رواية نقطة و سطر جديد (الحلقه الثانية)
الفصل الثاني
دخلت "جوري" بنتها مرة واحدة و هي ماسكة في ايديها كتاب و سمر مازالت مخضوضة و متوترة لأنها فكرتها " عمرو "
جوري : مامي هو يعني ايه كلمة ( Immigration)
سمر بخوف و هي بتقفل المكالمة : انتي انتي مش تخبطي وانتي داخلة هو انتي سمعتي حاجة يا جوري
جوري ببراءة : لا .. اسمع ايه
سمر : طيب انتي عايزة ايه دلوقتي
جوري : يعني ايه كلمة immigration يا مامي
سمر بعصبية : يووووه روحي اعملي بحث عنها في Dictionary
دخل عمرو في اللحظة دي
عمرو : في ايه يا سمر بتزعقيلها ليه انتي عملتي ايه لمامي يا جوري
جوري : انا بسألها عن معني كلمة مش عارفاها يا بابي قالتلي شوفيها في Dictionary
سمر : يا حبيبتي مش قصدي انا قصدي يعني شوفيها في Dictionary عشان متنسيهاش بعد كدا
عمرو بإقتناع: اه فعلا مامي عندها حق يا جوري عموما هي معناها هجرة
جوري : اوكيه يا بابي هروح اكمل الهوم وورك
___________________________________
في كافيه ( إسلام قاعد مع صحابه و متضايق بيفكر في موضوع الشغل و صحابه بيهزروا لكن هو مش معاهم )
معتز : بس بقا يا جماعة إسلام متضايق و مصدع
مرام: مالك يا إسلام
معتز : اصل مش عارف يتعين في الجامعة متقبلش
إسلام : معتز خلاص
مرام: يا سلام قول انت بس و من بكرة اخليك تتعين في اي جامعة انت عايزها
إسلام قام من علي الكرسي : ميرسي يا مرام لما احتاج واسطة باباكي هبقي اقولك
____________________________________
رجع البيت و كان قاعد لوحده مخنوق
دخلت نور غرفة إسلام كان قاعد في اوضته مخنوق من اللي حصله انهاردة كل حاجة بالواسطة حتي التعيينات فاق علي صوت نور و هي بتقوله
_ إسلام .. لوما يلا عشان الغدا جاهز
إسلام : ماليش نفس
نور قربت منه و طبطبت عليه: معلش يا لوما والله هتتحل و بعدين يا عم ده المدرسين بياخدو قد كدا و مرتب احسن من المعيد
إسلام بنبرة حزن: انا كنت بذاكر و بتعب عشان اتعين معيد في الجامعة يا نور و في الاخر يرفضوني عشان يعينو ولاد الدكاترة و قرايبهم و اللي معاهم فلوس
نور : ربنا هيعوضك بأحسن من كدا ولله و بكرة تقول نور قالت و يلا بقي عشان تتغدا
اسلام :ماشي
علي ترابيزة السفر
اسلام و نور قاعدين علي كرسين جنب بعض و حسان ( باباهم ) قاعد في اول كرسي و من الناحية التانية عدي اخوهم الكبير و جانبه والدتهم ( شاهيناز )
اسلام بيمد ايده و ياخد من طبق المحشي اللي قدام عدي
عدي بعصبية : يووووه مش قدامك طبق كل منه
اسلام بنفس نبرة عدي: والله طبقي خلص ولا انت مش شايف مثلا
حسان بصوت عالي : ايه في ايه انت و هو هنبتدي خناق ع الأكل
نور : خلاص يا اسلام كل من طبقي و انا هدخل اجيب من جوة طبق تاني
___________________________________
بعد الغداء كان عدي بيحاول يقنع والدته كالعادة و هي باين عليها مش موافقة
عدي: يا ماما عشان خاطري بقي وافقي
شاهيناز : انت عارف ان صاحبتك دي انا مش مرتاحلها
عدي :يا ماما هي هيام عملت ايه بس و بعدين انتي شوفتيها مرة واحدة علي فكرة يعني يا شوشو ملحقتيش تعرفي البنت كويس اومال الخطوبة اتعملت ليه ما تتكلم يا بابا
حسان: انا عن نفسي موافق طالما ابنك بيحبها و هي كمان بتحبه ايه المشكلة سيبيه يختار
شاهيناز : انا بس يا حبيبي قلبي مرتاحلهاش حسيتها مش صريحة كدا و بعدين انا كنت حاطة عيني علي مريم بنت دكتورة زميلتي بصراحة البنت محترمة و بنت ناس و زي القمر يعني مش ناقصها اي حاجة و شكلها يعني بتحبك
