كبرياء الصمت (الحلقه 11)
الفصل الحادي عشر ( كبرياء الصمت )
جلال : انت كنت متخانق معاها ليه يا سيف
سيف : مفيش عشان كنت مخنوق من شوية حاجات في الشغل و البيت
جلال : ولا عشان بتحبها
سيف بصدمة : بحب مين
جلال : ايسل
سيف بتوتر: ايسل ازاي يعني انت اكيد بتهزر صح لا
جلال قاطعه : لو لسانك بيكدب ف عينيك مش قادرة تكدب ده انت لو كدبت عليهم كلهم الا انا
سيف : مش كان صعب عليا اني افضل أحبها و هي مبتحبنيش لكن اللي كان اصعب اني افضل مستمر في حبي ليها و هي مش حاسة
جلال : عشان انت ضعيف لا اعطتها فرصة تحبك بسبب انك المفروض بتحب واحدة تانية ولا فرصة تحس بحبك
سيف: مفيش اصلا واحدة تانية ضحي دي كانت كدبة انا مخترعها عشان هي متكتشفش حبي ليها
جلال :طب ما انا عارف
سيف : عارف ؟
جلال: يابني انا بعرف الإنسان من عينيه عينيك كانت بتقول كدا كان نفسي يا سيف تكون انت اللي هي بتحبه انت شبهها في حاجات كتير
سيف : انا كنت ببني أحلامي كلها عليها و هي مكنتش تعرف عن أحلامي حاجة كنت بكدب عليها عارف مقولة القلوب عند بعضها معتقدش ان المقولة دي صح عشان لو هي صح و القلوب فعلا عند بعضها كان هيبقي مفيش حاجة اسمها حب من طرف واحد
جلال : لا يا سيف خليك أقوي من كدا الحياة مبتقفش علي حد يابني انت لسة شاب
سيف :داخل ع 25 سنة يا جدو كبرت اهو
جلال : لسة شاب برضو ولو 35 لسة صغير يا
شوف يا سيف الحياة مبتقفش علي حد الحياة مستمرة سواء ضحكت او بكيت متحملش نفسك هموم لانك مش هتستفيد من الدنيا بحاجة ف عيشها صح و اضحك زي ما بيقولو محدش واخد منها حاجة
سيف : لكن احنا عايشين فيها و بنجرب كل حاجة فيها سواء بوجع او بفرح
جلال : الحياة مش طويلة عشان تجرب كل حاجة فيها ولا قصيرة لكن هي جميلة لو عرفت أنها متساويش حاجة الحياة اللي بجد في الآخرة و كلنا هنروح محدش هيستمر فيها .... حاسس بقلبك بيوجعك و مش قادر تنسي متشتكيش لحد اشتكي لربنا قوم صلي ركعتين
سيف : انا بصلي الحمد لله و مش بسيب ولا فرض ولا سنة
جلال : لا صلي ركعتين لله لما تحس انك مخنوق
سيف : تفتكر هنساها
جلال : هتنساها
____________________________________
مختار : لا طبعا بس انتي هتكوني زيك زي اللي شغال بعقد مؤقت و خصوصا ان كل المتثبتين هنا معاهم خبرات و شهادات
منار : تمام جدا
مختار : تمام ممكن بطاقتك
منار بصدمة بتحاول تخفيها: بطاقتي
عاصم : اه عشان يسجل بياناتك
منار : اه ثواني .... اتفضل
مختار : تمام يا منار هبعتها ل شيماء تمليء الملف بتاعك و من بكرة تقدري تيجي تشتغلي
منار : بجد متشكرة اووووي يا دكتور عاصم و متشكرة جدا لحضرتك
عاصم :متقوليش كدا و بعدين بابا هو اللي وافق يعني هو اللي يستحق الشكر بس
مختار : انا اصلا اول مرة الاقي حد جايلي من طرف عاصم في شغل بس واضح انك مجتهدة و هتشتغلي كويس
منار : ان شاء الله اكون عند حسن ظن حضرتك
________________
ايسل فتحت الاكونت بتاعها و كتبت status جديدة كتبت فيها 👇👇👇
