قصة (الإيثار)
قصة ( الإيثار ) كاملة
جوزي بقى يرجع البيت متاخر كل يوم
والاقيه بيتكلم في التليفون بصوت واطي بعيد عني
انا متجوزة بقى لي سنه ونص
بحب جوزي جدا .. بس ملاحظه انه متغير بقى له أسبوعين
وبقى يرجع من الشغل واكل ومش بيرضى يتغدى معايه
ما بقاش بيحكيلي عمل ايه فالشغل
مبقاش بيرد على تلفوناتي لما بتصل بيه وهوا بره
ما بقناش بننزل سوى ..ولا بقى يتكلم معايه زي الاول
حتى شكله بقى متغير ومبقاش عايز يقعد معايه زي مايكون اتخنق مني او في حاجه انا مش فاهماها
الموضوع ده مضايقني جدا .. حتى مش عارفه أفاتحه في الموضوع .. كل ما اكلمه يقولي تعبان وعايز انام
بقى ينزل من البيت بعد ما يرجع من الشغل على غير العادة و يقولي رايح مشوار ..
ويرجع بعدها بساعتين أو تلاته
أقوله كنت فين ؟؟! .. يقولي كنت في مشوار.. ومرة كنت مع صحابي عالقهوة
مش عارفه اعمل أيه ؟.. حاسه ان حياتي بقت سودا فعلا .. الايام بقت ممله وكل حاجه بقت روتينيه جدا
قررت أستفذه عشان يتكلم معايه واقوله اني قررت أرجع الشغل اللي كنت فيه قبل ما نتخطب
وبالفعل استنيته بعد ما رجع وقعد قدام التلفزيون .. وعملتله شاي وفتحت الموضوع ..
اللي كان هيجنني فضلت أقوله هرجع اشتغل ولسه هقوله أنا ليه خدت القرار ده
لقيته بيقولي تمام ..!! وانا كنت متوقعه انه هيتخانق معايه
وافق اني ارجع الشغل رغم رفضه الشديد للموضوع ده قبل كده ؟
قولتله خلاص تمام انا هروح الشركه من بكرة .. وسيبته ودخلت انام
تاني يوم صحيت بدري ولبست ..ونزلت الشغل بتاعي وقابلت المدير وقولتله عايزة ارجع اشتغل
رحب بيا جدا وقالي مكتبك موجود .. وفعلا استلمت شغلي في نفس اللحظة
كان جوايا حاجه بتقولي بلاش تعملي كده .. بس كان لازم استفزة واشوف اخره فين .. لحد ما هوا يكلمني
قابلت صحبتي الانتيم نور في الشغل .. ماقولتلهاش اني هرجع تاني.. قولت افاجئها وفعلا فرحت جدا لما شافتني وفضلنا نتكلم كتير واحنا بنشتغل وانا بحاول افتكر الشغل كان بيمشي ازاي وبعد يوم طويل وصعب
حسيت بانجاز رهيب .. فعلا قعدة البيت دي بتقتل كل حاجه وممله لاقصى درجه
بعدها روحنا نتعشى أنا ونور إحتفالا برجوعي .. وبجد حسيت أني اتولدت من جديد
وفضلت بره قاصده لحد ما الوقت اتاخر.. وبعدها جوزي عماد اتصل بيا مرتين ما ردتش عليه
رجعت البيت الساعه 11 بليل ودخلت الشقه من غير سلاموعليكم زي ما بقى يعمل الفترة الاخيرة
وأول ما شافني ...
===================================================
وأول ما شافني ..لقيته بيسألني بكل هدوء اخبار شغلك أيه ؟
قولتله تمام ومبسوطة جدا .. قالي بالتوفيق وابتسملي ودخل ينام معرفش هوا انا مابقتش فارقه معاه للدرجه دي ..انا اعرف ان العتاب نص المحبه .. بس لما العتاب يختفي وكل واحد يعمل اللي هوا عايزة دا مقلقني اكتر
المهم اني قولت امشي معاه للاخر
تاني يوم نزلت الشغل وروحت اتعشى مع نور واتاخرنا ورجعت لقيته مستنيني برده وفضلنا كده اسبوع لحد ما رجعت في يوم مالقتوش في البيت ؟!
