لحسن حظ قلبي
"لـ حُسن حظ قلبي"
..........
-ايه ده؟!
ايه اللي هناك ده؟!!!
ياا نهاااار أبيض دي بنت دي بنت..!
هي واقفة على الكوبري ليييه؟
هتنتحر يعني؟
إنزلي يا آنسة ايه اللي بتعمليه ده حرام عليكِ
=بس..سيبني أموت
أنا عاوزة أموت
-لا بجد..!
هي حياتك بإيديكِ يعني علشان تنهيها؟!
لو كنتِ خالقة نفسك كنتِ انهيها بنفسك
=أنا مخنوقة بجد و محدش حاسس باللي فيا خالص
-بس كده حرام!!!
=ممكن تسيبني في حالي بدقنك دي
إنتوا مش فالحين غير في قولة حرام لكن مش بتعملوا بالحلال
-يا آنسة بالله عليكِ اسمعي الكلام و اهدي شوية والله كده غلط و أكبر غلط
عاوزة تموتي كافرة يعني؟!
طب قُليلي كده هتقابلي ربنا إزاي!!!
اعقلي و فكري كويس مفيش أي حاجة في الدنيا تستاهل اللي بتعمليه ده
=أنا مش عاوزة أموت كافرة و لا حاجة
بس أنا خلاص مابقتش حمل أي حاجة خلاص
-طب ممكن تنزلي بس من عندك و بعدين تتكلمي!
=.....
-أيوة كده ربنا يباركلك
ارجعي على بيتك يا أستاذة....
=سمية
-أيوة اتشرفت بيكِ
و أنا حمزة
يلا ارجعي على بيتك بقا ممكن!
=إنت مش قُلتلي إنزلي و اتكلمي!؟
-هااه!!
=أصلًا كلكوا شبه بعض
هو حبني و فهمني إنه كويس و كمان كان بدقن زيك كده و خلاني فكرت إنه عارف ربنا و هيتقي الله فيا و حاول يتحكم في لبسي و خروجاتي و حياتي كلها لدرجة إنه خلاني مش بخرج خالص يادوب من البيت للجامعة و من الجامعة للبيت
سنة و نص فكرته بيخاف عليا
كان بيكلمني و بيوعدني بحياة وردي كلها و إنه مش هيسيبني خالص لحد ما جه و قال إنه لا يمكن يكمل معايا و إنه لا يمكن يتجوز واحدة كلمها
و طلع بيشرب سجاير و دقنه دي على الفاضي و خلاص و لا ملتزم و لا حاجة
أصلًا لو ملتزم مش هيبصلي!!
و كان ساعات يتعدى حدوده بالكلام و كنت بعدي علشان الدنيا تمشي لإني حبيته و بحجم ما حبيته كرهته و يمكن أكتر
أنا أصلًا مين يرضى بواحدة زيي!!!!
-......
=مش بتتكلم ليه؟
إنت مش بتبصلي ليه أصلًا؟
يلا كلكوا زي بعض أصلًا
كلكوا نسخة واحدة و صنف واطي
-خلصتِ؟
=نعم!!!
-خلصتِ كلاااام!
=...
-بصي يا بنت الناس
كل اللي قُلتيه ده بردو مايستاهلش تنهي حياتك بسببه
و مش مجرد دقن يعني تدين يا آنسة
تعرفي إن أصلًا وقفتي هنا معاكِ كده غلط و عارف إني هشيل ذنب كبير بس ماكنش ينفع أسيبك كده خالص و ربنا يغفرلي
بصي الدنيا دي اختبار من ربنا يا تنجحي يا تفشلي
يا جنة يا نار..!
