رواية نقطة و سطر جديد (الحلقه الثالثه)

الفصل الثالث
(معلش اقروا الفصل مرة تانية عشان نزل مش كامل و مسحته )

نور دموعها بتنزل منها من الرعب و الخوف بتندم علي أنها اخدت العربية مع أنها مش اول مرة تسوق بتفكر لو عمرو حصله حاجة هي هيضيع مستقبلها لكن استعاذت من الشيطان و شافت الدكتور خارج من الغرفة جريت عليه سألته

نور بلهفة : دكتور والنبي قولي هيعيش يا دكتور ؟
الدكتور ضحك و بصلها : هيعيش متخافيش ده عنده خدش و كدمات شكله بيتدلع اصلا هو بس اغمي عليه من الخضة عموما هو شهر أكتوبر كدا كل يوم حادثة مش عارف ليه
نور : ااه طيب يعني هو دلوقتي كويس
الدكتور : ايوة تقدري تدخليله
نور : طب هو هيخرج امتي
الدكتور : ممكن بكرة عن أذنك

دخلت الغرفة اللي فيها عمرو كان فاق وقتها

نور : انا اسفة بجد بص ده رقمي لو عوزت نتكلم في اي تعويض انا موافقة بس بلاش محضر من فضلك
عمرو : لا انا اللي اسف ماخدتش بالي من الطريق للاسف و بعدين تعويض ايه بس دول يدوب كدمات و خدش
نور بتلقائية : احم شكرا  بجد ااه نسيت اقولك انا حطيت خطك في موبايلي و جربت اتصل علي اي تعرفه ف كان متسيف رقم sweetheart قولت تلاقيها خطيبتك او مراتك
عمرو بعصبية : انتي غبية انتي ازاي تكلميها اهو الحادثة اللي حصلتلي ارحم من انك تكلميها قالتلك ايه يعني
نور : انا اسفة علي العموم هطمن عليك وقت تاني مع السلامة
عمرو : يوووه استني يا .. استني
نور دخلت الغرفة تاني
نور : نور اسمي نور
عمرو : وانا عمرو المهم هي قالتلك ايه
نور : قالتلي معرفش صاحب الرقم ده و قفلت السكة في وشي
عمرو ضحك ضحك هيستيري و بعدها دموعه نزلت قربت منه و عرفت أنها عملت حاجة غلط هي مكنش ينفع تتصرف كدا لعنت نفسها علي التصرف ده كانت تستني لحد ما يفوق

نور : انا اسفة حقيقي
عمرو بيمسح دموعه : لا انا اللي اسف اني اتعصبت عليكي انتي مالكيش ذنب اصلا
نور : طب هو الدكتور قال انك هتخرج بكرة انا لازم امشي عشان إتأخرت و هجيلك بكرة
عمرو : ماشي
نور : حاول تنام واضح انك مرهق

خرجت نور من الغرفة
حس بوجع و هو بيتحرك لكن حاول ينام مش عارف الصدمة كان وجعها أكبر بكتير من الحادثة كان بيقول لنفسه ياريتني ما كنت عملتلها توكيل طب مين كان هياخد بالو من الشغل هو يارب اللي بيعمل خير بيكون جزاءه كدا هو الشر دايما بينتصر يارب

اما نور دخلت الاستقبال في المستشفي و كلمت الموظفة

نور : انا هسيبلكم فلوس تحت الحساب

تاني يوم راحت المستشفي و سألت الدكتور قالها ان عمرو حالته كويسة و يقدر يخرج انهاردة
دخلت نور ل عمرو و قالتله انهم خارجين

عمرو : هو عربيتك حصلها حاجة
نور بتلقائية : مش مهم العربية المهم انت  .. احم لا العربية بخير مفيش حاجة
عمرو : طيب انا هدفع الحساب للمستشفي و اخرج
نور قاطعته : لا لا انا خلاص دفعت كل حاجة
عمرو : دفعتي كام
نور : مش لازم يعني عموما خلاص الحوار انتهي تسمحلي اوصلك
عمرو : ممكن تقولي دفعتي كام
نور : يا عم ده مبلغ تافه ليا عندك عزومة بقى بيهم
عمرو : علي اساس أننا هنتقابل تاني
نور : اكيد لو لينا نصيب المهم دلوقتي انا هوصلك المكان اللي تحبه
عمرو : تمام

خرجوا من المستشفي و قبل ما عمرو يركب معاها وقف بعيد و اتصل في اللحظة دي علي واحد صاحبه

عمرو : باسل ازيك بقولك هو ينفع اجي عندك كام يوم حصل معايا مشاكل كتير
( حكاله عمرو علي كل اللي حصل من سمر و هاني )
باسل : ولله يا عمرو مش هعرف عشان هبة مش هتوافق و غير كدا صعب ف لو عرفت هكلمك تاني و اقولك
عمرو : انا فاهم طبعا طب مينفعش مثلا اقعد في شقة مامتك القديمة
باسل : ها لا اصل الشقة دي مفتاحها مش معايا مع اخويا و هو دلوقتي مسافر انت عارف
عمرو بحزن: اااه متشكر اوي سلام

ركب معاها
نور : ها صاحبك قالك ايه
عمرو : مش هينفع ابات عنده
نور : شكله نفضلك
عمرو : نعم! يعني ايه ؟
نور : نفضلك مش عارف معناها اممم واضح انك ابن ناس الصراحة بالساعة و اللبس و الموبايل ده
عمرو ضحك : هو انتي بتوصفيني ولا بتحسديني
نور : لا احسد ايه بس ده انا عيني عليك باردة
عمرو : اه ما هي باردة فعلا
نور : بتقول حاجة يا عمورة
عمرو : لا
نور : و بعدين بقي يا عم الغاضب انت يعني انت معندكش بيت طيب ولا اهل
عمرو : تعرفي تسوقي وانتي ساكتة ممكن
نور : لا مبعرفش
عمرو : طيب
نور : للدرجة دي دمي تقيل
عمرو : انا اللي مش عايز أضحك
نور : طب هنلف القاهرة كلها ولا ايه
عمرو : اقفي كدا عند اي ماكينة صرف

