كبرياء الصمت (الحلقه العاشره)
الفصل العاشر ( كبرياء الصمت )
روان : أحمد انت هنا
احمد بحدة : اه احمد يا انسة روان ايه مالك اتخضيتي كده ليه و كأنك بتعملي جريمة
روان بلخبطة : جريمة جريمة ايه .. و بعدين انا متخضتش انا داخلة انام
احمد : و الولد اللي كنتي معاه روح ولا استنيتي معاه شوية
روان بخوف : ولد مين ؟
احمد : متستهبليش
روان :قصدك عمرو ده ده زميلي في الجامعة و كان موجود في نفس الكافيه اللي انا فيه و سألني علي شوية حاجات
احمد : كان قاعد معاكي في نفس التربيزة بقا
روان فهمت انه شافها و هي مع عمرو تحت الكافيه : لا انا كنت مع صاحبتي و هو شافني و انا نازلة
احمد : الحوار ده ميتكررش تاني و لو طلع كلامك ده كدب متزعليش من اللي هيحصلك
روان : يا احمد انا مش صغيرة علي فكرة و مش بعمل حاجة غلط
احمد بعصبية :هعدي الموضوع ده المرة الجاية مش هيعدي انتي فاهمة
روان بخوف : حاضر يا احمد
__________________________________
في الصباح
جلال بصوت عالى نسبيا : سيلا ... يا سيلا يالا اصحى يا بنتى
ايسل بكسل: ...ممممم شويه شويه يا جدو
جدها : يووه يالا يا بنتى علشان تلحقى تفطرى و تنزلى الجامعة و بعدين امك اتصلت و قالت تطلعيلها
ايسل : اهه صحيت يا جدو خلاص ... صباحك زى الفل
جدها : صباح الخير يا حبيبتي
ايسل : مالك يا جدو
جلال : مفيش بس ملاحظ انك مخبية عني حاجة
ايسل : مفيش يا جدو بس
جلال قاطعها : لما تكوني عايزة تتكلمي انا موجود صحيح سيف عامل ايه
ايسل بضيق : مبيكلمنيش معرفش ليه و نفسي يرد عليا آخر مرة قالي انا مخنوق و سيبيني لوحدي
جلال : يمكن حاجة مضايقاه و هيكلمك
ايسل : ممكن برضو يلا انا هقوم اجهز الفطار نفطر و اطلع لماما اشوفها
__________________________________
عاصم: صباح الخير يا بابا
مختار بسخرية : لا تصدق فعلا صباح الخير ... ده الساعه 2 العصر يا استاذ عاصم ...
عاصم ببرود: اه بجد طب كويس
مختار : ممكن اعرف حضرتك رجعت البيت امبارح الساعه كام ..؟؟
عاصم: ع الساعة 2 و نص كدا
مختار: لا بجد محترم .. تصدق انا دلوقتى مطمن لو مت او لو جرالى حاجه هلاقى راجل يمسك البيت و يلم شمل اخواته ... انت بجد بنى ادم مستهتر ...و مش بتتحمل مسئوليه
عاصم :فى ايه الجامعة و بروح و مش بتأخر... ايه المشكله انى اسهر مع اصحابى شويه .. و تانى يوم اجازه ... هو المفروض ادفن بين البيت و الشغل
مختار : لا المفروض تبقى راجل محترم و تتجوز و تستقر بدل ما انت كل يوم و التانى مع كل بنت شوية
عاصم : طيب ماشي
مختار : انا رايح المحكمة عندي قضية مهمة
خرج مختار و عاصم قاعد مكانه دخلت عنده والدته اللي كانت سامعة الحوار كلو
عبير : عاصم حبيبي
عاصم : نعم ي حبيبتي
عبير : يا عاصم ابوك عنده حق علي فكرة انت ابنى الكبير ... فاهم يعنى ايه انت ضهرى و سندى ... يا بنى حرام عليك مش عايزة اموت بحسرتى عليك ... اتقى الله عندك اخت بنت عارفة أنها اتجوزت بس برضو يابني ... و بكره هيبقى عندك زوجه و من بعدها بنت ... اتقى الله فى بنات الناس ... كفاياك لعب بيهم
عاصم بانفعال: دول كلهم زى بعض ... كلهم بنات رخيصه .... و انا مش بغصب حاجه على حد .. لكن ....
( كان هيقول كلهم زي بعض لكن ايسل لا )
عبير : لكن ايه
عاصم : ها لا مفيش
عبير : بس بتغضب ربك ... فكر ان ليك رب شايفك .... ارجع صلى يا عاصم ...و ابعد عن البيئة القذره اللى انت زرعت نفسك فيها دي
عاصم : حاضر يا ماما
___________________________________
بوسي : طب ما يمكن زميلها فعلا
احمد : حتي لو زميلها تقف معاه ليه
بوسي : هي مش وضحتلك وانت عديت الحوار
احمد : أيوة لكن مصدقتهاش لخبطتها و توترها في الكلام شككني فيها
بوسي : لا يا حبيبي هي خافت منك بس لكن روان مبتعملش حاجة غلط
احمد : طب عايزك لما تجيلك توقعيها بالكلام و كدا لحد ما تحكيلك مين عمرو ده
بوسي بنرفزة: ازاي يعني انا مش كدا علي فكرة
احمد : هو ايه اللي مش كدا هو انا مش من حقي اخاف علي اختي و كمان هي بتثق فيكي يعني هتحكيلك
بوسي : وانا مش هخون الثقة دي حتي لو حكتلي هقوم اجهزلك الغدا
احمد : ماليش نفس
بوسي : يوووه بقا يا احمد استني طيب انت رايح فين
احمد بغضب : بجد انا تعبت دي مبقتش عيشة ولله بنتخانق علي كل حاجة حتي لو مفيش حاجة نتخانق عليها بنتخانق
خرج احمد و سابها لوحدها بتعيط كانت بتأنب نفسها مش عارفة هي صح ولا غلط ولا هما الاتنين غلط
__________________________________
في مكتب أحد كبار المحاميين أصحاب الشأن المتميزة في هذه المهنة عبارة عن شقتين مفتوحين مع بعض يضم به مكاتب للسادة المحاميين بمختلف درجاتهم بالإضافة إلي غرفة لحفظ القضايا و الملفات الهامة و مكاتب للوكلاء و غرف الانتظار
ايسل وقفت أمام مكتب سيف مترددة لأنها اول مرة تذهب لمكان عمله
ايسل : لو سمحتي
السكرتيرة : أيوة يا فندم حضرتك عندك قضية
ايسل : لا انا عايزة استاذ سيف من فضلك هو ده مكتبه
السكرتيرة : اه ده مكتبه ثواني اديله خبر هو حضرتك اسمك ايه
ايسل : لا بصي هو ينفع أدخله انا زميلته في الجامعة قبل ما هو يتخرج و متخانقين و بصراحة عاملاهاله مفاجأة
السكرتيرة : صدقيني مش هقدر لازم اديله خبر
ايسل :ولله علي ضمانتي متقلقيش أوعدك انك مش هتتضري نهائي و ممكن اقول انك في التواليت وانا دخلت علي طول
السكرتيرة : حضرتك ...
