كبرياء الصمت (الحلقه 26) الاخيرة
الفصل 26 و الأخير ( كبرياء الصمت )
روان مسكت شنطتها و لسة هتمشي : طيب تمام ..بعد اذنك
عمرو مسكها من ايديها :استني رايحه فين ؟
روان :هروح وانا اسفة لو سببتلك ازعاج يعني
بصلها عمرو وماسك ايديها
عمرو :انتي بجد هتتغيري و مش هتيجي في يوم تقولي عايزاك كدا و ..
روان : صدقني انت عندي احسن من اي حد في الدنيا انا غبية و استاهل كل اللي يجرالي بس الا انك تبعد عني ولله بعد كدا هنتفاهم و اي حاجة بعد كدا هسمع كلامك فيها لان كلامك كان صح فهلت
روان بتجمع كلامها : انت قولت ايه
عمرو : وحشتيني
روان حضنته : انا مش مصدقة والله
عمرو: انا فعلا مكنتش هرجعلك بس حسيت انك بجد لسة بتحبيني و معترفة بغلطك
ضمته اكتر و حضنته : بحبك
عمرو : وانا كمان
روان : لا عايزة اسمعها يا عمرو
عمرو : بحبك يا روان ... بصي ايه رايك نحدد ميعاد فرحنا اللي بقالنا سنين مأجلينه
روان :بالسرعة دي
عمرو : سرعة ايه بس ده صحابي اللي مخطوبين بعدنا معاهم عيال دلوقتي
روان : اوكيه موافقة كلم احمد و شوف
_____________________________________
في نفس الوقت
مالك : و المفروض اني اسامحك بعد ما سلمتي نفسك لواحد عشان يتجوزك مقابل ترجعي حقك و خونتي صاحبتك
منار : انا مكنتش اعرف ان هيحصل كل ده يومها كنت فاكرة اني هغريه بس و بعدها واحدة واحدة هنتجوز
مالك بيضحك : و المطلوب مني ايه اسامحك يعني و اقولك يلا نتجوز
دموعها اتجمعت: قولتلك كان غصب عني
مالك : بتهيالي ميعاد كشفك انتهي عشان في دور بعدك و عندي شغل مش فاضي اسمع كلام تاني
منار :يعني
مالك قاطعها : مش عايز أعرفك تاني و ياريت متكلمنيش عشان لو حصل انا لحد دلوقتي محترم معاكي صدقيني المرة الجاية هقول كلام هيجرحك و وانا مش عايز اجرحك بكلام زفت روحي يا منار احسن
_____________________________________
ايسل مسحت دموعها :عاصم أخرج
عاصم : طب قوليلي اعملك ايه انا بتعذب كل يوم بسبب اللي عملته فيا و فيكي حاسس ان الدنيا هتديني فرصة أخيرة يمكن نصلح كل حاجة
ايسل : قولتلك اخرج لو سمحت يا سيف خليه يطلع
عاصم : مش هينفع
عبير :سامحيه يا حبيبتي حتي عشان بنتكم
ايسل : مانا سامحت قبل كدا كتير كتير اوي و كانت ايه النتيجة
عاصم : صدقيني دي اخر مرة
ايسل : لا و ولو مخرجتش انا اللي هخرج
عاصم : خلاص انا نازل
____________________________________
مر شهر و كان يوم كتب كتاب روان
في الدور الأول من السلم في العمارة اللي روان ساكنة فيها
سيف :ايسل بصي انا هاخد فريدة اشتريلها حاجة حلوة من السوبر ماركت عشان نسيت
ايسل : مش مهم يا سيف و احنا نازلين
سيف: لا عشان متزعلش
ايسل : طيب انا هاجي معاك
سيف : لا مينفعش
ايسل : هو ايه اللي مينفعش
سيف : اطلعي انتي يا ايسل عشان روان اكيد محتاجاكي دلوقتي واحنا مش هنتاخر يلا باي
و اخد فريدة و نزل
ايسل : يا سيف يخرب عقلك مش هعرف انزلك ام الكعب ده حاسة اني هقع و الأسانسير كمان مالو مبيفتحش ليه
ايسل طلعت الدور التاني فجأة الأسانسير وقف و حد شدها من ايديها و قفل الأسانسير تاني لسة هتصرخ حط ايديه علي شفايفها و بصلها لاقت عاصم و هو شادد ايديها و ضمها لحضنه
عاصم:وحشتينى..
