نقطة و سطر جديد (الحلقه العاشرة)

الفصل العاشر ( قبل الأخير )

مروة (الشغالة ) : الحقي يا هانم الحقن خلصانة

في اللحظة دي الجرس رن فتحت مروة كان عمرو و نور و اتصدمت سمر لما شافتهم

عمرو شال بنته و جري بيها علي العربية و نور ساقت بسرعة و وصلت المستشفي اللي بتشتغل فيها مامتها و سمر و حسام راحوا وراهم

و هو بيفتكر مكالمة حسام

فلاش باك *******

حسام اتصل ب عمرو
حسام : اسمع يا عمرو بنتك دلوقتي بين الحياة و الموت يا ترجع الفلوس يا اما بنتك تموت
عمرو :انت عملت فيها ايه  .. حسام انا ولله العظيم مستعد اعملك اي حاجة بس الا بنتي
حسام  : تعالي خدها دلوقتي  بس خليك فاكر انك قولت هترجعهم و لو مرجعوش ليا كذا طريقة
_____________________________________
في المستشفي اللي بتشتغل فيها شاهيناز

فاطمة لموظفة الاستقبال : لو سمحتي مكتب دكتورة شاهيناز فين من فضلك
الموظفة : آخر الطرقة دي

وصلت فاطمة عند المكتب

فاطمة : عايزة دكتورة شاهيناز
..... : طيب لحظة واحدة اشوفها فاضية ولا لا
فاطمة : اتفضلي

بعد دقايق خرجت الممرضة

الممرضة : اتفضلي هي فاضية

دخلت فاطمة المكتب

شاهيناز : اتفضلي
فاطمة : انا فاطمة .. اللي عدي قال لحضرتك عني
شاهيناز بدهشة: انتي ؟ و جاية ليه
فاطمة : لا متخافيش حضرتك انا مش جاية عشان اقولك وافقي عليا ولا اني كويسة و الكلام ده انا جاية عشان حضرتك ظلمتيني .. انا الحمدلله ابويا و امي علموني يعني قناعة و يعني ايه مبصش لحاجة حد
شاهيناز : وانا ايه يخليني اصدق
فاطمة : المثل بيقول تعرف فلان؟ اه اعرفه .. عاشرته؟ لا .. يبقي متعرفوش .. اسألي ابنك من يوم ما عرفته ولله العظيم ما خليته يصرف عليا جنيه واحد ولا طلبت منه يجيبلي هدية و يوم ما جابلي رفضت لان مفيش حاجة بينا رسمي و لان كمان بابا علمني أن الواحدة لما تتخطب حتي خطيبها ميصرفش عليها لأنها لسة في بيت ابوها لما يكون جوزها يصرف براحته .. انا خلصت كلامي عن إذن حضرتك

خرجت فاطمة و شاهيناز مستغربة و بتفكر هل هي فعلا كويسة زي ما سمعت ولا بتقول كدا و خلاص
__________________________________
ندي جريت منه و اسلام مسكها من ايديها
ندي صرخت : إسلام انت هتعمل ايه ؟ عشان خاطري سيبني انت عمرك ما كنت كدا ايه اللي حصلك

اسلام مرة واحدة قطع هدومها
ندي بتعيط:في ايه يا اسلام .. ليه بتعمل كدا ؟

حاولت تقوم و تفتح الباب وقعها علي الارض و بيحاول يلمسها و هي بتصرخ و هو بيبوسها
ندي زقته علي الحيطة و اتخبط : حرام عليك .. سيبني

جريت علي الباب و فتحته و هو حاول يقوم مقدرش و هي بتفتح الباب قابلت معتز و نزلت تجري
_____________________________________
في المستشفي
فاطمة كانت في مكتب دكتور عمار

فاطمة :حضرتك طلبت تقابلني
عمار: أيوة يا فاطمة اقعدي الأول ..
فاطمة : اتفضل
عمار: بصي انا متابعك من وقت ما اشتغلتي و بصراحة عجبني أخلاقك و شغلك جدا و التزامك و بصراحة حسيت اني معجب بيكي .. و حابب اتقدملك لو موافقة
فاطمة : حضرتك شخص كويس جدا و اي حد يتمني يسمع مكاني الكلمتين دول .. لكن انا مرتبطة بإنسان و ممكن منكملش مع بعض لكن مقدرش اخونه و اوافق علي حد غير لما أنساه و ده صعب يحصل ف انا كان نفسي الكلام ده يحصل بس معاه هو
عمار: عدي مش كدا ؟
فاطمة : حضرتك عرفت ازاي
عمار:كان باين اهتمامك بيه ايام ما كان هنا و لما شوفته بيجي المستشفى حسيت ان فيه حاجة بس قولت اسألك و اشوف رد فعلك يمكن تكونو اصحاب و عموما ربنا يسعدكم مع بعض
_____________________________________
اول ما شاف حسام مسكه و ضربه و الكل حاول يبعدوهم عن بعض