ايسل قاطعتها: بالله عليكي سيف ده اخويا و احنا متخانقين و دي الطريقة الوحيدة اللي هيتفاجأ بيها صدقيني مفيش اي ضرر ليكي
السكرتيرة: تمام انا هروح التواليت عشان الحوار يكون بجد
ايسل : ثانك يو بجد يا
السكرتيرة: شيماء
ايسل بسعادة: ثانك يو يا أحلي شيمو
دخلت ايسل الى مكتبه و هي تسير علي أطراف قدميها حتي لا يشعر بها لتجد سيف يجلس شادرا و كأنه يحمل هم فوق رأسه
ايسل :يا سوفا مالك شايل طاجن ستك كدا ليه
سيف بصدمة : ايسل انتي جيتي ازاي
ايسل : مكتبك طلع حلو اوووي قوم كدا يا واد اما اجربه
سيف : يخربيتك و بعدين هي شيماء دخلتك ازاي
ايسل : هي في التواليت وانا دخلت من وراها
سيف بيضحك : اتهرس في 300 فيلم مصري الحوار ده غيري يا ماما
ايسل : وايه الجديد يعني
سيف :ضحكتي ع البت
ايسل : انت عرفت ازاي
سيف : يا بنتي انا حافظك و بعرفك لما بتكدبي ثانيا بقا ب غباءك يعني عرفتي منين أنها في التواليت طب حتي اكدبي كدبة تتصدق
ايسل : تصدق اه
سيف : عايزة ايه بقا
ايسل : مبتردش عليا ليه
سيف : عايز ابقي لوحدي الفترة دي ممكن
ايسل مسكت ايديه و شدته يقوم
نظر لها بحزن كأنه محتاج يعرفها كل شيء كأنه محتاج يخرج كل اللي في قلبه لكن لسانه ميقدرش يتكلم مقدرش يقول السر اللي محدش عارفه غير احمد
سيف : انا شويه و هبقى تمام ... ما تقلقيش عليا
ايسل : أنسي مش هسيبك تكون لوحدك ... انا مش هقدر اصدقك ...لا صوتك ولا شكلك ولا احساسي بيك بيقول كده
سيف : معلش انا مضايق شويه ممكن تسيبينى
ايسل : مستحيل انت اخر شخص ممكن اسيبه فى ضيقته .. ده انت ياما هونت عليا ...قولى مالك و انا ممكن اساعدك ... طب حتي قوم هننزل نروح اي مكان هادي نتكلم فيه
سيف :مش قادر يا ايسل و غير كدا عندي شغل مش هينفع اخرج
ايسل : طيب هقعد معاك
سيف : يا بت انتي ايه لازقة
ايسل : عاجبك ولا مش عاجبك
سيف بيتصنع الخوف : عاجبني انا اقدر اتكلم
ايسل : أيوة كدا هقعد ع الكرسي بتاعك الحلو ده اجربه ممكن
سيف : شكلي هترفد ولله بسببك
ايسل : عادي يابني باباك هو مديرك
سيف : يعني يرضيكي اروح في داهية
ايسل : هنروح سوا متقلقش
سيف : طب افرضي بابا دخل فجأة دلوقتي يقول ايه ها
ايسل : عادي تيجي تخطبني و تدبس بقا
سيف ضحك بعد لحظات اختفت ضحكته و شرد
ايسل: مالك فى ايه يا سيف
سيف بشرود: هه انتي بتكلمينى
ايسل : اه بكلمك انت مالك فيك ايه ...شكلك متغير
سيف نافيا: لا لا مفيش حاجة يا بنتي عادي
ايسل نظرت لعينيه و هي بتتكلم: فاكر يا سيف لما كنت بتقولي ان انا مرايتك اللي بتحتاجها تشوف فيها نفسك كويس اللي بتقف قدامها و تتكلم كأنك بتكلم مع نفسك من غير خوف لأنك واثق ان انا نفسك
سيف : أيوة انتي مرايتي يا ايسل مرايتي اللي مش بخاف وانا بتكلم معاها اللي مش بخاف أنها تكسرني او تأذيني عارفة كنت قبل ما اعرفك كنت ماشي بقاعدة معينة اللي هي الصمت هو احسن صاحب ميقدرش يخونك
ايسل : حلوة القاعدة دي بس انا حاسة انك مطبقها الأيام دي
سيف : لا عادي
ايسل : هو مش كنت من شوية مرايتك احكيلي بقا طب ضحي كلمتك
سيف : ضحي طلعت مرتبطة اصلا
ايسل بدهشة : معقولة طب ليه يا سيف اتأخرت كدا شوفت بقا اخرت تاخيرك ده
سيف بنرفزة : انتي عايزة ايه دلوقتي مش وقته محاضرات
ايسل : انا مش بديك محاضرات للاسف انت جبان و كنت خايف تعترفلها احسن أنها طلعت مرتبطة ع الأقل ارتبطت بشخص قالها مش زيك كنت خايف تنطقها هو انا مش ياما حذرتك
سيف : انا كنت خايف اخسرها يا ايسل
ايسل : دلوقتي بقا تقدر بطل تخاف لانها خلاص راحت
سيف : روحي يا ايسل
ايسل : لا مش هروح غير لما تيجي معايا و مش هسيبك في حالتك دي قولتلك حتي لو غصب عنك فاهم
