كبرياء الصمت (الحلقه 12)
الفصل 12 ( كبرياء الصمت )
سيف : يلا عشان تقطعي التورتة
ايسل بتقطع التورتة و هي بتقطعها السكينة وقفت في نص التورتة وخبطت في شيء فكرت ان التورتة ده آخرها و مش هتقطع اكتر من كدا بتاخد جزء من الكيك بالملعقة اتفجأت لما شافت علبة لونها احمر
ايسل : سيف ايه ده
سيف : افتحيها
ايسل بتفتح العلبة موجود فيها دبلتين
سيف بيغمز ل اخوه من بعيد
ايسل : ايه ده هو بتوع مين دول اوعي تكون بقا دي مفاجأة و عايز تخطبني يا واد صح
سيف بيضحك : موافقة يعني
ايسل بتضحك: مفيش مانع
روان : بصي قدامك كدا
ظهرت صور علي شاشة العرض اللي في المطعم
بتجمع ايسل ب عاصم
مسك عاصم الميكرفون و بدأ يتكلم: سيلا فاكرة اول صورة دي لما الكاتشب وقع علي هدومك واحنا في المطعم و وانا غرقت نفسي زيك عشان كنتي مكسوفة تمشي و هدومك متوسخة من الكاتشب و كل في المكان بيضحكوا علينا و قالو مجانين طب فاكرة الصورة التانية دي لما قولتيلي مبعرفش اكل مكرونة اسباجتي و بهدلتي نفسك برضو فاكرة اول خناق بينا لما حد يسأل حبكم من اول نظرة و انتي تقولي لا ده من اول تهزيق... طب فاكرة البيرفيوم اللي كنت بجيبه من لندن و مش لاقيه و جبتهولي فاكرة خناقنا المفضل بالنسبة ليكي فاكرة اول مرة غيرت عليكي من اي حاجة بتحصل
كل صورة من دول فيها معني و ذكرى جميلة اووي للحظات متتعوضش بينا فاكرة اول فيلم دخلناه سوا و احنا بس اللي بنضحك و كل اللي في السينما مستغربين .... هفضل اقولك انك دايما انتي اجمل و انضف حاجة في حياتي .... انتي حتي مش بتيأسي من اني مبتغيرش لا انتي معايا انا عمري ما هنسي اي لحظة جميلة او وحشة جمعتنا سوا انا من غيرك فعلا ولا حاجة .... ايسل انا مجرد ما أفتكر ملامحك و ضحكتك بس غصب عني بكون مبسوط حتي لو جوايا هموم و مشاكل ... فاكرة لما سالتيني انت مسيفني ايه عندك علي الموبايل قولتلك ملكيش دعوة مسيفك My Baby لانك فعلا طفلتي الصغيرة ... طفلتي اللي بحس أنها متعلقة في هدوم باباها فاكرة لما قولتيلي انا بحسك بابا .... ايسل انا عمري ما هحب بعدك و قبلك اصلا انا مكنتش اعرف يعني ايه حب انا حبيت الدنيا معاكي ضحكتك بس بتديني امل اني احب كل حاجة فعلا مقدرتش ابعد عنك ولا اسيبك لأنك انتي كل الحاجات الحلوة اللي في حياتي عشان كدا هتفضلي دايما الجزء الاجمل في حياتي... بحبك .. وقدام كل صحابك و الناس دي
انا بعتذرلك انا اسف انى زعلتك و خليت دموعك تنزل ..لو موافقة ارجعلك بس المرة دي قدام كل الناس و اهلي و اهلك و نكمل حياتنا مع بعض وانتي خطيبتي و قريب هتكوني مراتي قولي اه
هزت ايسل رأسها وهي مش مستوعبة ولا مصدقة اللي شایفاه وسامعاه ودموع الفرح نزلت من عينيها
قربت منه و مسك ايديها قبلها كان بيتمني انه يحضنها في اللحظة دي لكن كان خايف من رد فعلها
عاصم :اوعدك ان طول مانا بتنفس مش هتخلي عنك ابدا
ايسل : بحبك جدا
عاصم : بصي كدا
كان موجود يافطة كبيرة عريضة بتتفرد مكتوب عليها
( عندما يراهن الجميع علي عدم مصداقية حبي ليكي و يحدث و اقوم بخطبتك 💍 )
سيف بيحاول يتمالك نفسه و يظهر عكس اللي جواه : اجيب 2 لمون بقا