ايسل بتحاول تزقه مش عارفة ولا عارفة تتكلم
عاصم شال ايديه من علي بقها: بقولك وحشتيني
بتحاول تبعد عنه : ابعد ايدك
بتحاول تبعد عنه وهو ماسكها : مش هسيبك يا ايسل مهما تحاولى
ايسل بتوتر : ابعد ايدك ونتكلم زى الناس العاقله
عاصم :ومين قال انى عاقل ..اللي عملتيه معايا يجنن بلد ده انتي ربيتيني من اول و جديد
ايسل : و ياريتك هتتغير
عاصم : ولله العظيم مستعد احلف قدامهم كلهم اني بجد هتغير
ايسل سكتت
عاصم : انا مش همشي انهاردة غير وانتي معايا و في حضني
ايسل : بس انا تعبت مبقتش قادرة استحمل
عاصم : وانا مش هسببلك اي وجع تاني صدقيني المرة دي بجد وحياة فريدة تسامحيني
ايسل : ولو كلمت بنات تاني
عاصم : وحياة ايسل عندي ما هعمل كدا و لو عملت احرميني منك
ايسل : ماشي موافقة بس دي اخر فرصة يا عاصم ولله آخر فرصة بجد
عاصم شدها لحضنه اكتر : اوعدك من انهارده ان هتلاقيني شخص تاني و احسن من الأول و أوعدك انك هتفضلى فى حضنى ومش هسيبك تبعدى عنى
_____________________________________
خلص كتب الكتاب و المأذون بيقول
المأذون :بارك الله لهما و جمع بينهم في خير
عمرو : مبروك يا حياتي
روان : الله يبارك فيك ي حبيبي
احمد : مبروك يا حبيبتي
روان : ايه يا احمد الموسيقي الميته اللي مشغلنها دي ما تخليهم يشغلوا حاجه عدله حجرين عالشيشه مثلا و لا غمازات عاوزين نرقص و نهيص
احمد : هههههههه متقلقيش هنشغل احلي اغاني دلوقتي اصبري
روان :ماشي يا احمد
احمد : خلي بالك من اختي يا واد
عمرو : في قلبي قبل ما هتكون في عنيا يا حمادة .. وصيها هي عليا مجنونة اوي البت دي
روان : انا مجنونة
عمرو : احلي مجنونة
احمد : ربنا يخليكوا لبعض يارب
عمرو : يااااااارب
عاصم للكل : لو سمحت انتبهوا ھنا لدقیقة
انا من موقعى ده عاوزكم تشهدوا ع كلامى دا
ايسل .... اوعدك انى مش ھسیبك ابدا في يوم زعلانة ولا هخونك تاني و قدام كل الناس دي اني بجد هتغير انتى اجمل ھدیة ربنا بعتهالى
ايسل ... بحبك ،،،لالالالا بعشقك موت
الكل صفر وھیص و ايسل راحت ناحیة عاصم وحضنته
احمد : ان شاء الله نصیبك ھیكون مع اللي تستاھلك وتحبك وتحبها بس ابوس ايدك تعترفلها ع طول
سيف بيضحك: النصيب مینفعش ندخل فیه ھو بیحصل بس و بعدين انا نسيت
احمد : بجد
سيف : اه طبعا بقولك ايه انا عطشان هشرب ماية
سيف وقف عند البار و هو بيلتفت وقع عصير ع فستان بنت من الموجودين
.... : انت مبتشوفش يابني انت ...