سيف : انتي عارفة ان انا لما بكون مخنوق بحب اكون لوحدي
ايسل : قولتلك مش هسيبك و متحاولش تطفشني
سيف : طب انا ورايا شغل
ايسل : هقعد لحد ما تخلص
سيف: برضو؟
ايسل : اه
___________________________________
دخل احمد شقته الساعة 1 Am
دخل غرفته و كان ظاهر عليه التعب كان متوقع ان بوسي نامت لكن كانت هي مستنياه تطمن عليه خصوصا انه قافل موبايله
بوسي :أحمد انت اتأخرت كدا ليه انا قلقت عليك و كلمت عاصم قالي ان هو معاك
احمد : مفيش كنت بريح دماغي من الصداع
بوسي : صوتك متغير انت كويس يا حبيبي
وضعت ايديها علي مقدمة رأسه وجدت حرارته مرتفعة من غير ما تتكلم قامت جهزت كمدات و قاستله الحرارة و كانت سهرانة جنبه طول الليل
احمد : انا بجد مستغرب
بوسي : من ايه يا حبيبي
احمد : المفروض اننا متخانقين و انك زعلانة مني وانا اللي غلطان فعلا لكن رغم كدا انتي استنيتيني اجي من برة و فضلتي سهرانة كل ده مع انك بتنامي 9 او 10 و قيستيلي الحرارة و عملتيلي كمدات و اخدت دواء كل ده مع اننا متخانقين يعني
بوسي : ياااه يا احمد احنا بقالنا 5 سنين و نص متجوزين و لسة بتسأل سؤال زي ده انا عمري ما بزعل منك عشان انت حبيبي و ابو بنتي و حياتي انت النعمة اللي بحمد ربنا كل يوم عليها بجد
احمد : عارفة يا بوسي دلوقتي بس عرفت يعني ايه اختارت واحدة تبقي امي قبل ما تكون مراتي ربنا يديمك نعمة في حياتي دايما
وضمها لحضنه في اللحظة دي
____________________________________
تاني يوم كان عاصم معزوم عند بوسي
احمد : اومال مش ناوي يا عاصم تخطب بقا
عاصم : اه اكيد ناوي بس دلوقتي
بوسي : اومال امتي يعني بعد عمر طويل ان شاء الله مش كدا يا عاصم كفاية بقا و اخطب و استقر و افتح بيت انت مبقتش صغير
عاصم : للحظة كدا فكرتك عبير مش عارف ليه
بوسي : و هفضل دايما اقولك كدا
عاصم : عايز محشي ورق عنب
بوسي : تمام كدا ولا اغرفلك تاني
عاصم : لا كويس كدا اومال جنة فين
احمد : عند ايسل هي بتاخدها كل شهر في نفس اليوم تقضيه معاها و بروح اخدها
عاصم : طب ينفع اجي معاك او اروح انا اجيبهالك
بوسي قاطعته: لا احمد بيروح بنفسه
عاصم :اه ماشي
بوسي: اومال هتخطب ايسل امتي ولا ناوي تقضيها كلام كدا و خلاص
عاصم : لسة مفكرتش في الحوار ده
بوسي : ليه ان شاء الله ناوي تكون زي غيرها صح
عاصم : لا انا بحبها بجد
بوسي : و لما بتتنيل مش هتخطبها يعني ولا ايه
عاصم : لازم أتأكد أنها تستاهل اخد الخطوة دي عشانها و اشوف هي حققت كل المقاييس و الصفات اللي انا بتمناها ولا لا
بوسي : مقاييس ايه انت هتشتري جزمة
عاصم : لا هتجوز
بوسي : انت مين اصلا عشان تقيمها و تشوف تستاهل ولا لا ما كل الناس بتتجوز كدا عادي
عاصم : أتأكد طبعا عشان بعد الجواز منتخانقش كتير و نكون متفاهمين في كل شيء ده جواز يعني مش لعبة و بعدين انا عايز اللي اتجوزها تملي عيني مبصش بعدها كل ما أشوفها اقول الحمدلله اني اتجوزتها
بوسي : لا يا حبيبي الرجالة اللي زيك مبيملاش عينهم غير التراب
عاصم : انا شبعت الحمدلله
________________________
ايسل : جوجو ممكن تشيلي الكيس بتاع الفطير و الشوكليت ده
جنة مسكت الكيس منها و هو ماشيين وقفت قدام شباب كتير في الشارع قدامهم
ايسل : جنة امشي العمارة في اخر الشارع اهو قدامنا وقفتي هنا ليه
جنة : مش همشي
ايسل : بطلي شقاوة في الشارع بقا
جنة بنرفزة و صوت عالي: امسكي الكيس ده هو انا خدامة عندك
ايسل : بت خدني هنا مش هعرف اشيله يووووه بقا
طلعت جنة العمارة و سابتها لوحدها
شاب من اللي واقفين وقف قدام ايسل : اشيله انا يا قمر
ايسل بعصبية : وانت مال امك انت كمان عايز ايه ده ايه البلاوي دي ....
