رواية حب عمري 💟الحلقه 12💟

الفصــــل الثـــــآنــــي عشــــر

*** حب عمرى ***

فى صباح اليوم التالي بدأت خيوط الشمس تتسلل الي غرفه داليا لتداعب عيناها وبدأت تفيق من نومها ولكنها كانت عيناها منتفخة من اثر البكاء طوال الليل .. استيقظت

ودخلت الي المرحاض لتزيل اثار دموعها بأخذ حماما دافئ .. ثم عادت الي غرفتها وبدلت ملابسها وتوجهت الي باب الشقه ولكن اوقفها صوت حنان

حنان : ايه يا دودى راحة فين بدري كده يا حبيبتي

: راحة المستشفي يا خالتو

حنان : الساعه لسه مجتش 7 وانتي معادك هناك 8 هتمشي بدري ليه كده

: عادي ياخالتو علشان اعوض ايام الغياب

حنان : فطرتي يا حبيبتي

: هبقي اكول اي حاجة في المستشفي لما اجوع بعد اذنك يا خالتو

حنان : خلي بالك من نفسك

: حاضر سلام

حنان بعد ان ذهبت داليا : ربنا يريح بالك يا بنتي ويكرمك

هبطت داليا الي الاسفل ولكنها توقفت قليلا امام البحر قبل ذهابها الي عملها

داليا : " لحد امتي هفضل تعبانه كده وحزينه .. انا عارفه ان مش بسهوله انساه بس ازاي هتعامل معاها ومعاه .. كل ما هشوفها قدامي هفتكر حلمي اللي راح مني وقلبي اللي اتكسر ..

وكل ما اشوفه قدامي هضعف وهحن ليه .. يارب قدرني علي نسيانه .. انا راضيه باللي انت كاتبهولي يارب بس انا بشر ومبقتش قادرة استحمل .. استحملت بعدي عنه كتير بس كان عندي امل اننا هنتلاقي في يوم لكن دلوقتي مابقاش من حقي حتي اني افكر فيه .. بقي لغيري وهي اولي بيه .. وهنا تنهدت تنهيدة قويه

جاء من خلفها ليسمع تنهيدتها سيف: ياااااااااااااااااه كل ده جواكي

داليا بفزع : سيف.. انت هنا من امتي

سيف: لسه واصل دلوقتي

داليا : وايه اللي منزلك بدري كده

سيف: عادي قولت اتمشي شويه ما انتي عارفه اني بحب الجو ده انتي ايه اللي منزلك بدري كده لسه باقي ساعه ع معاد المستشفي

داليا : عادي لاقيت نفسي صحيت قولت انزل

سيف: مالك يادودى

داليا وهي تنظر لعينيه : " بتسألني مالك وانت كاسر قلبي .. اد ايه كلمة مستفزة انك تقتل انسان وتسأل عليه .. متشغلش بالك بيا انا خلاص مت وقلبي مات من بعد ما شوفتك معاها .. غصب عني هبقي عايشه من غير روح ومن غير قلب .. وياريت متسألنيش مالك دي تاني "

سيف : دودى بكلمك مالك

داليا والدموع متحجرة في عينيها : عادي انا همشي علشان متأخرش سلام

تركته ورائها دون ان تسمع ردا منه .. كانت تتمني ان تترك حبها له كما تركته هكذا ولكن سيظل الحب بداخلها ولا تستطيع ان تتركة او تتخلي عنه ابدا .. كانت تسير شاردة حتي وصلت الي المستشفي لا تعرف كم استغرق من الوقت او كم سارت ولكنها تعلم انها الان امام باب المستشفي ويجب ان تركض لتلحق موعدها .. ركضت داليا الي الدور كانت تركض بجسدها ولكن عقلها وروحها في مكان اخر تركته مع حبيبها امام البحر ولكن قطع شرودها صوت سحر