سيف : اسف مقصدش ولله
.... : ايه ده سيف ازيك
سيف : انتي زي
.....: زينة انت مش فاكرني
سيف :لالا فاكرك اللي كنتي متصورة مع ايسل و بتاكلي مصاصة
زينة: هو انت هتفضل فاكرلي دي و علي فكرة انا كبرت
سيف : ااه ما هو باين
زينة : هو مش انت برضو اللي كنت عامل تاج ( بتنطقها ب ال j ) ل بيكشر ل ايسل ع الانستشرجرام
سيف : كنت عامل ايه حضرتك
زينة : تاج ع الانستشجرام
سيف بيضحك : مفيش ش خالص يعني و بعدين متتكيش ع الحروف اوي كدا
زينة ضغطت ع شفايفها : انت بتستظرف يعني
سيف : لا بس الانجليزي بتاعك تحفة
زينة : لعلمك بقا الانجليزي بتاعي اللي بتتريق عليه ده عندنا في العيلة بيدوني لقب بلوفيسيرة عليه
سيف :اسمها بروفيسيرة ... صحيح انتي في سنة كام ي بروفيسيرة
زينة : لسة مخلصة 3 ثانوي و مستنية النتيجة
سيف : ربنا معاكي
_____________________________________
منار اتقابلت مع ايسل في الصالة
منار : ازيك يا ايسل
ايسل كان معاها عاصم : طيب انا هجيب ماية عشان عطشانة جاي معايا ولا هتفضل واقف هنا
عاصم : لا جاي
دخلت ايسل البلكونة و عاصم وراها
ايسل بعصبية : ايه اللي جابها انا مش فاهمة
عاصم : اهدي يا حبيبتي
دخلت منار في الوقت ده
منار : انا عارفة انك مش عايزة تشربي اشربي دخلتي عشان
ايسل : دخلت عشان مش عايزة اتكلم معاكي
عاصم : طيب انا هشوف احمد
خرج عاصم
منار : ايسل انا اسفة علي كل حاجة حصلت مني
ايسل : مش فاهمة انتي عايزة مني ايه
منار : عايزاكي تسامحيني و نرجع صحاب تاني احنا مش عشرة يوم ولا شهر ولا سنة ده احنا مع بعض و صحاب من 6 ابتدائي
ايسل بتضحك : طب كويس انك لسة فاكرة اننا صحاب من 6 ابتدائي و لسة فاكرة اننا في بينا عشرة انا بجد بستغرب اوي انتي اثبتيلي ان الصحاب مش بعدد السنين صاحبتي بقالك 12 سنة بس اقسم بالله عندي صحابي اللي عرفتهم من الجامعة زي سيف و روان احسن منك
منار : يا ايسل ربنا بيسامح افتكري الحاجات الحلوة اللي كانت بينا
ايسل :حاجات حلوة ايه اللي افتكرها ده انا لما بفتح فيديو فرحي بكون هاين عليا اقص كل مشهد انتي موجودة فيه و تقوليلي افتكرلك الحاجات الحلوة عقاب الندل اجتنابه
سابتها ايسل و خرجت
____________________________________
اشتغلت اغاني و زينة رقصت مع البنات ولاحظ سيف النظرات الى بیتبص لیها من المعازیم..........
راح ناحیتها : ایه یا زينة مش كده محسسانى انه اخر فرح ھتحضریه
زينة: كبت بقى یا سيف بعید عنك وبعدین انت مركز معایا لیه ده انا مصدقت اجي فرح من غير أخويا و بعدين احنا في فرح و كدز
سيف : طیب اھدى شویا انتى اكتر بنت شعنونة الكل بیبص علیكى
زينة: بقولك احنا فى فرح
سيف :في كتب كتاب ع فكرة
زينة :فرقت يعني
سيف :اه
____________________________________
روان : انا خايفة تبعد عني تاني
عمرو مسك ايديها و باسها : انا مش عايزك تخافي لاني بجد هفضل معاكي دايما انا مبسوط اوي وانتي معايا
روان : انا بحبك اوي يا عمرو بجد انت هدية ربنا ادهالي و هحافظ عليها عشان تفضل معايا دايما