الشاب : ايه يا بت انتي لسانك ده انا لو نفخت فيكي هطيرك
ايسل : ليه فاكرني بالونة
الشاب : لا و ظريفة كمان بس قمر يا بنت الايه
مسكه شخص من قميصه بعنف لدرجة أنه كان هيتخنق
الشخص : بلاش اقولك الظريفة دي تبقي مين
ايسل بصدمة : دكتور عاصم
عاصم : اطلعي البيت و سيبي الحاجات دي انا هشيلها
الشاب : ايه يا عم انت هتخنقني اوعي كدا
الشخص : عارف لو شوفتك بتعاكسها تاني اقسم بالله ما هخليك تخرج من بيتك تاني
ايسل : سيبو حرام عليك هتخنقه
عاصم بنرفزة : سمعتي انا قولت ايه روحي البيت علي طول
ايسل بخوف من نبرة صوته : ماشي
الشاب : ايه يا عمنا هتعمل ايه يعني
عاصم : انا هوريك يا روح امك هعمل ايه ان مكنتش هتبات في القسم انهاردة بقضية مبقاش انا
الشاب : ايه يا اسطا صلي ع النبي كدا مالك كل ده عشان عاكست المزة دي هي تخصك يعني
عاصم بعصبية : انت مش ناوي تتأدب صح
الشاب :لا و هعاكسها تاني تستاهل بصراحة جامدة
عاصم بعد عنه و اخد الشنط بتاعة ايسل و وقف بعيد عنه
الشاب بصوت عالي من بعيد: مقولتليش يعني هتعمل ايه
عاصم تجاهله و خرج موبايله و اتصل بشخص عاصم : أيوة يا مدحت انت في القسم طب في عيل كدا عايزك تبعت حد يجي ياخده .... يا مدحت هقولك بعدين ابدا يا سيدي بيعاكس واحدة كدا قريبتي و قل ادبه عليها بس عايزه يتروق الليلة دي بص انا صورته من غير ما ياخد باله هبعتلك العنوان في مسج و صورته تمام يا مدحت مش عارف اقولك ايه بجد بس اسمع عايزه يتعلم عليه عشان يبطل يعاكسها تاني ماشي سلام
طلع عاصم العمارة بعد ما انهي المكالمة مع صديقه الظابط
ايسل بعصبية: ايه اللي انت عملته ده و بعدين انت اتخانقت معاه
عاصم :وانتي ينفع اللي عملتيه ده ازاي اصلا تطولي لسانك معاه ايه بتردحيله في الشارع
ايسل : نعم وانت يعني كنت عايزني اسكتله ولا اسكتله ده واحد قليل الأدب
عاصم : ماهو مش هيسكت لما يلاقي طولة اللسان دي و بعدين ما تحطيش زفت روج تاني علي شفايفك و دخلي شعرك ده جوة الطرحة المرة الجاية هقصهولك
عاصم بايديه دخل خصلات شعرها جوة حجابها و مسح بايديه الروج من علي شفايفها لكن متمسحش كلو
ايسل : انت ازاي تمسحه كدا
عاصم : متمسحش كلو اصلا
ايسل : اصل الليب جلوس ده ووتر بروف ( ضد الماء )
عاصم : لولا ان احنا واقفين هنا كنت وريتك بيتمسح ازاي
ايسل بغضب: انت قليل الادب
عاصم بابتسامة : I know ( انا عارف )
جنة : خلصتوا خناق
عاصم بغضب:انتي حسابك معايا بعدين انتي كمان
جنة : مش هتقدر تعملي حاجة
عاصم : ماشي لما نروح هقولك هعرف ولا لا
ايسل : حرام عليك دي طفلة
في اللحظة دي وصل بوكس القسم و اخد الشاب ده في العربية معاهم
ايسل : انت عملت ايه اتصلت بحد ياخده صح منك لله
عاصم بابتسامة: عشان محدش يعاكسك بعد كدا خدي الحاجات بتاعتك دي و يلا يا جنة عشان نروح
ايسل : لسة هنتعشي
عاصم : طيب امشي انا بقا
جنة : تعالي اتعشي معانا
ايسل : تعالي طارق مش هنا جدو اللي موجود
____________________________
ايسل : قوليلي بقا انتي واحمد عاملين ايه
بوسي : اهو لسة في حوار الخناق دائما
ايسل :يا بوسي خدي كل حاجة ببساطة عشان لو طرف شد التاني يرخي عشان الخيط اللي بينكم ميتقطعش و تقعدي تربطي فيه و يبقى مكلكع
بوسي :تعبت بجد من كتر خناقنا ده
ايسل: مفيش بيت في مصر مفيهوش خناق
بوسي : علي رايك
ايسل : عاصم قالك ايه لما فتحتي معاه حوار جوازنا
بوسي : انتي هبلة يا بت انتي ما حكيتلك الحوار 10 مرات
ايسل : يعني بجد هو مش عايز نتجوز ولا ايه
بوسي: مش عارفة بصي يا ايسل حتي لو اتجوزتي عاصم لازم تاخدي بالك من كام نقطة كدا عاصم اخويا بتاع بنات اصلا و الراجل بتاع البنات عمره ما بيتغير اسمعي مني انا أكبر منك و سمعت كتير من صحابي لما تيجي تتجوزي يا حبيبتي تبعدي عن 3 أنواع من الرجالة البخيل و ابن امه و بتاع البنات التلاتة دول زي الزفت و مبيتغيروش و ضيفي عليهم اهم صفة اللي مبيصليش لان مش هيتقي ربنا فيكي صدقيني ده غير كمان اللي بيشرب ده هيتعبك
ايسل : أيوة بس عاصم قالي انه هيتغير عشاني
بوسي : و متغيرش ليه حبيبتي مراية الحب عامية ولله ولا انتي مش شايفة عيوبه دي فوكك من انه حنين ولا زفت ده اخويا وانا عارفاه متقلليش من نفسك عشان ولد يا ايسل انتي اختي وانا من حقي اخاف عليكي و انصحك حتي لو من اخويا بتهيالي صاحبتك و سيف قالولك نفس الكلام