عدي : يا ماما مريم بنت كويسة جدا ولله و جميلة جدا بس انا بعتبرها اختي محستش خالص قبل كدا إنها حبيبتي يعني ولا يرضيكي اخطبها و اظلمها وانا مش بحبها
شاهيناز : خلاص يا حبيبي اللي تشوفه حدد ميعاد معاها و نروحلها
عدي بسعادة مسك ايد والدته باسها : أيوة بقي يا شاهي ربنا يخليكي لينا يا حبيبتي
___________________________________
تاني يوم كان اول يوم ل نور في الوظيفة
وصلها علي بعربيته للمدرسة
علي : ايه يا ناني مالك يا حبيبتي اهدي كدا
نور : خايفة اوي يا علي دي اول مرة هدرس فيها
علي : حبيبتي متخافيش ده زي شكة الدبوس
نور بسخرية : علي اساس ان شكة الدبوس مبتوجعش يا غبي
علي ضحك : دایما كبسانى كده
نور بصت ع الساعة : لقد حان وقت المغادره .. يلا روح انت بقي
علي : هتوحشيني
نور : وانت كمان يا بيبي
علي : اموت انا في بيبي دي
دخلت الفصل و هي قلقانة و خايفة كانت بتروح تدريب العملي لكن المرة دي هتشرح و تتحمل مسؤلية بتدعي في سرها اول يوم يعدي علي خير و خايفة خصوصا أنها هتتعامل مع طلبة صبيان مش بنات لكن بررت لنفسها ان التوتر ده عشان اول يوم لكن بعد كدا هتاخد عليهم
دخل كل الطلاب الفصل ( الصف الأول الاعدادي )
نور بجدية : السلام عليكم و رحمة الله و بركاته
احد الطلاب : بركاته ولا بركات الأهلي
كل الفصل بيضحك علي هزاره
نور بعصبية و صوت عالي: انتو بتضحكوا عليه لما اقول السلام عليكم تردوا السلام مش تتريق حضرتك
الكل : و عليكم السلام و رحمة الله و بركاته
نور : اتفضلوا اقعدوا ما عدا انت أيوة انت خليك واقف
قربت منه و بهدوء : ينفع اللي انت قولته ده يا انت اسمك ايه
الولد بسخرية : اه ينفع اسمي سمير
نور بغضب : ينفع ينفع سيادتك تتريق علي كلام ربنا ايه فاكر نفسك ظريف مثلا
سمير : في ايه يا ابلة فوكك مني و اشرحي الدرس ولا اخرجي و سيبنا نلعب
نور : انت انت ازاي تكلمني كدا ماشي انا هندهلك المدير يتصرف معاك
خرجت نور و هي متعصبة قابلت الوكيل في الطرقة
نور : مستر محسن مستر محسن من فضلك دقيقة
محسن : أيوة
دخل محسن معاها الفصل و شرحتله الموقف كلو
محسن : في ايه بس يا استاذة نور الولد مغلطش فيكي و بعدين هما طريقة كلامهم كدا
نور بدهشة : نعم مغلطش فيا ازاي حضرتك ده اتريق ع كلام ربنا و استهزأ بيه بغرض التريقة
محسن :يا استاذة نور إن الدين يسر و ليس عسر
نور : بس حضرتك دي سخرية و ده ذنبه كبير عند ربنا .. ربنا سبحانه و تعالي قال :يحذر المنافقون أن تنزل عليهم سورة تنبئهم بما في قلوبهم قل استهزئوا إن الله مخرج ما تحذرون* ولئن سألتهم ليقولن إنما كنا نخوض ونلعب قل أبالله وآياته ورسوله كنتم تستهزئون* لا تعتذروا قد كفرتم بعد إيمانكم إن نعف عن طائفة منكم نعذب طائفة بأنهم كانوا مجرمين
محسن : صدق الله العظيم بس دول اطفال اكيد ميقصدش و اهو خلاص عرف غلطه و مش هيكرره اشرحي الدرس عشان الحصة متخلصش
نور : يعني حضرتك شايف ان ده عادي اوكيه تمام
خرج أستاذ محسن و بدأت نور تعرف نفسها عليهم
نور : اتمنى الموقف ده ميتكررش ... انا اسمي مدموزيل نور مش ابلة ولا مس .. مدرسة فرنساوي
____________________________________
سافر عمرو مع بهاء و بالفعل عمل توكيل ل سمر بالتحكم في كل شيء
في الشركة
هاني كان موجود و معاهم محامي و سمر مضت علي ورقة الشراكة بينهم و كان معاها حسام
هاني : واخيرا بقي مبروك علينا يا مدام سمر
سمر : الله يبارك فيك
هاني : صحيح انتي واثقة انه هيطلقك
حسام : و لو مرضيش نخلعه يا حياتي
