انتقام العجوز غلين

انا كوينتن مبسوط جداً بالبيت الجديد اللي اشتريته من أيام ..
مكنتش مصدق اني هملكه بالمبلغ البخس ده ..
فيه قطع أثاث كتيرة وقيمة ..

رينا خطيبتي هتيجي تعيش معايا من النهارده ..
الباب بيخبط أكيد البيتزا وصلت ..

قعدت قدام التليفزيون كان فيه مجموعة كبيرة من شرايط الفيديو أخترت شريط منهم لكن لاقيت الجهاز اشتغل لوحده ..

ملكني فضول اشوف آخر فيلم اتفرجت عليه العيلة اللي كانت قبلي في البيت ..
فتحت البيتزا وبدأت في الأكل واشتغل الفيلم ..

ظهر على الشاشة شخص قاعد في غرفة بيقول ..
لما تشوفوا التسجيل ده يبقي انا في الأغلب ميت..
والأطباء هيقولوا ان سبب الموت ساكتة قلبية..

لكن مش هي دي الحقيقة ..
لو انتِ او انتَ الساكن الجديد..
أرجوكم امشوا من البيت ده فوراً ..

عملت إيقاف مؤقت للفيلم شربت شوية مياه..
مش عارف هو ده فيلم ولا تحذير ولا ده فيلم رعب بالصدفة بيتكلم عن بيت ملعون وساكن جديد ..

بس على كل حال انا مبأمنش بالحاجات دي ..
شغلت الفيلم مرة تانية وركزت أكتر في طعم البيتزا الجميل ..

وابتدا الشخص ده يتكلم ويقول ..
انا أندرو بشتغل كاشير في ماركت وزوجتي باتريسا بتشتغل رفيقة لواحدة عجوزة إسمها مدام غلين كانت عايشة في بيت كبير لوحدها ..

وحيدة زوجها مات من سنين ومكانوش بيخلفوا ..
جليسة على كرسي متحرك كانت باتريسا بترعاها مقابل راتب شهري كويس..
من فترة أصبحت أفعال باتريسا غريبة جداً كانت دايماً عصبية ومخنوقة من الحياة ..

في يوم قالتلي إنها هتبات عند العجوز غلين لأنها تعبانه..
وافقت ..
لكن باتريسا كلمتني تاني يوم وهي بتبكي وبتقول مدام غلين ماتت ..

كانت منهارة ..
كنت قربت أخلص الشيفت بتاعي..
روحت بسرعة على بيت مدام غلين كانت الشرطة هناك باتريسا أول ما شافتني جت واترمت في حضني وهي منهارة من العياط ..

التقارير الطبية قالت ان سبب الوفاة ساكتة قلبية..
بدأت في إجراءات الدفن بسرعة لأن مدام غلين مالهاش حد غيرنا يسأل عليها ..

واتفاجأنا إنها قبل ما تموت كتبت بيتها الكبير بأسم باتريسا..
المحامي بتاعها كان معاه كل الأوراق
وبعد شهر من موت مدام غلين روحنا نعيش في بيتها وسيبنا الشقة الايجار اللي كنا عايشين فيها ..

بس لاحظت ان باتريسا علي طول سرحانة وتصرفاتها بقت غريبة ..
أيام كنت أدخل عليها البيت اسمعها بتتكلم مع حد رغم أننا عايشين لوحدنا ..

الموضوع ساء جداً كانت بتبكي طول الوقت وبتردد كلام غريب إنها باعت نفسها للشيطان مكنتش فاهم ايه اللي بيحصل ..

الموضوع زاد أكتر لما سمعنا بموت المحامي الخاص بمدام غلين ..
الغريب إنه مات بساكتة قلبية ..
في ليلة استقبلت المكالمة دي من باتريسا بتتكلم بخوف وفزع شديد ..

اندرو تعالي البيت فوراً انا خايفة ..
هي هنا دلوقتي قاعدة قدامي على الكرسي المتحرك ونظراتها مخيفة..
مكنتش فاهم منها حاجة ..

هي مين اللي قدامها على كرسي متحرك؟
أول مرة أحس بالرعب ده في صوت باتريسا ..
حاولت أفهم منها أكتر لكن سمعت صوت صرخة قوية منها والخط قطع من غير ما ألحق أقول كلمة ..

إتجهت للبيت بسرعة وأول ما وصلت اتصدمت لما لاقيت باتريسا في الأرض مبتتحركش عينيها مفتوحة كأنها اتجمدت وهي بتصرخ من الفزع ..