( ماذا فعل الله لك لكي تتجنب لقائه )
عاصم كان في الوقت ده ظهر عنده في الإشعارات أنها نزلت status جديدة لأنها عامل كلوز ليها قرأ status كذا مرة في كل مرة قلبه بيوجعه من معناها حاسس انه فعلا بعيد عنه لكن مش قادر حاجة بتمنعه يقرب لربنا افتكر كلمتها ( صلي قبل ما يتصلي عليك )
قام من السرير و طفيء السيجارة اللي بيشربها و دخل الحمام اتوضي وهو بيفرد السجادة يبتأمل لمدة لحظات و قال لنفسه : لو صليت هتكون راضي عني انا عارف ان رحمتك واسعة و انك بتفرح برجوع العبد ليك لكن انا مش عارف ايه بيمنعني هي كلامها صح بس مش عارف ايه اللي مانعني بقيت بتكسف اصلي لاني عارف انك مش هتقبل صلاة من واحد زيي
اتصل عليها عاصم بعد ما انهي الركعتين مش عارف هما ركعتين ايه لكن كان محتاج يصلي فعلا
ايسل ردت عليه : ايه يا عاصم
عاصم : ايسل
ايسل بقلق: مالك
عاصم : البوست اللي انتي نزلتيه ده وجعني و خوفت
ايسل: عشان الصلاه هي أساس كل حاجه اللي بيصلي كويس يعني منتظم و مبيأخرش صلاته حياته بتختلف بيبقي هاديء و راضي بكل شئ سواء حلو او وحش و بيبقي سعيد ف حياته حتي لو كل الظروف ضده ده حتي الاذان بيقول حي علي الصلاة حي علي الفلاح يعني الفلاح مربوط بالصلاة اى انسان تعيس ف حياته يبقي اكيد بعيد عن ربنا
عاصم : ده علي اساس ان اللي قريبين من ربنا معندهمش مشاكل و مرتاحين
ايسل: لا طبعا ده مش معناه ان القريبين منه معندهمش مشاكل و هموم اكيد عندهم لان ربنا بيختبر صبرهم و حبهم ليه و قوة ايمانهم بالابتلاءات بس الفرق انهم بيبقوا راضيين بكل شئ و صابرين و جواهم يقين أن كل حاجه في النهايه هتبقي كويسة
عاصم : طب و السنين اللي ضيعتها من عمري من غير ما أصلي
ايسل: طلع صدقة و ادعي ربنا يغفرلك بص انا مقدرش افتي فيها ولله بس ممكن اسالك شيخ فيها و يقول تعمل ايه عارف ده كفاية بس لذة السجود و انك تناجي ربنا بحاجة و تحس انه سامعك ❤❤ ده لو بتتمني اي حاجه وعايزها في الدنيا او الاخره ارضي ربنا ومفتاح كل شئ مقفول هو الصلاة .... ممكن اسألك سؤال
عاصم : اتفضلي
ايسل :ايه الفرق بينك و بين الكافر ؟
عاصم : ان انا مؤمن بالله و الرسول و ديني الإسلام
ايسل: لا الصلاة عماد الدين ❤ طالما مفيش صلاه يبقى مفيش دين✋ .... اول حاجة هتتسأل عليها بعد الموت هي الصلاة ده غير ان مفيش عمل غيرها هيشفعلك عدم صلاتك مش هتدخل الجنة و انت م بتركعهاش
و مش ممكن تتساوي باللي بيصلي عند ربنا أبدا
ولا حتي هتشوف توفيق ولا سعادة ولا حماية من كل شر لو مبتصليش
عاصم : كنت محتاج كلامك ده جدا محتاج افوق بجد
ايسل : وانا معاك و هفضل دايما جنبك و افكرك بكل فرض
عاصم : انا عارف انه صعب بس خليكي معايا
ايسل : متقلقش انا معاك ولله
عاصم : ربنا يخليكي ليا بجد انتي انضف حاجة في حياتي ولله انا كل يوم بتأكد ان ربنا عايز يسعدني و يوفقني لما حبيتك
_____________________________________________________
في يوم ايسل كانت في عيادة دكتور