عمرو :اقسم بالله ما هسيبك .. لو بنتي جرالها حاجة ما هسيبك
سمر :في ايه هو عملك ايه
عمرو : البيه هو اللي اكلها كل الحلويات دي كان بيهددني بيها عشان ادفعله الفلوس شوفتي وساخته

سابهم عمرو و وقف عند الأوضة اللي فيها جوري كانت نور ماسكة مصحف و بتقرأ سورة يس قعد جنبها و بيدعي تقوم بالسلامة

سمر: صحيح يا حسام ؟انت كنت هتموت بنتي فعلا  كلام عمرو صح ... رد عليا ساكت ليه!
حسام : أيوة انا عملت كدا .. بس مكنتش هموتها انا عملت كدا عشان هو يرجعلنا الفلوس و دي تكون نقطة ضعفه
سمر : انت غبي .. فلوس ايه دي اللي هترجع ده جوري كمان مش هترجع..منك لله .. حرام عليك
_____________________________________
خرجت من العمارة و خايفة من نظرات الناس بتحاول تداري هدومها اللي اتقطعت ركبت تاكسي و وقف قدام عمارة روان  و اتصلت بروان تنزلها و يكون معاها بلوزة

نزلت روان و من غير ما تتكلم لبستها البلوزة و طلعت شقتها
_____________________________________
خرجت شاهيناز من أوضة جوري و معاها ممرضة

عمرو :خير طمنيني
شاهيناز : السكر علي عليها جدا و لولا انك جبتوها في الوقت ده كان ممكن متكونش معاكم دلوقتي بس الحمدلله بقت كويسة
نور :الحمدلله انا هدخل أشوفها

عمرو بص لحسام و سمر

عمرو :عايزك
سمر :  ايه
عمرو : بنتي هتعيش معايا و من غير اي رفض او موافقة بدل نروح محاكم و نرفع قضية بالذوق البنت ترجع تعيش معايا انا مش مستغني عن بنتي ولا تهديدات جوزك ده و لو هي طلبت لو يعني تشوفك هبعتهالك غير كدا لا
سمر : حرام عليك انا كنت هموت عليها
عمرو بنرفزة :وانتي مش حرام عليكي .. البنت كانت في لحظة مش هتكون معانا
_____________________________________
عمار في مكتبه و اتصل ب شاهيناز

عمار : انا برضو استغربت كنت فاكرها هتوافق بس  طلعت بتحب ابنك جدا
شاهيناز : انا متشكرة اوي يا عمار .. يعني البنت فعلا بعيدا عن الموقف ده هي كويسة ؟
عمار: جدا و صدقيني مش هتندمي انك هتناسبيها
_____________________________________
في المساء
في أوضة شاهيناز
شاهيناز بصوت عالي :انت جيت يا عدي
اسلام دخل الأوضة : لا يا ماما انا اسلام عدي دخل اوضته
شاهيناز : طيب انت جيت يا حبيبي
اسلام : جيت؟ لالا لسة برة يا ماما
شاهيناز :اتريق علي مامتك اتريق ... روح ابعتلي اخوك ولا اقولك انا هروحله
اسلام :طيب

دخلت شاهيناز اوضة عدي كان قاعد علي مكتبه و فاتح اللابتوب

شاهيناز : ممكن اتكلم معاك شوية يا حبيبي
عدي :اكيد طبعا يا ماما اتفضلي
شاهيناز :هو انت بتحبها ؟
عدي :جدا علي فكرة يا ماما هي بنت كويسة جدا و ...
شاهيناز قاطعته : اتصل بيها و حدد ميعاد مع أهلها نروح نخطبها

عدي تنح دقايق و بيحاول يستوعب اللي مامته قالته

عدي : ماما هو بجد اللي قولتيه ده
شاهيناز : اومال يعني كرتون
عدي:الواد اسلام و البت نور علموكي القلش
شاهيناز ضحكت : يلا كلمها
عدي حضنها و باسها من رأسها : انتي بتتكلمي بجد
شاهيناز : أيوة بتكلم بجد البنت دي باين عليها كويسة و سألت عنها
عدي : والله العظيم انا بحبك
شاهيناز : ربنا يخليك ليا انت و اخواتك
_____________________________________
تاني يوم

