بوست غير حياتي 🙄 الجزء الاول

كان اليوم عيد زواجهما الخامس وكأي زوجة تذوب عشقا بزوجها حضرت أشهى وأطيب الأصناف التي يحبها زوجها ريثما يعود من معرضه الخاص (معرض خشب ورثه عن والده ) وارتدت أجمل ثيابها وأشعلت الشموع هنا وهناك حتى بدا المنزل في غاية الرومانسية كما أصرت حماتها اليوم أن يبيت صغيرها عندها ليحلو الجو لابنها وزوجته . تأخر لبعض الوقت لكنها انتظرته بفارغ صبرها حتى عاد في العاشرة مساء كان المنزل مظلما تنيره بعض الشمعات ....
=هو النور قاطع ولا ايه !... أميرة ..أميرة
-ايوى يا حبيبي ...انا هنا أهو ..(أمسكت بيديه برومانسية بالغة وسحبته باتجاه السفرة )
=هو النور قاطع ؟
-لا ..
=ياه يا حبيبتي كل ده توفير
-لا ثواني كدة ..هو انت مش عارف النهاردة ايه
=النهاردة الأربع ... فين المشكلة
-تاريخه ايه بقى ...ها
=واحد خمسة...اه عيد العمال كل سنة وانتي طيبة ياحبيبتي
-ده على اعتبار اني بشتغل اصلا ...طيب ياسيدي مااااشي... مش بيفكرك بحاجة تانية
=...(اختلس نظرة للسفرة)... الله مكرونة باشميل ...تعالي ناكل الاول ميت من الجوع ونبقى نشوف موضوع التاريخ ده بعدين ...وافتحيلنا النور ده
-طيب .. انا هدخل انام بقى..(بعدما فقدت الأمل منه تماما فمن الواضح أنه نسي  واتجهت الى غرفتها بعدما أضاءت له الأنوار)
=...(سحبها من يدها مبتسما ووضع يده في جيبه )..مفكراني ناسي عيد جوازنا... انا لقيتك عاملة شغل أفلام قلت أعمل زيك واستهبل وبعدين تزعلي واوقفك هههه
-هههههه حبيبي انت والله ..استنى اغمض عيني قبل ماتطلع الهدية
=هدية ايه ...لا مش أوي كدة انا بقلد الأفلام في حاجات بسيطة بس .. هههههه ... انا بطلع الموبايل عشان أصور مائدة الرحمن دي
-هههههه ماشي ياسيدي انت دخلتك علينا بالدنيا أصلا .. يلا عشان تاكل بقى عاملالك كل الأكل اللي بتحبه .

بدآ بتناول الطعام بعدما التقط وليد بعض الصور ثم انشغل قليلا بهاتفه ومن ثم بدأ بالتهام الطعام ليدق هاتفها حينها...
-ايوى يا طنط ..عاملة ايه
=تمام بس زيد بيعيط ومش راضي يسكت خالص
-اممم كنت عارفة والله ... خلاص ياطنط ابعتيه مع ماجد

بالطبع بعد قليل وصل زيد وكانت أميرة قد أعدت طبقا كبيرا من الأصناف التي صنعتها وأعطتها ماجد . ما ان احتضنت زيد حتى هدأ ونام في حضنها وراحت هي الأخرى في نوم عميق بجانب طفلها لم تستيقظ الا مع آذان الفجر لتجد السفرة كما هي وقد استلقى زوجها على الأريكة المقابلة للتلفاز ونام  بعدما  ملّ من انتظارها . أيقظته ليرتاح في غرفته وراحت هي ترتب وتنظم البيت وبعد انتهائها بدأت تتصفح الفيسبوك لتصلها رسالة من صديقتها أماني..
=ازيك يا أميرة ..
-أماني ...ازيك عاملة ايه
=تمام
-ايه اللي مصحيكي بدري
=بصراحة انا مانمتش
-ليه بس
=اممم بصراحة مترددة اقولك ولا لا
-فيه ايه يا بنتي قلقتيني ماتتكلمي
=بصي في جروب كدا أنا مشتركة فيه واحدة نزلت صورة أكل وبتقول خطيبي طالب مني اعمل الأكل ده واتعلمه
-فين المشكلة !؟
=المشكلة اني لقيت انها نفس سفرتك وأطباقك وكان ظاهر جزء من النيش بتاعك ..قلت يمكن مجرد تشابه عادي بس لما دخلت صفحتها لقيت البوست ده (أرسلت إليها صورة كانت بها فتاة تقف ممسكة بيد وليد وقد كتبت على الصورة تمت خطبتنا....

الجزء الأول من بوست_غير_حياتي

ريم_السيد