هاتفها بيرن
ايسل : الو
عاصم : وحشتيني
ايسل : لا ولله مش احنا متخانقين
عاصم : ده مش معناه اني مقولكيش وحشتيني
السكرتيرة : انسة ايسل محمد جلال دورك اللي جاي بعد المدام ما تخرج
ايسل : هي هتخرج امتي
السكرتيرة : يعني 10 دقايق و تخرج هي استشارة
ايسل : اوكيه ميرسي جدا
عاصم : انتي فين
ايسل : عند الدكتور
عاصم بقلق: ليه انتي تعبانة فين الدكتور ده ؟؟
ايسل : لا بس درجة حرارتي عالية جدا و عندي صداع ف حجزت و ميعادي كمان شوية اهو
شخص في العيادة بيكلم ايسل : لو سمحتي ممكن ادخل قبلك وانتي تاخدي دوري اصل انا تعبان جدا
ايسل : وانا يعني اللي جاية اشتري موز بلبن مانا تعبانة برضو
الشخص ضحك : انا اسف
ايسل : خلاص عادي اتفضل دوري مفيش مشاكل
الشخص : متشكر جدا
ايسل : العفو اتفضل ..... ايوة معاك
عاصم بنرفزة : ما تبطلي بقا طولة لسان مع الناس
ايسل : بتيجي كدا ولله غصب عني
عاصم : فين الدكتور ده عنوانه فين
ايسل : ليه
عاصم : هجيلك
ايسل : لا انا هكشف و اروح مش لازم
عاصم بجدية: فين يا ايسل
ايسل : مصمم يعني .... طيب هبعتلك العنوان في مسج
عاصم : اوكيه باي
___________________________________
بوسي :مش كفاية بقا بلايستيشن اقفله
احمد : يعني انزل مش عاجبك اقعد في البيت مش عاجبك اعملك ايه يعني
بوسي : تقعد من غير لعب ع بلايستشين
جنة في اوضتها : يوووه مش عارفة أذاكر من صوتك يا مامي
خرجت جنة من اوضتها و مسكت ريموت التليفزيون و وقفت قدام بوسي و بتضغط عليه
بوسي بعصبية : اوعي من وشي انتي كمان بتعملي ايه
جنة ببراءة :بطفيكي عشان تسكتي
_____________________________________
ايسل : كل ده انا بسبب ضيعت دورين
عاصم : الطريق كان زحمة و كنت سايق بسرعة
ايسل : طيب يلا عشان دوري دلوقتي
الدكتور : تمام انا كتبتلك حقنة تاخديها مرتين
ايسل :لالا بلاش يا دكتور انا بخاف من الحقن
الدكتور : الحقن بتجيب نتيجة بسرعة
عاصم : تمام يا دكتور هنجيبها
ايسل : استني بس هنجيب ايه انا مستحيل اخد حقن
عاصم : يلا بينا عشان اللي بعدنا يدخل ولا ايه يا دكتور
الدكتور بيضحك : اه فعلا ايسل بطلي دلع و خدي الحقنة مش هتعمل حاجة
ايسل : ماشي هاخدها و خلاص
خرجوا من عيادة الدكتور
عاصم : خليكي في العربية هروح اجيب الدواء
ايسل: لا هاجي معاك عشان احاسبه
عاصم بنرفزة: مش معاكي راجل يعني
ايسل : وانت تدفعلي ليه اصلا
عاصم : بطلي بقا خناق هروح اجيب العلاج و راجعلك
ايسل : طب هاجي معاك عشان اخد الحقنة
__________________________________
في سيارة عاصم
عاصم بعصبية : انتي بتستعبطي يا ايسل صح
ايسل : الطب مفيهوش احراج علي فكرة
عاصم : وحياة امك لا و موافقة ان الدكتور يديكي الحقنة عادي
ايسل : فيها ايه يعني
عاصم : بنت اللي تديهالك غير كدا لا
ايسل : علي فكرة عادي يعني ده دكتور مش في نيته حاجة
عاصم : احلفي كدا انه عادي و مش هتتكسفي