هاني ضحك: تعجبني دماغك يا حوس وانا هوكلك المحامي الكبير بتاعي و اعتبري القضية ناجحة و انك خلاص خلعتيه هو راجع امتي صحيح
سمر : بعد بكرة
هاني : انا هموت و اشوف منظره و هو خسران طب ما كان من الأول يلا يعيش و ياخد غيرها بقي
____________________________________
دخلت نور غرفة إسلام و هي باين علي ملامحها السعادة
نور : إسلام لوما
إسلام : ايه يا نور في ايه
نور : لقيتلك وظيفة يا عم
إسلام : بجد فين
نور : في مدرسة خاصة بنات ثانوي أيوة يا عم والعة معاك
إسلام بضيق: مدرس اشتغل مدرس
نور بسخرية : اومال هتشتغل مهندس مثلا يابني انت خريج تربية هتشتغل ايه حضرتك
إسلام : كان نفسي اشتغل معيد
نور : حبيبي أفهم محدش عارف الخير فين ما يمكن ربنا كاتبلك الخير هنا
إسلام : طيب
موبايل إسلام بيرن كان معتز صاحبه
نور : طيب ده عنوان المدرسة متنساش تروح بكرة
_____________________________________
نور اتصلت ب "علي" خطيبها كان انتظار اتصلت علي الرقم اللي اخدته منه كان انتظار بعد 5 دقايق اتصل عليها (على)
نور : علوش حبيبي
علي : نور ازيك معلش يا قلبي كنت بكلم واحد صاحبي
نور في سرها : صاحبك برضو يا حيوان ماشي يا علي
نور : ولا يهمك يا حبيبي اصل انت وحشتني اوي يا لولو و عايزة اشوفك
علي : وانتي كمان يا حياتي بس بلاش لولو دي عشان دي بتتقال للبنات بس وانا راجل يا حبيبتي
نور : هههه حاضر يا حبيبي المهم عايزة اشوفك بقي
علي : اكيد طبعا من عينيا تحبي نروح فين
نور : نروح مطعم بيتزا هت ممكن
علي : ماشي اجهزي و هستناكي
قفلت نور معاه و غيرت هدومها و كلمته استناها في العربية لأنه ساكن معاها في نفس العمارة وصلوا المطعم و طلبت نور اوردر كبير و غالي و دي مش عادتها
علي : حبيبتي انتي هتاكلي ده كلو متأكدة
نور بدلع : ايه يا علوش مالك مستخسر فيا
علي : ها لا طبعا انا اقدر برضو
بعد 10 دقايق كان الاوردر جهز و الجرسون نزلهم الطلبات
نور اخدت قطعة صغيرة من البيتزا : هات موبايلك يا علي
علي و هو بياكل اللقمة وقفت و بيكح : احم
نور : يا روحي شرقت اشرب ماية
علي بخوف : حاا ضر
نور : هات موبايلك يا علي
علي بتوتر و كأنه متردد يعطيها الموبايل : اتفضلي
نور بعصبية : نعم انت هتستعبط افتح الباسورد
علي فتح الباسورد و اعطاها الموبايل مرة تانية
فتحت نور الموبايل و دخلت علي كذا برنامج و فتحت الواتساب آخر محادثة مكتوب فيها من بنت
_ بس كنت قمر انهاردة يا بيبي
علي : بعتلها ايموشن 🙈 قرد بيتكسف
نور دخلت ع باقي المحادثات و اتأكدت ان علي فعلا بيخونها و مع 4 بنات تانيين حدفت الموبايل علي الترابيزة
نور بعصبية : بتقولك كنت قمر يا بيبي لا و باعتلها قرد بيتكسف
ضربته نور بالبوكس علي خده
نور : ده عشان تتكسف تاني يا حبيبي و تخبي وشك و تبعتلها قرد مكسوف
علي ايديه علي وجهه و بتألم
علي : نور اهدي الناس بتتفرج علينا
نور خبطت الكرسي في الحائط : خليهم يتفرجوا يا حبيبي و يعرفوا ان خطيبي بيخوني خليهم يتفرجوا
خرجت نور من المطعم و علي شاور للجرسون يحاسب
علي : الحساب من فضلك
الجرسون : اتفضل يا فندم
علي بصدمة : يا نهار اسود دي كملت طالبالي اوردر ب 499 جنيه هاتلي يابني باقي الأكل ده تيك اواي
الجرسون :تحت امرك يا فندم
دفع علي الحساب و اخد الاوردر تيك اواي و كانت نور لسة واقفة مستنية اي تاكسي
علي : نور استني بقي
نور : ابعد عني ملكش دعوة بيا فاهم عاملي فيها مكسوف يا عينيا
علي : خلاص بقي يا نانا ده انا حتي بعتلها قرد مكسوف بس ولله مردتش عليها
نور بعصبية : ابعد عني