ركنت نور قدام ماكينة الأموال ATM و دخل الأرقام السرية و كان موجود فيها 100 جنيه افتكر انه نسي يملاها فلوس خبط ايديه في الحيطة و ركب معاها العربية و هو مخنوق
نور : مالك في ايه
عمرو : مش معايا غير 1000 جنيه بس حتى مش هعرف احجز في اي اوتيل
نور : طب انا معايا فلوس عايز كام عليهم
عمرو : لا طبعا ايه اللي بتقوليه ده مينفعش اخد منك حاجة طبعا
نور : و مين قالك اني مش هاخدهم منك تاني هترجعهم ع فكرة
عمرو ضحك : انتي جدعة اوي علي فكرة
نور : بص دلوقتي نشوف اي اوتيل فاضي تمام
عمرو : ماشي

دخلوا كام فندق قريبين في المكان اللي هما فيه و كلهم أسعارهم غالية علي فلوس نور وصلت نور بعرييتها ل فندق و ركنت العربية و نزلت معاه وقفوا عند كاونتر الاستقبال

عمرو :ممكن حضرتك تحجزلي غرفة
الموظف نظر لحظات للكمبيوتر : للاسف يا فندم مفيش ولا غرفة فاضية
عمرو : اوف ايه الحظ ده يا اما اخد جناح كامل يا مفيش مكان هو كل اوتيل كدا
الموظف : عشان الهاي سيزون و كدا يا فندم
عمرو : طب اعمل ايه دلوقتي انام في الشارع
الموظف : ممكن حضرتك تشوف اي فندق تاني
عمرو : ارجوك انا مستعد اعمل اي حاجة عشان انام الليلة دي
نور : عمرو تعالي خلاص

خرجوا من الفندق و ركب معاها العربية
عمرو : اعمل ايه يعني يا نور
نور فكرت لحظات : بص انا هعمل حاجة بس انا عارفة أنها غلط لكن مش قدامنا حل غير كدا بس بالله عليك وحياة اغلي حاجة عندك ما
عمرو قاطعها:نور انتي عايزة تعملي ايه
نور مسكت مصحف صغير موجود في العربية
نور : امسك المصحف ده و احلف انك مش هتقرب مني ولا هتعملي حاجة انا هخليك تبات عندي الليلة دي
عمرو : ازاي طب و اهلك
نور : انا حاليا قاعدة في شقة بنت خالتي و بعد بكرة هرجع شقتنا ها هتحلف ولا لا
عمرو : حاضر هحلف

مسك المصحف و حلف انه مش هيقرب منها ولا هيخونها و هي كانت حاسة انه صادق وصلت العمارة و طلع معاها الشقة

نور : نام في أوضة الأطفال دي
عمرو : طب نور انتي هتنامي على طول
نور : أيوة عايز حاجة
عمرو : ها لا تصبحي علي خير
نور : عمرو انت جعان ؟
عمرو : لا
نور : بجد
عمرو : بصراحة اه
نور ضحكت : هدخل احضرلك العشا وانا كمان جعانة .. عمرو
عمرو بصلها: ايه
نور : مش ناوي تحكيلي حكايتك
عمرو : مش لازم

نور دخلت المطبخ و جهزت اكل ليها و لعمرو اكل حاجة بسيطة بالرغم من انه جعان لكن مقدرش يأكل كل ما يفتكر اللي حصله طب هيعمل ايه الفترة الجاية هيعيش فين بعد الليلة دي صرخ مرة واحدة بصوت عالي

عمرو : ليه مش موتيني ليه الحادثة كانت بسيطة حرام عليكي ياريتني كنت مت
نور خافت من صوته : في ايه حرام عليك بتقول كدا بيه بعد الشر عليك
عمرو : مفيش شر ليه يارب يحصل فيا كدا هو انا استاهل استاهل يارب
نور : اهدي يا عمرو مش كدا طب احكيلي فيك ايه وانا اساعدك.
ضحك بسخرية : تساعديني ازاي يعني هتجيبيلي ....
نور : انت مش عايز تحكي ليه ولله اعتبر بتكلم نفسك
عمرو : انا داخل انام

كان عندها فضول تعرف ايه حكايته طب فين اهله مش لابس دبلة في ايديه عشان تعرف هو متجوز ولا خاطب طب مين صاحبة الرقم اللي قالتلها معرفهوش أسئلة كتير جواها مالهاش اي إجابة هو الوحيد اللي يقدر يجاوبها قررت تدخل تنام
_____________________________________
في صباح اليوم التالي

دخلت سمر الشركة و كلهم مستغربين ان عمرو لسة مرجعش طلبت اجتماع لكل الموظفين

سمر : دلوقتي الباشمهندس عمرو اتنازل عن الشركة او انفصلنا خلاص و دلوقتي انا بقيت رئيسة مجلس إدارة الشركة دي
كلهم مصدومين ما عدا صاحب عمرو ( باسل )

سمر : ايه مالكم مش مبسوطين ..
... : ها لا اكيد مبسوطين
سمر : طيب اتفضلوا كلكم علي مكاتبكم ماعدا حضرتك يا باشمهندس باسل