الدنيا مش بننهيها بإيدينا إحنا ماكنش فات حد تعب
أنا والدي مات بكانسر و كان بينهش فيه لمدة تلات سنين و كنت بشوف البسمة مزينة وشه و يقول ياااا رب إنت قادر ترحمني ياااا رب
قبل ما يموت بدقايق لقيته بيضحك ليا كانت تقريبًا أجمل ضحكة شُفتها في حياتي و قال يا ابني أنا خلاص هروحله
و اعرف حاجة واحدة بس إن الدنيا تعب و مشقة و لازم تعافر فيها و في نفس الوقت لو عملت ايييه مش هتلاقي غير نصيبك و بس.!
دوري على الحلو قبل الوحش
دوري على الخير قبل الشر
دوري على كل حاجة حلوة في كل العك اللي حواليكِ و امسكي فيه بايديكِ و أسنانك
كوني صادقة مع نفسك و اسمعي كلام قلبك من الجنب الطاهر
يا آنسة الدنيا مش عاوزة منك غير إنك تقربي لربنا و هتشوفي الحلو في مرها و بس صدقيني
في رعاية الله و أتمنى تكوني في أحسن حال
و سامحيني على الوقفة دي لإنها غلط أصلًا
آسف والله آسف
----------------------------
*كنتِ فين يا سمية؟!
=كنت..كنت قاعدة على النيل شوية يا ماما
*ماشي يا حبيبتي يلا علشان عاملة ليكِ حلة محشي هتاكلي صوابعك وراها
ده أنا كنت مستنياكِ تيجي بفارغ الصبر
=بجد
*آه والله
يلا بقا قبل ما الأكل يبرد
و كمان أبوكِ قال هييجي ياكل معانا
يلا بقا ادخلي أوضتك و أنا جهزتلك هدومك بردو خدي دش و صلي كده و فوقي
=حاضر
*مالك يا سمية؟!
=مفيش يا ماما بس تعبانة شوية
*تعبانة مالك يا حبيبتي؟!
=عندي صداع صعب أوي يا ماما
*طب ادخلي اعملي اللي قُلتلك عليه أول كده و لو ماخفيتيش هجيبلك علاج للصداع
=حاضر
-----------
=هو أنا إزاي ماكنتش حاسة إني لو أذيت نفسي أهلي هيتأذوا؟!!
ليه ماقدرتش إني بنتهم الوحيدة!!!
ليه كنت مفكرة إنهم مش بيهتموا بيا و لجأت للغرب و خدت على دماغي في الآخر!؟
ليه ماكنتش بلاقي الخوف و الحب و الحنان اللي في عيون أمي دول؟!!!!
لييييه ليييييه؟!!!!!
من زمان ماكلتش معاهم و لا قعدت معاهم و لا عملت حاجات كتير أوي
مالتزمتش في الصلاة غير لما هو جه حببني فيها
و مالبستش طويل و محتشم غير بعد ما هو قال
ياما أمي حاولت معايا و كنت بتجاهلها
و في الأخر هو مش عاوز مصلحتي كان بيمثل الحب!!
أصلًا الملتزمين زي حمزة دول نادرين هو كان بيمثل مفيش حد ملتزم يكلم بنت أصلًا من ورا أهلها و الناس
حمزة!!!
طب ليه ضربت المثل بحمزة!!
بجد شكله كويس
لاااا لااا لااا أنا مش هقعد أربط نفسي بوهم تاني ياااارب أعني على حاجات كتير صح و ابعد عني الغلط
أنا عارفة إني مش بعرف أدعي بس يا رب إنت عالم بيا من غير كلام
---------------------------
+ تسلم إيدك يا غالية يا أم الغالية و الله
الأكل جميل و الله يا فاطمة
*تسلملنا يا رب
بالهنا و الشفا
=أنا وحشتني اللمة معاكوا أوي
*يا حبيبتي يا بنتي
ده أنا الكلمة دي فرحتني بشكل!!