علي : طب خدي الاكل بتاعك اللي انتي مش اكلتيه طلبتهولك تيك اواي
نور اخدت منه الاوردر و مشيت قدام
نور بصوت عالي و بتصطنع البكاء : يا كابتن يا شباب الحقوني الشاب ده عايز يتحرش بيا ايه يا رجالة هو مفيش راجل يدافع عني ولا ايه
معظم الشباب اللي في المكان مسكوا علي و ضربوه و نور ضحكت و ركبت تاكسي
نور : الحمدلله ده انا مكلتش غير 2 سلايس بس من البيتزا كويس انه طلبلي الاوردر كلو طلعت ذوق يا علوش
_____________________________________
في المساء
علي كان في الصالون و قاعد مع إسلام و علبة الشبكة قدامه
علي : إسلام انا عايزك تساعدني ان نور تديني فرصة انا مش عايز اسيبها يا إسلام ادخل أتكلم معاها و عقلها والله العظيم انا بحبها
إسلام : يعني هو انا سكت يا علي ما هو علي يدك من شوية كلمتها قدامك و انت عارف دماغها انشف من الحجر اعملها ايه يعني
خرجت نور من غرفتها
نور : هيكلمني يقولي ايه يعني يا علي انت عارف دي المرة الكام بسامحك فيها وانت مبتعقلش و بقول يا بت عدي يا بت خلاص اخر مرة لكن واضح ان ديل الكلب عمره ما هيتعدل اتفضل شبكتك اهي و دي كل الهدايا بتاعتك كمان مع انك زبالة و خونتني و متستحقش تاخدهم بس انا عندي أخوات و يمكن بكرة يحصل معاهم كدا خد حاجتك و روح ارتبط ب 2 و 4 و 10 براحتك يا علي و اتفضل بقي من غير مطرود اظن انت عارف مكان الباب فين
عدي دخل في اللحظة دي
عدي: عيب كدا يا نور في ايه
نور : مش عايزة أشوف وشك هنا اتفضل
علي : طيب انا خارج و خليكي فاكرة اني جيت اصالحك وانتي مصممة علي رأيك
خرج علي و قفل الباب وراه بعصبية
عدي بعصبية : ممكن أفهم ايه الموقف الزبالة اللي حضرتك حطيتينا فيه ده
نور ببرود: إسلام هتروح بكرة المدرسة
عدي : متغيريش الموضوع جاوبيني
نور : انت بتزعق ليه دلوقتي
إسلام : نور انتي مكنش ينفع تعملي فيه كدا طب حتى كنتي خدي رأينا انك هتسيبيه
نور بصتله : كنت لازم اعمل كدا ماهو انا لو كنت جيت قولتلكم كنتو هتدخلوا معايا في مناقشات و حوارات عشان اسامحوا و انسي و ده خطيبك و بيحبك و صلي علي النبي و هيتعدل و الكلام ده
عدي : ده مش لعب عيال يا حبيبتي عايزة تفركشي كان ممكن تاخدي رأينا و نتنيل نحل الموضوع لكن تروحي تضربي الواد و تدفعيه اوردر كبير و تطرديه من الشقة علي ايه ده كلو و بعدين انتي مكملتيش كام شهر مخطوباله
نور : اهو الكام شهر دول عدو عليا كأنهم سنين مبقتش طايقاه بني آدم مقرف كداب و خاين ده مسبش واحدة من صحابي الا و حاول يكلمها
إسلام : نور مش هو ده اللي جيتي اتحايلتي علي بابا و ماما يوافقوا عليه و قولتيلنا نساعدك عشان يوافقوا عليه ده ماما لما كانت تسألك ايه اللي عاجبك فيه هبيتي فيها و قفلتي اي باب للمناقشة و قولتي دي حياتي وانا حرة فيها
نور : كنت غبية و اتخطبت له و اكتشفت أن اختياري ده كان غلط و قررت خلاص اصلح غلطي فيها ايه يعني و بعدين يعني معروفة الخطوبة الاولي اتعملت عشان تتفسخ اصلا
عدي: شايف طولة لسانها لا الهانم بتهزر كمان و بتضحك
نور : ايه يعني لما اهزر و اضحك اومال يعني اعيط و اغني ظلموني علي ايه
خرج عدي و هو مخنوق من تصرفات أخته
إسلام : بس قوليلي انتي عرفتي ازاي ان علي بيخونك
نور : بص يا ايسو انا الأول كنت شاكة فيه و بعد كدا اخدت موبايله في مرة و كان عامل نظام كدا يحط 3 أرقام في العرض و بعدين فكرت اشوف مين الارقام دي لقيت رقمي و رقمين تانيين و بعدين حفظتهم و سيفتهم عندي و اتصلت قبلها بيوم عليه بالليل لقيته wait و اتصلت ع رقم منهم كان wait برضو وقتها اتاكدت انه بيخوني و بعدها الرقم رد و كانت بنت