عاصم : متعرفيش انا الحوار ده كلفني قد ايه ولله بس الصراحة سيف ساعدني كتير اووي
ايسل : ربنا يخليكو ليا
سيف كان عنده يقين ان هي محبتهوش هي حبت أخوه فعلا احيانا ممكن الإنسان يضحي بكذا حاجة عشان يسعد اللي بيحبه هو كان واثق ان هي مش ليه عشان كدا مش قادر انه يصارحها لان المرة دي كان هيخسر اهم اتنين في حياته
عاصم مسك العلبة منها : طب و لو قولتلك ان الدبلتين دول انا جبتهم لينا
ايسل متفاجأة : بجد يعني ده انا وانت ؟
عاصم مسك الدبلتين :مكتوب عليهم ايه
Asem & Aysle
قرب من اذنيها و همس : غيري Relationship بتاعتك و اعمليها Engaged ( مخطوبة )
ايسل شهقت: بجد
عاصم : لو هتفضلي كدا مش مصدقة هروح ارجعهم وانتي حرة بقا
ايسل مسكته من قميصه :ترجع مين استني
عاصم : هخطب بلطجي انا عارف
ايسل : مش عاجبك يعني
عاصم :عاجبني جدا ولله
ايسل : سيف انت كنت عارف
عاصم: بصراحة لولا سيف مكنتش اي حاجة اترتبت بجد
ايسل : انا بجد مش مصدقة هو انت مش المفروض انك سبتني خلاص
عاصم: مفيش اي حاجة تقدر تبعدني عنك
ايسل بنرفزة : و بعدين انت ازاي اصلا تشتري الدبل دي من غير ما تاخد رأيي
عاصم : هاتيهم يا حبيبتي انا هرجعهم خلاص
ايسل : بس هما حلوين
عاصم بيضحك : حلوين؟
ايسل : جدا
عاصم : انا جايبهم مؤقت و كدا كدا هغيرهم
سيف : طيب انا هسيبكم بقا لوحدكم اليوم ده
ايسل : لا خليك يا سيف
سيف : لا كدا احسن طبعا Enjoy بقا
عاصم : ربنا يخليك ليا بجد
سيف : ايه يابني انت أخويا ربنا يسعدكو دايما ❤
ايسل : عقبالك يا سوفي
سيف : لا انا قاعد شوية .... همشي انا بقا
عاصم : ايه سوفي دي كمان
ايسل بتاكل من التورتة: بدلعه فيها ايه
عاصم : ااه لا مفيش حاجة بس لو متلمتيش بالتورتة دي و في وشك علي طول
ايسل : ياريت ده حتي طعمها حلو اوي
عاصم : بحبك يا مستفزة
ايسل : ايه بجد ده انا بقالي قرن مسمعتش الكلمة دي
عاصم : طب ايه مفيش وانا كمان
ايسل : لا مفيش
عاصم :صحيح هتحدديلي ميعاد مع مامتك امتي
ايسل : انهاردة طبعا
_____________________________________
ايسل : مامتي اغسلك المواعين اللي باقية
صفاء :قولي عايزة ايه علي طول
ايسل : ولله يا ست الكل انتي دايما كدا ظالمني
صفاء : لو بتعملي كدا عشان متقابليش العريس ف انسي
ايسل : أيوة بصراحة
صفاء : غصب عنك
ايسل : أيوة مش هقابله عشان اصلا اتقدملي عريس تاني غيره
صفاء بدهشة: مين ده
ايسل : عاصم
صفاء : معقولة عاصم ده هيخطبك
ايسل : شوفتي بقا يا صافي
صفاء : أيوة و عيوبه اللي انتي عارفاها و
ايسل قاطعتها: يا صافي مش مشكلة كل ده انا واثقة ان انا هقدر اغيره و هعرف ازاي اخليه شخص تاني بس بطريقتي
صفاء : ولو متغيرش
ايسل : يا ماما بقا حددي الميعاد عشان يجي
صفاء : ولله ما عارفة اقولك ايه اللي انتي شايفاه بس متجيش بعد الجواز تعيطي علي العموم اما اشوف فترة الخطوبة دي هيعمل ايه
ايسل : ماما
صفاء : خليه يجي الخميس الجاي
ايسل قبلتها من وجنتيها: هييييييح بحبك بحبك جدا ولله ربنا يخليكي ليا
صفاء : يعوض عليا عوض الصابرين يارب مالك يا بنت المجنونة شوفتيني وافقت
ايسل : هتوافقي يا مامتي