ربنا يديم اللمة الحلوة دي يااا رب
+ يااا رب يا حبايبي
النهاردة كان في شيخ كده في المسجد اللي جنبنا كان بيصلي بينا إمام
هو لسه شاب بس تبارك الله يا فاطمة حاجة كده ترد الروح بجد
أخلاق و خلقة ربنا يبارك فيه يااا رب
كان بيتكلم عن حفظ القرآن و إن إحنا نحاول نحفظ على قد ما نقدر و نعمر قلوبنا بالقرآن بدل ما يسكنه حاجات تانية
رُحت كلمته و قُلتله إني حافظ شوية من القرآن و كنت خجول لإني كبير في السن و كنت بسأله على طريقة أحفظ بيها القرآن تكون سهلة بس كلمني بكل جمال و أخلاق و الله و قال إن في ناس لما بتكبر بتطنش لكن حصل معايا العكس و كلامه فرحني بجد
و عارفة في الأخر طلع ابن مين يا فاطمة؟!
+ مين يا حسين؟!
*ابن عماد اللي بيتهم بعدنا بشوية هنا اللي كان مات بالسرطان ده
الله يرحمه و ينور قبره ياااا رب
+ يا عيني
ربنا يرحمه يااارب
كان صالح و ابنه صالح
ربنا يرحمه ساعة آذان يااا رب
=طب أنا هقوم كده أنضف مكان الأكل و أصلي و أجي أعمل فشار و ندردش سوا
+ بت يا سمية إنتِ سخنة و لا حاجة؟!
=لا يا بابا ليه؟!
+ أصلك يعني بتبقي تيجي تاكلي و تروحي على الأوضة بتاعتك و مش بتطلعي منها و بتفضلي ماسكة التليفون بتاعك ياختي و فاتحالنا على الفيسبوك و اللي مش بوك
= لا يا بابا ما أنا عرفت إني غلطت و مش هكرر غلطتي بإذن الله
+ يا حبيبتي لا غلطتِ و لا حاجة بس بردو ده مايمنعش إن إحنا ناكل فشار و نشرب شاي من ايدك يا جميل
=من عينيا الاتنين يا بابا
قالت في نفسها*هما إزاي واثقين فيا كده؟!
و أنا كنت ضيعت الثقة دي بإيديا بس يا بابا أوعدك إنها مش هتتكرر بإذن الله و هحاول أكون بنت صالحة*
-----------------------------
-مالك يا عم حمزة بتفكر فيها كتير ليييييه!!!!!
أنا هقوم أصلي يمكن ربنا يزيحها من تفكيري خالص و بعدين دي مش اللي كنت بحلم بيها ليه بفكر فيها؟!
يلا هقوم أصلي القيام بقا دلوقتي
..
يااااارب اهديها ياااا رب وارزقني بيها هي شكلها بنت حلال
من يوم ما شُفتها و أنا غصب عني بفكر فيها
يااا رب اغفر ليها و ليا و ارزقني بيها لو ليا خير فيها و لو شر اسقطه عنها و ارزقني بيها
و إنت قادر على كل شيء يااا رب
...
بقا أنا قومت أصلي علشان أنساها أقوم أعيط و أطلبها من ربنا
ياااا ربي إيه البنت دي!!!!!
-------------------------------
=بابا يا بابا يا حتة سكرة
ممكن أطلب طلباية صغننة..؟!
+ طلباية؟!
يخربيت التعليم المجاني
المهم عيوني ليكِ يا قلب أبوكِ
=احممم احممم الحمدلله الحمدلله بقالي ست شهور لابسة الخمار
أممكن يعني ألبس النقاب يا والدي العزيز؟!
*بجد يا سمية؟!
=أيوة والله نفسي بجد
أنا الست شهور دول حياتي اتغيرت ١٨٠ درجة بجد الحمدلله و حفظت فيهم حوالي ١٢ جزء من القرآن و بجد القرب من ربنا نعمة إحنا بنجهلها بجد
أنا كان نفسي ألبس الخمار و النقاب سوا بس خُفت مابقاش قده و أنا كمان هوائية بس خلاص هلبسه بإذن الله و صليت استخارة و عقدت النية
لسه بس الموافقة منكم
+ احممم ده لو هيسعدك يا بنتي أنا موافق
*أنا رأيي من رأي أبوكِ
= إيه داااااااه؟!!!