سحر : الف سلامة عليكي يا داليا

: الله يسلمك يا دكتوره

سحر وهي تعدل من هندامها : طب يلا نشوف شغلنا بقي

ولكن قطع حديث سحر دكتور رامي

رامي : الف سلامة عليكي يا داليا المستشفي كانت مضلمة من غير التلميذه النجيبه

داليا بابتسامة باهته : الله يسلمك يا دكتور رامي

رامي : بعد اذن دكتورة سحر انا محتاج داليا معايا انهاردة

سحر : اوك مع دكتور رامي يا داليا

ذهبت داليا مع رامي وبدأت في ممارسه عملها ولكنها كانت حزينه ودائما الدموع قريبه من عينيها .. اختفت الابتسامة الرقيقه التي كانت تقابل بها المرضي وتعطيهم الامل في الحياه

لاحظ هذا رامي وبعد ان خرجوا من غرفه احدي المرضي

رامي : انا اختارتك تبقي معايا لانك الوحيدة اللي بحس المرضي بيرتاحولها .. المرضي مالهمش ذنب في انهم يشوفوا التكشيرة دي .. ابتسامتك كانت احلي مافيكي وبتدي امل للمرضي .. ياريت نبعد عن اي مشاكل وننسي كل حاجة شخصيه واحنا في الشغل

داليا وبدأت دموعها في النزول وكانت تتطآطئ رأسها الي اسفل : حاضر " عايزني ادي للناس امل في الحياه وانا مين يديني الامل اذا كانت ثقتي في الحياه والامل فيها انعدم "

بدأت داليا تتفقد المرضي من جديد وكانت تحاول ان ترسم الابتسامة ولكنها ابتسامة مرسومة وفي خلفها حزن هائل كانت ابتسامة مزيفه كاذبه ليس لها معني لان هناك قلب محطم كيف تضحك وكيف تحيا والامل منعدم لديها والقدر لم يتركها بحالها وابعد بينها وبين حبيبها ولكن قطع تلك الشرود صوت ريم

ريم : دودى حمد الله ع سلامتك مشوفتكيش الصبح

داليا وهي تأخذ نفسا وتخرجة قويا فتطاير خصلات شعرها : الحمد لله .. معلش يا ريم علشان عندي مرور

ريم وهي تستغرب موقفها : اوك .. ابقي طمنيني عليكي

داليا: ان شاء الله .. ثم تركتها وذهبت لتتفقد احوال المرضي وكان معها رامي

رامي : جهزي نفسك في عمليه هتدخليها معايا

داليا : اوك

بدأت في تجهيز نفسها لحضور العمليه ودخلت مع رامي الي غرفه العمليات وحاولت ان تنسي همومها حتي لا تضيع روحا من بين ايديها وانتهت العمليه وخرجت منها وذهبت لتبدل ملابسها ووذهبت الي خارج المستشفي وذهبت الي كورنيش البحر وجلست علي الكورنيش واعطت وجهها للبحر وشردت فيما حدث لها وبدأت دموعها في النزول مرة اخري

رآها رامي وهي تجلس هكذا ذهب اليها ووقف بجوارها

رامي : تعرفي ان صاحبي الوحيد في الدنيا دي هو البحر

داليا وهي تنظر لمصدر الصوت باستغراب : نعم

رامي : ممكن اقعد

: اه طبعا اتفضل يا دكتور

رامي : دكتور دي جوة المستشفي .. بره المستشفي انا رامي وبس اتفقنا

: ميصحش يا دكتور حضرتك استاذي

رامي : واستاذك بيقولك انا اسمي رامي وبس .. داليا تقبلي نكون اصحاب

داليا : طبعا يا دكت .. طبعا يا رامي

رامي : ايون كده دكتور دي رخمة اوي

ابتسمت داليا علي كلمتة بعفويه : طب ليه بتقول ان صاحبك الوحيد هو البحر مع انك اجتماعي

رامي : تقدري تقولي كده اني مش لاقي اللي يستحق يبقي صديق او صاحب لان ليا مقاييس معينه في كلمة صداقه