____________________________________
عاصم : انا عايز اخطب
عبير : بجد يا عاصم معقولة هتخطب فعلا
مختار : ياريت بس تكون واحدة بنت ناس و محترمة مش زي اللي تعرفهم
عاصم : لا من الناحية دي اطمن
عبير : شوفتها فين دي يا عاصم و عرفتها ازاي احكيلي
عاصم : طالبة عندي في الكلية
مختار : منار
عاصم : لا واحدة صاحبتها
مختار : عموما انا هسال عنها الأول عشان لو زي اللي انت تعرفهم اعتبر ان مفيش جواز هيتم
_____________________________________
في المساء كانت بوسي قاعدة قدام التليفزيون بتشاهد فيلم رعب اكشن
احمد : بوسي اعمليلي شاي
بوسي : استني بس يا احمد اما اشوف المشهد ده
احمد : يا حبيبتي ابقي اتفرجي عليه بعدين
بوسي : طيب طيب هعملك
احمد : عايزه بالنعناع و كتري النعناع
دخلت بوسي المطبخ و بعد ما عملت الشاي فتحت برطمان الملوخية الناشفة بدل برطمان النعناع الناشف و وضعت ربعه في الكوب كان كل تركيزها تعمل الشاي بسرعة عشان تكمل الفيلم بسرعة
احمد بيشرب الشاي : ايه القرف ده انتي حاطة ايه في الشاي
بوسي : نعناع استني بس يا احمد اسكت دلوقتي لما اشوف البطل هيعمل ايه ده شكله هيقتله
احمد بيدوق النعناع لان فيه حاجة غريبة
احمد : انتي بتستهبلي حطالي ملوخية في الشاي
بوسي بشهقة: تصدق نسيت احط نعناع فعلا
احمد : انتي بتحبي افلام الرعب و الأكشن صح
بوسي : جدا يا حبيبي
احمد مسك شعرها و قرب منها : طب ايه رايك لو اتحول لحقيقة و تعيشي جواه
____________________________________
في غرفة ايسل .... روان بتحطلها الميكب
ايسل بلخبطة: هو شكلي حلو
روان : قمر يا حبيبتي ولله
ايسل : خايفة اوي يا روان بجد حاسة ان قلبي هيقف من الخوف
روان : معقولة اللي يقول كدا يقول أنها جوازة صالونات ده عاصم يا حبيبتي
ايسل : ماهو خايفة برضو لما تكوني مكانى هتحسي زيي صحيح هي منار مش جاية
روان : مش عارفة كلمتها و قالت أنها خارجة مع مامتها و مش هتقدر تيجي كدا كدا دي قعدة اتفاق يعني و قراية فاتحة
طارق خبط علي الباب و دخل عندهم في الوقت ده
طارق : احم ايه القمر ده يا عروسة ... العريس ايجا
ايسل : يلهوي انا لسة محطتش الروج و البلاشر
طارق : والنبي يا روان خليه حاجة هادية كدا بلاش الألوان الفاقعة دي
ايسل: وانت مالك اطلع برة
طارق : العريس لسة مجاش علي فكرة ... يلا انا طالع عايزين حاجة
روان بتضحك: لا ميرسي يا طارق
ايسل: جتك نيلة في تقل دمك ... وانتي بتضحكي علي ايه انتي كمان
روان : مبضحكش استني احطلك الروج الأول
دخلت صفاء و هي بتزغرط: مبروك يا حبيبتي اخيرا ايجا اليوم اللي هشوفك فيه عروسة عقبالك يا روني
روان : ربنا يخليكي يا طنط
صفاء : البسي الصندل ده السيلفر ده هو اللي لايق مع الفستان
ايسل :لا يا ماما اصل عاصم قالي ملبسهوش عشان بيغيير عليا
صفاء : بيغير عليكي من ايه يا قلب امه
ايسل : ماما بيغير عليا عشان رجلي بتبان منه و هو مش بيحب حد يبصلي
صفاء : طب ولله ما هتلبسي غيره قال بيغير عليها قال
ايسل : يوووه يا ماما بقا و بعدين ممكن أقع
صفاء : امشي بالراحة .. دول شكلهم ايجو
ايسل : حطيلي الروج يا رورو عشان خايفة بجد ربنا يستر بقولك ايه هو مامته طيبة