استغربت جدا وقلقت ..معقوله يكون سابلي البيت عشان يستفزني .. تصرفات عماد كلها مش عاجباني بقى له شهر .. فكرت اتصل بيه ولا لا بس قولت اكيد بيعمل كده عشان اتصل بيه ومايردش عليا ويستفزني
بس افرد عماد بيخني فعلا .. هبقى انا اللي فاكره اني بستفزة بس هوا اللي نجح ينفذ اللي في دماغه وينزلني من على ودانه
انا مابقتش فاهمه حاجه دخلت انام وانا مش جايلي نوم اساسا وفضلت عامله نفسي نايمه وصاحيه وكل شوية امسك الموبايل عشان اتصل بيه واقول لا خليه للاخر .. وعلى الساعه 2 بليل لقيته راجع وغير هدومه ونام
ماردتش اعرفه اني صاحيه .. بس في فكره جاتلي ..تاني يوم سلمت عليه وروحت الشغل واستئذنت في نص اليوم ورجعت عالبيت على العصر كده .. واول ما فتحت باب الشقة سمعت صوت ناس
لقيت صحاب عماد في الصاله وسامعه صوت واحده بتتكلم جوه في الاوضه ..انا هتجنن ايه اللي بيحصل ده
دخلت على الاوضه جري وصحابه بيحاولوا يمنعوني
لقيت عماد نايم عالسرير وفي دكتور وممرضه وواحد صحبه واقف معاه .. اول ما عماد شافني انهار في العياط
وانا كمان مقدرتش امسك نفسي وعيطت
عماد طلع عيان وعنده مرض خبيث صعب يتعالج منه ومخبي عليا كل ده وكان بيتاخر بسبب الكشف وجلسات العلاج وماكنش عايز يعرفني .. والموضوع ماثر عليه جسديا ونفسيا ازاي انا ماكنتش باخد بالي من جمه اللي خس واتغير
وملامحه اللي اتغيرت ولو حاجه بسيطه .. التعب ظاهر عليه .. قعدت جنب عماد عالسرير وفضلت احضنه وهوا يقولي ما تخافيش انا هبقى كويس واخبار شغلك ايه ؟
مابقتش فاهمه ايه اللي بيحصل ..ابتسمتله وبوست ايده وطلعت بره الاوضه انهار من البكاء وصحابه بيهدوني وبعدها عرفت من صحابه انه فاضله ايام معدوده اقل من اسبوع ويفارق الحياه وهوا محلفهم ما يعرفوش حد
بس هما مش قايلينلوا ان مرضه خطير للدرجه دي .. عشان ما يتعبش نفسيا .. وخافوا يقوليلي من بدري يدايق ويتعب اكتر .. وقالولي انه كان عايزني اشتغل عشان كان حاسس انه هيموت وكان خايف عليكي من بعده
بعدها .. اتلصت بالشغل وخدت اجازة وفضلت مع عماد في البيت اخدمه بكل اللي اقدر عليه وكلمت اهله يجوا يزورونا من غير ما اعرفهم حاجه وبعد يومين عماد بقى مش قادر يتحرك من السرير وبقيت بعمله كل حاجه
وجبت شريط فرحنا نتفرج عليه سوى .. ونفتكر ايام ما كنا بنتقابل في الكليه واول هديه جابهالي كانت برفان .. في عيد الحب .. وفضلنا نتفرج على صورنا في شهر العسل ونضحك وكل شويه بسسيبه وادخل الحمام ابكي وامسح دموعي واطلعله فرحانه ..بعدها مسكت ايده وقولتله انا اسفه ..اسفه لو كنت زعلتك في حاجه .. انت مافيش انسان زيك مفكره انك مقصر معايه وانت خايف على زعلي انا اسفه .. باس راسي وقالي بحبك
الموضوع كان صعب عليا جدا ..بعدها قومت احضر الاكله اللي بيحبها ورجعت لقيته ماسك صوره فرحنه ودماغه نايمه على صدره ..الصينيه وقعت من ايدي واترميت في حضنه اعيط
اسفه لو قصرت معاك .. اسفه اني ماكنتش جنبك في اصعب شهر في حياتك .. اسفه لو في يوم ظلمتك لو حتى في خيالي
كتير مش بنحس بقيمة الحاجه غير لما تروح مننا
النــهــايــة
بقلم_عمر_ليمونه
التعليقات على الموضوع