قصة الكرسي العجيب🤔الجزء الاول👉

#الكرسي_العجيب

تفتكروا ممكن كرسي يكشف  حقيقه شخص !محدش  هيصدقني بس القصه دي حصلت معايا انا شخصيا،هقولكوا كل حاجه من البدايه،الحكايه بدأت في يوم الصبح لما ماما جابت الكرسي ده من بتاع الروبابيكيا
*فلاش بااك*
-ايه يا ماما الخبط والرزع اللي عالصبح ده ؟
=الناس تقول صباح الخير
-صباح الخي ايه ده ايه الكرسي ده
=حلو مش كده ده لقطه جبته من بتاع الروبابيكيا وبخمسين جنيه بس

-معقول ده باين انه جديد ،اكيد فيه حشرات ولا في حاجه ماهو الناس مش هترميه وهو جديد كده
==ما انا فتشت فيه ونفضته كويس امك ناصحه ياض ،دي ام حسن عينها كانت هتطلع عليه وانا خطفته خطف كده.
-الله عليكي يا ست الكل هو فعلا لقطه بس يارب ميكونش فيه حشرات وتملا المكان لو حصل كده اديه لام حسن هديه هههه
=بس ياض ،بقولك ايه احطه هنا ولا احطه في اوضتي انا وابوك
-يانهار أبيض الساعه 9انا اتأخرت لما ارجع يا ماما نشوف هنحطه فين
*لبست ونزلت بسرعه وخلصت جامعه ورجعت متأخر ونسيت حوار الكرسي ده ودخلت نمت وصحيت تاني يوم كان الجمعه بعد ما صليت طلعت لاقيت ماما حطت الكرسي مكان الكرسي القديم اللي بابا بيحب يقعد عليه وهو بيتفرج علي التلفزيون كنت عارف انها حطته هنا مخصوص علشان بابا يقعد عليه ،الكرسي كان باين انه لسه جديد  لونه اسود وفيه ورود زرقه وظهره طويل قعدت  عليه بمجرد ما قعدت حسيت ان الكرسي بيلف بيا ولاقتني في اوضه غير الاوضه اللي كنت فيها قومت  مفزوع من علي الكرسي لاقتني في الصاله عندنا بصيت حواليا في خوف وفضلت باصص للكرسي محتار اقعد تاني ولا لا ..اقعدت تاني وغمضت عيني نفس اللي حصل لكن المره دي مقومتش من علي الكرسي وفضلت ابص حواليا و شكل الاوضه  كان مألوف،كانت صاله عاديه كنبه وكرسين وتلفزيون لكن فجأه
-انت مغمض عينك كده ليه ياض
=ايه ده ايه اللي حصل!
-وعرقان كده ليه انت تعبان يا احمد ياابني رد عليا
=ايه يا ماما ها لا مفيش يا حبيبتي
-ياولا بتشيل الكرسي ورايح فين
=هحطه في اوضتي اصله عجبني اوي ومريح
-مش ده اللي فيه حشرات حلي في عينك دلوقتي ،ابوك هيطلع عينك ده عجبه اوي
بوص الولا دخل وقفل الباب مااشي يا احمد
*فتح الباب*
=حبيبتي يا ست الكل مقدرش اقفل الباب بس اصل الكرسي ده طالع من عيني وهيبقي  حلو اوي في اوضتي وبعدين انا حبيته علشان انتي اللي جبتيه يا عسل انتي
--كلني بالكلام كلني
*دخلت الاوضه وقفلت علي نفسي علشان محدش يقاطعني ورجعت تاني للاوضه اللي حاسس اني هتلبس او هيحصلي حاجه بسبب الكرسي الملبوس ده،في صوت خناقه في الاوضه اللي جوا كنت عايز اقوم لكن مقدرتش أتحرك رجلي كأنها متكتفه لاقيت راجل خارج من الاوضه وعمال يزعق وراه واحده ست ولما شوفتهم عرفت انهم جيرانا زمان طنط حنان وعمو سمير كنت بحب طنط حنان جدا كنت بشوفها حلوة جدا وشعرها كان جميل ودايما مرتبه ولابسه حلو عمو سمير كمان كان بيلبس بدل وشيك اوي دي كل معلوماتي عنهم لانهم كانوا جيرانا وانا عندي ست سنين وبعدها احنا عزلنا  ،ومش فاهم برده الكرسي بيوريني بيتهم ليه ،خرجت اسأل ماما عنهم لان من جوايا كنت حاسس ان في حاجه لازم اوصلها.