خرجوا كلهم ما عدا باسل

سمر : كويس انك كلمت عمرو بالطريقة دي مش عايزينه يعطلنا عن حاجة و اوعدك هزودلك مرتبك طالما هتشتغل معانا
_____________________________________
دخلت المطبخ و بتحضر الفطار يعتبر معرفتش تنام كتير من القلق هي اول مرة تعمل كدا اول مرة تساعد حد غريب متعرفوش وقاعد معاها في الشقة لكن دعت ربنا اليوم ده يعدي بخير
شغلت التليفزيون كان شغال اغنية  ( محمد عبدالمطلب _ شفت حبيبي ) بتغني معاها :

شفت حبيبي وفرحت معاه
ده الوصل جميل حلو يا محلاه
بعد الوحده وكل اشجاني
كان قلبي وحيد وصبح فرحان

هو كمان مقدرش ينام طول الليل حاسس ان رأسه هتنفجر من الصداع فتح الباب و خرج من الأوضة سمع صوت اغنية شغالة و حد بيغني معاها قرب من المطبخ و فضل واقف لحظات سرحان كان صوتها حلو الي حد ما ، بتبص قدامها شافته شهقت بصرخة قرب منها و وضع ايديه علي فمها تسكت

عمرو: بس بس هتفضحينا هشيل ايدي بس متصرخيش انا مش عملت حاجة ولله ولا انتي جالك زهايمر
نور: انت انت واقف من امتي و سمعتني يلهوي سمعتني وانا بغني
مقدرش يمسك نفسه من الضحك علي منظرها
عمرو :من اول الكوبليه بتاع شوفت حبيبي بس متقلقيش صوتك حلو يعني مش وحش شغال
ردت بتناكة : عارفة عارفة
عمرو :  عارفة ايه صوتك زفت ماشاء الله يعني ده انا بجاملك
نور :لا ولله
عمرو :هههههه لا بهزر صوتك حلو بس مش لدرجة التناكة اللي ظهرت علي وشك دي و بعدين لو صوتك حلو زي ما بتقولي مكنتيش قلقتي لما شوفتيني ولا ايه
نور باحراج : ها .. ااه بتشرب السكر كام معلقة شاي
عمرو : افندم
نور:  قصدي كام معلقة شاي في السكر يوووه بتتنيل تشربه ازاي
عمرو : بس بس اهدي 3 معالق شاي  .. يخربيتك لخبطتيني مش شارب شاي ياستي خلاص
نور ضحكت : هعملك كابتشينو و خلاص
_____________________________________
سمر غيرت كل الشغالين ما عدا صباح و ده لان جوري بتحبها .. جوري كانت قاعدة في اوضتها بتعيط رافضة تروح المدرسة اليوم ده

صباح : خلاص بقي يا جوجو متعيطيش عشان خاطري
جوري : بابي وحشني اوي يا دادة
صباح : يا حبيبتي هنعمل ايه بس ربنا هيرجع الحق لصحابه ده ابوكي طول عمره طيب و حنين
جوري : هو هيرجع امتي
صباح : ادعي ربنا يا حبيبتي ادعي ان بابا يرجع تاني

_____________________________________
في المدرسة

اسلام بيشرح على السبورة و معظم البنات غير منتبهين مع الشرح لكن مركزين مع شكله و معجبين بيه بالرغم من أنه لبسه عادي اسلام من النوع الشباب اللي مبتهتمش بالموضة بتحب الاستايل القديم كان شكله زي ممثلين زمان بوسامته و تسريحة شعره و طريقته في الكلام بتجذب اي بنت ناحيته

اسلام : هنحول pressent ل passé composé

ندي لصاحبتها : هو مالو داخل حامي كدا ليه
روان: مش عارفة
اسلام لاحظ صوت في الفصل
اسلام :هو انتو مرتاحين معايا
كلهم :جدا يا مسيو
اسلام : بجد مبسوطين يعني عموما لو حد مش فاهم حاجة قولولي اعيدها تاني بس عايز طلب منكم
_ اتفضل يا مسيو
اسلام : مش معني ان انا مدرس جديد اني هكون متساهل معاكم و هعدي .. انا بكره الصوت جدا ف اعتقد البريك اتعمل عشان الكلام و الاكل مش الحصة

و بص ل ندي و روان
ندي: اكيد يا مسيو
اسلام : طيب نرجع نكمل شرح و ان شاء الله تكون سنة سعيدة معاكم
ندي : ان شاء الله يا مسيو بس انت متقاطعش

كلهم ضحكوا ماعدا اسلام

اسلام : نعم
ندي : كمل يا مسيو الدرس
اسلام : ااه كنا بنقول هنحول passe composéé ل pressent

الجرس رن في اللحظة دي

اسلام : طيب نكمل بكرة .. اورفوار

بيفتح الباب اتفاجأ ب مرام

اسلام بدهشة : مرام
مرام: ازيك يا ايسو هو انت بتشتغل هنا
اسلام : علي اساس انك متعرفيش
مرام بمكر: و اعرف منين يعني
اسلام في سره: ماشي يا معتز الكلب يعني اخلص منها في الكلية تطلعلي في المدرسة