عمرو : ربنا يخليكي ليا
____________________________________
جنة : مامي مامي عايزة اعمل بي بي
بوسي : طيب يا جنة ثواني يا روان هدخلها التواليت و راجعالك
دخلت بوسي مع جنة ناحية التواليت حد بيشدها من ايديها و قفل الباب
جنة : تمام كدا يا بابي انا جبتهالك
احمد بيجز ع اسنانه: تمام يا حبيبتي روحي انتي بقا
جنة : لا ماليش دعوة
بوسي : في ايه يا احمد
احمد حضنها من ضهرها : مفيش بس انتي وحشتيني جدا
بوسي ضربته علي كتفه : اتلم ها البنت واقفة
احمد : لا بجد وحشتيني
بوسي بتغمز ل جنة : معقولة البنوتة القمر دي بنتي
احمد بيبص ل بوسي : معقولة القمر دي مراتي ما تطلعي يا جنة تيتا بتنادي عليكي
جنة : اومال انا مسمعتش ليه و بعدين بطل شقاوة ها
____________________________________
النهاية
______
السؤال اللي منتظره الكتير بقا ايه هو الحقيقي و ايه الخيالي ؟؟؟
مبدئيا كدا انا كنت منزلة بوست ع البيدج اني عايزة اختار أسماء الأشخاص من أسماء الفانز لكن طبعا مش هختار اي اسم و خلاص لا هختار الاسم اللي لايق مع الشخصية ف بنت قالتلي اكتبي ( ادم ) بس اعمليه شخصية بنت وحشة في الأول قولتلها ليه ... قالت هحكيلك انبوكس بدأت تحكيلي انا عيطت من كلامها فعلا و صعبت عليا اوي قالتلي يعني ينفع تكتبيها بس علي طريقتك انتي قولتلها اكيد تصدقي دي شبه الفكرة اللي عندي شوية ف ممكن ادخل قصتك فيها
المهم ان الحكاية الأصلية أن فعلا عاصم ده كان بيكمل دراسته في لندن و رجع لكن مش دكتور في الجامعة فعلا شبه الممثل التركي اللي في مسلسل بنات الشمس (اللي اسمه علي ) الحكاية ان هي كانت فعلا طلعت عينيه عشان يرتبط بيها و ارتبطوا و بعدها عرفت انه بتاع بنات و رجع للي هو فيه تاني و كانت مامتها و اخوه بيحظروها منه (سيف ) انا عاملاه في القصة انه صاحبها لكن في الحقيقة هما كانوا مش أصحاب من الاول هما كانوا أصحاب بعد ما ارتبطت ب عاصم بفترة كبيرة سيف مكنش يعرف ان هي و عاصم مرتبطين اصلا لان كان عاصم بيقول احنا صحاب عشان كان بيقاوح و يقولها انا مش بتاع جواز و سيف حبها بعدها عرف انهم فعلا مرتبطين قال ل عاصم .. و قالها سيف عايز يتقدملك بس طبعا كان بيقول كدا بيشوفها هي لسة بتحبه رغم خيانته ليها ولا لا ف هي رفضت في الفترة دي هي و سيف كانوا صحاب جدا و كان بيقف معاها في اي مشكلة بتواجهها و كان سايبها تفكر توافق عليه ولا لا ...لكن أتأكد أنها هتفضل تحب عاصم ف كان بيساعدها يتغير لحد ما في يوم اتخانقت مع عاصم خناقة كبيرة بسبب صاحبتها كانت في الاصل صاحبته و عرفها عليها و عرفت أنها خانته معاه
لما هي بعدت عنه اتجنن لانها كانت ضعيفة اي حاجة بيعملها بتسامحه عليها و ترجعله عاصم كان صريح جدا لما يكلم بنت او يقابل بنت يروح يقولها انا عملت كذا و كذا هي تتخانق معاه لكن بعد كام يوم ترجعله و يتقابله و يتكلموا تاني لدرجة انه كان بيعرفها علي صحابه البنات اللي يعرفهم اما سيف كانت مهمته انه ينصحها لكن هي مسمعتش كلام حد هي حبت عاصم جدا وصلت بيها أنها كانت هتنتحر مرتين بسببه ( عشان كدا انا عكست شخصيتها خلتها قوية و تقدر تستحمل الوجع )