في كافيه

عمرو : اسمع يا حسام انا جاي عشان اعمل معاك صفقة كويسة جدا .. انت دلوقتي مش معاك اي فلوس بس في ايدك تعمل حاجات تديك فلوس
حسام :اللي هي ؟
عمرو : شيك ب 3 مليون جنيه  .. مقابل انك تمضي سمر علي تنازل بالشركة و المصنع و الفيلا ليا .. كدا كدا انت مش كسبان حاجة والشركة و المصنع واقفين عشان مفيش فلوس بتديرها و الفيلا سمر مش هتبيعها عشان تديك فلوس لأنها واثقة لو اتباعت انت هتاخد الفلوس ليك تصرفها ع الفاضي.. ها قولت ايه ؟
حسام : موافق اهو الواحد يكون مطلعش من المولد بلا حمص
_____________________________________
كانت قاعدة في النادي مع روان و مرة واحدة سابتها و راحت الحمام شافته قدامها و اول ما شافته افتكرت كل حاجة في اليوم ده دموعها نزلت منها و كانت هتقوم قعدها تاني

اسلام : ندي انا اسف .. انا معرفش ولله ايه اللي حصلي و خلاني اعمل كدا اليوم ده

بيمسح دموعها اللي بتنزل بعدت ايديه عنها

اسلام :ردي عليا يا ندي كفاية كدا .. عشان خاطري طب كفاية عياط
ندي :ملكش خاطر عندي .. انا خلاص بقيت بكرهك
اسلام :انا عارف ان انا غبي و حيوان و كل اللي يجي في دماغك بس ولله العظيم بحبك .. صدقيني يا ندي دي اول مرة في حياتي اعمل كدا

قربت منه مرام في اللحظة دي

مرام : علي فكرة هي بتعيط و مش عايزة تقعد معاك مش بالعافية يعني
اسلام بنرفزة:انتي هنا كمان عايزة مني ايه
مرام : إسلام قوم معايا و كفاية مشاكل بقي
اسلام زقها و مشي ورا ندي اللي قامت من علي الترابيزة

اسلام :حرام عليكي كفاية .. ردي عليا .. كلنا بنغلط
ندي :بس مش اي غلط انت جرحتني .. انا خلاص مبقتش بحس معاك بالأمان بقيت بخاف منك عارف يعني ايه بخاف منك
_____________________________________
في شقة حسان

نور : بقولك يا حبيبي هو انت ليه مأذتش باسل و هاني مع انهم اذوك كتير قبل كدا و بايدك تأذيهم
عمرو : لان مش من طبعي الغدر ولا الخيانة .. و دول عملولي حاجة و انا اديتهم كلمة اني مش هعملهم حاجة مع ان كان في ايديا أذيتهم بس زي ما قولتلك الغدر مش طبعي
_____________________________________
حسام حط لسمر مخدر في العصير قبل ما تشربه

حسام : اتفضلي يا حبيبتي العصير بتاعك
سمر : غريبة اول مرة أنت تجيبه
حسام : ليا من غيرك يا سمورتي

شربت سمر العصير و بعد ساعة كانت فقدت الوعي لكن عينيها مفتحة مضاها حسام علي الورق و شاله
_____________________________________
في أوضة اسلام كان قاعد عمرو و نور معاه

عمرو : طب ازاي انت كنت شارب حاجة
اسلام : لا مشربتش غير عصير جوافة
نور : من مين؟
اسلام : معتز
عمرو :طب ما يمكن كان حاططلك حاجة في العصير
اسلام : لا طبعا ده صاحبى هيحطلي ايه يعني
عمرو : إسلام هو انت ...

و سكت و بص ل نور و اسلام فهم

اسلام :اطلعي برة يا نور
نور :ما تتكلموا قدامي
اسلام : قولت اطلعي برة ده كلام مينفعش تسمعيه لما تكبري بقي
نور  : اممممم طيب

خرجت نور و عمرو كمل كلامه

عمرو: بقولك انت جربت قبل كدا تاخد
اسلام قاطعه بصوت منخفض جدا : هشششش استني
عمرو : في ايه
اسلام : نور بتصنت
عمرو : ازاي دي خرجت
اسلام : هثبتلك دلوقتي

فتح الباب مرة واحدة نور وقعت علي الارض  و اسلام مسكها من شعرها

نور باحراج:اصل انا كنت هخبط ف لقيتك في وشي
اسلام : متكررش تاني ها

خرجت نور و اسلام قعد جنب عمرو

عمرو : انت عرفت ازاي
اسلام : دي اختي وانا حافظها .. كمل
عمرو : مش يمكن لسة واقفة
اسلام:لا.. كمل
عمرو:طيب بص يا معلم انا كنت بقولك انت جربت قبل كدا اي نوع منشطات أو فياجرا
اسلام : لا طبعا بس انت ايه اللي خلاك تفكر في كدا
عمرو : لان ممكن يكون شربت حاجة فيها برشام زي ده عموما احنا هنروح نعمل تحاليل و نتأكد
_____________________________________
يوم خطوبة عدي