اسلام : طيب يا مرام عن اذنك حصتي خلصت
مرام : ماشي يا ايسو نتقابل في البريك بقي

خرجت ندي من الفصل و استأذنت من مرام

مرام : معاكم مس مرام مدرسة انجلش
_____________________________________
ندي : مسيو يا مسيو اسلام
اسلام التفت لها:أيوة عايزة حاجة يا ..
ندي : ندي حسين
اسلام : أيوة يا ندي اتفضلي
ندي : هو انت مش ناوي تزود دخلك يا مسيو
اسلام : نعم
ندي : عايزة درس يعني يا مسيو
اسلام : اه طب ما تقولي كدا عموما انا عندي مجموعتين شوفي ايه مناسب ليكي و تعالي فيها
ندي : لا انا عايزة اخد لوحدي خاص يعني
اسلام : ااه  طيب ده رقمي خلي بابا او ماما يكلموني و اتفق معاهم
ندي : ليه بابا و ماما هو انا صغيرة يعني
اسلام ضحك : لا كبيرة بس اعتقد هما يتفقوا معايا افضل ولا ايه
ندي : okk يا مسيو
____________________________________
في كافيه
كان قاعد عدي مع هيام
هيام بضيق : يعني ايه الكلام ده يا عدي
عدي: ممكن نتفاهم و تهدي يا هيام عشان نلاقي حل
هيام : انا هادية اهو ما تقول في ايه يا عدي لحد دلوقتي اهلك متصلوش ولا حددوا ميعاد اتفاق الخطوبة في ايه فهمني ولا اهلك مش موافقين عليا
عدي : مفيش يا حبيبتي ماما بس عندها شوية مشاكل في المستشفى و بابا بيظبط اموره و عايزين نفكر نتصرف ازاي عشان اقنعها
هيام : قول كدا بقي يا عدي مامتك اصلا يا حبيبي من ساعة ما جت و هي مش عاجبها بيتنا اوعي تكون فاكر يا حبيبي انك ابن الباشا اللي بيحب بنت فقيرة و عايز يتجوزها لا انا الفرق بيني و بينك مش كبير اوي يعني
عدي :  لا لا يا حبيبتي هي استغربت لكن بعد كدا عادي و بعدين انا مقولتش كدا
هيام : عدي متكدبش عليا مامتك شايفة كدا و ده اللي انت مش عارف تقوله ازاي
عدي : حبيبتي ممكن تهدي عشان تفهمي الموضوع صح
هيام بسخرية : اه انا هادية اهو اتفضل سمعني
عدي: احنا عايزين نفهم هي عايزة ايه عشان نقدر نتصرف بس ده مش معناه اني موافق علي اللي هي بتقوله
هيام : طيب يا عدي لما مامتك  ترد عليك و تديك قرار ابقي إتصل بيا سلام
عدي بخنقة: هيام استني ... يوووه

كان العمال بيكملوا شغل في الشقة و نور قاعدة هي و عمرو في الريسبشن موبايلها رن كان عدي أخوها ردت
نور: الو أيوة يا عدي .. اه هاجي انهاردة حاضر والله هقولها انت عارف ماما بقي و احساسها و كدا ... ههههه قولها تصبر شوية حاضر سيب الموضوع ده عليا ماشي سلام

عمرو : انتي هتروحي انهاردة
نور : اااه
عمرو : طيب
نور سرحت دقايق : عمرو انا جاتلي فكرة جامدة
عمرو : ايه هي
نور : فيه شقة جنبي دي فاضية كان ساكن فيها واحدة و ابنها بس سافروا عشان ابنها جاتله وظيفة برة مصر و سابو الشقة ايه رأيك تاخدها
عمرو : أيوة بس الفلوس اللي معايا مش هتكفي إيجارها
نور : يا عم متقلقش انا هدفعلك اول شهر

سكت عمرو و فهمت انه متضايق أنها عايزة تدفعله كل حاجة
عمرو : لا يا نور مش هينفع انا وافقت تدفعيلي تمن ليلة واحدة في اوتيل لكن إيجار شقة كمان علي ايه ده كلو انتي عبيطة حد يساعد حد ميعرفوش و يديله فلوس
نور : انت اللي عبيط انت فاكر اني مش هاخدهم منك تاني ولا ايه ده انا أقتلك ساعتها.. لما تشتغل و ربنا يكرمك بشغل و يكون معاك فلوس رجعهملي و بزيادة ها
عمرو بابتسامة : نور .. انا متشكر اوي فعلا
نور : انا عملت كدا عشان طلعت جدع و محترم و محاولتش تبصلي اي بصة مش تمام و مخالفتش وعدك ليا
عمرو : انا عمري ما اعمل كدا عشان انا مش خاين
نور : طب يلا بقي عشان نلحق نكلم عم شكري و تاخد مفتاح الشقة

دخلت المهندسة عندهم
.... : نور احنا خلصنا كل حاجة و بعت صور الشغل لمدام ياسمين و عجبها
نور : تمام كويس انهم خلصوا بدري
____________________________________
في شقة ( شكري ) صاحب العمارة

نور بتتفق معاه هي و عمرو

نور : يا حاج شكري خليك جدع بقي و قلل السعر شوية
شكري : يا نور 1750 جنيه حلو دول حتي كانوو1800 وانا قللتهم عشانك
نور : كدا يا عم شكري ااه قول كدا بقي يعني انت طلعت زي ما سمعت و بيقولو عنك
شكري : بيقولوا ايه
نور : بيقولوا يعني انك بخيل و جلدة و بتخاف ع القرش
شكري بغضب: ايه مين دول و بيقولوا كدا ليه
نور : لا ما هو انا مسكتلهمش ااه الحق يتقال برضو قولتلهم الحاج شكري ده كريم جدا و عمره ما استخصر حاجة في حد
شكري : اصيلة يا نور
نور : بس قالولي اثبيتلنا قولتلهم طب انا هروح مع اخو صاحبتي و اشوف هيكرمه في السعر ولا لا و الصراحة يا حاج طلعت زي ما قالو
شكري بصوت عالي : لا الحاج شكري عمره ما كان بخيل طب عشان الكلمة دي قوليلهم ان الأستاذ ده هياخد الشقة ب 1500 جنيه يلا 300 جنيه تخفيض اهو
نور ضحكت : أيوة بقي هو ده كرم الحاج شكري مبروك يا استاذ عمرو