... طبعا ما انتي بتفرحي ب نرفزتي صح
ايسل: اصل شكلك بيكون حلو وانت متعصب كدا يا خلاثي يا ناس
عاصم : لا ولله و بعدين ايه يا خلاثي دي انتي بتلعبي مع ابن اختك
ايسل بتلقائية :ده انت لو ابن اختي كنت هريته بوس
عاصم قرب منها و غمزلها : طب ايه
ايسل : ايه ارجع مكانك
عاصم قرب خده عليها : احنا فيها علي فكرة اعتبريني ابن اختك بقا و يلا انا جاهز
ايسل : بجد موافق يعني
عاصم : اه طبعا
ايسل ضربته بالقلم علي وشه : ارجع مكانك و بطل قلة أدب
عاصم بيحسس علي خده اللي وجعه من ايديها : ولله فكرتك هتبوسيني بجد حتي استغربت
ايسل : لا ده انا اديك بالجزمة كمان لو القلم مجابش نتيجة
عاصم : حرام عليكي انا وشي وجعني بجد انتي مفترية ولله
ايسل بتضحك : احسن عشان تبطل قلة أدب
____________________________________
في الحضانة عند جنة
جنة : نور عايزة شيبسي عشان ميس موف مش هترضي تخليني اشتري من برة دلوقتي
نور : لا مش هديكي و ركزي معاها
جنة : كدا يا نور ماشي
جنة بصوت عالي :ميس موف ميس موف ..... نور بتاكل شيبسي وانتي بتشرحي
الميس: قومي اقفي يا نور وانتي كمان يا جنة
جنة: ليه يا ميس انا مش اكلت ولله
الميس: عشان قولتلك 100 مرة اسمي ميس نوف مش ميس موف كلهم بيقولولي موف بسببك
جنة : لا انتي اسمك موف
نوف: يوووه قولتلك اسمي موف ...
جنة : شوفتي
نوف بعصبية : لخبطتيني اسمي نوف نوف
_____________________________________
في الجامعة
سيف : هي ايسل فين
روان : مع عاصم
سيف : يعني جاية ولا مش جاية
روان : لا هتيجي هي بتقوله علي حاجة و جاية
سيف بنرفزة : هتيجي امتي هي لما بتكون معاه بتنسي نفسها اصلا
روان بمرح: انت بتغيير عليها ولا ايه
سيف بعصبية : انتي هتستهبلي يا روان ايه بغيير عليها دي
روان : سيف استني .... يوووه مقصدش ولله استني بس
_____________________________________
شريف : اتفضلي يا معلم
منار بسعادة : أيوة بقا البطاقة اخيرا
شريف : بس خدي بالك عاصم ممكن يقوله اسمك او
منار :لا متقلقش عاصم مش هيروح يقوله اسمي وكدا انا معايا بطاقتين واحدة للشغل وواحدة الأصلية
شريف : خدي بالك بس
منار:لولا البطاقة اللي انت عملتهالي دي كنت روحت في داهية
شريف :عشان كنت حاسس انه هيطلب بطاقتك
____________________________________
مختار : تمام يا منار انتي كدا اتعينتي معانا
منار :هبدأ الشغل من انهاردة صح
مختار : أيوة
__________________________________
صفاء : روحي كملي نشر الغسيل ده
ايسل : ماما انا مش لاقية ولا واحدة في أوضتك
صفاء : انتي مش كان معاكي 2 في العلبة
ايسل بضيق : يا ماما مش لاقياهم انا دلوقتي عايزة واحدة حتي
صفاء : طيب انزلي اشتري الصيدلية تحت العمارة
ايسل بنرفزة : ازاي يعني انزل كدا ازاي
صفاء بعصبية: بت متعليش صوتك عليا عيب كدا
ايسل : يوووه بقا يا ماما
صفاء : انا قولتلك اللي عندي انزلي هاتي و بعدين انتي مش بتعملي حسابك و تجيبي زيادة ليه
ايسل : هو ده وقته ....