حاولت افوقها لكن مفيش نبض ولا نفس ..
اتصلت بالطوارئ علشان أعرف بعدها ان باتريسا ماتت ..
ماتت بساكتة قلبية ..
بقيت عايش وحيد بعد فراق باتريسا كنت حزين جداً عليها ..
انا ماليش غيرها ..

في ليلة بعد وفاة باتريسا بشهر قلقت من نومي على صوت كرسي متحرك خارج غرفتي كأن حد بيتحرك بيه ..
فتحت الباب لاقيت الكرسي المتحرك فعلاً بس مكانش حد عليه ولاقيت غرفة مدام غلين مفتوحة معرفش ازاي الباب اتفتح والكرسي خرج منها..

باتريسا احتفظت بغرفة مدام غلين بكل تفاصيلها وحاجاتها..
دخلت الكرسي تاني الغرفة وقفلت الباب بالمفتاح ورجعت نمت..

نزلت شغلي الصبح لأن الشيفت أتغير من فترة ولما رجعت لاقيت حاجة غريبة جداً لاقيت باب غرفة مدام غلين مفتوح والكرسي المتحرك واقف قدام غرفتي ..

خوفت وحسيت بشئ مش طبيعي ..
لكن قلت اكيد انا مقفلتش الباب كويس إمبارح واتهيألي اني قفلته بالمفتاح ..

لكن اللي حصل يوم اجازتي أكدلي انه فيه حاجة مش طبيعية حصلت ..
كنت قاعد في غرفة الجلوس ومشغل التليفزيون ..
كان الوقت متأخر لما لاقيت الإرسال اتقطع عن التليفزيون واشتغل مقطع فيديو خارجي ..

فتحت عيني وانا بتحقق من باتريسا اللي ظاهره في الفيديو وهي واقفة في المطبخ قدام طبق حساء وبتخرج حبوب صغيرة وبتحطها في الحساء واتحركت بالطبق لغرفة مدام غلين ..

الكاميرا بتتحرك ورا باتريسا كأن فيه حد معاها وبيصورها ..
باتريسا دخلت بإبتسامة على مدام غلين وشربتها الحساء لآخر نقطة ..
وبعدها قعدت جنبها..

لمدة ساعتين علشان تشربها الدواء اللي بتاخده في الميعاد ده ..
لكن العجوز غلين مقامتش تاني..

الغريب هو ظهور إبتسامة على ملامح باتريسا ..
تصرف غريب على موقف زي ده ..
و مع شروق الشمس شوفت باتريسا وهي بتتصل بيا بتقولي الخبر وبتمثل إنها منهارة ..

الإرسال رجع تاني ..
وانا كأني كنت في كابوس ..
مش فاهم ايه اللي حصل ده ..
بس اللي انا شوفته ده بيثبت ان باتريسا قتلت مدام غلين ..
لكن ليه تعمل كده ..

البيت ..
والمحامي..
باتريسا والمحامي ماتوا بنفس الطريقة..
ساكتة قلبية زي تشخيص وفاة مدام غلين ..
ليه عملتي كده يا باتريسا..ليه ..

الفيديو إنتهى لحد هنا ..
لكن الشخص اللي كان بيحكي مكانش حاسس ان الكرسي المتحرك بيقرب منه فعلاً ..

إتجهت لجهاز الفيديو علشان اخد الشريط ده واقدمه للشرطة ..
لكن الغريب إني ملاقيتش أي شريط جوا الجهاز.. حسيت بخوف شديد ..

لما سمعت صوت حركة لعجلات كرسي متحرك ولما بصيت في إنعكاس شاشة التليفزيون اتفزعت من صورة ست عجوزة شكلها مخيف قاعدة عليه ورايا.

في الوقت نفسه سمعت جرس الباب ..
حاولت أتحرك في إتجاه الباب لكن ..

أتجمدت مكاني وحركتي اتشلت لما وقفت قدامي
بشكلها المرعب وبيخرج من بوقها حبوب كتير بتقع
على الأرض..

حاولت أصرخ صوتي مطلعش..
حسيت ان الدنيا ضلمت وفقدت الوعي..
فوقت في المستشفى وجنبي رينا..

اللي طلبت المساعدة من الشرطة اللي كسروا الباب
علشان يلاقوني قدام التليفزيون فاقد الوعي..

حكيت للشرطة اللي حصل لكن مكانش معايا أي
دليل يثبت كلامي ..

تمت
انتقام_العجوز_غلين
محمد_خالد_رزق