اسلام : الله عليكي بس فيه حاجة معقولة يعني الرجالة ضربوه كدا هي رجالة مصر بقت بخير
نور ضحكت : لا طبعا يا لوما دول رجالة كدا الواد ميشو بعتهملي و اديتهم فلوس و منهم ناس برضو ضربوه معرفهمش بس من الشارع
إسلام : اوووه لا ده انتي طلعتي دماغ ولله بس علي صعب عليا الصراحة مع انه يستاهل الواطي ده
____________________________________
تاني يوم استلم اسلام وظيفته الجديدة
في فصل بنات (فصل 2 ثانوي )
معظم الفصل بيتكلم في مواضيع مختلفة
بنتين بيتكلموا مع بعض
البنت 1 : انتي عارفة اصلا يا بنتي الفيلم كان تحفة بجد و لا البطل هيييح كان فظيع جدا انا لازم اشوف الجزء التاني عارفة بقي كانت البطلة
البنت 2 : ندي اسكتي المستر دخل
ندي: طيب يا روان
دخل إسلام الفصل و اتكلم باللغة الفرنسية
إسلام: bonjour ( صباح الخير )
الكل وقف : bonjour
ندي : بقولك بقي البطلة كانت لابسة فستان كدا سواريه لونه احمر
روان : واااو بجد نفسي اشوفه
إسلام لاحظ صوت لكن مش قادر يحدد منين لكن واضح ان الصوت من الصف التاني
إسلام : Asseyez vous (اتفضلوا اجلسوا )
روان : ندي اسكتي يخربيتك المسيو تقريبا اخد بالو اننا بنرغي
ندي : فوكك بصي متنسيش تفكريني اوريهولك ها
مسك ( إسلام ) قلم السبورة و كتب التاريخ و عنوان الدرس
روان : كان نفسي اجي معاكي السينما و اشوف الفيلم ده
ندي : خلاص الجزء التاني لما ينزل مصر هحجزلك معايا
إسلام : معاكم مسيو اسلام مدرس الفرنساوي هناخد verb etre و نراجع ع الضمائر
je يعني انا
الكل : je
إسلام : je suis يعني انا اكون
Tu
il
Elle
Vous
ندي بصوت عالي : نسيت اقولك بقي تسريحة شعرها يا بت يا روني كانت كيرلي و يلهوي كانت تجنن
إسلام ترك القلم و وضعه علي الترابيزة و قرب منهم
إسلام : ايه اللي كان يجنن ده
ندي و روان كاتمين نفسهم من الضحك و الإحراج
إسلام : بترغوا في ايه من ساعة ما دخلت مبطلتوش رغي
ندي ضحكت
إسلام : أيوة بتزغزغك يعني
روان : ههههههههه سوري يا مسيو بجد مش هنضحك تاني
إسلام : طيب اتفضلي قوليلي انتي و هي تصريفات verb etre
روان: احم هاا
ندي : ههههه سوري يا مسيو اصل احنا ثقافتنا انجلش ف الفرنساوي ده مش بنفهم فيه اوي يعني كلمتين بننجح فيهم و خلاص
إسلام ضحك : لا بجد
ندي و روان :ههههههه أيوة
إسلام بعصبية : مش كفاية ضحك بقي
ندي : هي اللي بتضحكني يا مسيو
روان : انا برضو
إسلام بحدة : خلاص كفاية اتفضلوا اقعدوا و كفاية ضحك ممكن
____________________________________
حددت هيام مع عدي ميعاد يقابل والدها
و بالفعل كان عدي اتفق مع والدته و والده علي ميعاد مناسب و وصلوا العمارة هو و نور و اسلام و والدته و والده
شاهيناز : يعني هي ساكنة في انهي دور فهمنا اتصل عليها
عدي : حاضر يا ماما بتصل اهو .. أيوة يا حبيبتي بقولك احنا وصلنا ااه اطلع انهي دور امممم طيب هطلع و اكلمك
قفل عدي مع هيام و ملامح وجهه متغيرة لكن حاول ميظهرش
شاهيناز : ها انهي دور
عدي : الأخير
حسان:طيب افتح الاسانسير يا إسلام
دخلوا الأسانسير و وصلوا الدور الأخير و بعدها طلع عدي فوق السطوح و هما مستغربين لكن طلعوا وراءه
شاهيناز : عدي فهمني احنا طالعين هنا ليه
عدي وقف مرة واحدة : ماما هيام قالتلي أنها ساكنة فوق السطح من فضلك يا ماما نتكلم في اي حاجة لما نروح
شاهيناز بصدمة: شايف ابنك بيحطنا قدام الأمر الواقع ازاي ماشي يا عدي حسابنا معاك في البيت مش هنا