جنة قاعدة قدام التليفزيون بتتفرج علي كرتون السا و آنا و بتاكل جيلي بالفراولة و قطع الموز المفضل ليها
ايسل : جوجو حبيبتي
جنة : قولي عايزة ايه علي طول
ايسل : يا بت انتي متأكدة انك 5 سنين طيب بصي يا روحي انتي طبعا عارفة الصيدلية اللي تحت العمارة
جنة : مالها
ايسل : ممكن يا روحي تجيبيلي منها حاجة
جنة : عايزة ايه
ايسل :بصي هكتبلك في ورقة اللي انا عايزاه
جنة بنرفزة: قولي انا مش صغيرة بعرف احفظ
ايسل :عايزة اولويز اللي لونه بلو متجيبيش البينك ها
جنة : بامبرز يعني
ايسل : لا بامبرز ايه بصي امسكي الورقة دي و اديها للبنت اللي في الصيدلية و هي هتفهم اوعي حد يعرف أنه ليا فاهمة و خدي الشنطة بتاعة الحضانة بتاعتك حطيه فيها اوعي تمشي بيه
جنة : حاضر متقلقيش
ايسل : اما اروح انا بقا أكمل الغسيل و بالمرة ابص عليها و هي نازلة
__________________________________
ايسل في البلكونة بتنشر الغسيل جنة كانت اشترت و خارجة من الصيدلية كان في شباب واقفين جنب العمارة جنة خرجت الاولويز من شنطتها و بصوت عالي
جنة :هو ده البامبرز اللي انتي عايزاه يا سيلا
كل اللي تحت العمارة بيبصوا علي ايسل و بيضحكو
شهقت ايسل و تيشرت طارق وقع منها وهي بتنشره : يلهوي اتفضحت
دخلت جنة باب الشقة بتعطيها الشنطة
ايسل بعصبية :وحياة امك ... ما هسيبك انهاردة
جنة بتجري منها في المطبخ :الحقيني يا طنط بنتك هتضربني
ايسل : انا مش هعرف أنزل من بيتنا تاني ولله
جنة ببراءة : انا مش عملت لك حاجة
ايسل : ولله ما هسيبك اوعي كدا يا ماما
صفاء :خلاص يا ايسل دي طفلة يا حبيبتي مش عارفة حاجة
ايسل : انا هربيكي من اول و جديد
جنة :وانتي هتفضلي تلبسي بامبرز لحد امتي ده انا اصغر منك و مش بلبس
ايسل مسكتها: كدا بتفضحيني ماشي
جنة : انا مش عملت حاجة
ايسل : يا روحي هاتي بوسة بقا
صفاء : هو ده اللي هضربها
ايسل و هي حضناها : مش بتهون عليا
_____________________________________
في محل بيرفيوم في سيتي ستارز
البنت : حضرتك عايز نوع بيرفيوم معين يا فندم
عاصم : عايز Cartier
البنت بدلع: تحب تجرب التيستر الأول ولا اجيبهولك علي طول
عاصم : أحب اوي
ايسل خبطته في كتفه : لا يا حبيبتي هنجيب نوع تاني تعالي كدا
عاصم : ايه مالك
ايسل : مش ناوي تتلم يعني
عاصم : وانا عملت ايه يعني
ايسل بضيق: لا خالص بتعاكسها قدامي
عاصم : انا مش كلمتها ولله
ايسل بنرفزة : يلا ننزل من المحل ده
عاصم بيضحك : قمر يا حياتي وانتي متعصبة كدا عايزة تتاكلي ولله
جنة:ايه تتاكلي دي انت فاكرها بسكوتة
عاصم : ايه ده انا كنت ناسيكي خالص ولله
