ماذا يسبق الحب
"ماذا يسبِق الحب..؟!"
......
-يعني خلاص هتسيبي البيت يا مروة؟!
=عاوزني بعد كل ده و أقعد هنا يا عمر؟!
تزعقلي و تهيني و كمان كنت عاوز تمد إيدك عليا؟!
ليه هو أنا ماليش أهل يردوا عليك؟!
-ما إنتِ اللي حرقتي دمي و مش راضية تسمعي الكلام
=ما إنت طلبت ١٠٠ طلب في وقت واحد و أنا النهاردة تعبي زاد بجد و بتحرك و وجع بطني زايد أوي
-ما أنا قُلتلك تعالي نروح لدكتور و إنتِ اللي عندتي عليا
=خلاص يا عمر أنـ.....
-مـ.. مالك يا مروة في إيه؟!
بترجعي كده ليه يا بنتي؟!
=مش عارفة بطني بجد وجعاني أوي
ابعد...ماتلمسنيش
-طب مش إنتِ لابسة أهو!
تعالي معايا بقا للدكتور اللي جنبنا ده
و بطلي عند و التصرفات دي
=سيبني في حالي
مش كنت لسه هتمد إيدك عليا
-اسمعي الكلام و بطلي عند يا مروة
=سيبني يا عمر أروح عند أهلي شوية ربنا يكرمك
-تسيبي بيتك بعد سبع شهور جواز يا مروة؟!
أومال بعد سنة هتعملي إيه؟!
=و إنت بعد سنة هتعمل إيه؟!
هتمد إيدك عليا بقا؟!
أنا همشي أريح أعصابي شوية هناك لو سمحت
-مش هعرف أقعد هنا من غيرك
ماتسيبينيش
=في رعاية الله
-----------------------------------------
°يعني مفيش حاجة وحشة يا بنتي؟!
=لا يا بابا مفيش حاجة
أنا بس تعبانة كده و برجع كتير و عندي وجع جامد في بطني قُلت أجي أرتاح هنا شوية
~ طب ما يمكن حمل يا مروة!
=حمل؟!
بجد؟!
°أيوة يا بنتي ممكن
تعالي نروح للدكتورة اللي جنبنا دي بالليل
=حاضر يا بابا
~ هتصل بقا بعمر ييجي معانا
=لا يا ماما هو مشغول
بلاش تقلقيه عليا على الفاضي
~ على راحتك يا بنتي
-----------------------------------
*يعني تقوم تسيبها تمشي كده؟!
-و كمان كانت تعبانة
*اخص عليك يا عمر
-أنا ماعرفش يا ماما أنا عملت كده إزاي!!
أيوة اتعصبت عليها بس و الله مش عارف مالي كده
ما هي بتتهمني بإهمالها يا ماما و إني مش بهتم بيها
أومال لو ماكناش واخدين بعض عن حب
كنا هنقطع في بعض؟!
*إنت مش بتفرحها يا عمر؟!
-أفرحها إزاي يعني؟!
*مش بتجيبلها هدايا؟!
مش بتخفف عنها تعبها؟!
مش بتطبطب عليها وقت ما تتخنق؟!
-يا ماما ما أنا برجع من الشغل هموت و أنام
فيادوب باكل و أنام
أنا يعني هقطع نفسي؟!
*هي تعبانة من امتى؟!
-ده من زمان أوي تقريبًا تلات أسابيع
*تلات أسابيع و ماعرفتش تاخدها من إيدها كده غصب عنها و تكشف عليها؟!!!!
-ما هي مش بترضى..!
*صدقني لو لاقية منك اهتمام بيها فعلًا و شايفة إنك مهتم بإنك تاخدها للدكتور كانت هتيجي
على فكرة الست بترجع عن أصعب قرار بكلمة حلوة
كان في مرة واحدة اتخانقت مع جوزها و راحت تلم هدومها فجوزها راحلها و ضحكلها و قالها: بتعملي إيه يا حبيبتي؟!
قالتله:بشيل هدوم الشتا و بحط هدوم الصيف
شايف لما ابتسملها بس جبر بخاطرها يا عمر
-ما هي اللي كانت عاوزة تمشي يا ماما!!
*تمسكها كدهو غصب عنها و تراضيها
-يا ابني ده ربنا قال:وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً ۚ إِنَّ فِي ذَٰلِكَ لَآيَاتٍ لِّقَوْمٍ يَتَفَكَّرُونَ
ماقالش حب زي ما إنت بتقول ده قال مودة و رحمة
وِد مراتك و ارحمها يا عمر هي محتاجة منك كده و بعدها قول بتحبها
و على فكرة الحب مالوش لازمة من غير دول
راعي مراتك يا عمر إنتوا مالكوش غير بعض
-يا ماما أنا طلعت وحش أوي
بس ده يستاهل إنها تسيب البيت و تمشي كده يعني؟!