داليا : اهاااااا تمام

رامي : تعرفي اني في يوم من الايام كنت حزين زيك كده ويمكن اكتر وبرضه كنت متدرب

داليا: اشمعني

رامي : خسرت حب عمري او تقدري تقولي اللي كنت فاكرة حب عمري

داليا باستغراب : ازاي

رامي : كنت بحبها من واحنا في الجامعه وهي كمان كانت بتحبني بس كنت يا دوب متدرب بسيط في مستشفي جامعي زي كده وهي رفضت انها تشتغل معايا في نفس المستشفي قررت انها تشتغل في مستشفي خاصه ابن صاحب المستشفي بدأ يلعب عليها ويفهمها انه بيحبها ووقعت في حبه وسابتني بس هي كانت ماديه اهتمت بالعربيه والمظهر والمركز بس طلع ندل وسابها واتجوز واحدة بنت رجل اعمال

داليا : ربنا مش بيسيب حق حد كما تدين تدان

رامي : ونعمة بالله انا بقي تعبت وانهارت لانها سابتني بس لما فوقت من الصدمة عرفت انها ولا حاجة لانها متستحقش انها تبقي في قلبي لحظة واحدة وعرفت ان مستقبلي هو اهم من اي حاجة تانيه واهو ربنا كرمني وبقيت دكتور الحمد لله

داليا : الحمد لله

رامي : انتي بقي زعلانه ليه

: عادي مش زعلانه هزعل ليه

رامي وهو ينظر لعينيها : تعرفي ان العيون دي مبتكدبش ابدا العيون دي فيها اسرار كتير اوي مستخبيه

: هو حضرتك دكتور جراحة مخ ولا دكتور عيون

رامي : اهو كلهم دكاترة مش هتفرق

داليا بابتسامة رقيقه : خليك في تخصصك احسن

رامي : هههههههههههههه بقي كده

: معلش انا مضطرة امشي لان الوقت اتأخر

رامي : هتروحي لوحدك الساعه 9

داليا: عادي يعني

رامي : استني هاجي معاكي اوصلك

: مالوش داعي انا هركب تاكسي واروح ع طول

رامي : ماشي ما انا هركب معاكي التاكسي ويبقي يوصلني انا كمان

داليا : لاء حضرتك روح وانا هروح

رامي : لاء هوصلك يعني هوصلك وخلصت المناقشه

داليا : اوك

قام رامي بتوصيلها الي المنزل وصعدت الي المنزل

مجدي : اتأخرتي كده ليه يا دودى

داليا : كان فيه عمليه يا جو وكنت فيها

مجدي : ماشي يا حبيبتي يلا ادخلي غيري علشان ناكل سوا

داليا: معلش يا جو انا كلت في المستشفي مش هقدر معلش

مجدي : عيني في عينك كده

وهي تتهرب منه : انا هدخل اغير بعد اذنك

دخلت داليا الي غرفتها وجدت منى جالسه ع السرير

داليا : مالك قاعده كده ليه

منى : عادي هعمل ايه بس سقعانه

داليا: الجو عادي يعني مش تلج

منى : انتي بتحبي الشتا انا مبحبهوش

: في حد مبيحبش الشتا ده اجمل شتا هنا في اسكندرية

منى : ماشي

: مالك يا منى فيكي ايه

منى : مش عاجبني حالك يا بنت خالتي

: ماله حالي ما انا كويسه اهو

منى : ده اللي بتبينيه قدام الناس بس للاسف مهما عملتي باينه حزينة اوي يا دودى

داليا وهي ترتمي بين احضان منى: تعبانه اوي تعبانه بحاول اعمل قويه علشان ما انهارش بس مش قادرة حاسه اني خلاص مت قلبي مات وكل حاجة جوايا ماتت

منى وهي تربت علي كتفها : ده نصيب يا حبيبتي ولازم نرضي بيه واكيد ربنا عاينلك حاجة احسن

