قصة صوت الموت

مروحة من الشغل الساعة 1 بليل والشارع كله هادي وضلمة ، في الأول كنت بخاف ولكن بعد كدا بدأت اتعود عايشة لوحدي وماليش أهل بعد موت زوجي وبنتي محروقين من الحريقة اللي حصلت في شقتنا ولازم أقبل بأي شغلانة دلوقتي عشان أقدر أصرف على نفسي  دخلت الشارع وكان فاضي كعادته ولكن لقيت قط اسود واقف في نص الشارع قدام عمارتي كنت بشبه على شكله ولما قربت قدرت اتاكد دا ايه .
دا القط بتاعي
خرج ازاي وامتي؟!  معرفش ؛  لأول مرة أشوفه مرعوب بالشكل دا ، عينيه مطلعة خوف مشوفتوش في بشر لحد دلوقتي ، شيلته وطلعت بيه للشقة لحد ما وقفتني جارتي أم أحمد .
‎
-ازيك يا سلمى يا بنتي
-تمام كويسة
-متيجي تباتي عندي النهاردة أنا جوزي مسافر وزهقانة
-معلش والله اديكي شايفة الوقت وأنا راجعة تعبانة
-يا بنتي حرام عليكي انتي ليه عاوزة تقعدي في الشقة لوحدك دا انتي حتي ما غيرتيش لون الحرق اللي في الحيطة وسيبتي المنظر كدا بقاله شهر
-معلش سبيني لوحدي بقي
-طب بلاش النهاردة
-ليه يعني
-شقتك النهاردة غريبة صوت ناس بتتحرك وتمشي والكلام دا مش أول مرة يحصل حتى القط بتاعك نط لشباكي بكل خوف من صوت حاجة بتتكسر ولما فتحت الباب ارجعهولك راح جري ؛ شقتك من ساعة الحريقة وهي مش تمام تعالي عشان خاطري اقعدي معايا النهاردة

ابتسمت ابتسامة انتصار رهيبة أخيرا اللي عاوزاه حصل روحت للشقة بسرعة وفتحتها وبصيت جواها
اتاكدت من اللي عملته وابتسمت

-دي مش اصوات عفاريت يا طنط

دخلت وقفلت الباب

-دي اصوات بشر
_________________________
*قبل يوم من الموقف دا*
راجعة للبيت في نفس الوقت ومعايا التُربي بتاع مقابر عيلتنا ، نزلنا من عربيتي وطلعنا جري للبيت وكل واحد في أيده شوال، دخلنا وحطيناهم علي الأرض وسلمته المبلغ الكبير اللي اتفقنا عليه ونزل
بصيت للشوالين بكل اشتياق
وبدأت أفك الرباط واسحب اللي جواهم

جثة جوزي وبنتي

أو نقدر نقول الهيكل العظمي ليهم

منظرهم مرعب والريحة ترعب أكتر

ولكن دا الطريق الوحيد اللي اقدر اخليهم يرجعولي زي ما قالي الدجال ؛ عشان كدا لازم اكمل
بدأت بترتيب الخطوات الصح اللي قالي عليهم

رسمت دايرة كبيرة لامسة كل ركن من اركان الشقة رسمتها بدم اشتريته من المستشفي اللي جنبنا
*يعتبر انا خلصت كل فلوسي لحساب التربي والدجال واكياس الدم *
بعد ما رسمت الدائرة ابتديت  أحط شمع كتير علي حدودها وانتقلت للخطوة اللي بعدها
النجمة السداسية اللي هرسمها تحت راس بنتي وجوزي وحطيتهم في نص الدابرة وبدأت اقرا الطلسم اللي ادهولي
كلام كتير مش فاهماه ولكن قالي اني لازم اقراءه بالتشكيل الصح وخلاص
وكل لما أقرأ أكتر ، شمعة ورا التانية تطفي
لحد اخر شمعة واخر جملة

عودوا من ظلام الموت لنور الحياة

وفجأة الظلام غطي المكان

وصوت بعيد يشق السكون من أبعد أوضة في الشقة

ماما احنا جينا
______________________

بعد ما اتكلمت مع جارتي دخلت الشقة والقط نط وفضل واقف علي الباب خايف يقرب
جريت علي بنتي وزوجي وحضنتهم
لسه اثار الحروق موجودة علي جسمهم

-متقلقوش احنا هنروح بكرا المستشفي ونبدأ نشوف علاج للآثار دي
ابتسمت بحنية وابتسمولي

كلمني جوزي مسعد وقال سلمي يلا بقي احنا جعانين هناكل ايه

-حاضر اقعدوا يلا نفسكوا تاكلوا ايه
-انا نفسي في لحمة يا ماما
-حاضر يا حبيبتي يلا هجيلكوا اهو

دخلت المطبخ ووقفت افكر في اخر موقف قالهولي الدجال
-------------------
-لو عاوزة عيلتك تفضل معاكي لازم كل شهر تقدمي قربان للخُدام اللي سخرتهملك عشان يفضلوا محافظين علي وجود عيلتك
-قربان...... بمعني
-يعني تقتلي  حد
- ايييه!! مش ... مش هقدر اعمل كدا طبعا مستحيل
- اتصرفي ؛ انا محتاج دمهم شعرهم عظامهم اتصرفي
- مش هقدر اعمل كدا
-لازم تقدري ولا مش عاوزة تشوفي عيلتك تاني
- لا لا ارجوك خلاص هحاول
--------------------
بصيت للنتيجة اللي في الحيطة ؛ اول قربان لازم يتسلم بكرا ... مش عارفة هعمل ايه بجد

قطع صوت تفكيري بنتي بتنده عشان جعانة

طب دلوقتي فلوسي خلصت ومفيش لحمة هنا خالص وكل الجزارين قفلوا اكيد ؛ هجيب منين

بنتي جات جري بتديني موبايلي اللي كان بيرن ومسمعتهوش

*رسايل جاتلي  من ام احمد جارتي *
سلمي في كلام كتير وصوت ناس عندك في الشقة انتي ليه مش بتردي علي مكالماتي

سلمي انتي كويسة

افتحي الباب طيب اطمن عليكي انا بخبط مش سمعاني ليه

جريت بسرعة وخليت عيلتي يدخلوا الاوضة ومش عارفة اتصرف ازاي

وفجأة كل الخيوط ابتدت تتجمع

أخدت السكينة وروحت فتحت الباب

صحيح اللي بفكر فيه مجنون ولكن خوف من فقدان عيلتي بيعمي كل شئ الدجال محتاج القربان وانا محتاجة اللحم لعيلتي  وكمان عشان لازم أخفي أثار القرابين اللي هتتسلم ..
عشان كدا انا هرحب بأم أحمد على العشاء النهاردة

تمت