نحن😈الجزء الثالث😈

نحن
٣

- أستاذ علاء ، استاذ علاء ، فووووق يا استاذ علاء ، انت نايم هنا ف الفصل من أمتى ؟ .
فتحت عيني بالعافية بصيت ناحية الصوت اللي بيكلمني و الغريبة أنه طلع (عبد الحميد) فراش المدرسة اللي كان بيصحيني و انا نايم على الارض وسط الفصل و النهار طالع من حواليا ، فتحت عيني بالعافية و قولتله .
- انا ايه اللي جابني هنا ؟ ، و نمت هنا ازاي ؟
- انت بتسألني انا يا استاذ؟
- ما هو انا معرفش انا جيت هنا ازاي ؟؟؟
- طب تعالى معايا ننزل أوضتي قبل ما البنات يجيوا و المدرسين و يشوفوك و تحصل مشكلة تعالى ....

نزلت مع عبد الحميد أوضته و غسلت وشي و عملي فنجان قهوة خلاني فوقت و صحصحت شوية و بدأنا نتكلم عن اللي حصل ...
- بس هو حضرتك جيت بالليل ليه ؟ ،،،، و ايه اللي خلاك تنام فالفصل يا سي الاستاذ ؟
- معرفش يا عم والله ، ما هو انا لو اتنيل اعرف هقولك ، و بعدين ايه جيت بالليل دي هو انت شوفتني لما جيت ؟
- لأ ماشوفتكش ، بس اكيد يعني انت جيت بالليل لأني امبارح نسيت باب المدرسة مفتوح و روحت فالنوم غصب عني .
- اه و لو كان حرامي دخل المدرسة ولا حاجة اتسرقت ، كنت هتقول للمديرة غصب عني برضه ؟
- يا بيه الحرامي هيخش يسرق ايه يعني ، المقاعد بتاعت الفصول ولا هيسرق الكمبيوترات الخربانه اللي ف مبنى الادارة؟
- يا أخي انت بتبررلي انا ليه ، و انا مالي؟
- يا سيدي جاوبني انت ، جيت ليه بالليل و نمت فالفصل للصبح ليه ؟ ، اه تلاقيك زهقت م النوم لوحدك ف شقتك ف قولت تيجي تغير مكان نومك .
- اه تصدق صح ، هو فعلا زي ما انت قولت ، ممكن بقى تسيبني اروح للمديرة عشان في حاجة مهمة جدااا عاوز اسألها عليها .
- الله ، ما تتفضل يا سي الاستاذ هو انا ماسكك ، اتفضل اتفضل ، و متقلقش مش هقول لحد على أنك كنت نايم فالفصل لوحدك طول الليل ، هيهيهي .
- جدع يا عبد الحميد جدع ، و انا اوعدك برضه أني مش هقول للمديرة انك كنت نايم بالليل و نسيت باب المدرسة مفتوح .

اتكتم عبد الحميد و بص ف الارض ، سيبته و مشيت و طلعت مكتب المديرة عشان كنت عاوز اسألها عن الطالبة الجديدة ، ما هو انا مش لاقي تفسير للي بيحصلي ، طلعت للمديرة و دخلت مكتبها ، استقبلتني بابتسامتها الصفرا كالمعتاد و قالتلي بكل برود .
- صباح الخير يا مستر علاء ، هو حضرتك مش ف فصلك ليه هو انت مش عندك حصة دلوقتي ؟
- اه فعلا بس معلش يا استاذتنا كنت عاوز اسأل حضرتك عن الطالبة الجديدة اللي دخلتيهالي الفصل امبارح .
- اه قصدك مي .
- مي مين ؟
- مي ، البنت الجديدة اللي اتنقلت لمدرستنا امبارح و دخلتها الفصل اللي انت كنت بتدي حصه فيه امبارح و اللي المفروض حضرتك تكون بتدي فيه حصة دلوقتي .
- لأ حصة ايه بقى و بتاع ايه ، مي مين يا حضرة المديرة ، انا اقصد مروة ، مروة سعيد اللي حضرتك دخلتيها عليا الفصل امبارح .
فجأه وش فريدة المديرة اتقلب و بصتلي بارتباك مصحوب بحزم ، كانت زي ما تكون بتداري ارتباكها بأنها تكلمني بحزم .
- مروة سعيد مين يا استاذ علاء ، البنت اللي اتنقلت اسمها مي السيد و ده الملف بتاعها اهو .