ايسل : يلا يا جوجو ننزل احنا الأول
___________________________________
عاصم وقف قدام محل حيوانات كانت جنة نامت في الكرسي الخلفي في السيارة
عاصم: بقولك ايه ما تيجي كدا هسأل علي كلب معين هنا
ايسل : لا انزل انت
عاصم : بتخافي ولا ايه
ايسل : لا بس في حيوانات تانية بخاف منها
عاصم : انزلي متخافيش
ايسل : طيب
عاصم : بقولك ايه هو الكلب الهاسكي لسة مجبتوش
صاحب المحل : لا ولله لسة
عاصم لفت نظره ثعبان
عاصم : طيب بكام التعبان ده
صاحب المحل: 500 جنيه
ايسل شهقت: يلهوي ليه كدا
عاصم بيضحك : بس يا مجنونة اهدي
ايسل شدته من ايديه و خرجوا من المحل : 500 جنيه ليه يا حبيبي امشي امشي مش انت مش بتصلي هيجيلك في القبر ببلاش يا عينيا
عاصم : شكله عجبني ولله
ايسل : أيوة وانت ناوي تربيه في البيت يعني و طنط عبير راضية علي كدا
عاصم : لا انا بحب الكلاب بس ... واحد صاحبي كان عايز يشتري تعبان قولت اسال بالمرة
ايسل : اوكيه اذا كان كدا معلش
_____________________________________
دخلت ايسل الشقة كانت والدتها قاعدة في الصالة منتظراها
صفاء : ايسل تعالي
ايسل : ماما انتي لسة صاحية
صفاء : اتاخرتي كدا ليه
ايسل : مفيش يا ماما كنت مع
صفاء أخدتها من ايديها و قعدوا في البلكونة اللي في غرفة ايسل
صفاء : كدابة
ايسل : هو انا كملت عشان تقولي كدابة
صفاء : يا بت انتي بنتي عارفة يعني ايه بتكدبي عليا يا ايسل
ايسل : يا ماما كنت هقولك
صفاء : كنتي معاه مش كدا
ايسل : ولله يا ماما جنة كانت معانا
صفاء : جنة ؟؟؟ بجد يعني ده سيف صح كنت حاسة ولله
ايسل :لا مش سيف ده أخوه عاصم
صفاء : اللي هو دكتور عندك في الجامعة
ايسل : اه يا ماما
صفاء : طب احكيلي
ايسل : طب ايه رايك اعمل كوبايتين عصير مانجا كدا و طبق فشار حلو و نتكلم
صفاء: عايزة تعمليلي قاعدة رومانسية صح
ايسل : يا خوفي بس لا تحدفيني من البلكونة و تقلبي عليا
صفاء بتضحك : لا مش هقلب عليكي يلا اعملي و مستنياكي
___________________________________
صفاء : وانتي بقا مصدقة انه بجد بيحبك
ايسل : أيوة يا ماما بيحبني بجد
صفاء : معتقدش اللي زي عاصم ده بتاع جواز اصلا
ايسل : يوووه يا ماما بقا حتي انتي كمان هتقولي كدا
صفاء : يا حبيبتي حتي لو اتجوزك ده بتاع بنات يعني هيفضل كدا طول عمره و مش هيتغير يا بنتي تعرفي ان اغلب المشاكل اللى الراجل فيها بيخون مراته الأساس بتاعها بيكون هو بتاع بنات قبل الجواز ... يجى فترة الخطوبة واول الجواز بيبطل شوية ... لكن طبعا بترجع ريما لعادتها القديمة للاسف يا بنتي الطبع بيغلب التطبع !!!
