يكلمني لما يروح ويقولي إيه الأجواء هناك , وكان المفروض يرجع تاني يوم الصبح بدري .

جيه وقت المغرب , وحسيت بإرهاق شديد , قولت هخطف ساعتين أنامهم , وأبقى أصحى أكلم محمد 

بعد وقت مقدرش أحدد مدته بالظبط , صحيت على صوت نغمة موبايلي , كان محمد بيتصل 

رديت لكن هو مكانش موجود علشان يتكلم , صوت حركة كتير , ناس بتجري , أصوات كتير مُتداخله في بعض , قدرت أميز وسط كل الأصوات دي , صوت صرخات محمد المُتتالية , وقدرت أميز كلام كان بيقوله "أرجوكم , أنا كنت جاي أساعدكم , أنا مكانش في نيتي حاجة , أرجوكم مش هاجي هنا تاني , مش هفضح سركم"

وبرضو سمعت كلمات تانية لكن مش قادر أفسرها بشكل كويس , أنا ممكن أقولهالكم , يمكن حد يكون عنده خبرة أكتر مني ...

                             الأضحية 

                             ألأضحية

      سيدنا الأعظم , جئنا لك بتلك الدماء الطاهرة النقية

      كما وعدناك , كما كُتِبَ العهد الوثيق بيننا 

    فلتقبل بتلك الدماء , بدلًا من دمائنا , فلتكُف عنا          

    شرك 

                     ألأضحية الثالثة في الطريق

إتقفل الخط , وأنا بحاول أفهم أو أستوعب اللي بيحصل , قعدت فترة أدور عالبوست في كل الجروبات علشان أقدر أوصل لمحمد , لكن مفيش أي فايدة 

عدا يوم , ويومين , واسبوع , وأنا في حالة ذهول تام , قررت أخرج عن دايرة الصمت دي , وأروح لشيخ وأقوله اللي أتقال في المُكالمة , يمكن هو يفهم .

تاني يوم روحت لشيخ معروف عندنا , وعرضت عليه كل اللي أتقال في المكالمة .

نظرات الشيخ مكانتش مريحاني , بدأ الشيخ يتكلم 

" بص يابني , أنا مش دجال , لكني أقدر أفسرلك كل اللي أتقال في المكالمة , أهل القرية من كلامك عاشوا الفترة الأخيرة في رعب بسبب شخص إسمه *العراف* والأطفال كانت بتختفي , الستات مبتحملش , وده على كلام واحد من أهل القرية نفسهم , واضح إن أهل القرية , وثقوا عهد مع العراف , بإنهم يجيبولوا أضحية , والأضحية دي زي القربان , شىء بتقدمه مُقابل شىء , والصفقة هنا واضحة , أضحية مقابل إن أهل القرية يفضلوا بخير, والأذي ميطولهمش , وواضح إن دي مش أول أضحية تتقدم , الناس دي عملوا صفقة مع الشيطان , لكن فكر في الموضوع , روح , قدام روحك وروح عيالك وأهلك , الموضوع عادل كفاية بالنسبالهم 

    إستودع محمد عن ربك يبني , وأدعيله بالرحمة " 

تمت 

احمد هاني