-ماما فاكره حنان و سمير
=حنان وسمير مين
-جيرانا في البيت القديم
=ياااه ايه اللي فكرك بيهم
-مش عارف بس  احكيلي عنهم شويه 
=احكيلك يا اخويا ده انا بحب الرغي اوي  حنان وسمير كانوا متجوزين كان دايما الناس بتضرب بيهم المثل شوفوا حب سمير وحنان وشوفوا عربيه وبيت سمير وحنان كان دايما  الناس بيتكلموا عنهم وعن المميزات الكتير اللي في حياتهم لبس ايه وعربيه طبعا الستات كانوا بيحسدوا حنان علي سمير   اللي يتمنوه ،انما حنان كانت إنفه كده مش بتكلم حد لما كان بيعزم العماره كلها عنده اصله كان اجتماعي اوي كانت هي تقعد لوحدهامتحبش  تكلم حد إنما استاذ سمير الشهاده لله ما يتعايبش 
-ماشي يا ماما شكرا علي المعلومات القيمه دي
=عفوا يا اخويا متجيش تاني
*دخلت الاوضه وعمال أفكر قعدت تاني علي الكرسي لاقيت حنان قاعده بتعيط وبتكلم حد في التليفون  وبعدين عمو سمير دخل البيت وكان متعصب ومولع سجاره
شد التليفون من إيديها ورماه وضربها بالقلم،  لاقيت طنط حنان بتكلم حد بتقوله هجيلك يا حبيبي متزعلش  ،كانوا بيحضروا الشنط ،منهاره من العياط  وبتقوله انت قتال قتله وشيطان ،فجأه لاقيتها علي كرسي متحرك. مكنتش فاهم حاجه كان كل ده بيجي علي شكل صور ولقطات بتعدي ورا بعض وانا مش فاهم منها حاجه  لكن اللي مش فاهمه اكتر ازاي هو قادر يمثل علي الناس انهم سعداء مع بعض وحصل ايه علشان تتشل.
-هتفضل قاعد طول اليوم في الاوضه
=خضتيني  ،ماما اديني عنوان بيتنا القديم
-انت ايه حكايتك يا ولاه
=هقولك بعدين بس اديني العنوان
*خدت العنوان وروحت وطلعت الشقه خبطت محدش فتح نزلت أسأل البواب قالي انهم عزلوا لكن ميعرفش مكانهم فين سالته علي أسمه بالكامل روحت أدور عليه في الفيس لاقيته قعدت الف في الصفحه بتاعته الصور كانت صور مفرحه مدلش ابدا انهم بيعيشوا حياه تعيسه شكلهم اتغير شويه عن اخر مره شوفتهم فيها وانا صغير
فكرت اخش اكلمه وبعدين معرفتش هقوله ايه ،اكيد مش هدخل اقوله انت بتضرب مراتك  انا عرفت من الكرسي كل حاجه   ،انا بتفرج علي الصور لاحظت انهم بيروحوا نادي معين كتير دورت عليه علي النت وجبت عنوانه وروحت ودخلت ادور عليهم ملقتهمش
جيت تاني يوم ولاقيت طنط حنان قاعده ومعاها بنت بتساعدها وبتأكلها فضلت واقف بعيد مش عارف اقولها أن الكرسي قالي ان جوزك بيضربك ولا اعمل ايه ،قررت مرتبش الكلام واروح
-صباح الخير
=المساعده:صباح النور لو حضرتك جاي علشان الانترفيو فده مش انهارده ده يوم الاثنين مع استاذ سمير
-الانترفيو!