ايسل : خلاص يا بوسي عرفت كل ده المفروض اني اعمل ايه بقا اروح أقوله يا تتغير يا اسيبك
بوسي: اللي زي عاصم ده مش بتاع جواز ولله هو بس عجبه ان بنت تقوله لا و متعجبش بيه ياريتك كنتي اعتذرتي و محصلش اللي حصل ده
ايسل عينيها لمعت بالدموع : حبيته يا بوسي
بوسي : حبيبتي اهدي كدا و هنوصل لحل كويس معاه انتي خلصتي تتبيل الفراخ
ايسل : اه دخليها الفرن
بوسي : وانا علقت ع الرز
بوسي قعدت جنبها علي تربيزة المطبخ
ايسل : هاتي البامية عشان اقمعها
بوسي : حاضر .... بصي يا قلبي الراجل اللي زي عاصم ده او مش شرط عاصم معظم الرجالة يعني طبعا مش كلهم لو مراته ملكة جمال لازم يبص برة و الست مننا طبعا لازم تعمل كل جهدها عشان تسعد جوزها سواء باهتمامها بيه و بنفسها و بولادها و بيتها الا أنه في النهاية الراجل يبص علي واحدة تانية و يروحلها رغم ان مراته بتكون مخلصة كل الإخلاص ل جوزها و بتعشقه لدرجة الجنون و حبها ليه مبيقلش بالعكس و حتي لو هو بيحبها برضو لكن بيشوف البنت اللي بتعجبه حتي لو مراته واقفة معاه في الشارع عارفة ليه
ايسل : ليه
بوسي : لان الخيانة بتجري في الراجل بتاع البنات في دمه و في عروقه عشان كدا ميملاش عينيهم غير التراب
ايسل : أيوة بس مش كل الرجالة كدا و الكلام ده مينطبقش علي كل الرجالة
بوسي : بصي انا مش بعمم علي كل الرجالة لكن كتير اوووي منهم كدا فيه منهم رجالة بجد يستحقو الكلمة دي كلمة راجل لكن دول قليلين اوي بس موجودين طبعا
ايسل: عشان كدا اكتر نسبة خيانة زوجية من الراجل
بوسي : بالظبط صحيح فيه ستات كتير بتخون جوزها لكن النسبة العالية من الراجل
ايسل : عندك حق
__________________________________
منار : يا حبيبتي الراجل بتاع البنات ده عمره ما بيتغير بعد الجواز الخلاصة ان اللي كان هيتغير ده كان اتغير من يوم ما عرفك
روان : أيوة يا موني لكن لو حب بجد هيتغير فعلا
منار : حبيبتي افهمي الراجل بتاع البنات ده بعد الجواز اه بيتغير بس بيكون بتاع بنات و ستات و كلو
روان : لا بيتغير على فكرة ابن خالي كان قبل الجواز حاجة و دلوقتي بعد الجواز بقا عنده بنتين و مراته مقالتش انه خاين ولا حاجة و بيحبه بعض جدا
منار : رورو حبيبتي ده نوع نادر اووي و بعدين ممكن مراته مبتشتكيش هو اكيد مش مضمون بس ممكن يحصل
روان : مش عارفة بس اللي شوفته قدامي ده اتغير فعلا
ايسل : يعني عاصم مش هيتغير
منار : هيتغير طبعا كام يوم و يرجع تاني لطبيعته انا بجد مش فاهمة انتي ازاي مستحملة الوضع ده يا بنتي ازاي قابلة بانه لسة بيعرف بنات
ايسل :بتهيالي انتي عارفة الإجابة كويس
منار : يا روحي الراجل الوسخ ده بيفضل طول عمره كدا و ديل الكلب ده بيبقا نقص و عمره ما هيشبع صدقيني
روان: بالراحة عليها يا موني مش كدا
منار : لا دي الحقيقة اللي هي دايما بتهرب منها ايسل الللي انتو فيه ده مش حب صدقيني ده تعود منك و تسلية منه معتقدش انك لحقتي تحبيه اصلا ولا هو كمان
ايسل: لا ده حب بجد حب مش تعود لا ..... صحيح يا روان انتي عاملة ايه مع عمرو
روان :بنتكلم بس خايفة من احمد عشان كدا مش بنتكلم كتير
______________
ايسل : سوفي
سيف :قلب سوفي
ايسل : لا بجد عايزة اتكلم معاك في حاجة مهمة كدا
سيف : ها
ايسل : ايه الفرق بين الحب و التعود
سيف :اشمعنا يعني
ايسل : عشان خاطري يا سيف جاوب بقا لاني محتارة بجد
سيف :امممم واضح ان اسألتك كترت اووي اليومين دول
ايسل : استحملني بقا يا سوفي و بعدين هو انت يعني عندك كام سيلا
سيف : هي واحدة بس ولله
ايسل :متثبتنيش بقا و قولي ايه الفرق بينهم
سيف :هو الفرق من وجهة نظري بيتحدد بالمسافات يعني لو حد دايما موجود و بتتكلمو كل يوم مثﻻ و طول الوقت بتتعاملو مع بعض ف تلقائيا هتقربو من بعض وممكن تحسي انك بتحبيه في حين انك بس اتعودتي عليه وعلي وجوده انما الحب ممكن يبقي حد بعيد ومش بتتقابلو الا كل فين و فين و رغم كدا مش بيفارق تفكيرك و دايما عايزة تعرفي اخباره وتطمني عليه و حاجات كدا يعني دا رايي و برضو لو عدى 30 سنه مشفتيهوش ولا كلمتيه هيبقي ولا كأن مر سنين احساسك زى ما هو انما التعود زى ما تعودتى ع وجوده هتعرفى تتعودى ع غيابه وعموما اللى حب بجد عمره ما يسأل السؤال دا عشان الى بيحب استحاله يشك ف حبه بيبقي يقين جدا جدا