في أوضة اسلام كان عمرو قاعد مع اسلام و بيلبس عنده

نور : البس الكرافتة دي
عمرو:ما هي دي حلوة يا حبيبتي
نور بغضب:ماليش دعوة البسها عشان تليق مع فستاني الأحمر

شاهيناز بصوت عالي من اوضتها: يا اسلااااام
اسلام : اما اشوف ماما عايزة ايه

خرج اسلام

عمرو شد الكرافتة بتاعته و قلعها و نور مسكت الكرافتة الجديدة و رفعت رجلها عشان تطوله و مش عارفة

عمرو شالها و قعدها علي التسريحة
عمرو : اقعدي هنا يا اوزعة عشان تعرفي تطوليني
نور ضحكت و هي بتربطله الكرافتة: انا مش اوزعة انت اللي طويل
عمرو بيقرب منها : هو انتي مالك حلوة انهاردة كدا ليه ؟
نور : مش عارفة اربطها اسكت بقي
عمرو غمزلها: ما تجيبي ها
نور: عمرو اسكت بقي و بعدين مش راضية تتربط ليه دي

دخل اسلام في اللحظة دي

اسلام بنرفزة: انتي ايه مقعدك علي التسريحة كدا
نور : اصل .. كنت بربطله الكرافتة و مش طايلاه
اسلام :اطلعي برة يا بت وانت ارجع مكانك
عمرو :علي فكرة احنا مخطوبين
اسلام :اديك قولت مخطوبين يعني مش من حقها تربطلك الكرافتة
_____________________________________
في بيت فاطمة
عدي بيلبسها الدبلة

عدي: مبروك يا حبيبتي
فاطمة : الله يبارك فيك
عدي : بحبك
فاطمة :انا مش قادرة أصدق كل حاجة تمت بسرعة و مامتك اقتنعت بسرعة
عدي : شكل المقابلة بتاعتك جابت نتيجة
_____________________________________
تاني يوم

في الشارع

حسام :الورق معايا بس الفلوس الأول
عمرو : اتفضل الشيك اهو

حسام اعطاله الورق

عمرو:كدا تمام جدا ..
_____________________________________
في أوضة اسلام

اسلام : جبت نتيجة التحاليل و الدكتور قالي ان انا اخدت منشط قوي فعلا ... معقولة معتز يعمل فيا كدا بس ليه ؟
نور :لان ببساطة معتز من الأول اصلا بيقول لمرام كل حاجة عنك متستغربش دلوقتي عشان عمل حركة زبالة زي دي
عمرو : وريني التحليل ده
اسلام : ليه
نور :هنروح لندي طبعا و نقولها علي الأقل تعرف انك مش وحش و ان دي كانت لعبة
_____________________________________
حسام راجع الفيلا بالعربية وقفوه بلطجية بأسلحة

_اقف يا عمنا
= أنزل يابا انزل يا حبيبي متخافش
حسام نزل من العربية :ايه انا مش معايا فلوس ولله
_فتشوه يا رجالة

اتنين فتشوه و واحد شاف الشيك و بدله بشيك تاني بامضاء باسم مختلف عن اسم جد عمرو

حسام : ده شيك شغل سيبه
_لا ميلزمناش ده شوفو يمكن معاها حاجة في العربية
حسام : مش معايا يا عم انت و هو امشوا بقي
_____________________________________
تاني يوم
راح اسلام ل معتز في شقته و اتفاجأ بوجود مرام

اسلام : الله.. ده الحبايب متجمعين
معتز بيبلع ريقه: اس اسلام
اسلام : ايه ياض مالك في ايه .. ازيك يا مرام
مرام : انا بس كنت جاية ل معتز عشان كان عايز شغل لواحد صاحبه يعني و ..
اسلام قاطعها: أيوة عارفه الشغل ده .. بس شغل علي تقيل يا صاحبي .. عارف يا معتز كانت آخر حاجة اتوقعها انك تطلع بالوساخة دي

قرب منه مرة واحدة و مسكه من لياقته لدرجة أنه كان ممكن يتخنق .. و مرام خافت و نزلت جري