=اه المقابله اللي هتعملها مع استاذ سمير يشوف انت تقدر تساعد استاذه حنان ولا لا ،ولا انت مش جاي علشان المقابله
-لالا جاي علشان المقابله طبعا بس انا افتكرت اني هعملها مع طن قصدي استاذه حنان
=لا مع استاذ سمير
-اجي يوم ايه
=يوم الاتنين الساعه عشره
*مشيت وانا مش عارف هعمل ايه في المقابله دي لكن كان في حاجه بتحركني أكبر مني مش فاهم هي ايه وايه اخرة اللي انا بعمله ده  جيه يوم الاثنين وروحت النادي لاقيت ناس كتير بس مش كتير اوي يعني 30شخص بيقدموا قولت في نفسي اني هترفد وش لكن لاحظت أن الشخص بيقعد يتكلم مع عمو سمير صحيح لكن الموافقه من طنط حنان كانت مش بتتكلم لكن بتهز دماغها بالرفض لكل حد يقعد وكان لازم اخليها توافق عليا،استنهزت فرصه ان جوزها بيتكلم في التليفون وقام وقف بعيد قربت بسرعه من الطراييزه وقعدت علي ركبي
-طنط حنان مش فكراني انا احمد جاركوا في الشقه القديمه انا عايز أساعدك
*ملحقتش اكمل لاقيت جوزها واقف ورايا مع نظره غضب*
=انت بتعمل ايه هنا !!!
-انا اسف
*استنيت دوري وكانت قبلها طنط حنان بترفض كله وكان جوزها باين انه زهق وشويه هيتعصب ،جيه دوري سألني شويه أسئله لكن كانت المفاجأه ان طنط حنان هزت راسها بالرفض كان نفسي اقف واقولها لييييييه انا جاي اساعدك واخرجك من المأزق ده ،إنما مشيت وحسيت خلاص كده وأنسى الموضوع ده وكفايه مثاليه وأن لازم في الحياه ظلم واني مش هعدل المايله لكن فات 3ايام واتصلوا عليا مكنتش مصدق نفسي وروحت وفهموني علي كل حاجه  والمفروض أعمل ايه انا كنت مطلوب مني أقعد معاها اساعدها علي الاكل واي حاجه تانيه إنما الحاجات الشخصيه كان ناس تانيه بتعملها وعرفت كمان انها فقدت النطق من الصدمه ولما سالت هي اتشلت من ايه قالوا انها حادثه ،الفيلا كانت حلوة جدا ومتجهزه بكل حاجه حسيت كمان ان جوزها ندم انه كان بيضربها وبيحاول يسعدها ويريحها  او يمكن انا كمان انخدعت بالمظاهر!
فضلت شهر بقعد معاها طول اليوم وامشي علي النوم وطول الوقت ده بحاول تقولي حاجه وفهمتها اني عرفت ان جوزها بيضربها وانه مش طيب كده زي ماهو مبين بس مقولتلهاش ان الكرسي اللي وراني كل ده علشان مستحيل حد يصدقني ،سالتها أساعدك ازاي لكن هي مكنتش بتدي ردة فعل ،بعد الشهر فقدت الامل ،روحت البيت ودخلت اوضتي ولاقتني مقعدتش علي الكرسي العجيب ده من ساعه ما اشتغلت عندهم ،قعدت عليه لاقيت طنط حنان قاعده  بتكتب في كتاب اعتقد انه مذاكرتها وكانت بتعيط وهي بتكتب كانت قريبه مني لكن مش القرب اللي يخليني اشوف الكلام بوضوح لكن لمحت اسم "آدم " وحاولت اشوف اي حاجه معرفتش خالص الكلام كان بخط مش واضح  وانا معرفش أقوم من مكاني للاسف
قمت من علي الكرسي ودخلت أنام وصحيت روحت الفيلا اول سؤال سألته وانا معرفش هلاقي إجابه او حتي هعرفها ازاي وهي مش بتتكلم بس سألته
-مين آدم ؟
*بصت باستغراب وخوف*
=انت عرفت الاسم ده منين؟
-انتي بتقدري تتكلمي ازاي!
‏Menna_elshamy

الكرسي_العجيب