لفت وشها و غمزت ل عمرو و ضحك

شكري: هدخل اجيب المفتاح و العقد

عمرو : يا بنت الايه عرفتي تخفضي منه 300 جنيه
نور : عيب عليك ده انا نور برضو
_________________________
استلم عمرو الشقة و نور عرفته أنها ساكنة معاه في نفس الدور الشقة اللي قصاده

في شقة حسان ( والد نور )
نور كانت بتكلم مامتها و هي في المطبخ بتحضر العشا
نور : ماما
شاهيناز : عايزة ايه
نور : عدي يعني يا ماما كان عايزك توافقي يروح  ل هيام عشان تحددوا تفاصيل الخطوبة يعني
شاهيناز بعصبية : مستحيل قوليلو ينسي انا مستحيل اناسب الناس دي
نور : يا ماما ده بيحبها
شاهيناز : بيحبها ايه و زفت ايه الحب ده يركنوا علي جنب

عدي دخل في اللحظة دي

عدي : يا ماما عشان خاطري وافقي بقي ماهو انتي لو مش وافقتي انا هروح لوحدي اخطبها

خرج عدي و اتعصبت من قراره هو للدرجة دي بيحبها

شاهيناز : سامعة بيقول هيروح يخطبها لوحده
نور : اه يا ماما مانا سمعته .. ماما هو بيحبها علي فكرة سيبيه يختار حياته بنفسه و بعدين سيبك من ابوها هو هيتجوزها هي ولا ابوها و بعدين انتي مش واثقة فيا طب انا عمري قولتلك حاجة يا شاهي و طلعت غلط
شاهيناز : اااه كتير
نور بإحراج : ها ااه دول كام مرة بس لكن ان شاء الله المرة دي هيكون إحساسي صح .. بصي يا شاهي دلوقتي الخطوبة اتعملت عشان نتعرف عليها و علي اهلها طلعت كويسة يبقي تمام مطلعتش كويسة يبقي خلاص يفركش و بعدين عدي بيحبها و هي بتحبه و باين عليها طيبة
شاهيناز : طيب روحي قوليلو اني موافقة خليه يحدد ميعاد معاها نتفق علي الخطوبة
نور بسعادة  باستها من خدها: هييييح أيوة بقي يا شاهي يا سكر انتي
____________________________________
نور دخلت ل عدي الأوضة كان واقف و قلقان و اسلام قاعد علي السرير بيحاول يهديه

نور : عدي للاسف انا حاولت بس ماما دماغها ناشفة
عدي : خلاص سيبوني دلوقتي و اطلعوا برة
نور : يا مان واطي انت .. شاهي وافقت
عدي : اقسم بالله انتي احلى و اجدع اخت في الدنيا
نور : بس اسمع الحوار ده مش لله و للوطن إطلاقا احم
عدي :أيوة عايزة ايه يعني
اسلام ضحك : ايه يا عم عدي هتعمل فيها من بنها
نور : حياتي اللي فاهمني

لمست كف ايديها بايديها التانية و بتحسس عليهم

عدي : انتي بتسخني ولا ايه
نور : ايه يا دو عايزة Money فلوس يعني
عدي : نعم فلوس وانا اللي كانت فاكرك بتعملي ده لله و للوطن
نور : نعم يا عينيا مفيش حاجة ببلاش دلوقتي  ولو موافقتش هروح اقنع ماما ترفض
عدي :بس بس خلاص عايزة كام
نور قعدت علي السرير و وضعت رجل علي رجل

نور : دلوقتي عندي شروط مش بس فلوس
عدي: ها ايه شروطك انجزي
نور : مبدئيا مفيش كوي قمصان ولا بنطلونات لمدة اسبوع ممنوع اعمل فطار الصبح ممنوع اعمل نسكافيه بالليل و ممنوع اغسل هدومك لمدة اسبوع برضو و لو عايز اعملك حاجة من دول بفلوس طبعا و عايزة 350 جنيه تمن اقناعي ل ماما و علي فكرة 350 دي بعد الديسكونت اللي عملته و ااه مش عايزة DVD شكرا
عدي : تحبي اروقلك اوضتك خميس و جمعة
نور : ياريت يكون افضل برضو
عدي : أتمني بس ان وشي يكون مش مضايق رجل حضرتك
نور : لالا متقلقش مش مضايقها يلا هات الفلوس بقي
عدي :هما 200 جنيه و الهبل التاني ده مش عايزه

طلع فلوس من جيبه و أعطاها 200 جنيه

نور : كدا طيب انا بقي هروح ل ماما و اقولها تغير رأيها و هي ما هتصدق
عدي :خلاص خلاص خدي 150 كمان اهو
نور : أيوة بقي
اسلام ضحك و بصوت ضعيف:مادية حقيرة
نور رجعت : بتقول حاجة يا لوما
اسلام : لا بقول مادية جميلة
_____________________________________
دخلت  نور المطبخ و اخدت طبقين فيهم فراخ بانيه و بطاطس محمرة و عيش

نور :شاهي بقولك .. طنط زينب من زمان مروحتلهاش ف ايه رايك ابعتلها الاكل ده انتي عارفة أنها قاعدة لوحدها و كدا
شاهيناز : ماشي يا حبيبتي طب خلي اسلام يروح
نور : لالا هروح و هاجي بسرعة متقلقيش

خرجت نور من الشقة و كان معاها النسخة التانية اللي سلمهالهم شكري
فتحت الباب و دخلت شقة عمرو ، كان عمرو قاعد في الريسبشن بيفكر في بنته

