اومينيس 🙄 الجزء الاول🙄

اومينيس 1

كنت عارفه انه يوم ملهوش ملامح من الاول بس كمل باللي شوفته واللي كنت متخيله انه ف الافلام بس!!!
روحت من الشركة وانا هلكانه من الشغل امي مدياني المفتاح عشان بتأخر ساعات واختي ريتاج بتكون ف الكليه هي ف طب ف اغلب وقتها اما ف المشرحه اما ف قاعه الاستذكار بتذاكر واسلام اخويا في حصصه لانه ف ثانوي وعامر اخويا الصغير ف حصه حساب "من حسن حظه "
فتحت الباب بالمفتاح بصيت يمين وشمال ملقتش حد لسه هدخل اوضتي واتكعبلت ف اخويا اسلام  مرمي ع الارض كنت هصوت م الخضه بس ربنا اداني قوه ومعملتهاش ولله الحمد نزلت اوطي اشوفه ماله لسه هتكلم لقيته فتح عينه بيهمسلي "اوعي تعملي صوت " الدم وقف في عروقي حرفيا!!
لقيته بيشاور بعنيه ع السقف تلقائيا بصيت لفوق ويا ريتني اتعميت قبل م اعملها وعشان انا متربتش قومت بصيت فعلا شوفت منظر جمد الاكسجين في رئيتيني حرفيا نفسي طالع تقيل وروحي صغرت بس تقلت حسيت اني في بعد تاني خالص غير العالم بتاعنا ده لقيت اختي ريتاج!!!
رجليها واديها بقدره قادر متعلقه في السقف واللي نازل منها راسها وشعرها بصالنا بس مغمضه لونها غريب مش اصفر ولا ابيض جلدها باهت وشعرها كأنه مبلول بس مش مبلول في سواد غريب تحت عنيها لسه مش مستوعبه ايه اللي وصلها فوق وايه حصلان اصلا سبت كل حاجه مسكاها المفاتيح والشنطه وقعوا مني عملوا صوت عالي فجأه فتحت بصتلي بصه شهقت منها دي مش اختي ده مخلوق من قعر جهنم مش عنين اختي فجأه لقيت هوا جمبي اخويا طار ملقتوش جمبي كان هنا لسه وبقدرة قادر كنت وراه في ثانيه عند مدخل العماره!
خدت نفسي واستجمعت قوايا العقليه 'اللي باقي منها طبعا ' وسألت اخويا في ايه مين ايه وازاي ليه ؟
تنحلي وقالي الشيخ هو اللي هيساعدنا مش طالع من غيره!
امي دخلت علينا من بره هي وابويا كانوا بيجيبولي حجات لجهازي وميعرفوش اني قطعت الخلف تقريبا من اللي شوفته فوق لقيونا وشنا مصفر وعنينا مبحلقه جريوا علينا في ايه مالكم وقفين كده ليه ؟
اخويا قال تعالي معايا للشيخ ربيع ريتاج اللي فوق دي مش ريتاج  خالص!
الغريب ان بابا مستغربش ساب الحجات من ايده بهدوء ومشي مع اخويا يروح للشيخ ربيع وكان في بالي الف علامه استفهام بس اللي جاي بعد كده كان كفيل يهدهم ويبني بدالهم الف الف سؤال!
جه الشيخ ومعاه مصحف صغير وقزازه ميه وطلعنا فوق بكل هدوء واول م فتحنا الباب بصينا كلنا ملقنهاش بقينا بندور عليها بعنينا الا ابويا لقيناه مبحلق في ركن مضلم ف المطبخ بس نور الصاله واصله فنقدر نشوف طشاش!
لسه بنبص لقينا امي وقعت من طولها واخويا اسلام رجع مترين ورا , ابويا ده بقي في دنيا غير الدنيا مبحلق تماما وانا فوقت من ذهولي علي صوت الشيخ وهو بيصرخ " اعوذ بالله من الشيطان الرجيم اعوذ بالله من كل مارد لعين ...!
يتبع