داليا ببكاء : مش عايزة الاحسن مش عايزة غير سيف وبس

منى: يا حبيبتي خلاص بقي متعمليش في نفسك كده وحاولي تنسي ده ربنا مدينا نعمة النسيان يا حبيبتي

: ازاي انسي عمري اللي فات .. ازاي انسي احلامي معاه وحياتي اللي بينتها وياه .. قوليلي ازاي وانا معاكي

منى: ممكن بس تهدي العصبيه والدموع مش هترجع اللي راح

داليا : صعب عليا اشوفه واكلمة وانا قلبي مكسور منه .. صعب عليا اسمع منه كلمة مالك .. تخيلي انه جالي ع البحر وقالي مالك .. بيسألني مالك يا منى وهو السبب في اللي انا فيه

منى : هو ميعرفش يا حبيبتي اللي فيكي من ايه .. انتي خسرتي سيف كحبيب بس متخسريهوش كصديق

: تفتكري انه من السهل عليا اعتبره مجرد صديق .. انا حلمت معاه بكل حاجة كويسه .. حلمت معاه بعمري اللي جاي .. ازاي بسهوله كده يبقي مجرد صديق

منى : هنعمل ايه انا لو عليا اروح اقوله ليه سبتها واختارت غيرها بعد اللي عملته علشانك بس صعب اجرح كرامتك يا حبيبتي

داليا : اوعي تعملي كده سيف محسش باللي جوايا يبقي مش لازم يعرف حاجة

منى : قومي غيري هدومك وروقي كده وحاولي تنسي واهتمي بشغلك ومستقبلك ده اللي هينفعك صدقيني

داليا بتنهيدة قويه : عندك حق

جففت داليا دموعها وقامت بتبديل ملابسها الي ملابس للبيت ودخلت الي المطبخ وصنعت لها كوبا من الشاي بحليب ووقفت في الشرفه بعد ان فتحت الحاسوب الشخصي ع اغنيه اصعب حب

كانت تستمع الي كل حرف وكل كلمة تقال كانها تعبر عما بداخلها وماحدث معها ووجدته خارجا الي الشرفه ممسكا بهاتفه النقال ويحدث ريم ولكنه عندما رآها انهي المكالمة مع ريم

سيف: ازيك يادودى

داليا بحزن : الحمد لله

سيف : ايه الاغنيه اللي انتي مشغلاها دي فين نجاه

: عادي اصل الاغنيه عجباني

سيف: بس دي حزينه اوي

: وايه الفرح اللي في حياتنا علشان نفرح

سيف : مالك يا داليا وايه نظرة التشاؤم دي

: عادي متشغلش بالك بعد اذنك

سيف: هتدخلي

داليا: اه علشان عندي مستشفي بدري

سيف: وانا مسافر بكرة

بلا مبالاه : اوك .. تصبح ع خير

سيف وهو مستغرب موقفها : وانتي من اهله

دخلت داليا الي غرفتها وانهارت من البكاء .. كيف طاوعها قلبها علي هذه المعامله .. ولكن باي صفه اعامله واهتم به فهناك من احق لها بالاهتمام به .. ولكن لم اتعود علي تلك المعامله معه من قبل .. هو من اجبرني علي تلك المعامله ولا يجب التعامل معه سوي بهذا الاسلوب .. فهو من كسرني وهو من يتحمل معاملتي

في صباح اليوم التالي ذهبت داليا الي عملها ووجدت ريم امامها

ريم : صباح الخير يا دودى

داليا بنظرة ثاقبه ووحادة : صباح النور

ريم : جايبالك حته خبر مقولكيش

داليا بلا مبالاه : خير

ريم : دكتور وائل هيسيب المستشفي هيسافر كمان اسبوعين

: اوك .. انا همشي علشان عندي شغل

ريم : دودى استني

: نعم

ريم : هو انتي زعلانه مني في حاجة انا عملتلك حاجة ضايقتك

داليا وهي تتنفس الصعداء : لاء ليه بتقولي كده

ريم : لاني شايفاكي بتكلميني بزهق وحاسه اني مضايقاكي في حاجة

داليا واوشكت عيناها بالدموع : " اقولك انك سرقتي مني فرحتي ازاي .. ولا اقولك انك كسرتيني وقتلتيني بسكينه باردة ازاي .. ازاي اقولك انك ضيعتي مني عمري اللي فات وعمري اللي جاي " انا مش زعلانه منك ياريم انا بس اعصابي تعبانه معلش