*يا حبيبي إنت مش وحش و لا حاجة
و هي سابت البيت لإن مش ده اللي هي اتمنيته و اتمنت تعيش فيه و بيه
في فترة الخطوبة كل واحد بيبين محاسنه و بيقول للطرف التاني هعيشك في جنة
و الطرف التاني بيبني أحلام و أماني على أساس الكلام ده
الجواز مش سهل
الجواز مسئولية كبيرة و مش سهلة أبدًا
بس إحنا في إيدنا نسهل الصعب يا ضنايا
-أنا ندمت بجد
بس و الله العظيم بحبها و مش قادر على غيابها الساعتين دول مش عارف أعمل إيه؟!
*روحلها النهاردة
-محروج أوري وشي لأهلها
*و مش محروج على صورتك اللي هتتهز عندها لو سيبتها كده و ماعبرتهاش؟!
لا و كمان تعبانة؟!
-أنـ...
أنا هروح أيوة هروحلها يا ماما
أنا أهملتها بجد
أنا مش عارف إزاي الشغل خد كل وقتي كده؟!
إحنا ماكناش كده يا ماما!!
*روحلها يا ابني
-ربنا ما يحرمني منك يا ماما
-------------------------------------------
=يعني أنا حامل يا دكتورة؟!
• أيوة يا حبيبتي حامل
مبااارك يا حبيبتي
~ بتعيطي ليه يا بنتي؟!
= فرحانة أوي يا ماما و الله
فرحانة بجد
مش مصدقة نفسي
يعني هكون أم يا ماما خلاص
°ربنا يكمل على خير يا حبيبتي ياااا رب
أنا قلبي كان حاسس أصلًا
=أنا لازم أعرف عمر يا مـ....
~إيه يا بنتي سكتِ ليه؟!
=لا و لا حاجة يا ماما
بس أول ما أوصل هعرفه بإذن الله بلاش من هنا يعني
°طب يلا يا حبيبتي نروح البيت كده أول
-----------------------------------
=عمر!!!!!
-يا عيون و قلب عمر من جوا إنتِ و الله
° إيه يا عم الهدايا دي كلها؟!
و إيه بوكيه الورد الفزييييع ده؟!
كل ده علشان المدام تعبانة شوية
ماتقلقش هي كشفت و الحمدلله هـ...
~ تعالى يا حسين ندخل بس كده و هي تكلمه جوا
بلاش قاعدة السلم دي
......
-هو إنتِ ماقُلتيش على اللي حصل بينا؟!
=لاء
-ليه؟!
=ماحبش إنهم يزعلوا منك
-أنا آسف
=و لا يهمك
-لا بُصيلي يا مروة بالله عليكِ
ده أنا ماليش غيرك يا حبيبتي و الله العظيم
ماتعمليش فيا كده أنا مش حمل كده و الله يا حبيبتي
=*بتعيط*
-طب بطلي عياط علشان خاطري
أنا عرفت غلطي فين
و صدقيني مش هشيلك فوق طاقتك تاني و هاجي أعمل معاكِ في البيت اللي أقدر عليه
و كمان هفضيلك وقت نخرج فيه و نشم هوا و نبعد عن الدنيا بحالها سوا
=غصب عنك مضطر تعمل معايا الفترة الجاية..
-اشمعنى؟!
=أصل انا روحت كشفت و الدكتورة قالتلي إني
قالت إني يعني حامل في شهر
-إيه؟!
بجد و الله العظيم؟!
لا تعالي هنا إنتِ راحة فين؟!
=نزلني يا عم إنت أنا لسه زعلانة
-زعلانة إيه بس!!
ده الزعل مش لايق علينا و الله
أنا فرحان أووووي يا مروة بجد
هيكون عندنا نونو صغنن بجد بجد!!؟؟؟
=ممكن أطلب منك طلب؟!
-اطلبي أكيد ده أنا عيوني ليكِ
=ماتعملش كده فيا تاني
عارفة إنك ممكن تكون شايفها حاجة تافهة بس بجد أنا اتخنقت أوي و لو كنا فضلنا سوا
كان ممكن نتخانق أكتر و أنا مش بحب نتخانق يا عمر و إنت عارف كده كويس
-لا مش حاجة تافهة و لا حاجة
أنا عرفت غلطي و الله يا ست الحسن
و الليلة مش هتنامي غير في بيتك يا حبيبتي
يلا بقا نروح
=استنى ناخد البلالين و الورد و الحاجات الحلوة دي
أومال فين الرومانسية دي من زمان كانت وحشاني
-مش هتوحشك تاني هتلاقيها على طول
.....
و إن أرقى ما في الحب ليس بقول "أنا أحبك" كل وقت،،بل أرقى ما فيه هو أن يسعى الطرفين على الحفاظ على ما بينهم،ودهم و الشعور الأول الذي انتابهم لبعضهما البعض بعدم نُقصان..
فالحفاظ على الحب أجمل من الحب نفسه..
و الحب يغمر كل معاني الحياة..
.....
ريهام يحيى
التعليقات على الموضوع