بجد بجد بجد!!!!
يعني مش هحطكوا تحت الأمر الواقع و ألبسه و أغصبكوا؟!
مش هتقولولي مش هتتجوزي؟!
يا نهار أبيض و فيه نقط أبيض برددووو
أنا فرحااانة فرحاااااانة اووووووي
تسلمولي يا أحلى أب و أم في الدنيا
أنـ..أنا هروح أصلي التمن ركعات شكر اللي كنت ناوية أصليهم فرحتوني فرحتووووني
+ ربنا يسعدلي قلبك يا قلب أبوكِ من جوا
=حبيبي يا بابا والله
--------------------------------
=الحمدلله
الحمدلله
الحمدلله حتى ينتهي الحمد
الحمدلله كما ينبغي لجلال وجهك و عظيم سلطانك
الحمدلله
أحمدك و أشكر فضلك يا ربي بجد
أنا فرحانة فرحانة بالقرار ده و قلبي سعيد لدرجة مش قادرة أوصفها لنفسي حتى
ياااااا رب حققلي الأمنية التانية
ياااا رب ارزقني بواحد زي حمزة يعرفني الصح من الغلط
يااا رب أنا مش عارفة متعلقة بيه كده ليه من يوم ما شُفته بس بجد نفسي ترزقني بحد نفس الشخصية اللي فرقت معايا
يارب إنت جعلته سبب لحياة جديدة ليا فارزقني بحد زيه
--------------------------------
+ إزيك يا حمزة يا ابني؟!
-الحمدلله في نعمة يا عم حسين والله
+ ممكن أتكلم معاك في موضوع كده
-تؤمرني طبعًا
+ الأمر لله يا ابني
-طب تعالي نقعد جوا في المسجد
....
-اتفضل يا عمي
+ بص يا ابني
أنا والله محروج أوي إني أطلب منك طلب زي ده بس بجد أنا بتمناه يحصل
-يا عمي اتفضل أنا عينيا ليك
+ تسلملي عينيك يا حبيبي
أصيل زي أبوك الله يرحمه
الله يرحمك يا عماد يااا رب
-ربنا يكرمك و يعزك يا عمي
+ يا ابني أنا عندي بنتي الوحيدة
منتقبة و بفضل الله بتحاول تختم القرآن و ملتزمة الحمدلله و عارفة ربنا
و بصراحة مش قادر أشوف زوجها غير فيك إنت
عارف إن عيب أوي آجي أطلب منك كده بس صدقني أنا بعزك و بحبك أوي و بتمنى تكون جوز بنتي من كل قلبي
أنا مش بجبرك أنا بخيرك بس مش أكتر و الله
و تيجي تشوفها عجبتك أو ماعجبتكش أنا مش هزعل والله
و بعدين دي الوحيدة اللي ليا والله و بتمنى يكون معاها حد زيك يا ابني
-......
+ أنا آسف يا ابني لو زعلتك والله أنا عارف إني بفكر بأنانية
-لا..لا يا عمي ماتقولش كده
حاضر يا عمي
حدد موعد و أنا هاجي فيه مع والدتي
+ يا حبيب قلبي يا ابني يااا رب
ربنا يجبر بخاطرك زي ما جبرت بقلب راجل عجوز زيي
تعالي يا ابني بكرة في الوقت اللي تحبه
-حاضر يا عمي أنا هصلي هنا معاك المغرب و تاخدني و نطلع و أنا هكون عرفت والدتي البيت و تطلع قبلنا
+ من عينيا يا حبيبي من عينيا
خد نمرتي بقا عندك سجلها و كلمني
-حاضر يا عمي و اتفضل رقمي أهو بردو
----------------------------------
= ياااا ربي
معقول دعوتي اتحققت تاني؟!
حد زي حمزة!!
حمزة بردو!!!!؟!
بابا بيقول عليه كويس و بيقول عليه متدين و ملتزم و دايمًا بيمدح فيه
معقول يكون الخير فيه؟!