ريم وبدأت دموعها في الهبوط : طيب ممكن تتكلمي معايا لو مخنوقه

داليا : صدقيني لما احس اني عايزة اتكلم هاجي واحكيلك

ريم وبدأت تغمض عيناها بقوة وامسكت جبينها بيدها

داليا بلهفه : مالك ياريم

ريم بصوت متقطع : مش عارفه حسيت بعيني مزغلله شويه وصداع جامد

داليا : برضه الصداع انتي لسه مكشفتيش

ريم : ده حبه صداع تلاقيه من السهر ولا حاجة اصل سيف مسهرني لحد الفجر ع التليفون

داليا شعرت بخنجر يصوب تجاه قلبها وبدأت عيناها تمتلأ بالدموع واختنق صوتها : اه طب بعد اذنك

ريم بعد ان شعرت بتحسن : اتفضلي

ذهبت داليا الي المرحاض وبدأت تبكي وبقوة علي الامها وعذابها كيف تنسي وهي دائما امامها فهي تحاول ان تتجنبها ولكن دون فائدة اه يا قلبي كم عانيت وتعذبت .. ارحمني يا الله من تلك الالام التي تعتصر قلبي فقد تعبت

سمعت صوت بكائها سحر وانتظرت حتي تخرج داليا وجدت وجهها ملئ بالعبرات الحارة

سحر : مالك يا داليا ايه الدموع دي كلها

داليا بارهاق : ولا حاجة يا دكتورة انا بس تعبانه شويه

سحر : ايه يا بنتي ده.. ده انتي تعبانه خالص .. اتفضلي روحي

: معلش يا دكتورة انا شويه وهكون كويسه بس راحتي في شغلي

سحر : ع راحتك بس ياريت لما تتعبي تروحي

: ان شاء الله بعد اذنك

سحر : اتفضلي

ذهبت ا الي الحاله التي تباشرها مع دكتور رامي ونظر لها رامي وجدها باكيه بعد ان خرجوا من غرفه المريض

رامي : مالك يا داليا في ايه

داليا بعصبيه : انا كويسه ومش عايزة حد يقولي مالك دي تاني ارحموني بقي انا تعبت من الكلمة دي

رامي وهو يهدئها من تلك العصبيه : اهدي بالراحة وهو يمسكها من يدها تعالي عايزك

اخذها رامي الي غرفه مكتبه وكانت هي منهارة من البكاء

رامي بحنيه : ممكن تهدي خالص

داليا بعد ان بدأت تهدأ : انا اسفه يا دكتور انا مش عارفه انا قولت كده ازاي سامحني انا اسفه بس بجد تعبانه ومش قادرة اسمع كلمة مالك دي تعبت منها وكرهتها ومبقتش قادر استحمل

رامي : خلاص يا داليا مش هقولهالك تاني بس صدقيني مش قادر اشوفك كده ممكن تهدي وتروحي مش هتقدري تكملي اليوم كده

: لا يا دكتور هقدر

رامي : بلاش عند

: صدقني هقدر

رامي : براحتك يلا روحي ع شغلك

ذهبت الي تفقد المرضي حتي انهت يومها وعادت الي المنزل

مرت الايام مليئه بالحزن والالم الذي يعتصر قلب داليا حتي جاء يوم من الايام كانت ذاهبه الي عملها ودخلت من باب المستشفي ووجدت امامها صدمة كبيره ........