ايجا في يوم فجأة قالها انا فعلا بحبك و عايز اخطبك اتخطبوا و اتغير شوية لحد الجواز بعد ما فريدة ايجت و رجع تاني لعادته و فعلا كانت ايسل مش بتشيل حد مسؤوليتها و حماتها كانت مش بتحبها فعلاا في الأول بعدها قررت تاخد موقف منه و بعدها رجع كويس تاني
شخصية بوسي و احمد دول __ أحمد ده أخو عاصم اصلا الاكبر منه و بوسي دي خطيبته و صاحبة ايسل و هي و احمد سبب تعارفهم ع بعض لان كان يوم عيد ميلاد بوسي عاصم كان لسة راجع مصر و خلص دراسته في لندن ف كان رايح عيد ميلاد بوسي خطيبة أخوه و اتقابلوا هناك و حاول يكلمها و هي صدته من بعدها و هو حاول يكلمها تاني كان احمد بينصحها كتير تبعد عنه لأنه عارف اخوه بتاع بنات و قالو هي مش زيهم ف بلاش احسن (لكن حكاية احمد و بوسي دي حقيقة دي واحدة صاحبتي جوزها مهندس و فعلا مكملتش الجامعة بسبب الأولاد و بسببه قالها هخليكي تكملي و هو اللي اصر تخلف بدري لكن الأسماء احمد و بوسي و جنة و عمار دي واحدة صاحبتي تانية انا بحبها اختارت اسمها و اسم جوزها و ولادها اكتبهم طبعا حكايتها غير دي )
جنة _ دي اخت ايسل معرفش هي كانت بتعمل كل المصائب دي ولا لا بس هي لمضة
عمرو و روان _ كنت عايزة اتكلم عن الولد اللي زي عمرو الشخص اللي بيصالح دايما و يسامح و يعدي هي بتكون فاكراه ضعيف لكن هو ضعيف بحبه ليها
و فعلا عاصم جايب ل ايسل كلبة اسمها بيلا
___________________________________
ياريت بقا كل بنت كانت بتابع في صمت تقولي رأيها حتي في الفصل الأخير ده و فعلا عجبتكم ولا و قولولي نصيحة ليا او نقد يعني انا كنت في القصة دي بحاول أعلي مستوايا فيها
انا عايزة البوست يتمليء كومنتات تشجعني اكمل لاني هحتفظ بيهم و هقراهم كل ما احس اني متضايقة و مش عايزة اكمل
و طبعا السؤال المعتاد عايزني اكتب حاجة تاني ولا خلاص كدا
💙 ملحوظة كل اسماء الشخصيات دي اسماء صحابي اللي متابعيني مش أسماء الشخصيات الحقيقية
___________________________________
الغرض من القصة
1_الحياه طبعا مش بمبي ولا حاجه هتلاقيها كاروهات شويه يوم ابيض ويوم اسود الشطاره انك تلوني الاسود كل بیت مبیخلاش من المشاكل ..لكن امتى وازاى والاسلوب یكون ایه بیختلف من بیت لبیت ...
2 _ حب من طرف واحد ..حب ملوش نتیجة غیر وجع القلب لانه مش متبادل ..حب مفقود منه الامل والاصرار علیه ضیاع عمر ووقت
3 _ لو بتحب حد روح قولها يمكن هي كمان بتحبك او حتي لو مش بتحبك قولها عشان ترتاح محدش ضامن بكرة ايه
4 _العلاقة بین الاتنین مشاركة یعنى اى قرار
كویس او وحش الاتنین یتناقشوا مع بعض مینفعش تاخد قرار وتفتكر انه ف صالح الطرف التانى انت كده بتفصله عنك ..المناقشة بین اتنین بتوصل لنتیجة افضل او حل وسط یرضى الاطراف فبلاش تعند في اللي ممكن تتتفاهم فيه عشان ماتضطرش تخسر حاجات أكبر.