كانت هيام ساكنة في منزل صغير فوق السطوح
عبارة عن غرفتين و حمام و مطبخ صغيرين و صالة ضيقة جدا عدي فعلا اتفاجأ بكل حاجة هو كان عارف ان مستواها ضعيف لكن متوقعش انها عايشة فوق السطوح في اوضتين رحبوا بيهم أهل هيام كان عندها اختين صغيرين في ابتدائي و والدها و والدتها
والدها ( صابر ) ماسك شيشة و بيشرب و لابس هدوم داخلية فانلة حمالات و شورت ابيض و ده منظر غير لائق تماما اما والدتها باين عليها الطيبة لكن جالسة على الارض نظرا لعدم وجود كراسي
صابر : يا اهلا و سهلا بالضيوف تعالي يا بت يا هيام قدمي للضيوف حاجة تشربوا ايه
شاهيناز : لا شكرا مالوش لزوم
صابر : لا ولله لازم تشربوا حاجة لا مؤاخذة ملحقتش اغير هدومي و البت هيام استعجلتني هاتي يا بت يا روحية الجلابية بتاعتي
روحية: حاضر يابا
والدة هيام ( أمينة ) : يا اهلا و سهلا شرفتونا ولله اومال فين الباشمهندس عدي
عدي : انا يا طنط ازيك
أمينة : اهلا يابني فعلا زي ما هيام وصفتلي ربنا يحميك
عدي: ربنا يخليكي يا طنط
حسان : اومال فين العروسة
أمينة : اهي جاية يا هيام تعالي سلمي علي الضيوف
خرجت هيام و علي ايديها صينية الشاي و قدمته
نور بابتسامة : ازيك .. انا نور اخت عدي
هيام : ازيك يا نور اسم علي مسمي ولله
نور : ميرسي
إسلام بيهمس ل نور في اذنيها: امك ناوية لعدي الليلة شايفة بتبصله ازاي الواد ده هيتمرمط ولله
نور : علي فكرة مش بالماديات ولله شكلهم ناس طيبين بس بصراحة ابوها ده مسخرة بالشورت اللي لابسه ده
اسلام : طب بس اسكتي لاحسن ياخدو بالهم مننا
____________________________________
بعد ما روحوا البيت كان عدي منتظر محاضرة والدته و غضبها منه
شاهيناز بعصبية : كدبت عليا ليه لما سألتك عن مستواها و قولتلي معرفش
عدي : عشان فعلا مكنتش اعرف يا ماما اتفاجأت زيي زيك ولله العظيم
حسان : خلاص يا شاهيناز بكرة نتكلم
شاهيناز : لا مش بكرة انهاردة انت ايه رأيك يا عدي
عدي: اللي شوفته انهاردة مش هيغير حاجة عادي
شاهيناز بنرفزة : نعم يا حبيبي مغيرش حاجة ازاي انا متوقعتش ان مستواها كدا دي كدبت عليك مقالتش مستواها ايه
عدي قاطعها: لا يا ماما هيام مكدبتش هي اصلا مقالتليش قبل كدا مستواها ايه ولا انا سألتها لان مكنش فارق معايا و مازال
شاهيناز : بس هي عارفة يا عدي مستوانا ايه هي عارفة أننا الحمدلله مستوانا المادي كويس و اعلي منها بكتير فيه فرق شاسع ما بين واحدة عايشة في أوضة فوق السطوح و بينا
عدي بسخرية : اه يا ماما احنا عايشين في قصر معلش احنا مستوانا متوسط علي فكرة لا احنا عندنا قصر ولا فيلا
حسان : يوووه كفاية بقي يا عدي عيب اوي كدا
شاهيناز قعدت جنب عدي و حاولت تتكلم بهدوء: يا حبيبي افهمني طب سيبك من المستوي المادي انا مش هبص عليه ده مستوي اجتماعي ينفع تناسبه ده والدها قابلنا بمنظر مش كويس خالص ولا طريقتهم في الكلام صدقني يا عدي عدم التكافؤ والفرق في المستوى هيعمل مشاكل كتيرة بعد الزواج انت بتفكر بعاطفتك بس لو اتجوزتها هتقل المشاعر وهتبتدي تشوف اللي انت عارفه و بتتغاضي عنه دلوقتي ومع الاسف هتكون جوازة فاشله اسمعني بقي يابني الله يخليك شايف والدها بيتعامل معانا ازاي شايف الفرق بينا و بينها ياريت تنهي الموضوع ده من دلوقتي احسن ما تتعب بعدين في المستقبل
عدي : يا ماما انا بحبها ارجوكي كفاية بقي انتي ظالماها هيام بنت كويسة جدا صدقيني يا ماما
شاهيناز بنظرة حزن : انا داخلة اوضتي يارب بكرة تكون عقلت