ايسل : لا طبعا انا مش شاكة في حبي ل عاصم لكن كلام منار خلاني اسال
سيف :عاملة ايه مع عاصم
ايسل :اهو يعني ساعة كويسين و ساعة لا بس ماشية
__________________________________
جلال بيفتح الباب كان الساعة 11 و استغرب ان أيسل بتيجي الوقت ده
جدها اتخض وقلق: مالك یا حبیببتى طارق زعلك
ايسل :لا بس مفتقداك اووى و عايزة اتكلم معاك يا جدو و قولت لماما هنزل عندك
جلال : طب ادخلي نقعد في البلكونة نتكلم یلا وكفایة عیاطو اعملي كوباية شاي بلبن حلوة كدا من إيديك
ايسل : اوكيه استناني و جايالك ولا اقولك الجو برد خلينا في الريسبشن هنا
قلق جلال من دموعھا دى ..دخلت ايسل الم طبخ جهزت 2 كوب الشاي باللبن المفضل ليها و لجدها
ايسل دخلت عند جدها و قعدت جنبه و اترمت في حضنه كأنها كانت محتاجة ده جدا طبطب عليها و هداها لأنه محتاجها تتكلم
جدها: مالك يا حبيبتي اتكلمي
ايسل: جدو يعني ايه حب
جدها : يعني انك عايزة تكوني مع شخص معين من غير اي سبب الحب ده شيء بیعیش جوانا مش بیموت حتى لو اصحاب الحب سابونا او ماتوا
ايسل : طب ماما مكنتش بتحب بابا
جلال : مين قالك كدا
ايسل : لأنها اتجوزت بعده هي اه قعدت كذا سنة رافضة بس برضو اتجوزت
جلال بابتسامة: بصي يا حبيبتي الحب بين الزوج و الزوجة ده ترجمة مشاعر و أحاسيس و اندماج عشرة و روابط عيالهم لكن المشاعر الصادقة و الروابط القوية دي مبتموتش غير بموت حد فيهم لكن الشخص التاني بيعيش ع الذكري دي امك اتجوزت عشان تتخلص من المتجمع العقيم و عشانك عشان يكون ليكي اب او شخص يكون مسؤؤل عنك لما يتقدملك عريس هو اللي يقف جنبك و هو اللي ياخدك من إيديك لحد عريسك يوم فرحك .... من غير ما تتكلمي عارف ان طارق مش هو الشخص الصح او الكامل لكن ده اختيار والدتك عايز اقولك أنها كانت بتحبه جدا لكن
المجتمع اللي احنا فيه بيبص للارملة و المطلقة أنها مش عايزة تتجوز تاني عشان دايرة علي حل شعرها و بالذات المطلقة حتي الراجل يا بنتي عندك مثلا سامح جارنا أتجوز بعد مراته ما اتدفنت بشهر عارفة ليه لان معظم او اكتر الرجالة مش بتعيش ع ذكري مراته بعد ما تموت حتي لو كان بيحبي و طبعا بسبب الحجة المعروفة عشان تربيله العيال و تاخد بالها منهم بلاش تظلمي امك لانها بني ادمة زيها زي الراجل و هي معملتش حاجة عيب ولا حرام ي بنتي الزواج ده شرع ربنا حلله و هي معملتش غير الصح عشان حياتها تستمر
لو ابوكي نفسه كان هيتجوز لو بعد الشر يعني صفاء هي اللي ماتت ده ابني وانا عارف
ايسل : يعني هي نسيت بابا
جلال : لا تعرفي في اول جوازها هي و طارق كانت بتتلخبط في اسمه و تناديه باسم ابوكي لكن بعد كدا بدأت تفهم غلطها هي عائشة ع الذكري لكن منسيتش اوي ربنا خلق النسيان عشان الحياة تمشي و بعدين انتي كنتي عايزاها تدفن نفسها اي ست في الدنيا او معظمهم محتاجة راجل في حياتها و زي ما قولتلك هو لو كان هو الارمل كان برضو اتجوز و احتفظ بذكريات المرحومة في قلبه
ايسل : عندك حق
جلال : طب قوليلي بقا
ايسل : ايه
جلال : بتسالي عن الحب ليه
ايسل : هو الحب حلو يا جدو ؟
جلال بابتسامة :الحب حیاة النفس ال بتتنفسيه ..الاحساس ال بیخلیكي بتحسي بجمال كل حاجة الحب .. ھو انك بتستحملي وتعیشي وتكملي رغم المشاكل و العقبات اللي بتواجهنا الحب الحب ده عالم تاني بيفصلك عن الواقع و في نفس الوقت بيديكي حافز كبير انك استمري في الواقع بمساعدة الطرف التاني لو بيحبك بنفس مقدار حب الطرف الأول
ايسل : يعني الحب حلو اووي كدا و امتي اعرف اني بحب بجد
جلال : يا سيلا الحب ده اجمل شئ في الدنيا
حد يحتويكي ويخاف عليكي ويقدرك تشتاقي وتغيري وتحلمي بيه حتي انتي صاحيه تحسيه حواليكي اما بقا بتعرفي ازاي
ممكن لما تشوفيه تحسي انك فرحانه ولو مشفتيهوش تحسي هم الدنيا كله فيكي حاجات جميله مينفعش الكلام فيها لانها حاجات لا اراديه
ايسل :جدو انا بحب
جلال : طب ما انا عارف و كنت مستنيكي من الأول انك تحكي عاصم مش كدا