روان : اه بتحب عاصم اوي اكتر واحد في ولادها
ايسل : يعني حما قوية كدا ولا طيبة
روان : وانا ايه عرفني يعني هو انا كنت اتجوزت ابنها
ايسل : ماهو اخوكي ياختي مناسبهم
روان : هي كويسة مع احمد بصراحة يلا قومي روحي المطبخ عشان لما مامتك تنادي عليكي تقدمي الحاجة و تسلمي عليهم
دخلت عندهم بوسي هي و جنة في الوقت ده
ايسل : بوسي انا خايفة بجد
بوسي حضنتها: يا عروسة ايه القمر ده
ايسل : عروسة ايه لسة بدري دي قراية فاتحة لسة الخطوبة مجتش
بوسي : الف مبروك يا روحي
ايسل : شكلي حلو يا جنة
جنة:انتي جميلة من غير حاجة
ايسل : والنبي انتي الي جميلة .... انا خايفة اوي ما تقدمي انتي الحاجة يا رونا مكاني
روان : نعم هو انا العروسة ولا انتي انتي هبلة
ايسل : طب افرضي بقا يا بوسي اهلك مش ارتاحولي كدا قراية الفاتحة تتلغي صح
بوسي بتضحك : لا طبعا و بعدين هتعجبيهم متقلقيش اهم حاجة بس بلاش طولة لسان انهاردة والنبي خلي اليوم يعدي ها يلا انا طالعة لما مامتك تنادي عليكي قدمي الحاجة
____________________________________
دخلت ايسل عندهم و هي ماشية بهدوء و خايفة تقع و قلبها بيدق جامد
سلمت عليهم كلهم و من توترها مسلمتش علي عاصم ولا اعطته كوب الكوكاكولا يشربه
صفاء في سرها : كنت عارفة ان بنت الموكوسة دي هتفضحني
صفاء : قدمي يا حبيبتي ل الدكتور عاصم حاجة يشربها
ايسل : ها ااه هو فين
كلهم بيضحكوا علي كسوفها و لخبطتها
جنة: امسك يا خالو كوبايتك ... دي حاجات بنات لما تكبر و تتخطب زيها هتعمل كدا
عاصم : يا بت انتي عرفتي منين بقا
جنة بتحذير: دي حاجات بنات قولتلك
عبير بتوشوش عاصم : عروستك زي القمر يا عاصم و باين عليها فعلا مش من الزبالة اللي تعرفهم
عاصم :روحي قوليلهم يا ماما
عبير بتضحك : يارب بس تكمل معاك
ايسل بتوشوش بوسي : بوسي هو سيف فين
بوسي : سيف عنده شغل و مقدرش يجي
ايسل بحزن: طيب
_______________________________
طارق: الشبكة ب 150 ألف
ايسل بشهقة: ليه هيخطب أنجلينا جولي والنبي لو هيخطب أنجلينا جولي ما هيجيبلها شبكة بالسعر ده .... ده اللي يجيب شبكة ب 150 ألف و بالسعر ده دلوقتي يبقى حاجة من الاتنين يا وارث يا حرامي ف اهدي كدا يا طارق
كلهم ضحكوا علي طريقة ايسل
عاصم بيبصلها تسكت : معلش يا جماعة ايسل بتحب تهزر بس
ايسل : لا ده مش هزار طارق انا اللي هتجوز مش انت بص يا عاصم هات بالسعر المناسب ليك و خلاص متسمعش كلام طارق لأنه حاطط ايده في الماية الباردة
مختار أعجب بطريقة ايسل في الكلام مستغرب أنها مش متصعنة و علي طبيعتها اما عاصم كان قلقان ان والدته و والده يضايقو من لماضتها
عاصم : مش هتفرق يا ايسل اللي شاري مش هيفرق معاه بكام دي مجرد أرقام يعني
مختار: اختاروا الشبكة اللي انتو عايزينها طبعا و بالسعر اللي عايزينه
طارق : طب ما الناس اهو مش ممانعين انتي متضايقة ليه
جلال : خلاص يا طارق سيبها تختار اللي هي عايزاه براحتها احنا بنشتري راجل مش فلوس ولا شبكة
ايسل : ربنا يخليك ليا يا جدو
طارق قاطعها : انا بقول نقرأ الفاتحة
عاصم : انا شايف كدا برضو ... بسم الله الرحمن الرحيم ...