مسكت الملف اللي حطته المديرة قدامي على مكتبها و بصيت فيه ، فعلا البنت اسمها مي السيد و من صورتها عرفت انها مش هى البنت اللي شوفتها امبارح ، ايه ده ؟ ، اكيييد في حاجة غلط لا لا لا انا مش مجنون ، بصت لي المديرة بنظرة تهكم كده و قالتلي .
- مش كفاية بقى بص ف الملف و اتفضل على حصتك ولا ايه يا مستر .
بصيت لها و انا مستغرب و مسهم و قولتلها .
- حاضر حاضر ، عن أذن حضرتك .

مشيت من مكتب المديرة و روحت للفصل اللي اول ما دخلته بصيت بعيني كده على الطالبات اللي قاعدين و كانت ف وسطهم البنت اللي شوفت صورتها ف الملف من شوية عند المديرة ، فضلت ابص على البنات بنت بنت ، كأني بدور على مروة اللي شوفتها امبارح لكنها مش موجودة ، غصب عني صوتي طلع و انا بفكر بيني و بين نفسي و قولت ( لااااا ما هو انا مش مجنون لااااا ، مروة كانت هنا امبارح ) ، البنات بصولي كأني مجنون و لقيت البنت الجديدة اللي اسمها مي بتقولي ( بعد أذن حضرتك يا مستر ممكن اروح الحمام ؟) ، بصيتلها بلا مبالاه و قولتلها ( اتفضلي يااااا ، يا مي ) ، خرجت البنت من الفصل و ابتديت اشرح للبنات و ف وسط ما انا بشرح لقيت مروة واقفة ف أخر الفصل و بتبصلي و هى مبتسمه جداااا ، غصب عني لتاني مرة صوتي عليِ و قولت ( مروة اهي ، انا مش مجنون ، مروة اهي) غصب عني و انا بتكلم حسيت برعشة غريبة فجسمي و كأن كهربا بتصعقتي و غصب عني فقدت الوعي .

فوقت لقيت نفسي قاعد على مقعد من مقاعد الفصل و البنات ملمومين حواليا و المديرة واقفة معاهم ، و بيحاولوا يفوقوني ، فوقت و قدرت بالعافية اقف على رجلي و بدأت اسألهم هو ايه اللي حصل ؟ ، محدش جاوبني غير المديرة اللي قالتلي (تعالى معايا على مكتبي يا استاذ علاء) ، فعلا روحت مع المديرة لمكتبها و لقيتها بتديني ورقة و بتقولي أمضي ، بصيت ف الورقة لقيتها طلب اجازة لمدة اسبوع ، بصيت للمديرة و قولتلها ..
- بص انا مطلبتش اجازة يا استاذة فريدة .
- من غير ما تطلب يا علاء ، انت شكلك مجهد و اعصابك تعبانة و اكبر دليل على كده انك بتشوف بنت مش موجودة و متغير من امبارح على حسب كلام البنات و النهاردة كمان فضلت تقول مروة اهي مروة اهي و بعد كده اتشنجت و اغمى عليك ، و انا مش هستنى تفضل تتعب كده لحد ما ف يوم يجرالك حاجة فالمدرسة و تجيبلي مصيبة .
- يا استاذة فريييدة انا فعلا بشوف بنت اسمها مروة و انتي دخلتيها الفصل امبارح و قولتيلي انها بنت جديدة .
- يا استاااذ علااااء البنت الجديدة اسمها مي ، و مفيش بنت ف الفصل ده اسمها مروة سعيد ، اتفضل امضي على الاجازة و سافر البلد ارتاحلك كام يوم علشان تكون فايق لفترة الامتحانات الجاية .

