الغرفه 47

الغرفه_47 ا
لجزء_الاول
صووت صريخ عالي مع ضحكات غريبه ، لمبه الطرقه بتطفطف ، البيبان بتفتح وتتقفل بقوه ، خيال اشخاص بتظهر وتختفي مع النور ، دم بيسيل علي الجدران مع كلمات بلهجه غريبه ، نور شديد طالع من احد الاوض بيقلب الي نار ياكل كل اللي فيها ، دخان بيملي المكان ويعمل شبوره بتنتهي بنهايه كل حاجه ...
انا مالك يوسف ، دكتور في مستشفي امراض نفسيه وعصبيه في القاهره بقالي 6 سنين ، طقوس غريبه اعتدنا عليها في المستشفى هنا في يوم 25 مايو من كل سنه ، الاوضه رقم 47 السبب
من 7 سنين في يوم 25 مايو شاب جاله حاله صرع شديده وكان بيكسر في كل حاجه حواليه في الاوضه ، الممرضين سابوه يهدأ كالعاده لكن المفأجاة انه ولع في نفسه ومات ، او مماتش ..  ده اللي قاله كل الناس اللي حذروني اشتغل هنا لكن انا رفضت وصممت اشتغل هنا واعتدت علي الرعب ده في نفس اليوم من كل سنه
الغريب في الموضوع ان الطقوس ديه مش بتعدي بالساهل فكل مره دكتور بيختفي وبنلاقيه بعدها بيوم في الاوضه مقتول ومكتوب علي الحيطه بدمه كلمه بلغه مش مفهومه ، حاجه اشبه بالرموز اللاتينية القديمه ، كنت بجمع الرموز علشان افهم لكن في كل مره مبقدرش اترجم اي حاجه
- الو ، ايوه يا ليلي ، المره ديه اللي اتقتل يحيي يا ليلي ، بقولك يحيي يحيي ، ماشي مش هروح من غيرك ، سلام ..
يحيي زميلي في المكتب طول ال6 سنين ، ضلع من اضلاع المستشفي من ساعه تأسيسها ، كان اخر ضلع باقي يعتبر ، اخر دكتور حضر الحادثه فكلهم ماتوا
- اهدي يبني هنروح سوا للمدير اهو وتقدم استقالتك وتمشي من هنا
= مش همشي من هنا غير لما افهم اللي بيحصل
- مش هتفهم ، مش هتفهم ونهايتك هتكون هنا يا مالك
= معنديش مشكله علي الاقل ابقا حاولت
" بيخبط علي مكتب المدير "
= بعد اذنك يا دكتور ، انا عاوز افهم اللي بيحصل هنا
* تفهم ايه ؟ تفهم ان الدكاتره بتوعي بيروحوا واحد ورا واحد ، ولادي اللي مربيهم علي ايدي ومعلمهم ماتوا هنا
= يا دكتور انا عاوز اساعدك واريح نفسي ، اللي ماتوا دول كان فيهم زمايلي وعاوز اجيب حقهم ، انا عاوز منك تصريح للارشيف يسمحلي اجيب كشوفات المرضي اللي ماتوا هنا من 7 سنين وانا هتصرف
* اتفضل ، مع اني واثق ان مفيش فايده
خرجت ومعايا ليلي اللي منطقتش بكلمه ، كل تركيزها كان علي لوحه مكتب الدكتور " د/ شريف رشوان اكبر دكتور نفسيه وعصبيه بالوطن العربي "
في طريق ومرورا بالاوضه 47 سمعت حد بينادي عليا من الاوضه اللي جمبها
- متحاولش يا دكتور ، الروح سيطرت علي المكان هنا ومش هتسيبه غير لما تخلص علي كل اللي فيه
= روح مين !!
- روح الشاب الغلبان اللي اتعذب لحد ما مات وبعدين ولعوا في جثته
= اتعذب ! اتعذب ازاي
* يلا بينا يا مالك من هنا ده شكله تعبان
- انا فعلا تعبان يا استاذه ، او هما اتهموني بكده ورموني هنا علشان كنت شاهد علي اللي حصل ، الشاب ده كان عنده معلومات تودي صاحب المستشفي وكل الدكاتره اللي هنا في داهيه ، خاف علي نفسك يا دكتور علشان دورك قرب
* ياا مالك يلااا بينا من هنا
= دور مين اللي قرب !! انت مجنون يا راج...
مكملتش جملتي وكان الدخان ملي المكان وبعد ما اختفي كان اختفي معاه المريض مع وجود جرح صغير في ايدي ومكتوب بالدم اللي نزفته الرمز اللاتيني اللي كان ناقص ..