نور : احم احم
عمرو بابتسامة : نور اتفضلي
نور : مانا اتفضلت اصلا اتفضل ده العشا بتاعك قولت اكيد جعان بقي
عمرو : طب قولتي لأهلك ايه
نور : لا عادي انا بعرف اظبط متقلقش
عمرو : طيب كلي معايا
نور : حاضر هاكل حتة صغيرة بس عشان للاسف هروح اكمل عشا معاهم
عمرو : نور .. شكرا على كل حاجة حلوة بتعمليها معايا بجد انتي أجدع بنت في مصر ولله
نور : انت اللي اكيد ربنا بيحبك عشان وقعت في طريقي
عمرو ضحك : هو لو ربنا بيحبني كان ده بقي حالي دلوقتي
نور :مالك يا عمرو و بعدين متقولش كدا ( وعسى أن تكرهوا شيئا وهو خير لكم وعسى أن تحبوا شيئا وهو شر لكم )
عمرو : صدق الله العظيم انا مش قصدي بس انا كنت حاجة تانية الحمدلله علي كل شيء بس اوعدك ولله اني اول ما يكون معايا فلوس هعوضك بكل حاجة عملتيها معايا
نور : طيب حيث كدا بقي رصيدك دلوقتي معايا 15000 + عشا ب 20 جنيه و ب 3 جنيه عيش و المواصلات طبعا هحسبها
عمرو ضحك : ايه ايه كل ده
نور : دي اسعاري علي فكرة و اسأل عليا برة انا كدا كارماك اصلا
عمرو : لا ولله
نور : أيوة يلا بقي لازم امشي هجيلك وقت تاني
عمرو : ماشي
_____________________________________
في اليوم التالي
الساعة 6 مساءا

عدي : يلا يا ماما عشان نلحق نوصل بدري
شاهيناز بصوت عالي من اوضتها: أيوة يا عدي بلبس
حسان : مبروك يابني ربنا يتمملك علي خير
عدي : الله يبارك فيك يا حبيبي
اسلام خرج من اوضته : مبروك يا عدي ان شاء الله ترجعوا محددين ميعاد الخطوبة
عدي : عقبالك يا حبيبي مش جاي معانا ولا ايه
اسلام : لا عندي درس دلوقتي رايحه
نور : أيوة بقي يا عم بقينا بندي دروس ايه ده الجرس بيرن ثواني اشوف مين

خرجت تفتح الباب اتفاجأت ب ( نسرين )
نسرين: ازيك يا ناني
نور : الحمدلله اهلا

لمحت علي نازل من علي السلم و وقف في نفس الدور قريب منهم
نسرين : يارب تكونى بخير وبقيتى احسن
ابتسمت "نور" : ليه يا حبيبتي حد قالك اني تعبانة انا الحمدلله كويسة و كويسة جدا كفاية اني سمعت كلام مامتي حبيبتي و سيبت علي
نسرين: ايه ده يا نوني انتي لسة زعلانة عشان لولو خطبني انا و سابك
نور ضحكت بسخرية: أولا انا اللي سبته يا حبيبتي .. ثانيا بقي ازعل ليه ازعل دي يعني معناها اني لسة بحبه وانا مش بحبه انا لما بفتكره بقرف بحس باحتقار من نفسي اني حبيته وانا يا حبيبتي زي ما انتي شايفة قدامك اهو زي الفل الحمدلله .. ثالثا بقي ازعل انه خطبك ليه يا نوسا يا حبيبتي المثل بيقول اللي سابته الهانم تاخده مساحه السلالم يا عينيا
نسرين بغيظ و بصت ل علي: Oh My Godd بجد الألفاظ بتاعتها بيئة اوي يا لولو
نور ضحكت : لولو ازيك يا لولو
علي في سره:الله يخربيتك يا نوسا
نور : اصل كان فيه واحد بيقولي لولو دي بتتقال للبنات بس مش كدا برضو يا لولو
علي : ها اه مش يلا يا نوسا بقي
نسرين :ايه يا بيبي ثواني نسيت اقول ل ناني حاجة
نور بصتلها بقرف: خير...
نسرين: انا عازماكي علي خطوبتي انا و علي بعد اسبوع انا عارفة انك مش هتيجي و هتقولي تعبانة بس قولت اعزمك انتي برضو كنتي صاحبتي
قاطعتها "نور ": مبرووك ان شاء الله هاجي
نسرين : ده الكارت اللي فيه العنوان يا حبيبتي
نور بصت ل علي: مبروك يا لولو
بصت "نسرين " ل "نور" وبسخريه وبتضحك:هستناكى يلا see you
نور : سيوهاتك معاكي يا حبيبتي
قفلت نور الباب و رزعته جامد و دخلت اوضتها عيطت جامد دخل اسلام وراها و اول ما دخل اترمت في حضنه

اسلام : اهدي يا حبيبتي مالك بس
نور : علي خطوبته بعد اسبوع و نسرين جاية تغيظني
اسلام : طب انتي بتعيطي ليه لسة بتحبيه
نور : انا كرهته اصلا من زمان انا بس صعبان عليا العشرة مش قادرة أصدق ان دي كانت صاحبتي يا اسلام
اسلام : ماهو الدنيا كدا مين دلوقتي بيفضل علي حالو
نور : يا بجاحتهم جايين يعزموني على الخطوبة
اسلام :فوكك و متروحيش
نور : اه عشان يقولو عليا متغاظة
____________________________________
نسرين قبل ما تنزل هي و علي لمحت باب شقة عمرو بيتفتح

نسرين :انت الساكن الجديد صح
عمرو : اه في حاجة
نسرين اعطته الكارت
نسرين : انا جارتك في العمارة اللي قصادك لازم تيجي خطوبتي انا و علي كمان اسبوع
عمرو :اه مبروك
نسرين : لازم تيجي يا ..
عمرو : عمرو
علي : مش يلا بينا
نسرين : لازم تيجي يا عمرو
عمرو : اه ان شاء الله
_____________________________________
في بيت هيام