فعلا مضيت على الاجازة و نزلت حوش المدرسة و قلت اقعد شوية قبل ما اروح ، و انا قاعد ف حوش المدرسة لقيت بنات الفصل جايين يطمنوا عليا ، طمنتهم و مشيوا ماعدا بنت واحدة اسمها (ريهام) ، فضلت واقفة و لما سألتها ( في حاجة يا ريهام ؟) ، بصت لي بخوف و ارتباك و قالتلي ..
- حضرتك مش مجنون يا مستر علاء ، انت صح ، مروة سعيد كانت موجودة ، بص يا مستر ، كل اللي هقدر اقولهولك اني بعيد السنة لأني سقطت السنة اللي فاتت بسبب اللي حصل ، و بما أن حضرتك اول سنة ليك ف المدرسة ف اكيد متعرفش حاجة عن مروة و اللي حصلها ، بص يا مستر انا مش هقدر اتكلم هنا لاحسن حد يسمعني ، ممكن نروح نتكلم ف اوضة عم عبد الحميد علشان هو كمان هيأكدلك الكلام اللي هقوله .
بصيت ل ريهام و انا مرتاح نفسياً لأني حسيت أني مش مجنون و برضه كنت مستغرب و خايف ، قولتلها (حاضر ، يلا بينا ) ،روحنا أوضة عبد الحميد انا و ريهام ، اول ما شافنا عبد الحميد قام وقف و بص لريهام و قالها ..
- في ايه يا بنتي خير؟
بصت له ريهام و قالتله .
- اقعد يا عم عبده ، و احكي ل مستر علاء عن مروة لأنه شافها .
عبد الحميد بصلنا بخوف و بلع ريقه و قال بحذر ..
- شافها ،،،، شافها ازاي و فين ؟
بصيت لعبد الحميد و قولتله .
- اه بشوفها ف كل مكان و هى اللي خلتني اجي المدرسة امبارح بالليل .
قعد عبد الحميد و بدأ يتكلم .....
- شوف يا استاذ علاء ، اللي هحكيهولك ده حصل ، بس لو حد غيرك انت و ريهام عرف بيه ، و حد عرف ان انا اتكلمت معاك ف الموضوع ده ، كلنا هنروح ف داهية ..
بصيتله بنظرة خوف و قولتله ..
- احكي متخفش احكي ..
بصت له ريهام و قالتله بنبرة حزن ..
- احكي يا عم عبده احكي ، يمكن استاذ علاء يلاقي حل و تفسير للي حصل .
بص لنا عبد الحميد و حط وشه ف الارض و بدأ يحكي ..
- السنة اللي فاتت يا استاذ علاء و تقريباً زي الايام دي بالظبط ، اتنقلت لنا بنت جديدة جاية من محافظة الاقصر ، اتنقلت المدرسة هنا لأن اهلها اتنقلوا من الاقصر للقاهرة و هى بسم الله ماشاء الله كانت بنت جميلة جدااا رغم أنها سمرة لكن عينيها كانت تشد أي حد يبصلها، و بعد مده البنت اختفت ، أهلها بلغوا الشرطة و الشرطة بدأت تدور لحد ما غلبوا خالص و ملقيوهاش و لا حتى لقوا ليها جثة تقول ان هى ماتت فقالوا انها هربت ، كل ده كان عادي و بيحصل انما اللي مش عادي بقى لما كل يوم و التاني حد يشوفها فالفصل و فالمدرسة ، ده حتى مسيو مروان بتاع الفرنساوي وقتها فضل يشوفها زيك كده لحد ما زهق و قدم طلب نقل م المدرسه و نقلوه فعلا ، و الغريبة وأن من يومها فريدة المديرة محرجة على أي حد فالمدرسة يتكلم فالموضوع ده معرفش ليه !!!! ....