معتز: إسلام احنا كنا
اسلام بعصبية: كنتوا هتضيعوا بنت.. بنت مالهاش ذنب هتضيعوا مستقبلها
معتز : والله ابدا يا اسلام انا كنت لسة هطلع افتحلها لقيتها نزلت تجري بس ولله كنت هنقذها صدقني
اسلام : كنت ايه؟ هتنقذها و افرض كان حصلها حاجة و ملحقتش كان هيحصل ايه
معتز:ما انت كدا كدا بتحبها يعني كنت هتتجوزها و غير كدا اصلا مرام قالتلي اطلع بسرعة كان كل هدفها بس ان مفعول البرشام يشتغل و ندي تكرهك
اسلام : بس انت صاحبي يلا ليه عملت كدا
معتز: الصحوبية حاجة و المصالح حاجة تانية

اسلام سابه و قعد علي الكرسي : انت صح... لا بجد انت صح مفيش صحاب بجد في الزمن ده غير نادر اوي و فعلا المصالح ممكن تيجي علي العشرة و الصحاب.. بس قسما بالله يا معتز لو مرام حاولت تقرب مني تاني او تعمل حاجة .. مش هقولك هعمل فيها ايه هتكون مفاجأة
___________________________________
في النادي

عمرو : دي كل الحكاية و التحاليل قدامك اهي تقدري تتأكدي
روان : بجد مرام دي طلعت زبالة اوي
ندي : طب اسلام فين
نور : في البيت
ندي : هاجي معاكي ممكن
نور :اكيد طبعا
_____________________________________
نور دخلت لاسلام الأوضة

نور  : إيسو .. في ضيوف معايا
اسلام بخنقة : مش عايز اشوف حد
نور شاورت لندي تدخل: تعالى يا ندوش

ندي قعدت جنبه علي السرير

نور : طيب انا هعملكم عصير

خرجت نور من الأوضة

ندي :وحشتني اوي
اسلام :نعم
ندي : انا عرفت كل حاجة خلاص
اسلام :بعد ايه ؟ بعد ما بعدتي عني و قولتي بقيت بخاف منك
ندي : إسلام في ايه انا مكنتش اعرف ان ده غصب عنك
اسلام: و دلوقتي عرفتي
ندي :في ايه.. مالك ! هو انت مبقتش تحبني .. رجعت لمرام صح
اسلام ضحك:  رجعت لمرام ايه يا هبلة انتي هو انا كنت معاها اصلا عشان ارجعلها
ندي : وحشتني
اسلام : وانتي كمان
ندي :قوم بقي البس و نخرج
اسلام : لا مش قادر
ندي فتحت الدولاب: لا هتخرج هختارلك حاجة تلبسها بدل ما انت مكتئب كدا
_____________________________________
عمرو اتصل بميار

عمرو: ميار انا عايزك تعرفي سمر خيانة حسام مع البنات اللي في الشركة
ميار: اوكيه بس ازاي
عمرو :هقولك
_____________________________________
تاني يوم
في مكتب ميار

ميار : يا رحمة عشان خاطري وافقي مش هياكلك
رحمة: انتي عارفة بكره حسام ده يخربيت تقل دمه
ميار: اللي هنعمله ده هيخلينا نخلص منه ولله و نرتاح من قرفه
رحمة : طيب بس مش هطول
ميار :اول ما ارنلك تطلبيه يجيلك  و هو ما  هيصدق انك عبرتيه
_____________________________________
ميار دخلت مكتب نجلاء 

ميار : نجلاء كنت عايزة اتكلم معاكي
نجلاء : اتفضلي
ميار : قوليلي يا نوجا يا حبيبتي هو انتي فيه حاجة بينك و بين حسام
نجلاء بتوتر :  نعم ! حاجة ايه لا مفيش حاجة و بعدين انتي جبتي الكلام ده منين
ميار :ابدا ده من 3 في الشركة شافوكي معاه كذا مرة وبصراحة وانا كمان بس متقلقيش دول حبايبي و قولتلهم محدش يطلع السر ده برة
نجلاء : سر ايه انا مفيش بيني و بين حسام ده حاجة و كلامنا بيكون شغل و بس
ميار : الحمدلله طمنتيني
نجلاء :طمنتك ليه ؟
ميار :اصل حسام بيجري ورا المهندسة رحمة زميلتي و بيحاول يرتبط بيها بس هي مش بتديله وش لحد ما وقع
نجلاء : انتي كدابة
ميار:وانتي ايه اللي ضايقك
نجلاء : الكلب الحيوان  ... ده معشمني انا كمان بالجواز بعد ما ينفصل من سمر
ميار بدهشة:هو هيطلقها
نجلاء : اه بس انتي بتكدبي ولا بتتكلمي جد
ميار  : لو مش مصدقاني تعالي دلوقتي المكتب و هتشوفيه و هو بيكلمها بس من بعيد عشان ميشوفناش ده انا حتي سيبتلهم المكتب و جيت لما هو طلب مني كدا