أنا يا رب هجرب مش هخسر حاجة
و أنا لازم أشيل حمزة من دماغي خالص لإنه أكيد مايعرفش إني بقيت حاجة تانية
يا ربي أنا هرضى بكل شيء إنت كاتبهولي
----------------------------
° طب يا ابني طالما مش عاوزها ليييه قُلت طيب؟!
-يا أمي أولًا الراجل جه طلب مني إزاي هقوله لا!!
و كان بيكلمني بعشم أوي كمان
و تاني حاجة فيها كل الصفات اللي بحلم بيها بصراحة
° طب و سمية؟!
-هاااه...سمية تقريبًا كانت مجرد سراب يا أمي
و الواقع حاجة تانية
° بص يا ابني بصراحة نهلة أختي بتقول على بنت فاطمة دي ما شاء الله بتروح المسجد و ملتزمة و بنت حلال و الأطفال هناك بيحبوها كمان
يعني جرب مش هتخسر حاجة و لو والله ليك خير فيها هتاخدها يعني هتاخدها
-عندك حق يا ماما
يلا علشان منتأخرش على الناس
------------------------------
+ اتفضل يا حمزة يا ابني اتفضل
نورت البيت و الله
الله أومال فين العروسة يا فاطمة ينفع كده يعني لسه ماخرجتش من الأوضة
*بتصلي المغرب يا حسين و بطل وشوشة الناس يقولوا علينا ايه؟!
+ طيب خلاص خلاص
اتفضلوا يا جماعة اقعدوا
-ممكن يا عمي نعمل الرؤية الشرعية دلوقتي علشان ألحق بس العشاء جماعة
+ من عينيا
ادخل اقعد هنا و ماتخافش أنا هبص عليكم
-تسلم يا عمي الله يعزك
.....
=السلام عليكم
-و عليكم السلام و رحمة الله و بركاته
=صوته يا ربي
معقول أكون بوهم نفسي!
أنا لازم أبص
..
اييييه!!!!!!
حمزززةةةة
-مييين؟!!!!
=*نزلت النقاب*
-سميـ.. سمية؟!
إنتِ هنا؟!
إنتِ إزاي هنا!!!!
إزاي بقيتي كده؟!!!
إنتِ بجد بنت عم حسين؟!
=*بتعيط*
-هو أنا مش بشوفك غير بتعيطي اسكتي بالله عليكِ و فهميني ايه اللي بيحصل ده
بجد إنتِ سمية!!
إنتِ ماتعرفيش أنا دعيت ربنا قد ايه يرزقني بيكِ
أنا كنت فقدت الأمل خالص و عمي لما كلمني عليكِ كنت مش عاوز أجي في الأول بس ده الحمدلله إني جيت
أنا مش مصدق نفسي خالص
مش مصدق إنك هنا والله
=أنا كنت بدعي دايمًا بيك بردو
لحسن حظ قلبي إنك جيت لحقتني و خليتني أفتح عيني على حاجات كتير
بفضلك بعد ربنا اتغيرت كتير و في كل حاجة
أنا مش مصدقة نفسي بجد و مش مصدقة اللي حصل
و كنت مفكرة إنك مش ممكن تبص لحد زيي؟!!!
و بابا كان بيحكي عن والدك و عنك كتير و أنا ماكنتش بربط أي حاجة خالص..!
فعلًا الدعا بيغير القدر و أنا كنت بدعي ربنا يرزقني بحد زيك و ماتخيلتش يرزقني بيك
-سمية أنا هخرج أقولهم نعقد بكرة و نتجوز بعده
=نعم!!!!
-يا سمية ماتتكلميش خالص إنتِ موافقة و أنا موافق كفاية كده حرااام حراااام
يا عمااااااااااي أنا موافق و هي موافقة و عاوزين نعقد بقا و بارك الله لنا و بارك علينا و يارب يجمعنا بخير
ريهام يحيى
التعليقات على الموضوع