صابر (والدها ) : معلش الدهب يلبسوه عند الصايغ و خلاص
شاهيناز : نعم ازاي يعني المفروض يتلبس في الخطوبة
حسان: خلاص تتعمل حتى لو حفلة صغيرة يعزموا فيها صحابهم بس و الناس القريبين
صابر : لامؤاخذة دي مش من امكانياتي
شاهيناز : نعم معروفة الخطوبة علي العروسة
نور : خلاص يا ماما مش لازم
عدي : خلاص انا ممكن اعمل انا الخطوبة
شاهيناز : طيب موافقة بس الشبكة تكون متواضعة طالما الخطوبة علينا
عدي : لا يا ماما مش هينفع هيام معندهاش اي دهب خالص
شاهيناز بضيق: طيب
صابر : يبقى نقرأ الفاتحة
عدي : اقري يا ماما عشان خاطري

شاهيناز كانت حاسة بحب عدي ل هيام ف قررت متضيعش فرحة ابنها و اتمنت ان هيام تكون عكس ما هي متوقعة و تكون تستاهل الحب ده فعلا خلصوا قراءة الفاتحة و اتحدد ميعاد الخطوبة و تلبيس الدبل و حددوا ميعاد شراء الذهب

شاهيناز : هيام هبقي اكلمك في الموبايل عشان تشتري الفستان او ممكن نروح لمصممة ازياء انا عارفاها شاطرة جدا ماشاء الله و هخليها تفصلك فستان جميل و متقلقيش من حاجة اليوم كلو هيكون علينا
هيام: ربنا يخليكي يا طنط
شاهيناز : حبيبتي انتي زي نور و ان شاء الله ربنا يتمملكم علي خير
____________________________________
استمرت نور لمدة اسبوع تبعت اكل ل "عمرو" بتصحي قبلهم كل يوم و تعمل فطار و تدخلهوله الشقة و وقت الغدا بتعطيله وجبته و العشا بحجة انها بتروح لجارتهم ( زينب ) هو مش غريب علي نور لكن الغريب أنها كانت بتروح كل يوم و مامتها شافت أن ده شيء عادي ف قررت نورتعرف اهلها علي عمرو يمكن هما اللي يطلبوا يعزمومه في مرة

اما عدي اشتري الشبكة ب 30 ألف جنيه و شاهيناز اشترت القماش ب 2500 جنيه و دفعت 2500 للمصممة و حجزتلها مع ميكب ارتيست ب 2000 جنيه كانت بتعاملها زي بنتها و حاولت تعطيها فرصة يمكن تطلع تستاهل فعلا زي ما عدي قالها

و في يوم كان عمرو خارج من شقته حاولت نور بطريقتها الاجتماعية تتعرف علي عمرو و عرفته علي شاهيناز و عزمته علي الغدا

شاهيناز : لازم تيجي بقي
عمرو : ان شاء الله اكيد
نور : هنستناك
عمرو بابتسامة : اكيد هاجي
_____________________________________
بعد الظهر كان عمرو موجود عندهم في الشقة

حسان: نور دي من و هي صغيرة و هي مجننانا مسمينها نور خراب لو فيه أي مصيبة حصلت في البيت لازم نور تكون ليها دخل فيها حتي لو مش هي برضو لازم نور تكون السبب فيها
نور : شايف الظلم
عمرو ضحك : واضح انك كنتي شقية وانتي صغيرة
حسان : طب هحكيلك حاجة يا عمرو نور كانت في الابتدائي و طالبين منها نشاط للعلوم مش فاكر كان ايه بس هو للكهربا جابت لمونة و حطت فيها سلكين و حطت السلكين في الفيشة بووم حصل قافلة في البيت كلو

كلهم بيضحكوا
حسان : مش دي المشكلة اطلاقا المشكلة لما سألتها قالتلي اصل كنت فاكرة اللمونة هتنور

عمرو بيضحك: يخربيت دماغك
حسان :و مرة بقي كنت عازمهم برة في مطعم كانت نور عندها 6 سنين بعد ما خلصنا الاكل وقفت علي الكرسي و فضلت تغني و صلي صلي علي النبي صلي و ترقص و المطعم كلو أتفرج علينا و لقيت ناس بتصقف اخدتهم و مشيت و حتي مكملناش اكل
عمرو ضحك :انتي كنتي فظيعة
نور :اكيد محصلش طبعا انا مش فاكرة الحاجات دي
حسان : لا و فيه بقي مرة كنا
نور قاطعته : بابا ما صباح الفل بقي صدعت الأستاذ عمرو كفاية يا بابا احكيله عن مصايب اسلام و عدي شوية ولا بلاش نصدعه
عمرو : لا خالص باباكي لذيذ جدا كمل مصايب نور
نور : لا ولله
عمرو : ههههه خلاص عشان شكلها اتقمصت
شاهيناز : منورنا ولله يا عمرو مش عارفة الواد إسلام ده اتأخر كدا ليه عايزين نحضر السفرة شكلك جوعت
عمرو :لا خالص انا مستنيه حتي عايز اتعرف عليه
شاهيناز : نور هاتي فاكهة كمان ل عمرو عشان طبقه قرب يخلص
نور : علي فكرة هو مأكلش كتير منه اصلا و لو جبتله تاني مش هياكل
شاهيناز :يخربيتك قومي بطلي كسل بقي
نور : ماشي يا ماما بس لو مأكلتش منه انت حر عشان انا هقوم اجيبلك
شاهيناز : معلش يا عمرو هي نور كدا بتحب تهزر