ايسل : اه انت عرفت ازاي
جلال : يوم ما ايجا هنا مع سيف عرفت من عينيه أنه بيحبك
ايسل : بجد
جلال : الحب لو مفضحهوش اللسان بتفضحه العينين
ايسل :بس انا متلخبطة اوي يا جدو كل اللي حواليا بيقولولي لا لكن انا بقول اه
جلال : لان مراية الحب عامية انا مش هقولك ايه الصح و ايه الغلط لكن يا ايسل لو هو بيحبك بجد هيعمل المستحيل عشان تكوني ليه
ايسل :ماهو ده اللي مقلقني يا جدو
جلال : يبقى تقعدي مع نفسك و تكلمي معاها و تشوفي انتي قصرتي في ايه و صلحيه شوفي انتي صح ولا هما انا واثق فيكي لكن يوم ما احس انك ماشية في طريق غلط همنعك عنه و زي ما قولتلك اقعدي مع نفسك و فكري
__________________________
ايسل بتكلم عاصم في الموبايل
ايسل : طبعا كنت سهران مع الصايعين بتوعك
عاصم : انتي عايزة كل تنكدي عليا يعني
ايسل :انا بنكد عليك يا عاصم .... طب قولي بقا انت صليت العشا
عاصم : لا ولا حتي المغرب العصر بس
ايسل بنرفزة: هو انا مش قولتلك تصلي المغرب و العشا
عاصم: كسلت
ايسل : لا بجد كسلت تصلي هو انت بتصلي عشاني مثلا ده حاجة بينك بين ربنا دي اول حاجة بيتحاسب عليها في القبر هي الصلاة وانت ماشاء الله عليك يا حبيبي بتصلي كل جمعة و اوقات لا و بتحايل عليك و اتصل عشان افكرك تصلي وانت ولا فارق معاك اصلا
كان في حديث للرسول بيقول : من احب لقاء الله احب الله لقاءه و من كره لقاء الله كره الله لقاءه
عاصم: عليه الصلاة و السلام انا بكسل يا سيلا مش عارف ليه
ايسل: عشان الشيطان بيتغلب عليك بيقولك لا انت بقا قاومه يا عاصم ايه اللي ربنا عملهولك عشان تتجنب لقاءه جرب كدا تنتظم في الصلاة و شوف الفرج و السعادة في كل حاجة و الحياة قد ايه جميلة ولله هتحس براحة مدوقتش طعمها قبل كدا يا عاصم صلي قبل ما يتصلي عليك انت
عاصم : حاضر يا ايسل هحاول
ايسل :مفيش حاجة اسمها هحاول في حاجة اسمها انك هتسمع الكلام و تتغير لان انا مش عايزة اعيش مع واحد مبيصليش
عاصم بعصبية : انتي عايزة كل حاجة تمشي علي مزاجك صح عايزة اتغير يبقى خلاص يا عاصم من بكرة يا حبيبي تكون إنسان كويس دايما حطاني في مقارنات مع غيري دايما تقوليلي مش انت الإنسان اللي انا عايزاه يكون اب لولادي متفكريش ان انتي بس اللي ملاك وانا اللي شيطان لا يا حبيبتي محدش فينا ملاك كلنا بنغلط احيانا خلاص روحي بقا دوري ع واحد بيصلي و عارف ربنا كويس اوي و في كل المواصفات اللي انتي تتمنيها
ايسل : اروح ادور
عاصم : عايزاني اقولك ايه يعني انا خلاص تعبت بجد
ايسل : ماشي يا عاصم سلام
عاصم : متقوليش زفت سلام متقفليش و تسيبني محروق دمي
ايسل :وانا يعني دمي متحرقش انا بقول سلام عشان نبطل خناق
عاصم : اه تصدقي عندك حق فعلا سلام يا ايسل
____________________________________
ايسل بتكلم سيف في الموبايل
ايسل : مفيش كويسة الحمد لله
سيف فهم من صوتها أنها مخنوقة : طب قومي البسي و نخرج
ايسل :ماشي عايزة اروح اي كافيه قريب من النيل
سيف :اشطا نروح ( لاتينو )
ايسل : تمام بحبه جدا
________________
منار :عاصم كنت عايزة منك طلب كدا
عاصم : اتفضلي
منار : كنت عايزة اشتغل
عاصم باستغراب : دلوقتي بس استني حتي في الأجازة
منار : مش حوار كدا بص هو ماما الحمدلله مكفياني و زيادة بس الواحد لازم يخلي عنده دم برضو انا محتاجة اشتغل عشان اشيل عنها شوية وانت عارف يا عاصم انا لسة متخرجتش يعني مش معايا شهادة ولا خبرة يعني مش هعرف اشتغل حاجة كويسة
عاصم : فهمتك خلاص سيبيلي الحوار ده وانا هتصرف
منار : ميرسي اوي بجد
عاصم : متقوليش كدا عادي يعني
منار : عامل ايه مع ايسل
عاصم : متخانقين اصلا و مش بنتكلم
منار : ليه كدا احكي وانا هقولك مين اللي غلطان
عاصم : حاضر هحكيلك عشان انتي عارفة صاحبتك برضو
___________________
سيف : مالك بقا
ايسل: مفيش متخانقة انا و عاصم
سيف : بسبب ايه
ايسل حكتله علي موضوع الصلاة و التغيير
سيف ضحك
ايسل بضيق: بتضحك عليا انا غلطانة
سيف :اصل انتى عاملة زى العشطان وبيشرب بسرعه لأنه خايف و حاسس انه مش هيعرف يشرب تانى او الجعان وبياكل بسرعه لانه عارف انه مش هيلاقى اكل تانى .. اتصرفتى بتلقائيه من غير تفكير مفكرتيش تحسبيها ..