مشيت للارشيف خطوه بتجر خطوه وانا بفكر في اللي سمعته ، معلومات ايه اللي يعرفها شاب زي ده ، وهل بعد ما كملت الجمله هقدر اترجم معناها
وصلت الارشيف وبعد تدوير استغرق وقت كبير مع ليلي ، كل واحد فينا معاه ملفات وبيدور فيها علي حاله تشبه حاله الشاب ، اي دليل يوصلنا ليه  ..
- اهو لقيته يا ليلي " توفي نتيجه حريق كبير شب في غرفته " وكان في نفس الاوضه " الغرفه 47 "
مسكت ليلي الملف والصدمه بانت علي ملامحها ، كل الحكايات اللي قالها المريض ممكن تكون صح ، مفيش حاجه تانيه غير كده ، شافت حاجه هتغير كل التفكير والادله اللي كانوا ماشيين وراها ، الاسم !! ، مجرد ما قرأيته فهمت كل حاجه ، الاسم كان .....
" يتبع " ...
...................................................................................

#الغرفه_47 #الجزء_الثاني
كان " علي شريف رشوان " ..
جريت علي اوضه المدير باقصي سرعتي ، فتحت الباب واللي اتوقعته لقيته ، كان هو اللي عليه الدور ، متبقاش غيره حضر الحادثه ولسا عايش ، دكتور شريف غرقان في دمه علي الكرسي لكن المره ديه من غير اي رموز ، فالجمله اكتملت وناقص مني الترجمه ، اللمبه بتطفطف وصوت الصريخ بيعلي ويملي المكان..
- الو ، وصلت لايه يا لؤي ، بتقول ايه !! ترجمه الرموز " صديقتك الجميله هي القاتله "
ملحقتش ابص ورايا ، اخدت ضربه قويه علي دماغي افقدتني الوعي لفتره مش بسيطه ...
- آااه  ، ايه ده !! انا فين وبعمل ايه هنا !!
= متقلقش يا دكتور انت في اهدي مكان في المستشفي ، في الاوضه 47
- انتي يا ليلي ، طيب ليه !! وازاي !!
= قبل مجاوبك احب اقولك اسمي الحقيقي بالكامل انا اسمي ليلي شريف رشوان ، اظن دلوقتي فهمت
- اخته !! انتي اخت علي
= ايوه اخته ، انا بنت شريف رشوان اللي رماني انا وامي وانا لسا صغيره ومفكرش حتي يسأل فينا ، في كل مره بخش مكتبه بيبقا عندي شعورين بيقطعوا بعض ، اروحله واخش في حضنه ولا اروحله واطعنه في قلبه
- واخوكي ذنبه ايه وليه حصل فيه كل ده
= اخويا وصل لملفات تودي ابويا في ستين داهيه ، ابويا مشترك في اكتر من 100 عمليه سرقه اعضاء ، حالات الوفاة اللي متسجله في المستشفي بتاعته اسبابها كلها وهميه علشان يغطي علي جرايمه ، ماسك علي كل الدكاتره القدام هنا مصايب وده اللي اداني الفرصه اخلص عليهم واحد ورا واحد من غير ما يسيبوا المستشفي ،  كانوا 8 مع ابويا ، عدا 6 سنين فكل سنه بموت واحد علشان احفر التاريخ ده في دماغ الباقيين ، فاضل 2 ، حبيبك لؤي اللي عليه الدور
- لؤي !! ازاي وهو عمره مشتغل في المستشفي هنا
= اشتغل بس مقالكش انه سابها بعد الحادثه ، كلمه دلوقتي لو عايز تتأكد
- ..........
= ومش هيرد ،  الناس في الشارع لاقوه رمي نفسه من البلكونه وانتحر يعيني 
- انتي بتعملي كل ده ازااي ! ازااااي 
= لجأتلهم علشان يساعدوني مقابل اني انفذ شروطهم
- هما مين دول !!
= اللي حوالينا واحنا مش شايفنهم ، اللى يقدروا يعملوا اللى انا وانت والف غيرنا ميقدروش يعملوه ، هما الوحيدين اللى كانو مستعدين يساعدونى عشان كدا لجأتلهم
- مش هتقدري تنفذي شروطهم
= مش مهم ، المهم اني هبقا نفذت اللي في دماغي وانتقمت لنفسي ولاخويا ، دوقت كل واحد فيهم من نفس الكاس  ، نشرت الخوف في قلوبهم وهما مستنين دورهم ، خلصت علي 7 دكاتره اشتركوا في الجريمة مع ابويا ومتبقاش غير واحد ، انت ...
* تم العثور علي ليلي مشنوقه وبجانبها 9 جثث مشوهه مجهوله الهويه في الغرفه 47
النهاية
ل_حاتم_عشري