كلهم قرءو الفاتحة و كانت ايسل مبسوطة اوي ان عاصم اثبتلها انه فعلا بيحبها
__________________________________
ايسل : انا بعت مسج علي الايميل بتاعة الويدنج بلانر عشان احجز معاهم و لسة مردوش
عاصم : متقلقيش هيردوا بس اكيد مشغولين
ايسل بخنقة: انا بجد مخنوقة كل حاجة بتتعمل بطيء اوي حتي و مكلكعة
عاصم : يا حبيبتي انتي بس متوترة ولله كل حاجة هتمشي
ايسل : عليا النعمة احنا في حد عاملنا بي بي في الخطوبة دي
عاصم : طب ما تقولي ان في حد باصصلنا في الخطوبة ألطف يعني ايه التشبيهات البيئة بتاعتك دي
ايسل : يا روحي خليك انت في تشبيهات الواو
عاصم بيضحك : اهو كلامك ده هو اللي شدني ليكي اصلا ... وحشتيني
ايسل : لا بجد افتكرتها دلوقتي دي طبعا عشان تثبتني بيها
عاصم : هو قلبك مقالكيش انك وحشتيني
ايسل :يا حنين روح اخر الشارع يا حبيبي بيع الكلام ده
عاصم : ايه يا خفة انتي
مسك دقنها و رفعه لفوق : انا وانتي لينا طريقة عشق مختلفة مينفعش تليق بحد غيرنا اصلا
ايسل : بتحبني بجد
عاصم :بعشقك اصلا
__________________________________
بوسي و جنة أمام التلفاز بيشاهدوا قناة Cbc سفرة و الشيف بيعمل الاكل
جنة : مامي .... مامي
بوسي منتبهة مع البرنامج : ايه يا جنة اهدي كدا عشان احفظ الاكلة دي
جنة قربت من التلفاز
بوسي: اوعي يا جنة مش شايفة حاجة منك
جنة : مامي هو ازاي انا ببص للبصل وهو بيقطعه و عيني مش بتعيط
بوسي بتضحك: عشان هو في Tv يا حبيبتي انما انا قدامك
جنة : لا ما هو انا مقربة منه
بوسي : واضح ان مش هخلص من اسالتك الذكية .. رتبتي شنطتك عشان الصبح مندورش علي الكراسات بتاعتك
جنة : لا
بوسي : طب يلا رتبيها
___________________________________
و هما بيشتروا فستان ال خطوبة و الحاجات الناقصة
ايسل لاحظت أن فيه بنت بتبصله و هو بصلها مسكته من قميصه : ولله ما انت نافع و شكلك هتتعلق
عاصم :هتعلق ايه بس يا سيلا مانا متعلق في قلبك يا حبيبتي
ايسل : أيوة ثبتني ثبتني
عاصم بيستفزها : بس مزة تصدقي
ايسل : عاجبك فيها ايه دي ان شاء الله دي قالعة اكتر ماهي لابسة
عاصم : لا بس لبسها شيك علي فكرة هو أي نعم عريان شوية بس حلو
ايسل : و مين قالك ان الجمال باللبس ده يا حبيبي ده انا مجننة الشارع كلو بالبيجامة
عاصم بعصبية : نعم يا روح امك مجنناهم بايه قولي تاني كدا
ايسل : بالبيجامة
عاصم : و اللي في الشارع ازاي يشوفوكي بيها اصلا انتي مش محجبة
ايسل : عادي بلبس طرحة خليك ايزي يا بيبي كدا ....
عاصم قرب منها و مسك خدها بايديه و قرصها جامد : ايزي يا بيبي
ايسل : عاصم اوعي كدا الحركة دى بتوجع اوي
عاصم : لما تتلمي هبطل أعملها
ايسل : حرام عليك بتوجعني بجد
عاصم سحب ايديه : اتلمي بقا
ايسل : لما تتلم انت الاول يا حبيبي
___________________________________
احمد بزعیق في الحمام : يا بوسي الفوط فين مش لاقي زفت فوطة نضيفة
بوسي : يلا يا حبيبتي قولتلك رتبي كراساتك و كتبك من بالليل اما اشوف بابا
خرجت بوسي تشوف احمد و جنة وضعت ايديها علي خديها لان ده الوضع المستمر اليومي خناق دايما لدرجة أنها صدعت من صوتهم
بوسي : ایوة يا احمد اهدي