بعد مرور وقت

شاهيناز : ولله يا عمرو انت منورنا
نور : ماما علي فكرة انتي قولتيلو انت منورنا 55 مرات لحد دلوقتي انا خايفة من كتر النور يحصل قافلة
شاهيناز : هههه سكر يا نور ممكن تبطلي هزار بقي
و وجهت كلامها ل عمرو :  انا عايزاك بقي تاكل و تقولي رأيك في اكل نور

نور بتحطله قدامه فراخ و محشي ورق عنب

عمرو : تحفة يا نور اقصد باين من الريحة و شكله
نور : ميرسي يا عمرو مش كنا نستني يا بابا إسلام و عدي
عمرو : دول اخواتك
حسان :اه بس عدي مش هيجي غير علي المغرب و إسلام زمانه جاي

إسلام دخل في اللحظة دي و قعد جنب عمرو علي الترابيزة و بياكل

شاهيناز : حبيبي مش تسلم الأول علي الضيف
إسلام : ازيك ! عامل ايه ؟مين ده ؟
حسان : ده عمرو جارنا
عمرو : انت عدي
اسلام : لا انا اسلام معلش يا عمورة بقي اصل بضعف قصاد ورق العنب ف دخلت علي طول
عمرو : لا ولا يهمك
_____________________________________
تاني يوم ..
كان في الوقت ده ميعاد خطوبة علي و نسرين

شاهيناز : ما بلاش يا نور انا مش مرتاحة
نور : في ايه يا ماما بس
شاهيناز : حبيبتي بلاش تروحي
نور :ماما مينفعش انا لازم اروح عايزاهم يقولو اني متغاظة
شاهيناز : خلاص خلي اسلام يروح معاكي ... يا اسلام
دخل اسلام في اللحظة دي
اسلام بإعجاب : ايه المزة دي قمر يا نونو

كان إعجاب اسلام جزء من التعبير عن جمالها فعلا كانت جميلة جدا اليوم ده اتفقت مع ميكب ارتيست صاحبتها تجيلها و فعلا نور مع ملامحها الهادية كانت زي القمر

شاهيناز : خلي بالك منها و حط عينك عليها ها
نور : ايه يا شاهي انتي مش عارفة بنتك ميتخافش عليها
شاهيناز : ماهو المصيبة اني عارفاكي يا نور بالله عليكي تعالي بسرعة سلموا عليهم و تعالو
نور :حاضر يا شاهي
إسلام : مزة يا بنت الايه من زمان مشوفتكيش ب  full make-up كدا
نور :ايه رأيك
اسلام مسك ايديها و باسها:قمر يا حبيبتي طبعا و بعدين انتي جميلة في كل الأوقات
نور : ولله انت اللي قمر يا واد
اسلام : لولا انك اختي كنت خطبتك
نور ضحكت : يخرب عقلك
اسلام : شكلك هتطلعي ب عريسين 3 4 5 انهاردة
شاهيناز : يارب يا حبيبي
نور : عايزة تخلصي مني يا شاهي ماشي
شاهيناز : يا حبيبتي عايزة أفرح بيكي

خرجوا من الشقة و كان عمرو جاهز و خارج لان نسرين أكدت عليه مرة كمان و كان حابب يروح تغيير من الخنقة اللي هو فيها انبهر ب شكل نور هو متعود يشوفها دائما علي الطبيعة و باللبس الخروج اول مرة يشوفها بالسواريه و ميكب كامل

نور :عمرو ازيك انت خارج ؟
عمرو : اه رايح خطوبة
اسلام : و احنا كمان رايحين خطوبة اوعي يكون نفس الخطوبة بتاعة علي و نسرين
عمرو : اه هي
نور : خلاص تعالي معانا بقي اسلام اخد عربية بابا و بالمرة نوصلك معانا

نزل من علي السلم في الوقت ده طفل عنده 13 سنة

.... : ايه العسل ده
نور سلمت عليه :ميشو ازيك
اسلام : احم ميشو ايه يا معلم شكلك عايز تتضرب
ميشو : يعني بلاش اقول رأيي في العسل ده قصدي يعني في نور
نور : لا يا معلم المهم تعالي عايزاك

اسلام ل عمرو : اصل ميشو و نور صحاب معرفش ازاي بس هي نور طفلة عموما
عمرو ضحك : شكلها بتحب الاطفال
اسلام : بس ميشو ده مش طفل خالص ده كل صحابه كبار اصلا و شقي جدا في الشارع

نور : برافو عليك يا ميشو خد دول فلوس الزيت الباكم بتاع الفرامل اللي انت اشتريتو المهم قولي ايه اللي حصل
ميشو : زي ما انتي قولتيلي اشتريت الزيت و دلقته علي العربية بتاعته علي الكبوت وعلي السقف العربية جلدها خلاص ساح اه والله و بقي شكلها وحش و مش بس كدا بوظتله كل الكاويتشات يعني العربية خلاص مش هتشتغل انهاردة
نور بسعادة : أيوة بقي ده
و لسة الباقي
ميشو : انا كان ممكن ابوظله العربية و افجرهاله اكتر من كدا بس قولت حرام كفاية عليه كدا اه اومال ايه ده احنا الشقاوة فينا برضو بس احنا اللي ربنا هادينا
نور : اهم حاجة بعتله الواد سعيد بتاع التوكتوك
ميشو : عيب عليكي حصل طبعا
____________________________________
شاهيناز نزلت ل زينب جارتها

شاهيناز : ازيك يا زينب معلش كنت جاية اخد منك الحلة التيفال بتاعتنا اللي نور كانت منزلالك فيها اكل
زينب : ده انا اللي عايزة اشتكيلك من نور دي بقالها يطلع اسبوع مجاتليش ولا شوفتها و زعلانة منها بس الحلة دي مش عندي

يتبع ........
🌸 شاهيناز هتعمل ايه مع نور و ممكن تقولها الحقيقة ولا هتكدب