ايسل: لا يا ماما فيه نسبة منهم بيتغيروا
صفاء:والنبي نفسى اشوف فين النسبة النادرة ديه اللى بتتغير بعد الجواز !!! وللاسف فى ستات بتكون فاكرة ان جوزها خلاص عقل وبطل ، بس هو بيكون ذكى وبيعرف يخبى لكن ولا بطل ولا نيلة
ايسل : ماما علي فكرة عاصم مش بيخبي عليا حاجة كل حاجة بيحكيهالي
صفاء : يا فرحتي قال يعني بيحكيلك انه تاب
ايسل : هو انا بحكيلك عشان تسمعيني الكلام ده انا عايزاكي تنصحيني يا ماما
صفاء : يا بنتي المنسون هيفضل طول عمره منسون ماتضيعيش وقتك معاه
ايسل : ايه الكلام البلدي ده يا ماما
صفاء : بكرة تعرفي ان الكلام اللي مش عاجبك ده هو الصح
__________________________________
ايسل: مالكو مبسوطين كدا ليه
طارق : يارب دايما مبسوطين كدا
صفاء :اصل انتي متقدملك عريس أخو صاحب طارق
طارق : و ايه بقا أدب و أخلاق و كل حاجة ماشاء الله و
ايسل : هو اللي من طرفك يعرف الأدب و الأخلاق
طارق : شايفة طولة لسان بنتك
ايسل : مش موافقة
طارق بيحاول يستفزها: ليه ان شاء الله هو فيه غيره
ايسل : لا فيه ولا هيبقي فيه
صفاء : ليه كدا يا حبيبتي طب حتي اقعدي معاه و شوفيه يمكن ترتاحيله
ايسل : انا ولا هشوف ولا هقعد مع حد
طارق : ليه يعني احنا خلاص حددنا الميعاد و الراجل جاي
ايسل : يوووه بقا
__________________________________
صفاء في غرفة ايسل
صفاء : و هو انتي فاكرة ان اللي زي عاصم ده بتاع جواز
ايسل: يوووه بقا يا ماما
صفاء :اسمعيني بقا يا بنتي اللي زي ده مش هيتجوزك ولله و سبق و قولتلك قبل كدا
ايسل :يا ماما لا عاصم بيحبني بجد
___________________________________
عاصم : وانتي قولتيلها ايه
ايسل :قولتلها انك بتحبني و هتيجي تتقدملي مش ده اللي هيحصل برضو ولا ايه
عاصم بعصبية : وانتي ازاي تاخدي قرار من نفسك
ايسل : يعني ايه فهمني كدا معلش هو احنا علاقتنا دي ازاي بقا يعني هنفضل كدا لحد امتي
عاصم : مش عارف بصراحة لسة مقررتش
ايسل : و ناوي تقرر امتي لما اتخطب انا صح
عاصم : لا انتي مش هتتخطبي لحد غيري
ايسل : ايه ده بقا ان شاء الله يعني لا عايزني اتجوز غيرك ولا انت قادر تاخد خطوة بنفسك المفروض ان انا اصدق انك بتحبني صح
عاصم : استني رايحة فين
ايسل :في داهية .... انا عايزة افهم بس انت بتحبني ولا لا
عاصم : انتي عارفة الإجابة كويس
ايسل دموعها نزلت منها: بس كلهم بيقولولي عكس كدا كلهم بيخوفوني منك مش عارفة أصدق مين طب اصدقهم ولا اصدقك ولا اصدق قلبي عارف مش صعب عليا اني اضحي عشانك و اقف قدام طارق و أرفض العريس ده الصعب بقا اني ألاقي اللي يستاهل التضحية دي
عاصم : انتي بتعيطي ليه
ايسل : عشان العياط ده الشباك اللي بضطر افتحه لما احس اني اتخنقت هو انت مش بتقولي الحقيقة ليه يعني هما كلامهم صح ولا لا يعني انا في حياتك زيي زي غيري ولا انا مختلفة زي ما بتقول
عاصم : قولتلك قبل كدا انك انتي الحاجة النضيفة اللي في حياتي
ايسل : يعني هتثبتلهم انك بجد بتحبني
عاصم : انا مش هثبتلهم حاجة انا لما بكون عايز حاجة هعملها بنفسي مش هستني حد يقولي اعمل كذا و اعمل كذا يتهيالي يعني ولو حضرتك مش مصدقة اني بتنيل بحبك تبقي دي مشكلتك