5 _متاخدش تجربة غیرك مقیاس لتجربھ
ھتعیشها ..كل تجربة لیھا ممیزاتها وعیوبها بتختلف عن غیرھا بلاش نسمع كلام من حد مش مضمون هو صح ولا غلط لان ممكن كلامه يخوفك و تفكري ان كل تجربتها هتحصل معاكي زي ما حصل مع ايسل قبل فرحها بيومين )
6 _ الصحاب مش بالعشرة ولا بعدد السنين المواقف هي اللي بتعرفك مين صاحبك اللي بجد
7_ البنت لما بتحب بجد وتدى الامان وتتصدم
وتنجرح بیبقى صعب تنسى وتسامح الا في حالات قلیلة وبتتغیر شخصیتها اوقات للاسوء
8_ يمكن انتي مريتي بمواقف ضيعت منك حاجات كتير لكن صدقيني .. غلطان اللي بيقول اللي اتكسر مابيتصلحش 😉اللي اتكسر بيتصلح لان ربنا اللي هيصلح .. ❤❤❤ عشان كدا اوعي تيأسي
9 _ شخصيتك مش تتنازلي عنها اللي هيحبك هيحب كل حاجه فيكي ومش هيبقا عايزك تغيري حاجه في شخصيتك مش اللي يقولك اتغيري ✋ حبي اللي يستهلك ... لكن لو قالك غيري شيء فعلا انتي شايفة انه غلط حاولي تغيريه غير كدا بلاش
10 _بلاش ترددي كلمة الطلاق في كلامك مع جوزك خصوصا وقت الخناق بينكم ، لأن تردد الكلمة دي ولو على سبيل التهديد بيخليها تديله احساس بعدم الأمان وعدم الاستقرار
11 _بطلى تتخانقى مع جوزك علشان هيتخان معاكى وهيخرج هو يسهر مع صحابة وانتى هتفضلى متنكدة ( الكلام ده ع بوسي و احمد طبعا 😍😂 )
12 _أنت عملت ذنب و عاوز تتوب بس خايفه ربنا مايقبلش توبتك ، تعرف انك مجرد ماراودك الاحساس ده خليك ع يقين و اتاكد ١٠٠٪ ان توبتك هتتقبل بس تتغير بذمة
13- تحلي ببرود الاعصاب و ابتسمي للعالم - Smile and Wave
14 _ ركزي مع نفسك انتي و جوزك بس مش مع حد تاني
15 _اعترفي_اعترف باخطائك ... عادي ما كلنا بنغلط بس اهم حاجة نتعلم من غلطانا و ميتكررش
16_ جوزك ليكي انتى لوحدك متتخليش عنه لاي واحده تاخذه منك ولا تتخلي عنه بسهوله ولا تتنازلي عنه لاى واحدة
17 _لو الراجل خاين لازم فرصة لاصلاحه انتي بس عالجي الأمور مع نفسك ولو عايزاه و متمسكة بيه اقبلي تغيريه و لو مش هتقدري سيبيه فورا
18 _ الراجل الي بيسامح و يصالح بنفسه مش ضعيف ده ضعيف بحبك اوعي تخسريه
19 _الراجل اللي معندوش تجارب ده تقدري تشكلي شخصيته بنفسك لأنك اول حد في حياته
20 _كلمة بحبك سهلة لكن اثباتها صعب
21 _ الراجل اللي بيحب بيتحمل حاجات كتير محدش يستحملها بس ده لو بيحب
22 _الاهل عامل اساسى لتكوين شخصية اولادهم احتواءهم و حنيتهم اهتمامهم بيهم بيفرق كتير في شخصيتهم لما يكبروا بالذات الاب
23_ متفرقش بين معاملة اولادك بلاش تدلع بنتك و تشد علي ابنك بحجة انه يطلع راجل لأنك هتخلق جواه عقدة
24_الفلوس مش كل حاجه ..الفلوس وسيلة للحياة مش شرط الحياة
25 _الحياة مش سهله ومطباتها اكبر اختبارتها .. كل ما تقع قاوح وقوم تانى
و متديهاش الامان اوى لانك متعرفش من اى اتجاه هتجيلك الضربة
26 -قبل اى قرار ادى نفسك فتره تفكر ومراجعه قبل القرار لان مهما كان قرارك انت اللي هتتحمل نتيجته سواء بالايجاب اوالسلب
27 -اسمع نصائح اللي حواليك ودا مش معناه انك غلط وهما صح لا اسمع ممكن رأيهم يوضحولك حاجه مش شايفها
28_ متستغلش حب الطرف التانى ليك و تستغل حبه و طيبته لانه ممكن يجيله وقت يجيب آخره و يتعب و ميرجعش تاني
29 _تكرار الغلط في حياتك ده دليل ع انك مبتتعلمش من أخطائك مش ان الظروف اللي عملت كده
30 _تربيه الحيوانات الاليفه مش هوايه وموضه فى اشخاص بيحتاجوا يتكلموا معاهم وبيكونوا اقرب ليهم عن البشر..
31 _ انتو مش ملايكه ولا انتي خاليه من العيوب ولا هو بس تقدرو تتناسو مشاكالكم اعملو نفسكم مش واخدين بالكم منها بس العيوب البسيطه مش الكبيره ها العيوب الكبيره دي ممكن تصلحوها مع بعضومش من يوم وليله هتتغير واحده واحده ولازم تصبري عليه ولازم هو كمان يصبر عليكي
____________________________________
تمت بحمدلله ❤❤❤❤❤
التعليقات على الموضوع