احمد بصوت عالى : فین الزفت الفوطة مش لاقي حاجة نضيفة
بوسي : الناس بتقول صباح الخیر
مش زفت
احمد : ماھو انتى لو بترتبي كل حاجة مكانها مش هزعق
بوسي بتناوله فوطة : اتفضل
احمد : هدومي مكوية ولا هتعطل زي أمبارح
بوسي : 10 دقايق بس و هتكون جاهزة
________________________________
ايسل مع سيف في كافيه
ايسل : بكرة الفلانتين بقا
سيف : و خطوبتك يا عم
ايسل : طب ايه بقا
سيف : ايه انتي فين الهدية بقا يا معلم
ايسل : انت الراجل يابني ... الراجل هو اللي يجيب
سيف : ده في شرع مين الكلام ده
ايسل : انا يا بيبي
سيف : take this .. from ام ترتر
ايسل بتضحك : لا انا عايزة هدية زي كل سنة
سيف : مش جبتلك في شهر 11 و الاسبوع اللي فات في عيد ميلادك
ايسل : ماليش دعوة انا عايزة Gift (هدية )
سيف : هجبلك زفت حاضر من عينيا
ايسل بتضحك : ماليش دعوة انا عايزة جيفت يا سوفي
سيف : طب وانا فيه الجيفت بتاعتي
ايسل : انت الراجل قولتلك
سيف خرج علبة هدية مربعة بيفتحها فيها كور صغيرة :يلا عيشي بقا جبتلك gifts كتير
ايسل :الله كل ده و دول الروايتين اللي كنت عايزاهم و مش لاقياهم
سيف جايبلها ميكب و روايتين
وانا جبتلك ده بحوش فيها بقالي شهر علي الله يطمر بس
سيف : جبتيلي ايه بقا .... اوبا ايه النضارة الجامدة دي و تيشرت برشلونة كمان
ايسل : و الكوتشي نسيته
سيف : حلوين يا سيلا اوووي
_________________________________
بوسي بتكلمها في الموبايل
بوسي : يعني انا غلطانة
ايسل : أيوة طبعا يعني الراجل بيصالحك و انهاردة الفلانتين عشان اتخانق معاكي الصبح تقومي تعامليه بالطريقة دي
بوسي: غصب عني بقا كنت مخنوقة
ايسل : تمام كنتي كلميه بالعقل و بهدوء احمد مأجرمش يعني
بوسي : خلاص هو كدا كدا جاي كمان ساعة و هنتكلم عادي
ايسل: يا بت انتي اللي الغلطانة اتصلي بيه صالحيه .... الاعتذار عن الغلط مش هيجرح كرامتك ده هيخليكي كبيرة في عينيه
بوسي : يا بنتي انا تعبت بجد من كتر خناقنا ده غير أن احمد عصبي جداا
ايسل : حوشي ياختي الهدوء اللي نازل منك
بوسي : بس هو اكتر
ايسل :يا بنتي المشاكل دي عادي ولله اي مشاكل موجودة في اي بيت
___________________________________
ايسل : وحياة امك جايبلي مج اسود علي دماغك بتسود الفلانتين عليا
عاصم : بس يا غبية اهدي هتفضحينا و بعدين مانا جايبلك حاجات تانية معاه
ايسل : انت لسة شوفت فضائح و اعمل بيه ايه ده ده اسود و مالوش اي منظر
عاصم : ماهو لو كان صبر القاتل ع المقتول كان زمانه مات لوحده .... لو سمحت ماية سخنة ممكن
الجرسون باستغراب : ليه ي فندم في مشكلة عندك
عاصم : لا كوباية ماية سخنة بس
ايسل : ايه هتلسعني بالماية مثلا
الجرسون : اتفضل يا فندم
عاصم بيسكب الماء السخن في المج بيظهر صورتها هي و عاصم علي المج
ايسل : ايه ده الله
عاصم : ده مج سحري
ايسل : ظلمتك يا بيبي
عاصم : لما بتحطي حاجة سخنة فيه صورتنا بتظهر بعد ما تشربي و النسكافيه او الشاي يبرد مثلا الصورة بتختفي
___________________________________
اتفقوا مع الويدنج بلانر و اختاروا القاعة التي ستتم فيها الخطوبة و الديكورات و شكل الدعوات و عددها ..