ايسل : انا بعمل كل حاجة عشانك بقف قدام صحابي و ماما عشانك عشان بحبك وانت مش عايز تعمل حاجة واحدة حتي عشاني ليه هو احنا مش زي الناس العاديين مش المفروض اننا نتجوز زيهم يعني
عاصم : انتي عارفة ان انا مش بتاع جواز صح
ايسل: قصدك ايه
عاصم : مش عارف افهمي زي ما انتي عايزة تفهمي بقا مبقتش فارقة
ايسل:ده انا بستحمل كل حاجة عشانك بستحمل انك بتكلم بنات و تسهر معاهم و تشرب و كل حاجة و في الاخر مش بتقدرني بكون معاك و تبص علي دي و دي بكون معاك و عادي كل حاجة عندك عادي انا كل حاجة بتوجعني بسببك
عاصم : وانتي كنتي عارفة اني كدا
ايسل : انا لما حبيتك حبيت كل حاجة فيك حتي عيوبك حبيتها بحبك لدرجة مش مفهومة او يمكن مش طبيعية كنت بستغرب نفسي ازاي بحبك وانا كل عيوبك دي ازاي بحبك وانا عارفة انك حتي مش ممكن تتجوزني لانك موعدتنيش بجواز
مقدرتش تتكلم خرجت من المكان و سابته و مشيت
_________________________
احمد : مش عارف اقولك ايه بس انت كدا بتوجعها يا عاصم حرام عليك بجد
عاصم : انا نفسي مش عارف انا عايز ايه
احمد : اوعي تخسر واحدة شافت كل عيوبك و لسة بتحبك دي حتي بتساعدك تتغير يابني
عاصم : حتي دي مش بسمع كلامها فيها كلامها كلو صح انا بحبها بس مش عايز اتجوز
احمد : و هي بتحبك هي مش عملت حاجة غير أنها بتساعدك تتغير تكون إنسان كويس
________________________________
كانت قاعدة في اوضتها بتفتح tv بتقلب في القنوات كانت شغالة اغنية جنات (حب امتلاك ) بتسمعها و كأن كل كلمة فيها بتعبر عن علاقتها بيه مش قادرة توصف هو بجد كلام صحابها صح ولا هو بجد بيحبها
تقالي عنه يا ريت تحاولي تحاسبني منه
دة كتير بيوعد بس مبيوفيش بوعده
اديتة فرصة يحبني عرفت انة
كان ناوي نتصاحب شوية وننسي بعض
مكنش ناوي الخير يوميها يا قلبي ليا
ومكنش ناوي الخير من الاول معاه
يا دوب دة كان بيرضي غروره بي
وحبه ليا يا قلبي كان حب امتلاك
مش فاهمة بس ازاي وليه عدت عليا
وانا غلطتي ان مشاعري خلتني اندفعت
لما اتعاملت معاه بطيبة وحسن نية
كانت النتيجة ان النهار دة لقتني ضعت
مكنش ناوي الخير يوميها يا قلبي
ليا ومكنش ناوي الخير من الاول معاه
يا دوب دة كان بيرضي غروره بي
وحبه ليا يا قلبي كان حب امتلاك
_________________________________
اتصل سيف ب ايسل
سيف : ايسل
ايسل بقلق : سيف مالك انت كويس
سيف : تعاليلي في المطعم
ايسل:في ايه طيب فهميني
سيف : لما تيجي بس الأول
بعد ربع ساعة كانت ايسل في المطعم و كان ضلمة
بعدها الشموع نورت المكان و كلهم : happy birth day Aysle
ايسل : انهاردة عيد ميلادي انا بجد مش مصدقة ولله
المكان متزين بالورد و البلالين علي اسم Aysle و اغاني و تورتة عليها صورتها كانت بتتمني عاصم يكون معاها في نفس اليوم و هو اللي يحتفل بيه معاها
سيف : يلا عشان تقطعي التورتة
ايسل بتقطع التورتة و هي بتقطعها السكينة وقفت في نص التورتة وخبطت في شيء فكرت ان التورتة ده آخرها و مش هتقطع اكتر من كدا بتاخد جزء من الكيك بالملعقة اتفجأت لما شافت ......
التعليقات على الموضوع