ايسل : انا عايزة مصلحته يا سيف خايفة عليه بلاش اهتم بيه و اطمن عليه
سيف : احبك اقولك اللي بتعمليه دا خنقة مش اهتمام .. انتى ادى للي قدامك مساحة يتحرك فيها وانتى راقبيه لما تحسى انه فى خطر ادخلى وساعديه او امنعيه لكن مترميش علب السجاير بتاعته ولا تتخانقي معاه عشان مرضيش يصلي
الزن هيلين دماغ اى انسان .. لكن قفش كده مينفعش دا انسان زيك وكل انسان مبيحبش حد يتحكم فيه اكيد .. ده اخويا وانا عارفه كويس اوي مش بيجي بالطريقة دي
ايسل :بصراحه لما فكرت فيها حسيت انى اوفر جدا
خنقتيه .. اظبطى بقى الدنيا وفكرى قبل ما تعملى حاجة انصحيه بالراحة بيشرب سجاير خليه بدل علبة سيجارتين او 3 واحدة واحدة الدنيا هتمشي
ايسل : معاك حق
______________________________________________________
منار بنرفزة : حرام عليك بجد انت ازاي تكلمها بالطريقة دي
عاصم : مش عارف بس هي استفزتني بصراحة
منار : حتي لو هي بتحبك يا عاصم
عاصم : وانا يعني مش بحبها
منار : تصرفاتك دي غلط يا عاصم بجد حرام عليك ايسل متستاهلش منك كدا
عاصم : انا اتخنقت بجد
منار: نعم انت بتهزر اتخنقت ايه ان شاء الله انت فاكرها زيها زي غيرها لعبة زهقت منها و خلاص
عاصم : يوووه بقا انتي كمان عايزة ايه مش فاهم
_________________________________
في كافيه
شريف : بس انتي كدا هتضيعي نفسك انتي عايزة تلعبي مع حوت
منار : حوت ازاي يعني
شريف :اللي زي مختار ده حوت يا بنتي ده بيكسب قضيات صعبة جدا و مفيش حاجة بتقع من تحت ايديه
منار:عاصم لو بجد خلاني اشتغل في مكتب مختار يبقا حلو اوووي
شريف : مش فاهم بجد انتي هتضيعي نفسك ولله ده غير اللي زي عاصم ده اكيد بيكلمك و بيتسلي انتي عارفة دماغه ايه مع البنات كلها
منار : عارفة بس معايا ميقدرش
_________________________________
احمد : كمل
سيف: وانا معاها بحاول اداري وجععي و غيرتي عليها لكن اوقات مبقدرش مش قادر اكون اناني يا احمد مش قادر منصحهاش عارف ان كل مرة هتتكلم عن عاصم و ان معظم كلامها عنه لكن مقدرش امنعها مقدرش أقولها متتكلميش عنه
احمد : حاول تتهرب من كلامها
سيف : مش قادر صعب اوي يا احمد لما بتتورط في حب شخص مش حاسس بيك بتبقي مش عارف الدنيا هي اللي ظلمتك ولا انت اللي ظلمت نفسك لما حبيته
احمد : هتنساها يا سيف صدقني هتقدر خليك اقوي من كدا
_________________
تاني يوم
جلال : مكنتش بتكلم ايسل ليه يا سيف
سيف : مفيش يا جدو كنت مخنوق من شوية حاجات بس
جلال : تعالي نلعب دور شطرنج حلو كدا و هعمل كوبايتين شاي معاهم
سيف : موافق بس انا اللي عليا الشاي هعمله
جلال بابتسامة : موافق طبعا انت عارف شاي بتاعي تقيل
سيف : عارف طبعا
__________________________________
سيف قاعد مع جلال في البلكونة و بيلعبو شطرنج
جلال: ايسل حكتلي أنها بتحب
سيف : هي قالتلك
جلال: اه انه اخوك
سيف : وانت رأيك ايه
جلال : نصحتها أنها تنساه لانها هتتعب
سيف : ليه
جلال : انا قعدت مع عاصم لما ايجا ياخد بنت اختك نظرتي ليه فهمت من كلامه أنه شخص كويس من جواه لكن صعب اوي يتغير هو جواه حاجة نضيفة لكن مش قادر يخرجها دماغه عجبتني جدا
سيف : عاصم طيب جدا لكن هو ماشي بدماغه هو
جلال : عشان كدا انا عايزك تنصح ايسل تبعد عنه
سيف : مش هتسمع كلامي هي بتحبه
جلال : انت كنت متخانق معاها ليه يا سيف
سيف : مفيش عشان كنت مخنوق من شوية حاجات في الشغل و البيت
جلال : ولا عشان بتحبها
سيف بصدمة : بحب مين
جلال : ايسل
____________________________________
في مكتب المستشار مختار العدوي
عاصم : بابا دي منار اللي قولت لحضرتك عنها بجد من اشطر الطلبة اللي عندي
مختار : اهلا يا منار مع اني .....
تليفون المكتب بيرن
مختار : ثواني اما ارد ..... الو أيوة يا نبيل .... ااه انت و دعاء تاني ... يا نبيل الظاهر كدا انك مش عارف قدر و مكانة مختار العدوي الاسم نفسه كبير اوووي انا بتاع المصايب التقيلة اووي بتاع القضايا المرعبة قتل و رشوة و فساد و مخدرات محدش بيوكلني للدفاع عنه الا اللي مكانته عالية من وزير بقا وانت نازل اقوم انا اترافع عن قضية سهلة زي دي ده حتي عيب في اسمي و مكانتي و مستقبلي السياسي و الحزبي ......حاضر يا نبيل خلاص هبعتها ل سيف ولا حد من المحاميين الشاطرين يمسكها ماشي تعالي بكرة و اشرحله كل حاجة ماشي سلام دلوقتي عشان شغلي
مختار :معلش اتأخرت عنكم ااه كنت بقول مش بشغل عندي طلبة وبالذات لو سنة 3 لكن هشوف دماغك كويسة ولا ايه معانا
منار : ان شاء الله اكون عند حسن ظن حضرتك
عاصم : عايزك تشرفيني بقا
منار: حاضر يا دكتور عاصم
مختار : تمام عاصم فهمك طبيعة شغلك هتكون ازاي
منار هزت رأسها بالنفي
مختار:طيب انتي هتشتغلي تحت التدريب لمدة شهر كاختبار يعني لو اثبتي كفاءتك هتاخدي مرتب ... اوقات بيكون عندي عجز في شغل كتير هتكوني احطياتي مكان اي حد من المتثبتين هتنجزي شغله
منار : يعني انا هشتغل يوم و ايام لا
مختار : لا طبعا بس انتي هتكوني زيك زي اللي شغال بعقد مؤقت و خصوصا ان كل المتثبتين هنا معاهم خبرات و شهادات
منار : تمام جدا
مختار : تمام ممكن بطاقتك
منار بصدمة بتحاول تخفيها: بطاقتي
التعليقات على الموضوع