وفي يوم الخطوبة كانت ايسل تجلس علي كرسي في البيوتي سنتر و سرحانة حتي انتهت الهير دريسر من استشوار شعرها
روان : طب ولله شكلك بشعرك كدا احلى ما تخليكي بشعرك يا سيلا
ايسل : بجد
بوسي : اه بس لو مامتك موافقة براحتك
ايسل : مش عارفة بس لا لا طبعا ده كان عاصم يضربني
روان: عادي حطيه قدام الأمر الواقع
ايسل : هتدافعي عني انتي مش هيرضي لا ده ممكن يلغي الخطوبة او يشتري طرحة البسها هطلق يا بت
روان : هو انتي اتجوزتي عشان تطلقي ايه ده منار ايجت
ايسل قامت من الكرسي و حضنت منار : منار انا كنت خايفة متجيش البيوتي سنتر
منار و هي حضناها: مبروك يا عروسة ايه القمر ده
ايسل : من بعض ما عندكم يا روحي
منار: خلصتي ولا لسة
ايسل : لسة هلف الطرحة
منار: خليكي كدا تصدقي شكلك احلى
ايسل : لا عاصم هيزعقلي مش هينفع
روان: يا حبيبتي دي يوم يعني و دي خطوبتك يا حبي .... بس عارفين خطوة الحجاب دي صعبة شوية مش اي حد ياخدها عشان كدا انا لما هتحجب هتحجب وانا مقررة اتنازل عن حاجات كتير الأول
الميكب ارتيست:طب يلا عشان اعملك الطرحة
ايسل : اوكيه
بوسي : بلاش تطلعي شعرها من الطرحة عشان هو ممكن يتخانق معاها
ايسل : لا طلعيلي قصة بسيطة
بوسي : انتي حرة هينكد عليكي
ايسل : مش مهم يعني كأنها طلعت كذا غصب عني
____________________________________
في غرفة عاصم
عبير : عاصم ؟؟
عاصم : ايوا يا ماما .. ادخلي
عبير : بتعمل ايه يا حبيبي ؟؟ قوم البس خلاص مش فاضل الا ساعتين !
عاصم : مفيش يا ماما بس مبسوط اوي فرحان ومش مصدق ان انهاردة خطوبتي
عبير: مبسوط عشان خطوبتك انهاردة
عاصم : مش بس عشان خطوبتي .. فرحتي ب ان ايسل هتبقى خطيبتي دي فرحة مكنتش متخيل أنها تحصل كنت فاكر اني مش هاخد الخطوة دي خالص
عبير : ياسلام .. للدرجادي فرحان .. اومال لما تتجوزها هتعمل ايه
عاصم : يااااه بجد امتي بقا ..كفايه انها خلاص هتبقى ملكي
عبير : والله يابني مش زمان مشفتكش وانت فرحان كدا .. ربنا مايحرمك من الفرحة دي ابدا ياحبيبي
عاصم : ولا يحرمني منك يا حبيبتي
عبير : يلا هسيبك تجهز بقى عشان مأخركش .. قدامك نص ساعه عشان تلحق تجيب اختك و عروستك من الكوافير وتروحو الاستديو تتصورو ..
عاصم :لا انا متفق مع فوتوغرافر هيصورني برة
عبير : ماشي متتاخرش عشان عروستك
عاصم : حاضر تلت ساعة و هكون جاهز ..
___________________________________
في القاعة
( عاصم كان عامل علي حسابه و كاتب علي الاطباق اسمهم Asem&Aysle و تاريخ الخطوبة و كل طبق متزين بالورد .. وكان جايب اضاءات ومشكلها على اسمه واسمها ومثبتها على الحيطان .. الكل كان مبسوط وفرحان بالجو اللي مختارينه .. )
ايسل و هي قاعدة جنبه في الكوشة : الطرحة هي اللي بتزحلق شعري علي فكرة
عاصم : كل ده الطرحة مزحلقاه
ايسل : ها اه ما تعديها يا بيبي ده انهاردة خطوبتنا حتي
عاصم :معاكي دبوس
ايسل : ليه عايزني اشكك بيه
عاصم : بصراحه اه .. انا حاسس اني بحلم ..