خرجت نجلاء مع ميار و وصلت عند المكتب من برة و كان حسام قريب من رحمة و بيتكلم و يهزر معاها و باين انه معجب بيها

نجلاء : الحيوان بيكدب عليا و مقضيها مع كل واحدة شوية ولله ادخل اطربقها علي دماغهم
ميار :لالا اللي هتعمليه ده أكبر غلط تعالي معايا الكافتيريا كدا و نتكلم علي رواقة و هقولك تاخدي حقك منه ازاي لكن بالطريقة دي هيقولك غوري من وشي موعدكتيش بحاجة
_____________________________________
في مكتب سمر

سمر مصدومة: انتي متأكدة ولا بتكدبي عليا
نجلاء : انا ممكن اثبتلك ان كل حرف بقوله صح .. اتصل بيكي و هو معايا و اسمعك كل كلمة بيقولها
سمر :وانتي ياختي ايه اللي فوقك و خلاكي تيجي تقولي
نجلاء : لان لقيت انه مش معايا انا بس مع نص بنات الشركة و حضرتك نايمة علي ودانك قولت اجي اقولك
سمر : ماشي

سمر لنفسها : بس وديني يا حسام لو طلع كلامها صح لهيكون آخر يوم في عمرك .. كدا حسابك تقل اوي
_____________________________________
عمرو اتصل ب سمر

عمرو : كنت متصل عشان اقولك ان بمساعدة حسام اخدت منك الفيلا و الشركة و المصنع مقابل مبلغ صغير اخده و قريب اوي هيطلقك
سمر :انت كداب
عمرو : هبعتلك صور امضتك علي الواتساب

قفل معاها و بعتلها الصور و فعلا كانت امضتها حست أنها هتتجنن

سمر :والله العظيم ما هسيبك يا حسام
_____________________________________
اتصلت عليها نجلاء و فتحت و بدأت تسمع سمر كلامه معاها

نجلاء : بس انت شكلك مطول مع سمر
حسام بيضحك : لالا مطول ايه بكرة الحد هروح عشان اقبض الشيك اللي معايا و هطلقها
نجلاء بدلع:طب و بعد ما تطلقها هتعمل ايه ؟
حسام : هتجوزك انتي طبعا يا مزة
نجلاء : يعني انت بجد يا حبيبي مش بتحبها
حسام : أحب مين الراجل ميحبش الست الرخيصة انا بس كنت معاها لحد ما فلوسها خلاص طارت ف قولت اخلع .. انا كنت بحب فلوسها بس
_____________________________________
في شقة حسان

ندي : طنط شاهي  ازيك ...
شاهيناز : اهلا يا نودي يا حبيبتي اتفضلي
ندي : حضرتك بتعملي ايه ! تحبي اساعدك؟ 
شاهيناز : لا ابدا يا حبيبتي في المطبخ بعمل الاكل
ندي :اومال فين نور و اسلام
شاهيناز :نور في اوضتها  و اسلام في اوضته بس نايم
ندي : طيب هروح لنور
شاهيناز : ماشي يا حبيبتي وانا في المطبخ لو احتاجتي حاجة

دخلت شاهيناز المطبخ و ندي دخلت بهدوء اوضة اسلام قربت منه و قعدت جنبه علي السرير كان لابس شورت بس و مش لابس اي تيشرت

ندي : إسلام .. قوم
اسلام قام مخضوض :ندي انتي بتعملي ايه هنا ؟
ندي بنرفزة : جاية اعرف مين البنت اللي متصور معاها علي الانستجرام و عاملالك تاج
اسلام  : انتي اتجننتي ازاي دخلتي اوضتي
ندي :انت اللي مجنون دي كانت ماسكة نفس الازازة بتاعتك
اسلام : دي كانت زميلتي في الجامعة و اتصورنا كلنا
ندي :و تتصور معاك ليه
اسلام فتح الدولاب و طلع بنطلون يلبسه :يا بنتي مينفعش تفضلي هنا عيب
ندي بتشد البنطلون من ايديه : يعني ايه تتصور معاها
اسلام بعصبية : طب اطلعي بس هلبس و نتكلم برة مينفعش كدا
ندي شدت البنطلون من ايديه : اومال ينفع ايه ؟ ينفع تتصور مع بنات غيري
اسلام :خديه يا حبيبتي البنطلون مش عايزه ... يا مااااما