قاطعت ريهام كلام عبد الحميد و قالت ...
- ايوووووه ، مسيو مرواااان ، انا بقى هبتديلك حكايتي من نهاية كلام عم عبده ، شوف يا مستر علاء ، من قبل ما مروة تتنقل عندنا المدرسة و هو مسيو مروان بتاع الفرنساوي بيصاحب دي و بيكلم دي و البنات كمان كانت بتعجب بيه و بتحبه لأنه شاب و وسيم و واخد باله من نفسه شوية ، المهم هو كان تقريبا مصاحب نص بنات الفصل او اكتر لكن الحقيقة انا مكنتش منهم لأني مكنتش بحبه ، المهم مروة جت المدرسة و لجل حظها الأسود كان اول حصه ليها هى حصة مسيو مروان اللي شافها فيها و اعجب بيها و هى كمان اعجبت بيه ، و لأني كنت كبيرة عن دفعتي لأني بسقط كتير ف مكنش ليا اصحاب فالدفعة لحد ما مروة جت و تقريبا كانت من سني لأن اللي عرفته بعد كلامي معاها انها هى كمان بتسقط كتير بسبب ظروف سفر أهلها ، ف بقينا اصحاب و بدأت علاقتنا تبقى اكبر لحد ما ف يوم جت حكتلي انها بتحب مسيو مروان و انه هو كمان بيحبها ، انا ساعتها اتعصبت عليها و حاولت افهمها انه كداب و بيقول كده لنص بنات الفصل علشان ياخد منهم حاجة ، سألتني حاجة ايه ؟ ، قولتلها أي حاجة بقى اياً كانت سواء فلوس او جنس او أي حاجة هو مبيقولش لا ، ساعتها هى كدبتني و اتعصبت عليا و اتهمتني اني بقول كده لأني بغير منها ، بصراحة انا زعلت منها وقتها لكني مكرهتهاش ، لحد ما ف يوم جت قالتلي انها هتخرج لأول مرة مع مروان ف اليوم ده و انه هيفاتحها فالجواز اليوم ده ، و من بعدها اختفت ، الحقيقة انا حاولت اتكلم و احكي لكن لما فكرت اتكلم و الكلام وصل لزفته الطين اللي اسمها فريدة المديرة هددتني انها ممكن تفصلني من المدرسة و تضيع مستقبلي نهائياً و ده طبعاً عشان اسم مسيو مروان ابن اختها ميجيش فالموضوع ،،،، عدت ايام و مروان بدأ يكلم نفسه ف وسط الحصص و بدأ يصرخ ف الفصل و يقول مروة اهي مروة رجعت ، عدى كام يوم و بعدها طلب أنه يتنقل و فعلا اتنقل لكن مروة متنقلتش معاه لأني شوفتها و كانت بتجيلي فالفصل و ف البيت و فالحلم و تعبت جداااا بسبب أني بشوفها و بسبب برضه أني مش قادرة أتكلم ولا اقول اللي حصل قبل ما تختفي ، و مش بس انا اللي شوفتها لأ ده كان كل مدرس شاب جديد يدخل الفصل يحصله اللي حصلك و يقعد فتره و بعد كده يقدم طلب نقل و يمشي ، لحد ما حصل اللي حصل و انا كان لازم احكيلك لأنك قولت أنك شوفتها فالفصل قبل ما تتشنج و يغمى عليك ..
بصيت لريهام و لعم عبد الحميد و قاطعت كلام ريهام و قولت ..
- مروان غِلط مع مروة ، و بعد كده قتلها ......
فجأه لقيت عبد الحميد و ريهام بيبصولي و بيقولولي ...(انت عرفت منين ؟) .
بصيتلهم بنظرة خوف و قولت لهم ....
- مش مهم بقى عرفت منين ، المهم ان انا هتصرف ازاي دلوقتي ، و هلاقي فين مروان الزفت ده ؟
بصلي عبد الحميد و قالي هتلاقيه ف مدرسة ثانوية ف حي من احياء القاهرة .
اخدت عنوان المدرسة و روحت لمروان ..... يتبع

محمد_شعبان
العارف