دخلت والدته غرفتها و هو متضايق و في نفس الوقت مصدوم من مستواها لكن حبه ليها كان اقوي من انه يبص للشكليات دي
بيفكر هو ممكن كلام والدته يكون صح ؟ممكن فعلا هيام تتغير بعد الجواز ؟ممكن الفرق في المستوي المادي و الاجتماعي يفشل علاقتهم؟ أسئلة كتير جواه لكن اللي واثق من إجابتها انه بيحب هيام جدا عشان كدا قرر ميستسلمش و ينفذ وعده ليها بيبص ل نور و اسلام و والده اللي مشغولين بمشاهدة فيلم
عدي : نور هو انتي ايه رأيك
نور : بص يا عدي انا دايما مقتنعة ان اكيد الانسان مبيختارش اهله ولا مركزه ولا بيئته بس بيختار بعقله هو هيكون ايه عشان كدا المستوى المادي ده بالنسبة لي مجرد شكليات الأهم الشخصية و الإنسان اللي هتعامل معاه و انا حاسة أنها كويسة و الله اعلم انت ادري
عدي:صح يا نور عشان خاطري بقي كلميها والنبي ماما بتسمع كلامك و بتقتنع بيه خليها توافق نزورهم تاني و نتفق علي الخطوبة
نور : ماما يومين بس و هتهدي و ان شاء الله تقتنع متقلقش سيب الموضوع ده عليا
عدي قرب منها و باسها من رأسها : ربنا يخليكي ليا يا احلي نور في الدنيا
نور : اه صحيح نسيت أقولكم دي ياسمين بنت خالتي كلمتني و قالتلي اخد نسخة المفتاح اللي سابتها معايا عشان مهندسة الديكور هتظبط حاجات في الشقة و اخوها للاسف سافر مع صحابه اسكندرية و مش هتأمن لحد عليها غيري لحد ما ترجع هي و أكرم من شهر العسل
حسان : خلاص يا بنتي روحي بس شوفي مامتك الأول بس هي بعيد هتيجي كل يوم ازاي
نور : مانا هقعد هناك اليومين دول في الشقة بتاعتها و هاخد معايا طقمين و متقلقوش هطمنكم عليا
اسلام : أيوة بس ازاي تقعدي لوحدك
عدي: أيوة فعلا مينفعش
نور : يعني اعمل ايه يا اسلام انت عارف انا بحب ياسمين جدا و للاسف مقدرتش اقولها لا و هي مش هتأمن حد علي شقتها و حاجتها غيري و بعدين دول يومين يعني
حسان : خلاص يا حبيبتي روحي
نور : طيب بابا انا هاخد عربيتك عشان انت عارف المواصلات و كدا و خلي عدي يوصلك بعربيته بقي
عدي : عشان تعمليلنا حادثة بيها
نور : علي فكرة انا بعرف اسوق ها ريح نفسك يلا انا داخلة اصالح شاهي
____________________________________
في اليوم التالي
في باريس
كان عمرو بيتكلم مع بهاء
عمرو : بيبو خلاص بقي هنرجع بكرة مصر انت خلاص بقيت كويس الحمد الله
بهاء : بجد يا عمو
عمرو : طبعا بس قبلها هخرجك انهاردة و افسحك شوية و نشتري شوية حاجات
بهاء بسعادة: انا بحبك اوي
____________________________________
نور كانت بتجهز شنطتها و جهزت طقمين سمعت صوت زغاريط من البلكونة طلعت تشوف مين كانت والدتها واقفة في البلكونة
نور : ماما مين اللي بيزغرط
شاهيناز : ها لا مفيش
نور : ده جاي من عند شقة نسرين
شاهيناز : صحيح هتمشي امتي
نور لاحظت ان مامتها بتغير الحوار
نور :ماما في ايه
في اللحظة دي خرجت " نسرين " صديقتها و جارتها في البلكونة و معاها " علي " خطيبها السابق
نسرين : مش تباركيلي يا نونا انا و علي اتخطبنا
نور حاولت تتماسك : بجد مبروووك يا علي الف مبروك
نسرين بتضحك : عقبالك يا نونا
نور : اكيد يا حبيبتي بس هستنضف وقتها
دخلت والدتها و نور معاها و رزعت باب البلكونة وراها اول ما دخلت اترمت في حضن مامتها و عيطت
نور : دي صاحبتي يا ماما صاحبتي و و علي
شاهيناز : بس يا نور اهدي دول ميستاهلوش ولله مش عارفة كان عاجبك فيه ايه بس طب ولله فرحت انك سبتيه بكرة يجيلك اللي احسن منه ولله
نور : صعبان عليا صاحبتي يا ماما دي كانت صاحبتي هي و ميار و خايفة علي يبعد ميار عني