شاهيناز دخلت في اللحظة دي هي و نور

شاهيناز : ندي انتي بتعملي ايه هنا ؟
نور شهقت:  وانت ازاي مش لابس حاجة
اسلام : انا لسة صاحي لقيتها قدامي و ملحقتش البس خدي ندي طلعيها برة دلوقتي
ندي :ماليش دعوة لازم اعرف مين البنت دي
شاهيناز : طب تعالي دلوقتي برة يغير هدومه حتي
ندي : طب خليه يقولي مين البنت دي
اسلام: انتي مجنونة مانا قولتلك زفت زميلتي
ندي  :و زميتلك تمسك نفس ازازتك
اسلام بنزفزة: كانت عايزة تشرب ايه امنعها؟
_____________________________________
سمر لبست أشيك فستان عندها و عملت تسريحة حلوة لشعرها و ميكب و كانت فعلا جميلة كان حسام دخل الفيلا و انبهر بجمالها

حسام قرب منها و حضنها  :ايه الحلاوة دي يا روحي
سمر : ايه رأيك
حسام : قمر طول عمرك
سمر : استني بس .. هجيب كوبايتين شمبانيا

دخلت المطبخ حضرت كوبايتين و طلعت قدمتهوله
حسام بيشرب  : اومال الشغالين فين
سمر :قاعدين في الأوضة اللي في الجنينة
حسام : احسن برضو ما تيجي نطلع فوق
سمر : مش وقته يا حبيبي .. صحيح يا حوس ايه اكتر حاجة بتحبها
حسام : انتي طبعا
سمر : و ايه كمان
حسام :و الفلوس .. الفلوس دي اكتر حاجة بحبها

بعد دقايق كان حسام بدأ يصدع  و بطنه وجعته

سمر :مالك يا حسام في ايه
حسام :مش عارف حاسس ان انا عندي صداع و دايخ
سمر :بعد الشر عليك يا حبيبي
حسام : ااااااه مش قادر .. اطلبيلي دكتور
سمر : لا مش هطلب دكتور
حسام  : حرام عليكي انا بموووت
سمر : ما انت هتموت فعلا يا حبيبي بس عشان انت بتاعي انا مرضتش حد يموتك غيري الشمبانيا كان فيها سم يا حسام
حسااام : ااااااه
سمر طلعت سكينة و لبست جوانتي

سمر :بس الظاهر ان السم لوحده مش هيبرد ناري .. السكينة دي كمان هتبردها

غرزتها في بطنه و هو صرخ

سمر :ليه خونتني .. بيعتني يا حسام لعمرو و بتخوني ده انا عملت كل ده عشانك .. سيبت عمرو و اتجوزتك و وافقت اخد منه كل حاجة  عشان اكون معاك .. عملت ايه عشان تبيعني يا ابن الكلب .. بس انت السبب انت السبب وانا مبقتش عارفة اعمل ايه فقتلتلك

حسام بيتألم و بيصرخ من الوجع

سمر بتضحك و دموعها غرقانة علي وشها: محدش هيسمعنا انا قافلة كل الشبابيك و الباب

مرة واحدة حسام صرخ جامد وصوته راح و سمر مسكت ايديه حطت رأسها عند قلبه عرفت انه خلاص مات

سمر بتفوقه: حسام .. حسام قوم كلمني ... حسااام

بتضربه بالقلم علي وشه
سمر بتخبطه يصحي:حسااام قوم .. كلمني مش انت من شوية كنت بتتكلم .. انت مموتش لا .. انت مموتش يا ابن الكلب انت اللي خلتني اعمل كدا .. يا نهار اسود اعمل ايه .. قوووم حرام عليك

مسكت موبايلها و هديت شوية و اتصلت ب عمرو

سمر : أيوة يا عمرو .. انا خلاص عرفت ان حسام بيخوني و هنتطلق .. كلمتك عشان تيجي تستلم الفيلا خلاص بس طالبة منك تخليني اشوف بنتي حتي لو كل شهر مرة ... ماشي تعالي دلوقتي .. مش مهم تجيب حاجتك دلوقتي .. انا هروح في بيت بابا القديم بس كلمتك عشان اديلك مفاتيح كل حاجة ماشي سلام مستنياك
_____________________________________
دخل عمرو الفيلا و لسة هيرن الجرس كان الباب مفتوح دخل و لسة هينادي علي سمر اتفاجأ بحسام علي الارض