ايسل : لا يا حبيبي مبتحلمش ..انا اللي حاسة اني هعيط من الفرحة
عاصم : لا اوعي تعيطي عايزك تفضلي تضحكي كدا ده انتي طول ما بتضحكي انا بتنفس ولله
ايسل : تيرااارررراراا متحاولش تثبتني قولتلك
عاصم : لا بجد فعلا
بدأت اول رقصة سلو بعد تلبيس الدهب و طبعا كان طارق رافض لكن بعد إقناع رقصت معاه علي اغنية
بهرب ف حضن عنيكى👀 تايه ونفسي الاقيكى 👫
عايش ف بعدك عنى مشتاق للمس ايديكى👫
نفسي بشوقى تحسي😩تمحى بايدك جرحى😩😊
واللى دا فات ننساه وابدا معاكى انا فرحى💟
زى الملايكه ف دنيتها ولا حد فكر يعارضها 👌
كل اللى تطلبه يتحقق دى حاجه خارج ارادتها✌👍
متقولش تطلب تتمنا دى حور ونازله من الجنه😍
النظره منها تدوخ ناس😮
وليها بس الكون غنا 🎤🎶
بيكى الحياه بتحلالى ياللى شغلتلى بالى😍🙈
عشت علشانك بكرة لجل ماتبقى حلالى💍
كل العيون حباكى عشقك❤
وبترجاكى انك تكونى علشانى يوم فرحى تبقي ملاكى👼✋
ياضحكه جميله شيفينها يابسمه حب عرفينها☺ يانجمه🌟
عايشه وسط سحاب☁ بتدارا لنحسدها🙈🙈
ياوردة🌺 مكانها ف البستان يا اية نازله من الرحمن😍😉
ياخفة دم موصوفه بتتباهى بشوق وحنان😘😀
___________________________________
ايسل كانت بترقص مع عاصم و صحابها و كانت بتدور بعينيها علي سيف اول ما شافته كان واقف بعيد مع احمد شدته من ايديه
ايسل :تعالى ارقص معايا
سيف : انتي عايزة عاصم يقتلني صح
ايسل :سيبك منه و بعدين انت أخويا تعالي
كانو بيرقصوا هي و روان و سيف و منار علي اغنية ( يا بتاع النعناع )
عاصم : شايف يا احمد دي بتستهبل صح
احمد :يابني عادي يعني انت عارف درجة صداقتهم و مش لوحدهم و بعدين هي مبسوطة متنكدش عليها بقا
عاصم :المفروض ان انا اسكت يعني اوعي كدا يا احمد
احمد : يا عاصم اهدي بقا ارقص معاهم حتي بس بلاش تنكد عليها في يوم زي ده
سيف قبل ما الأغنية تخلص سابها لأنه كان حاسس انه اخوه متضايق منه و اتحجج بأنه هيشوف باقي الحاجات في الخطوبة
__________________________________
تاني يوم
هند: روان موبايلك بيرن صاحبتك ميادة بتتصل
روان : حاضر يا ماما هرد عليها
بتمسك الموبايل و بترد على عمرو اللي مسجلاه ميادة
عمرو : لو مسألتش انا مكنتيش هتسالي صح ؟
روان بتوتر : لا خالص
عمرو : عاملة ايه
روان :ها تمام الحمدلله
عمرو : صحيح
روان : طب خليكي معايا ثواني .... عايزة حاجة يا ماما
هند :لا
_______________
مختار : ازيك يا ايسل
ايسل :تمام يا انكل
مختار : طبعا انتي متسغربة انا طلبت نتقابل ليه
ايسل : اه فعلا حضرتك كنت عايز تقولي حاجة
_____________________________________
روان دخلت اوضتها : أيوة معاك
عمرو : وحشتيني
روان بلخبطة:هه اه عمرو احنا اتفقنا علي ايه
عمرو : أيوة بس انا زهقت يعني لحد دلوقتي كلمة بحبك دي مسمعتهاش
روان : عشان مش عارفة ....خايفة اقولها اندم و اتوجع
عمرو : حبيبتي انتي ليه مش عايزة تديني و تدي نفسك فرصة انتي بتحبيني وانا بحبك ليه نضيع وقت كدا ولا انتي بقا حابة تتجوزي جواز صالونات و كدا
روان : عارف الحب في مجتمعنا بقا عامل ازاي
عمرو : ازاي
روان : بيتقدملها لأنه شايف أنها مناسبة جدا ليه لكن مش حبها ولا حاجة و هي برضو محبتهوش هي شافت انه فرصة متتعوضش للاسف هو ده الحب دلوقتي
عمرو : طب انتي عشان كدا رافضة فكرة اني اخطبك علي طول
روان :عشان مش عايزة كدا
عمرو : انا مفكرتش فيكي كدا انا حبيتك حبي ليكي ده مالوش اي سبب كل اللي اعرفه اني حبيت كل حاجة فيكي ده غير انك اول واحدة في حياتي بجد ارتبط بيها
روان : وانا كمان حبيتك بس خايفة
عمرو : لا قولتي ايه
روان : خايفة
عمرو : قبل خايفة دي
روان : احم قولت اني ... طب بقولك ايه سلام دلوقتي عشان احمد أخويا بيرن عليا
عمرو : بقا كدا ماشي هسيبك المرة دي بس
روان : لا ده بيرن بجد سلام
بترد روان علي اخوها : أيوة يا احمد
احمد : عاملة ايه
روان : تمام الحمدلله وانت
احمد : تمام صاحبتك ميادة عاملة ايه ؟
التعليقات على الموضوع