شاهيناز : لا معتقدش ميار بنت جدعة و بتحبك جدا متنسيش كانت بتقولك علي كل بلاوي علي المهم حبيبتي قومي اغسلي وشك كدا و روقي
نور : انا فعلا مبسوطة عشان عرفتها علي حقيقتها كان عندك حق يا ماما لما قولتيلي مش بترتاحيلها
شاهيناز : عشان بعد كدا تسمعي كلامي
خرجت نور و راحت شقة ياسمين بنت خالتها و كانت كلمت المهندسة و العمال و كملوا شغل فيها
_____________________________________
رجع عمرو من السفر كان محتاج يحضن مراته و بنته جدا اول مرة يبعد عنهم و يسافر لوحده كان مفتقدهم جدا دخل الفيلا و لسة هينادي علي سمر اتفاجأ بوجود هاني عدوه و حسام و 2 تانيين ميعرفهمش لكن واضح من شكلهم انهم بودي جاردز
عمرو بعصبية : انت انت بتعمل ايه في بيتي يا هاني
هاني ضحك و رد بسخرية : بيتك ههههه انا بعمل ايه هنا عشان انا شريك دلوقتي في الشركة و طبيعي اكون موجودة في الفيلا عندك
عمرو : سمر في ايه هو ايه اللي بيحصل ده فهميني
هاني : فيه ان مدام سمر خلاص بقت شريكتي ما هي وافقت ع العرض بتاعي
عمرو بصدمة: انتي يا سمر تعملي فيا كدا
وضع ايديه علي رأسه من الصدمة و مش مصدق اللي حصل قرب منها و مسكها من ايديها بقوة و قال بعصبية
عمرو : ردي عليا طب هو هددك عملك حاجة عشان تمضي صح
سمر : لا معمليش حاجة انا مضيت بمزاجي
عمرو : مش قادر أصدق انك زبالة اوي كدا
سمر : ليه يا عمرو ايه شوفتني في وضع مش كويس انا عملت اللي كان لازم يتعمل من زمان بس كنت مأجلاه اه صحيح نسيت أعرفك حسام حبيبي و قريب هنتجوز
عمرو ضربها علي وشها جامد و صرخ : انتي طالق اطلعي برة
حسام : انت ازاي تمد ايدك عليها انت اتجنتت و بعدين
سمر : بس يا حسام ثواني كدا يا عمرو دي شنط هدومك وانت اللي تتفضل برة مش انا لان نسيت اقولك انا نقلت كل حاجة باسمي و الأملاك بتاعتك كلها باسمي هههه عارفة ان الصدمة شديدة عليك بس انا عشان طيبة هديك 2000 جنيه تصرف نفسك بيهم
عمرو : يا ولاد الكلب انتو ايه .. وانتي عملتلك ايه وحش عشان تعملي فيا كدا
البودي جاردز اتدخلوا و منعوا عمرو يقرب منهم
سمر : طلعوه برة و خدو شنطه معاه
كان بيحاول يفلت منهم لكنهم كانوا الاقوى كان عايز يمسكها يقتلها صدمته فيها كانت قوية عايز يصرخ بس مش قادر كل حاجة منه راحت طلعوه برة الفيلا
_____________________________________
بعد ما انتهي العمال و المهندسة من الشغل فتحت الثلاجة افتكرت ان مفيش اكل فيها ف قررت تنزل تشتري طلبات
ركبت العربية و دخلت سوبر ماركت اشترت اكل يكفيها يومين انتهت من التسوق و ركبت العربية شغلت CD لاغنية بتحبها و بتغني معاها و بتخبط بايديها علي الدريكسيون موبايلها رن في اللحظة دي بتدور عليه جنبها و هي مش شايفاه فهمت انه في الكنبة الخلفية بتبص وراها تاخده غصب عنها خبطت في شخص فرملت فجأة و صرخت
نزلت من عربيتها بسرعة كان الشخص المصاب ( عمرو ) و الدم علي وشه و تقريبا فقد وعيه
الناس اتجمعت حواليها بمساعدة الناس ركبته عربيتها و وقفت امام أقرب مستشفي ندهت على الأمن و حضرولو نقالة و دخلوه الطواريء
كانت خايفة جدا و و متوترة لعنت نفسها علي غباءها يا عالم الشخص ده هيفوق ولا لا طب هيعيش ولا لا
افتكرت شنطه اللي معاها في العربية و موبايله اللي الممرضة سلمتهولها حاولت تفتحه لكن معمول ب باسورد دخلت الخط بتاعه في موبايلها كان متسجل رقم باسم sweetheart خمنت ان هي حبيبته او خطيبته اتصلت بالرقم
يتبع.......
🌸عمرو هيحصله حاجة ؟
🌸 و سمر رد فعلها ايه لما نور تكلمها؟
رأيكم بقي
التعليقات على الموضوع