عمرو : حسام انت ايه اللي عمل فيك كدا

من غير ما يقصد لمس السكينة و هزه كان فاكر لسة فيه روح

نزلت سمر في اللحظة دي

سمر : انا اللي عملت فيه كدا .. ولو متنازلتش دلوقتي حالا علي كل اللي معاك هبلغ البوليس و اقولهم ان انت اللي قتلته
عمرو : انتي مجنونة
سمر : لا مش مجنونة  ... قدامك 5 دقايق يا ترد يا اما البوليس لما يجي اقولهم ان انت ولو رفضت هقول حرامي
عمرو : وانا مش هتنازل عن حاجة

كان لسة هيخرج لقي البوليس قدامه

سمر :هو ده اللي قتله يا فندم
الظابط :هاتوه
عمرو بعصبية :تاخده مين يا عم مش انا اللي قتلته هي مش انا ولله
_____________________________________
في أوضة ندي
حسين : عاملة ايه يا حبيبتي
ندي : كويسة
حسين :يعني لما انا اقرب انتي تبعدي
ندي: عشان قربك بقي متأخر اوي
حسين : انتي لسة زعلانة مني ولا زعلانة عشان رفدت اسلام من شغله
ندي : هو عملك ايه يعني .. انت تعرف ان اسلام ده كان معايا يوم ما دخلت المستشفى و اغمي عليا و انت و ماما مفكرتوش تتصلوا تطمنوا عليا .. انت تعرف ان اسلام ده حصلي حوار سرقة كدا

( حكتله ندي الحدثين بالتفاصيل )

حسين : ده طلع جدع و راجل عموما انا هصلحله موضوع شغله ده
ندي :ازاي بس ده موقوف
حسين : متقلقيش هعوضه بأحسن من كدا
_____________________________________
في مكتب الظابط

الظابط :طيب انا هسيبكم معاه
ياسين : متشكر جدا يا باشا

خرج الظابط و نور جريت عليه حضنته
نور : انت كويس طمني عليك ؟
عمرو : خايف اوي
نور : تعالي انا جبتلك ياسين
عمرو : ياسين ؟
ياسين :اه مانا محامي
عمرو : كل ما كنت بقول خلاص اتحلت الاقيها اتقفلت في وشي زيادة
نور : متقفلتش ولا حاجة
عمرو :ازاي بس يا نور و بصماتي علي سلاح الجريمة و الشغالتين سمر هددتهم يشهدوا ضدي
نور :خلاص يا حبيبي اتنازلها عن كل حاجة انا كفاية عليا انت مش عايزين اي فلوس
عمرو: بعد كل اللي عملته ده ..
ياسين : بس بصراحة يا عمرو انت قتلته
عمرو : ولله العظيم ما قتلته .. نور انتي مصدقاني؟
نور :اكيد مصدقاك طبعا  .. العينين دي مستحيل تفكر تقتل
عمرو :يا حبيبتي القاضي و الحكومة ملهومش دعوة بالعينين مش بياخدوا بيهم
نور : اومال بياخدوا بإيه
عمرو بص ل ياسين :قولها يا متر بياخدوا بإيه
ياسين :مش وقت هزار اهم حاجة دلوقتي نكسب وقت من هنا لحد يوم الجلسة نفكر في حل
_____________________________________
وبعد حبسه اربع ايام و تجديد اسبوعين و عرض علي النيابة

يوم الجلسة _ في المحكمة

ياسين: موكلي راح لبيت المرحوم بسبب مكالمة من طليقته و لما راح اتفاجأ انه مقتول لكن هو متقلهوش
المستشار : نسمع رأي الشهود نادي علي الشاهدة رقم 1
..... : مروة محمد حسين
الشغالة 1 ( مروة ) : أيوة يا باشا
المستشار :قولي ولله العظيم اقول الحق
مروة: ولله العظيم اقول الحق
المستشار : عمرو فعلا قتل حسام ؟
مروة : أيوة يا باشا و كان قبلها بيوم عندنا و اتخانق معاه و هدده و هددنا لو فتحنا بوقنا هيقتلنا
عمرو بعصبية : كدابة ولله العظيم عمري ما شوفتها

المستشار : سكوووت  .. نادي علي الشاهدة التانية
..... : صفية محمود سعد
المستشار: انتي كنتي مع مروة يا صفية مش كدا ؟
صفية : أيوة  و فعلا البيه قتل الأستاذ حسام

المستشار الحكم بعد المداولة 

ياسين : ان شاء الله خير يا عمرو
عمرو : خير ازاي بس ده كل  حاجة ضدي

..... : محكمة
المستشار :بعد الاطلاع علي اقوال الشهود حكمت المحكمة حضوريا علي المتهم عمرو أحمد ماجد السعدني لتحويل أوراقه الي فضيلة المفتي بتهمة القتل العمد

يتبع ......